Hezekiah Kumpipa ~ Lian Muan Kim

Hezekiah pen Ahaz leh Abijah tapa hi a,kum 25 a phak in kumpi sep ki pan in kum 29 sung sem hi(2 kings 18:2, 2 chro 29:1). Hezekiah a khiat na in ‘Yahweh ka thahat na hi,’ ahih kei leh ‘Yahweh thahat hi,’ cihna a hi hi.A min zahkhat in Pasian thahat na bek mah tawh a kalsuan den kumpi hoih mahmah khat a hi hi.Hezekiah in kumpi a sep sung in (BC 716-687) biakna lam ultung sak a, gamdang tawh kizop na zong thupisak mahmah hi. Tua a hih man in Israel te thangthu ah Hezekiah zah a gamdang tawh kizop na a thupi sak omlo hi, ci uh hi ( 2 kings 18-20; 2 chro 29-32 ; Isai 36-39).

Hezekiah pen Pasian a zahtak kumpi hoih a tam hetlo lakah khat a hihi.Pasian mai ah thumaan in gamta a, a pa David khekhap zong hoi hetlo – in zuizo a hih man in Pasian pahtak pen khat ozng hong suak hi ( 2kings 18:3). Hezekiah in Topa muang tawntung a hih manin ama mai ahi-a, ama nungah ahi zong in amah banga kumpi hoih omlo hi (18:5-6). Hoih takpi ahihman in Jeremaih bang in phat mahmah hi.(Jer 26: 18-19).Kamsang Micah in Jerusalem kisiat na ding vai a gen ciang in (Mic 3:12), Hezekiah in kiniam khiatna tawh Topa zuah ahih man in Jerusalem khuapi pen tua zawh kum 100 khit ciang in kisusia pan hi.

Ama mai a kumpi sem Ahaz kumpipa pen Pasian mai ah a gina hetlo khat hi a, ama nunga kumpi sem ama tapa Menasseh zong kumpi hoihhet lo khat ahih man in tua tegel kikal a kumpi sep ding pen haksa phadiak khading hi (2kings 16:1-3; 21:2). banghang hiam cih leh asia puah ding haksa a, ahoih siatsak ding baih hi. Pasian theilo kumpi ki-ukna pan in Pasian a zahtak kumpi ki-ukna lamah makaih ahih manin haksatna tampi om ding a, langpan na zong tampi thuak kha ding hi.

Pasian theilo kumpi ki ukna pan Pasian azahtak kumpi ki ukna lamah ki makaih ding cih thadah Pasian theilo ve ve, Ki-ukna hoihlo pan ki-ukna hoih zaw deuh lamah kimakaih ding nangawn haksa mahmah ding hi. Mipi lungsim kisia khin in ginatlohna, zuaukhemna, zulhtatna, golhguk nekna, cihte sung ah a kidiah khinte pen tua mun pan in hong paikhia nuam khollo ding uh a, zong hongpaikhia zo khollo ding uhhi. ahi zong in haksa mahmah tga leh Pasian deihna tawh akituak-akimakaih na lamah kalsuan veve ding pen Pasian hongsap na leh hong deihsak na khat ahihi.

Hezekiah In Siangthona Masak

Makai thak khat a khankhiat nak leh kikhelna khat a om hi pah a, makaipa a hoih leh ahoih lamin kikhel in ahoih kei leh lah a hoihlo lamin kikhelpah hi. kikhelna khat piang limlim ahih manin alungkim om a, a lungkim lo zong om hi. Tua ahihman in buaina tuamtuam piang baih mahmah hi. Leitung thangthu a huamin en le hang gam khatpeuh in buaina ahauhpen hun pen makai kikhel hun hi-a , tua hun pen kumpi/makai langpante a kipat nop pen uh hun zong ahihi. Tua hi-a, Hezekiah in kumpi hong sep ciang in zong kikhelna tamsim sim hong piang hi. Tuate lakah a masa pen in ki siansuahna a hihi.

Hezekiah in Topa biakinnpi, siampite, le levi mite siansuah!

kisiansuah na ong kipat ciang in 1) kumtam simsim a kikhakcip khinsa Topa biakinnpi hong hong masa a, 2) Tua biakinnpi hong puahpha hi; Tua khitciang in 3) Siampite leh levi mite hong kaikhawm a, amau leh amau a kisiansuah nading uh leh Topa Pasian biakinn pi a siansuah na ding un thupia hi. Ni 8 sung vilvel siansuah ngiat uh a, tuakhit ciang in biakpiak na piak hong kipan uh hi(2chro 29:3-19).

Hezekiah in agam, aleitang mahamh zong siansuah! Biakinn leh biakna nasemte asiansuah khit ciang in Pasian tungah biakpiakna tuamtuam hong pia hi. A mipihte mahmah zong biakpiakna neihpih a, Topa mai ah siansuah hi. Biakna makaite a kipan a mipi te azawh khit ciang in a gam, a leitang mah mah zong hong siansuah hi (2 Chro 31:1-21). Bangci bang in agam siansuah hiam cihleh biakna makaite leh mipi tampi tawh ki kopin a gam sunga milim biakna tau khempeuh zong hong susia uh hi. Pasian-a a neihuh milim kitung velvalte leh singkhuam pasian tuamtuam te phuk uh a, satnenin semgawp uh hi.

Judah pan Manasseh gam dongah milim om khempeuh susia uh hi. Moses hun lai a dalgul zong bia uh ahih man in tua zong susia uh hi. Apu a pate un naungek go in a pasiante uh abiakna uh – tua milim pasiante khempeuh zong susia uh hi.Milim bia tampite heh mahmah ding uh hina pi, tuate hehna sangin Pasian hehna lianzaw lua a hihlam thei gige ahihman in kuakua heh ta leh awlmawh lo-in Hezekiah in Pasian deihna bek hongsem hi. Hezekiah insuaksiat a kulte susia a, paih akulte pai hi. Mi a lungkim sak ding siang in Pasian lungkimna lunggulhzaw a, mite hehna sang in Pasian hehna kihta zaw hi.

A galte sangin Pasian kihta zaw ahih man in Pasian maipha mah zon masak-a a nei hihi(2kings 18:4). Tua bangin a nuntak na mah mah tawh Pasian kihtaak ding leh Pasian nasep ding hong lak khia hi.Mihingte mitmuhna ah alauhuaipen mun atun hang in Pasian a belh nakleh a kihtakhuai bangmah omlo ahihna thei hi.Pasian kihta peuh le hang bangdang kihta nawn ding i hihiam?

Hezekiah In Biakpiakna Thupisak

Kumpi khat ahihna tawh sepding thupi tampi tam mahmah ding a, a buaina zong thu leh la tam mah mah ding hi. A hi zong in Hezekiah in Pasian mah zongmasa hi. Pasian tawh kilem ding lunggulh masa a, Pasian tunga biakpiak na piak ding masak zawhi. A gammi te tang dingin mawhsutsak a, mawhna biakpiakna piasak hi (2 chro 29:20- 24).Gan go-a biakpiakna tuamtuam a piak banah Music tuamtuam leh lasakna mahmah tawh zong Pasian bia-in Pasian maipha zong hi (vv. 25-26). Meihalbiakpiakna apiak kawmin Music tuamtuam tumna leh lasakna te zong neisak a, Topa Tunga lungdamkohna biakpiakna, kilem na, biakpiakna, leh dawn biakpiakna tawh khup hi ( vv . 27-36).

Hezekiah In Pasian Hoihna Phawk

Pasian hoihna,Pasian kepna leh makaihna te phawk a hih man in Hezekiah in paisan pawi ong lim bawl sawm mah mah hi.Ulian te mahmah tawh zong kikum uh a,Beersheba pan in Dan dong- Judah leh Israel te kipawl ngiat a Paisan pawi bawl ding ong thukim uh hi (2 Chro 30:1-5). Tua ciang inkamtai te taipah teuteu uh a,Topa kiang ah Israel te khempeuh a ciahkik na ding uh, a pu a pa te uh bang in mawhna bawl in angawngkhauh loh na ding uh, ki sikkik-a Topa a zuat kik na ding uh, milim te bia nawn lo in Topa Pasian bek bia a, ama na bek a sep na ding uh-tua hileh Topa in amau te lainat ding a, ami te anusiat loh ding, cihte tangko uh hi.

Tua bang in khuapi khat khit khuapi khat ah taangko in ataai na uah pawlkhatte in zahpih mahmah uh a, adang pawlkhat te in bel taksan in amawh na te uh kisik kik uh hi.tua ciang in paisan pawi ongkipan uh hi. siampi te leh levi mite ong ki siansuah uh a,Topa biakinn ah ong pai uh hi.Meihal biakpiak na te ong pia uh a,mipi te mawhna zong thuumsak in,mipi te siansuah uh hi.Tangtawng a kipan Pasian ompihna,Egypte te khut sung pan Topa in ahotkhiat na,cih te phawk uh a,Topa zuankik uh hi.Tua kawmkal ah kisiansuah lopi a paisan pawi sa bang a nekha om ahih man in tuate’ mawhna mahmah zong Topa in a maisak na dingin Hezekiah in ngetsakngiat hi(30:6-20).

Makai picing khat a hih man in akhialte taaigawp/daan pia gawp lo in thunget sak zaw hi. A mite khialhna a man tavuan laksak a, a makhialhna bang in Topa tung ah thuumsak hi.Tua bang in paisan pawi abawl na uah ni 7 sung lungdam ki paak in om uh hi.Music tuamtuam tawh lasa in om uh a,Topa phat ziahziah uhhi. Hezekiah in bawngtal 1000 leh tuu 10,000 gosak in, Judah te leh Israel te bek zong hilo,pemta tampi te tawh zong pawi bawl in lungdam ki paak in om uh hi. Tua hi a, Hezekiah in Pasian tungah a lungdamkoh ding mangngilh hetlo hi. Lungdamkoh na ding in aneihsa tampi tak zong piakhia a, kuamah deidan selo-in ne khawmsak hi.A mite khempeuh siansuah a, a nin vevete a dingin thungetsak hi.Kuamah nawlkhin lo-in kuamah pampaih lo a, mi khempeuh tawh Topa hoihna hang in lungdamkhawm thei hi.

Hezekiah In Piakkhiatna Pan

Makai hoih in nahoih sep dinghaksa sa lo a, ;hoih hi, a cih nak leh kua mah dang in asem kei phial zong in sem ngam hi.Piak a kul leh piangam in cil tentan lo hi.Hezekiah in meihal biakpiak na ding in ama neihsa ngiat sung pan tampi pia khia hi.Tua a piakkhiatte pen zing leh nitak meihal biakpiakna ding, Sabbath ni sim-a biakpiak na ding, kha thak leh pawi tuamtuamte-a a gawh dingun kizang hi(2 chro 31:30).Kumpi makai makai ahihna tawh kizui-in piakkhiatna mahmah zong pan a, cianghtak-in pia ahih manin a mipi te in zong citpiakna tawh nungzuih ziahziah uh hi.

Hezekiah In Piakkhiatna Ah Mipite Hanthawn

Makai hoihte in nasep hoih khatpeuh a om ciang in midang te zong kihelsak uh a, pawl zawnin amau kia in un manglo uh hi.midangte zong hantghawnin kihelsak uh a, hamphat na dingte zong amaungah dingbangin ngahsak uh hi.Hezekiah in ama neihsate mahmah cianghtak-in a piak khit ciangin a mite inz ong a piakkhiat ding uh hanthawn hi.siampite leh Levi mite tungah na neihsate uh pia uh. Tua hi leh amaute ahihna khempeuh uh tawh Topa nasem zo dinguh a, Kha an hong vaak zo dinguh hi, ci hi.

Tua bang acih ciang in mipite in buhtang, lenggahzu, sathau, leh khuaizute a kipan lo sung pan-a a ngah peuhpeuh uh- sawm ah khat hong puak ziah ziah uh hi. tua ban ah Judah khuapi te sung a, a teengte in a ganpi gantate uh pan in sawm ah khat hong puak lailai uh ahih manin Topa biakinnpi sung ah siampite leh Levi-te nek ding an leh tui vuum keei hi.Tua ciangin Hezekiah leh makaite in Topa phat uh a, a piakhiate zong paakta mahmah uh hi.

Tua banah biakinn ah an tam semsem ahih man in hoihtak-a a vaan ding leh a kisam banga a hawmkhia dingin makai tuamtuam seh hi (2 chro 31:4-21).Tua hi-a, Hezekiah in amite ahanthot bek hilo-in a panmun ding uh zong hawmsak a,amau mun ciat ah koih dimdiam hi. Pasian a dinga a kipia khempeuh a lomthawt loh na ding leh a dangdal loh na ding in avaan ding makai seh kawi kawi hi.

Hezekiah Gal Lianpen

Hezekiah in kumpi a sepzawh a kum 14-na ciang in Assyria kumpipa Sennacherib hong kuansuk a, Hezekiah ukna nuai-a khuapi muanhuai tampi honglaksak hi. Hezekiah kumpipa in kumpi asepma-in Assyria kumpi Shalmaneser in Judah gamveng teng a nawkgawp khitsa hi-a, tu-in a tapa Sennacherib pen Judah gamngiat a nawkgawp ding leh a la ding in hong kuansak ta a hi hi.

Tua ciang in Hezekiah kigalging pah-a Jerussalem kulhpite lamkik-in tausangte zong phongkik hi. Zumh leh hiam leh kidalna luumte zong tampi bawlsak a, Gihon lui pan Siloam bual dong a kizomsuak ding tuila hi(2 Chro 32:3-4).Koici lak uh hiam cihleh a nawlleh anawl pan in leisung khuat ngiat uh a, a kituah ciang in tuikhahpan uh hi. Jerussalem khuapi a ku-umcih cip phial hangin tui tawh buai nawnlo ding ,cih na ahi hi.

Ahi zongin Hezekiah lau mah mah vee a hihman in kamtai khat sawl a, Ken bang khialna nei -a , hong do sawm mawk na hih hiam? Ciahkik hoh in. Nong nget peuh peuh kong pia ding hi, a cih sak leh Sennacherib in Hezekiah kiang ah Ngun Talent 300 leh kham talent 30 nge hi. Ngun talent 300 pen ton 11 bang hi-a tuhun a ding in $10,000,000 val bang hi ding hi. tam tung mahmah phial ta leh gamkhat leh gamkhat kido loh na ding ahih man in tam lua sam lo hi. Hihzah tawh kilemna bawl thei ding uh a hihman in piaktak lel leh ki lawm hi.

Hezekiah in a piak taktak ciang bel Kumpi neihsa cinglo keei hiding hiven, Biakinnpi pan lak theih teng la-in hawkkhiat theih teng hawkhia hi. Tua ciang in Sennecherib pia hi. Pasian Muang a hihman in gal lel hetlo ding hi napi, Mihing ngaihsut tawmna tawh Hezekiah hong gamtang kha ahih manin kham leh ngun tampi suplawh hi. Pasian maipha azon ziau ding pen Sennecherib maipha zongmasa zawkha ahih man in buailawh hi.Pasian biakinnpi sung nangawn panin kham leh ngun a lakkul mawk hi. Tua hi-a , Mihing ngaihsut tawmna tawh thu leh la khatpeuh i vaihawm leh ei leh ei ki gim lel ding a, kisuplawh zaw in sawtvei zong ki manglo ding hi.

Hezekiah In Sennecherib Mai-Et Zolo

Sennecherib in Hezekiah maivilna kham leh ngun tampi ngah khin hi napi, Lungkim thei tuanlo -Jerusalem ngiat mah la nuam ahih manin galsim ding in hong ki thawi veve hi.Tua ahih manin Hezekiah piaksa teng khempeuh a mawkna suak hi.Tua ciangin Sennecherib in kamtaipa Rabshakeh sawl-in Hezekiah lauthawngsak gawp hi.Bangci sak hiam cihleh, kua muang na hi uh hiam? Galdo dingin thahat kisa mawkmawk na hi uh hiam, bang gelna nei-a ki muang na hi uh hiam?

Egypt kumpipa Pharoah a muang hi dep ve uh cin maw, a kumpi ciangkhut tungah khatpeuh kinga leh kitan lel lo dia. Na Topa Pasian uh a muang na hi uh hia leh? Pasian biakna tau tuamtuam te susia-a biakna tau khat bek tawh nabiakpa uh na Topa Pasian uh a muang nai vua… kei uttawm thu tawh hong paisuk hong sa na hi hiam, Topa hong sawl ahih lam thei lo na hi hiam? Topa in, pai in la, Hih gamsusia in, hong ci hi, cisak hi(2 Kings 18:19-25). Tua ban ah Hamath pasian, Arpad pasiante koi ah om uh ahi hiam?

Sepharviam pasian, Hena pasian, Leh Ivvah pasiante koi ah om uh ahi hiam? Hih a pasiante un Samaria gam ahuu uh hiam?Huu peuhmah lo uh hi.Huu lo uh a hih manin Samaria gam a lakhin zota ka hi hi.Kua pasian in a mite ka khutsung panin honkhia zen zen a hi hiam, Jerusalem zong ka khutsung pan in Topa in bangci hotkhiat ding ahi hiam, cisak – in lausak mah mah hi (18: 34-36) Lau mah lo ding maw, Assyria-te thahat mah mah uh hiven.kua mah kihta lo-in lelh zong neikhol lo uh hi.

Gamkhat khit gamkhat do kawikawi uh a, zo kawikawi uh ahih manin agam uh hong lian semsem hi. A thahat bek uh hilo in gal dodote uh ahihman in galsiam uh a, Galvan zong ki ciang mahmah ahihman in kihtak zong nei lo uh hi. Tuabang in gamkhat khit gamkhat alaklak uh leh Israel gam(saklam gam) nangawn kakhinzo ta uh a, (phaknatna nei galkapmang Naaman hun lai-in Israel pen Assyria khut sung tung khin), Judah gam(khanglam gam) hong tungsuk taktak ta uh hi. Hih zahta- a lauhuai Assyria galkapte Hezekiah in bang ci do ding hiam?

A Kisap Kei Leh Hezekiah Paulo

Hezekiah pen mipil gige khat ahi hi. Assyria Galkapte hong tungsuk keei ta uh-Hezekiah in a cihna ding thei lo; a cihna ding theilo ahih man in paulo ziau lel hi. Asssyria kumpipa in a kamtaipa sawl-in Judah te aphinsak gawpna pen atawmpen thunih om hamtang ding hi:- 1) Judahte laugawpding in Sennecherib khut sungah ki -surrender ding; 2)Hehgawp ding uh in hong kuan khia phengphang ding uh! A heh ua leh gal kisim pah ding; kihta-a a thuum ua leh lah ama nasemte suakding, cih ngaihsut hi kha ding hi.

A hizongin Hezekiah in kamtaipa’ thugen kamkhat beek dawnglo hi. A nautang te inzong adawn loh na ding un thupia ngiat ahihman in kuamah in tua kamtaipa dawng peuhmahlo uh hi (2 Kings 18: 19-36). kuamah pau peuhmah lo uh ahih man in kamtaipa a kilehkik ciangin a gen ding theilo hi. kamtaipa in gending bangmah neilo a hih man in Assyria kumpipa in zong acih na ding thei tuanlo hi. Judahte in Assyria te kihta lua uh a, a paungamlo uh maw, a zahpih lua uh maw , cih zong ki theilo hi. Paulo uh, hi ziau hi.

Tua apauloh ziauna uh pen amau pilna hi-a, Assyria kumpipa lungman na hong suak hi. Pauloh ziauna tawh galveng baih zaw thei a, khantawn buaina ding tampi tawh kipelh theizaw hi. Kamtam kipau leh khialna om hamtang a, Pau ding leh pauloh ding a khen theite mipil hi ( Pro 10:10).Mipil taktak te pau kidawm mahmah uh a, Thungaihsun taktak te om hithiat uh hi, ci hi (17:27). A pau laplapte sangin mihai te nuntak gimnam zaw hi , ci lai hi(29:20).

Mipil khat in bang ci ngei hiam cih leh , Beelhawm agin ngaih hi, ci ziau hi.Sente paunak khat ah, na hehna ip tentan le cin kum 100 na buai na ding tawh na ki pelh hi, ci hi.Tua hi a , Hezekiah apause lohna leh amite zong apause loh na ding uh a hilhna hang in ama pilna kilang a, a nungsang-a buaina ding tampi pan in zong ki pelh hi.Tua ahih manin Assyria kumpipa Sennacherib in galsim ding maw, Khawlkik ding, koici gamtat ding, cih theilo ahih manin tawlkhat sung tuaci omcip man hi.

Assyria -te tangthu ciaptehna ah Jerusalem a umcih hun uh pen BC 701 kum hi a, Sennacherib in Judah kumpipa pen lawh sunga vasa kikhumcip bang in khumcip hi, ci-in ciamteh uh hi. Tua in bang hong lak hiam cih leh Assyria-te in Jerusalem umcih mah hi hi; ahi zong in a umcih bek mah uh hi-a, la zolo uh hi, cih kimu thei hi.Tua banah Sennacherib ciaptehna ah, Judah kumpipa Hezekiah pen hong ki surrender nuam hetlo hi. Galvil na ding a a kibawl giahphual 46 kalaksak a, a kigalgin na kulhtge zong tampik ka suksiat sak khin hi.

A khuano tampi te zongka la khin a, limtak-a zong ka susia khin hi. kulhkongpi a tuangvelval, a khauh mahmahte tawh zong ka galkapte ka kuansak a, akhuapite uh panin numei naupang nupi papi mi 200,150 bang galtai uh hi. Ahizong in Hezekiah hong ki surrender nuam tuanlo ahih man in siahtampi ka kai hi, ci in ciamteh mawk mawk hi. Laisiangtho in Pasian nasepna lamdang te hanga Assyria-te gallehna na ciamteh lo hi leh Assyriap-te bang in amau gallehna ciamteh hetlo se uh hi( Thangthu ciamtehte ngeina hi lel sam e).

Hezekiah In Haksatna Kua Tung Tun?

Assyria kamtaipa Rabshakeh thugen teng Judah makait in a zak khit uh ciang in apuante uh balkek in Hezekiah kiang hong pai uh hi. A cihna ding theilo-in lomet bei dipdep uh hi.Kumpi Hezekiah aw, gal lel ding hita hang, hong kisimgawp ta ding hi; Assyria te sila ding vive hita hang, bangcih peuhmah ding ihi hiam, aci uh ahi hi. nungzuite in acihna ding uh atheihloh uh ciang in makaipa a koh ding mah uh hi a, makaipa in lametna a omkik theih na ding in avaihawm ding a hi hi.Hezekiah in zong a cihna ding thei tuan lo hi.

Makaipa, kumpi ahihman in vai ahawm tei tei kul a, bangcih ding, bang hih ding, hih buaina/launa bangci vensak ding, cih a ngaihsut kul hi. Makaih hoihlote hi leh bel mi khatpeuh tungah a veiteng ap ziau-in amah kipengsak kha mai ding a, ahizong in Hezekiah tua cilo hi. Vaipuak ding khempeuh aman pua a,Tavuan lakding khempeuh zong la pah hi. A puante balkek-in ippi puan silh-a, Kiniamkhiatna tawh Topa hong zuanpah hi(2 Kings 19:1-4).

A haksatnate kuama tungah tun masa lo a, kuamah zong suansawn lo hi.Topa tungah tunngiat hi. A galpa thahat ahih man in tuapa sanga thahat penpa a nungta Pasian ahihi.Suahtak na ding lompi khat nangawn amuh nawnloh laitak-in sim zawhloh zah donga lampi a theilai pa zuanziau hi.A vai teng teng khempeuh Topa ap-in avanggik teng khempeuh Topa Suan hi.

Hezekiah Thungetna

Hezekiah thungetna i etciang in Hezekiah in Pasian thei mahmah ahihna kimu thei hi. A upmawh bangin Pasian zonglo a, a theihna tawh Pasian zong hi. Bangci hiam cih leh, aw,Israel te Topa Pasian, Cherubte kikal-a a teeng pa aw, nang mah bek Pasian na hi hi. Leitung gam khempeuh ah nangmah bekin Pasian na hi hi. Nangmah in vantung leh leitung na bawl hi.16 Topa aw, na bil hong ngat inla hong za in. Topa aw, na mitte hong hak inla hong mu in. Sennacherib in a nungta Pasian hong kosiatna kammalte zong naza in.

Assyria kumpi te in minam tuamtuam te gamtuamtuamte susia mang uh a, a pasiante uh meikhuk sungah khul mangkhin taktak uh hi. tua cih thei lua lel mah un teh! banghang hiam cihleh tua milimte pen pasian hilo uh a, mihing khut tawh abawl uh sing le suang hi lel uh ahihman in a susia mang thei ahi uh hi. tua hih ciang in, tu in, kote Topa Pasian aw, thu kongngen hi. leitunga kumpi gam khempeuh in nangmah bek Topa Pasian nahih lam a theih nading un Assyria kumpipa khut pan in kote hong honkhia in, ci-in thungen hi( 2Kings 19:15-19).

Tua banah Hezekiah in atheihna leh aupna tawh Pasian zonghi. A upna tawh Pasian a zonciang in Pasian pen a pu David tawh thuciamna abawl pa,David kumpi tokhom a beisak ngeilo ding pa, David suan leh khak sung pan kumpi a beisak ngei lo ding pa ahihna thei gige ahih manin Tua David thupha a pia Topa Pasian mah a beel den a hi hi(2 Sam 7:8-16). A vanglian bek hilo-in a citak Pasian, Kamciamna a peel ngeilo Pasian mah beel leng ka kumpi tokhom kho pen ding a, ka thungetna zong hong dawng ding hi,cih upna nei hi( 2 Kings 18:3).

Tua Topa Pasian kamciam pen mihingte ginat na leh ginat lohna tunga kinga hilo-a a kiciampa Pa Pasian tunga kinga ahih manin muanhuai taktak ahihna zong thei hi. Tua hihman in Topa mah beel tentan a, Topa nung azuihna pan pialkhia hetlo-in Topa thupiakte zui hi. Tua hih manin Topa in amah ompih a, a pusuah sungtuamna ah a daupai hi. Topa ompihna a theihban ah Topa in a daupai sak ahih man in Hezekiah in Assyria kumpipa langpan ngam a, Kumpipa’ na peuhmah a semlo ding in khensat ii( 2 Kings 18: 6-7).

Hezekiah In Pasian Zial Leh Tong Thei

Makaih na ah pilciimna leh theihna kisam mah mah hi. Hezekiah in cimawh mah mah laitka in Pasian zia leh tong na theilo hi leh lungkham lum mai ding hi. Ahi zong in Pasian zia leh tong na thei gige ahih man in Pasian mah a gamtangsak zaw ahi hi. Pasian pen kumpi David tawh thuciamna abawl Pasian -tua Pasian in kumpi David tokhom beisak ngeilo ding ahih lam thei lua mahmah ahih manin Hezekiah kumpi tokhom zong bei lo ding ahihna kilang mah mah hi . Tua hihman in Hezekiah in Pasian sungah lungmuan na nei hi( 2 Kings 18;3; 19-34).

Tua banah thu a ngetna ah zong kumpigam khempeuh in Topa Pasian pen amah bek Pasian ahihna a theihna ding uh’ ci ngiat hi( 2 Kings 19:19).A tomin ci leng Topa Pasian minthan na ding, cih hi ngiat mai hi. Pasian minthan na dingin thungen ahih manin a thungetna kidawng hi. Pasian in Israelte ateelna pen hih hang ding hi-Minam khempeuh tungah Pasian min athan na ding! Tua hi-in, Hezekiah in Pasian minthan na ding ngiat mah, ci-in thu anget ciang in a thungetna ki dawng hi. Pasian minthan na ding in thunget nate hong kidawn ciang in ei zong ki sumh tuan hetloh hi hang.

Pasian in ‘minthanna’ teng a deih hi bek-a, hamphat na teng ahih leh ei mah hong pia lel hi. tua hi in, Pasian minthan na dingin na lianpipi ngen le hang Pasian in i thungetnate hong dawng ding a, hamphatna te ei a ding hong hisak ding hi.Makai te in laisiangtho thei-in Pasian zia leh tong thei limlim le hang i buaina leh i lungkhamna tampite hong vengpah ding hi.Pasian deihna tawh kituak-in thu i ngen thei pan ding a, I mite zong Pasian deihna tawh kituak mahin ki makaih thei ding hi. Ei hoihsak bang hilo, ei upmawh thu tawh hilo-in Pasian deihna tawh kituak in lampi maan ah i makaih thei ding hi.

Hezekiah In A Mite Hanthawn

Launa leh dipkuatna tawh a kidim i mite, lamet na a nei nawnlo i mite, koici kalsuan ding cih zong a thei nawnlo i mite a hanthawn ding hi le hang i koicih hanthawn tam? Kammal hoih nono zang in i hanthawn tam? Mihing hihtheihna khatpeuh lak-in i hanthawn tam? Makaite pilna leh siamna, neih leh lam khatpeuh bulphuh-in i hanthawn tam? Hezekiah in a mite Pasian thu tawh hanthawn hi. Na dang khatpeuh tungah a upna/muanna uh a koihloh na ding uh, Pasian tungbek ah a lametna uh a koih na ding un hanthawn hi.

Koici bang in hanthawn hiam cih leh, thahat unla hang un. Assyria kumpipa leh a galkapte hang in lau kei unla lungkia kei un. banghang hiam cih leh amah apanpih te sangin ei hong panpih pa vanglian zaw hi. 8 amah a panpih pen mihing khut hi lel a, ahi zong in ei hong panpih ding leh gal hong dosak ding pen Topa i Pasian a hi hi, ci hi.tua ciang in Judah kumpipa Hezekiah thugente hangin mipite lungmuang uh hi, ci hi( 2 Chro 32: 7-8).Hih bangin Hezekiah in amite a hanthot hangin amah a laulo hilo hi.

Laupi pi mah, ama launa sangin Pasian a muanna a lianzaw hi bek hi. Pasian upna tawh Pasian min mah paulam in a mite hanthawn ahih manin ama hanthotna hangin lungmuanna ngah takpi uh hi. Tua ahihman in mihing mitmuhna tawh Hezekiah pen muanhuai lua khol ta keileh ama zung azuih suaksuak ding uh haksa salo uh hi. Ama hanthotna pen amite a dingin thaza, han na, Lawpna, khamuanna, leh lungmuanna suak a hih man in a galpa uh bangzah ta-in thahat mah ta leh kihta nawnlo uh hi.

Hezekiah Galzawhna

Hezekiah galzawhna mun pen galphual hilo hi. Pasian mai a thungetna tawh gal a zo hi zaw hi. Galvan leh galhiam tawh galdo lo a, a khuuk tawh galdo zaw hi. Itna tawh a kidim vantung kumpipa maiah a va khuukdin leh gitlohna tawh a kidim Assyria kumpipa mai ah khuukdin kul nawnlohi. Thahatna tawh galdo lo a, kiniamkhiatna tawh galdo zaw hi. Mihing tha tawh galdo lo a, Khasiangtho tha tawh galdo zaw hi.

Pasian mai ah kiniamkhiatna tawh apuan balkeek ahih manin ama kumpigam ki balkeek nawnlo hi(saul kumpipa kiphasak ahih manin a kumpigam ki balkeeksak hi). Assyria kumpi Shalmaneser (272-722 BC) nung a zuih sangin Pasian nung zui in Pasian bek mah pom tentan zaw hi. Tua ahih manin Topa in amah ompih a, a sep peuhpeuh ah gualzawhna pia ahih manin Assyria kumpi Shamaneser nangawn zo a, Philistine-te zong zo gawpin Gaza dong la zo hi.

Tua zawh kum 10 khawng khit ciang in Assyria kumpi Sennacherib tawh hong khangkhia a, Hezekiah tawh a kido ding in hong om leuleu uh hi. Sennacherib thahat in kihtak huai mahmah ta leh Hezekiah in Pasian bek mah hong mai-et hi. Assyria kumpipa mai-a a pai sang in Kumpite kumpipa mai ah a va pai leh na baihzaw a,zong na nuam zaw hi. Itna tawh a kidim Pasian mai ah a va din leh zumh leh hiam mai ah tai kul nawnlo hi. Khua-ul sisan tampi tawh gal a dong ding sang in gamdaih na mun ah Pasian tawh hun la khawm ahih manin gualzawh na vuicing zaw ngah hi( 2 Kings 19:1). thunget na tawh galdo ahih manin a sep ding taktak teng Pasian in sepsak ziau hi. Pasian in sepsak ahih manin mihing ngaihsut theih/ngam loh zah dong in gualzawh na ngah hi.

Gualzawhna Taktak Pasian Kiangpan

Mi i muan ding sangin Pasian muan ding hoih zaw a, galvan tampi i neihsang in upna i neih ding thupi zaw hi. Upna lo tawh i kimuanna (galkap te), i cidam thahatna, leh i pilnate guaksuak lel dinga, upna tawh a kalsuante ahih leh guaksuak ngeilo ding uh hi. I mailam hun khempeuh a khensat pen Pasian ahih man in ama khut sungah kinga hithiat lelni!

Hezekiah in na dang khempeuh sangin Pasian muangzaw a, a vaikhempeuh Topa a ap ciang in Pasian in Hezekiah kiangah, na galpa ama namsau tawh ka puksak ding hi, ci ziau hi(2 Kings 19:7). A cihmah bangin hihtakpi hi. Tua bang Pasian muantaak taktak sa ing. Topa tungah na vaiteng ap in. Amah muangin . Amah in hong sem ding hi, ci- a hoong kamciam mangngilh kei ni(PS 37:5). Tua banah Pasian bangci lai hiam cihleh kei leh kei ka kikhualna leh ka nasempa David ka cihna-in Jerusalem khuapi ka huu ding hi, ci lai hi( 2 Kings 19:34).

Tua ciangin Pasian in a vantungmi khat sawl a zankhat thu in Assyria galkap 185,000 thatsak hi. A kumpipa uh bel tawl khat sung suakta sam hi napi, tua zawh kum 20 khit, khat vei, Nineveh khua ah a pasian Nisrok bia-a a mai ah a kunlaitak-in ama tate ngiat ahi Adrammalek leh Sharezer in suamlum ziau uh hi( 19: 35-37). Sennacherib in Hezekiah kiangah na Pasian in hong huun zo kei lua in teh, ci-a a zahpih mahmah hi na pi (19:10-13), a taktak-in ama pasian Nisrok in a biakinn sung tektek ah amah a huu zolo na hizaw gige hi.

Tua hi-a, Hih Hezekiah leh Assyria te kidona i et ciang in kumpi khat leh khat, galkapte leh galkapte a kido uh hilo zaw a, Israelte Pasian leh Assyria te pasian a kido uh hong himai hi. Kua pasian in Israel Pasian zo ngei ding ahi hiam? I biak Pasian ei lamah hong pan khit nung sang, kua in hong langpan zo ding uh a hi hiam(Rom 8:31). Hih thu tawh kisai Joshepus in a genna ah bel Assyria galkapte in meimatum vei mang uh ahihman in galphual pan a ciahkik uh ahi hi, ci hi (Ant 10:2-5).

Herodotus in bel, Assyria-te giahphual ah zusa tamlua mahmah a, a thalkhau te uh, a saili kuangte uh, leh a lum tawina savunte uh neksak mang uh ahih manin galvan nei nawnlo uh hi. tua kawmkal ah Babylon gamah ciahkik loh phamawh hi, ci hi (Bk 1, 1421). Hih bangte pen Pasian umlote muhna hi lel a, a sungah Pasian in a lamdang tak-a nasem hih lam a theih khak loh man uh maw, a up noploh man uh maw- thu tuam tuam hanga hih banga a gelh uh hi lel hi. Tua-hi a, LST gen mah bang in Pasian in a lamdang tak- a na a sepna tawh gualzawh na a pia a hi hi.

Hezekiah Kum 15 Kiletsong

Hezekiah in kumpi asep in kum 25 phapan hi. Ahi zongin kum 40 a phakma in, khat vei, sihzah dong dingin cina hi. Lupna tung ngakin gim mahmah-a a om laitak kamsangpa Isaiah hong pai hi. Gim mahmah-a a om laitak kamsangpa pai ahih manin nuam mah mah kha ding hi. Kamsang lianpen khat hi lai! kamsangpa in zong damsak pah thei kei phial zong in thu hong ngetsak leh ka dam ding hi, cih upna nei lua ding hi.

Ei zong i cinat ciangin i muan mahmah biakna siate khatpeuh in hong veh le uh nuam mah mah hi hang. Amau thu-a hong veh pak kei phial uh leh zong inn ah i sam-a thu i ngensak hi.Pasian nasem, i cihte uh ahih man in thu hongngetsak ding uh pen i lamen mah mah hi. Tua mah bangin Kumpi Hezekiah inzong kamsang Isaiah a pai ciang in lametna tampi nei kha ding hi.

Ahi zongin a lamet bang hi hetlo ho.Isaiah in thu a ngetsak ding cih thadah Hezekiah kiangah, na si ding hi.Nungta lo ding na hih manin na innsung vai hoihtak hawm in, ci-in ciahsan kik pah ziau hi( 2 Kings 20:1). Cina gim mahmah khat kiangah na si ding hi, va cih zong acipa a ding in lah nuam ken teh, a cinapa a dingin zong nuam kei zaw lai in teh! Mimawkmawk khat ih cih hilo lai, Pasian kamsangpa cih hi lai lai!

Hezekiah aw, na si ding hi, a kicih in Hezekiah kum 40 pha nailo hi. Kumpi a sepzawh lah sawt lua nai hetlo; lah khanglai mah mah. Nasep haksa teng a zokhin panpan, a gam zong nuam a sa dinga kipan pan hi lai ahih manin sinuam nai het lo hi.Tua hih manin kawm lam nga-in thu hong ngen pah hi. Kap ngekngek kawm sa-in thungen -a Topa aw, Hong ngaihsun dih in. Hong phawk dih in. Na mai ah thumaan na tawh ka nungta a, na tungah citak-in na muhna ah nahoih bek kasem hi, ci hi.

Hezekiah in Topa aw, na muhna ah a hoihin ka gamta hi, ci ngam hi. Mite’ muhna ah, ci hetlo hi. Pasian muhna ah ahoihin ka gamta hi, ci-in Pasian tungah ci ngak ek hi.Mi muhna ah zong a hoih-a gamta hihman in ki neih hetlo ahihna ,Pasian zahtak taktak ahihna,makai citak ahihna kimu thei hi. Makai hoih in mimai-a a gamta zia leh Pasian mai-a a gamtat zia ki lamdang sak lo hi.

Tua bangin thungen ahih manin Pasian in Isaiah sawlkik hi. Isaiah pen tualaitak in kumpipa huang sungah omlai hi.Hezekiah kiangah Isaiah in bang hong ci hiam cihleh Pasian in na thungetna hong za-in na khitui te hong mu hi. Hong damsak pelmawh ding a, tu zawh nithum khit ciang in Topa biakinn ah na kikhawm zo ding hi. Kum 15 hong nungta sak beh ding a, Assyria kumpipa khut sung panin hong honkhia ding hi. Ama min leh a nasempa Daivd acihna in hih Jerusalem khuapi zong hong hu ding hi, ci hi( 2 Kings 20:5-6).

Tua hi a, Hezekiah pen kum 15 ki letsong hi. Kiletsong cih ciangin angahloh ding pi angah hi masa lo-a, kum 15 nungta lai ding ahihna Pasian in a theisak ahi hi. Kum 15 bek nungta lai ding ahih man in a innsung vai hawm hen, aci ahi hi.

Hezekiah Thanem Nate

Zeisu longal mihing kicing i om kei a, paubaanna neilo taktak makai zong i om kei hi. Mihing mah uh ahih manin makai hoihte zong thanemna nei uh a, Khialhna tuamtuam leh ki cinlahna tuamtuam zong nei uh hi. Hezekiah zong kumpi hoih pen khat, Pasian pahtak pen khat ahih hangin thanemna pawlkhat mah na nei ve ve hi.

1) Hezekiah in Pasian muanglah: Pasian kamsangpa Isaiah tungtawn in Hezekiah dam ding, nithum khit ciangin kikhawm zo ding acih hi napi Hezekiah in umlah tei tei hi.Topa aw, hong damsak takpi ding na hih leh, nithum khit ciang in kikhawm zo takpi ding ka hih leh ‘lim'(‘sign’) khat hong lak in, ci hi. Tua ciang in Isaiah in Pasian in agen bangin hong damsak takpi ding ahih manin ‘lim’ khat hong lak ding hi: Ni liim degree 10 Mapai leh ut maw, Deree 10 nungkik zazw leh ut, ci-in dong hi. Tua ciang in Hezekiah in degree 10 a mapai ding pen lamdang lua khol kei; degree 10 hong nungkik sak in, ci hi.

Tua ciang in Isaiah in thungen a, Topa in a thungetna dawng pah hi. Ni liim degree 10 nungkiksak hi.Pasian cih bangin muang ziau leh na lamdang ngetnget kul se lo ding hi. LST sungah na lamdang tampi te pen Pasian a muanzawh loh hang ua piang a hi hi. Gtn: Gideon in Pasian muanglah ahih manin na lamdang pawlkhat na ngen pahpah hi.Pharisee-te in zong Zeisu umlo uh ahih manin na lamdang na kal uh a, ahi zong in Zeisu in na laklo lel hi. Pasian tungah na lomdang i kalh leh i upna neu lai ahih zawkna phawkni.

LST in hong gen bangbang umsuk ziau le hang na lamdang kalhkalh kulnawn lo a, upna ah i picing zaw semsem ding hi. Na lamdang a kalphot te in kalden uh a, na lamdang lamen den uh ahih manin Pasian a muanzah dingun muang zolo uh hi.Na lamdang mah kal tawntung uh ahih manin upna tawh a kalsuan hi nawnlo uh a, muhna tawh a kalsuan hong suakta uh hi. Ei Pasian tate pen Paul gen mah bangin Muh na tawh hilo-a upna tawh a kalsuante i hihi (2 Korin 5:7). Banghang hiam cihleh mulo pi-a upna ah thupha om zaw a, Pasian lungdamna ki cing zaw hi( John 20:29).

2) A hauhna tung ah a lungmuan na ki nga: Hezekiah in Babylon pan-a hong pai taangmipa ahi Marduk-Baladan tungah aneihsa ngun koihna, a vanmanpha koihna khempeuh a vek-in lak hi. Ka neihlian pen Pasian hi, acih ding sangin ka gamh ka go pen hih hauhna teng hi, a ci hi gige hi. Isaiah in Hezekiah kiangah, tua Marduk-Baladan kiangah bang teng lak na hi hiam, a cih ciang in Hezekiah in, Ka neihsa khempeuh ka lah loh omlo hi, ci hi. Hezekiah in aneihsa teng tawh a kisial mah mah ahi hi)2 Kings 20:12-15).

Pasian a muan ding sangin a neih le lamteng muang zaw kha a, Pasian a neihna hang a ki sialh ding sangin a hauhna teng tawh kisial zaw hi. Tua ahih manin Pasian in Hezekiah kiangah, na inn sunga hauhna khempeuh, na pu na pa’ kholsa khempeuh, Babylon gamah ki paipih mang ding a, bangmah cian nawn vet lo ding hi. Na tu natate zong sal-in kai ding uh a, Kumpipa inn sungah nasem ding in kiget ding uh hi, ci hi( 2 King 20: 16-18) I kimuanna pen Pasian ahih kei leh piangthak makai hoihlo ihihna kilang pah hi. Thu i ip theih kei le zong makai hoih i suak kei ding a, Gimna tampi in hong nungzuih zaw lai ding hi.

3) A tapa pantah lo: Hezekiah in innsung vai hawmding sangin gamvai hawmnuam zaw hi. Jerusalem khuapi a ding in bual khat bawlsak a, khua pua lampan in lei sung ah leilet to-in tuilak sak a, Jerusalem khuapi bangmah a kisamlo dingin vaihawm hi( 2 Kings 20:20). Ahi zongin a innsung vai hawm hetlo citciat hi.Hezekiah in a innsung vai ding hawm taktak hi leh a tapa Manasseh kumpi hoihlo pen khat suak hetlo ding hi. Pasian in Hezekiah kiangah na innsung vai hawm in, na si ding hi, a cih-in a tapa Manasseh pen kum 7 khawng pha pan ding hi. Manasseh kum 7 pha ta hi na pi, Ki pantah mel lo hi ding hi ven Pasian in Hezekiah kiangah na innsung vai hawm in, a ci hi ngel hi. Manasseh kum 12 a phak ciangin a pa Hezekiah in kumpi-in koih a, amah tawh kum 10 sung khawng mangkhawm uh hi. Tua khit ciang in Hezekiah si a, Manasseh kia in Judah gamhong uk hi.

Hezekiah pen kumpi hoihpen khat, Pasian pahtak pen khat ahih manin a tapa Manasseh ahih leh kumpi hoihlo pen khat hong suakhi:-1) Manasseh in apa suksiat milim biakna taute hong bawlkik a, 2) Baal pasian biakna taute hong lamkik hi; 3) Asareth nusian biakna taute zong hong phongkik a, 4) vantunga om khempeuh bia-in 5) tuate’ na sem hi; 6) Topa innsung na ngawn ah milim biakna taute lam a, 7) Topa innsung siangthomun nangawn ah nikha aksite a biakna ding in biakna tau lam hi;8) A tapa khat zong meihal biakpiakna-in zang a (Judahte thangthu ah a tapa tawh meihal biakpiakna a nei kumpi nih bek om hi: Ahaz leh Manasseh),9) Mailam thugenkhol thei te thu dong in ,) Dawisate, 11) Dawilawm neite leh aisan theite thu dong ahih manin Pasian hehsak a, Topa mai ah siatna tampi bawl lai hi; 12) Topa in David leh solomon tungah hih Jerusalem khua-a ka innsung-hih lai mun tektek ah kamin ka thangsak tawntung ding hi, acihna mun tektek ah Asherah nusiam milim koih sawn sawn hi; 13)Pasian theilo minam sangin Manasseh makaihna tawh Judah te tatsia zaw uh a, Pasian thukhenna a thuak minamdangte sangin zong muhdah huai zaw lai uh hi( 2 Kings 21: 1-11).

Hih zahta-a a sia Manasseh pen kum 7 a phak dong Hezekiah in pantah mel lo hi ding hi ven, Pasian in Thupia-in na innsung vai hawm in, a ci ahi hi. Hezekiah in kum 15 bek neilai a hih lam thei ahih manin a tapa tawh kumn10 sung mangkhawm uh hi. A tapa pen kumpi-a a ki koih loh ding lau lua hi ding hi ven , kum 12 khawng pha panpan na pi, amah tawh kum 10 sung bang a mangkhawm ding in bawl samsam hi. Pasian thu leh la a pattah ding kimlai, a kumpi hihna a taan loh na ding in pantah zaw kha hi. Pasian in, na innsung vai hawm in, a cih pen khathu ah a innkuan hoihtak bawl pha ding, ‘ready’ sak ding, a cih hi na pi’n , Hezekiah in ci le sa thu bek na enkha ahih manin neu lai mah mah napi Manasseh kumpi a na semsak keei, ci le sa thubek ah a pantah keei ahi hi.Tua ahih manin Manasseh pen hihzah ta a hoihlo kumpi khat hong suak a hi hi.

4)Hezekiah thuakding daan. Hezekiah acidam ta cih a zak ciangin Babylon kumpipa in a nasempa Marduk-Baladan tung tawnin Hezekiah letsong puaksak hi. A taktak in letsong puak ngiat-a pai hi masa lo a, lawm/pawlpih zong a pai ahi hi. Babylon kumpipa in Assyria kumpipa do nuam a hihman a pawlpih a zong kawmkawm a hi hi. Tua banga hong pai pen Hezekiah in na limbawl lua mahmah hi.Judah gampen gam neu khat ahih hang in thuneu tuan lo hi, cih a lahnopna-in a neihsa teng, a kham a ngun teng, a pak namtui manpha teng, a galvan teng, — a vek in lak ziah ziah.Mi mawkmawk theih loh ding a ki koih khempeuh zong lakmang a, a lahloh khat zongom lo hi.

Isaiah in Hezekiah kiangah, na lengla te in bang gen uh hiam, koi pana hong pai hi ung , ci uh hiam, a cih ciang in Hezekiah in, Babylon gampek pana hong pai uh hi, ci hi. Isaiah in, na inn sungah bang teng mu uh hiam, acih ciang in Hezekiah in, ka innsunga om khempeuh mu uh hi. Ka van manpha khempeuh a muhloh uh omkei, ci-in dawngkik hi. Tua ciang in Isaiah in Hezekiah kiangah, na inn sunga na neihsa khempeuh, na pu na pate kholsa khempeuh, khat zong kisit lo ding a Babylon ah ki paipih ding hi. Na tu nata te zong sal-in kai ding uh a, kumpi inn sung a nasem dingin kiget ding uh hi,ci hi(2 Kings 20:12-19).

Sihna sang in kiget ding cih pen a utloh zawk uh hi a, a tu a tate kiget ding cih pen suan leh khak nei nawnlo ding , a khang uh mang ding, cihna hi pah ahihman in hamsiat na lak ah a utloh pen khat uh a hi hi. Ahi zong in Hezekiah in tua hamsiatna a ngahkha a hi hi. Pasian a muan ding sangin a neihsate a muanzawkna leh thusim im theilo-a a vek-a a genkhiatna hang in hih banga hamsiatna thuak a hi hi. Tua banah, a innsung vai a hawmloh na hang in zong hamsiatna a ngah a hi hi.

Hezekiah Sihna

Hezekiah in BC 715 pan in 686 kum dong Judah gam uk a, Kum 29 sung uk hi. Amah kia in kum 20 sung uk a, a tapa Manasseh tawh kum 9 sung uk khawm uh hi. (BC 695-686). Ama uksung in kamsang Isaiah leh Micah-te in Judah gamah Pasian nasem uh a(Isaiah 1:1; 37:21; Mic 1:1), ama a ding in Pasian thu tampi tun uh hi. Hezekiah a sih ciangin David tate kivuina han tungnung ah kivui a, Judah mi khempeuh leh Jerusalem khuami khempeuh in pahtawi uh hi( 2 Chro 32: 32-33).

Hezekiah thunget na zah a thungetna minthang tamlo a, ama thungetna bang thungetna ki dawng pah zong tamlo hi. Ama hangin cikmah hun-a om ngeilo leh cikmah hun-a om ngei nawnlo ding na lamdangte ki mu thei hi. Gtn: Ni liim leh om! A pa Ahaz pen kumpi hoihlo pen khat hi in a tapa Manasseh zongkumpi hoihlo pen khat a hi hi. Judah kumpite thangthu ah a tapate uh meihal biakpiakna ding a a pia zong hih kumpi tegel bek mah hi a, Hezekiah pen hih kumpi hoihlo pen tegel kikal-a kumpi siem ahih man in ama a ding in haksa phadiak ding hi. Ahi zong in Khasiangtho thamah tawh gualzawhna ngah a, a thanem nate hanga Pasian Thukhenna te zong ama khan sung in thuak kha lo hi.

Dr. Lian Muan Kim