Ref: whiteestate.org
Zo Phualva Thupuak: Vol 09, Issue 06
ELLEN G WHITE LE LAI SIANGTHO
Zo Phualva Thupuak Vol 09, Issue 06, Sep 2019
Paul in Ephet 4:11,12 sungah “Tua hi a, amah in mi pawlkhatte sawltak ding, mi pawlkhatte kamsang a thu a hilh ding, mi pawlkhatte lungdamna thu a tangko ding, mi pawlkhatte pawlpi sia le thuhilh sia dingin a suaksak hi. Pasian na a sep theih nadingun misiangthote kigingkholsak in Khazih pumpi a lamkip theih nading uh ahi hi” ci in na gen hi. (Thuciam Thak: Zokam Standard Version, Bibles International, 2014). Mihon tawh na asepkhop kum 70 sungin Ellen G White in lai tampi gelh a, a diakin cidamna tawh kisai te bang leitung pilna in tu hun ciangin kipsakna te pulaak zel uh hi.
E. G. White in ama laigelhte pen Lai Siangtho behlap nading hilo a, “khuavak lianzaw ah mite lam alak dingin khuavak neuzaw kipia hi” ci-in amahmah in gen hi. (Review and Herald, Jan 20, 1903). Mrs. White laigelhte in Lai Siangtho tawh kikim lo a, Lai Siangtho taanga zat ding zong hilo hi. Lai Siangtho pen “thunei pen le Pasian deihna hong lak a khial theilo kilaakna hi” ci in na gen hi. The Great Controversy, p. vii.
E G White gelh laibu te lakpan in Zokam tawh Christ Kiang Zautna (Steps to Christ), Tatkhiatna Tangthu (The Sory of Redemption), Kumkikna Lamen Innkuan (Adventist Home), Pawlpi Thu Lamlak (1 & 2), Tuan Pupa le Kamsangte (Patriarchs and Prophets), Khangcin Lunggulh (Desire of Ages), Kidona Lianpi (The Great Controversy) cihte kinei khin hi. Mizo lai a siamte ading in simtehih ding tampi om khin zo hi.
TITHE LE CHRISTIAN-TE
Tithe cih kammal pen Mikang lai hi a, Zokam in Sawm-a- khat (1/10) ahk Sehsuah kici hi. Ih ngah khempeuh lakah sawm ciangin khat cihna hi a, 100 ciangin 10 ahi hi. Gtn in kha khat sum lut 1000/- a ngahte adingin sehsuah pen 100 ahi hi.
A Bul Koi pan
Sinai Ma-in Om khin:
Tithe piakna tawh kisai Lai Siangtho sungah a bulcin en leng Israel (Jacob ta 12te suante) cih kammal a omma in upna pupi ahi Abraham in Cannan khuapi-a a teng, Yahweh abia Salem kumpipa Melchizedek (Piancilna 14:18-20; Heb. 7:2,6) tungah na pia khin zo hi. Abraham in a neih khempeuh lak panin sawm-a-khat pia hi ci in kiciamteh hi. Tua ahih manin hih Sehsuah piakna pen Judah le Israel te ading bek hilo hi cih kimu thei hi.
Lai Siangtho Thak Hunah Tithe:
Zeisu in Matt. 23:23 le Luke 11:42 sungah Tithe piakna pen thukimpih in pompih hi cih kitel hi. (Leiland Wilson, “The Old Testament and Tithe,” Baker’s Dictionary of Practical Theology (Grand Rapids, MI: Baker, 1967), p. 357. A kineihkhem thukham hilh siate le Pharise te in 1/10 piakna ah citak mahmah napi in, a lungsim sungah thumanna le itna omlo (Luke 11:42) ahih manin Zeisu in taai hi. Tua 1/10 na piakna uh tawh kisial pah lanlan kei unla, thumanna le cihtakna na behlap un ci in a hilh ahi hi.
Mate Lai Siangtho pen Zeisu van ah a kahtoh khit sawtpek ciangin Jews Christiante adingin aki gelh hi. Tua hi a, Tithe beisakna hi zawlo in, kipsakna hizaw hi. Alang khatah, Lungdamna thubu Luke pen Gentile te ading a kigelh hi a, Tithe piak ding hanthotna ahi hi. (I. Howard Marshall, The Gospel of Luke: a Commentary on the Greek Text (Grand Rapids, MI: Eerdmans, 1978), p. 498). Mate le Luke ih simna tungtawn in Christian te in pawlpi panpih nadingin Zeisu gen sehsuah piakna honghilh hi. Zeisu in a nungzuite kiangah Lai Siangtho lui huna Tithe piakna kipsak kik hi. Judahte in ngeina khat in Tithe kaikhawm in a pia hilo a, Pasian ngetna a picing sak uh hi zaw hi.
Paul ii Genna:
Lungdamna thu tangkona ah a kipiakhia mite panpih ding thupi hi cih Paul ini hong hilh hi. 1 Cor. 9:13 sungah Paul in Lai Siangtho hunlai a biakbuk sunga nasem dinga kipumpiakte panpihna thu a gen ahi hi. Tua panpihna pen Tithe le citpiakna sumpi pawlkhat (Gamlak. 18:8-24) tawh kisem hi. Siampite le Levi minamte leh tawntung lungdamna thu a tangkote kibang hi cih gen hi. Lungdamna thu a tangkote Lai Siangtho lui hunlai ate bangin panpih ding kilawm hi aci ahi hi.
Lai Siangtho thak sungah Tithe nilkhiatna thu omlo in kipsakna kimu zaw hi. A diakin Hebia 7:1-10 sungah Abraham in Melchizedek tungah sehsuah na pia hi cih in hong telgen hi. Zeisu hong sihna in Tithe piakna le Pasian nasemte panpihna thu beisak lo a, ama sih zawh van a kah khit pek a kigelh laibute ah kiciamteh hi.
Sawm-a-Khat Kholna Biakinn
Lai Siangtho lui hunin Levi te in Sehsuah pen koi bangin kaikhawm in, koi bangin hawmkhia kik uh hiam cih ih theih ding kisam hi. Mal. 3:10 sung ih et ciangin, “Ka biakinn ah an a om theih nadingin…” ci hi. A kammal bul Hebrews ah ‘bayith’ hi a, “inn, biakinn, kumpi inn” cih khiatna nei hi. Bayith pen Lai Siangtho lui sungah Topa’ inn cihna in kitam zat mahmah hi. Mite in a sawm-a-khatte uh Paisian ading a aseh uh mun siangtho ah hongpaipih uh hi ci in Thkna 12:5,6 ah kigelh hi.
Tithe Kaihkhopdan le Hawmkhiatdan:
2 Khang 31:5-12 ih et ciangin kumpi Ahaz in Topa lampi pan pialin Israel mite in Ama’ kiangpan a taikhiat uh ciangin biakinnpi kikhakcip hi. Puahpha p[a Kumpi Hezekiah hong kah ciangin biakinn pi kihong kik a, a sehsuahte uh le a sumpite uh biakinn ah hongpaipih dingin tangkosak hi. Tithe a sang dingin Levi mi nih kiseh uh hi.
Tua tithe te a hawm khia dingin Levi mi khat le midang gukte kiseh hi. A nampih uh siampite, uham pan a naupang dongin a kikim in hawm uh hi. Tua banah Topa biakinn sungah lutin amau sep theih ciat a sem, khang ciamtehna sunga kiciam the kum thum tungsiah pasal peuhmah in a ngah uh hi. (2 Khang. 31:15, 16).
Biakinn ah Paipihna:
Lai Siangtho in ih kaihkhop ding dan le ih hawm ding dan kician takin hong genlo hi. Himah taleh, paidan khat na om khin hi. Amasa pen in, kholna khat om a, kaikhawm in, tua panin kikhawm khia kik hi. A nihna ah, a kaikhawm ding le a hawmkhia ding mi kisehtuam uh hi. Kuamah in tua dinmun ading kilawm ing ci tawm lo uh hi. A thumna ah, Pasian in a sehsa angah ding mite tung bekah kipia hi. Israel mite kiang panin Tithe la dingin amah le amah kiseh tawm lo uh hi.
1/10 pen Topa biakinn aa nasemte le Lungdamna thu tangkote adingin kikaikhawm a, a kaihkhop dan le a zeekdan ding thukhun kinei dimdiam hi. Sehsuah pen Pasian neihsa (Mal. 3:8-10) ahih manin guta ih suak loh nading in biakinn ah puak in, a kilawm a kituak bangin kizeek ta hen. Ref: Angel Manuel Rodríguez gelh “Tithing in the New Testament and Christian” pan kilasawn hi.
Mi Thatsim Mehza
Nidang ih pu ih pate’n mehteh mehgah, nek leh dawnte-ah khah tuamtuam nei selo-in na ne-uh aa, cidam in khansau uh hi. Tuhun ciang mehza kihello meh limlo-in kingaihsun mawk hi.
Mehza (Ajinomoto) sungah pumpi hong susia thei dat tuamtuam kihel hi ci’n kimukhia hi.
Mehza mehna hangin a nuai aa natnate kingah thei hi.
- Haihut natna (ပန်းနာရင်ကြပ် ရောဂါ)
- Cithak in vun phualsak
- Dip nasak
- Sikhang natna
- Lungtang natna
- Lungtang kinawhsaisak
- Lungsim liinglawng/Lungsim palangsak
- Ci bawksak/ci phawmsak. (Ref: Sm Vung Hau Lun, Mikim’ Cidamna, p. 12.)