Zukhamden Nulepate Kikheel

Talitha Hoyato, 19

Papua New Guinea, July 6

Talitha’ nulepate pen zuu leh kikhap-kimawl a-uuk nupate, ci-in Papua New Guinea gam, mualtung khuapi khat ahi, Goroka khua sungah minthang mahmah uh hi.

A nupa-un zuudawn leh kimawl in thapaai den uh ahih manin inn-a, amahguak a nusiat den uh, kum 8 a pha pan, a tanu uh mangngilh pahpah uh hi. Tua hang mah in a vengnu un tanu bangin a kep dingin a nget ciangin zong phamawh sa se lo in phal ziau uh hi.

A vengnu un numeino Talitha a inn ah ciah pih in, “Nu aw” kicisak hi.

Zingsang tungin, a Nu in nai 5 a khuang dingin, a koih naipi hong gin ciangin Talitha hong khanglo hi. Lupna tung panin a nu thokhia suk a, khukdin suk in, nakpi tak-a, gingkhia-in Pasian tawh a kiho a mu hi. A nu in Talitha’ min zongh Pasian’ mai-ah a pulaak hi. Tua khit ciangin a nu in Laibu kawm-vom khat hongg in a sim hi.

A zingsang kik ciangin zong, nai 5 mah iin, nai khuang in Talitha phawng leuleu hi. A nu in thu ngen in, Lai a sim leuleu laitak Talitha in en giugiau hi. Tua ni khit lam ciangin nupite honkhat va hawh in, amaute’ mimal buainate tawh kisai, Talitha’ nu’ kiang panin ngaihsutna hoih hong ngen uh hi. A nu in zong amaute tawh thu ngenkhawm in, tua Laibu Vom tungtawnin ngaihsutna manpha amaute’ tungah a pia hi. Tua Laibu Vom pen Lai Siangtho ahihlam Talitha in nungtheih kik hi.

Talitha in a nu’ hih bangbang hong ciing ta hi. Nai khuan hong tawp ciangin amah zong hong khuukdin suk in, thu a ngen hi. Lai Siangtho sim hi. Lai Siangtho sung-a, amuh thak thute midangte’ tungah a hopsawn nadingin a nu in hilh hi. Tua bangin Talitha in thungen in, Lai Siangtho  sim in mite’ tungah a hopsawn ciangin Pasian in a dawn lam a ki thei hi. Amah in Pasian um hi.

Kum hong bei toto in, Talitha zong hong gol toto ta hi. Kum 17 a phak ciangin tui kiphum hi.

A kituiphum zawh a sawt lo in, a nu in, a pianna nulepate’ kiangah a ciahkik dingin sawl hi.

“Na cih tak pi maw nu?” ci-in kap kawmin Talitha in, “Ka ciah kik ding hong deih takpi maw nu” ci kik kik hi.

Khitui naptui tawh kidim kawmin, a nu in haksaa sapipi a, a khensatna kipsak ta hi.

“Jesu pen nangma’ aituam Honpa in saang khinta nahih manin, na nulepate’ kiangah tua na saansa Jesu’ thu nagen ding hi” ci hi.

Talitha’ nulepate zong a kongkhak vuah a tanu uh hong dingg amuh uh ciangin lamdang sa mahmah uh a, ahih hangin saangkik uh hi. Himah taseleh amaute in Jesu’ thu za nuam tuan nai lo lai uh hi.Talitha in Jesu’ min a pulaak simsim in ngawhdawn in a vaakkhiat san pahpah uh hi.

Tua bang pipi mah in Talitha a inn vuah hong om suaksuak a, a muh khaak ngei nai loh a nau thumte ahi, nau pasal nih leh nau numei khat, tua teng tawh a kimaingaap nadingin a han ciam hi. Zingsang nai 5 in nai khuangsak aa, thungen in Lai Siangtho sim den hi.

Bang simsim ka hiam, cih a nulepate’ tungah gen nuam mahmah taleh amaute in ngai nuam lo in, nial den uh hi. Tua ahihmanin amaute a ihmut kaal un a lupna geivuah va pai-in, Lai Siangtho tangthute va gengen hi. amaute’ tungah thu ngetsak den hi. Amah akem a nu in agen thute phawk kik zeel hi. “Khaa khat akikhel nading pen ei sep theih hi lo in, Pasian’ sepding ahi hi.” cih ahi hi.

Kum khat khit ciangin, a pianna a nu, biakinn hong pai nuam ta sam na pi, mite in a ciamnuih bawl ding maizum hi. Mi khempeuh in a zuudawn leh a kimawl lam thei uh ahih man ahi hi. Talitha in bel a patauh loh nadingin hanthawn den hi.

“Pasian in lungsim en hi,” Talitha in ci hi. “Topa Jesu hih leitungah a om lai-in, no mah bang mite tawh kikhawl khawm hi. Midangte’ ong gensiat ding patau kei in, nu aw. Mawhnei mi khat a kikhel ciangin vantungah lungdamna lian mahmah hi” ci-in hanthawn den hi.

Tu-in ahihleh Talitha a neulai a, a keem a nu in biakinn sungah Talitha’ pianna tuunnu a muh ciangin lungdamna luankhi a nuul simsim hi. Talitha leh a nau thumte itna tak tawh va aangpom-in va nam hi.

“Mite’n hong gensiat hangin lung himawh mahmah kei oh, nu aw. Pasian in lungsim en hi. Pasian in nang a’ dingin ngiimna lianpi khat nei hi.” ci hi.

A nu biakinn panin hong ciah ciangin a pa in bangmah na hopih lo hi. Talitha in a pa zongh, biakinn ah kikhawm dingin a zol hangin nial lai hi. “Naupang neu khakha in, ka sep ding hong hilh sese ke’n” ci hi.

Tua teng khit ciangin Talitha in Daniel 4:28-37 sung-a, Pasian in Nebuchadnezzar ganhing lungsim a guatna thute hong sim hi. A pa a kikheel matengin thungetna tawh Pasian, a buan den dingin Talitha in khensat ta hi.

Tu-in Talitha in hibangin thu ngen hi. “Topa Pasian aw, Nangmah a nungta Pasian nahihna hong theih nadingin kumpi minthang Nebuchadnezzar ganhing lungsim guan thei na hih leh, tu-in ka pa hong etsak in, mi mawkmawk khat hi lel hi. Nangmah a nungta Pasian nahihna hong thei-in, a kipsak theih nadingin, ka Pa’ tungah nalamdang khat hong piangsak in.” ci hi.

Tua bangin Talitha in thu angetkhit a sawt lo in, palikte in a pa hong man uh hi. Ahangin, a pa pen electrical engineer hi-a, a sepding a kisawl nasepteng a vek in zo lo ahih manin a boss pa in thong sungah khumsak hi. Thong sung panin Jesu’ thu hong um pianpian ta hi. Kha thum a cin khit, thong sung panin hong suahtak kik ciangin biakinn ah tui kiphum dingte’ thusinna ah hong kihel thei ta hi.

Talitha ahihleh gen zawhloh zah dongin nakpi takin lungdam mahmah hi.

Himah taleh tua zawh kha khat khit ciangin a Pa typhoid fever natna tawh, kum 45 pha pan in hong sivat mawk hi.

Talitha in ahihleh ngaihsun zo mahmah lo phial hi. Telzo mahmah lo hi. Sabbath sim in a innkuan kim un lungnuam takin kikhop khawm ding pen a lunggulh penpen ahi hi. A Pa’ nusiat a dah teeisaam hangin Pasian in a thungetna a dawnlam thei ahih manin a lungkim veve hi.

“Ih lametna bangin hong pian loh hangin, Pasian’ lampi bel a tawntungin bangkim-ah a hoih pen hi den hi”. “Ka pa pen Adventist mi hoih mahmah khat hong suak in ka innkuan un biakinn ah tonkhawm diamdiam dingin ka ki lamet hangin tua bangin hong piang lo hi. Himah taleh ka pa in Jesu umh in, saang ahih manin ka kipaak mahmah hi. Topa Jesu hong paikik ciangin vantungah ka innkuan un ka paikhawm veve ding uh hi”, Talitha in ci hi.

A nu ahihleh, Sabbath simin pelh lo in kikhawm den a, a sawt lo in, tui  kiphum ding hi ta hi. Tua banah Talitha’ naute tengthum zong biakinn ah kikhawm den uh hi.

Tu-in Talitha, kum 19 phata-a, saang’siamah suak dingin sang a kah laitak hi. Amah in Nu nih nei ahihmanin alungdam mahmah hi: khat pen a pianna tuunnu, khat pen acing akeem nu ahi hi.

“Nungzui muanhuai ka suah nadingin ka neulai-in, hong keem-in,hong pantah ka nu’ hangin Pasian’ tungah lungdam ka ko den hi. Tu-in zongh koimun koigam ah kahei zongin kei hong panpih den amah mah ahi hi.” Talitha in ci hi.

Abeisa kum thum lai-in, Sabbath 13na mission sumpite tawh Talithate tenna ahi Papua New Guinea gam a, a khua vuah Sabbath School Khaan dingte ki lamh sak hi. Mission sumpi nong khiat man un lungdam mahmah hi.

By Andrew McChesney