4. Zawhna ahihkeileh Lelhna apia Thute

THUKHEN 4

Zawhna ahihkeileh Lelhna apia Thute

Kumkikna Lamen Innkuan -THUKHEN 4 Zawhna ahihkeileh Lelhna apia Thute Leeln G White Adventist Home Zokam, Zolai, Tedim, Chin
 

NAWHSA, KHANCINGLO KITEENNA

Neusen Lawmngaih Lauhuai.—Kiteen baih ding hatthot huailo hi. Kiginna om manlo nawhsa takin athupi kiteenna bawlding hilo hi. Lungsim leh pumpi akhancin ding kisam hi.1
Numei leh pasal no tampite in ki-itna khancin nailo, khensatna cingtak nailo, mipi pualo, akisangkhanlo ngaihna omlopi in naupang lungsim tawh kiteeng uh hi.
Neusen kithuahna tawh siahuai takin kiteenna aom bangin adahhuai takin kikhenna zong om hi. Nu leh pa awina aomlopi in neusen kithuahna tawh akiteengte-in lungnop ngahding lamet omlo hi. Neusen kingaihna khal kul a, kum cingin numei’ nin zong pai phot dinga, apahtawi huai nuntakna aneih uhciangin ngaihmuanna om pan hi. Kikhalna aneilo kiteenna in nopna aomlo nuntakna kaizawn ding hi.
Khangno zangdawng leh nawibawkcil hun pen kiteen hun hilo hi. Hih hunin lawm hoih ngah ding haksa hi. Akhensatna tawm ahong picin zawk ciangin kiteen ding kilawm kisa hi. Ahizongin lungnopna ngah takpi ding, lamet omlo hi. Picin ding ahanciam sangsikun kitelkhialna piangin, akigamlatna uh zai tektek a, khat leh khat kinawl khinta uh hi. Tuabangte adingin “inn” in bangmah siangthona neilo hi. Ki it lohna kammal leh thangpaih kampaute tawh inn sung gu dim uh hi.2
 Acingtak lo kiteenna in tuhun a aom siatna namcinte piang sak hi. Neusen kiteenna in pumpi cidamna leh lungsim picinna khangkhan lo hi. Hih thu-ah ngaihsunna kizang lo hi. Khangno tampite in zualzanna zui hi. Hih kalsuanna in ahoih leh asia tawh kipaaikan hi. Khantawn thupha ahihkei leh samsiatna ahisak thu pen nawhsa takin leh si-sa tawh khensat uh hi. Mitampite in Christian muhna tawh hilhna, leh ngaihsutna ngai nuamlo uh hi.3
Sinna leh thuakna atawm lai khangnote nawhsa takin akiteeng dingin Satanin tatsatlo-in nasem hi. Tuhun a aminthanglo kiteena dante in ahoih zaw ahi hi.4
Pasian’ mite lakah neusen kiteenna-in kimakna, kikhenna, leh pawlpi nasiatakin buaisak hi.5
Tulai neusen kiteen baihna leh Isaac ie kiteenna saikak in. Khangnote in kingaihna ah amau gel lobuang thudot nei nuamlo uh hi. Hih thu ah Pasian leh anu leh apate nangawnin kham zolo hi. Nupi papi acin ma pekun nu leh pa lo-in akhensat siam dingun kingaihsun uh hi. Akiteen kum amasa hunin akhialhlam uh pulaak pah hi. Nungzui thusiate adal dingin ziakai ta uh hi. Pillohna leh kikhallohnate in siatna piang sak hi. Akimak donguh hakkol abang kiteenna nei uh hi. Hih leitung mahmah ah mitampite in lungnopna sia sakin, ahong tungding lametna hemkhia uh hi.6
Pasian Nasem Ahidingte Awk Sak.—Khangnote in tawlkhat sung thumaan saang uha, ahoihlo kithuahna leh khangmoi kiteenna tawh Satan bumna ngahin lampial uh hi. Satan in khangnote asiangtho lampi panin apial nading ahoihpen bumna in zang hi.7
Tulai khangnote in lauhuaina theih lo uh hi. Pasianin Ama’ nasepna panmun tampite ah azat theih khangno tampi aom hangin Satan in ama’ bumna tawh amaute kikai-awk sakin Pasian nasep nadingin thanem sak hi. Satan in theibaih leh beltaka nasempa ahi hi. Mite athaangah a awksak nadingin baih asak bek thamlo-in tua thaangte panin zong suahtakding haksa hi. Tuabang lauhuainate khangnote in mu zolo uha, zong kidal khollo uh hi. Pasian kiang panin pilna ngen lo-in khat leh khat kingaihna tawh kikhih sawm uh hi. Amaute ahilhdinga akisawlte zong deihlo uh hi. Kicing kisa uha, kikhalna deihlo uh hi.8
Nawibawk leh Zangdawngcilte Hilh.—Na zangdawngcil nungak ngaihnate kuamahin sangmuh lo hi. Hih tawh nalungsim nazualzan sakna hangin lai hanciam ding hong susia hi. Asiangtholo lawm leh gual hong nei sak dinga, nalampi leh midangte lampi kisia ding hi. Nang cih bekmah thu nasak laiteng thuhilh ding, hong makaih ding, hong khal ding khempeuh nanial ding a, thumaan leh dikna tawh aihualna na nei kei ding hi. Hih thu kei hong kilak hi.9
Kum Kikhaihna.—Na kiteen pihdingte in hauhna neilo kha ding hi. Ahihhangin tua sanga amanphazaw cidamna nei khading hi. Tuabang vai ah kum kitam khaih kei hamtang hen. Hih thu namanlohna in akhangno zaw adingin nasia takin natna piang sak hi. Natate zong pumpi leh lungsim hatta hong kisut hi. Khangmoite kitangsap kithuahpihna pen uhamte in pia zo nawnlo uh hi. Makaihna leh itna akitangsap hun lian in nu leh pate in hong sihsan ta ding uh hi.10

KITUAKKIMNA

Kibulhsiamna.—Innkuan tampite-ah Christian ziadam, ngeina hoih, kizahtakna leh kipahtawina omlo a, innkuan nuam apiang sak kiteenna omlo hi. Lungduaina, migitna, ziadamna, leh Christian’ itna munah paukhauh, kilangpanna, kimawhsakna, leh ki-ukcipna omzaw hi.1
Kiteenna ma-in zongsatnate leh lungsim puakte kitheih zahdingin kinaina om manlo hi. Nisim nuntakna tawh kisai-in, lengla bangin kiteenna nei uh hi. Mitampite in kibulh siamna omlo uh ahihlam nung phawk uha, zekai ta uh hi. Anuntakna uh gentheihna in tuh hi. Azi leh atate in pa ahi pasal’ kicintaak lohna leh zawmpaihna hangin thuakpih uh hi.2
Kizon khialhna hangin leitungin gentheihna leh mawhna tawh kidim hi. Pawlkhatte in akiteen zawh uh kha tawmkhat sungin lungsim kituak theilo ding uh ahihlam kiphawk uh hi. Vantung’ ki-itna leh kilemna aom nading munah innkuan kitotna piang ta hi.
Thuneu ah lungkimlohna hangin thangpaihna piang hi. Lungkimlohnate kipulaak in, kimawhsakna kigena, ki- itna tawh pumkhat abangding kimlai kikhenna leh gentheihna piang hi. Mi tul tampite in amaanlo kiteenna hangin pumpi leh kha susia uha, manthanna lampi ah atuaksuk uh hi.3
Akitam Innah Tawntung Kibatlohna.—Kiteenna ah lungnop nading leh khantoh nadingin nupate in kipumkhat ding uh hi. Si-le-sa lungsim in Christ’ lungsim tawh kipum khat theilo hi. Khat in taksa adingin khaituh a, ama lungsim tawh kituakin ngaihsun leh gamtang hi. Khat in, Kha tuh in, “KEI” lungsim nencip a, Topa’ deihna bangin nuntak sawm hi. Hih nihte in duh leh dah kibanglo, tup leh sawm kibanglo uh hi. Thu-um zawpa in a umlo zaw pen thumaanah azawh kei leh, vantung tawh kizopna aneilo pa tawh zawngkhal takin aomkhop theih nadingin abiak leh a upna nusia hamtang uh hi.4
Kithutuahlohna in Innkuan Satkham.—Kiteenna atamzawte in gentheihna bek piangsak hinapi-in khangno tampite in tua lampi mah tawn uh hi. Satan in amaute tua lampi ah makaih hi. Lungnopna ngah nadingin kiteen kul hi, ci-in um sak hi. Akiteen uh hangin innkuan zong vak zolo, panpih zolo uh hi. Khat ie lungsim tawh kituak dinigin akikhiam theilote in anuamlo kilamdannate leh kidemna apelh zawh nadingun kalsuan zolo uh hi. Hihin nitawpni hun cianga mi tul tampi asiat nading leh vankhua ataan nading uha khemna ahi hi.5
Mittaw Kingaihna Thunung.—Mittaw kingaihna in akilawh thei natna bang hia, mite’ lungsim pumpi uk hi. Amaute in thuhoih lahoih neilo uha, amu khempeuh adingin hehhuai hi. Ahun tung nailo kiteenna ah hihbang natgual in nawka, huk leh lanna tha beita-in thaksuahna abei ciangin adinmun maan uh kithei pan uh hi. Kituaklo pipi in khantawn kiteeng geigai uh hi. Kiteenna khau ie khihna tawh lungsim na sa-in gentheihna masuan uh hi. Apiang bangbang ahoih in zeptawm ding sangsikin, kiteenna kamciam maanlo hi, ci-in mawhsak uh hi. Akituaklo kiteenna hakkol mah kibulh sa-in meidawina tawh amaute kithat uh hi.6
Akitatsat theilo kiteenna akepcing zawh nading uhin, kiseelna pel-in, anuntak theih nading uh nupate in asin akan azon ding uh kisam hi.7
Midangte Thuakna in Hilhna.—Mr.A pen Satan in zothawh takin akimawlpih theihding pianzia nei hi. Kiteenna tawh kisai in ama’ tuahna tawh khangnote thuhilh hi. Azi in alungsim leh si-le-sa’ veina nungzui-in, ngaihsutna leh thukhenna donglo-in, alawm dingin teel hi. Amaute kiteenna in itna maan ahi hiam? Hipeuh mahlo hi. A mittaw, si-le-sa hanga kiteenna ahi hi. Kiteenna tavuan apuadingin kilawmna neilo uh hi. Lupkhopna tha akiam ciangin amaute kizopna ahong khauhzaw hiam? Akingaihna uh athuklut zaw hiam? Etlawm takin anuntakna uh akipum khat mah hiam? Akilumlet in apiang hi. Zatkhiatna tawh azia leh atongte uh agil semsem leh akiteenna in lungnopna apiak sangin, buaina pia zaw hi.8
Lungnopna apiang saklo hihbang kiteenna tawh akipumkhatte kiang panin kum tampi sung laikhak ka ngah hi. Hih kiteenna hangin apiang thute in lungsim nasak mahmah hi. Hihbang kamsiatna atuakte tungah bang thuhilhna pia ding, cih zong khensat haksa hi. Bangci in ahaksatna vangik kizang sak thei ding hiam? Ahizongin amaute’ thuaksiatnate in eite thu ahong hilh ding ahi hi.9

INNTUAL AH KISINNA

Kiteen nading Kithawinaah Pilna kisam.— Bangkua vaihawm nadinga akizangpah thei ding pilna akineih masiah numei ahi a, pasal ahizongin kiteen loh ding ahi hi. Numei in lungsimpuak leh omdan sin masa ding hi. Tuaciang bekin ahoih in tate pantah thei pan ding hi.1
Numei tampi takte in sang thupite panin pilna sang nei leh pahtawina ngah napi, innsung nasep zia theih neilo uh hi. Innkuan khuasak nadingin picinna aneihloh manun innkuan sung ki-ukna nei theilo a, lungnopna ngah theilo hi. Amaute in numeite’ dinmun sang leh hamphatnate agen uh hangin amau mahmah in numei picingte ie dinmun ban zolo uh hi.
Evua ie suan leh khak ahi numeite in innkuan nasep theiding hi. Bangkua nasep sin kimding uh hi. Numei in innsung nasep siam hileh nu leh zi dinmun akisap ciangin kumpinu bangin ama’ panmun ah kizek siam ding uh hi. Atate makaih, hilh, a nasemte makaih, leh a innkuan adingin ama khut mahmah tawh asem dingin kicinna neiding hi. Pumpi taksa ie kilamzia, cidam nadingin sianthona, nek leh dawn leh kizep kipuahna, nasepna leh tawlngakna, leh simbeilo innkuan dam nadinga akisam thu tampite atheih ding thu nei hi. Atate anat ciangin zong ahoihpenin akep leh adon theih nading pilna zong atheihding ahi hi. Atheih ngeiloh siavuan siamahte khut sungah amanpha atate a ap maimai ding uh hilo hi.
Innkuan sung kikep kikhual dan theihlohna in mipi tanna hizaw, cihna-in mihing akibawlcil a Pasian’ vaihawna tawh kilehngat hi. Thadahna in mawhna hia, bangkua sung nasep theihlohna-in haina hi. Hihin, a nungciangin nasia taka kisikna hong pia ding thu ahi hi.2
Khangno nupi tampite in innsung nasepte pen cimhuaina sa uha, tua hangin numei tampite in nu leh zi tungah akinga zasep silbawlte thei losa in pasal nei uh hi.3Innkuan sungah apiang ding tate kepzia atheilote in pasal neih ding hilo hi, cih thukhun om hi. Pasian in ahong piak innkuan ihkepsiam ding ahi hi. Pasianin innkuan adinga ahong khun sak thukhun atheilote in Pasian tung leh innkuanpihte tungah aneih tavuan thei lo ding uh hi.4
College ah Innkuan Sinna Neihding.—Pawl Sang akah khangnote in innkuan vai pilna angah ding uh kilawm hi. Hihin gamtat kisuih nadinga akisam thu phamawh ahi hi. Nasep ngahin inn nasep thadah in koihdap ding hilo hi. Nisial nuntakna tawh akisai tavuante theih ding kisam hi. Buaina atawm theithei in inntual nasepte thei ding leh siam dingin sin sak ding hi. Na khempeuh etlawm leh picing takin vaihawm ding hi. Anbuk leh innsung dangte pen asiangtho leh anamtui dingin kem ding hi. Bangkua nasep khempeuh akikhit khit ciang bekin laibute sim thei pan ding hi. Innkuan anuam sak nasepte nusia liangin laisim ding hilo hi.
Kinlo leh awlmawhlo takin innsung na seplohna in ngeina hoihlo hia, paihkhiat ding ahi hi. Hih zongsatna hoihlo zawmpaihna in mihing’ kimanna siasak ding hi.5
Innkuan Lam Pilna Kisam.—Laisinna ahiang tampite in sangnaupangte hun tampi laksak ahihhangin lungnopna pialo leh kisam masa lo hi. Nisim innkuan sungah akizang pilnate kitang sam zaw hi. Numei khat in Piantit pau, Maths, piano siamnate kisam thei mahding hi, tuate sangin moh/an bangci bawlding, puankhui theiding, innkuan lamna ah tavuan tuamtuamte siamding kitangsam pen hi.
Innkuan bup cidam nading leh lungnop nading in anhuan theih siamna sanga athupizaw siamna omlo hi. Acidam huai lo, loptop a akihuan ante in khanghamte kizat theihna leh angek lai tate khantoh nading susia pen hi. Pumpi kitangsap banglianin anhuanna, alim leh aneknop huai dinga anhuanna in thuhoih lampi ah gualzawhna hia, tua ahihkei leh lamkhialah gualzawhna hiding hi. Bangkua nasep thu neu tuamtuamte ah thumanna in lungnopna tawh kizom gige hi.6
Sianthona Thukhunte Awlmawhin.—An nekna, thalakna, tate kepsiamna, cinate donna, leh tuabang thudangdangte ah ih awlmawhlohna sangin kin ngaihsut zawk ding ahi hi. Tua in sianthona thukhun ahi hi.7
Sianthona thu sinna ah, siate in mimal sianthona kisapna hilh ding hi. Tua-ah zongsatna leh kim leh pam sianthonate huam hi. Lupna mun leh anbuk hahsiang dinga, an zong alim theithei in huan in, abucing theithei a geelna-in innkuan lungnop nading ahi hi. Leengla do nadingin amanpha theithei in leengla khan zepna sangin thupi zaw ahihna sangah kihilh ding hi. Nuntakna in an sangin thupi zaw a, pumpi in puan sangin thupi zaw (Luke 12:23) ci-a thuhilhnain kum zabi 18 hun laite sangin tu-in kisam zaw lai hi.8
Khangno Numei Kuhkal Zongsatna Kihilh.— Kiteenna naneih ma-in apiangsual na zia natong uk ding leh puahdingin hanciam masa in. Lungnopna nangah nop leh na thanemnate nazawh matengin kiteenna vai na lungsim panin hemkhia phot in. Innkuan vai tavuan ala dingin pilna zong nasin naikei hi. Innsung nasep silbawlna ah kuhkalna na nei nai kei hi. Na hoih sepna ah akuhkal zongsatna nei khin phot lecin mangthang kik nawnlo ding hi. Bangbang hun leh mun natung zongin na dinmun tawh naki tangaih dinga, akigingsa in na omding hi. Nasepna ah nopsakna nangah ding hi. Na hoih sepna ah nuam nasak leh na lungsim in na nasepna ah om dinga, sunmang manin hun abei nawn kei ding hi.
Na hoih sepnadingin theihna leh siamna naneih leh atawlnga theilo, alungkim theilo lungsim tha dimin, picinna leh zahtakna nangah ding hi.9
Numeite ading Manpha Khutsiamna.—Mi tampite in atapa in amailam nuntakna azop zawh nading sinna aneih sak hangun anu mahmah leh atanu adingin amau leh amau akivak zawh nadingin pilna piakding pen kin masakin neilo thei uh hi. Numei in sangah asin thute nisim anuntak nadingin zang thei loin, thu thuk anhuanna thuk leh innsung gamtatna adingin hilhna ngahlo ahihmanin kimanna neilo leh nu leh pa adingin vangik suakin hong khangto uh hi.
Amah mah kikemsiam dinga akipantah numei in midangte zong kemsiam ding hi. Amah in innkuan leh khuatual adingin dongkholh ngeilo ding hi. Atuahsiat ciangin akivak nadingin mun khat peuhpeuh hong ngah ve dinga, ama tungah akingamte zong akhual zo ding hi. Akisap leh azat theih dingin numeite zong sumbawl theihna lampi khat peuhah kipattah ding hi. Avaangnei zum nasepte khengin inn nasepte tawmin, anhuan in, inn hah in, puan khui in aom theihding uh kisam hi. A hau a, azawng zongin, innsung khatah innnupi in atheihding thute amahin zong asin kul a, asiam kul hi. Tua hileh nuntakna ahong kilum let ciangin amahin tuabang hun adingin akigingsa asuak hi.10
Numeite adingin bangkua sung nasep siamna in akiciangtan theilo kimanna ahi hi. Innkuan tampite in nu ahi zi ie kizek siamlohna hangin inn sungah dahna tung sak hi. Ih tanute in lim suai thei, akhelkhel bawl thei, la tum thei, ahihkei leh laigelh thei ahihzahin amau puan ding mau mahin at in, khui in, tha omdingin an huanin ankuang lui thei ding hi. Numei kum kua leh kum sawm aphak ciangin innsung nasepna ah mapang ding hi. Ahih zawh nasep ahih nakleh tavuan la ding hi. Pa pilte in atanute adingin “A nu bangmahin innkuan vai avan thei dingin, nu hoih asuak thei dingin, hun azat siam nading un, zi leh nu kilawm takin apian nadingun, innkuan amakaih thei dingin, leh khuatual ah mi khat mahin akizahtak nadingin” deih sakna nei hi.11
Pasal ahi Pa in Cilin Belding.—Tanglai ngeina ah mopipa in zawlzu akisan ma-in asungh dingpa kiangah ama’ neihna leh amun tawh kituakin sum ahih kei leh van kipia sak hi. Hih ngeina pen kiteenna akip aneih nading ngimna ahi hi. Innkuan akhual zolo tangvalte pen pate in atanu uh’ pasal dingin neihtham nasa lo uh hi. Sum cil in, sum lam nadingin thagum zangin, bawngte leitangte anei zolote pen muantham salo uh hi. Azi piakding anei zolote in sum/van piakna tawh sittelna nanei uh hi.
Angaih numei ie pa adingin nasep hun zong kipia hi. Sum leh van tangin hun pia in thalawh sak hi. Tuabang thagum sepnaah thumaanin, kilawmna alahzawh ciangun a tanu pia khia a, akiteen ciangin tua sum/van ahih keileh hun tawh athalawh khempeuh atanu moken in puasak hi. Hih khanglui ngeina in khatveivei Laban bangin akizatkhialh zel hangin thuhoih tampi piang sak hi. Mo ding athalawh pa in nasepna tawh athalawh hangin nawhsa takin kiteen ding phallo uh hi. A itna bangzahin thuk a, a lamthak ding innkuan akhual zawh danding sittelna nadingin hun kisawt sak hi. Tuhun ciangin khanglui ngeina tawh kilehngat in kigamtang ahihmanin siatna tampi hong piang hi.12
Sumneih loh pen paulap ding omlo hi. Pasal tampite pen, Amah migi, pawlhuai, cingh, gamtat hoih,, Christian hi, akicih theih bangin amah leh amah kikemcing zolopi, zong kici thei hi. Nuntakna ding sumgum tawh kisai in, sum athalawh tawm theilo ahihmanin naupang bang ahi lai hi. Ei leh ei ading dingin anu leh apate in pattahna neilo hi.13

PIANTHAKNA KINGEN

          Biakna in Innkuan Nopsak.—Innkuan biakna in alamdang vangliatna hi. Pasal in a zi bawldan, zi in a pasal bawldan in vantung Innkuan lut nadinga kithawina hithei hi.1
Christ ie itna tawh akidimte in kigamla khen thei ngeilo hi. Biakna in itna hia, Christian inn in itna ateenna mun hi. Thukhual kammal leh aziadam migitna in ki-itna pulaak hi.2
Inn sungah biakna kisam hi. Hih bekin kiteenna ah thangpaihna apiangsak khialhnapite dalzo bek hi. Christ in a ukna munah athuk, amaan, angkhuatlo itna teeng bek hi. Lungsimte kikhih dinga, nihte in kihual takin nungta khawm thei ding hi. Tuabang innah vantungmite leengla dinga, amaute’ kepna tawh nupate’ inn siangtho sak hi. Ganhing bang zualzannate tua inn panin kihemkhia ding hi. Ngaihsutnate Pasian’ lamah kilamto dinga, lungsim’ ki apnate Ama kiangah kahto ding hi.3
Christ atenna innkuan sialah ki-itna leh kikinna kilak a, akitatsat nuntakna azeel itna ie teenpihna om ding hi.4
Christian Biakna in a Uk Huzaapna.—Christian biaknain kitenna a uk huzaapna hiding hi. Atam zawte’ kiten nopna lungsim phut pen Christian thukhun tawh kituaklo hi. Satan in Pasian’ mite ahuzaapna khangkhan nuam hi. Ama’ mite tawh akipawl theih nadingin Pasian’ mite lungsim sungah asiangtholo zualzanna guan nuam hi. Pasian Kammal sungah, Pasian itna in atenpihlo mite tawh kipawl lohding siangtakin nagen khin hi.5
Akiteengcil Nupate Hilhna.—Khantawn tulpih ding kiteenna in Christ leh Pawlpi kizopna lim hi. Christ in Pawlpi tunga apulaak lungsim lian pen pasal leh zite in aneih ding uh lungsim ahi hi. Pasian it mahmah uh hileh Topa sungah ki-it den ding uh hi. Amaute-in adeihna uh nial tuak le-uh, khat leh khat thupha kipaih ding uh hi.
 
Na nih un napiangthak ding uh hi. Khat mah in zong “Pasian’ thu maanna” nanei kei uh hi. “Kei tawh aom khawmlote in Kei hong langpan hi; Kei tawh akaikhawmlote in athehthang uh hi” cih Jesu thuhilhna na sin ding uh hi. Pasian’ ta taktak suakin, nasep aptham muan tham ding nasemte nahiding uh hi. Tua hileh tawldamna, muanna leh upna note kong pia ding hi. Na nih un Christian lungnuamte nahi ding uh hi. Asia nialin, apha nateel theih pahpah dinguh kong deihsak hi. Pasian’ kammal sin un. Topa Jesu in gupna angah dingin hong deih sak hi. Alamdang takin hong kemzo a, kimanna anei in nungta-in, nasep hoih asem zo ding kong deih sak hi.
Pasian’ ta taktak asuakding deihna lian naneih keileh, khat leh khat kihuhdan ding nathei kei ding uh hi. Khat leh khat kihehpih unla thukhualna nei un. Na kilungdam sak nadingun angsung deihnate nusia un. Nisimin nang leh nang kitheihsiam semsem in. Nisimin na thanemnate tha napiak nadingin sinpha un. Topa Jesu in na khuavak, na tha, na lungdamna lukhu hiding hi. Banghang hiam, cihleh na deihnate Topa’ deihna na hisak hi.
Na lungsungah athumang Topa hehpihna na kisam hi. Topa’ nasepna tawh akizom mi khempeuhte-in atawntungin angsungkhuatna vilden ta hen. Na meivakte kuang sak un. Tua hileh na kampau leh na gamtatte ngoltollo ding hi. Khat leh khat lungnopna kipia leuh cin, na nih un lungnopna nangah ding uh hi. Leilam lungsim kongte khak unla, vanlam lungsim kongte hong un.
Mimal Honpa in Christ sang lecin, numei leh pasalte in asang dinmun tung theiding hi. Ngak unla thungen un. Pasian tungah kiap un. Tawntung nunna ngah nading azongthei tha hong guanding hi. Na ngaihsut, kampau, gamtatte tawh leitung’ khuavak nahiding uh hi. Topa’ sungah kikhal un; tua lo-in Pasian hong piak nasep natangtun kei ding uh hi. Jesu upna tawh nangma kha agum hibeklo-in thukhun leh limlahna tawh midangte zong na gum theiding uh hi. Jesu na etteh ding uh ahi hi. Gualzawhna apia thei Amah len un. Angsungkhuatna zungkalh un. Pasian lamsang un, tua hileh note in Ama’ tate na hiding uh hi. Na Honpa uh pahtawi un, tua hileh Amahin agamsungah note munkip hong pia ding hi.6
 
 (Khen Lina zo ta hang ei, zom lai ni maw, Lawm).
See also  Topa’ Gaam
Tags: ,

Admin

Admin

Top