Zomi Sabbath School Lesson 6: SIAPIPA KIANGPAN PILNA TUAMTUAM, Zokam, Zolai, Zopau, Thado, Tedim, Paite

ZSL 6: SIAPIPA KIANGPAN PILNA TUAMTUAM

 Lesson 6                                         *October 31–November 6

 

SIAPIPA KIANGPAN PILNA TUAMTUAM

 

 

SABBATH NITAKLAM                                   Oct 31

 

Tukalsung Simding: Gen. 3:1–11, Rom. 5:11–19, Gen. 28:10–17, John 1:1–14, Matt. 15:21–28, Mark 10:46–52.

Kamngah: “Tua ciangin Zeisu in, ‘Na ciah thei ta ding hi; Na upna in nang hong damsakzo hi’ a cihkhit phetin amahin khua mu thei pah a, tua apaina lampi ah Zeisu’ nung azui hi.” (Mark 10:52).

            Eite lakah amah leh amah akizumpih ngeilo aom hiam? Ei leh ei kinatsakna’ng a bawlngei lo, mitheih ding lau a om khuankhuan ngeilo kua om hiam? I vekpi mahin tua cingei veni aw.

            Adam leh Eve a kikham singgah anekkhit laitak a omdan ding ngaihsutsak in. Jacob in a Pa khemin a sanggampa azawhthawh bawlkhit, asanggampa kihta in a tailaitak ngaihsutsak in. Zanin koici ihmut hiam? Numei zualzangnu “amawh laitak” (John 8:4) in kiman ngaihsutsak in. David zong tuabang dinmun tungngei a, Psalms 32 na pen a lungsimnat leh a kisikkikna pulakna la ahi hi.

            Lungdamthu in vannuaibuppi huam a, Khazih’ sihna in zong mikhempeuh huamgai hi. Kibat lohna tampitakte kawmkal ah: mawhneihna in hong kipumkhat sak hi. Tua a hihmanin, Christian pilna maantaktak in, a lungkiathuai mahmah eite’ dinmun adingin noptuamna’ng lampi hong musak hi. Tukal sungteng eite noptuamna ahi i Siapipa i ending hi.

 

SUNDAY                                                                           November 1

Buk Sangin

            Gen. 3:1–11 simin. Banghangin Pasian in Adam kiangah “koiah om na hiam”ci in dong hiam?

________________________________________________________________________________________________________________________________________

            Tangthu in pukna singgahpen apple bangin ciamteh hi. Laisiangtho in cilo hi. “Singkung’ gah” (Gen. 3:3) cizaw hi. A singgah namin bangmah sailo hi. Tua singkung in dinmunkhat nei a, tua gah neekding kikham hibek hi. “Keima’ nuntakna kemzo ing. Keimah Pasian hilel ing. Pasian’thu tungsiah ah thuneilel ing” ci a, Pasian’thu nawlkhinte akizia-etna ahi hi.   

            “Gulpi” in Adam leh Eve singgah aneeksak zawhphetin anuntakzia uh paikhial pahlian hi. Pasian hong paina ging azakuh ciangin “huan sung singte lakah” (Gen. 3:8) abu uhhi. Pasian in Adam kiangah “Koiah om na hiam?” ci in a dotliang pen lamdanglua hi. Theikhialua ding hi. Amau gamtatnasa dungzui in hibangin bukkul ahihna phawksaknuam hihtuak hi. Amau’ gamtatna in a dahhuaithu tungsak ahihna theisaknuam hi.

            Rom. 5:11–19 sim lecin, Paul in, Eden huansung Adam hihdan leh, singlamteh tungah Zeisu’ hihdan a saikakna tamveipi omhi. Adam hihbang in hihlo dingin Zeisu hongpai ahihna hihmunin bang hong gen hiam?

________________________________________________________________________________________________________________________________________

Hotkhiatna ngiimna pen Adam leh Eve in Pasian’ kam adawnna pan hong piang aci omhi. Amau’ mawhna hangun maizumin Pasian taisan in abukna uh pan Pasian in honkhia uhhi. Eite zong tuabang vivemah i hi a, Zeisu hongpai in hong honkhia hi. “Koiah om nahiam?” cih dotna zong ei hong dong hipahlel hi. I mawhna khialhnate tawh koikoi ah i omzongin Zeisu hongpai in hong honkhia hi.

Eite’ pianzia pen Pasian kiangpan bu i hihmanin, hong honkhia dingin Zeisu kiang hong tunh ding Christian pilna in bang kisam a, banghang kisam hiam?

 

MONDAY                                                          November 2

Taai

            Gen. 28:10–17 simin. Hih tangthu in bangtawh kizom a, amau’ mawhna hangin a taaite tungah Pasian’ hehpihna a omzia koibangin hong lak hiam?

________________________________________________________________________________________________________________________________________

            Innkuansung vaikhat ah Jacob in a Nu’ panpihna tawh, khemna lianpi khat bawlkha in, tua hangin thuakngiat kul hi. A sanggampa ama tungah hehmahmah ahih manin a taaikul a, Haran gam a Pu kiang zuanin hong taai hi. Na khempeuh buai in lauhuai mahmah hi. Nitumkuan khat lungsim gikpipi in khuamial sungah hong kalsuankhia hi. Manawh ding bangmah omlo, vandumpi nuai ah pum paikhiat hiau hi. Suangtum khat lukham in hong ihmu hi. A ihmut nuammahmah pen a khanglosak khat hong omhi. A minthang mang, kahlei khatin lei ah kiphut in, vantung baanto hi. Vantung mite kahto tuaksuk uhhi. Aw khat za a, “Keimah in Topa, Abraham’ Pasian Ka hihi” cihi. Tuabangin ama’ innkuan min tawh kamciam piasuksuk hi. Na suan nakhakte tam ding hi. Lei mite tungah thupha ahi ding uhhi. “Keimahin nang hong ompih in, napaina peuhah kongkem ding a … kong gensa thute kahihkhit matengin nang kongnusia kei ding hi” (Gen. 28:15) a cihi.

            EGWhite in Paul cihna a genna ah “Jacob’ mang sung a kahlei in, Zeisu limcing hi a, vantung leh leitung, athanem mihing leh apicing Pasian hong kizomsak hi. Tua tangpupate leh kamsangte in panpihna a ngah uhciangin thangah in anuntakna apiakngamnapa hangin a upna thakhauh hi.”—The Acts of the Apostles, p. 512.

            Jacob a khanlawh ciangin: “Hihlai munah Topa omtaktak hi; keimah in tua thu ka theikei hi” (Gen. 28:16) a cihi. Tua thupiang lipkhaphuai lua hi. Mangngilh ngeihetlo ahihmanin min khat pia liang hi. Pasian tungah khantawn thuman dingin kamciampia hi.

            Hih tangthu panin, Pasian in Khazih tungtawnin i mawhnate enhetlo in hong zon manin bang pilna peuh i ngahthei diam? Christian pilna in zong hih thukhunte banghangin masothuai naci hiam?

 

TUESDAY                                                             November 3

Rabbi Zeisu

            Laisiangtho thak sungah akhawkpi khempeuh lakpanin: “A kipatcil in Thu om a, tua Thu Pasian tawh omkhawm a, tua Thu Pasian ahi hi” (John 1:1) cihsangin a minthangzaw adang omlo hi. John 1 na in mangngilh huailothu: “Tuathu mihing hongsuakin kote lakah hong om a, itna nei in citakmahmah ahihmanin, Pasian pianzia aneihna kamucian uhhi. Hih pianzia pen Pasian’ tapa khatbek hihna tawh aneih pianzia ahihi” (John 1:14) cihthu honglak hi.

            John 1:1–14 simin. Hihmunte in Zeisu pen kua hi ci a, bang honghihsuk ci hiam? Zeisu in etteh thamcing Siapa ahihna bangkhawng hong gen hiam?

________________________________________________________________________________________________________________________________________

            Eden huanah Adam leh Eve a hopih Pasian, bangmahlo sungah Jacob ahopih Pasian in mikhat bangin hong kilak hi. Zeisu sungah Pasian hong kilak hi ci in Laisiangtho thak in gen hi. Zeisu in Pasian ahih manin, Pasian’ deihna leh ama’ lampi Amah tungtawnin i thei ding hi. Tuiphum John in nasia takmahin nasem ahih manin Jerusalem a biakna makaite nangawnin tuam ngaihsut mahmah uhhi. Ahihhang amah sangin lianzawpa’ maiah lam a sialsak hilel bek hi. Milakah a tuam pianmahmah khat hongpiang ding a, Tuiphum John zong tuapa “khedapkhau sutsak dingin kilawm lo” (John 1:27) ciliang hi.

            A zingciangin Zeisu a muhphet leh “Pasian’ Tapa” ci in tangko pah hi. Tuakhit a zingciang in “Pasian’ Tuuno” ci in tangko kik hi. John’ nungzuite nihin Zeisu’ nungzuih ding khentatuh hi. Zeisu in bang zong nahi uhhiam ci in a dotleh “Rabbi aw” (John 1:38) (Sia a cihna) aci uhhi. Zeisu pen Rabbi, Sia khat hi a, a hihhangin, Pasian himawk a, mihing Sia mawkmawk khatbang hithei lo hi. Pasian in mihingin hongpiangsuk in Rabbi, Sia khat hong semsuk hi. EGWhite in “Leitung in a muhngei Sia a lianpen” naci hi—Signs of the Times, June 10, 1886. Tua Siapa in Pasian ahi hi. 

            Zeisu in kua cih thei in, Khalam thumaante ama kiangpan sinding banghangin hoihpen hiam? Kam a genkhiat bek hi lo in, i gamtatna mahmah thupi ahihna Zeisu kiang pan i theih bangteng omhiam?

 

WEDNESDAY                                                      November 4

Nupi Khatin Hopih kik           

            Zeisu in Siapipa hi. Pasian’ omzia taktak kamtawh hong hilh banah zong nuntakpih hi. Mi khatpeuh in, a kam a dawncingin, amah’n zong ngaihsak ahihna lungdamna tangthu khat sungah kician takin omhi.

            Zeisu in Tyre leh Sidon huampan hongpai Gentile numei khat (Canaan mi) a kihona simin (Matt. 15:21–28, Mark 7:24–30). Zeisu’ kholhpihte bangin tuanu ngaiphalo uh a, Zeisu in zong a lungsim sungah koihtuak khollo hi. Tuanu’ hansanna bang nacih diam? Zeisu in midangte a thuhilhzia hih tangthu in bang hong theisak hiam?

            Zeisu Tyre leh Sidon nai hongpai a, minamdang tampitak teengin kizopna kikangkeeina mun ahi hi.  Khuapi ateeng Greek mite in gamlak lokho Jewte simmawh mahmah uh a, Jewte’n zong amau simmawh mahmah uhhi.

            Galilee gam ukpipa Herod in Tuiphum John a thahlup madiak ahi hi. John pen muhna zai mahmah khat hi a, ama’ sihna pen mailam ading thuhoihlopi ahi hi. Zeisu zong a lauhuai mahmah anasepna kipanding hita hi.

            Nakpitak kigingsa in Zeisu innkhatah honglut hi. Mark in, tualai ah a omlam kuamah’n theilo hi (Mark 7:24) ci in ciamteh hi. Ahihhang tua nupinu in thei veve hi.

            Tuahunlai ngeina ombang hileh, numeikhatin mite saan dingin amah kipulak tawm theilo hi. Tua banah, tua nupinu in Jew mite’ ngaihloh minamneute hilailai a hihmanin, amah Zeisu tawh kigamla mahmah hi.

            Nupinu’ tanu damlo ahihmanin huhna ngentantan hi. Zeisu in zong awlmawh vetlo hi. “Tate’ annek ding laksak in uikhawite piakding kilawmlo hi” (Matt. 15:26) ci hi. Tua kammalte in amau’ lungsim sukha mahmah kha ding hi.

            Tua leh thulamdang khat hongpiang hi. Tua nu’n dawngkik hi. Amah Jew mite bang hilo in, uite tawh kikholhtheih tuaklel hi. Tua ahihmanin, “Himah hi, Topa aw, a topa’ sabuai tung panin a-kia annengte, uikhawite in zong nebuang hi lo ahi hiam?” (Matt. 15:27) aci hi. Tua nu’ dawnkikna in lamdangsak hi. Sawlngawh tawh kibang hi. Zeisu in zong ata damsak hi.   

“Na deihna bangin hong piang ding hi” (Matt. 15:28). Tua kammalte bangci danin tel na hiam? Ei deihna bangin thupiang denlo himah taleh, koici dawnkik ding i hi hiam?

 

THURSDAY                                                          November 5

Sangnaupang Khatin Ngah

            Zeisu leh nungzuite Jerusalem lam hong zuanta uhhi. Herod in zong Tuiphum John alunglut mahbangin, ukpite leh Herod in Zeisu zong lunglut mahmah uhhi. A nungzuite leh mizawngte in lungsim thanem mahmah in kikhelna zong lam-en zolo uhhi.

            Zeisu leuleu in leitungah lam-etna lianpen hong deihsak hi. Ahihhang ukpite lampanin a nasepna khempeuh suksiat ding vive manawh uhhi. Zeisu gualzosak nuamlo uhhi.

            Zeisu’ mimuan sangnaupang 12 tengbel Zeisu lamah pantuak lel uhhi. Ahihhang amaute lungsim buai uh in khua mulo uhhi. Etpak dingin, Mark 8:31-33 sungah, Siapipa in a sangnaupangte muhzawhloh thute mudingin to hi. Aphamawh mahmah munte ah khalam mittaw peuh ki omthei hi (Mark 8:37). Khuamu a kisate Zeisu in a cihzel napen hibanghang ahi hi. 

            Khutdawhngenpa mittaw Bartimaeus, Zeisu in a damsakthu simkik in (Mark 10:46–52). Zeisu’ hehpihna lianpi phawkin. Mittawpa’ khuamuhnopna in Jerusalem dong Zeisu’ nung zuihding khentatna piangsak hi. Mark in Bartimaeus leh nungzui dangte kibatlohna pulak ahihlam naphawkkha hiam? Siapipa deihnate dawngpahpah ding ihihna hih tangthu in bang hong phawksak hiam?

            Bartimaeus in naungek’sam kawingiungeu leh losung mangbuh minte mel munuam hi. Khuamuhna cihzong cilehsa bek zong hi lolai hi. Hih tangthu sungah khalam hiphadiak hi. Siapipa dinmun taktak theihna leh ngahna ahi hi.   Khalam muhna zong thukhat hi a, thupi mahmah ahihna, Zeisu in zong thei hi. Mihingte’ kisaptaktak pen ahoihzaw leh nuntakna thak ahihlam zong Zeisu in thei hi.

            Hebrew 5:12–14 simin. Hihmunin pilna man-taktak’ thu bang hong hilh hiam?

 

FRIDAY                                   November 6

Ngaihsutbeh Ding: EGWhite lai Steps to Christ laimai 57-65 ah “The Test of Discipleship” simin.

            Ellen White gen thudang tampite lakah, Siapipa deihbang zuih lianlianna tawh kisai in “Ama’ lim i puaknop manin, a Khasiangtho di’ik-in, A deihbangin gamtatna tawh amah lungdamsak leng” (Steps to Christ, p. 58). Zeisu tawh kholhkhopna ah vaipuak peuhmah “lawpna suak hi” cihi (Steps to Christ, p. 59). Laisiangtho in zong, Matthew 5–7 sungah omhi. Siapipa in a sangnaupangte theihding a deihsak, vantunggam luttheihna’ng thusim teng kigualsuk demdam hi.

 

Kikupding Dotnate:

  1. Pasian in Adam, Eve Jacob a minsap mahbangin eite zong hong minsap hi. Eite (Bartimaeus tungah ahihbangin) lunggulhna, eite in kuate hi a, koiah paiding cihte hong phawksak hi. Hih munsanah i tate ahi a midang a hizongin Laisiangtho i hilhdan ngaihsunkik in. Tavuan manna lelin Laisiangtho hilhna leh, deihsakna lianpi tawh hilh koici kilamdang naci hiam?
  2. Na nuntak khualzinna ah koiah omcih dotna pen mimal ai hipeuh maw, midang kikuppih ding namuan omlai maw? Pawlpi in “Khazih Pumpi” (1 Cor. 12:27) cihbang ngaihsutna in, Khazih hong theihsaknop thute midang tawh kikupkhopna panin kitheithei cih ahi diam?
  3. Thursday ni in, Bartimaeus pen cilehsa leh kha mittawtnapan a kisuahtak phetin khuamu a, Jerusalem dong Zeisu’ nung zuipah cihthu sinzo uhhi. Hih lampi tungah Siapipa’ pilkammalte nisimin zaden hi. Tu’n Zeisu lim puanuam, a Kha diiknuam in ana semnuamta hi. Christ kiang Zuatna in “lawpna” acih mahbangin, Mualtung Thuhilhna sunga Zeisu kammal bangin a lawp ding banghangin kisam hiam?
  4. Thursday dotna lungngai phakik dih in. Sia leh Pha koici khentel thei ding i hi hiam? Tua pilna i neihlel sangin, tua pilna tawh gamtatna in banghangin thupizaw thei hiam?