A Cingtaak Tawlngakna

 

Lesson 13                                            *September 18–24

 

A Cingtaak Tawlngakna

 

Sabbath Nitaklam                                           Sept. 18

 

Tukalsung Simding:  Revelation 1:9–19; Matthew 24:4–8, 23–31; Revelation 14:6–12; Heb. 11:13–16; Phil. 4:4–6.

 

Kamngah: “Laisiangtho in: ‘Kuamah in a muh ngeiloh, a zak ngeiloh, piang thei dingin zong a ngaihsutloh uh thu pen, Pasian in Amah a it mite adingin a bawlkholh saksa ahi hi’ a ci hi.”  1 Cor. 2:9.

 

          Asia leh apha kikal gal kidona lianpi sungah om gige na hihlam na kiphawkkha ngei hiam? Mi tampi takin, hih thu phawkkha bilbel uhhi. E’n zong phawklel mah hang nge. Eite in apha leh a sia, Khazih (apha) leh Satan (asia) kikal kidona lianpi sungah i omgige hi.  

          Nuntak zong thunih tawh nungta i hihi. Khazih leh Satan kikal kidona lianpi zong leitung buppi huam a- vantungpan kipan ahihmanin (Revelation 12:7) vannuai bup huam cihding hizawlai hi. Thubuai tampitak kawmkal ah Pasian’ geelsa suaktak na’ng lampi pen kimangngilh kha thei sop ding hi. Galte, gamvai buainate leh khuahun siatna cihte in, eite hong kem ding omlo bangin hong koih hi. Ahih hangin Pasian in kamsang tungtawnin hong makaihna hangin, koilam zuanin kipai a, tua mun koici tun theih ding cih hong theisak hi. 

          Kidona lianpi pen a mimal mahmah in zong hongtung zel thei hi. I nisim nuntak sung mah ah, i upna hong kito zelzel thei a, Zeisu nihveina hong pai dong nungta ding i hihkei ngaalleh bel sihna mah i masuan veve hi. 

          Tukal sungtengin, a tawlnga hetlo i leitung, a ki telcianlo i mailam khawng eima nuntak sungteng beek a tomin ending hihang. Asauzaw in bel, na khempeuh kamciam vive tawh kidim hi. 

 

 Sunday                                                          September 19

A Tawp Dong Muhkholhna

 

          A khanghampen in a nungta nungzuipa pen, ama’ it mahmah na khempeuh tawh a kigamla, suangbek tawh a kidim tuikulh tungah a tutna panin Zeisu tawh kimu uhhi. Hih bang tuikulh a tang-om khat a tunciangin ama’ lungsim sungah bang om thei ding hiam? Tua bang munte koibang in khengzo thei hiam? Zeisu van akahtoh lai mu a, vanmi nihte zong mu in, a thugen uh: “Galilee mite aw, banghangin vantung lam enin ding niloh nahi uh hiam? Note kiang panin vantungah a ki lato hih Zeisu pen, vantungah a paitoh na muh uhmah bang teekteek in khatvei hong paisukkik ding hi” (Acts 1:11) cihi.

          Kum tampi paikhin napi tua Zeisu hong kileh nai peuhmah lo hi. Tualai in a omkha, a nungzui dangte si mangkhin uh a, Zeisu’ thu teci panna sihlawh uhhi. A khangmoi pawlpi zong, a khang kikhel kawmin a lauhuai mahmah bawlsiatna leh, a sunglam pan mahmah in lehdona hong omta hi. John ahihleh khattang zuang a, tawl in, tawldam ngahlo hi. Tua laitakin mangmuhna amah kipia hi.

          John in hih mangmuhna pan bang hehnepna ngah in na-um hiam? Revelation 1:9–19 simin.

…………………………………………………………………………………………………….……………………………………………………………

          Zeisu in a nungzuite kiangah “Hun beidong in note a hong ompih tawntung ding ka hihna thu phawk ta un” (Matthew 28:20) a cih kammalte in, khattang a zuang John pen thapia den hihtuak hi. Hih Mangmuhna Zeisu’ “kilaakna” tengin amah hehnem a, Zeisu zong pen “Alpha leh Omega, A masa leh a nunung” hi in, khattang ompa tawh thutuam khatin omkhawm tawntung hi. Hih pan a kipan a zomsuk khempeuhin hongpai leitungvaite vive ahi hi. Tangthu pen a lamdang mahmah in kimu khol saka, amau adingin mailam’ thu hiziau napi, ei adingin Christian pawlpi’ tangthu hisese hi.        

          Hong piang ding gimna leh haksatnate kawmkalah, hunbei dingzia zong John kiangah kilak hi. “Vanthak leh leithakkhat kamu hi. Vanmasa leh leimasa maimangkhin a, tuipi zong om nawnlo hi. Mothakkhat a pasaltawh kituah dingin kizem bangin, vantung Pasian kiang panin, khuapi siangtho Jerusalem khuathak a hong paisuk kamu hi” (Revelation 21:1, 2). Leitung hun bei nading Mangmuhna sung kiciamteh tengin, John pen Pasian panpihna leh kamciam sungah tawldamna taktak ngahsak hi.

          Nuntakna haksa in lauhuai theikha ding hi. Pasian in mailam khempeuh theikhol a, tua mailam hunsaupi in eite adingin bang hehnepna hi thei hiam? 

 

Monday                                                       September 20

Hun Simna

 

          Olives mual tungah, Zeisu in, nungzuite’ dotna a dawnna ah, tangthu azaizaw in pulak hi. “Hih thute cik ciangin hong piang ding a, nang na hong pai ding hun leh hun bei nading bang lim om ding hiam hong genin” (Matthew 24:3)a ci uhhi. 

          Mate 24 sunga Zeisu sermon kigelhte in, ama’hunpan kipanin nih veina hong paikik kikal sungteng huamgai hi.      

          Zeisu in, khang tawntung adingin Pasian’ geelna ombang a hun nunung genkholhnate bangin, hun nunung mite kiginkholh theih nadingin a mite hilhkhol nuam hi. I kimkotteng a kisia khin zongin, Ama itna sungah lungmuang takin tawlnga dingin hong deih hi. 

          Daniel 12:1 sungah “mihing pianzawh a kipan a nasia penpen gimna hun hong tung ding hi” ci hi. Zeisu in Amah nihveina hong paima a piang ding teng ahih mannin, i kiginkholh ding hong deihsak hi.

          Ama’ koibangin hongpai ding hiam? Khemna koici pelhthei ding ihi hiam? Matthew 24:4–8, 23–31.

……………………………………………………………………………………………………..……………………………………………………………

          Hun nunungah Zeisu in hong pai takpi ding hi. Ama’ hong pai ding hungeelna genkholhna sunga omkhin a, Ama’ sermon sung nangawnah om khin hi.   

          Leitungbup khuahun kikhellai in zong leitungbup sung pan mi giat bek mahin kigingkhol kha uhhi. Zeisu amah teekin nihveina hong kumkik ding lam-etloh laitak ahih dingpen, tua tuiciin tawh na genteh hi (Matthew 24:37-39). Nihveina hong kumkik ding hun kuamah’n theilo mahleh (Matthew 24:36), Pasian’ genkholhna bangin leitung thupiangte i muhciangin ahun naitektek cih Pasian in hong theisak hi.

          Genkholhna sungah eimah zong pansan nei dingin hong sehkhin hi. Eite pansan bang hiam? Matthew 24:9–14 siksan in.

…………………………………………………………………………………

          Hih vannuai sungah eite in a en bekte ihi hetkei hi. Lungdamthu thehthang dingin, eite in lawptakin semkhia ding hihang a, bawlsiatna mahmah zong phukha ngiat ding hihang.

          “A tawpdong kipkho” cihteh bang acihnopna hiam? Koicih peuhmah ding? Mi tampi a puk ziazua bangin, ei i pukkhakloh nadingin bang khentatna neih kul hiam?

 

Tuesday                                             September 21

Mainawt Ding Thupiakte

 

            Thu lamdang piang ziahziahte eite’n ukzo peuhmahlo i hihhang, eite in bangmah semlo in tu hithiat ding zong hituanlo hihang. Mite’ ngaihsutdan pen “hun nunung thupiangte bel genkholh bangin pianglel ding hi a, om ngei bangin om lel ding lobuang bang hih ding om hiam? Kei guak in bang hihthei ding ka hiam?”

            Christian peuhmah in amau kimkot a mite tawh tuabangin kizop ding hi lo a, a diakin hun nunung ah tua cihloh ding kisam hi. Mangmuhna 14 sungah, hih banghun laitakin eite ngiimna pen, Pasian’ thukhenna leh Zeisu nihveina hong paikik ciangin kiging dingin midangte huhding cihi. 

            Revelation 14:6–12 simin. Hih tengah bang honghilh a, leitungah bangthu tangko ding ihi hiam? Banghangin hihthu in manmawh hiam? 

……………………………………………………………………………………………………………………………………………………………………

            Adventist i hihmanin “tulai thumaan” (2Peter 1:12) sang hihang a, a diakdiakin, “Vanmi Thumte Thupuak” hipha diak hi. Tulai hun in eite hong sapna thubulpi i muthei hi. 

            Phawk dingin “tawntung lungdam thu” tawh panpah a, tua in eite’lam-etna leh hotkhiatna ahi Khazih sihna, thawhkikna ahi hi. “Ama’ thukhen hun hong tungta hi(Revelation 14:7) cih penin hun nunung hun honglak thupuak ahi hi. Tua banah “van leh lei bawlpa” hong bia un cih hong sapna langkhatah; Babylon sungah omlai a “sahang leh a milim” a biate vauna lauhuai zong omlai hi. A tawpna ah hun nunung Pasian’ mite adingin: “Pasian’ thukham leh Zeisu’ teci panna a kemcing mite adingin upna leh thuakzawhna kisam hi” cihi. 

            Revelation 14:11. Sahang leh a milim abia mite tawldamlohna bangci gen hiam?

……………………………………………………………………………………………………..……………………………………………………………

            Sahang leh a milim abia mite asun azanin tawlngak omlo hiam? Ngaihsutna tuamtuam tawh khiatdan kibanglo theitak ahihhang, hihmite peuhmah in, Pasian tunga thumaan mite ngah khak tawldamna peuhmah ngahlo cih thukimciat lelni.

            Vanmi thumte thupuak apatna lamtengpen “tawntung lungdam thupuak” hi cih banghangin cithei ding hiam? Hih thupuakte leitungah i puakciangin a thumaan banghang in masuan tawntung ding hiam? Lungdam thupuak telcianna ah koibangin tawldamna bulphuh thei ding hiam? 

 

Wednesday                                                           September 22

Tawlnga Hithiat

          

          Christiante in kum zalom tampi sungmah Khazih hong pai ding ngak uhhi. Eite’ lam-etna saangpen hi a, eibek hi lo, a khang tawntungin a thumaan Pasian’ mite lam-etna ahi hi. 

          Hebrew 11:13–16 simin. Khangluite bek hi lo, tulai eite mahmah adingin bang kamciam om hiam? 

……………………………………………………………………………………………………………………………………………………………………

          Mi thupi leh thupilo a vekin silel a hih ciangin hih munte in khiatna nei khollo bang ahi hi. Hih “kamciamna a sangnailo mite” cih in bang ci nuam ahi diam? Amau sikhin a, vantungah Topa tawh mangkhawmuh in thaman ngah zihziah hileh, Billy Graham zong sikhin a, vantungah Zeisu tawh a maankhopna thute i zaza ding hi. Sihna thu peuhmah a leh a mak in kigengen hi. Mikhat si a, “RIP (tawlnga hithiat)” peuh cihi hang. Tua banzom bang omlai? Hih mite vantungah a ututin omta uh a, leitungah thupiangte khawng hong ensuk hithiat lel hiding hiam?

          Zeisu in sihna koici gen hiam? John 11:11 simin.

……………………………………………………………………………………………………………………………………………………………………

          Sihciangin “tawlnga hithiat” cihbel bangbang hitaleh thumaan hi photphot hi lo hiam? Misite tawlnga taktak uhhi. “Thu ummite adingin sihna pen thuneu hilel hi. Khazih in tawmveino sungbek dingin gen hi. ‘Ka thu a mang mi in sihna tuakkhalo ding hi, sihna ciamkhalo ding hi.’ Ei Christiante adingin sihna pen ihmutna hi a, khuamial sungah gamdai takin ompak hilel hi. Amau nuntakna ahihleh Khazih hangin Pasian in kepsak a, eite’ nuntakna ahi ‘Khazih hong kilat ciangin, Ama’ sungah minthanna tawh i kilangh ding uhhi’ John 8:51; Col. 3:4.”—Ellen G. White, The Desire of Ages, p. 787. 

          Zeisu in, mikhat a sihhunsung leh a thawhkikni zingsang pen khuaphawklo in ihmutna tawh genteh (John 11:11, 14) a, hot ngah leh ngahlo te’n zong a thamanuh thawhkikni zingsangin ngahpan dinguh (John 5:28, 29) cihi. Sihna hongtun hunhun in a kigingsa in i omtheih ding Amah’n hong vaikhak phapha hi.

          Na it na ngaih a sisate in tawlnga hithiat takpi cih na theih manin bang hehnepna na ngah tuam hiam?

 

Thursday                                                  September 23

Topa sungah Lungdam Tawntung

 

          Zuutphone sung Google Gamlim pen kizangpha mahmah hi. Phone sungah GPS hong ommaa in koici gamtat cih zong phawkzo nawn tuankei hang. Theih ngeilohna mun khat bang pai nuam hileng kilungkham mahmah a, phone sungah google gamlim a omkhit ciangin gamdang khuapi khat zong lungmuang takin kipai theita hi. Hih lungmuanna pen, Pasian in genkholhna sungah hunsehna hongpiaksa tetawh a kigenteh thei diam.

          Khatveivei ciang, phone apps sungah mun khawng i khialhkhak ciang, ahih keileh lampi tomzaw peuh i theihciangin hong kilak lampi zuilo in adangkhat peuh kizui thei hi. Cihdan tuam khatah, ei painopna mun ahi lo khat tungkha in – lungsim nakbuai mahmah thei hi. 

          Philippi 4:4–6 simin. Haksat natna a kidim hih leitung mahmahah tawldamna leh lungnopna taktak koici ngahtheih ding Paul in ci hiam?

…………………………………………………………………………………………………………………………………………………………………

          Hih munsan ah Paul in, haksatna bangbang na tuak zongin lungdam lel ding hong cilo hi. Paul in, “Topa sungah Lungdam tawntung in” cizaw hi. I tuakkhak haksatna hang hizawlo in, i tunna mun peuhpeuh Pasian tungah i kingak nakleh, Ama’ hoihna, itna leh singlamtehah hong ki piakkhiatna hangin, a genthei i kha in, Ama sungah lungdam tawntung ding hi. 

          Hih kammalte in hih leitung galkhat lam a tawlngakna leh lungnopna a gengen ahi hi.

          I lungsim tawlngak nading dan pen “bangmah lung hihmawh neilo” dingin ngaihsun dih in. Tua bangdan pen leitungmi ta’dingin piang zolo ding a, (Paul nangawn haksatna tampi mah nei hi)a hihhang itna Pasian in na khempeuh lencip a, Ama’ gam sungah hong honkhia ding, eite lunghihmawh teng khempeuh pen muhna thak tawh hong musak ding hi. 

          “Topa ei kiangah om hi. “Hong naih mahmah a, sihna sung ahi ihmut khit ciangin, i muhkik masak ding pen Khazih hong paikikna” hipah hi. 

          Nuntakna pen kitelkhialna, ki etcikna leh kitomgawpna khawng tawh kidim hi. Kuamah i pengzokei a; sawltak Paul zong peng tuanlo hi (2 Cor. 11). Ama cihnopna pen bang peuh a piang zongin, Khazih hangin hong kipia kha-tawldamna sungah tumahmah in lungdam ding cih hong gengen ahi hi. 

          Philippi 4:4–6 simkik in. Bang haksat gentheihna peuh na thuak zongin, hih kammalteng nangma nuntakna sungah na koici zattheih ding hiam? 

 

Friday                                                       September 24

Ngaihsutbeh Ding“I thungetna peuhmah i ngetbanglianin hong kipiak ding lunggulh hang a, tua bang in hong kipialo-in, a tumdang khat peuh hong pianzawk ciangin i lungkia thei hi. Thunget bangbang a hun leh deihna tawh kizui in hong piak danding Pasian hoih lua in theikhialua hi. Ei deihna sang a hoihzaw in hong lepsak zawsop ding hi. Ama’ pilna leh itna muang in, ei deihna hong zom zawdingin ngenlo ding hang a, Ama’ deihna eimah’n zop zawk dingin amai ah lut ding hihang. Eite’ deihna leh lunggulhnate Ama’ deihna sungah mangsakzaw ding hihang.”—Ellen G. White, Gospel Workers, p. 219.

          “Tua hunin, amite honding leh tawntung nuntak pia dingin Zeisu hong pai madeuh in . . . Hankhukte kihong in, misite gualzosa in hong thokhia in, Sihna aw na guu koiah om hiam? Han aw, na gualzawhna koiah om hiam ci in kiko ding uhhi. Zeisu sungah a ihmu it leh ngaihte in sih theihlohna silhsa in hong thokhia ding uhhi.”—Ellen G. White, Counsels on Stewardship, p. 350.

 

Kikup Ding Dotnate:

 

1.   Kidona lianpi omzia ngaihsunpha in. Leitungah koibangin hong kilangkhia hiam? Nangma nuntakna mahmah eleh? Om takpi hilo hiam? Mite’n dawite om taktak ding khawngin ngaihsunlo uh himahleh, hih thute piang taktak hi. Leitung pianzia i theihtel nadingin hih Kidona Lianpi thuzong telphat mahmah ding banghang kul hiam? Banghangin hih Kidona Lianpi in hehnepna tawh tawpthei ding hiam?

2.  Genkholhna khengval a paikha peuhmah lungheina peuh piangsakthei hi. Mi genkholh mawkmawk i upmahmah khatpeuh hong tangtunloh ciangin pawlpi mite in koibangin lungsim buaipihthei uhhiam? Tua bang thaangsungah awkloh nadingin koibangin i kikem khinkhian thei ding hiam? 

3.  Revelation 14:9-14 sungah sahang leh a milim biakna tawh a tawldamlote’ thu simkik unla, bang acihnopna hiding hiam?

4.  Pawlpi sungah kidona khatpeuh a omleh zong Khazih hong paikik nading tawh kizomthei kizomlo thei lel hi. Bangbang hitaleh, Topa hong paikik ding thupuakna ah kihel tawntung ding banghangin phamawh thei ding hiam? 

 

See also  ZSL 5: Laisiangtho Bekmah
Tags: ,

Admin

Admin

Top