A CINGTAAK VANNUAI AH LANGDONA

A CINGTAAK VANNUAI AH LANGDONA - Power Point

A Cingtaak Vannuai ah Langdona

Lesson 1, October 1, 2022 Sabbath School Lesson Power Point

Sabbath Nitaklam

Tukalsung Simding: 1John 4:8, 16; 1John 4:7–16; Ezek. 28:12–19; Isa. 14:12–15; Mang. 12.

 

Kamngah:      “Nang khuavak’ta, Zingsol Babylon kumpipa aw, vantung panin bangci kiat na hi  hiam? Minamte a niamkoihpa ahi nangmah leilak dongah hong bangci kiphuk ahi     hiam?” Isa. 14:12.

 

Thu ngaihsunmi tampi takin gitlohna bulpi kanpha mahmah uhhi. Gitlohna a omman bek in hoihna kidawk thei hi ci in a ngaihsun mitampi zong omveve hi. Pawlkhat leuleu in, leitung pen a cingtak in piang hinapi, gitlohna honglut kha hi a ci zong omhi. Greek mite taang upna khat ah, Pandora in a bung a honciangin, bungsung pan gitlohna namkim lengkhia in leitung khempeuhah kizeel hi cihi (gitlohna bulpi gencianlo hinapi, tua bungsungah kikhol cipong hi).

Tua tawh kilehbulh in, Laisiangtho in, hong it Pasian pen vangliatna kidim (1Khang. 29:10, 11) a, picing hi cihi (Mate 5:48). Ama’ nasepna kicing (Thuhilhkik 32:4) a, leitung a piansak mahmah zong hipah hi. A kicing leitungah gitlohna in koibang in hongpiangthei hiam? Piancil 3 in a cihna ah Adam leh Eve pukna in mawhna, gitlohna leh sihna hong tun hi cihi. Tua dawnna in ngaihsut huai thunih omsak hi. Amau puk mapek in Eve a khempa “gulpi” a ommanin gitlohna omkhinzo hi (Pian. 3:1–5). Tua ahih manin, tulai hun mahmah in eite hong ukcip tua gitlohna bulpi zonkhiat nading pen, mihing pukmapek panin kipat kul hi.

 

Sunday                                                                              September 25

Piansakna, Itna Pulakna

Tua hun laitak in piansak sate khempeuh in sialehpha a kihel bialbual thupuak kician mello khat pua hi. Lingpak hoih in a gim namtui mahmah hinapi a ling in hong nasakthei mahmah hi. Vaphual zong melhoih mahmah hinapi vasa dangte buu susia in a note neeksak thei hi. Mihing hoih mahmah i sakhun a omhang, ngongtat gitlohna leh muhdahna tawh kidimthei veve uhhi. Khaici vawhpa thugentehna sungah “Na losung ah navawh khaici pen taangci hoihte hi lo hiam? Hih tahumte koipan in hongpiang hiam” (Mate 13:27) cih dotna pen lamdanglo hi. Lo neipa in zong “Galte vawh ahi hi” (Mate 13:28) ci in a dawng hi. Tua mahbang in Pasian in a picing vannuai piangsak himah taleh, galpa khat in gitlohna thuthuk khat tawh suksiatsak hi.

1John 4:8, 16 sim in. “Pasian in itna hi” cih kammal in Ama piansak nasepsate omzia koibangin hong lak hiam?

…………………………………………………………………………………

 

“Pasian in itna ahi hi”  (1John 4:8, 16) cih kammal in thukizom namthum neithei hi. Amasa in, itna cihlimlim amahguak omsim theilo in ki pulakkhia hamtang hi. (Pulak khiatlo itna a omthei hiam?). Pasian hong itna pen Thumgawm Pasian in, a mimal in neikim uh a, Ama piansaksa khem peuh tungah hawmkhia hi. A nihna, Pasian in a sepsa khempeuh pen a kikhel ngei hetlo hong itna hong lahna ahi hi. Tua in Ama’ piansak nasepte, A hotkhiat nasepte, leh mihing pumpi mahmah gimpiak ding thukhenna cihte kihel hi. A taktak in, “Pasian hong itna pen hong hehpihna sungah kiam hetlo in hong pulak hi. Thumaanna pen Ama’ tokhom bulphuh, leh hong itna’ gah zong ahi hi.” —Ellen G. White, the Desire of Ages, p. 762. A thumna ah, Pasian in itna hi a Ama’ hong itna hong pulakkhiat nungsang, Ama’ omzia tawh kilehbulh in mawhna bulpi hitheilo ding hi.

Tua ahih leh, Pasian in vannuai a piansakloh phamawh hiam? Zaa liatna lampang pan enpak leng, Ama’ deihteelna tawh a khentatna ahih manin, “No” kicithei hi. Ama’ omzia itna lampang panin enleuleu leng, itna a pulakkhiat theihna dingin vannuai khat Amah’n deih hi. Pasian’ itna a dawngkik thei bek thamlo itna zong a hawmkhia kikthei nuntakna nei mihing hong piansak zong lamdang mahmah hi. (Maku 12:30, 31 etbeh in).

Piansaksa leitung enkawikawi in. Mawhna in a suksiat teng lobuang Pasian’ itna a pulaklai bang peuh namu thei hiam? Piansak sateng tungpan in Pasian’ hong itna koibang in i kisinthei ding hiam?

See also  ZSL 7: Kampau, Athu le A Kizoppih Thute

 

Monday                                                                          September 26

Deihteelna, Itheihna Thubulphuh

1John 4:7–16 simin. Hih munpanin deihteelna tungtawnin itna neihtheihna ding bangpeuh hong hilh hiam?

…………………………………………………………………………………

Bawltawmpak pen nasia ziaizuai mahleh, nungtalo a hihman in khang theilo hi. Set milim zong a pau asep ding tampitak kiguangkhin sitset ahihhang, nungtalo in ngaihsutna neilo uhhi. Nuntakna leh deihteelna tegelpen, itna neihtheih na’ngleh hawpsawntheih na’ngin a kikhen theilo thunih ahi uhhi. I Pasian in zong Lucifer kihel vanmite leh leimi khempeuhpen, amau deih teelthei dingin bawl a, khialhna nangawn a teeltheilua uh ahihi. Vannuai buppi pen picing mahmah in itna leh pilna sungah khangto dingin Pasian in bawl hi.

1John 4:7-16 sungah John in “Pasian in itna” a hihlam thupisak in, eite mawhna hangin sih lawh ngamna ding pulak hi. Tua hi a, eite’n zong Ama’ hong itna pahtawina in khatleh khat i ki it ding uh ahi hi. Pasian’ itna sungah bulkip anei tua itna in, eite Pasian sungah omin, Pasian zong ei’ sungah omcih teci ahihi. Hihthu in, eimah kibulphuh in omngeungau sangin, mi’tungah Pasian’ itna pulakin hawmkhia thei ding in hong teelsak hi. Suakta takin teeltheihna pen ki zang khialthei mahmah a, Lucifer in zong vantungah langdona in zangkha hi.

Tua deihteelna atelpha mi pawlkhat in, Lucifer in langdo ding cih Pasian in thei gegu pipi in banghang in piangsak teitei hiam cih ngaihsun uh hi. Lucifer a piansak manin Pasian in mawhna bulpi hipah ding hiam? Hihthu tawh kisai in paulam ding tampitak omthei ahih manin, upmawh dawn mawkmawk theih ding dotna khat ahi hi. Pasian in vaipuak neimah hi cihtheih dinmun ahi hi. Mawhna bulpi leh a pianzia pen thuthukpi ahih manin kuamah in telgen theilo hi.

Bangbang ahi zongin, Pasian in mawhna piangsaklo limlim; phalna pia hibek a, singlamteh tungah Ama’ pumpi mahmah piakkhiatna tawh tua mawhna thaman teng lohsiang nadingin kipia hi. Gitlohna i thuak kawmkawmin, mawhna leh gitlohna thaman teng mansangpen in hong piaksak khin cih leh (Mate 5:43–48, Rom. 5:6–11), eite sangin Amah in tua gitlohna nakthuak zawlai a hih lam i mangngilh ngeikei ding hi.

            Deihteelna, Pasian hongpiak hi a, siangtho hinapi, nangma aading ahi a midang ading ahi zongin a lianmahmah nungzui peuh hong neithei hi. Hih silpiak ahi deihteelna khat peuh nabawl ding ciangin, a nungzui bang omding cih nathupi ngaihsut kha hiam?

 

Tuesday                                                                          September 27

Lungdam theihlohna Thusim

Ezekiel 28:12–19 simin. Hih mun panin mawhna bulpi thuthuk bang i mukha thei hiam?

……………………………………………………………………………………………………………………………………………………………………

Ezekiel’ laibu sungah a tamzaw hun nunung a ding limte vive kigelh hi. A gentehna tampi takmah (mihing, ganhing leh van) leh thupiang peuhmah vannuai bup ahih keileh tangthu cihte gentehna in zang hi. Ezekiel 28:1-10 sungah, Topa in Tyre kumpipa’thu gen a (Tyre khua pen tanglai Phoenician gam tuipigei khuapi haumahmah), “mihing” hilel napi kiphasak mahmah, ki pasian sak in, pasian’tokhom ah tu ning cihi.

Ezekiel 28:12–19 ah zong, hih tangthu mahpen vantungpan Lucifer hong kiatsukna thubul mah ahihna pulak hi. Tyre kumpipa pen mihing hilel a “tuipi sungah(Eze. 28:2, 8), “suang manpha tawh a kizeem vanmi(Ezek. 28:13), “Pasian’ huan Eden ah teeng” “Pasian’ mual siangtho tungah teeng(Ezek. 28:14) cihi.

A thupi pen kammal khat “Gamtat siat ding nakipatma hunciang dong nasuah tuung a kipan in, nagamtatna khempeuh paubaanna khatbeek omlo hi” (Ezekiel 28:15). Lucifer pen a picing khatmah ahih mahbangin deihteel theihna nanei a, tua deihteelna mahin Lucifer’ picinna sungah, gitlohna, a sia bawlnopna hong kihel hi. A taktak inbel Lucifer pen picingtak mahin, suakta takin deihteel thei dingin kipiangsak hi. Ahih hangin tua a deihteel theihna zangkhial in, ama’ dinmun taktak sangin kithupisak zawkha ahih manin siatna hongtung hi.

See also  Hihte Lakpan Aneupen

Pasian in a piansakna leh a vangpiakna ciangtawh lungkim zonawnlo a, Pasian tungah a lungdam ding phawklo in, ama kiphuutlo pipi khawng lunggulhkha pongmawk hi. A picing himah leh vanmikhat maimai ading in hihthu peuh koibang in piangthei peuhmah ding hiam?

“Mawhna pen, a kitelkheh nailo thuthukpi ahihi. Ama omtheihna hangthu bangmah omlo hi; telkheh ding khawng i hanciam lehbel, kitawzut nading paulam zongzong peuh kihi lel ding hi. A picing vannuai ah a kimaisak mawk theilo mawhna hong piang hi”—Ellen G. White, The Truth about Angels, p. 30.

1Thessalonians 5:18 ah, Paul in “nakhempeuh” lungdamko ding cihi. Haksat hun khawngah, lungkim theihlohna lungsim koici bangin zothei ding in hihmun in hong huhthei naci hiam?

 

Wednesday                                                                      September 28

Kiphatsakna Manh

Laisiangtho sungah a kidem tawntung thukhunpi namnih omden cih kimuthei hi. Khat pen Salem’ thukhunpi, Zion mual, Jerusalem, leh Jerusalem thak hi a; Pasian’ gam ahi hi. Tua gam a langdo gampen Babel kici Babylon hi a, langdona Satan’gam ahi hi. Pasian in Ama’mite pen Babylon dawi biakna sungpan paikhia in khapsa gamah Amah’bia dingin samdenden hi.

Etpak dingin, Abram kici Abraham zong, Chaldee gam Ur khua nusia in Canaan gam zuan ding in sam hi (Pian. 11:31–12:9). Jew mite in zong sawtpi khual a zinkhit uh ciangun Babylon nusia uh in Jerusalem hong zuan uh hi (Ezra 2). Mangmuhna laibu sungah zong, Pasian mite pen hun nunung Babylon nusia ding uh a (Mang. 14:8), Zion mual ahi Jerusalem thak beel ding in hongsam hi (Mang. 14:1; 21:1–3, 10).

Isaiah 14:12–15 sim in. Lucifer in vantungah a omgige kimlai a kiphatsakna hangin hih leitungah bang thusia hong tunliang thei hiam?

……………………………………………………………………………………………………………………………………………………………………

Laisiangtho sungah Babylon khuapi in Pasian leh Ama’gam talsik in langdo a; Babylon’ kumpipa a cihpen (Nebuchadnezzar a heemgenna) hi a, kiphatsakna limpua hongsuak hi. Babylon gampen milimpi’ kham-lutang hi cihthu Pasian in kumpi Nebuchadnezzar tungah pulak khinzo hi (Dan. 2:37, 38). Pasian pulakna langdona in, kumpipa in kham bekmah tawh milimpi khat bawl a – ama’gam beingeilo ding cihna hi in – mi khempeuh in zong tua biasak lailai hi (Daniel 3). Tyre kumpipa’thu (Ezek. 28:12–19) mahbang in, Babylon kumpipa mahmahpen Lucifer limpua hipah hi.

Isaiah 14:3-11 in, kiphatsak heuhauna hangin Babylon kumpipa pukna gen hi. Tuakhit teh Isaiah 14:12-15 sungah, tangthu panin vantung kumpigam’thu ah hei in, Lucifer’pukna bulpi taktak pen kiphatsakna a hihna pulak hi. Lucifer in ama’tokhom pen vantung vangliatna khempeuh tungsiah ah lamto in “Sangpenpa(Isa. 14:14) bang kahi ding hi cihi. Hihpen deihsakna lianpi tawh Pasian’ hong itna lehdo kipatna, angkhualna leh demna hipah hi. Galpa inbel Pasian mawhzon ding leh a vantung mite lakah zuauthu thansak ding khawng kihta vetlo lel hi. Tuate in vannuai ah gitlohna thubulpite ahi hi.

            Eite zong zaa liatna, gualzawhna khawng hangin kiphatsak ding bangzah baih naci hiam? Singlamteh masuan gige leng tuabang thaangte sungah pukna dingpan koibangin hong kemcing thei hiam?

 

Thursday                                                                            September 29

Uplohna Kizeel

Mangmuhna 12 simin. Hih mun in vantung langdona pen leitungah a kilawhna koibang in hong hilh hiam?

……………………………………………………………………………………………………………………………………………………………………

           

Lucifer pukna pen gallelhna maimai hi hetlo hi. Mangmuhna 12 sungah, vantungah gal hongpiang a, Lucifer leh a vanmite in Christ leh a vanmite langdo uh cihi. Tuamun ah Lucifer pen “tanglai gulpi,” “Dawimangpa Satan,” leh “leitungmi khempeuh a khempa(Mang. 12:9, 10) a cihi. Christ ahihleh “Michael(Mang. 12:7) hi ci a, “Pasian tawh kibangpa” a cihna hi.

See also  ZSS 3: Pasian’ Sapna

Jude 9 in, “vantungmi mangpa Michael” a nacih manin, pawlkhat in Amah pen vanmi maimai hilel ci in umphial uhhi. Daniel inbel, ama’ mangmuhna khempeuh pen, Khazih i tawntung gam – khut tawhlo in hongpiang suangtum (Dan. 2:34, 45), mihing’ Tapa (Dan. 7:13), vantung galkap mangpipa (Dan. 8:11, 25), a lian vantungmi mangpa Michael (Dan. 12:1) cihbangin a pulak hi. Tua hi a Topa’ Vanmi cihpen Topa Amahmah hi a (Pai. 3:1–6, Sawl. 7:30–33), Michael a cihzong in Pasian mah ahi Christ mah hiding hi.

Mangmuhna 12 in hih kidona tangthu teng hong hilhcian diudeu a; (1) Lucifer in vanmi sehthum suah sehkhat tawh vantungah galdo, (2) Khazih in singlamteh ah a kiptakin a galzawhna (3) hun nunung ah a beibang Pasian’ mite tungah zomtosuak lailai cihi.

Hih kidona tawh kisai in EGWhite in, “Pasian in hehpihna lianpi tawh Lucifer sawtpi mah thuak keikai hi. Lungkim zolo in, a dik vanmite tungah zuauthu a nagengen ciangin thakhat in khiasuk pah tuanhetlo hi. Vantungah sawtpimah omlai hi. Kisikkik hun ding kipiapia in a mawhna kimaisaksak hi” cihi—EGWhite, The Great Controversy, pp. 495, 496.

Tua thu vantungah bangtanvei sawt cihzong i theizo tuankei hi. A hun sawt ding sangin a thupizaw thukhat pen Satan leh a vanmite in “guallel a hih manun, vantungah ki omsak nawnlo(Mang. 12:8; Luka 10:18 etbek in) cihi. A buaihuai pen ah, Amauteng ei leitungah hong tungsuk sese uhhi.

Hih leitungah tua gal kidona omtaktak cih koibang in mutel thei ding ihi hiam? Tua galdona sungah galpa i zawhtheih nading lam-etna khatbek in bang ahi hiam?

 

Friday                                                                                    September 30

Ngaihsutbeh Ding:      EGWhite’ kammal, Patriarchs and Prophets Laimai 33-43 ah “Why Was Sin Permitted?” leh The Great Controversy Laimai 492-504 ah “The Origin of Evil” simin.

“Satan leh a vanmite in vantung vangliatna, Pasian a zahtakhuaina, a minthanna teng mukhin napi uh langdo kha a hihmanun, hotkhiatna a ngah na’nguh lam-etna omtheilo hi. Amau theih ngeisa Pasian’ vangliatnate lobuang a dang vangliatna thak lamdang zong Pasian in lakngei tuanlo hi. Genzawhloh vangliatna sungmah ah langdo thei uh ahihleh, tua sang a hoihzaw lai dinmun ah koihtheih na’ng zong omtuanlo hi. Amaute’ lunghianna langdona leh maunopna lungsim tungah a gualzo zawtheilai ding vangliatna a kisiit khinkhian cih zong omtuan nawnlo hi. Amau’ mawhna leh a thuakkik ding uh peuhmah pen vantungah amau khatciat a kisang koihna dungzui in kigual ding hi.”—Ellen G. White, Confrontation, p. 21.

“Satan’ lampialna leh, tua tungtawnin mihingte a khemzawhna vang pen Pasian leh Christ in, a kipatcil pekpan in theikhin uhhi. Mawhna omthei dingin Pasian in thupia ngei lo hinapi, omthei ding cih mukholzo ahih manin; tua tawh kisai a hihding daan bek geelkhol hi. Leitung a itna lianlua mahmah ahih manin, a Tapa neihsun piakkhiat ding kamciam pah a ‘Amah a ummi khempeuh kisialo in tawntung nunna angahtheih na’ng uh ahi hi’ John 3:16.”—EGWhite, the Desire of Ages, p. 22.

 

Kikupding Dotnate:

  1. Mawhna kipatna tungtangah Pasian in vaipuak a neihleh neihloh nakpi takin kikum dih un. Koici khensat ding ihi hiam?
  1. Gitlohna tawh kisai dotna khempeuh pen singlamteh in koibang in vengsak hiam? Gitlohna a kipatna telphat theihna dingin; bang hangin singlamteh in thulaigil hithei ding hiam?
  1. Kum tultampi sung mawhna i thuakkhit ciangin, Satan in zong ama’ langdona’gau a thuak dingteng tellua mahmah khin ding hi. Tua pipimah banghangin Pasian langdo kenkon hiding hiam?
  1. Mate 5:43-48 sungah, Christ in, a kikhel ngeilo Pasian hong itna gen a, tuapen eite khatleh khat i kilah ding lim ahi hi. Na innkuansung leh napawlpi sungvuah koibangin zangthei ding nahi hiam?

Download (PPTX, 8.94MB)

Tags: , ,

Admin

Admin

Top