ZSS 2: A HOIHZAW  LEITHAK KHAT GEELNA

Lesson 2      A HOIHZAW  LEITHAK KHAT GEELNA

July 6 – 12

  Sabbath  Nitaklam                                        July 6

Tukaalsung sim ding:    Exodus 3:7; Matt. 22:37-40; Exodus 22:21-23; Deut.  14:22-29; 26:1-11; Lev. 25:9-23.

Kamngah:     “Nomau mipihte tungah phu lalo in, amau na lungsimneih kei dinguh a, nomau na ki it uh bangin, na vengte na it ding uhhi: Keimah in Topa ka hihi”. Lev. 19:18.

            Hong hehpih manin, Pasian in, kizopna tuam vilvel a nei dingin minei tuam hi. Enoch, Noah, Abraham, Isaac leh Jacob te tangthu sungah, kizopna puahphat ding Pasian in deih mahmah hi.Amau mimal leh amau innkuan a dingbek hilo hi. Pasian tawh a kizop uh ciangin, thupha sanguh a, kizopna te hoihzaw in thupha tampi hawmsawn thei uh hi. Pasian in Abraham kiangah, “Thupha ngah dingin, minamlian khatin nang hong bawl in, thupha hong pia in, na min kong liansak ding hi. Nangmah thupha hong pia te, thupha kapia ding hi” (Gen. 12 : 2, 3).

         Tua thupha te in, Israel minam tungtawn in hong luangding a, Messiah zong tua minam sungpan mah in hong piang ding hi. Pasian in Israel minamte piangsak a, tua minamte tungtawn mah in nasem hi. Thukham leh paidaan te pawi leh ngeina te zong amau nuntakpih dingin pia hi.

Sunday                                                             July 7

A Za Pasian

            “Ka mite in Egypt gamah a thuaksiatna te ka mukhin hi. Amau te saltanna ah a kahna awte ka zakhin a, amau’ thuakna te ka ngaihsutsak hi” (Exodus 3 : 7). Kum 400 sungbang sal nasep tawh ngak uh hi. Pasian in a mite enkik in, Egypt gampanin paikhiatpih ding kamciam piakhin hi napi, khangkhat khit khangkhat sal mahin, milim bia te nenniam in om uh a, Pasian dai diidee hi.

            Tua khit teh Pasian in lam tuampi  khat tawh hong kilak hi. Thongkia taimang Moses kiangah, sawlbawk lak meikuang tawh hong kilangin hopih hi. Moses nasep masak pen dingin, Egypt gam a om a mipih Israel te kiangah paikik ding a, amau te ki nenniamna te Pasian in mukhin a, don hi cih thu gen masak ding thupia hi. Damtak in thukawng hei toto lai ding hi.

            Exodus 3:16,17 simin.  Hih thupuak  khatbek tawh Pasian in a mite ading a geelna te a kipat ding banghangin thupi hiam? Hih Pasian kammal in nang lunsim hong koici laak hiam?

…………………………………………………………………………………………………………………..

            Ahih hang Pasian khawl nailo hi. Gam hoihzaw khatah paipih ding bek a, Egypt gampan paikhiatpih lel ding hilo hi. Kum 400 sung Egypt te hauhna ding teng sepsak khinzo ahihmanin, Egypt mite tungpan thaman hoih ngah teitei ding cih Pasian kam ciam hi: “Keimah in, Egypt mite muhna ah, hih mite maipha kapia ding a, note na paikhiatuh ciangin, a hawmguak in na pai kei ding uh hi” (Exodus 3 : 21). Nenniamna hun teng a bei ciangin, Pasianin hih salte minamthak in bawl hi. Pasian in amau te pen a tuam vilvel lametna dim minam a suak dingdeih hi. Pasian’ ngiimna in, a kimkot a om minamdang te mai ah, Abraham in, ama’ thupha tawh leitung mite thupha a sansak mah bangin, hih minamte’n limhoih limpha etteh cing hi dingin deihsak hi.

            Leitung ah thuaksiatna te khempeuh, Pasianin mu a, kahna awte za cih theihding bangzah thupi a, Pasian omzia bang hong hilh hiam? Exodus 4 : 31  lungngai in.

See also  SS 4th Qtr: Khrih Sungah Thu-um Mite Pumkhatna

 

Monday                                                  July 8

Thukham Sawmte

            Matt. 22:37-40  le Exodus 20:1-17 simin. Zeisu in thukham sawmte a tomlakna na muh teh, thukham khatkhit khat na teltheih sem nading hong koici huh hiam?

…………………………………………………………………………………………………………………..

            Thukham sawmte pen, gamkhat ki-ukna thukhun-pi te tawh kibang hi. A thu bulpi teng a pulak khit ciangin, tuateng siksan in, gam ki-ukna thukhun bawl a, mi- nam khat in dingsak hi. Khat leh khat aki it theihna dingun, thukham-kee te bawlsak lai hi. Khristian gam tampi takte in zong, hih thukhamte pan in, a gam thukham te a bawlna pen lamdang simtham hi.

            Hih thukham te tom linlian mah leh, a tomcinzia pen neuseh theih ding hilo hi. “That kei in” (Exodus 20 : 13) a cihteh, “nuntakna a tomsakthei gamtatna khat peuhpeuh”  a hi a, “mizawng, thuaksia te awlmawhlohna” cihte kihel hi (Patriarchs and Prophets laimai 308). Tua mahbangin, “gu ke’n” cihteh, “salkhawi, galsim, galmat” cihte hi a; “thaman piak ngiatngiat ding” Topa’n deih hi.  “Mikhat i  theihlohna, thanemna, leh tuahsiatna te tungah meet-sawmna” cihte kihel hi(Patriarchs and Prophets laimai 309).

            Ei leh ei, sia kei hang e, peuh i kici kha ding hi. Mithahna, guktakna ah khut khial i hih kei nakleh hoihpeuh i cikha ding hi. Ahih hang, Zeisu in, thukham a gen ciangin, na neunocik khat hihlohna zong thukham picing saklo ci hi. I ngaihsutna, i lunggulhna leh septuak i seplohna te zong, thukham palsatna (Matt. 5 : 21-30) hi ci hi.Thukham sawmte hoihtak a kemcing minam cih ngaihsun in. Lawpna tawh Pasian it a, khat leh khat a ki it minam hipah hi.

            Banghang in, Thukham te toi ngaihsut pahpah i hi hiam?  Inuntakna sungah a zaizaw nuntakpih theih ding te awlmawhlo kha hihang. A toi muhte in banghangin nuntakpih theizaw hiam?

Tuesday                                                            July 9

Salte, Meigongte, Tagahte, Gamdangte

           Exodus 23 : 9 sim lecin, Israel te a ding Pasian thupuak bang om hiam?

…………………………………………………………………………………………………………………..

            Salpan a suakta tuung Israel te’n, nenniam hihna, bawlsiat thuakna leh mival hihna cihte tel mahmah uh hi. A suahtak uh ciangin, amauommun ngei mangngilhloh ding Pasian in deih hi. A gupkhiatna thu mangngilhloh na’ngin, Paisan pawi bawlsak hi. “Salsuahna Egypt panin, Topa in vangliatna tawh, kote hong paikhiatpih hi” (Exodus 13 : 14).

Exodus 22 : 21-23simin. Amau, sal a hih ngeina dungzui in, minamthak a suak uh ciangin, a dinmunlui phawkkik ding banghangin thupi ding hiam?

…………………………………………………………………………………………………………………..

            Pasian in, a thukham teng a piak khit ciangin, tawmvei tak gamdai dide a hih manin, Pasian in Moses tuamsap in, hih thukhamte tawh kizui a nuntaktheih ding dan hilh sitset hi. Biakbuk alamding lai un zong, salte tungah gamtat dingdan amau thuak ngeisa te tungtawnin, khawkpi(chapter) thum dim bang hilhcianna pia hi. Gitlohna tawh kisai thukham, neihsa tawh kisai thukham, nisim tat leh heekdan tawh kisai thukham, thukhen zumpi leh thukhen mang khawng hong nei toto uhhi (Exodus 21 – 23).

            Minam thak sungah, khuami te thukham, khuapua mi thukham, cihte kician mahmah hi.Tuabang mite simmawh theilo ding, annek tuidawn nangawn zong, vang omtak mah in, ansangh cihkhawng zong kaikhawmsak hi. Tuabang a mi namdang te a ding vaihawmna pen tanglai in omngeilo hi. Tuni in zong, midangte tung thupha bawl ding cih zong a phawk meello tampitak om hi.

See also  Lesson 10:  Haksatna Hun Tawmnote

            Mi thuaksia te tungah hehpihna na neitheih tuam na dingin,na phutkhakngei bang thu khat peuhpeuh a om hiam?

Wednesday                                         July 10

Sawm ah Nihna

             Christian tampi takte in, Laisiangtho cihbangin sawm a khat pia uh hi. Malachi 3 :10 sung hipen a, a ngahsa te sungpan Sawm ah Khat tawh Pasian’ na semkik ding cihna hi. Hih sawm a khat te ki aapkik a, pawlpi simin, tua sawm a khat te lungdam thu tangko na’ngin zatna’ngthukhun kipmahmah te neiciat uh hi.

            Lev. 14 : 22-29 sim lecin;  sawm a khat aapkikna a thu bulpi in bang hi ci hiam?

…………………………………………………………………………………………………………………..

            Mawhzolna khat bel, sawm a khat aapkik leng kicing pah hi cih thu hi. Israelte tungah Pasianhilhna bang hi leh, sawm a khat pen a kipatna hipanlai ci hi. A ki ettelna khatah,Israel te’n a kumkhat sumlut sungpan Seh Li suah seh khat, ahih keileh, sawm a thum dong bang pen, Pasian nasem Siampi te leh mizawng te piasak uh hi. Laisiangtho siam pawlkhat in, gamdang mite, tagah te leh meigong te a dingin Sawm a Nihna ci hi.Mite in amau sepsa te tungah anlakna om ding a, Pasianin zong thupha hong pia ding cih kamciam hi.  Thupha sanglo zaw deuh te zong manngilh lo ding ci hi.

            Kumsim in hih te pen biakbuuk pan kizeek khia ding a, kum thumsim in bel, a tuam vilvel in, a kimkot a omte tungah hawmsawn lai ding hi. Hih anlakpawi ah, a ki mangngilh baih mahmah khatpen : “Sawm a khat piakkum a hi, a kumthumna kum in, amaute in na khuapi sunguh ah, anne in gilvah  in a omtheihna dingun, Levi mite, pemta te, pa neilo te leh meigong te uh tungah na pia un” (Deut.  26:12).

            Pasian lamlakna mah bangin, Israel tate piakkhiat sum leh pai te pen, mizawng cimawhte panpihna in kizang a, Pasian thupha leh hehpihna a san dandan uh leh mite’n amau phawkna dandan in a piakhia uh hi.

            Deut. 26:1-11 simin.  Topa’n bang gen hiam?  Mizawng tagah te piaknop na’ng lungsim bang ci zat theih ding i hi hiam?

Thursday                                                      July  11

Jubilee Kum

            Inn leh leitang bangmah a nei vetlo Israel tate in, Kamciam Gam tunding ngaka ombek a hi uh a, leitang te la pheiphei in, minam khatin ding ding’ cih Pasian’ geelna ahi hi. Joshua in makaih in, a behbeh, a innkuankuan in, leitang hawm diim diam ding cih Pasian deihna ahi hi.Hauhna te, hamphatna te leh na bulpi te khempeuh pen, mihau tawmno’ khut sung tung lel ding cih zong Pasian in thei khin hi. Bangkua haksatna te, cidamlohna, teelkhialhna leh kamsiatna khat peuhpeuh hangin, leitang neite’n a zuak uh leh; tua innkuan in cikmah hunin leitang neingei nawnlo ding hita hi.

            Pasian in, leitang peuhmah zuak theilo ding; zuaknop leh “Jubilee kum” ciang bekin zuakthei ding, Jubilee kum a tunteh, a neiluite aapkik ding:  ban ah, a kizuak leitang peuhmah, a zuakpa tanau khat peuhpeuh in, ut hunhun in tankik thei ding ci hi. Pasian in “Leitang pen keima-a’ ahih manin, neihsuak dingin leitang kizuaklo ding hi. Bang hang hiam cih leh note pen kei tawh a omkhawm khualmi leh pemta te na hi uhhi” (Lev. 25:23) ci hi.

See also  ZSS 3: Thusim pan Pulaakna ah

            Lev.  25 : 8-23 simin.  Hih thukhunte kizang peuhmah leh, i kimkot mipi a koici kikheel tam? “Khat leh khat na ki simmawh kei ding uhhi” a cih phadiak bang e?

…………………………………………………………………………………………………………………..

            “Pasian piak thukhunte pen bel, mite liangko kikim theihna’ng ahi hi.Kum sagihna Sabbath Kum leh Jubilee Kum te pen;  a kikal lakah a ki peelkhial khempeuh puahphat na’ng kum a hihi” EGWhite, Patriarchs and Prophets,  laimai 534.

           Lai Siangtho thukan taktak te’n bel, hih thukhun te kizui maw zuilo cih kician mello ci uhhi (2 Khang 36:21). Bangbang hi taleh, Pasian thukham kizui hi leh, leitung ah hibang thute omding cihna hi.  Mizawng cimawh te bel, Pasian’ deihna mah bang in, ki mangngilh lo bilbel hi.

 

Friday                                                            July 12

Ngaihsut beh ding: Patriarchs and Prophets, 303-314  sung  “Israel tungah a Kipia Thukham” leh  530-536 sung “Pasian in Mizawngte a Kepna” cih thulu te tawh EGWhite laigelh sim in.                                            

           “Moses in thukham a piakkhit nungsang, mizawng-te tungtang thukham Pasian piakte lakah zong a lamdang zaw tuan bangmah omlo lel hi. Pasian in a mite thupha tampi pia ding ci napi, mizawng om vetlo ding hi zong cituanlo hi. Na gamsung vuah mizawng kitatsat ngeilo ding hi cizaw hi. Hehpihna, citna leh thupha bawlna nei mite zong tatsatlo in om ding hi. Mite in kamsiatna, damlohna, neihsa mansuahna cihte thuak uhhi.  Pasian hilhcianna bangin gamta peuhmah le uh bel, khutdawhngen leh anneilo cihte om ngeingeilo ding hi” (EGWhite, Patriarchs and Prophets, 530-531).

            “Hih thukhunte pen azawng ahau liangko kim in thupha santheihna ding hi zaw hi. Huaihamna te le ki-liatsakna te beisakin, khantoh na’ng lam zongzaw in, mi deidan neilo a deihsakna tawh, lawmleh gualhoih bawl in, ki makaihna kipsak ding hi.  Mi khempeuh a kizom bikbek i hi a, midang phattuam na’ng i bawl peuhpeuh, ei thupha sanna hipahpah hi” laimai 534, 535.

Kikup ding Thute

  1. Israel te minamthak in dintheih nading Pasian geelna te, thukhun te khempeuh lakpan a bangpen in na lungsim hong lapen hiam?
  2. A mite a piak thukhamte in, a thanempen na munte Pasian in ngiim cih na koici theihthei hiam?
  3. Hih thukhun te telsiam in i zangthei ding hiam? A koipen in tuhun a ding in kilawm nasapen hiam? Israel te a dingin a nisim nuntakna vuah a zatding uh a hih manin bang thu thupi mahmah i sin theih ding a om hiam?

Tomkaihna:    Israel mite thuaksia in akahna awte Pasian in za a, gumkhia hi. A ki mangngilhcipsa te leh a thanempen na te uh puahpha kik in, thupha sang minam thak khat a bawl ding a Pasian in a sapna ahi hi.

Download (PDF, Unknown)

Tags: ,

Admin

Admin

Top