ZSL 12: A Hopsawntaak Thupuak

Zomi Sabbath School Lesson 12: A Hopawsawntaak Thupuak, Zokam, Zolai, Tedim Laisiangtho Hilhcianna, Sinna,

LESSON 12                                                       *September 12–18

 

A HOPSAWNTAAK THUPUAK

 

SABBATH NITAKLAM                                     September 12 

TUKALSUNG SIMDING: 2 Pet. 1:12, 16–21; Mang. 19:11–18; Mang. 14:14–20; Thuhilhsia 12:13, 14; Mang. 14:6–12.

 

KAMNGAH: “Leitung vantungah ateng mi namkim, pau namkim azang mite tungah a tawntungin lungdam nading thu gending anei vantung- mi khat van kimlai ah leng ka mu hi. Amah nakpi takin kiko a, Amah in mihingte thu a khending hun hong tungta ahih manin, Pasian kihta unla amah phatun. Van le lei tuinak le tuipite abawlpa hong bia ta un aci hi.” (Mangmuhna 14:6, 7 NKJV).

 

Khazih hong sihna bel vannuaibup huam a; koi hun, koilai cilo mihing nungta ngei khempeuh huam gai hi. Lungdamthu zong pau nam, ngeina le omna mun khempeuh ading ahi hi. Minam kideidansa teng kizomkik sak hi. Zeisu in a nuntakna, a sihna le a thawhkikna tawh hell vangliatna teng zogawp hi. Lungdamthu in Zeisu’ tangthu ahi hi. Eite adingin si a, ei ading mahin nungta hi. Mawhna daan pan hong hon dingin hong paikhin a, mawhna om nawnlohna ah hong honkhia dingin hong pai kik ding hi. Ei thuak ding a kilawm sihna hong thuaksak a, ama’ nuntak ding kilawm nuntakzia, ei hong nungtasak hi. Khazih sungah dikna, sianthona i ngah a, khatvei ciang minthanna i ngahlai ding hi.

Laisiangtho in Zeisu hong paina a nihvei tuak mah un thupisak hi. Hong gum dingin hongpai masa a, man genzawhloh tawh hong tatsate inn ah ciahpih dingin hong pai kik ding hi. Mangmuhna laibu pen, Zeisu hong paikik nading leitung kigingsak dingin a kigelh hi phadiak hi. Tu hun adingin thupuak phamawh khat ahi hi.

*Tu kal sung tengin, kum zalom 21 sung ading Mangmuhna laibu gensa teng i sin ding uhhi. Pawlpi in hun nunung thupuak hawmsawn dingin Zeisu hong sapna i sin ding hi.

 

SUNDAY                                                                      September 13

PETER’ THUPUAK – TULAI THUMAN

 

Hotkhiatna tangthu sungah, Pasian in, mailam thupiangte telzawh na’ngin thupuak tuamvilvel hong puak hi. Pasian in guallel ngeilo hi (Isa. 46:9, 10). Thukhenna khat peuhpeuh a tun ma in, kamsangte sawl in thupuak khat peuh pia masa hi (Amos 3:7). Tuiciin tun madiak in, tuiciin tun ding Noah sawl in tangkosak khol hi. Egypt ah zong Joseph paikhol sakin, kialpi dozawh na’ng kum sagih sung hauhna tawh kigingkhol sak hi. Jew kamsangte in, Babylonte in Jerusalem a suksiat ding Israel makaite kiangah genkholsak hi. Kisikkik nading tuiphumpa John thupuak in zong Zeisu hongpai masaklai in mi tampi kigingsak hi.

Peter 1:12 simin. Peter in Pasian thupuak koici pulak hiam? 2 Peter 1:16–21simin. Peter leh nungzuite’n a tangko uh “tulai thuman” in bang a hiam?

 

 

Kum zalom masa ading thupuak thupipen in Khazih hong pai khin cih thu ahi hi. Pa’ hong itna pen Khazih in singlamteh tungah  kipiakna   tawh  honglak  hi. “Mawhna thaman in sihna” hi a, Khazih hangin mi khempeuh in tawntung nuntakna ngah uh hi. Upna tawh i saan hiphial taleh, eima teelsiamna bang ahi hi (Rom. 3:23; Rom. 6:23; Eph. 2:8). Zeisu sungah hotkhiatna thu cih pen ani ciangtanh bei ngeilo hi. Khangsim adingin tulai thuman hiden hi. Laisiangtho laibu nunungpen Mangmuhna laibu in, a sawtlo in Zeisu hong paikik in tawntung hotkhiatna hong pia ding cih gen hi. Mihing’ ngeina in a khialhna le angkhual biakpiakna cihte pholak hi. Zeisu in mihingte ading hong sepsak thute Mangmuhna in a kipatpan a tawpdongin pulak hi. Zeisu in, a Pa’ teci maan hi a, “leitung kumpite a ukpa” ahi hi. Amah in “eite hong it a, ama’ sisan mah tawh i mawhna hong sawp in, a Pa Pasian maiah kumpi le siampi hong suaksak hi” (Mang. 1:1–6 en in). Mangmuhna laibu pen Zeisu le ama hun nunung thupuakte tawh amite, ama hong paikik na’ng a kigin kholhsakna ahi   hi.

 

Mangmuhna laibu na simteh bangpeuh na phawk kha hiam? Genkholhna Sapite khawng le lim a tuamtuamte peuh maw le? Zeisu in, genkholhnate banghangin Mangmuhna laibu sungah hong pia hiam? Mihingte a itna thu hihte in koibangin pulak uh hiam?

 

MONDAY                                                                    September 14

MANGMUHNA’ IE HUN NUNUNG BULPHUH

 

Lungdamthu bute in Khazih hong pai masakna bulphuh hi. Asuahna, a nasepna, a sihna le a thawhkikna thute gen hi. Hong paikik na’ng thu zong gen mahleh, a bulphuhpi hi lo hi. Mungmuhna laibu in, a khangkhangin kidona thute bulphuhpen hi. Genkholhna khempeuh in Topa hong pai kikding thu vive gen uh hi.

 

Mang. 1:7; 11:15; 14:14–20  le Mang.   19:11–18 simin. A thukhupna koici kibang uh hiam?

 

 

Mangmuhna apat pan atawp dongin Zeisu hong paikik ding thu gen suksuk hi. “A kigo Tuu no” (Mang. 5:12) in kumpite’ Kumpi le topate’ Topa (Mang. 19:16) ahi hi. Ama’ mite a bawlsia galte khempeuh susia khin ding hi (Rev. 17:14). Mawhna lauhuaina pan honkhia in minthang innah ciah pih ding hi. Sia le pha kidona lianpi zong tawp ta ding hi. Leitung thaksuak ding a, misiangthote in a Topa tawh mangkhawm tawntung ding uh hi (Mang. 21:1–4).

Mangmuhna 22:7 (12, 17 leh 20 zong), Zeisu in, “Ka hong paibaih tading hi. Hih laibu sung a kigelhthu a zui mite mi hampha ahi hi” ci hi. Zeisu in mihingte kiang pan hong nget nunung penin amah it thukkik, a hehpihna sangsiam leh ama’ thumaante zui in, hong kumkik nading zong a kigingsa in om ding cihte ahi hi. Zeisu hong sapna aw Mangmuhna sungah, “Khasiangtho le Mothak in Zeisu kiangah, ‘Hongpai in’ a ci uhhi” (Mang. 22:17).

Tawntung nuntakna zong mite khempeuh i Topa in hong sam hi. Hong hotkhiatna thupuak a sangsa khempeuh in, hong kumsukkik ding thupuak a sangthei dingin midangte zawnding hong deih hi. Hong paikik ciang leitung kigingsak dingin thupuak puakding ei hong sawl hi. Leitungah Zeisu tawh Pasian’ na sepkhopna sangin thaman a tamzaw nasep omlo hi. Hun nunung in hotkhiatna’ng ngiimna sungah kihelna sangin tangtutzawk ding nasep omlo hi.

Khazih, hong paibaih ding hiam? John in tunung kum 2000 lai pekin gelh khin hi. Misite omzia i theihsa hi a, Zeisu hong kumkik ding cih pen, mikim in i muh ding  hi a, i sihkhit peuh ahi diam kitheilo hi. Zeisu bangzah in hong paibaih taktak ding hiam?

 

TUESDAY                                                                     September 15

MANGMUHNA SUNG HUN NUNUNG THUPUAK

 

Mangmuhna laibu’ laigilpi in alian 14 ahi hi. Hun nunung a nungta Pasian mite adingin thupi phadiak hi. Mihingte adingin hun nunung Pasian’ thupuakte om hi. Hih hun nunung thupuak in Pasian’ mite bek hi lo, mihing khempeuh ading thupi mahmah hi.

 

Mang. 14:14–20 simin. Topa hong paikikna bang limpua tawh kilak hiam?

 

 

Anlakna pen Laisiangtho in Zeisu hong paikikna limpua in zang hi (Mate 13:37–43; Maku 4:29). Mangmuhna 14, an minte lakna pen, misiangthote aki hotkhiatna hi a, an minkikte in migilote a kisuksiatna limpua ahi hi. Mangmuhna 14:6 -12 sungah, numei pasal khempeuh hun nunung thupuak tawh anlak hun ading kigingkhol ding cih hong hanthawn hi.

 

Mang. 14:6, 7 simin. Hih tengah bang thugil na mu hiam? Ei Seventh-day Adventistte’n i teltheih nadingin hong bangci huhthei hiam?

 

 

Mangmuhna 14, vantungmi khatna’ thupuak in, kum zalom 21 sunga mite’ nuntakpih ding hi phadiak hi. Pasian’ hehpihna in mawhmaina hong pia cih lungdamthu ahi hi. Mawhna gu pan hong suaktasak a, gualzawhna hong pia hi. Hih thupuak in Khazih hong piansakna leh hong  tatkikna tawh kiphu thei  dingin   hong vaihawmsak  hi. Pasian’ thukhen ni ciangin thumanlohna khempeuh tawp  ta ding cih  hong lak hi. Thumanlo peuhmah om paisuak ngeilo dingcih hong theisak hi.

“SDA-te pen kulhcing leh khuavakpuate in hong kikoih ahi hi. Leitung a kisia tading cih a nunungpen hilhkholna hong pia hi. Pasian’ kammal khuavak bangin amau tungah tang hi. Vantungmi khatna, nihna, thumna thupuak khempeuh tangko dingin hong sawl hi. Tua sang a thupi zaw nasep dang omlo hi. Thudang a thupitsak zawkding kiphal hetlo hi.”—EGWhite, Evangelism, pp. 119, 120.

 

I pawlpi in ahi a, mimal in i hizongin, hih thu koici leng thupi ngaihsut thei ding i hi hiam?

 

WEDNESDAY                                                  September 16

PASIAN THUPUAK AKICINGZAW IN TEL

 

Mangmuhna hun nunung thupuak in, Zeisu hotkhiatna a picingzaw in hong hilh hi (Mang. 14:6). Pasian “kihta” zahtak dingin hong sawl a, Ama’ thukhenna telpha in a thukhamna mang dingin zong hong sawl hi (Mang. 14:7). “Pasian kihta” cih pen ei ngaihsut ding ahi hi. Pasian lungdam sak, amah masasak ding cihna hi. Athu mangin amah suunin nungta ding (Paunak 3:7; Sawl. 9:31; 1 Pet. 2:17) ci hi. Pasian “pahtawi ding” cilai hi. Pahtawi cihteh i nuntakna tawh pahtawi ding hi.

Thuhilhsia 12:13, 14 leh 1 Corinth 6:19, 20 simin. Hih munte in Pasian kihta a pahtawi cihthu koibangin hong telzaw sakthei ding hiam?

 

 

Midang kibuaipih noploh hun, mi awn tampi in amau angbek a khual hunin, hih thukhenna thupuakin mi khempeuh tungah mawhpuak i neihlam hong phawksak hi. Pasian zahtakna, athu manna leh thukhenna cihte kizom dimdiam uh hi. Thumanhna zong Zeisu tawh kizopna pan agah ahi hi. Ama’ dikna bekin, thukhenna pan suahtak na’ng kicing a, ama’ dikna bekin eite hong sungzo hi. Ama’ dikna tungtawnin ama’ min pahtawina i nuntakpih thei ding hi.

 

Mang. 14:7; 4:11; Piancil 2:1–3 leh Paikhiat 20:8– 11 simin. Pasian biakpiakna maan taktak koi pan kipan a, Sabbath in tua thu tel i hihna koici lak hiam?

 

 

Sabbath in biakpiakna thulaigil hi cih Satanin tellua ahih manin langpan mahmah hi. Khazih pen piangsakpa ahihna hong lak a, mi khempeuh in “van le lei a piangsakpa bia-un” (Rev. 14:7) ci’n hong sawl hi. Ama ut thu in na mawkpian cih upna a laan hun in, piangsakpa Zeisu in biak-taakcingpa hi ci in hong zol hi.

Sabbath pen, Pasianin hong piangsakpa hi cih phawkna hi a, amah bekmah biak- taakcing hi. Pasian in hong piaksa i hunte khempeuh lak pan khen 7 khen- khen khat Amah eite hong piangsakpa ahihna phawk ding hong deih hi.

 

THURSDAY                                                                  September 17

A NUNUNGPEN PASIAN’ SAPNA

 

Mangmuhna 14:8; 17:3–6; 18:1–4 simin. Hih munteng ah Khalam Babylon tangthu bang om hiam?

 

 

Mangmuhna sungah “Babylon” cih limlim mihing nasepna kibulphuh biakna manlo, mite’ ngeina tungah a ding upna khial cihna ahi hi. Mihing pahtawi a, amau hoihnate, mawhbanglo Zeisu nuntakzia sang pahtawi zaw hi. Pasian thupiakte tungah biakna makaite thupiak koihto uh hi. Tua Babylon in milim leh Ni biakna phualpi hi a, kha lam ginatlohna phualpi ahi hi. Hih biakna manlo ngeinate  pen  tanglai   Babylonte biakna tuamtuamte’n zangsuksuk uh hi. Hih leitung ading Pasian’ hun nunung thupuakpi pen Zeisu leh a dikna ahi hi. Vantung’ hong sapna “Babylon, a cimhzo hi, a cimhzo hi . . . Ama sung pan hong paikhia ta-un” (Mang. 18:2, 4). Khazih’ hun nunung thupuakte a pahtawi dingin, Pasianin SDAte hong sawl hi. Zeisu thuhilhnate i laptoh ciangin, Amah a lamto i hi hi. “Lampi, thumaan leh nuntakna” ahipa pahtawi ding ahi hi (John 14:6). Zeisu’ thuman hangin Babylon khialhna kidawksak ding hihang.

 

Mangmuhna 14:7, 9–11 simin. Biak dingin bang teng kipulak hiam?

________________________________________________________

 

Manguhna 14 in, biakding nam nih hong pulaak hi– Piangsakpa biakna leh Sapi biakna ahi uh hi. Hih biakna nam nih in Pasian’ Sabbath maan tungah kinga te leh, phuaktawm Sabbath maanlo tungah kinga uh hi. Sabbath in tawlngakna, khamuanna leh piangsakpa, Gumpa le hong pai ding Kumpipa cihte limpua ahi hi. Langdona Ni in, mihingte bawlsa, thukimna tawh a kipsak uh thute cihna hi.

 

Mangmuhna 14:12 simin. Hih mun in bang gennuam a, amai ah hongpai masa thutawh kisai in e? Hihtengah thukham leh hehpihna omkhawm a, tuagel kikhen theilo cihthu koibangin hong hilhcian hiam?

 

Friday                                                                          September 18

NGAIHSUTBEH DING: “Pasianin tanglai Israelte a saptuam bangin, leitung khuavak hi dingin tuhun a pawlpi hong samtuam hi. Vantungmi thumte thupuak tawh- a pawlpi leh leitung hong khenkhia in, amah tawh siangtho kinaihna hong pia hi. Ama’ thukhamna leh tulai thuman genkholhna kemcing dingin eite  hong  teel hi. Tanglai Israelte tungah Laisiangtho a piak mahbangin, leitungah tuate puakkik dingin eite hongsawl hi.”

“Mangmuhna 14 a Vantungmi thumte in, Pasian thupuak leh khuavak a sangsa mite hi a, leitung khempeuhah tua thute a puak dingin hong sawl hi. Khazih in a nungzuite kiangah: ‘Leitung khuavak na hi uh hi’ (Mate 5:14) ci hi. Zeisu a sangthei kha khempeuh kiangah Calvary singlamteh in: ‘Kha manphatna enin. “Leitung khempeuhah pai kawikawi unla, mi khempeuh tungah lungdamthu vahilh un” (Maku 16:15) ci hi. Hih nasep bangmahin dalsak kei ta-un. Tulai hun ading nasep thupi penpen hi a: a tawntung kip ding hi. Mi khempeuh a gupkhiat nading hong itna in a nungzuite khanglosak ding hi.”

“Ama tungah a kipia peuhmah Khazih in lungdamtakin sang hi. Mi leh Pasian kilemsak in, Zeisu hong sunglutna tawh leitung hopih hi. Gen in, thungen in, la in sa in la, ama thuman leitung dimsak in, mainawt pih in.” EGWhite, Counsels for the Church, pp. 58, 59.

 

KIKUPDING DOTNATE:

  1. Mangmuhna 14, vantungmi thumte thupuak in, SDAte koibangin limpua thei hiam?

 

  1. Sabbath leh ama’ limpuak a thupitzia ngaihsun in. Pasianin hong piaksa hun lak pan, khen 7 lak pan khen khat, amah phawkkik na’ng hong ngenkik cih sin hi hang. Mual siangtho peuh, khuasiangtho peuh paai bang in paai ding hisamlo hi. Kal khat khat veita bek Sabbath hong tung hi. Tua ni a thupitna leh a deihna koibangin i telthei ding hiam?

 

  1. Babylon a cipna thu leh Sapi ciaptehna thute mi sukhalo in koibangin hilhcian thei ding hiam? Mi a sukkhakna ciangciang ommah taleh, a tawmtheipen in, koici hilhcian ding i hi hiam?

 

 

READ  Kumkik Na’ng Lametna Nuntakpih
Tags: ,

Admin

Admin

Top