A Kilawm Tuuno

A Kilawm Tuuno

Lesson 4 : January 19 – 25

Sabbath Nitaklam Jan 19

Tukaalsung sim ding : Mang 4; Ezek 1:5-14; Mang 5; Eph. 1:20-23; Hebrew 10:20-23; Sawltak 2:32-36.

KAMNGAH: “Kap kei in. Judah sungpanin Humpinelkai, David suan sungpan in a lianpa, gualzo khinta a, tua laizial ciaptehna sagihte lakhia in, a laizial phelthei ding hi.” Mangmuhna 5:5.

Nung kaal in, leitung a ding Khazih thupuakte i mu khinzo hi. Tu’n, tuate hi nawnlo in, “Hih thu teng khit ciangin, a piangding thute” (Mang 4:1) hi ding hi. Mang-muhna a lian 4 leh 5 sung thute in, vantung a piang thute hi a, tangthu khempeuh leh, gupkhiatna tangthu, Pasian in uk a hihna thu pulaak hi. Mailam thupiang dingte a genma in, Khazih Siampi Lianpa in, gupkhiatna nasep i thu laigilpi a hihna pulaak hi.

Mangmuhna i sim tohtoh ciangin, limlaakna vive tawh ki pulaak a hih manin, telhak mahmah hi. A kammal te zong, laisiangtho luisungpan a laaktohtoh kammal pawlkhat kihel a, a khiatna maan taktak theihtheihna dingin, laisiangtho limlak te, telphot kul hi.

SUNDAY Jan 20

Vantung Kumpi Innsung Ah
Mang 4:1 pan kipan, Zeisu in, Ama’ hong paikik dong tangthu piang dingteng mangmu sak hi.

Mang 4:1-8, Eze 1:26-28 leh Mang 5:11-14 simkaak in. Hihte in vantung kumpi innsung omzia bang honglak hiam?

…………………………………………………………………………………………………………………..

Sawltakpa in, vantung kumpi inn tawlet pan a sung a et ciangin, Pasian tokhom mu hi. Tua Kumpi tokhomin, Pasian ukzawhna aana leh, sakhituihuup in, Pasian in Amite tungah a thumaanna limpua hi,(Piancil 9:13,16; Isa. 54: 9,10). Satan pen, Pasian ukzawhna aana a sutnuam galpa hi a, Pasian ukna nial kinken hi. Kidona Lianpi ah, a kituh thu laigilpi in, ‘kua in ukna aana nei taktak hiam’ cih thu a hihi. John in, Pasian tokhom a muhna pen, Pasian in ukna aana taktak nei cih i theihna ding a hihi,(Mang 4:1-8; 5:11-14).

Mang 4:8-11 leh 5:9 -14 simin. Biakpiakna maantaktak bang hiam? A lian 4 sungah, Pasian biaktaak cinna banghang hi a, Mang 5:9-14 na ah, Tuuno biaktaak cinna banghang hiam?

…………………………………………………………………………………………………………………..

Mangmuhna 4 na ah, Pasian tokhom leh, biak-piakna omden a hihna hong lak hi. A lian 4 ah, Pasian’ piansak theihna vaang leh, a lian 5 na ah, a kigo Tuuno gupkhiat zawhna vaang hong lak hi. Ni guk sung, na khempeuh a bawlzopa in, A mite khempeuh puahpha in, a kamciamsa tawntung innpi ah ciahpih kik ding hi.

Mang 5:12 na ah; Vannuai leitung khempeuh a bawlpa in, “a kigo Tuuno” hi ci hi. Tua thu in, gimna, natna kidim hih leitungah bang lametna hongpia hiam?

MONDAY Jan 21

Kumpi Innsung ah Vantung Kikhopna

Mang 4:4 sung a upa te pen, vantung mite hilo hi. “Upa” cihciang laisiangtho in, mihing tung a zat hizaw hi. Vantung mite pen, Pasian mai ah ding ci zel a, hih Upa te in, kumpi tokhom tungah tuu uh ci hi. A silh uh puanpaakte zong, a thumaan, Pasian’ mite’ puanpaak hi, (Mang 3:4,5). A lutung vuah galzawhna lukhu (Greekpau in Stephanos, Mang 4:4), te zong, galzo misiangtho te ading a kikoihkhol (James 1:12) sa ci hi. Hih Upa 24 te pen, galzo misiangthote cihna hi.

READ  Sinna 13: ANUNUNG KIPUMKHATNA ANGEI BATSAKKIKNA

Nambat 24 in zong limlak hi : 12 nihvei hi a, laisiangtho sungah, Pasian’ mite cihna hi. Upa 24 a cih ciangin, laisiangtho lui hunpan leh, laisiangtho thak hun a misiangtho te a cihnopna hi. Siampi 24 in, nikhat sung a nasephun a kikhopna zong limlak a hihi, (1 Khang 24:1 -19). Tua Upa 24 te pen, Zeisu, sihna zo a, a thawhkik lai (Mate 27:51-53) a thokik te hi kha ding hi. Tua hileh, hih Upa 24 te in, mipi’ ai-awh in, Pasian’ gupkhiatna nasepna te thumaan thutang a hihna teci pang dingin, van a kahto uh a hihi,(Mang 4:5,9). Upa 24 te leh Ganhing nungta 4 (aneu 8) te in, Tuuno mai ah bokin bia uh hi. “Nangmahin, kigo in a thokik, na sisan tawh minam khempeuh, paunam khempeuh hong lei in, Pasian mai ah siampi leh kumpi nong suaksak hi” ci in lathak sa in, Tuuno bekin biaktaakcing hi ci in phat uh hi,(Mang 5:8-10).

Mang 4:6-8 sungah anungta Ganhing 4 te thu gen hi. Ezekiel 1:5-14; 10:20-22 leh Isaiah 6:2,3 sung, “a nungta 4” a cihte tawh saikaak in.

…………………………………………………………………………………………………………………….

Ganhing nungta 4 te in, Pasian’ sawltak leh tokhom cing te hi, (Late 99:1). A kha te un, manlaanna lak a, a mit te un, pilna limlak hi. Upa 24 te leh vantung mite tawh, a omkhopna uh in (Mang 5:11), vannuai leitung khempeuh, Pasian maiah om hi cih ong lak hi.

TUESDAY Jan 22

A Kiciamteh Laizial

Mang 5:1-4 sung simin. Isa. 29:11,12 tawh enkhawm leng laizial in bang khiatna nei a, John, banghangin kap hiam?

…………………………………………………………………………………………………………………..

Greek lai sungah, tua laizial, Pasian ziatlamah kiphah ci hi. “A ki ciamtehna, a phelzo ding mi” a kizong hi,(Mang 5:2). EGWhite genna ah, tua laizial sungah, “Pasian nasepna tangthu, minamte leh pawlpi, a ukzawhna, a thukhamna te, gamte, minam te, paunam khempeuhte a huzaap zawhna tangthu te kigelh hi” E G White, Manuscript Release vol. 9, laimai 7. Tomlak leng, a puuksa mite a photkik na’ng thusim teng omna hi a, Zeisu hong paikik niciang kitelpha ding hi, (Mang 10:7).

Mang 5:5 -7 simin. bang hangin, vannuai leitungah tua ciamtehna hongzo ding, Zeisu bek omthei hiam?

…………………………………………………………………………………………………………………..

READ  Zokam Lesson 1: PATMOS PAN LUNGDAMNA THU

Vantung kumpi innsung buaina in, Satan’ langdona hang hi. Hih leitungin, Pasian bawlsa hi napi, Satan in sut hi. John’ kahna in, Adam pan kipan, a khang a khang a, misiangthote’ mawhna kolpan suahtak na’ng kahna te limpua hi. A kiciamteh laizial in, mawhnapan suahtak na’ng thute omna hi. A puuk leimi te’n, gupkhiatna dingin, galzopa Zeisu, tua laizial hongzo dingpa kisam uh hi.

I Tapidaw nuntakna sungah, a masa penpen in Zeisu, bangci i koih thei ding hiam?

WEDNESDAY Jan 23

A Kilawm Tuuno

Mang 5:8-14, Eph. 1: 20 – 23 leh Heb. 10 – 12 simin. Tua tengin, bang lametna leh hahnepna hong pia hiam?

………………………………………………………………………………………………………………….

Khazih in kumpi tokhom naih in, laizial la hi. Tua in, ukzawhna aana khempeuh nei cihna a hihi, (Mate 28:18; Eph. 1:20-22). Tua hun laitak in, vannuai leitung bupin, Khazih’ ukzawhna aana hong tel uh hi. Adam in a mansuah sa, Khazih in ngahkik hi. Khazih in laizial la cihciangin, hongpai ding hun khempeuh, Amah’n len, cihna hi. Ganhing 4 leh Upa 24 te’n, Ama’ maiah kun in bia uh a, “Nangmahin laizial la a, ciamtehna a hong dingin, na kilawm hi; A hangthu in, na si zo a, na thokik hi” ci uh hi, (Mang 5:9).

Ganhing 4 leh Upa te, vantungmite’n honpi te’n hong pawmuh a, Pasian tokhom kiimah dinguh in, “a kigo Tuuno, a hingkikpa, a puuksa mite tankhiapa” ci in phat uh hi, (Heb 7:25). Tokhom kiim aa ding khempeuh in zong, “ a kigo Tuuno in, vangliatna, minthanna, hauhna, pilna thahatna, zahtakna thupha te nei tawntung ta hen” ci in phat uh hi, (Mang 5:12) . Tua a tung a phatna awging khempeuh khit ciangin, Ganhing 4 te leh Upa 24 te in, “Amen” ci uh hi.

Mipil te’n, hih leitung pen, khatvei kaangtum ding a hih kei leh beimang ding hi ci uh hi. Pasian thu tawh saikaak leh kilamdang mahsi! Hong ngak gige mailam thu piangding te, eite a dingin bangzah lungdam huai hiam?

THURSDAY Jan 24

Penticost Thupiitna

Penticost ni a, Kha Siangtho a kibuak lai in (Sawlt 2:1-4), gupkhiatna ngiimna te sungpan a thupi mahmah khat a hi, Khazih in, vantung biakbuk sungah Siampi lianpa leh kumpipa in kipsakna a hihi. Pasian’ ziatlam ah om in (Mang 5:6,7), gupkhiatna ngiimna te a sem thei hi. Ama tungtawnin, mite in, Pasian tawh direct kizomin, mawh maisakna i ngah thei hi.

Sawlt 2:32-36 leh John 7: 39 simkhawm in. Zeisu in vantungah Siampi lian leh Kumpi a hih manin, eite’ a dingin bang lametna om hiam?

…………………………………………………………………………………………………………………….

Khazih, vantungah a kisaan manin, a nungzuite tungah zong Khasiangtho hong kibuasuk hi. Mang 5 : 6 ah, Kha sagih, “leitung khempeuhah kisawl hi” ci hi. tua Kha sagih te in, leitungah, Khasiangtho nasepna a picinna limpua a hihi. Khazih in Kumpi a suak ciangin, Khasianghto leitungah hong sawlsuk hi. Tua zong, Khazih’ nasepna masapen hipah hi. Khasiangtho hong kibuakna in, Zeisu, mihingte a ding, a kipumpiakna, Pasian in saang cihna a hihi.

READ  PAWLPI SAGIH TE TUNGAH THUPUAKTE

Khazih, vankahto a, van kongpi ah a lut ciangin, vanmi honpi te’n, pahtawi in pawipi khaam uh hi. Tua khit ciangin, Kha Siangtho zong mite tungah hong kibuaksuk pah a hihi. Penticost ah Kha hong kibuakna in, Zeisu hangin, vantung leh leitung kizopna kipta cihna a hihi. Khazih in, Amah, vantung Kumpipa suak takpi, ukzawhna aana nei takpi a hihna tellahna in, Amite’ kiangah a Kha hong sawl a hihi, EGWhite, Sawltakte Nasepte laimai 38, 39.

Hebrews 4:16 leh 8:1 simkhawm in. Zeisu in, vantung Kumpipa leh Siampipa a hih manin, nang a ding bang lametna lian om nasa hiam? I mailam bangmah muanhuailo kawmkaal ah, tua thumaante upna in, na nisim nuntakna bangci hong huh hiam?

FRIDAY Jan 25

Ngaihsut beh ding

EGWhite lai, Desire of Ages laimai 829 – 835 sungah “Ka Pa leh, Note’ Pa” leh: Sawltakte Nasepte laimai 47 – 56 sungah “Kha Silpiak” cih te simin.

Mang 4 – 5 sung thupuakte in hun nunung a om mite a ding hi phadiak hi. Penticost a Kha hong kibuakna in, leitung khempeuhah lungdamna thu kipuak, a kipatna a hihi. A thu laigilpi in, Pa ziatlam a om, Siampi leh Kumpi a suak Zeisu mah hipah hi. Christian masa te’ upna bulpi (Heb 8:1), leh innkiu suang (Sawlt 2:32-33; 5:30,31). A upna thu guipi leh haksatna sungah a thangahna pen uh (Sawl 7:55, 56; Rom 8:34) hi. Mi tampi mahin mu in, Pasian gam zong, amau nasepna tungtawnin ki phutzo hi. Mihingte puahpha a piangthaksak zo, Pasian kihta a bia dingin a huupzo thu in, Khazih hang a gupkhiatna lungdamna thupha bek a hihi (Mang 14 : 7). Eite lametna in, i Kumpi leh i Siampipa Zeisu bekmah hi a, hunbei dongin hong tonpih dinghi (Mate 28 : 20).

KIKUP DING DOTNA TE:

  1. Vantungah, Pasian phat a bia dingin, nikhat i tung teitei ding hi. Pasian in eite a ding a hong sepsak sa te khempeuh hangin, lungdamna leh pahtawina tawh bangci i phat thei ding hiam?
  2. Mang 4 : 11 leh 5 : 9 simin. Hi tengah, Pa leh Tapa i bangci muh hiam? A nihgel mahun, biaktaakcing a hihna bangci kilang hiam? A lamdang Pasian thumaan thu nih honglak Sabbath in bang hong hilh hiam?

Tags: ,

Admin

Admin

Top