A Tawldamlo Kamsangpa
Lesson 12 *September 11–17
A Tawldamlo Kamsangpa
Sabbath Nitaklam Sept. 11
Tukalsung Simding: Jonah 1–4, Jer. 25:5, Ezek. 14:6, Revelation 2:5, Luke 9:51–56, Jude 1–25.
Kamngah: “Ganhing tampi thamlo, a taklam khut leh a veilam khut nangawn a khentel nailo naupang tulza leh tulsawmnih valte tenna, a lian mahmah Nineveh khuapi pamaih salo ding ka hi hiam? a ci hi.” Jonah 4:11.
Laisiangtho sungah a zaknophuaipen tangthute lakah Jonah tangthu kihel hi. Pasian in a sap Kamsangpa hi napi bangci mawk hiam? Pasian’ sapna taisan hi. Tangthu hoih mahmah tawh Pasian in amah a zolkhit ciangin Topa’ thu mang dingin lungsim khentat napi, bangciang hih sawmbek hiam? Teci a vapanna mite in kisikkik takpi in amau a suahtak takpi ciangin, a phun ciak ding ciangbek ahi hi.
Tawldam ngahlo lua, lungnop ngahlo lua kisa in “Topa aw ka nuntakna tu in hong la in, ci in kong thum hi, bang hang hiam cihleh ka nuntak sangin si leng kei adingin a hoihzaw hi” a ci hi.” (Jon. 4:3).
Zeisu in zong, Jonah tangthu mah kamzat in nei in, “Jonah in amaute kiangah thu-ahilh ciangin a mawhna uh panin kisikkik ahihmanun, thukhenni ciangin, Nineveh khua mite in, note mawhsakna thu hong gen ding uh hi” (Matthew 12:41). Jonah sangin lianzaw takpi hi. Hikei leh ei hong Honpa hitheilo ding hi.
Tukal sungteng Jonah tangthu i sin ding uh a, ama’ tawldamlohna leh lungnop neihlohna pan bang pilna i ngahthei ding hiam?
Sunday September 12
Lehtai
Jonah pen a lawhcing mahmah thupuakpa ahi hi. Mi sawlhak khat zong hiphotphot hi. Jonah in bangbang hih taleh Pasian in ama’ nuntakna bingzat limlim hi. A zang mahmah leh a puak nuam Pasian’ hakkol (Matthew 11:30) puak sawmlo in, Pasian in paiding a sawlna lam pai lozaw in lehtai in, Ama’ tawldamna zonsawm mawkmawk hi.
Pasian’ sapnalam ahi lo, koilam ah, Jonah in tawldamna zonsawm hiam? A nopsak tuam lawhbeek hiam? Jonah 1.
……………………………………………………………………………………………………………………………………………………………………
Pasian’ sawlna lampan Jonah lehtai dengdang hi. Kamsang dangte Pasian in a sapciangin Pasian tawh kiho ding hun a laktheih zeluh bangin (Exodus 4:13), Jonah in tuabang hun la vetlo hi.
A lungluthuai thukhat, 2 Kings 14:25 sunga bang ahihleh, Pasian in Jonah a sapmasak penna zong hihtuak nawnlo sop hi. Tua hunlai in, Jonah in Pasian sawlna bangin semtakpi sam hihtuak hi.Tutungin bel semhetlo hi.
Banghang hiam?
Tangthu ciaptehna bang ahi a, leisung a kitawhkikna pan ahi zongin, tua hunlai, Jonah in Israel sungah kamsang a sephun, kum zalom giatna hunlai khawngin nisuahna gamlaizang ukpi Assyrian kumpite pen, ngongtat lua mahmah cih kithei hi. Tua khitzawh kum 75 khawng ciangin, Assyria kumpi Sennacherib in Judah hong sim hi. Israel leh Samaria tegel in tuama sang kum sawmnih laipek in kiakhinzo a, Kumpi Hezekiah in zong Assyria langdona sungah hong kipawl khinzo hi.
Assyria te’n zong thu-ciaptehna nei uhhi. (2 Kings 18 leh Isaiah 36) sunga Assyria tethu ciaptehna leh Sennacherib’ kumpi inn kawm tunga ciaptehna bang ahihleh, Kumpi Hezekiah gam khanglam ah kulh hoih mahmah anei Lachish khuapi ngongh takin a lakdan kiciamteh hi. Mun khatah, Sennacherib in, khuapi 46 a suksiatna panin mihing tulzanih sang tamzaw galmat ci hi. Assyria kumpipa in Lachish a laklai bangin mihing tulza tampi galmat in: Kumpi Hezekiah mimuante peuhmah pen a hingtangin bawlsia a, pawlkhatte pen Assyria ah ciahpih in, mantawm sal in zuakmang hi.
Assyria-te peuhmah pen tua hunlai leitungbup mahin ngongtat samahmah uhhi. Tua kumpi gamlaizang penpen ah Pasian in Jonah sawl sawnsawn hi.
Jonah a painoploh lamdangsak nading a omhiam?
Pasian kiangpan lehtai maw? Tua bang na hihngei hiam? Na hihngei khakleh na dau apai hiam? Tua khialhna pan bang pilna na ngah thei hiam?
Monday September 13
Ni Thum Tawlnga
Jonah in Pasian a taisat hang kimawk koihlo hi. Tawmvei a tawldamvat hangin Pasian in huihpi lamdangkhat sawlin buaisak hi. Tui hankhuk sungpan Jonah honkhia dingin Pasian in ngapikhat sawl hi.
Ut thulopi in ngapi gilsungah nithum a tawlngak khitciangin Jonah in Pasian bekmah ama adingin muanhuai ahihna hong phawksan hi. Khatveivei, leitungin bangmah honghuh theihlohna munpeuh i tunzek hong kul a, tuabang hunciangin Zeisu kisam takpi i hihna kiphawkpan hi.
Ngapi gil sunga Jonah’ thungetna simin, Jonah 2:1–9. Bangthu ngen hiam?
…………………………………………………………………………………………………………………………………………………………………
Tui thukpi lauhuailua sungah om himahleh, Jonah in biakinnpi tawh thungen hi. “Na biak innpi” enkik nuam hi.
Bangthu tengin zomtoto hiam?
A thungetna bulpi in biakinnpi hi a, thungetna peuhmah ah biakinnpi mah koihpah ding hihang. Laisiangtholui ah zong Pasian omna mun khat bek omhi. Amah biakinnpi sungbekah omhi (Exodus 15:17; 25:8). Thungetna leh Pasian tawh kizopna bulpi in biakinnpi ahi hi.
Tua pipi mah Jonah in Jerusalem biakinnpi paulamlo hi. Ahihhang Jonah’ paulap pen van biakinnpi hi bilbel (Jonah 2:7) hi. Pasian leh ama’ hotkhiatna hong paina mun mahah a lam-etna omsak hi.
A tawpna ah Jonah in hih thumaan hongtelta hi. Pasian’hehpihna hong ciamkha hi. Amah hotkhiat hita hi. Ngapi in amah a luakkhiat ciangin, kamsang lehtaipa tungah Pasian’ itna omlai cih hong phawksan hi. Leitungah lampi olzaw omhetlo a, thu-ummite adingin Pasian’ deihna mah lungmuanna leh lampihoihpen ahihlam theita hi.
Tutaktak ciangin Pasian’ sawlna mansawmta a, Nineveh khualam masuanin, uplahna nei nawnlo in, gamdangmi kamsang khawng peuhmah a deihhetlo khuapi gilomahmah khat zuanin hongpai gaihgaihta hi.
Khatveivei ciangin, thukhat peuhmah muhnathak i neihtheih nadingin taisat peuh kulzanzan thei hi.Jonah’tangthubel ngapi’ gil sungpan suakta hinaven, tuabel khengval deuh ahihteh; na kimkot pan tawlkhat taikhiavat in muhna thak tawh na muhkik theih nading ngaihsun in.
Tuesday September 14
Nasep Khinzo
Israel’ khuate tawh enkak leng, Nineveh pen lianlua hi. “Khuapi lian mahmah khat hi a, nithum sungtak kikantan hi” (Jonah 3:3) cihi.
Jonah 3:1–10 simin. Hih khuapi gilo in koibangin dawnna nei uh hiam? Midangte tungah teci pan theih nadingin hih tangthu pan bang pilna peuh kingahthei ding hiam?
……………………………………………………………………………………………………..……………………………………………………………
Khuapi sungah pai in, Jonah in Pasian’ thupuak tangko hi: “Ni sawmli khit ciangin, hih khuapi kisusia ding hi” (Jonah 3:4) cihi. Thupuak bel a tangtan hipah hi. Akicing diudeu hongpia lo a, tua thupuak a za mi khempeuh un Jonah’ vauna umuh hi. Nisuahna lam gamte ngeina bangin, Nineveh kumpipa in lungsim kipuahphat nathu pulakkhia hi. Mikim- ganhingte zong – dahna tawh antang ding (ganhingte koici dah cih genlo) cihi. Kumpipa kumpi-tokhompan tuaksukin leivuilakah tusuk a, a thupi mahmah lim honglak hi.
Jonah 3:6–9 simin. Jeremiah 25:5, Ezekiel 14:6 leh Revelation 2:5 tetawh khuikhawm in. Kumpipa kampauna ah bangthu kihel a, kisikkikna taktak pen bang tawh hong lakkhia hiam?
……………………………………………………………………………………………………………………………………………………………………
Sermon bel tom litlet lel hi napi, thumaan leh kisikkikna taktak tawh kidim hi. Jonah in a thuhilh kawmkawmin Khasiangtho in zong Nineveh khuamite lungsim sungah nakpitakin nasem hi.
Pasian in Israel mite lainatna tawh a makaih bang hamphatna, Nineveh mite in ngahkhalo uh himahleh, amaute in thu hoih mah tawh hong dawng zaw uhhi. Tua ciangin amaute in, “Pasian’ hehpihna maiah bokni, eite hih theih om nawnlo! Ama’ hoihna leh hehpihna muangni” ci uhhi.
Jonah amah tektekin Pasian’ hehpihna ciamkha ngiat a hihmanin, Pasian’ hehpihna pen, tua sungah a tawlnga nuamngiat mite adingin aituamngiat hi cih hong telta hi.
Christian nuntakna ah kisikna banghangin phamawh sese hiam? I bawl kikkik mawhnate pan kisikkik takpi cihteh bang a cinuam ahi diam?
Wednesday September 15
A Heh A Tawldamlo Thupuakpa
Jonah’ tangthu in chapter 3 tawh tawp nailo sese hi.
Jonah 4:1–11 simin. Jonah’ bang buaizel hiam? Ama gamtatkhialhna tungtawnin bang sinna i neithei diam?
……………………………………………………………………………………………………………………………………………………………………
Jonah 4 in ama’ nasep khinzo a hihmanin, Pasian tungah a hehna tawh kipan hi. Jonah in amah hong kiliansak mahmah hi. Naupangno kitom bangin a kitomkeei kamsangpa tawh kiho nadingin Pasian in hun tuamkhat la ngiat hi.
Pasian nungzui taktakte, kamsangte nangawn – khantohna leh gualzawhna neihbeh ding kisamlai hi.
“Jonah in, tua khuapi siahuai mahmah hinapi, puan hampi silhin vutlehvai sungah a omuh manin, Pasian in a hotkhiat nopna a muh ciangin; Pasian’ hehpihna hangin a lungdam masapen dingpa hinapi: kei khawng kamsangzuau hong suaksak cihlam in siatlakzaw hi. Ama’ vang kem nuam lua in, tua khuapi kisia sungah manphatna gen zawhloh kha teng mu nawnlo hi.”—Ellen G. White, Prophets and Kings, p. 271.
Pasian in a kamsangpa a hehpihna lamdanglua hi. Jonah zang nuam mahmah napi, Jonah a lehtai ciangin, huihpi sawl a, ngapi in tua a lehtaipa hong puakkiksak hi. Tu in zong, Jonah a lehtat leuleu ciangin, Pasian in hun la in Jonah’ lungsim hoihlo teng hilhdikdek in, “Na hehding kilawmsa nahi hiam?” (Jonah 4:4) a cihi.
Luke 9:51–56 simin. Hih tengah thupiangleh Jonah tangthu akibatna namu hiam?
…………………………………………………………………………………
“Pasian in leitung mite hong it mahmah ahihmanin, a Tapa a um mi khempeuh sia nawnlo in a hin tawntung theih nadingun, a Tapa neihsun hong piak dongin hong itna hong lak hi” (John 3:16). Jonah 4:11 ah zong Pasian in: “Ganhing tampi thamlo, a taklam khut leh a veilam khut zong a khen thei nailo naupang tulza leh tulsawmnih sang a tamzawte tenna a lian mahmah Nineveh khuapi pamaih salo ding kahi hiam?” cihi. Atawpna ah lungsim ngaihsutna gamtatna khempeuh hong ukpa in Pasian ahihmanin bangzah angtanhuai hiam?
Pasian hong lainatna leh thuakzawhna bangte, eite’n zong midangte tungah koibangin neithei ding ihi hiam?
Thursday September 16
Langnih Om Lampi
Jonah in ama’ dinmun khengin lungkham tuakzaw hi. Nineveh ading lauhuai mahmah hi napi, Jonah tangthu sungah Nineveh mite buaina omlozaw hi. Thupuak telsitset pahuh a kisikpah uhhi. A thupuakpa Jonah in ama’ thupuak tangthu tawh kizopna thanem hizaw hi.
Hih tangthu ah, Pasian in a sawlhak mahmah kamsang khat a zatna pen, Jonah in Nineveh a paikul ahih mahbangin, Nineveh mite’n zong ama’ thupuak a zakuh kulngiat cih atheih hang ahi hi.
Jude laibu simin. Koibanngin “Pasian’ itna sungah kip” thei ding ihi hiam? Jude 21. Bang a cihnopna hiam?
……………………………………………………………………………………………………..……………………………………………………………
Jude in a laibu tomno sung 21 ah “I Topa Zeisu in Khazih in hong hehpihna tawh nuntak tawntungna hongpiak ding na ngak kawmun, Pasian’ itna sungah kip-un” hongci hi.
Pasian’ itna leh hehpihna mimal in ciamkha cihpen khatvei peuh hibeklo hi. “Pasian’ itna sungah kip” theih nading pen, midangte vaphak kul hi. A zomah Jude in “hehpih” in “hon” ding, “meiphual sungpan dokkhia ding” cilai hi.
Jude 20–23 simin. Hih tengah Jonah’ tangthu tawh kilual bang om a, eite bang hong hanthawn hiam?
…………………………………………………………………………………………………………………………………………………………………
Pasian in Nineveh pai dingin Jonah a sapsese pen Jonah in, tua sapna a ngahma in Assyria mite tawh a kizopna a thukngaihsut ngei kholloh hang ahi hi. Ama’ tumtakin tua mite ngailo hi ziau a, sapna angahmaa in zong bangzah mudah cihzong theituan selo lel hi. Vantungah Nineveh mite tawh kiveng ding cihkhawng ngaihsunkha seselo hihtuak hi. Pasian it bangin it ding kisin kha nailo hi. Pasian in Nineveh pai dingin Jonah a sawlna pen, Nineveh mite zong vantung Ama’ gam sungah amau zong omtheileh a deihman hi. Jonah a sapna thu zong Jonah a it man mah ahi hi. Jonah tawh nasemkhawm in khangto kawm ding zong deihsaklai hi. Pasian in Jonah adingin Ama’ deihbang gamtatna, midangte vapha in eima neihsa upna leh lam-etna lakin, tawlngakna taktak tawlnga thei dingin deihsak hi.
Midangte hotkhiat na’ngin hun bangzah na zang ngei hiam? Khalam pan enleng, hihbang nasepnate in, Zeisu sungah tawlngakna taktak ngah theih na’ng koibangin hong huhthei hiam?
Friday September 17
Ngaihsutbeh Ding: “Jonah in mawhpuak lian mahmah khat angah hi gige mah taleh; Amah a sawlpa in amah panpihzo in gualzawhna a piazo dingpa ahihi. Kamsangpa in thumangziau lel lehbel, a phutkhakthu tampitak tawh kipelh ding a, thupha tampi zong sangzawsop ding hi. Himahleh Jonah’ lungkham hun sung khempeuhah Topa’n nusialo veve hi. Haksatna kigual diudeu leh vaipuakpihna lamdangte tungtawnin kamsangpa in zong Pasian’ vangliatna a muanna khangto sak zo hi.”—Ellen G. White, Prophets and Kings, p. 266.
“A telhak thuthuk genselo in, kiniamkhiatna tawh thugenna in mihing’ lungsim a sukha thei a muibun pen ahi hi. Pasian a it manun tua itna a genkhia kik mihai mimawlte zat kammalte muibunin leitung mipil ulian tampite lungsim lawngthei veve hi.”—Ellen G. White, Christ’s Object Lessons, p. 232.
Kikupding Dotnate:
1. Pasian in a mite hotkhiat na’ngin teci pangding a sawl ciangin a heh “Pasian’ kamsang” khat kua hiam? Jonah lampang panin eleh koibangin telsiamsak thei ding hiam? Mihingte in alehtat phial uh zongin, Pasian in amite a thuakzawhna bangzah lian naci hiam?
2. Jonah’ tangthu in Pasian pen mi vakvai honkhia bek hi lo a, A nungzuite zong a puahphat nathu hong lak hi. Tuni tuhunin Topa leh a thumaan i theihkhit hangin “Lungtangthak leh lungsimthak” koibangin ngahthei ding hiam? Thumaan theihna leh tuatawh kipuahphatna bang kilamdang hiam?
3. Jude laibu simkik in. A thupuak bulpi bang hi a, tua thupuakin tulai ei pawlpi tawh koici in kituak naci hiam?
4. Midangte hotkhiat nadingin sepkhiatna in, eimah adingin khalam bang hoihna hongpia thei naci hiam?
5. Jonah in Nineveh a pailoh na’ng thukip bangbang neitaleh, amah khiallua ahihlam Pasian in laktel sitset hi. Jonah khialhna bang khialh theihna lungsim koibang khawng midang tungah kineikha thei hiam?