“Adventus” le “Sweet December” 

Adventus” le “Sweet December by Peter Summpi |Zomi SDA

“Adventus” le “Sweet December” 

Peter Suumpi

Catholic thuzui mi khat in “Ei Catholic Pawlpi in bang hang in December ni khat ni Sweet December bawl lo ih hia? Ih sanggam tuiphum pawlpi te in zan in khangno te zanhak in gualnop bawl ngeingai uh in Topa Jesu hong suah kha ci in dawn ngei ngai uh hiven” ci in hong kidong ngei hi.

Tuiphum pawlpi te in biakpiak hun paizia (Liturgy) nei lo uh hi. Ahihangin Catholic Pawlpi in biakpiak hunpai zia (Liturgy) ki zui hi. Tua hi aa Pasian kammal A,B,C kum te, biakpiak pawipi nite, Pawlpi Calender cih te ahong om ahi hi. Catholic Pawlpi ii biakpiak hunpai zia te ahihleh (1) Adventus hun, (2) Christmas hun, (3) Hua hun (Lent), (4) Pasca hun le (5) Hun nautang” ci in hun (5) in khen hi.

“Adventus” ih cih pen Latin lai pan hong pai hi aa “Hong paina” (ahl) “ngakna” cih khiatna nei hi. Adventus hun pen Christu Topa in amasa pen leitung ah hong paina le anih veina leitung ah hong pai nading kigin kholh hun in Pawlpi in aciapteh hun ahi hi. “Topa Jesu hih Leitung ah hong pai lai in mihing khat bang in hong pai hi. Ahihangin mihing te tawh akilam danna khat mihing te in piancil mawhna ih nei aa Topa Jesu in neilo hi. Topa Jesu pen abeisa kum 2000 kim lai in Bethlehem khua ah hong suak cih pen tagnthu tungtawn in ih thei hi.

Hih pen “ Topa Jesu amasa hong paina” ahi hi. Ei te upna ah Topa Jesu pen Leitung bei ciang in khat vei hong pai kong pai kik ding hi ci in hong vaikha hi. (Mt. 24: 30; 25: 31) Tua hong paikik ding hun pen “anih veina hong paina” kici hi. “Topa hong pai nading lampi bawl unla, a tot ding lampi tangsak un…” (Mt. 3:3). Cathoic Pawlpi ii biakpiak hun pai zia pen “Adventus kal masa pen November kha bei kuan (ahl) December kal masa sung in tung den hi. Adventus hun sung pen nipi kal 4 sawt hi.

Pawlpi in March (25) ni pen “Vantungmi Gabriel in Tonu Maria kiang ah thu azaksak ni”(Annunciation of the Lord) in ciamteh in tua pawi ih bawl hi. Lam khat pan cileng Khasiangtho vanliatna tawh Tonu Maria ii gilsung ah thu in mihing hong suahni pawi zong ahi hi. Tua ni pan kipan in kha (9) khit ciang Topa Jesu hong suak in Chistmas pawi pen December (25) ni in ciamteh in kibawl hi. Adventus hun sung in Pawlpi in ei te ih lungsim ih kipuah phat ding in hong hanthawn ahi hi. Hih Adventus hun pen Topa Jesu hong suah ding hun ih theihna hang in lungdam kipak hun ahihmah bang in lam-etna ih ngah hun zong ahi hi. Ahizong in ataktak in ih lungdam kipak ding hun pen Christmas pawi ni ahi hi. Tua ahihman in Christmas pawi ii athupitna ih peen sak loh nading in Pawlpi in pilvang tak in kigin hun hong pia ahi hi.

See also  NUTE’ NI (MOTHER’S DAY)

Christmas pawi aading kigin nading hun aa hong hanthot hun ahi Adventus hun pen “ Ei te ii innkuan sung ah nausak ding aa akiging nupi khat” tawh kibang hi. (Hih hun sung in zong Maria pen Jesu apia lai hun ahi hi.) Nupa te in amau ii silesa sung pan ta nei ding cih thu atheih uh ciang in a lung uh dam mahmah ding hi. (Tua mah bang in Topa Jesu hong suak ding hun ahi December kha hong tung ciang ih lungdam hi. Ahizong in naungek Jesu hong suak nailo hi.) Naungek Jesu hong pai ding ahihman in Catholic Pawlpi in mihing khempeuh te ii lungtang sung ah ih kiphuah phat kholh ding athupitna hang in Adventus hun ci in hong ciapteh sak ahi hi.

Zinei pasal in azi agai lam atheih ciang in azi asuah ding hun lungdam kipak tak in lam-etna lianpi tawh kiging khol ding hi. Anau zong suak nailo pi in “ka lungdam khin lua” ci in azi gei ah om nawnlo in alawm agual te tawh “ka ta hong suak tading” ci in lungnop bawl in thapai mawk ding maw. A it azi gei ah om in azi tha pia in a hong suak ding ata no uh aading akiging hun ding na ngawn mangngilh kha mawk ding maw.

Azi in zong tua bang mah in lungdam in ata no koi ci bang in suak ding ci in kiging khol ding hi. Hih bang in hong suak ding ci in ngaihsun in ei ii gualnopna ding bek ultung sak lua in ih ta aading khaul manlo liang in duh teng ne in duh teng dawng in om ding ih hiam? Ih ta aading le ih pumpi a cidan nading in kidawm in, om zia khawlzia nek le dawn kidawp ding mangngilh liang ding ih hiam? (Ki dopna le kiginna om kei leh ih ta cidam takin hong suak zo ding maw cih pen lung hian huai hi.) Tua mah bang in kiging na omlo pi in naungek Jesu ei te lungtang sung ah cidam takin hong suak zo takpi mawk ding hiam?

See also  Biography of Robert S. Folkenberg

Unau sanggam sung ah zong hih bang mah ahi hi. Ih nau khat hong suak ding ciang in ih lawm te tawh gualnop bawl in om zaw ding maw (ahl) ih nu gei ah om zaw ding? Ih nu pen naupaai ahihman in tangzang zalzal lo in amau guak nusia leng amah na cim ding hi. Agamla aa om na sanggam dang te kiang ah zong ih nu nau hoihtak asuah theih nading thu na ngetsak un cih bek ih ngaihsun kha diam? Thungetna zong nausuah nading in kiginna khat mah ahi hi. Tua te sang in lawm le gual tawh gualnopna mah thupi sak zaw ding ih hiam?

Pawlpi in hihzah tak in thuk ngaihsut in Christmas pawi ii khiatna a peen loh nading in Adventus hun sung in gualnopna pawi te bawl ding tha hong pia lo ahi hi. Biakinn sung ah biakpiak hun sung in zong lasak te hita leh, Organ le adang tum theih tuamtuam te ih zatna ah hitaleh, Pasian tau tung pak tawh ih zep dan hitaleh Adventu hun tawh kituak in ih zat ding Pawlpi in hong hanthawn hi. Tua hi aa Christmas pawi ii lungdamna te ahun tung nailo pi in phuahtawm gualnop kholh loh ding zong kidop ding ahi hi. Tua mah bang in Adventu hun sung in kitenna zong akilawm bang in ih bawl ding Pawlpi in hong phawksak hi. Missa bawl hun sung in lungdam tak aa ihsak ahi “Vangsang bel ah Pasian minthang tahen” cih “Gloria” la zong kisa lo hi.

Tua ban ah biakpiakna te ah Siampi te puan te le adang Pasian’tau zemna puan te zong kisikkikna mel apua ahi adum (violet) mel kizang hi. Tua ahihman in Catholic thuzui mi te in Pawlpi ii hilhna te bang in Adventu hun sung in thungetna le pumpi kidekna le mawkna pan kisik kikna te tawh ih lungtang pen naungek Jesu hong lut nading in ih kipuak ding ahi hi. Tua bang aa kipuahna in lam-etna, itna le lungdamna te tawh Christmas pawi pi ii thupha ih sang thei ding hi.

See also  A BRIEF HISTORY OF THE SEVENTH-DAY ADVENTIST CHURCH

Catholic pawlpi in tua te pen pilvang tak in ih phawk ding hong deih ahihman in mi khempeuh te ii lungtang sung ah naungek Jesu hoihtak hong suak theih nading kigin hun ding in Adventu hun hong ciapteh sak ahi hi. Hih bang in ih lungtang ih kipuah na in Christu Topa ii nihvei hong pai nading aa kiginna zong ahi hi. Lam khat pan in Christian nuntakna sung ah a tuamtuam in hong pai Topa Jesu ih dawn nading in ih kigin kholhna ahi hi. Tua hi aa ih nuntakna sung ah Christmas pawi a tawntung in ih bawl det ding le ih lungtang sung ah atawntung in Chritu Topa hong suah nading hamciam ih kigin kholh den ding ahi hi.

Atawpna ah apatna aa dotna adawng ding hileng Catholic pawlpi ii biakpiakna hunpai zia Calendar sung ah “Sweet December” bawl ding na kihel lo hi. “Sweet December” ci aa khat le khat ki nohset ni ahi December ni 1 pen Catholic pawlpi ii Adventu nipi masa ni hi cih phawk in ih om siam ding ahi hi. Kum ii kikhelna tawh kizui in biakpiak hun paizia ii Adventu hun pen December (1) ni sang zong zekai zaw thei zel hi. Tua ahihman in Catholic thuzui te in gualnop nading aa akibawl ahi “Sweet December “ ni in mibang in “votzel sazel” in ih om loh ding ih kiphawk ding kisam hi.

Hong suak ding naungek Jesu pen mi khempeuh in a lungtang sung uh ah hoihtak kiging khol in suaksak thei ciat tahen” ci in thu kong ngetsak hi. Lailet: Peter Suumpi/ Ma Kasha (Momauk)

References:

  • (1) http://www.ncregister.com/…/10-things-you-need-to-know-abou…
  • (2) http://www.usccb.org/…/adve…/liturgical-notes-for-advent.cfm
  • (3) http://cyberfaith.com/liturgical_year.cfm
  • (4) ဆရာတော် ဆိုတေးရိုဖမော (ငြိမ်း) ဘာသာပြန်ဆိုထားသည့် “ကက်သလစ်အသင်းတော်၏ ဝတ်ပြုခြင်းနှစ် (အေ) တနင်္ဂနွေနေ့၊ ကျမ်းစာရှင်းလင်းချက်များ”။
Tags: ,

Admin

Admin

Top