Kumkikna Lamen Innkuan – Khen Thumna (Azom)
AKITAMZAT ZAWLHELNA
AKITAMZAT ZAWLHELNA
Zawlhel leh Kiteen Maanlo.—Amaanlo kiteenna in zawlhelna maanlo piang sak hi. Amaute in si-le-sa leh amittaw zualzanna zui uh hi. Zawlhelna pen khuaval nadingin zang uh hi. Pasian’ thukham apalsat kei phial uhzongin, alang nihun vangkepna leh zia hoih thukhunte palsat uh hi. Asang ziahoih, Pasian’ gel kiteenna theihpih zolo a, asiangtho pen ngaihna leh ziahoih gamtatna lam zolo hi.
Vantung laibu sunga vantungmite’ ciaptehna ihet ngam keiding leh, kamkhat tatkhat zong tang kei ni. Pasian’ minphat nading bek mitsuan in. Lungtangin asiangtho, akisiansuah ngaihna, Jesus Christ nungzuite tawh akilawm akisangkhan pianzia, leh leitung sangin ihvantung zawsak ding hi. Alanglam panah aom thu khempeuhin asia ahi hi. Laisiangtho thukhunin asanglap ahihkeinakleh kiteenna in siangtho theilo, leh asiangtho Pasian’ mai-ah pahtawi theihding hilo hi.1
Khangnote in si-le-sa zui lua uh hi. Tuabangin amau leh amau akipampaihlo ding uh hi. Ihngaihte’n puatham tawh baihtakin hong khih ding hilo hi. Tuhun, zawlhelna pen khemna leh
kineihna tawh akivaihawm hia, Topa sangin Satan’ kha in nasem zaw hi. Munci tengah neihtaang theihna (common sense) kisam hinapi kizang lo hi.2
Zankim Akkhuan dong.—Luphak pen ngeina in kizang kawikawi hi. Nanih un Christian nahih uh hangin Pasian lungdam saklo hi. Lup-hakna in cidamna susia a, azing cianga nasep nadingin lungsim navak lo sak hi. Puatham siatna tawh kipawl hi. Sanggampa aw, hihbang zawlhelna apelzo dingin nang leh nang kizah takin. Topa’ minthan nading bek amitsuan nahihleh kidawm takin na kalsuan ding hi. Na mit atawsak zawlgau natna nathuak loh nadingin Pasianin Christian khatin ahong sanna phawk in.3
Zankim hun tampi zawlhelna-in azangte Satan in hong encik hi. Amit uh kihong hileh akampaute vantung mite in ciamteh ahihlam mu ding uh hi. Pumpi cidamna leh ziahoih palsat uh hi. Hih zawlhelna pawl khat pen kiteen khit ciangin hun lazaw leuh kilawm zaw ding hi. Atangpi-in kiteenna-in zawlhel hun khempeuh dinkhawl sak hi.
Zankim zankhang zawlhelna tawh hun abei sakte in zuthawl kipia nungak leh pasalte susia thei hi. Lawmtate amau leh amau vang akipiak loh uhciangin, Satan kipaak in, Pasian vang kipia lo hi. Zualzanna hangin minhoih kisusia a, Pasian’ lungkimna tawh kiteenna bawlding baih lo hi. Akiteen uhhangin zualzanna hang hi a, aki-iplahna uh abei ciangin, abawlsa uh mawhna anung phawk ding uh hi.4
Satan in khate manin asuksiat theih nadingin azek ding na leh azat ding pilna thei hi. Mite’ kalsuan khem peuh encik a, zuihding lampi zong amah in mite ho-in, Pasian’ kammal zuih sangin ama’ kam kizuih sak zaw hi. Asia leh apha helsiam ahihmanin khangnote awk pahpah uh hi. Ama khut sungah a awk khinte pen amau leh amau dahna tawh kiliam sak uh hi. Tua hangin mun khempeuhah siatna kimu kawi kawi hi.5
Lungsimte tawh Kimawlna.—Lungsimte tawh kimawlna in asiangtho Pasian’ mai-ah athuneu hi hetlo hi. Pawl khatte in adeih zawk numeite tawh kithuah in kingaihna genin, agenthute huzaapna phawklo in, ek nusiat uh hi. Maipha angah zawkna munah kihei zelin ngaih thu genin nusia leuleu uh hi.
Tuabang lungsimin akiteennaah hong kidawk kik ding ahi hi. Hibang akitaklo lungsimin kiteen kizopna thelthang sakin, thukhunte ah kipsak lo hi. Acimtakna uhleh asiangtholo angaihsutnate uh agamtatna uhah hong kilang zel ding hi. Khangnote in a lungsim uh khihcip in, Satan in amaanlo lampi ah apialsak theihloh nadingin, akikepcing ding uh bangzahta in kisam hiam?6
Zawlhelna ah Khemna.—Mite lakah gualnek-in numei khat ie ngaihna angah hangin numei’ nu leh pa thei saklo-in agamtatna in numei tung leh ama’ nu leh pate’ tungah Christian gamtat saklo hi. Simtatna tawh numei khat ie lungsim angah ahizongin, Pasian’ tate in apulaak dinguh Christian ziadam leh lungsim kip apulaak zolo asuak hi. Laisiangtho in agen bangin thutanna leh simtatna tawh atup angah nading hanciamna-in amah angaite tungah cihtaklohna leh numei akem akhoi dingin akilawmlohna pulaak zaw hi. Tuabang nuai-ah kiteen kiciamna-in Pasian’ kammalte tawh kituak lo hi. Tanu khat nisim nuntaknaah lam pialsak, Pasian’ ngim sakna leh nu leh pate’ thupiakte azahtak losak pa in kiteenna sungah a tavuan lakna taksang lo ding hi. . .
“Suangpek tungah Pasian’ khutme in “Gu kei-in” ci hi. Gukngaihna zangin bangzahin kiphelh tawm nuam lai ihhiam? Khemna tawh zawlhelna akizat laiteng, kihonate kikemcinga, atawpna ah theihna ahau nailo zaw penin anungciangin apiang sualin, anu leh apate kiangpanin paikhia in, ama ngaihna ah kilawmna aneilo pa khat angsungah ki-ap hi. Laisiangtho in thumaanlohna namcin mawhsak hi . . .
Hihbang khemna tawh zawlhelna leh kiteenna in leitungah khuisatna piang sak hi. Bangciang taktak susia ding, cih Pasian bekin thei hi. Mi tampite in hih khemna tawh nuntakna susia hi. Thu-um Christiante, thumanna ah akipte, leh thudangah zong atheitheite nangawnin hih alauhuai mawhnate nabawl uh hi. Amaute khensatnate ngaihsutna nangawn in khel zolo hi. Mihing lungsim thuakna leh ci-le-sa lunggulhnate tawh nungta uha, Laisiangtho in bang gen hiam cih kanlo in, Pasian tawh kizop ding kikhaktan uh hi.7
Niamtuah ding Peelin.—Thukham 10 panin khat akipalsat ciangin niamtuah ding bek om lai hi. Numeite’ vang khatvei akiam khit ciangin thanghuai paktatnate mawhna-in mu nawnlo hi. Apaktat numeite huzaapna tulai leitungah bangzah in lian! Numei siate ie zolna tawh mi tultampi in kol-awk uha, amau leh amau kithat in, anuntakna tomsak uh hi. “Amaute khe-in sihnaah tuahsuk a, akalsuante in hell zuan hi” ci-a Topa’ thugen in maan lua hi.
Alauhuai, akikham lampi ah lam apialloh nading un lamdungah lai kisuang napi, ngaihsutna tawh kilehbulhin, Pasian’ thukham awlmawhlo-in, leh thangpaih lak uha, lampial zawkna in nei uh hi.
Pumpi cidam in leh lungsim siangtho in akemcing nuamte in “khangno lunggulhna taisan un.” Mawhna sunga atualbialte siatna panin akipuah dingin bel takin agente mudah leh simmawh uh hinapi, Pasianin amaute pahtawi in thaman pia ding hi.8
Tahum Tuh Lecin, Khai-kha Atding.—Tahum natuhna tawh na nuntakna susia kei in. Lawm nateelna ah loptop kei in.9
Tahum theh nadingin hun nazatna tawh nakhan tawntung ana sakding khaici na-at ding hi. Nai khat sung loptop ngaihsutna leh mawhna sungah lutna in lampialna hong kipan sak hi. Khangno
hunkhat bek nangah hi. Aman nei in hun zang in. Hunkhat na nawk khit leh kileh kik ding om nawnlo hi. Pasian tawh kizop ding anialte in mawhna sungah alut dingin khensat uh hi. Pasian in khangno khempeuh hong sittel hi. Note sangin akhangham zawte’ huzaapna awlmawh lohna leh zahtak lohna lim nalak uh hi. Na mawhnate ki-awnghawh in na om uh hi. Ahizongin hihte in ahoih gamtatna panin hong dalzo tuanlo ding hi. Nitawpni thu hong kisit ciangin na ki-awnghawh thei tuan kei ding hi.10
AKIKHAM KITEENNATE
Thu-umlote Tawh Christiante Kiteenna.—Thu- umlote tawh Christiante akiteenloh nading Pasian’ hilhna awlmawh lohna in leitung zeel hi. Pasian it a, akihta mi tampite in ciangtan aneilo Pasian’ pilna ateel uh sangin amaute’ lungawnna zui zaw uh hi. Hih leitung leh ahong paiding vantungah nopsak nading leh nupa kopte dam nading ahi Pasian kihtakna pampaihin, amittaw
ci-le-sa makaihna zui in, ki-uk sak uh hi.
Pasian’ thu akin numei pasal tampite in alawmte, meeltheihte leh Pasian’ nasemte zolna bilhum san uh hi. Thuhilhna pen mite’ sungthu kawnlawhna in ngaihsun hi. Deihsakna tawh ahilhpa zong gal in mu uh hi. Hih khempeuh Satan’ deihna ahi hi. Amahin mite bum a, alunggulhna uh in khuhcip hi. Ngaihsutna nangawn in lunggulhna ukzo nawnlo hi. Asiangtholo si-le-sa zongsatna sungah kia-in, akhanlawh ciangin gentheihna leh matna thuak ahihlam phawk pan hi. Hihin, ngaihsut mawkmawk thu hilo hi. Apiang takpi thu ahi hi. Pasianin aphalloh kipumkhatna pen Pasianin siangtho saklo hi. 1
Pasian’ Thupiakte Telnop.—Tanglai Israel mite’ kimah aom milim biate tawh akiteenloh nadingin Pasian in thupia hi: “Amaute tawh kiteeng bek thamlo in, na tanute uh zong amaute adingin na mokhak keiding uh hi. 62Atanute uh zong mo in nala keiding uh hi.” Ahang zong na pia hi. Mongneilo pilna anei Pasianin tua kiteenna panin apiang ding thu thei khol hi: Keimah ahong zuihna panun amaute in natate uh lampial sak ding hi. Amaute in pasian dang bia ding uha, note tungah Pasian’ hehna asosakin note ahong susia ding hi.” “Ahangin, note in Topa adingin asiangtho mite nahi uha, Ama adingin na Topa Pasianin leitung maitangah aom mite lakpanin note teeltuam ahidingin hong samkhia zo hi” . . .
Tuabangin, Laisiangtho Thak in thu-umlote tawh Christiante akiteen ding nakham hi. Sawltak Paul in Kawlentu pawlpi alaikhakna masa sungah: “Zi in apasal anuntak laitengin thukhamin suakta saklo hi; ahihhangin apasal si leh pasal dang tawh ateen theih nading Topa sungah suahtakna anei hi, naci hi. Alaikhak nihna sungah: “Thu-umlote tawh akikimlo hakkol na puakhawm kei un: ahangin thudik in adiklo tawh bang kipawlna nei hiam? Khuamial in khuavak tawh bang kipawlna nei hiam? Christ leh Beliel zong in bang kipawlna nei hiam? Thu- umpa in thu-umlo tawh bang kipawlna om hiam? Pasian biakinn in milim tawh bang kipawlna nei hiam? Note in Pasian’ teenna biakinn nahi uh hi. Topa in: “amaute sungah kateeng dinga, amaute in ka mite hiding uh hi. Keimahin amaute’ Pasian ka hidinga, amaute zong Keima mite hiding uh hi. Tua hia, amaute kiang panin hong paikhia un. Asiangtholo nate lawng kei un; tua hileh Keimah in note kong saang dinga, note adingin Pa ka hiding hi, note in zong ka tanu ka tapate na hiding uh hi, Vanglian Topa in ci hi.”2
Hun maanlo leh akituaklo kizopna hangin leitungah Pasian’ hehna tung hi. Hih tawh kisai-in Laisiangtho in akicianlo-in khuavak hong pialo hileh tulai a khangnote’ paulapnate kimawhsaklo ding hi. Laisiangtho in apicing ngaihsutna, kammal, leh gamtatna hong sianggen khin hi. Pasian’ thu in khe adingin khuavak hia, khangnote-in lampial nadingin paulap om thei nawnlo hi. Khangnote in tua laibu thudot bawl le-uh Pasian’ lampi panin pial khialo ding hi.3
Pasianin Thu-umte leh Thu-umlote Kiteending Kham hi.—Akikham lampi atawn dingin Pasian’ mite kisin kei hen. Thu-um leh thu-umlo kiteenna Topa in kham hi. Apiangthaklo lungsimte in ama’ utna zui-in, Pasian awi loh kiteenna bawl uh hi. Hih thu hangin numei leh pasal tampite in leitungah lam-et bei leh Pasian lo-in om uh hi. Lungtup hoihte si a, Satan’ thaangah awk uh hi. Si-le-sa deihna azuite-in hih leitung mahmah ah zong gahsia a-atding uh hi. Akha nuntakna zong atanlawh ding uh hi.4
Thumaan zui akisate in thu-umlote tawh akiteen hangin Pasian’ deihna tuancil uh hi. Tuahangin Pasian’ pahtawina ngah lo-in, kisikin khuisa ding uh hi. Thu- umlote in gamtat hoih aneih uh hangin Pasian piak gupna asanloh manun kiteenloh ding mah ahi hi. Thu- umlote gamtatna in ukna anei khangno mihaupa acih bangin “na khat na kisam lai hi” cih ding hilai hi.5
Solomon Limlahna.—Neihgil aneilo, mizawng 64daaipamte in Pasian’ santheih dingin nungta uha, leitungah aman nei in leh vantung minphat nadingin nungta uh hi. Ahizongin Satan in ama ngimna atangtun sak nadingin kiteenna zang hi. Mihing tawm khat bekin gualzawhna tawh tuabang awkna panin suakta zo uh hi.6
Satan in thumanna hangin apiangding thu thei hi. Kumpi ahihna tawh Solomon amaancil lai-in apilna, athupha piakna leh adiknate hangin minthang mah mah hi. Amah in apualam huzaapnate hong sungtum pih a, Pasian’ thukhunte nuaisiahin Pasian tawh kikhen khia hi. Galpa in hih hanciamna ah gualzo hi. “Solomon in Egypt kumpi tawh kipawlna nei a, Pharoah kumpipa tanu zi dingin la-in David’ khuapi ah hong ciahpih hi.”
Lawki gamte tawh kipawlna bawlin, tua kipawlna akip nadingin milim bia kumpipa’ tanu tawh kiteeng hi. Solomon in Pasian’ piak nate tawh amite siangtho a akepcing nasep hong nungngat hi. Hih Egypt kumpipa’ tanu kikhel khaleh, cih lametna-in mawhna bawl nading paulap kician hilo hi. Gamdangte kiang panin na kikhen khia ding uh hi, ci-a Pasian thupiak palsat in, ci-le-sa kumpite tawh hong kipawl hi.
Pasianin Ama hehpihna tawh tawlno sung hih mawhna humcip sak hi. Solomon’ zi hong kikhel sam hi. Kumpipa in apilna tawh siatna ahong lutna lampite acin ding ahi hi. Ahizongin pilna leh vangliatna ahong paina anak mangngilh hi. Ahoi-na in ngaihsutna kheng-in hong khangto hi. Amah leh amah hong kimuang a, Pasian’ ngimnate ama’ lampi tawh sepkhiat hong sawm hi. . .
Thu-um Christian tampite in Solomon bangmahin Pasian aneilote tawh kiteen ding lungngai thei uh hi, banghang hiam cihleh, siatna lampi azuante adingin phattuamna om ding hi. Ahizongin amau leh amau awkin, guallel uha, aupna siangtho, athukhunte uh khahsuahin, Pasian kiang panin kikhenkhia uh hi. Kalsuan khial khatin adang kalsuan khial khatah manawh hi. Atawpna ah amaute akhih kol panin suahtak nading lam-et beina ah kikoih thei uh hi.7
Paulap—“Biakna Kin Bilbel Hi.”—Christian ahilo bek hi, biakna kin bilbel, cih paulap pen Pasian anei lote’ ngaihna-in kizang hi. Thu-umte lampanin mi sawm lakah kuate in ahoih kiteenna in pianglo hi. Pasian mai- ah kamciam akipiak khit phetin khalam nuntolhna kipan paha, khalam tha kiamin, thuman kulhpi khat pan khat kisatkham-a, asawtlo-in anih un Satan dial nuai tunguh hi. Leitung mopawi gualnopna-in lungsim, upna, leh thumaan zogawp hi. Innkuan thak sungah thunget hun kizahtak zo nawnlo hi. Mo leh mopipa in amau leh amau akiteelna tawh
Jesu anawlkhin uh hi.8
Thu-um zaw sungah Kikhelna Masa.—Thu- umlopa in akipatcil in biakna langpanna lak khia lo hi. Ngaihsut dingin Laisiangtho thumaan akilah ciangin “Ka hihbangin hong kiteenpih hilo nahi hiam, hong nawngkai sak kei in. Na upna nong pulak kik leh abuai nuam hiteh kong ciding hi” cita hi. Upna anei zaw lamin upna thu agensialin upna neilo zaw pen gilo a, anawngkai sak tawh hong kibang hi.
Thu um zaw lam penin ama’ teelna tawh hih kipum khatna apiang hi a, kilungkim sak ding hi, cih hong hita hi. Akimangngilh bawl nadingin lawm le gual tawh kithauhna hong thupi sak hi. Acil in hihbang gamtatna hoih sa samlo hi, ahizongin thumaa.n lamah damdam in ze-ol semsem hi. Upna pan muanlahna tawh kibilkhek a, khatvei lai-a upna khauh hibang, bangci in kikhel hiam, cih ngaihsun theilo uh hi. Pillo kiteenna in bangzahta in kikhel sak hiam?9
Leitung tawh kipawlna kipatding lauhuai hi. Khangno numei leh pasalte’ kiteenna in biakna gamtatna leh kimanna abeina ahihlam Satan in zong thei siam hi. Hunkhat sung biakna ahanciam teihangin amau hanciam- na mahin langpanna khangsak a, lampial sak hi. Khatvei lai in upna leh lam-etna kikup nuam asak ngei hangin, thu-umlo tawh kikhihna in thumaan thutak upna satkhia a, Satan in alungtang sungah muanlah ta hi.10
Vantung Nopsakna Khahsuah.—“Akilung tuaklo mi nih apaikhawm theiding hiam?” “Bangbang thunget ding minih akilungtuakin vantung Ka Pa in amaute adingin avaihawm sak
ding hi.” Khat in ki-apnaah kipum khatin, adang khatin, awlmawhlo; khat in tawntung nuntakna lampi zongin, adang khatin lamtan zau sihna ah pai nuam hileh Pasian’ in akamciam bangci piak theih ding hiam?
Mi za tampite in Christ leh vantung nawlkhinin apiangthaklote tawh kiteeng uh hi. Christ ie itna leh hong ompihna-in manneilo lua ahihmanin mi maimai tawh kithuak ding alunggulh zaw ihhikha ding hiam? Honpa aiplah theilo khat deihna tawh vantung nopsakna nusia zen ding ih hiam?11
Thu-umlo khat tawh kizawpna tawh Satan’ mun nazuan hi. Khasiangtho na dahsak a, Ama’ hong dalna na hemkhia hi. Tawntung nuntakna adingin nagalsimna ah tuabang gal tuam ado nuam mah na hi hiam?12
“Thu-umlo kapasal in ka upna ahong pial sak ding hiam? Pasian itlo-in gualnopna azong zaw pa hilo hiam? Ama’ gualnopnaah hong kalsuan pihding hilo hiam?” ci- in kidong in. Tawntung nuntakna lampi in keen in, suangtum tam mahmah hi. Khalam khualzinna atuantual sakdingin vangik kisuan beh kei in.13
Khuamial Avenlohna Inn.—Lungtangin mite’ itna lungulh hi. Hih itna-in Jesus itna aluah ding zahin thahat zolo, siangtho zolo, manpha zolo hi. Zi in nisim sepna, leh nuntakna ie dahna amaingat dingin Christ’ sung bekah pilna, tha, leh hehpihna mu ding hi. Amah in ama’ tha leh ama’ lampi dingin Jesu aneih kul hi. Leitung lawm khat peuh tungah anuntakna apiak ma-in anuntakna Jesus tungah pia masa hen. Lungnopna maan angahding te-in, aneih leh asepna khempeuh ah Vantung’ thupha ngah masa hen. Pasian’ thu manlohna in lungtang tampi leh innkuan tampite gentheihna tawh kidim sak hi. Ka sanggamnu aw, khuamial avenlohna inn ah nateen nop keileh Pasian’ gal tawh na nuntakna gawm kei in.14
Christian’ Ngaihsutna.—Biakna thukhunte ahong kisittel ciangin Christiante in bang bawlding uh hiam? Etteh tham acing dingin, “Keimah in apilvang Christian ka hi hi. Nipi kal khat ani sagih ni-in Laisiangtho Sabbath ahi hi. Eite upna leh thukhunte in mite tawh ki aihual theilo hi. Tuabang mite tawh lungnopna kingah lo ding hi. Akicing Pasian’ deihna kazuih ding leh leitung tawh ka kibang kei semsem dinga, Jesu’ lim ka sun semsem ding hi. Christ ie ithuaina mu lo, thuman ie hupna nei loin na om leh, leitung na iplah dinga, Pasian tawh kisai nate na iplah zo kei ding hi. Kha thute Kha tawh kithei thei hi. Kha thu theihna naneih kei leh, Pasianin ahong teelna ahang natel keidinga, Topa’ na nasem zo kei ding hi. Biakna tavuan na awlmawh kei ding hi. Na lung anop keiding hi, Pasian in apiak khalam bilvuhnate zong na haza keiding hi. Biakna upna ah natangsuah ding hi. Na khuamuhna akikhel ciangin Pasian’ hong sapnate na telsiam ding a, na Honpa hong itna na puasiam dinga, na kizopna akipuah pha ding hi.”
Thu-umpa-in Christ tungah kipiak khiatna nanei dinga, khahsuah dingin tawntung nuntakna pammaih asa ta ding hi. Leitung ateel khat tawh na kipum khat sangin pasal neilo in na tolten nuam zaw ding hi. Amah in Jesu na neihna singlamteh lampi panin hong pial sak ding hi.15
Amuanhuai Kittenna.—Christ bekah amuanhuai kiteenna na lam thei hi. Pasian itna tawh mihing’ ki-itna anaipen in hong khih sak ding hi. Christ kumpi amaanna mun bekah athuk, amaan, angkhuat lohna piang hi.16
Kiteen Khit Ciang Khat Kikhel leh.—Pianthakna aneilopi akiteenpihte-in alawm tungah akhauh zawin thu amaan ding kisam hi. Kizopna peuhah gentheihna leh haksatnate atung ahizongin Pasian’ hong ngetnate amasa penin koih ding ahi hi. Itna leh ziadamna tawh Pasian muanna-in thu-umlo zaw te huzaap thei pen hi.17
HILHDING AKISAP CIANGIN
Laisiangtho pan Hilhna La in.—Pasianin aphuh hih kiteenna pen angsungkhuatna lungsim tawh neih ding hilo hi. Kiteenna aneih sawmte in thungetna leh lipkhatna tawh athupina kan hen. Pasian deihna tawh kituakin kavaihawm hiam, cihzong Pasian’ makaihna zong hen. Pasian’ kammal in hihthu ahilhnate sittel in. Laisiangtho’ deihna tawh kituak kiteenna bek Vantung in pahtawi hi.1
Lungsim pilvang tak leh thudik takin ngaihsut ding akisap leh hih kiteenna vai mah ahi hi. Laisiangtho thuhilh ding akisap leh zong minih pum khat suahna thu hipah hi. Ahizongin tuhun
khuahun ah zawlgau leh lunglen vaite kimakaih sak zaw uh hi. Tua in siahna ah hong makaih hi. Hih thu ah khangnote in pil zolo leh teitang takin ngaihsun zolo uh hi. Amaute adingin kiteenna in bumna tawh kibang hi. Pasian tungah ki ap lo uh hi. Amaute ngaihsutnate kolbulh bang a, mi khat peuhin anawngkai sakding patau bang kekin thu-im in kalsuan uh hi.2
Mitampite in alauhuai suangkil lakah vaikuan uh hi. Tembaw ahawl ding neilo in, huhna apia nuamte zahpih uh hi. Amau leh amau akimakaih tawm zoding kisa uha, a upna leh alungnopna tembaw suang tawh kitaih sak uh hi. . . . Laisiangtho ateldot kei uhleh amaute leh midangte tu leh mailam lungnopna uh asuksiat sakding khialhna lianpi bawl kha ding uh hi. 3
Amaan Khensatna Ngah nadingin Thungen.— Numei pasalte in ni khatin nihvei ta thunget zongsatna anei uhleh, kiteenna thu angaihsut uh ciangin li vei ngen uh hen. Kiteenna in
tu leh ahong paiding vantung nuntakna a huzaap leh a konlawh sak thu ahi hi.. .
Tuhun a mi atamzawte kiteendan in nitawpni hunte lim khat hi hi. Numei pasaltein ngawngkhauhin vaihawm uha, vantung nangawn nilkhia uh hi. Biakna in amaute kiteenna tawh akisai lo zahin nawlkhin uh hi.4
Zualzan Lawmngaihna-in Thuhilh Zalo.—Mi nih hong kitheihneih uhciangin khat leh khat zualzan kingaihna hong nei uha, thudang lading, midang mu thei nawnlo uh hi. Ngaihsutna bingin, thu-khenna mittaw hi. Thuhilhna khat zong pom theilo, amaute thuakna bekmah mitsuan uh hi. Apiang ding thaman mu zolo hi. Pul natna bangin amaute zualzan kingaihna in amute bum in, khawlhun nei thei lo uh hi.
Akim apama mite leh amau tawh akisai innkuan nihtein khantawn dahna tawh vaikhum dinga, cihmawh pih khading uh hi. Ahihhangin thumna leh hanthotnate amawkna suakta hi. Tuabang kipum khatna tawh Pasianin kimanna anei nuntakna thupha apiaktheih khempeuh susia ta hi. Ngaihsutna leh kizolnate ki awlmawh lo hi. Thuakna theihna ahau numei pasalte thuhilhnate in zualzan kingaihna ie khensatnate hangin phattuamna pia zolo hi. Biakna vai khempeuhah lungtunglo bek thamlo-in thunget ding zong tha ngah lo uh hi. Amau gel kipum deih uh a, nuntakna tawh akisai lo zahin tavuan lakna khempeuh kin lo uh hi.5
Khangnote’n Uhamte’ Pilna, Theihna Kisam.— Kiteenna panin gentheihna tampi apianciangin, bang hangin khangnote pil zolo uh hiam? Uhamte’ pilna leh thuaknate’ banghangin kisam salo lai hiam? Sumbawlna ah numei pasaltein kidawmtakin kalsuan uh hi. Sumbawlna khatpeuh tawh kizop ma-in, tua nasepna adingin kiginkholh ahi hi. Tua nasepna adingin hun, sum, leh kantelna tampi bawl masak ahi hi. Tua hileh supna kipelh thei ding uh hi.
Kiteenna aladingte in bangzahta in kigin kholh ding kisam hiam? Mailam nuntakna leh khangtampi asukha ding ahi hi. Tua hinapi-in, kiteenna vai ah ciamnuihna, zualzanna, mittawtna, leh
ngaihsut khinkhaina neilo uh hi. Ahang dang om tuanlo hi. Satan in leitung susia in, mihingte hong genthei sak nuam a, hih thu tawh hong bum ahi hi. Leitung gualnopna tawh ngaihsutna apicinglo mitein ahong tungding vantung nopsakna tansak hi.6
Picing Nu leh Pate’ Thukhenna Manpha.– Nu leh pate thuhilhna tawh kizawitawn lo-in naupangte in amaute duh leh dahnate akin zawk tuak uh hiam? Mi pawlkhatte in nu leh pate’ thuhilhna ngaihsut masakin zong neilo uh hi. Angsung lunggulhna in innkuan ki-itna kong khak tan hi. Hih thu ah khangnote in khanlawh ding kisam hi. Thukham 5na bekin Pasian’ kamciam nei hi. Lawm ngaihte’ thu mangzaw-in nu leh pa’ thu kizahtak lo hi. Nu’ thu zahpihna, pa’ kinna zahtak lohna in khangno tampi takte adingin mawhna in kiciamteh hi.
Hih thu ah akikhial pen thu in, theihna leh thuakna atawm lai khangnote kingaihna kinawngkai sak kei hen, cih ahi hi. Lampi tuamtuampanin etding akisam thu ngaihna ahi hi. Midangte thuaknasa leh innkuan nihte vai khempeuh khinkhaina kisam mahmah hi. Hih thu pen mitampite in zangkhai ngaihsut hi. Pasian leh Pasian azahtak nu leh pate’ thuhilhna ngai un, khangnote aw. Hih thu adingin thungen un.7
Pasian Zahtak Nu leh Pa Tung Kingam un.— Pasian azahtak nu leh pa naneih leh amaute thuhilhna zongin. Na lametna leh na sawmnate pulaak in. Amaute thuakna-in ahilh thute sin in.8
Tate in nu leh pa tawh kithei siamin, anopna leh adahna uh kikup pih thei leh, atuak khakding lungnatnate kipelh theiding uh hi. Bang lampi maan hiam, cih abuai uhciangin nu leh pa tawh kikamkum uh hen. Pasian akihta nu leh pate in aphulkhak dinguh lauhuainate genkhol theiding uh hi. Christian ahi tate in leitung thuphate sangin Pasian akihta anu leh apate’ itna leh tate atheihsiamna iplah zaw ding uh hi. Nu leh pate in tate thuakna theihsiam pihin, Pasian’ makaihna leh dalna angah nadingun thu ngetsak ding uh hi. Thamlo-in, nu leh pate in aciampel ngeilo Lawmpa leh Thuhilhpa kawkmuh den ding uh hi.9
Nu leh Pa-in Khangnote’ Kingaihna Lamlak.— Nute pate in tate lawmngaihna vaiah tavuan nei uha, tate tawh akituak lawm zonsak ding uh hi. Amaute thuhilhna leh gamtatna tawh leh Pasian’ hehpihna huhna tawh tate aneulai pek panin agamtatuh suih sak ding hi. Asiangtho, mipi acingding, leh ahoih leh amaan alunggulh theidingin pantah ding uh hi. Kibatpih in kibatpih kaizawn in, deih kibang uh hi. Thumaan leh sianthona leh gamtat hoih nate a iplah dingin aneulai-un hilhding uha, agol ciangun tuabang zia le tong aneite mah hong zong ding uh hi.10
Isaac’ Limlahna.—Nu leh pate in tate lungnop nading vaihawmding mangngilh ngeilo ding hi. Isaac in apa’ khensatna azuihna pen aneulai-a thumang dinga akipattahna hang ahi hi.11
Leitung thupha apia ding gaam tawh Pasianin Isaac thupha pia hi. Kum sawmli aphak ciangin apa in Pasian akihta asilapipa sawla ama’ ziding avaihawmna leh akhensatnate Isaac in mang hi. Tua pan ahong piang kiteenna in, Laisiangtho in akigen mah bangin, innkuan sung nopsakna piang sak hi. “Isaac in anu Sarah ie buk sungah Rebekah hong paipih a, amah in Isaac zi hong suak hi. Isaac in it mahmah a, anu asih khit ciangin Rebekah hangin hehnepna ngah hi.”12
Apil Nu leh Pate in Ngaihsun.—Nu leh pate in tate ngaihsutna donglo-in a innkuanpih ding laksak ding uh hiam? Ahihkei leh tanu tapate in nu leh pa dong masa lo-in alawmding ateel ding hiam? Hih kalsuannate in nu leh pa lungnop nading leh asuan leh akhakte itna angah nading uh abuaisak thei ding hiam? Tuabang tapa in, nu leh pate thuhilhna leh ngetna awlmawh lo-in ama’ thu-in akhensatna tawh akalsuan ding hiam? Kong geninah, Hilo ding hi. Tuabang tawndan pen thukham 5na in deihlo hi. “Pasianin ahong piak leitungah nakhansau nadingun na nu, na pa nazahtakin.” Hih kamciam tawh kithuah thukhamah Pasianin Ama’ thu amangte tungah akamciam peel ngeilo ding hi. Tate deihna aomlopi in nu leh pate in alawm ding uh teel sak ngeilo ding hi.13
(Khen Thumna zota hang ei, zom lai ni maw lawm!)