Amaute in Pumkhat

LESSON 3                   Oct. 13 – 19

“Amaute in Pumkhat A Suah Nadingun”

Sabbath Nitak

 
Tu Kaal Sung Sim Ding: Jn. 17: 1-26; 13:18 – 30; 5: 20 – 23;  2: 3-6; 1Jn. 5:19;Mk. 9: 38 – 41; Mang. 18: 4.
KAMNGAH: “ Hih mite a’ding bek thu a hong ngetsak ka hi kei a, amaute’thugenna hangin kei hong um mite a’ding zong a hong ngetsak ka hi hi. Pa aw, amaute khempeuh pumkhat a suahtheih nadingun ka hong ngetsak hi. Nangmah in kei na hong sawlna thu leitung mite in a uptheih nadingun eite gel pawlkhat ihih mah bangin amaute zong eite tawh pawlkhat hong hi tahen” John 17: 20, 21.
John Lungdamna Thu in  a sawt lo-in Jesuh a tuahding lehhekna leh sihna pulaak hi. John 13- 17 in Jesuh’ thuhilh nunung pen hi-in, kimkhat in ‘siampi pa thungetna’ ci uh hi (Jn. 17).  Siampi lah hi, mawhna hangin sihna thuak ding Jesuh in a thuak ding gimnate leh a siampi nasep tawh kisai a sep ding khempeuh a dingin thungen hi.  Khrih in ama nasem sawltakte le sawltakte nasepna tungtawnin Amah a um mite a’dingin zong thungen hi.” F. F. Bruce, The Gospel of John (Grand Rapids: Eerdmans, 1983), 328.
          Jesuh thunget a bulpi pen in Nungzuite kipumkhat nading, tua banah amau nung a thu-um mi khempeuh kipumkhat nading hi. A thunget mungtuppi pen in “Leitung mite aa dingin thu kong ngen kei hi. Nong piaksa mite nangma aa ahih manin amaute aa ding bekin thu kong ngen hi. Kei neihsa khempeuh nangma aa hi a, nang neihsa khempeuh zong kei aa ahih manin amaute hangin minthanna ka ngah hi” (Jn. 17: 9, 10).
          Thu-um mite kipumkhat nadingin Jesuh thunget ngaihsun lo-in pawlpi kipumkhat ding hanciamna in a mawkna hi ding hi. Bang ding aa Jesuh in thungen hiam? Kua aa ding thungen hiam? Jesuh thunget in tuhun aa dingin bang pulaak hiam?
Sunday                Oct. 14
Jesuh in Ama aa Ding Thungen
 
Siampi lianpa thunget khenthum kisuah hi. Khenkhatna Jesuh in Ama aa ding thungen hi (Jn. 17: 1-5), nihna-ah Nungzuite aa ding thungen hi (Jn. 17: 6- 19), thumna-ah amau khit a om thu-um mite kipumkhat nadingin thungen hi (Jn. 17: 20 – 26).
          Jn. 17: 1-5 sim in. Jesuh in bang thu aa dingin thungen hiam? Tuhun aa dingin bang a khiatna hiam?
  _________________________________________________________________
          ________________________________________________________
Jesuh in amasa-in  Ama aa ding thungen hi.  John 17 ma sungah Jesuh in a hun a tun nailohlam pulaak hi (Jn. 2:4; 7: 30; 8: 20). Ahi zongin tu-in a nuntakna a piak hun hong tungta hi. Mawhna thaman thuak dingin leitungah a hong pai, a tawpkhakna ding hi ta hi. Hih leitungah a hong pai-na thu a cinzawh nadingin hatna kisam hi. Tua dingin Jesuh in thungen hi. Singlamteh tungah gimna thuakin a nuntakna piakhia ding hi mah taleh, Jesuh in a Pa deihna bangin a sepna hangin a Pa minthan ding hun hong tungta hi. Jesuh in singlamteh tunga gimna a thuak ding a pelh theihloh ding sihna hi loh hi. Ahi zongin a Pa Pasian piak a zuihna hangin sihna thuak hi. Ama upna sihpih zong hi lo-in a Pa Pasian minthan nadingin mihingin a hong pian a kicinsakna hang hi zaw hi. Leitung mawhna hangin singlamteh tungah hong si hi.
          John 17:3 in nuntak tawntungna bangci gen hiam? Pasian ka thei hi, i cih ciangin bang pulaak i hiam?
    ________________________________________________________________
    ________________________________________________________________
Pasian i theihna sungah tawntung nuntakna thu kihel hi. Gamtatna ahih kei leh thutheihna tawh hotkhiatna kingah hi lo hi. Jesuh in eite aa dingin Singlamteh tungah a sihna hangin, nuntakna tawh Topa theihna hangin hotkhiatna kingah hi.  Hih thu theihtelna in Pa tawh mimal kizopna hong neisak hi. Na khat peuhpeuh theihna bang hi lo-in Pasian theihtelna in Amah tawh mimal kizopna hi zaw hi. Jesuh leitungah a hong pai-na a hang zong Pasian theihtelna nei-in tua theihtelna in Amah tawh mimal kizopna i neih nadingin hong pai hi.
Pasian tawh kisai thu-te theihna le Amah mah theihna bang kilamdang hiam? Pasian theihna dingin bang in hong huh hiam?
Monday              Oct. 15
Jesuh in Nungzuite aa Ding Thungen
 
John 17: 9-19 sim in.  A nungzuite aa ding Jesuh in bang thungen hiam?
__________________________________________________________________
__________________________________________________________________
Jesuh in Ama aa ding thu a nget khit ciangin Nungzuite aa dingin thungen hi. A sawt lo-in Nungzuite in Jesuh tawh omkhawm nawn lo ding uh ahih manin a lauhuai tuamtuamte le a upna uh  a nusiat loh nadingun Jesuh in amaute aa dingin thungen hi. Tua hi-in Jesuh in a Pa kepna sungah amaute ap hi.
Pa Pasian in leitung siatna pan amaute a kep nadingin Jesuh in thungen hi. Jesuh in leitung aa dingin thungen lo hi. Bang hang hiam cihleh leitung in Pa Pasian langpan tawntung hi (1Jn. 5:19). Nungzuite in hotkhiatna thugenin leitungah om lai ding ahih manun leitung siatna panin Pa Pasian in a kepna nadingin Jesuh in thungen hi. Jesuh in leitung aa ding lunghimawh hi. Bang hang hiam cihleh Amah in leitung Honpa hi. Jesuh a um mite in Lungdamna Thu a gen, a pulaakna uh tungtawnin leitung mun khempeuhah kizel bek ding hi. Tua hi-in siatna in a khaktan loh nadingin Jesuh in thu-um mite aa dingin thungen hi (Matt. 6:13).
Nungzuite khat in siatna sung tungkhin hi. Nitak khat Jesuh in a genkholh mah bangin Judah in migilote tungah a Topa ap hi (Jn. 13: 18 -30). Judah in kei hong lehhek ding hi, ci-in Jesuh in a genkholh hangin, genkholhna a om manin Judah in a lehhek hi lo hi (Late 41: 9). Paisanpawi annekna-ah Jesuh in Amah a lehhek ding pa itna le kilawmtatna lak veve hi (Jn. 13: 26 – 30). Paisanpawi annek laitakin Jesuh in Pasian ahihna tawh lehhek ding mipa’ omzia pulaak hi. Jesuh in ama nasem dingin itna tawh Judah sam hi. Ahi zongin Judah in itna tawh sapna aw nial hi.” Ellen G. White, The Desire of Ages, 720.
Hazatna le enna hangin Nungzuite khenkham ding hi, cih Jesuh in mukhol hi mah taleh amaute kipumkhat nadingin thungen hi. “Amaute pumkhat a suah nadingin nangma min tawh amaute kem ta in”( Jn. 17:11).  Tua kipumkhatna in leitung mite hanciamna panin kingah hi lo hi. Nungzuite kipumkhatna in Pasian hehpihna le a hong piakkhong hi zaw hi.  Amaute kipumkhatna in Pa le Topa kipumkhatna bulphuh hi-in, kipumkhatna lo-in hotkhiat nasepna in muibun lo hi.
Siantho-na le ki-apna lo-in hotkhiat nasepna lawhcing lo hi. Pasian’ hehpihna in thu-um mite sungah nasemin amaute nunzia hong khel ding hi. Pasian’ thuman teci hi dingin tua thuman in a hong khel kul hi.
Leitung tawh kipawl lo cih thu in bang pulaak hiam? Bang thu  in i nuntakna, i gamtat zia, i nunzia cihte leitung tawh kipawl lo-sak hiam?
Tuesday     Oct. 16
“Kei Hong Um Mite Aa Dingin”
 
          Jesuh in Nungzuite aa ding thu a ngetsak khit ciangin, amaute tungtawnin Amah a um mite aa dingin thungen hi (Jn. 17:20).
          John 17: 20 – 26 sim in. Thu-um mi khempeuh aa dingin Jesuh in bang deihna lianpi nei hiam? Bang hangin tua thunget tangtung ding thupi hiam?
__________________________________________________________________
___________________________________________________________________
Pa le Tapa  in pumkhat ahih mah bangun Jesuh in thu-um mi khempeuh pumkhat hi ding thungen hi. Pa le Tapa kipumkhatna thu John in limtakin pulaak hi. Pa le Tapa in kizopna nei lo-in nasem ngei lo uh hi. A sepna khempeuh uh semkhopna vive hi (Jn. 5: 20 – 23).  Leitung mi khempeuh aa dingin Pa in Tapa nunna pia dingin phal a, Tapa in a nunna hong pia hi (Jn. 3:16; 10: 15).
          Jesuh in a nungzuite mite kipumkhat nading thu a ngetna-ah Pa le Tapa ki-itna, sepkhopna, ngimna kipumkhat siksanin thungen hi. “Note khat le khat na ki-it uh leh ka nungzuite na hihna uh mi khempeuh in a hong thei ding uh hi, a ci hi” (Jn. 13: 35).
          Pa le Tapa tawh kizopna-ah itna tawh kipumkhatna kimu hi. Tua kipumkhatna in mite hotkhiatna thu  deihhuai-in musak ding hi. (Andreas J. Kostenberger, John: Baker Exegetical Commentary on the New Testament ( Grand Rapids: Baker Academic, 2004), 498. Thu-um mite khatlekhat ki-itna a kimuh ciangin leitung in Jesuh Honpa mu ding hi. Jesuh a um mite kipumkhatna in a kimu thei lo ding hi lo hi. Pasian’ mite lakah itna, kipumkhatna om kei leh bangci bangin leitung in hotkhiatna thuman mu thei ding hiam?
          Tawntung thuman thutak bulphuhin Jesuh a um mite kipumkhat dingin Pasian in amaute makaih hi.  Upna kipumkhat dingin Pasian in a mite hong makaih hi. Jesuh in sihna a thuak madeuhin, Pa tawh pumkhat ahih mahbangun, nungzuite kipumkhat nadingin thungen hi.  Tuni dongin hih thunget in vanglian hi. Jesuh in Nungzuite kipumkhat nading banah amaute tungtawnin thu-um mi khempeuh kipumkhat nadingin thungen hi. Khrih nungzui a kici mi khempeuh in Jesuh deih bangin kipumkhat ding kisam mahmah hi. Ellen G. White, 4T., 17.
 Pawlpi kipumkhat nadingin bang nasem hiam? Koi bangin pawlpi kipumkhat nading na huh hiam? Bang hangin kipumkhat nadingin huaihamna, angsung theihna ‘kei’ cih a om loh ding kisam mahmah hiam?
Wednesday    Oct. 17
Khristian Lakah Kipumkhatna
 
          Mark 9: 38 – 41; Jn. 10: 16 sim in. Koi bangin Jesuh in mihingte kideidanna, nawlkhin cihte leh Ama nungzui taktak pulaak hiam?
          _____________________________________________________________
          _____________________________________________________________
SDA pawlpi John sunga kipumkhat nadingin Jesuh’ thunget in SDA thu-um mite kipumkhat pulaak hi, ci uh hi. Vantungmi thum thupuak nasepna-ah pawlpi kipumkhat ding kisam hi.  Hih thu tawh kisai pawl sungah kibatlohna om kha thei mah hi. Ahi zongin koi bangin Jesuh thunget bangin Khristian dangte tawh kipumkhat ding mah ahi diam?
          Pasian in pawl dangte sungah Ama mi om hi, cih i thei hi. Lai Siangtho in zong Babylon sungah zong Pasian’ mite om lai hi, cih hong hilh hi. “ Ka mite aw, ama mawhna bawlna kihel kha lo-in, ama thuak gimnate na thuak khakloh  nadingun ama kiang panin hong paikhia un” (Mang. 18: 4).
          Ahi zongin Jesuh ka um hi, a ci mite lakah Khristian zuau mite kipumkhat ding uh a, genkholhna bangin Pasian’ mite bawlsia ding uh hi (Mang. 13: 1-17).  Tua hi-in  Adventist pawlpi in pawldang, Khristian dangte tawh kipawlna ( Ecumenical movement) pumkhatna tawh kisai kidawm mahmah hi.  Tua hi leh SDA pawlpi in pawldangte tawh koi bangin kizopna nei ding hiam? Ellen G. White in hih bangin hong hilh hi.
          “ Hotkhiatna thugen mi khat in ama deihna Pasian a uksak ciangin a thugen a za mite lungsimah Kha Siangtho in nasem hi. Gammial mite lak hotkhiatna thugen mite tawh mapankhop pelh ding hi lo hi. Tua bangin nasepkhop manin eite in Sabbath thuman nusia hi lo hi. Pumpi kikhalhna (temperance) tawh kisai amau hoihnate i lungdampih thei hi. Pumpi kikhalna tawh kisai (temperance) amaute tawh sepkhop theih ding om hi. Tua bangin mapankhopna panin Kha Siangtho in amaute sungah SDA pawlpi thupuakte theihtelna guan thei hi.” Ellen G. White, Welfare Ministry, 163. Ellen G. White in ama hunlai-a thupiang gen hi mah taleh tuhunin pawldang Khristian tawh kizopna zia ding hong hilh hi.
          Khristian pawldangte tawh kimlepaam nasepnate-ah mapangkhawm, i semkhawm thei hi. Tua bangin kipawlin nasep ciangin i upna, thuzuihnate nusiat ding hi lo hi. Tua bangin nasepna tungtawnin i pawlpi tangko thute i hawmsawn thei hi.
Thursday   Oct. 18
 Itna tawh Upna Hawmsawn
 
          Tawntung nuntakna i cih in Pasian theihtelna hi (Jn. 17:5).  1Jn. 2: 3-6 sim in.  Pasian thei i cih a khiatna bang hiam? Koi bangin Pasian i theihna nisimin kilang hiam?
    ________________________________________________________________
    ________________________________________________________________
A huampi-in mikim in i omna ciatah gammi hoih khatin i kingaihsun hi. Ahi zongin  mi tampi in Pasian’ thukham thupi-in ngaihsun lo-in nawlkhin uh hi. Mi kimkhat in Pasian’hehpihna in  a thukham kisamsak nawn lo hi, ci uh hi. Lai Siangtho in tua bangin hong hilh lo hi. “ Pasian’ thukham zuihna in Pasian theihtel nadingin a bulpi hi lo hi. Ahi zongin Pasian a thei mi leh a thei lo mi  a kilatna khat hi.  Tua hi-in  Pasian thu theihna nei i cih ciangin a thu bekin theihna hi lo-in, Pasian theihtelna in Ama deih bangin hong nungta-sak hi.” Ekkehardt Mueller, The Letters of John (Nampa: Pacific Press, 2009), 21.
          Jesuh mahmah in “ Kong na hong it uhleh ka Thupiakna na zui ding uh hi……  Ka thupiakte a zui mi in kei a hong it mi hi” (Jn. 14: 15, 21).  “Pasian itin ama thupiakte i zuihna tawh Pasian tate a it ihihlam i kithei ding hi. Pasian i it ciangin ama thupiakte a zui ihi hi. Eite a’dingin ama thupiakte zuih ding a haksa lua hi lo hi” (1Jn. 5: 2, 3).
          Jn. 13: 34, 35 sim in. Jesuh in Nungzuite bang thupiak thak pia hiam? Koi bangin hih thupiak thak in Jesuh nungzui mite kipumkhatna tawh kizopna nei hiam?
__________________________________________________________________
__________________________________________________________________
Midangte it ding thupiak  in thupiak thak hi lo hi. Pasian in Moses tungah a piak thukham in zong midangte it ding hilh hi (Siam. 19: 18).  Jesuh in Nungzuite a it bangin Nungzuite in zong midangte a it ding uh thupiak in thupiak thak hi. Jesuh in a nunna hong kipiak itna zui-in Khristian thu-um mite ki-it ding hong hilh hi.
          Jesuh in eite nunzia ding hong lak hi. A nuntakna in itna tawh nuntakzia hong lak hi. Hehpihna in sepna khat peuh itna tawh semin, angsung huaiham lo-in kipiakna tawh hanciamin nasem hi. Khrih in tatsat lo-in a itna hong lak hi. Mite aa dingin nungta tawntung hi. Leitungah tua bang itna a lak itna lian om lo hi. Kipumkhatna itna bulphuh hi. Khatlekhat kizopna-ah zong itna bulphuh ding kisam hi. Tua hi leh leitung mite tungah teci hi ding hi. Thu-um mite ki-itna hangin kipumkhatna hong om ding hi.
Jesuh hong lak itna midangte tungah bangci bangin lak ding na hiam?
Friday                  Oct. 19
Ngaihsutbeh Ding: Ellen G. White, “God’s Law Immutable,” 443 – 446 in The Great Controversy. “Denominations, Relations to Other,” pp 763, 764 and ‘Roman Catholic Church,” 110 in The Ellen G. White Encyclopedia.
          Seventh-day Adventist pawlpi in mun tuamtuam a om pawlpi, leitungbup a huam kipawlkhawmin nasem hi. Adventist pawlpi bek in hotkhiatna ngah ding hi lo hi. Adventist pawlpi in pawlpi khat mawkmawk hi lo hi. Adventist pawlpi sungah a kimu thei pawlpi le a kimu thei lo pawlpi om hi. Kua tengin Khrih nungzui-in kua teng in zui lo cih kitel lo hi. Mangmuhna sungah kipulaak mah bangin Khristian biakna sungah lampialna hong om manin Adventist pawlpi in Jesuh nungzui pawlpi hi, ci-in limtakin kitangko hi. Mang. 12 sungah a siangtho pawlpi man le ‘a kizuak numei tawh gentehin (Mang. 17) Babylon khuapi tawh genkakna kimu thei hi. A siangtho pawlpi in Tuuno’ zi, khuapi siangtho, Jerusalem khua thak cihte tawh kigenteh hi (Mang. 21, 22).
          Tuhunin a kimu thei pawlpi ci-in i tel hangin tuma kum zalom 600, 700 – Medieval Ages hunlai-in a kimu thei pawlpi telzawh ding hamsa hi. Tua hi-in Adventist pawlpi in amah bek Pasian’ pawlpi man hi, ci lo hi. Khristian dangte lakah om hi, ci-in pulaak tuan lo hi. Pasian’ pawlpi man in Amah tawh mimal a kizom, Amah a um mi hi. Pasian in tua bang mite thei hi. Adventist pawlpi in hun nunung aa dingin a kimu thei a cianlai Pasian’ pawlpi hi (Mang. 12: 17; 12- 14). Hih a cianlai pawlpi in mun khat om hi taleh mun tuamtuam ah om hi (Mang. 2: 24; 12: 17)” Ekkehardt Mueller, “ The Universality of the Church in The New Testament,” in Angel Manuel Rodriguez, ed., and Message, Mission and Unity of the Church (Silver Springs: Biblical Research Institute, General Conference of Seventh-day Adventists, 2013), 37.
         
Kikup Ding Dotnate
 
1.    Bang hangin John 17 sunga Jesuh’ thunget a tangtun ding thupi hiam? Jesuh in kum zalom khat hun lai-a pawlpi kipumkhat ding a deih bangin tuhunin zong a pawlpi kipumkhat ding pulaak hi lo hiam?
2.    Na pawlpi in pawldangte tawh nasepkhopna a nei hiam? Phattuamna na nei hiam? Koi bangin a hun, a mun tawh kizui-in pawlpi thuman nusia lo-in pawldangte tawh nasemkhawm thei ding na hiam?
3.    Pasian’ mite in thuman nuntakpih uh hileh Khrih’ thunget bangin thu-um mite kipumkhat ding hi. “ Kha Siangtho kimakai sakin, khatlekhat kilemin pawlkhat na hihna uh na kipsak tawntung un. A kibang lametna khat bek a ngahkhawm dingin Pasian in note hong sap mah bangin eite khempeuh pumkhat bek hi-in Kha Siangtho zong khat bek mah a neikhawm ihi hi. Topa khat bek, upna khat bek, tuiphumna khat bek mah a zangkhawm ihi hi” (Eph. 4: 3- 5).

 

Tomkaihna: Jesuh’ Siampi thungetna John 17  in tuhun pawlpi kipumkhat ding hong deih hi. Ama thunget bangin eite in zong kipumkhat ding thunget kisam hi. I upna in Lai Siangtho sungah a kip zaw semsem ding kisam hi. Lai Siangtho thuthuk muhzia kibatlohna om zongin, i pawlpih mi khatlekhat banah Khristian dangte tawh kizopna-ah itna kisam hi.
See also  ZSL 5: Laisiangtho Bekmah
Tags:

Admin

Admin

Top