Aw Khum Naupangno

👧 Aw Khum Naupangno 👦

Awkhum tak tawh pau hiathiat na in tua mi lungsim puakzia leh a thupitna, a lungduaina hong lak hi. Kamsia a paute milak ah a gualtungtuang tawh a ki bat pak hangin lungsim tawng pan ki neumuh lel hi. Omdaan siamin ngeina hoih tawh kamkhum a zang thei mite mikim in it zaw aa nasepna khat peuhpeuh ah zong gualzawhna ngah zaw hi. Midang khat peuhpeuh tungah huhna ki sap hun in zong awkhum ten ngah baih zaw cih ih theihsa hi.

Nu leh Pa piak sum leh paai te pen beipah thei napi tatdaan siamna leh kamkhum zat theihna pen a bei theilo Nu leh Pa hong piak Go leh Gam ahi hi.

Naungek in Nu gilsungah a omlai pek in a Nu kampaute zathei hi.

Kum (1) naupang in mi kampau a zak khempeuh ciamteh hi.

Kum (1) a cin kuan in kampau khiat ding hanciam ta a, kum 2-3 ciang kammal tomnono pau ta hi.

Kum khat leh lang a phak ciangin nuamna, dahna, hehna cih bang ngaihsutna te nei theita hi.

Kum3-10 kikal naupangte-in a zak khempeuh kammalte a paukhiat nop phadeuh hun ahi hi.

Kitot kiseel daan, ki ko daan, ki hamsiat daan, ki huatna kammal te a zakloh pi naupang ten a pauna ding uh thu omlo hi. Tua bang kammal hoihlote innkuanpihte in ahih theih zah tawp in kidophuai mahmah hi.

Nu leh Pa, innkuan pihte-in kammal hoihlo azang kei zong un kiim leh pam, a sangkahna pan un a zakte daan lianlian in hong paukhia thei uh hi.

Inn sungah tua bang hong paukhiat masak laitak nuihsan in paktat bawlna, ciamnuih bawlna in tua naupang kammal hoihlo a pau tektek nadingin thapia thei hi. Tua bang kammal zat a hoihlohna hilh in a zat kik loh nading limtak gen kul hi.

See also  Zo Phualva Vol 09, Issue 01: Lungsim Zatui 1

Naupang khat in a heh mahmah ciangin kammal hoihlo khat a zat leh tua kammal a zat kikkik nading in a heh theihtheih nading bawlkha peuhmah kei in. Ki sek thei hi.

❤ Bil neu keukeu ten a zakhuailoh kammal siate kamgol pi pan gingkhia sak kha kei in.❤

Deihsakna tawh,
Hau Lun Lametna

Ref. NNMS (Child Health Myanmar)
#Photo credits to Hau Lun

Tags:

Admin

Admin

Top