AWR Tangthu

Thu Makai

1989 kum aa Chin AWR ngimna leh geelna a omsa bang in Zomi AWR program pen 1991 kum in kipan aa 1971 kum pan aa a kipan a hi General Conference of Seventh-day Adventist, Adventist World Radio ie a hiang no khat ahi hi. Adventist World Radio pen Africa, Americas, Asia/Pacific, and Europe ci in phual pi 4 in kikhen hi. 1971 kum aa a kipan hi pan ahihmanin transmitter te zongh a thahat te zangh pah zo lo ahihmanin a hunhun in a kisap dan leh sep zawh dan zui in Adventist World Radio in transmission power beh lap zel uh hi. Ih Kawlgam aa ih ngaih Zomi AWR pen Philippines gam ie leilu lam aa US te ie keph tuikulh neuno ahi Guam tuikulh pan a hong kitheh khia hi aa Southern Asia-Pacific Division (SSD) sung ah kihel hi. Tua hi aa Asia/Pacific Radio Station, Guam pan kilowatt 100 transmitter set pi 4 tawh shortwave zangh in Asia gam tampi te ah a kitheh khia ahi hi.

Zomi AWR Vai Kipatcilna

Kawlgam sung ah Radio tawh na sep nading in line khat a kingah masa pen Union makai te in Karen te, Zomi te, leh nam dang te pau ading in na geel masa lo in Kawl gam bup aa a kizangh kim pen ahi Kawl pau tawh Kawl hun aa zat ding in na geel uh hi. Guam aa transmitter a beh lap uh pen 1990 kum pawl ciang in kizo thei ding cih ngimna leh lametna tawh AWR Asia/Pacific region makai te in 1989 kum or tua maa in Kawlgam leh

Asia gam tuamtuam te ah AWR line behlap ding gelna na nei khin zo uh hi. Tua hun lai in Upper Myanmar Mission ah Pr. Kip Za Nang, President, Pr. Thang Khuma, Secretary, leh Pr. Thangpu, Treasurer, te in a makaih laitak uh ahi hi.

1989 Myanmar Union Mission session leh Yearend meeting pen Myaungmya ah ki nei aa Division aiawh in Singapore pan Pr. Ba Khin hong pai hi. Tua lai ah Upper Myanmar Mission pan delegate tampi om ding ahihhangin Committee sung ah lay delegate aa a na kihel ka phawk khak teng pen Pa Khual Za Nang, Sia Kai Za Dal, leh Sia Pau Za Khan te ahi uh hi. Tua hun lai in Kawl kumpi ie radio station pan Chin Program ah Laizo pau (Falam kam) tawh kigen ahihmanin pawl khat te in AWR ading Laizo pau hi leh a ci zongh om uh hi. Ahizongh’n ih lay delegate teng mah kikum in Kawl kumpi ii Chin Radio program sung ah Laizo pau tawh a kigen ahih sam hang in Adventist sung ah Laizo kampau tawh Pasian thu taangko ding pen speaker ding leh program bawl ding zongh hamsa ding ban ah Sagaing khua aa ADNG (tu in UDNR) {ih Kawl kumpi in 1964 kum pan Academy for the Development of National Groups (ADNG) a pat khiat uh 1991 kum pan University for the Development of National Races (UDNR)} a kici kumpi sang ah Zo kam (Tedim kam) pen Khamtung gambup kampau ding in a kisin sakna thu leh AWR speaker ding leh program sung aa akisam a tuamtuam te ah a mapang thei ding pen Tedim kampau sung mah ah kicing pen ahih thu Sia Kai Dal in suut (thu sung) hi. A tung aa kumpi sang ah Zo kam (Tedim kam) a kisin na pen Chin Affairs Supreme Council ah Leilum khua mi Colonel Putpa in makaipi (chairman) a sep hun sung in Zo kam (Tedim kam) pen Chin language ding in a na guan man ahi hi.

1989 Union session hun in Pr. Sidney Gyi pen Union Communication Department Director a sep laitak hi aa aman zongh Zo kam mah hi leh kilawm sa pen aa hong panpih ahihmanin 1989 Myanmar Union Mission yearend committee ah ei Zo kam pen Chin AWR ah zat dingin kikupna a om khin ahi hi. Guam ah transmitter a beh lap zawh uh ciang in pau nam dang beh lap nading line nei beh uh ahihmanin Division te in Kawlgam leh Asia gam te sung aa pau nam tuamtuam te tawh thugen khiat theih nading line piak beh uh hi. Kawlgam aa SDA pawlpi sung ah pawlpi mi a tam pen Karen leh Chin programs ading in a kingah ciang in Sagaw Karen in nai lang, Po Karen in nai lang leh Chin in nai lang mah a ngah ahi hi. Hih AWR line a kingah beh ding a kitheih tuung lam in Zomi AWR in nai khat ngah thei ding in hong gen uh ngei hinapi tu ni ciang dong nai lang bek mah kingah lai phot hi.

Zomi AWR Zungkhak Kipan Global Mission cih theme tawh General Conference in mission nasep hong pat thak maa aa Zomi AWR (Chin AWR) pen AWR Asia/Pacific Region pan geelna a om sa dung zui in 1989 Myanmar Union Mission year-end committee, Myaungmya ah kikup sa ahih teii hang in a thu akipanh lith lith hi bek aa bang mah kigeel kisem taktak nai lo hi. 1990 kum pan Upper Myanmar Mission in Global Mission project sung ah Zomi AWR masuan ding geel theih bang in geel in Sia Thang Siangh, President, Sia Thankhuma, Secretary, Sia Kham Khan Lian, Treasurer, te makaihna tawh Upper Myanmar Mission in hanciam mahmah hi. Tua akipan Upper Myanmar Mission makai te khensatna zui in Zomi AWR ih cih hi aa mi namdang te in Chin AWR ci uh hi.

Pawl khat te in Mizo, Falam, Khalkha, or Zo kam tawh radio pan thugenna neih ding ngaihsutna tuamtuam a nei a om hang in Mizo pau tawh Mizo gam aa te in gen lel ding ahihmanin 1989 Union Session aa kikupna sa mah bang in Zo kam zangh in Zomi AWR cih ding Upper Myanmar Mission Executive Committee in khensat hi. Zomi AWR zum koi ah koih ding cih kikup leuleu ciang in Maymyo or Mandalay ah koih lengg a ci khawng zongh om hi napi, Mandalay lah electric mei a hoih mawh loh hang in innsap losap tam ding, Maymyo ah lah electric a om teii hang in mei tha hat vet lo, 110 volt te nangawn a taang gina zo hi lo ahihmanin Tedim ah ih Zalui mei tha hat mahmah lai banah thugen ding, la sa ding cih te zong Tedim gam kim aa ih pawlpi mi lasiam teng mah zangh nuam ding hang aa Maymyo khawng Mandalay khawng ah koih mawk leng sum zatna sum beina tam lua ding ahihmanin Tedim khua zah (kan) aa mun hoih om kei cih ngaihsutna tawh Upper Myanmar Mission Executive Committee in Tedim ah koih ding in a khentat a hi hi.

Zomi AWR Kungkhan Kipan

Radio ministry and studio recording cih bang pen Upper Myanmar Mission sung ah nei ngei nai lo ihihmanin Zomi AWR a makai leh speaker ding in music lam a uuk a siam leh thugensiam khat a kizon ciang in Sia Do Za Thang mah hoih kisa pen ahihmanin kha 6 sung bang studio aa recording sepzia leh bawl zia sin ding in 1991 kum in Yangon ah training kila sak hi. Tedim aa Zomi AWR inn lam ding kipan nai lo ahihmanin Sia Do Thang in Zomi AWR program pen Yangon pan hong pan khia masa hi. A tung a pat in bang mah kinei nai lo ahihmanin Yangon aa Kawl progam te’ vanh kizat sak in Park Lane aa Mission inn nuai khat ah Kawl, Karen, leh Zomi program te in mun kizangh taang hi. Kawl program zongh a kipat zawh uh kum tam nai lo, Karen program zongh Zomi program mah tawh akibang aa a kipan ton ahihmanin Myanmar Union Mission in recording machine track 4 te khat bek a neih sunh uh a hunhun in a hawm diam diam uh ahi hi. Sia Thang in technician lah sem, thugen in la zong khum hi. Zomi AWR ah thugen aa a mapang masa pen Sia Do Za Thang hi aa hun zeek leh thu pulaak (annoucer) aa a  mapang masa pen Sianu Dal Khan Vung (Pr. Daniel Nangno’ zi) ahi hi. Yangon khua aa a om thei sun Zomi SDA te in ka na hanciam khawm uh aa Zomi AWR ading in la khum masa pen te Sia Do Thang, Sia Mungno, Sianu Dal Vung, Sianu Pau Cing (Sia Do Thang’ zi), Sianu Thang Deih Lun te a hi uh hi. Hun hawm thawh uh aa hun kituhteh pian uh ahihmanin Zomi AWR speaker Sia Do Thang bang in hun tam a ngah zawh loh man aa a lungkham na hong gen thei zel hi. Set vanh kicin loh man in hun hawmthawh uh ahihmanin Kawl leh Karen program in Zomi AWR program pen nawngkaai hong sapian uh in hong nawl khin pian uh aa mundang ah kituah khia in vanh zangh khawm kei lengg hong deih uh hi. Tua hun lai in Zomi AWR thugen Sia Do Thang in tenna ding inn nangawn ngah zo lo ahihmanin tawlpi khat sung Yangon pan mile 50 vaal bang a gamlatna Pegu khua pan zum kah hi. Tua khit ciang in Ahlone SDA Mission inn ah tawl khat sung Church Pastor sem kawm in Zomi AWR ading Yangon ah na sem hi.

See also  Why Worship on Sunday? A Saturday vs Sunday Comparison

Zomi AWR Inn leh Vanhzatte Honna leh Appna

1992 kum pan Pr. Sandy Dee, President, Pr. Than Khuma, Secretary, leh Sia Gin Sian Mung, Treasurer, te in Upper Myanmar Mission makai panmun hong let uh ciangin amau maa aa Upper Myanmar Mission officers leh EC ie geelna sa te leh khensatnate dung zui in 1992 kum in Zomi AWR studio ding Lawibual SDA huang sung ah lam ding kipan hi. March 30, 1993 kum in Myanmar Union Mission president Ba Hla Thein, Upper Myanmar Mission officers, Pr. Sandy Dee, President leh Sia Gin Sian Mung, Treasurer, te tawh Zomi AWR hon pawi Lawibual SDA Mission huang sung, Tedim ah kinei hi. Topa Pasian hehpihna thupha hang in Yangon aa a om lai aa Sia Do Thang in a khum sa thu leh la te zangh in 1993 kipat lam pawl in Zomi AWR hun Guam pan a hong ging khia tatak zo ta ahi hi.

Sia Do Thang tawh Zomi AWR aa ding a kisamh vanh teng – dehumidifier, base guitar, lead guitar, recorder, mixer, timer, cih bang leh a dangdang a neng a tawng supplies a tuamtuam te dong in kikum in vanh lei nop vanh gil thupi diakdiak te bel UMM EC ah approval ka bawl sak uh hi. Union ulian te: Pr. Ba Hla Thein, Pr. Ba Khin, leh Pr. Do Hen Pau, te Singapore ah Division Committee a pai uh ciang in Zomi AWR ading in Recorder track 8 te khat a hong lei sak na ding uh UMM EC in minute sung ah a nget ban ah kei mah in Union ulian te kiang ah ka nget ka vai khak beh keei hi napi track 2 te khat hong leisak sese uh ahihmanin ka lung kim lo hi. Pr. Ba Khin in a hong leisak ahihmanin “hih a thak na deih kei leh Yangon aa track 4, a luui pen la le cin ai ve” hong cih ciang in a hong cih pong ahi phial zong in track 2 nei te a thak mah deih zaw kahihmanin lungkim lo pi mah in ka na saang mai hi. Sum tawh ih lei ding hi lel aa Union ulian te in bang hang in hong lei sak lel lo uh hiam ci in ka ngaihsun sun kha hi. Banghang cih leh tua hun laitak in Zomi AWR matching fund ci in Union office ah Ks. 25,000 UMM in nei hi. Tua hun laitak sum khekna pen $1.00 to Ks. 6.00 bek ahihmanin Zomi AWR ding aa ka nget track 8 te khat $4,166.66 man het lo lel ding ahihteh hong lei sak buang lo aa ci in khasia phial ingh. Ahizongh a hang ding ka ngaihsut sut ciang in a hi thei ding thu nih ka saaikak kha hi. Thu khatna ah Zomi AWR in recording machine thak track 8 te nei in Kawl program in a luui track 4 te bek nei ding cih pen ngaihsun zo lo uh ahi tam maw ka ci hi.

Thu nihna ah kong gen ngei sa mah bang in Pr. Sandy Dee leh Sia Gin Sian Mung te in UMM lutang a hong sep maa in Upper Myanmar Mission in Myanmar Union Mission ah ih sum puak ding te puak ngei lo in nazangh gai zel ahihmanin Ks. 2,500,000 (Ks. 2.5 million = $416,666.66) bang ih bat laitak mah a nahih mawk tawh ih leibaa ih thaangbaa hang aa hong koih dap zong hi kha ding ai ve maw ci ingh. A thu nih te hang hi khawm thei ding in ka um hi. Ahizongh’n thudang mawk mawk hi samm lo aa Zomi AWR tawh Pasian nasep nading hi buang ahih teh hong ngaih sut pih buang lo uh aa cih zongh ngaihsun kha veve ingh. Banghbangh ahizongh’n track 8 ka na ngah zawh loh uh hang in ih neih masak track 2 tawh Topa Khasiangtho panpihna hang in maa kinawt thei veve ahihmanin Topa’ min ka phat hi.

Tu lai hun aa digital tawh online zangh aa kizop ziauziau ki khakk ziauziau te bang hi lo in radio cassette tape vive a kizangh ahihmanin radio aw thehkhiatna phual Guam a tun nading vaipi khat ahi hi. Tua hun lai in Pr. Kyaw Sein Pe Union Communication Department Director a sep lai hi aa kumpi lam pan hamsatna a tuamtuam te hang hi ding hiam a nasep masuan muibun lua khol lo hi. Kawl program leh Karen program pan aa cassette te zongh tam nennan khin zel ahihmanin Zomi AWR cassette te hong khak sak zel tham sam ahihhang in masak in hong nei zo lo zel hi. Union ulian te gamdang a zin uh ciang or Division pan ulian te a hong zin uh ciang bek aa a kipua khia thei hi aa tua nangawn Yangon Airport pan kumpi te in hong muh sak le uh censor lo pi in puak khiat ding hong phal lo in hong mat sak ding uh ahihmanin hamsatna tampi ka naphu kha uh hi. Tu in ahih leh online tawh direct in kizom kikhak thei ziauziau uh ahihmanin Pasian nasepna mavang tuam mahmah ta hi.

Sia Do Za Thang Family
Pr Do Thang te innkuan, AWR-Zomi
Studio Honpawi ina kilakna uh hi. (Khup Khen Thang)

Zomi AWR Paak Bangh Palhta

Zomi AWR Studio inn lam nading in Upper Myanmar Mission in sum leh paai tampi bei in kilam hi. Lawibual leh Sakollam pawlpi mi te in AWR inn mun zikna ah tha tampi bei ding uh hi. 1993 kum, March 30 ni in Zomi AWR Studio a kihon akipan Sia Do Thang in hanciam in awkhum (recording) nasep hong zom to hi. Zo gam ah ‘awkhumna’ a om masa pen ahih mah bang in a diakdiak in music lam a uuk a siam pawl sung pawl pua a kua maciat in hong lungdampih mahmah uh hi. Mandalay leh Yangon khawng ah va pai aa aw khum ding pen ol het lo ahihmanin Zomi lasiam, khutsiam, khausaai siam, tampi te adingin phattuamna a pia thei ding khat ahih ban ah Upper Myanmar Mission ading leh Zomi AWR adingin zongh sumlutna (operating income) a om thei ding thu khat ahi hi. Tua thu hang in SDA pawlpi mi khat peuh in aw a khum nop leh tua zah, pawlpua pan Zomi khat peuh in aw a khum nop leh tua zah ci in ciangtanna kinei hi. Operating fund tampi hong lut thei ding aa a ki lamen ahi hi. Ei SDA pawlpi sung, Sakollam pan U Zamno (Pa Sian Cin Zam) bang in zongh Zomi AWR studio, Lawibual ah aw khum ngei hi. Tua ban ah Kap Pau (Ngente) in zongh la khum ngei hi. Ka theih khak loh hang in a dangdang zongh a khum om lai kha ding hi. Sia Sawm Sang in January 20, 2010 ni aa hong genna ah Sezang khua mi ECT lasiam nungakno 3 bang in a awkhum masakna uh Zomi AWR studio, Lawibual, ah a khum thu leh Lei Lum khua mi guitar siam Zen Lian’ group bang in zongh la series 5 bang Zomi AWR studio, Lawibual, pan mah khum hi ci in hong gen hi.

See also  Desmond Ford Thu Tawm

Zomi AWR Vul Kik Pak

A tung aa bang in kizom to suak hi leh Zomi AWR pen a lawhcing mahmah ding hi napi Tedim aa ih Zomi AWR studio thu kiza nawn lo in a mangthang bang in hong dai cip pian mawk hi. Zomi AWR program ah hoih tak aa thu khempeuh a vaan thei ding in 1991-1992 kum pawl pek akipan tua hun lai aa thugen, la sak leh tum theih khausaai a siam khawm, sia te lak aa ih neihsun Sia Do Thang pen AWR speaker leh AWR makai ding in special training a kipia ahi hi. Yangon ah Sia Do Thang in a sep sung in Zomi AWR hun ah thu pulaak leh hun zeek ding in sianu Dal Vung in temporary contract worker panmunh tawh kihuhsak hi. Tedim ah AWR studio ih hon khit ciang in Sia Do Thang te Tedim ah hong kikhin uh aa AWR ah full time kisem sak hi. Sianu Dal Vung in Tedim ah zui to thei lo ahihmanin Sianu Awi Khan Dim in thu pulaak leh hun zeek in panpih hi. Tua nung ciang in Sia Thang Gen Mung, Sianu Pum Go Man leh Sia Suan Sawm Sang te in Zomi AWR ah panmunh a tuamtuam tek tawh hong sem zom uh hi.

Hi bang kawmkaal ah Tedim aa ih Zomi AWR hong thaneem in Zomi AWR na sem Sia Sawm Sang pen Yangon ah kikhin suk hi. Sawtpi lai te in pawl khat te genna ah Sia Langh Sawm Mang in a makpa Sia Sawm Sang pen Yangon ah a koih suk hi a ci mawkmawk zongh ka zak ngei om hi. Tu sawng teng in pawl khat te genna ah MYUM makai, Karen/Deek te in Zomi AWR vai teng Tedim pan Yangon ah a hong tuah khiat sak bang in hong ging leuleu hi. Pawl khat te in ih van zat te luui lua ta, digital leh computerize recording equipment kisam ahihciang aa Yangon zuat kul dan in a gen zongh om hi. ‘Digital recording, computerize recording, internet leh online communication cih te leh a dangdang vanh zat a hoih zaw a kisamh om takpi mah ding hita leh AWR innpi nusia liang in Yangon ah ih khin se sang in equipment a kisam bangbang vai hawm in Tedim aa Zomi AWR innpi sung mah ah bangh hang in awkhumna a kisem zom suak ding in Upper Myanmar Mission officer te in na vai hawm lo uh hiam? Tua hi leh Tedim aa Zomi AWR studio innpi lalsan kul zawzen samm lo mah ding hi ven’ ci aa a ngaihsun mi tampi om kha ding hi. January 20, 2010 leh December 3, 2010 ni aa Sia Sawm Sang’ lai gelhte leh December 7, 2010, ni aa Sia Kham Khen’ lai gelh te ka sim kop ciang in Tedim aa Zomi AWR studio a hawmcip theihna

a hang a nuai aa bang in ki tel tak in kimu thei hi.

UMM Makaite in Puahlo Zuunlo

  1. Sia Do Thang in AWR speaker a sep kawm mah in “Sia Do Thang pen Circle Leader zong hi ahihmanin —–. Effort na hanciam ahih manin tape akicing in ngah zolo hi. Tua ciangin AWR Yangon pan in effort sermon na gente khum in cih dong in ki vaikhak hi.” (Kham Khen, December 7, 2010). Zomi AWR speaker himhim pen a kisam bang in a tawm pen full time speaker khat koih ding kilawm mahmah hi napi UMM makai te in Sia Do Thang pen AWR speaker leh Circle leader na thuah khawm sak mawk uh ahihmanin Zomi AWR awkhumna ah maa telh lo pah hi.
  2. Tua hun lai in Sia Gen Mung pen set len ding (technician) hi aa Sia Do Thang lah circle leader ahih kawm tawh AWR ah full time speaker sem nawn lo hi. Sia Sawm Sang in, “Tua hun laitak kei Lawibual ah AWR ah ka sep lai tak hi in tua a kipan in kei pen Heilei pawlpi kem in hong kituah sak hi. Tua pan in AWR ah thu gen tawh thuah kawm hen hong ci a, tai 28 kigam lat na mawtaw cycle omloh na khe tawh lampai na tua zah a gamla pan in zum hong kah sak tak ciangin kumkhat a ding khui khak ding te ki zo zolo suak pah hi. Tua bang teng hang in Tedim pan in Yangon ah hong ki sam suk ahi hi.” (Sia Sawm Sang, January 20, 2010) ci hi. Tua ban ah Sia Sawm Sang genna ah AWR speaker ding in”kei hong koih hi napin kumkhat khit teh kei zong Heilei hong puak leuleu in tua kipan Radio Speaker om lo ahih man in, Singapore pan in AWR programe director pa in, Chin program pen kum khat a puak ding zah nong puak kei vua leh, kiphiat ding hi a cih teh MYUM in kei Yangon ah hong sam suk in tua a kipan AWR Zohun pen tu ni ciang hong kizom to to thei suak hi.” (Sawm Sang, December 3, 2010) Sia Khen genna ah zongh,”Sawmsang thugen kiva ahihmanin, Genmungin set len hen, Sawmsang pen Heilei in sia dingin ngen ahih manin Heilei ah om henla,  A HUN NGAH SIAL IN SERMON ONG GUANG HEN cih ki vaikhak hi.” (Kham Khen, December 7, 2010) ci hi. Tua hi aa Sia Sawm Sang zongh full time in AWR masuan len sak lo in Tedim pan tai 28 a gamlatna Heilei khua ah UMM makai te in Pastor nasep leh AWR masuan na thuah khawm sak mawk uh hi. Zomi AWR awkhumna ah maa telh lo pah hi.
  3. Tedim ah circle leader leh AWR a thuah khawm khit ciang in “UMM session in Kachin Circle dingin aseh(Kachinte deihteel) sia Do Thang” (Kham Khen, December 7, 2010) pen Kachin circle leader ding in paisak sawnsawn lai ahih manin Tedim aa Zomi AWR ah masuan pi aa a nei om nawn lo mawk hi.
  4. Shan leh Kachin te ading deihsakna: “1999 kum mid-year EC committee ah” Sia Khen in, “Ei Zomi te Christion hi khin i hih man in radio tawh thu gen na kisam nawn lo hi. Ei gam pen khual mial gam hi nawn lo hi. Tua ahih man in AWR pen Shan leh Kachin te hawm sak leng hoih ding hi ci-in sutuan” hi. (Sia Sawm Sang, January 20, 2010) “UMM President ka sepciangin, imipi in AWR-Zomi nasep kizom in la zong kikhum theita hi. Global Mission vai-in, Shan le Kachin pen ka veei mahmah hi. TUA MANIN UMM PAN IN MYUM TAWN IN SSD AH SHAN PROGRAMME LE KACHIN PROGRAMME ONG BEHLAP SAK DINGIN KA NGEN HI. —AHIH THEIHLEH AWRZOMI TAWH RECORD KHAWM DINGIN ZONG KA NGEN HI PIANG THEILO AHIH MANIN SHAN LE KACHIN IN ZOM NAWN LO HI.” (Kham Khen, December 7, 2010) Division office aa AWR Department in Shan leh Kachin program hun hong pia beh zo hi leh Shan leh Kachin pau ading speaker nih bang kivaihawm ngel ding hinapi Zomi AWR in full time speaker khat nangawn na ngah zo nawn lo mawk hi.
  5. Tua hi aa Upper Myanmar Mission administration in full time AWR speaker koih lo ahihmanin a kisamh zah aw a kikhum zawh loh ciang in”Karen le Chin sermon kikhak den theilo ahih manin tawm hi cin Kaibe in agen ciangin,” donghu ding in “Kham Khen Pau, Kai Khan Khual, Do Za Thang, te in huh henla cih kithukim leuleu hi. —-Kham Khen Pau in Revelation khum ding, Sia Kai Khan Khual in Christ Object Lesson khum ning cia tua bang in kihon pan hi. Tua laitak mah in Yangon ah ahunbit dingin Sia Sawm Sang UMM pan kikoih suk hi. Kei tekin zong Computerize Recording tawh Mangmuhna bu hilhcianna va record lai ingh.” (Kham Khen, December 7, 2010 ci hi. Sia Khen in bang zah vei va khum hiam thei khang. Sia Khual leh Sia Do Thang te in donghu in a khum lo hi ding hiam Sia Khen in pulaak lo hi. Tua hi aa regular full time speaker kician koih lo pi in donghu bek a kiguan hang in amau zongh amau masuan nei ciat uh ahihmanin awkhumna pen telh tuam lo ding cih theihsa hi.
  6. Sia Kham Khen in “2001 kum August 20 ni in kei kiang mahmah ah hong gen in zong AWR phiat ding thu hong gen a, a hi zongin ken bangmah in ka dawn tuan kei hi.” (Sia Sawm Sang, January 20, 2010) Tedim aa Zomi AWR om nawn lo in Zomi AWR vai teng Yangon ah a kituah vai tawh kisai in Sia Sawm Sang in, “Hih thu lian ah bel MYUM tawh kisai masa het lo hi.” (Sawm Sang, December 3, 2010) a cih leh Sia Khen in “SSD deihna tawh, ahoih zaw ding ngimna-a MYUM in Yangon ah agawm suk hi zaw.” (Sia Kham Khen, December 7, 2010) a cih uh pen kituak mahmah hi. Hi bang aa Yangon ah Zomi AWR a kituah sukna leh a kigawm suk na a hang bulpi pen (1) tua hun lai aa Upper Myanmar Mission makaite in Tedim aa Zomi AWR speaker dingin hun bit sia na koih den lo uh ahihmanin Zomi AWR program ading a kicing awkhum zo lo uh hi. (2) Shan leh Kachin te ading deihsakna pen hoih mahmah ahi tazongh’n UMM makaite in Zomi AWR pen na nawlkhin na paampaih kha uh ahihmanin Zomi AWR a mitcip dek tak, a vul a vuai, a mangthang ding pen Southern Asia-Pacific Division ie thukhualna leh deihsakna hang aa Myanmar Union Mission in a hoih pen ding ngimna tawh Yangon ah a gawm suk ahih lam ih tel ciat ding hoih ka sa hi. 1997-2001 kum sung teng aa Upper Myanmar Mission lutangpi teng pen Pr. Kham Khen Pau, President, Pr. Langh Sawm Mang, Secretary leh Pr. Suan Cin Pau, Treasurer, te a hi uh hi.
See also  Jerusalem ah Ciahkik

Zomi AWR Khuasuak Kik in Gahta

Zomi AWR in thugen sia hunbit a neih loh man in Zomi AWR thugen sia leh na sem te in a kisam zah aw a khum zawh loh uh ciang in “Chin program pen kum khat a puak ding zah nong puak kei vua leh, kiphiat ding hi” (Sawm Sang, December 3, 2010) ci in Division makai te in a vau ciang in Zomi AWR a kisep zom theih ding ngimna tawh Sia Sawm Sang pen Yangon a tung suk ahi hi. Sia Sawm Sang in Yangon pan awkhum hong zop ciang in ih Zomi AWR hong khanglo kik, hong kitawh kik, hong khuasuak kik ahihmanin a vaihawm UMM, MYUM, leh SSD makai te tung ah lungdamna ka pulaak hi. Tu ni tu hun in ih biak Topa Pasian thupha hang in leitung bup ih omna mun ciat pan radio leh internet pan Zomi AWR hun ih ngaai thei ta hi. Khaa lam tha ih ngah lawh ciat ding ka lamen hi. Zomi AWR hang in Topa Pasian hehpihna leh gupkhiatna lampi mi bang zah in muh lawh khin aa muh lawh lai ding, kha khanlawhna leh pianthakna ngah lawh ding hiam cih pen ih tel loh hang in mi tampi in phattuam pih ding hi. Vantung ih tun ciang bek in ih tel zo pan ding hi.

Kei theih pak khat ah Tedim gam Sai Zang khua ah Pa Kham Sial Lian Gualnam in Zomi AWR a ngaihna pan Sabbath thumaan leh khaa khanlawhna ngah ahihmanin Sai Zang khua ah crusade hong bawl un ci aa a sap leh a nget huhau in Sia Sawm Sang leh Tedim circle aa sia te makaihna tawh gupkhiatna thu taangkona January 7-19, 2009 sung a va neih uh ciang in Pa Kham Sial Lian Gualnam, a zi, a tapa khat, a tanu khat leh a dang mi 9, a vek pi in khaa manpha 13 te in Pasian pawlpi SDA mission sung ah tui kiphumna tawh hong ki app uh aa Sabbath School member pen 35 pha pah uh ahihmanin tu in Sai Zang khua ah SDA pawlpi mi om ta hi. Topa’ min kiphat den ta hen. Sai Zang khua ah SDA pawlpi’ thupuak gupkhiatna thu pen 1957 kum pawl pek in Sia Phung Kai in na tangko ngei khin hi. Sia Kham Khen Tedim ah a om lai in Sia Kham Khen, Sia Mungno leh Sia Phung Kaite in Sia Kham Khen makaihna tawh Saizang khua sang innpi sung leh Mingyi Pu Mangtal ie Sai Zang innpi sung ah a kigawm in kaal thum sung bang taangkona nei ngei uh hi. SDA pawlpi thumaan pen hong saang aa hong ki app pah ding uh hamsa sa mahmah uh hi. Ahizongh’n Sia Phung Kai leh Sia Kham Khen te vawhsa khaici te pen Topa’ Khasiangtho in Zomi AWR tungtawn in huih lak pan Khasiangtho guah a na buak suk ciang in khangluui ngeina biakna leh RC pawlpi a thahat mahmah na Sai Zang khua ah tu in SDA pawlpi hong ding khia thei ta hi.

December 19, 2010 ni aa Sia Sawm Sang in tampi lak pan tawmno hong gen pak teng a nuai aa bang hi.

  1. AWR speaker a sep zawh thugen pi (main speaker) aa a mapan na 27 pha khin ta hi SDA pawlpi a om ngei nailohna khua 13 ah SDA pawlpi om ta hi.
  2. “Ling Thuk te khat bang a tapa khat neih sun a sihsuah teh a lungsim kisia lua in sun leh zan in zu bekbek a nek zawh kum 10 bang a cing khin papi khat AWR a ngaih na hang bekbek in, piang thak hi in zu leh za kham theih khempueuh nusia in mi thak suak taktak mawk ahih man in, a khuapih a a kipan a ma pian zia a thei khempeuh in lamdang a sak mahmah khat ahi hi.”
  3. Nahnuai khua a ten zongh ama thugen za nuam in sam uh hi. Sum leh paai tawh a huh zo ten Pasian nasepna ah panpih huai hi.
  4. Lai hong kikhak te zongh tha ngah huai thei mahmah in sum leh paai kicing hi leh lut theih nading mun tam mahmah om hi ci hi.

Panpih Ciat Ni

Hi bang in Zomi AWR a tehno sel in hong paak pha thei ahih leh a ngah phat zawh nading in a kisam sum leh paai te tawh huh in ih biak Pasian leh Sia Sawm Sang tawh maa pang khawm ding in hong hanthawn ingh. Zomi AWR a huh nuam te in Sia Sawm Sang tawh kizom in kam ciam (pledge) pia lengg AWR tungtawn aa Pasian thu taangkona tangzai tuam mahmah ding hi. Ken bel Sia Sawm Sang or Zomi AWR in mimal’ huhna Ks.1 a ngah sim in Ks. 1 tawh Ks. 300,000 dong matching fund piakna tawh huh ding in hanciam sawm ingh. Zomi AWR in gah pha tampi hong gah beh den henla, hih Zomi AWR nasepna hang in kha mangthang tampi in Topa Pasian’ tawntung nuntakna ngah lawh ta hen. Tu laitak aa a mapang Sia Sawm Saang leh Sianu Man te ie kammal (aw) te leh a masuan uh Topa Pasian in thupha hong piak sak ta hen. Ih Topa Zeisu hong kum kik ni dong Zomi AWR khansau in a khang khang in kip in hong cidam to suak den ta hen.

Zomi AWR a it leh a deihsak,

Mungno Gualnam

Riverside, California

December 21, 2010

Tags: , ,

Admin

Admin

Top