4. BANG HANG IN PIANG KA HIAM?
URUGUAY | April 27
Graciela Musetti, 52

Uruguay khuapi Montevideo bus khawlna khat ah nupi khat dingg hi. A tuamvilvel a, azat ding sum, a sumbawm sungah pua in, bus ngak hi. Thakhat thu-in aci hong ling’tantan hi. A sungah a gamtang khat a omlam thei hi. Bus hong tungin hong khawl hi. Ahizongin amah alehlam nga-in, Bus zui nawn lo-in, Lam lianpi kantan in moh sai-ah a sum tawh moh a lei zawsop hi. Inn a tun ciangin a pasal in, “Ong tungkik baih bilbel cei” na ci hi. “Imm, ken hih nawnloh dingin khentat ta hi veng” ci-in dawng hi. Tua zawh kha bangzah hiam khat khit ciangin Graciela Mustti piang hi.
Graciela’ nu Maria in ahih leh a tanu in tua ni, a mangngilh khak ding phal vet lo hi. 

Atumdang Naupang 

Graciela hong gol toto in, han khawng a, taih kitam ziazua lak khawng ah kimawl thei zel hi. Kha 18 a phak lai-in, kum 18 apha, a-u numei khat setzung meikat na hangin misi 20 lak ah kihel kha hi. Nisim in a nu in han-ah pai pih in, a sisa atanu ngai in va kap den hi. Graciela ahih leh han kitam lak khawng ah kimawl lel hi. Han te’ tunga paak kisuang a tam lua te panin pawlkhat la in, paak om vetlohna han te’ tungah va koih kawi kawi hi.

Lengla a neih uh ciangin a nu in, “Pasian in ka tanu khat hong laksak in, tua tang’ dingin khat hong pia kik hi,” ci thei zel hi. Tua khit teh Bus khawlna-a thupiang khawng ciamnuihna in gento zel hi. Nui kawm in, “Graciela bel hong pian ding a ki lamen vet lo ei ve” ci thei zel hi. Tua bang a cih ciangin Graciela in nuam sa lo hi. A innkuan sung vua ding a, khuavak khat ahi, a u nu’ taang dinga piang sese dan in ki ngaih sun hi. Kum tampi hong pai ta-a, a nulepate hong kikhen hi. 

Kum 15 a phak in tapa khat Graciela in hong nei hi. Tua khit teh a-u pen pa lungtang natna tawh hong si sawnsawn hi. Tua sihna in a nu lungleng sak lua ahih manin a nuta un han-ah va pai zel uh hi. Hun hong beitoto-a, Graciela unau te lak ah khat bekbek a cian lai, a u pasal khat setbing a tuan laitak mawtaw in taih kha in si sawnsawn hi. Graciela in a lungsim sung a, a ngaihsut ahi, tua  tuahsiatna innkuan sungah amah bekbek a suak ta liailiai ahihna a nu kiangah pulaak nuam napi pulaak ngam lo hi. Ama’ pianna hang-a tua bang a piang ahi zaw diam, ci-in khalau den hi. A nu hong teek ta-a, Graciela in a nu asih dongin kem hi. A sihkuan lam ciangin apum zaw-in lupmun ngak-a, lupna tung pan in a tanu nusia ta hi. Ni khat, Graciela in Adventist Radio, amau pau tawh kigen-na hong ngai kha hi. Pastor pa’ thugen in a lungsim bun mahmah a, lungnopna le ngaihmuanna hong ngah thei hi. Tua laitak mah in pastor khat in radio sung pan mah in, Adventist Pawlpi phut te lakah a kihel Ellen G White pen gensiat cihtak-in agensiatna ngai kha leuleu hi. Nak hehgen lua mahmah ahih manin Graciela lungsim sukha mahmah a, Ellen G White lai-at te sim dingin hong khentat hi. Koi pan ngah ding?

Graciela in laibu saal te leh saite ah dawp kawikawi-a, kua man na nei lo hi. Ni khat, a tapa khedap sai khat ah a vak leh tutphah tungah laibu khat a ki nusia velval mu hi. Tawm cik lem-in a sim khit ciangin inn ah a nu puak hi. “En ve nu, hih laibu deih thei kha ni teh” ci hi. 

Pasian Kiangpan Laibu
Graciela in a thulu a simleh “Lametna Lianpi” na kici-a, a gelh te min a-et suk leuleu leh Ellen G White na kici hi. Akhut bang liing pappap phial hi. “Pasian in ka nuntakna sungah na hong sem in, Hih laibu hong puak hi” ci hi. Tua hun a kipan in Graciela in Ellen G White um khial nawn lo hi. “A Lampi ka zuih theihna dingin Pasian in hih laibu tawh hongsam hi” ci hi. Nuevo Tiempo ah phone set in kanbeh lai hi. Tua Radio zumpi ah makaite-in zong pawlpi mi khat ahi, Miguel Amaro Aperanza pen, laisiangtho sinpih ding in paisak pah uh hi. 

A sawt lo-in Graciela zong La Teja Seventh-day Adventist pawlpi ah hong ki tuiphum pah hi. 2016 kum, Sabbath 13 na mission sumpi tawh a kilam pawlpi biakinn ahi hi. Tu in, amah pen pawlpi mi thalawp mahmah khat ahi hi. A veng sungah laisiangtho sinpih in, mite ahuh zawh zah in a panpih hi. Ama’ huzaapna mah tawh mi li bang ki tuiphum khin hi. ‘Bang hang a piang sese ka hiam,’ ci-in Graciela in ngaihsun ngeungau thei zel hi. Tu-in tua dotna aphi ngah ta hi. 

Kum 52 apha ta Graciela in, “Ka nu’ gilsung ah ka om cil pan in Pasian in keitawh na semkhawm khin hi” ci hi. “A zenzen in ka nu in, nauphiatna na zangh kha zenzen leh amah kua’n kem ding hiam? Kum 94 a pha ta, lupmun ngak ka pa kuan kem ding hiam? Pasian in na khempeuh lenkip ahihna ka thei hi. Pasian in ka sungah bang mu hiam cih ka theih loh hangin Ama’n kei hong hon hi. Ama’ nungzui ding mi ngah lai dingin ka ki lamen hi” ci hi.

La Teja Seventh-day Adventist biakinn leh Community Center lam nadingin 2016 kum a abbath 13na mission sumpi nongpiak man un lungdam hong ko kikkik ungh. Graciela bang mi tampi te Khazih kiang a tun zo, mission sumpi nong piak ciat manun lungdam mahmah hi.
By Andrew McChesney