PP 1: Banghangin Mawhna Om Kiphal Hiam?

BANGHANGIN MAWHNA OM KIPHAL HIAM?29

Pasian in ki-itna hi. John 4:16. A pianzia, a thukhamte in a beisa hunah ki-itna vive ahih bangin hong pai lai ding hunte ah zongh hi den ding hi. “Sangpenpa omna in a tawntungin kipa, kikheel ngeilo hi.” Ama sungah kilamdanna om lo-in, kikhelna meel zongh om ngiat lo hi.” Isai 57:15; Hab. 3:6; James 1:17.

             Pasian’ bawlsa na khempeuhte in a bawlpa itna lak hi. Mihing khempeuhte tungah Pasian’ vangliatna leh ukzawhna omin, tua in mihingte adingin thupha ahi hi. Laphuakpa in hih bangin na phuak hi.

            “Na khut in thahata, Na taklam khut in sang hi.

             Thumaanna leh thukhenna in Na Tokhom kiphuhna hi a,

             Na mai ah hehpihna leh Thutak pai hi.

             Nopsakna awging a neite mi nuamsa a hi uh hi.

             Amaute in, Topa aw, Na mai ah pai uh hi,

             Na min hangin nisimin lungnuam uh a;

             Na thumaanna sungah pahtawi-in a om uh hi.

             Nangmah in amaute thahatna bulpi na hi a,

             Siangpen Pa in eite kumpipa ahi hi.”  (Ps. 89: 13-18)

            Sia leh pha kikala buaina pen vantung pan a kipan mawhnateng kihaaltum dong, a kikheel ngeilo Pasian’ itna tellah-khiatna ahi hi.

             34Ukpipa in vanpi leipi a bawl laitakin Amah bek hi lo hi. A bawlsa mihingte tawh a lungnopna, a ngimnate a genpih dingin naseppih, kikholhpih khat nei hi. “A kipat cilin Thu a om hi. Thu in Pasian tawh a om khawm hi. Thu in Pasian ahi hi. Thu in a kipatcil a kipanin Pasian tawh a om khawm hi.” John 1:1,2. Khrist, Thu in, Pasian Tapa neihsun hi a, Pa tawh pumkhat ahih banah, pianzia, gamtatna leh ngimna te ah pumkhat ahi a, Amah bek mah Pasian tawh thu kikumthei leh ngimnate genkhia thei dingin a om hi. “A min in, Lamdang, Thupiapa, A hat Pasian, Tawntung Pa, Kilemna Kumpi,” ahi hi. Isai 9:6. “Ama’ paina in taanglai a kipan  hi a, bei ngei lo hi.” Micah 5:2. Pasian’ Tapa in amah leh amah a kigenna ah: “A kipatcil a kipanin Topa in kei hong nei a, A nasepte a kipat ma pekin: A tawntungin ka om hi…..Hih sim leitung a phuh ding lai-in, Amah tawh khangkhia khawm bangin, a geiah ka om a, Amah in keimah hong paakta in, Keimah in Ama’ mai ah a tawntungin ka nuamsa hi.” Prov. 8:22-30.

Pa in Tapa tungtawnin van a om nuntakna nei khempeuh a piang sak hi. “Amah tawh na khempeuh kibawla,… kumpi tokhomte, ukzawhnate, dawite, hatnate hi taleh, na khempeuh Amah tungtawnin kibawla, Ama ading ahi hi.” Col. 1:16. Vantungmite in Pasian’ nasem sawltakte a hi uh a, Pasian’ deihna bang semkhia dingin Pa’ khuavak tawh kiktuam  uh a, amanlang mahmah khate a nei uh hi. Ahih hangin Pasian Tapa, Pasian sathau-nilh, “Pasian meel kilangsakpa,” in “A vanglianpi tawh,” “Hih na khempeuhte uk a,” ukzawhna vangliatna a nei hi. Heb. 1:3. A vanglian kumpi tokhom in a kipatcil a kipanin Amah biakinn mun hi a, (Jer. 17:12) thumaan ciangkhutin Ama’ gam ukna kumpi ciangkhut ahi hi. Heb. 1:8. Minthanna leh Thupinate Ama aa hi a, A biakinn sungah hoihna leh hatnate a om hi.” Ps. 96:6. Hehpihna leh Thumaanna in Amai ah pai hi.  Ps. 89:14.

            Ki-itna thukham in Pasian kumpigam, kiphuhna bulpi hi a, A kumpigam sunga mite nopsakna in tua ki-itna thukham tawh kituak siangtho nuntakna a neihna ahi hi. Pasian in a bawlsa nuntakna nei peuhmah in Amah pen itna tawh a biak ding uh deih hi. Aana tawh thumanna cih bang, kisawl tentan ahih mana thumanna cih bang deih lo hi. Mi khempeuh tungah deih bang teel theihna hun pha pia hi. Tua hi leh mite’n amau deih thu tawh Pasian’ min phat thei zaw ding uh hi.

            35Ki-itna sungah a om laisiah kilemna leh kithuhualna om hi. Vantungmite nopsak pen in Piangsakpa ngimna bang tangtun nadinga sepna ahi hi. Pasian’ vaang kilat sak leh Amah phatna lasakte nuam sa uh hi. Pasian’ itna a thupi pen a neih manun kisaktheihna leh angsung-khualna om lo hi. Vantung mun khempeuhah kilem lo hi cih lahkhiat theih nading om peuhmah lo hi. Ahih hangin, hih nopsakna dinmun pen hong kilamdang hi. Pasian’ bawlsate lakpana khat hong thutangpeek se hi. Tua pa in Khrist khita lian penpa hi a, amah tung panin mawhna hong kipan khia hi. Amah pen bawlsa nuntakna nei khempeuhte lak panin siamna a sang pen leh vangliatna thupi pen tawh a kituam ahi hi. Amah in Lucifer, “Zingsang tapa,” a siangtho a niin baanglo, Cherub masa pen ahi hi. Pasian’ maiah dingin, a bei ngeilo Pasian vaangtaang in ama’ tungah om ngei hi. Tua ahih manin Topa in: “Nang in na khempeuh kicinna na hi a, pilna tawh kidimin, melhoihna tawh na kidim hi. Pasian’ huan ahi Eden huan sungah na om ngei a, suangmanpha namkimte na kizepna ahi hi…. Sathau kinilh cherub na hi a, Pasian’ mual siangtho tungah kong koih hi. Meikaang tawh kibang suangte lakah na vak kawikawi hi. Hong kipiansak ni a kipan na sungah mawhna a kimuh dong gen bang lo-in na om hi.” Eze. 28:12-15.

            Damdamin Lucifer in amah leh amah a kisangkhai nopna hong kilangh sak ta hi. Lai Siangtho in “Na meel hoih manin na kiphasaka, navaak na kisak manin na pilnate na susia zo hi… Isa. 14:13,14. A vangliatnate Pasian kiang pana a ngah hi napi Lucifer in amah leh amah neihtawm bangin ngaihsun hi. Vantungmite lak pan a sang pen hi napi, tua dinmun tawh lungkim lo in, Piangsakpa bek ii ngah dinga kilawm biak leh paai ding ut mawk hi.  Piangsakpa dinmun haza hi. Bawlsa nuntakna neite’n Piangsakpa tunga zahtakna leh itna apiak ding teng uh tawh amah a kibelh nadingin hanciam niloh mawk hi. Mongneilopa in A Tapa tunga a piak vangliatnate haza ahih manin, Lucifer in tua vangliatna a suh zawh theih nading bekbek hanciam hi.

            Tu-in vantunga kilemma, kithukhatna pen hong kitam kham ta hi. Piangsakpa kibiak ding sanga Lucifer a kibiak nadingin a hanciam tak ciangin 36vantungmite’n Pasian bek mah a lian pen hi na ci zaw uh hi. Tua hi a, vantungmite’n Lucifer nakpi- in kho uh hi. Pasian Tapa in zongh Lucifer maiah Piangsakpa liatna, hoihna leh thudiknate leh a siangtho, a kikhel ngeilo Pasian Thukhamte a phutpa hi a, tua a phuhsate panin pialkhia mawk leh Lucifer in amah a Bawlpa zahtak lo in, amah leh amah tungah siatna kitun suak ding hi ci-in a hilh hi. Tawpna neilo itna leh hehpihna tawh a kikhoh hangin Lucifer in nial teeiteei hi. Lucifer in Khrist a hazaatna picing sak nuam ahih manin hong ngawngkhauh semsem mawk hi.

See also  Zo Phualva Thupuak: Vol 09, Issue 06

            Pasian Tapa pen amah sangin a liat zawk nading thu om lo hi cih thu tawh kinialna neih ding pen Lucifer ngimna ahi hi. Tua hi a, Lucifer in Piangsakpa pilna leh itna pen mawhsakin kosia hi. Hih a ngimna a tangtun theih nadingin a khuak pilna a zangh ding hong hita hi. Ahih hangin Piangsakpa in A piansakte keem loin koih khong lo hi. Kiseelna lianpi a om ma-in, vantungmi khempeuh in Pasian deihna in bang hiam cih a theih uh kisam masa hi. Pasian pilna leh hoihna in amaute nopsakna naak ahih lam a theih uh kuul hi.

            Vantung Kumpipa in vantunga teeng khempeuhte a maiah kikhawm sak hi. Amaute maiah A Tapa dinmun omzia maan pen lak hi. Pasian Tapa in a Pa tawh kumpi Tokhom luah khawma, a tawntung vangliatna amau geel aituam hi. Tapa leh Pa in amau leh amau thu a “om” ahi uh a, kuama piansak ahi kei uh hi. Pasian tokhom kiimkotah a kisim zolo vantungmi “tul sawm a sim tulsawm, tul tampi” te om uh hi. Vantungmiliante in, Sawltakte bang leh gammite bangin om uh a, tung Sianmang kiang pana hong luangkhia khuavakte tawh nuam takin a om uh hi. Tua a kikhawm ziahzuah vantungmihonpite kiangah Kumpipa in, Pasian Tapa neihsun, Khrist bekbek in Amah tawh thu kikum thei in, A ngimnate taangcing sak dingin sem thei hi ci hi. Pasian Tapa in a Pa’ deihna bangin vantungmihonpite a bawl hi. Tua hi a, Amah leh Pasian tungah biakna leh paaina piak ding ahi hi. Vantungmite a bawl lai mah bangin, hih leitung leh a sunga teengte a bawlna ah zong Khrist in Pasian vangneihna mah zangh lai hi. Ahih hangin, hih munte ah Tapa in Pasian vaihawmna tawh kilehbulhin Amah leh Amah kiliatsak ding zong ngei lo in, A Pa minthan nading leh migitna leh itna tawh a kidim A pa ngimnate a semkhia hibek hi.

Tua ciangin, vantungmite’n kipaak takin Khrist pen a lian mah hi ci uh a, 37A maiah kuunin bia uh hi. Lucifer zongh a kuun hi. Ahih hangin, a lungsim sungah a lamdang, a lauhuai kitukalhna khat om hi. Tua pen in Pasian deih bang zui zaw ding maw cih leh hazatna leh deihgawhna tawh langdo ding maw cih thu ahi hi. Tawlpi khat sung pen vantungmi honpite huzap in zo gawp bangin kilangh hi. Phatna late kisa a, aw tul tampi a gin khiat ciangin, a lungsim sunga ngaihsutna hoihlo pen a tuimang bangin, a mahmah in zongh Pa leh Tapa phatna la sakpih saam hi. Ahih hangin, a vangliatna pen hong kiphatsakpih kik pah hi. A lian pen ahih nopna hong om kik hanhana, Khrist dinmun a hazaatna hong pokhia leuleu hi. Ama tunga kipia minthanna leh vangliatna pen Pasian piakkhong hehpihna hi ci lo in, Piangsakpa tungah lungdamna ko het lo hi. Vanglian leh pil kisa mahmah ahih manin Pasian tawh kizakim ding bek ut hi. Banghang hiam cih leh vantungmite’n amah pen it uh a, zahtakin a thupiakte bangin gamta uh hi. Vantungmi khempeuh tungah vangliatna leh pilna tawh kituam ahih man hi. Ahih tei hangin, ama tungah Pa tawh kizakimin Pasian Tapa a kipahtawi hi. Tapa in Pa tawh thu kikum thei hi. Lucifer in Pasian tawh thu kikum thei lo hi. Tua ahih manin, “Banghangin Khrist in zaliatna nei tuan se hiam? Banghangin Lucifer sangin kipahtawi zaw se hiam? cih dotna lungsim hong nei hi.

            A manlang thei penin Pa kiang pan hong pai khia a, vantungmite zongh amah banga a lungkim loh theih nadingun na hong sem hi. Pasian a zahtak mahmah bangin a ngimna thukpi selsimin hong vak kawikawi hi. A masa-in Pasian kumpigam ki-ukna ahi Pasian thukham pen a kimuanmawh nadingin hong gen hi. Leitungmite’n bel thukham kisam kha mah ding uh hi. Ahih hangin a pil, amau pilna tawh a gamtang thei vantungmite’n Pasian deihloh sem het lo ding uh hi. Amau ngaihsutnate uh siangtho ahih manin Pasian mah bangin khial thei het lo ding uh hi ci hi. Pasian Tapa in Pa tawh kizakima a om vial pen Lucifer kihuatna leh kigawtna hi a, thumaan het lo hi ci hi. Lucifer zongh a kizahtakhuai leh a kipahtawi huai khat mah hi ci hi. Tua hi a, Lucifer pen a sangpen munah om thei leh vantungmi khempeuhin suahtakna ngah ding uh hi. Tu mahmah in zongh amaute suakta lo uh hi: banghang hiam cih leh amaute UKPA deihna bangin a om uh kuula, a biak a paai uh kul hi ci hi. Hih bang khemna teng tawh a khem takciangin vantungmi tampitak in na sang pah uh hi.

            38Khrist dinmun bel kibang gige lai hi. Lucifer in Khrist a hazaat mana a hilo lamah gena, Khrist tawh kizakima a kigenna in Khrist dinmun pen a maan mah ahih lam tellah zaw hi. Vantungmite tampitak in Lucifer khemna ah mittaw in om uh hi.

            Vantungmite’ ukpipa a hihna zanghin siamna thuuk mahmah tawh vantungmite’n zongh Pasian a muanlah nadingun guuk sep sim hi. Pasian’ ngimnate leh vaihawmnate ahi lo lamin hei khia a, vantungmite uploh ding leh lungkimloh nadingin bawl hi. Kam khum nono leh aw zol nono tawh vantungmite kiangah thu muam niloh hi. Amah pen Pasian tungah a thumaan den mah bangin kigena, tua laitak mahin Pasian kumpigam kip nadingin ki-uknate leh thukhamte khek kuul hi ci hi. Pasian thukham langpang sa-in nasema, ama lungkimlohna pen vantungmite leh vantung ki-ukna a lemtuah bang danin kilangh sak hi. A simtham takin kikhenna leh kilangpanna khaici a tuhtuh hi napi, a siamna thuuk mahmah tawh amah pen vantungah kilemna leh lungnopna, muanna a om den nadinga hanciam mahmah bangin kidawk sak hi.

See also  Pasian' Thukhennate

Lungkimlohna pen hong kipan khia ta hi. A kilangtangin kikhenna a om loh hangin, vantungmite lakah pawl kikhen nading lungsim hong om ta hi. Pawlkhatte in Lucifer lamah pangin Pasian Kumpigam ki-ukna manlo hi ci uh hi. A tuungin vantung ii ki-uknate hoihsa in lungkim mahmah uh hinapi, Pasian ngimna leh vaihawmnate a theihpih loh manun, tu-in Lucifer zuau-khemna um in, hong lungkim nawn lo mawk uh hi. Khrist a liatsakna thu thei loin lungkim nawn lo uh hi. Hih a lungkim lo vantungmite in Lucifer panpih uh a, Lucifer pen Khrist tawh a kizakim mah ding hi cih pih uh hi. Ahih hangin, Pasian lama kip vantungmite’n Lucifer pen a kikhel kik nadingin genpih uh hi. Pasian deihna ah ki-ap zaw in ci uh hi. Khrist ahih leh Pasian Tapa hi a, vantungmite kibawl ma pek a kipan Pa tawh pumkhat ahi sa hi. Pa taklamah ding dena, a zaliatna pen Ama nuaia om khempeuhte adingin thupha hi. Tuni ciang dong kuamah in Amah nial ngei nai lo hi. Vantung ii 39kilemna pen khatvei zongh nawngkai ngei nai lo ahih manin, tu-in nawngkaina, kikhenna om sak kul se ding hiam ci uh hi. A dik vantungmite’n a lungkimlo a vantungmi pihte kianguah, Pasian langpang se dah un, Na langpan uh leh kisiacip lel ding hi uh teh. Hong kihei kik unla, Pasian kiangah thumaanna tawh hong ki-ap kik zaw un ci-in thuum uh hi.

            Pasian in angeina mah bangin, migitna lianpi tawh Lucifer pen thuak tentan lai hi. Vantungah lungkimlohna leh muhdahna cih bang peuhmah kithei kha ngei nai lo hi. Hih thu in thu thak, a lamdang, a kithei zo lo, a kituat thei lo thu ahi hi. Lucifer nangawn in ama ngaihsutna bang a sepkhiat ding hong lau giauguau hi. Ahih hangin khawl tuan lo mawk hi. Pasian itna leh hehpihna bek tawh amah khial zaw ahih lam kihilh thei bek hi. Lucifer in zongh amah khial zaw ahihlam kithei hi. Amah in “Topa in a lampi khempeuhah thumanin, a nasepna khempeuh ah siangtho hi,” cih a thei hi. Ps. 145:17.  Pasian thukhunte in dikin, vantungmite maiah a hi banga a gen ding hi cih mu hi. Hih a muh leh a theih thu bangin om hileh amah leh vantungmi tampi gumkhia zo mah ding hi ven. Ahih hangin Pasian tunga a kipiak ding pen ut lo hi. Vantungmite laka lian pen ahihna dinmun a nusiat khit hangin, Pasian lamah kihei kik henla, Piangsakpa pilna thei in, ama dinmun tawh lungkim lel hi leh, a dinmun ngei mah ah kikoih kik ding ahi hi. Tu-in, thu khensat hun hong tung ta hi. Pasian kiangah ki-ap ding maw? Ahih kei leh, a kilang tangin langpanna kipan khia ding maw cih thu ahi hi. Pasian kiangah ki-ap kik dektak hi. Ahih hangin a kiphatsakna in aki-apkik loh nadingin dal hi. Lucifer in khial ingh ci a kipulaaka, ama ngaihsutnate khial hi ci-a, a kosiat kumpigam kiangah a ki-ap kik ding pen haksa sa mahmah hi.

            Itna tawh a dim Piangsakpa in, Lucifer leh anungzuite kisiatna sunga tuak dektak uh hi cih amuh ciangin hehpih-in a kihei kik nadingun lampi zonsak hi. Ahih hangin, Ama hehpihna na nial uh hi. Lucifer in Pasian’ thuakzawhna pen Pasian’ kiliatsaknopna in gen zawsop a, a sawtloin Pasian mahmah ama ukna sungah hong ki-ap dingin gen hi. Vantungmite’n kiptakin amah a panpih naak uh leh a 40deih khempeuh ngah ding uh hi ci hi. Ama thu bek tawh om tentana, Amah a Bawlpa tawh kigaaldo ding phamawh sa lo hi. Tua hi a, Lucifer, “khawvaak puapa” Pasian vangliatna neihpihpa’ pen thukham palsatna tawh, Pasian leh a vantungmite galpa, a hong suak hi. Lucifer pen vantungmite cing ding kimlai vantungmite susiapa a lehsuah ta hi.

            A thumaan vantungmite thuumpihnate neu-etna tawh nialin, amaute pen a kibum silate cihsan hi. Khrist kisangkhanna pen dik hetlo ahih manin Pasian kumpigam sungah ki-ap lo ding hing ci hi. Khrist ii zaliatna zongh cikmah hunin lungkimpih ngei kei ning ci hi. A nungzuite kiangah kumpigam thak leh a nuamzaw ngah ding uh a, suahtakna tawh nuamsa mahmah ding uh hi ci-in kamciam pia hi. Vantungmite tampitakin a makai dingun sang dingin limlahna pia uh hi. Vantungmi khempeuh a ngah thei dingin ki-ummawha, Pasian tawh kizakimin, vantunga om khempeuhte in ama thu mang ta ding uh hi ci-in kilamen hi.

            A thumaan vantungmitten Lucifer leh a lawmte kiangah Pasian tungah ki-ap dingin thuum uh hi. A ut kei teeiteei uh leh a kipelh thei lo a thuak ding uh nate zongh hilh uh hi. Amaute a Piangsakpa in amaute pen zo peuhmah dinga a langpan manun daan thuak sak hamtang ding hi ci uh hi. Vantungmi kuamah in Pasian thukham langpan in zawhna ngah ngei lo ding hi, banghang hiam cih leh Pasian thukham in Pasian mah tawh kibangin siangtho hi. Lucifer khemna ngai kei un ci-in hilh uh a, Lucifer leh a nungzuite’n a manlang thei pen in a khialhnate uh pulaaka Pasian a zuat kik nadingun ngen uh hi.

            Tampi mah in hih khohna ngai-in kisik kik nuam uh a, Pa leh a Tapa hong zuan kik nuam uh hi. Ahih hangin, Lucifer in khem nading khat na nei khol gige hi. Amah in, Amah tawh kipawl vantungmite gamla paikhia khin lua uh ahih manun a kilehkik hangun Pasianin mawhmaina pia zo nawn lo ding hi ci hi. Pasian kianga ki-aap kik nuam peuhmah kikosia in a dinmun panun kiniam sak ding hi ci hi. Amah in bel Khrist pen tungnungpen hi ci ngei lo ding hi. 41Tua ahih manin amah leh a nungzuite adingin sep ding khat bek om lai a, tua in a suahtak theih nadingun gaal ado uh kuul hi ci hi.

            Satan ahih leh bel gamla paikhia khin lua mah hi. Ahih hangin a khemna tawh a mittawtsak a nungzuite a dingin gamla lua nai lo hi. A thumaan vantungmite ngetna bangin ki-ap kik uh hileh lametna nei thei ding uh a, Satan ii thangsiahna pan suakta mah ding uh hi ven! Ahih hangin, kiphatsakna, Satan a itna leh a suahtak nopna un ki-ap sak lo a, itna leh hehpihna tawh thuumna nunung pen nial uh hi.

See also  Khangnote Hanthotna 1

            Satan in a lungkimlohna min saka, langdona a tut dong a deih bang sem dingin Pasian in phal hi. Satan ngimna leh ngaihsutna khempeuh a picin kuul hi, tua hi leh a omzia diktak mi khempeuh in mu thei pan ding uh hi. Lucifer, sathau kinilh Cherub, pen sang takin kipahtawi ngei hi. Vantungmiten nakpi’n it ngei uh a, a huzap zongh khauh mahmah hi. Pasian kumpigam ih cih in vantungmite bek hi lo-in, a bawlsa leitung khempeuh zongh ahi hi. Tua hi a, Lucifer in vantungmi khempeuh zo thei leh leitung khempeuh zongh zo thei ding kisa hi. Tua ahih manin, a ngimna a tangtun theih nadingin a khelpilnate zangh hi. A khem theihna vaang pen nasia mahmah hi. A nasep peuhmah a kithei thei lo nate tawh tuam ahih manin, a ngimna taktak pen vantungmiten tel hak sa mahmah uh hi. A hong picin mateng, a nasep in thusia ahih lam kithei lo hi. A lungkimlohna zongh langpanna a suah ding kimu thei lo hi. A thumaan vantungmite nangawn in zongh a nasep leh a ngimna taktak tel theih zo lo uh hi.

            Lucifer in ama lama a kaih zawhloh vantungmite pen vantung a teengte hoih nading deihsak lote, bangmah kilamdanna neilote ci-in mawhsiat hi. Pasian lama om vantungmite pen langdona a sem bangin ngawh pongmawk hi. Thu seelna tawh Pasian ngimnate a kitel zawhloh nading pen ama ngimna ahi hi. A telnop mahmah nate a kitel theilo bangin kilangsaka, Jehova thu telnop mahmahte muanlahna tawh telzawhloh suak sak hi. Vantungmite laka a lianpen ahihna in tu-a a langdona nasep pen mavang sak tuam mahmah hi.

            42Pasian in thumaanna leh diktatna bek zangh thei hi. Satan in Pasian zat theihloh ahi zuauphuahna leh mi bumna,khemnate zangh hi. Pasian kammal a khial bangin kilangh saka, a bawlsate zuih dinga thukham akoih zongh maan lo bek tham lo in, Pasian biak leh paai ding cih sawnsawn pen tawh Pasian in amah leh amah kilian sak hi ci hi. Hih bangin Satan in Pasian leh Agam ki-ukna naak mawhsiat lua mawk ahih manin, vantungmi khempeuh leh leitung khempeuhte mit muhin Pasian kumpigam in dika, A thukhamte zongh siangtho hi cih lah kuul hi. Satan inlah amah pen vanpi leipi hoih nading bek zonga gamtang bangin kigen lai deep hi. Tua ahih manin a ngimna taktak leh a nasep zia pen mi khempeuh theih dingin a picin kuul hi. Tua hi a, a nasepna a tangcin  theih nadingin hun tawlpi khat a neih kuul hi.

Ama hanga om kikhenna pen Satan in Pasian kumpigam ki-ukna hoihloh man hi ci-in pum ngawh hi. Thusia khempeuh Pasian kumpigam ki-ukna hang hi ci hi. Amah pen Pasian Thukhamte puahpha leh akicing sak zaw dinga sem bangin kigen hi. Tua ahih manin, a ngimna leh akigenna banga a sep theih nadingin Pasian in hunpha pia hi. A nasep in amah mawhsak ding hi. Satan in a tuungin a langpangin kigen lo hi. Ahih hangin, vanpi leipi in ama omzia, pianzia, zuauphuakpa ahih lam a daal omlo in a theih uh kuul hi.

            Vantung pan a kinawhkhiat ciangin zongh mongnei lo itna nei Pasian in Satan pen susia pah lo hi. Pasian in itna bek tawh Ama na a kisep ding leh Amah a kibiak ding deih ahih manin, a bawlsate’n a thudikna leh a migitna a theihcian uh kuul hi. Vantung leh leitung danga teeng khempeuhte in mawhna omzia leh mawhna thaman om zia thei zo lo ahih manun, Pasian in Satan susia pah mawk leh Pasian thudikna koi hiam cih thei lo ding uh hi.  Tua ahih manin Satan kihingkhawi lai tadih suak hi. Thakhat thu in kimeeklum pak hi leh bawlsa pawlkhatte’n itna tawh hi lo in launa, kihtakna tawh Pathian bia ding uh hi. Tua hi leh mikhempa huzap pen kibeimang sak zo lo ding a, langpan nopna lungsim zongh maimang zo lo ding hi. Hong pailai ding a kisim zolo khang tampi sunga vanpi leh leipi hoih zawk nadingin Satan in a deihnate a picin sak kuul hi. Pasian kumpigam ki-ukna a langpannate leh a mawhsaknate, bawlsa nate khempeuh in kitel taka amuh uh kuul hi. Tua hi leh Pasian migitna, a thudikna leh A thukham kikheeltheihlouhna pen cikmah hunin kuamah in mawhsak ngei nawn lo pan ding hi.

            Satan langpanna pen vantung leh leitung adingin hong pai ding khang tawntung hun sungah theih den ding kihilhna thu khat ahi hi. Mawhna leh mawhna thaman omzia theih nadinga teci ahi hi. Satan deih thu in mite leh vantungmite 43suplawh sak mahmah ahih manin, Pasian thukham kipaampaih mawk leh bangci bang hi ding hiam cih kimu thei hi. Pasian kumpigam a om lai siah a sunga teengte’n lungmuangtakin om thei uh hi cih kilangh hi. Hih langpanna a kipicin sak manin, hong pai lai ding hunte ah misiangthote’n mawhna bawl nuam nawnlo, langpang nuam nawn lo-in, mawhna thaman thuak nuam nawn lo ding uh hi.

            Vantung a ukpa in na khempeuh a kipatna pan a tawpna dong, a beisa leh hong pai lai ding nate, a theipa hi-a, kuama nawngkai sak zawhlohin a ngimna leh a vaihawmna bangin tangtung sak hi. “A kiimkotah khuamialna leh meiipi a kaai hangin, a tokhom in thumaanna leh thukhenna tungah kiphut hi”. Ps. 97:2, R.V. Hih thu pen, a khial hi taleh, a thumaante hi taleh bawlsa khempeuh in  ni khat ni teh thei ding uh hi. “A nasep in siangtho hi: banghang hiam cih leh a lampite in thukhenna hi a: amah in a thumaan Pasian, mawhna tawh kihello, a thu dik leh a thutang Pasian ahi hi” Deut. 32:4.

&

 

Tags: ,

Admin

Admin

Top