GC 20: Biakna Khanlawhna
KHRIST hong pai kik nading tangkona in biakna khanlawhna lianpi khat piang sak ding ahihna Mangmuhna 14 a vantung mi khatna tangkona ah na ki gen hi. Vankimlai ah vantung mi khat leeng a, “leitungah ateeng mi aki pan gam khempeuh, nam khempeuh, pau khempeuh pawl khempeuhte kiangah,” ”Pasian kihta unla, avangliatna phat un. Bang hang hiam na cih uh leh, a thukhen ding hun a tung zo hi” ci hi. Mang. 14:6,7.Vantung mi in hih thugen hi cih thu a thupi hi. Vantung kamtaipa sianthona, vangliatna leh minthanna in tua thupuak nasep thupi sak in, vaang leh thupina in zong zui dinga gualzawhna ngah ding hi ci in Pasian in a sehsa ahi hi. Vantung mi khat van kimlai ah leeng in, “leitunga teng mi khempeuh akipan mi namkhempeuh leh mipawl khempeuh” tungah pataukona thu “aw ngaihpi tawh” atangko hi cih ciangin hih tangkona nase in nawh sa takin leitung zelin ki zo ding hi cih lahna ahi hi.
Hih thupuak pen mahin bang hun-in hih nasep ki pan ding cih hong lak hi. “A tawntung lungdamna thu” tawh kizom hi a, thukhenna thu a pulak hi. Hotkhiatna thu pen khang tawntungin a kihilh den den a hi hi. Ahih hangin hih thukhen hun tangkona pen Lungdamna Thu mah hi napi a a hun hong tun’ ciang, ni nu nung hun cianga tangko theih (356) bek thu ahi hi. Gupkhiatna Lungdamna Thu a khang khangin ki hilh hi. Hih hilhkholnain a hun atun cianga kihilh ding Lungdamna thu-ii khen khat ah ki hel ahi hi.Hilhkholhna in thukhenna hun atun dong aban ban in thupiangte a lak suk suk hi. Hih thu Daniel bu-a kigen thumaan ahi hi. Daniel tunga a gen lai-in thukhenna tawh kisai khawk teng pen ni nunungni hong tun’ cianga genkhiat bek dingin khup cip sak phot hi. “Beina hun atun mateng” khakcip in koih phot hi.
Thukhenna tawh kisai tangkona zong a hilhkholh thu atun’ mateng ki tangko thei nai lo ahi hi. Hun bei ding ciangin “mi tampite’ pilna khngin, hong peek leen ding hi” zong ci lai hi. Dan. 12:4.
Sawltak Paul in Khrist hong pai ding pen amau khang huam-a tung dingin a lametloh nading un a hilh hi. “Tua Ni hong tun’ ma-in Langpan’na lian a piang masa ding” mah na ci khol zo hi. 2 Thess. 2:3. Puukna lian hong tung phot dinga, “aki seel Gilo mipa ”-ii ukna hun saupi a om ma teng ih Topa pen lam et theih hi lo hi. “Gilo mipa” cih pen in “Mawhna thu thuuk” cih peuh, “Kisiatna tapa” cih peuh, “migilopa” cih peuh-in gen khia a, tua pen Papacy a genna a hi hi. Kum1260 sung avangliatna zomto ding a hi hi. Tua a vangliatna kum 1260 pen 1798 kum-in bei hi. Tua ma tengin Khist hong pai kik nading a piang thei nailo ding ahi hi. Paul genna in Khristian khang buppi 1798 kum dong huam suk hi. Tua kum khit lam ciang bek in hih Khrist hong pai kik nading thu ki tangko thei bek ding zong ahi hi.
Hun beisate ah tua bang tangkona om ngei nailo hi. Paul in zong tua bang thu gen theiloa, ute naute tungah Topa hong pai ding pen sauveipi khit ciang hi ding hi, mah ci zaw hi. Puahphate in zong tua thu tangkolo uh hi. Martin Lutherin tua thukhen hun ding kum 300 val sawt nawnlo ding hi, ci ngei tei bek hi. Ahih hangin 1798 khit ciangin a ki khup cip Daniel laibu pen ki leem khia ta a, hilhkholhna thutheih telna khang ta hi. Mi tampi in tua thukhenna hun hong nai ta hi cih thu tangko uh hi.
Kum zalom 16 lai a Puahphatna mah bangin Jesu alam en pawlte nasepna zong Khristian gam khempeuh ah a hun kibangin hong dawk khia hi. Europe leh America (357) ah thu um mi ginate in hilhkholhna na suut ciat uh hi. Kha Siangtho hilh kholhnate panin na khempeuh a mong tung ta hi cih hong mu khia ciat uh hi. Gam tuam ciat hi napi in Khristiante in amau om mun tek panin Laisiangtho simna tawh Honpa hong pai ding hun nai ta hi ci in na um ciat uh hi.
Miller in hilhkholhnate suut a, thukhenna hun hong tung ta hi cih a muh khiat zawh kum 3na 1821 kum ciangin “leitung bup thu puak siapi” Dr. Joseph Wolff in zong Topa hong pai ding nai ta hi, cih tangko a na ki pan hi. Wolff pen Germany gam-a piang hi a, a pa Jew Rabbi khat hi in Hebrew mi ahi hi. A neu lai lim phet-in Khristian biakna maan a sa hi. A lungsim in thu thei nuam, thu kan, thu ciamteh lua hi a, a pa’ inn sung ah Hebrew mi thu um te hong ki khawm-in thu ki kum zel uh hi. A minam un a lam et uh Messiah hong pai-in Isreal minam a puahphat kik hun ding lametna khawng ki gente na ngai gi ge-in na man khia khia hi. Ni khat ni ciangin Nazareth mi Jesu cih hong ki kum kha zen zen uh hi. Tuapa kua ahi hiam ci-in a dong khia pah cinten hi. A dawn’ kikna uah, “Jew mi talen gol mah mah nei khat hi. Amah leh Amah Messiah-in ki gen se a, Jew thukhen mangte in that sak uh hi” ci in gen kik uh hi. “Bang hangin Jerusalem ki sia in eite gaalmat sal khawi-in om i hi hiam?” ci in dot to zel ciangin a pa in, “Ala, ala, Jew te in kamsangte na that that uh a tua hang a hi ve!” ci in hilh kik hi. Naupangpa lungsim ah thu khat hong suak khia vat a, “Jesu zong kamsang khat hi kha-a Amah mawhnei lopi Jew te in a thah hang uh hi ding a hi ve maw!” aci hi. – “ Travels and Adventures of the Rev. Josep Wolff,”Vol. 1, p. 6 (ed. 1860). Hih lungsim pen khauh takin vom den pah ahih manin Khristian pawl sung a lut loh nadingin ki khaam napi, thuhilhnate va ngai ding hanciam pah viu veu hi. Kum 7 bek a phak laitakin Khristian puteek khat kiang ah Mes-siah hong pai cianga Israelte gual zawh nading thu gen pih-in va ki sial hi. Puteekpa in thu dam tawh, “Bawi aw, Messiah tak tak hong hilh ning; tua pa Nazareth mi Jesu hi,…na pu na pa te in tanglai kamsangte a bawl bang mah un bawl in Amah singlamteh ah khai lum uh hi. (358) Ciah in la Isaiah a lian 53 sung sim le cin Jesu Khrist pen Pasian Tapa ahih lam na mu ding hi” ci hi. – Ibid. Vol. 1, p. 7. A lungsimah tua thu kip pah hi. Inn ah ciah in tua Laisiangtho a sim ciangin Nazareth mi Jesu in tua a ki hilh kholpa hi takpi cih a mu hi. Khristiante thumaan mawk hilo uh hiam? Naupangpain tua hilhkholhna khiatna gen dingin a pa a sawl leh dawng hetlo mawh ahih manin tua thu peuh mah gen pih ngam nawnlo hi. Tua ciangin Khristian biakna a tel theih nopna a hong khang semsem hi.
Jew inn sung panin tua theihnopna lungsim tawh hong om gigea, kum 11 a phak ciangin leitung pilna leh a khan tawn nasep ding zong dingin a pa’ inn hong nusia ta hi. A behte inn khat ah om a, ahih hangin a sawt loin lampialpa cihna tawh ki nawh khia ahih manin, sum nei loin mi dangte lak ah hong pai khia hi. Mun khat khit mun khat ah pilna zong in pai khia a, Hebrew lai hilh in a ki vaak hi. Katolik sia khat thu zawhna tawh Rome upna hong saang hi. Tua ciangin, a minamte lakah thupuak hilh sia seem dingin ki sawl hi. Tua ngimna tawh a pai khiat khit kum tawmno sungin Rome-a Propaganda College ah lai sim zom kik hi. Hi lai panin amah pen thu ngaihsun thu gen siam ahih manin thu lampial hilh hi ci-a ngawhna hong thuak hi. A ki langtang mah-in pawlpi gamtat maanlote pulaak khia in, ki puahphat ding hong hansuah hi. Amasa in papal siapite in pahtaakna deihsakna tuam vilvel pia sam napi, a sawt loin Rome panin ki heem khia veve hi. Romete etcikna nuai ah mun khat pan mun khat a pai kawi kawi hi. Atawpna ah Rome sila hihna ah kipia zo lo ahih lam a ki tel dongin a thuak uh hi. Amah pen puahphat theih loh leh kep theih loh, ci in pulaak uh a, tua ciangin a utna peuh ah vak kawi kawi hi. England ah pai a Protestant upna zom in English pawlpi ah lut hi. Kum 2 sang akah kik khit 1821 kum in thupuak dingin pai khia leu leu hi.
Wolff in Khrist hong pai masak lai-in “dahna leh lungkham thuakpa hi: cih a saan’ phetin vangliatna leh minthana tawh a hong pai kik nading hilhkholhna zong tel (359) takin a mu khawm pah hi. Amah in a minamte Nazareth mi Jesu kianga kai khawm dingin na a sep laitakin tua mipa pen a hong ki khaam mipa hi, a hong pai masak lai in ki niamkhiat takin mite mawhna thoih dam nadingin kigo a, hong pai kik ciangin minthan’na leh gualzawhna tawh Kumpipa leh Honkhiapa-in hong pai ding hi” ci in a hilh hi.
Nazareth mi Jesu in Messiah hi a, a khut a khe te ki kheen let in thah dinga gangawhna lam zuan a kihawl tuuno bangin a ki paipih hi. Dahna thuak mipa hi a, lunggimna tawh ki dim hi. Judah tung pan-a kumpi ciangkhut a ki lakhiain, a khe kikal pan kumpi thuneihna a kilak khiat khit ciangin a khat veina a hong pai hi. Vantung meii lom leh vantung mi mangpa pengkul tum sakna tawh a nihveihna a hong pai kik ding hi ci in ahilh hi— Wolff, “ Researches and Missionary Labors,” p. 62 (ed. 1835). “Olive mual tung ah hong ding ding a, leitung pian cila Adam ngah dinga ki seh hi napi a ki taan kik gam ukna pen tua Jesu ki pia ding hi.( Piancil 1:26; 3:17). Amah in leitung bup ah Kumpi hi ding hi. Thuumna le tauna te bei sak dinga, lung dam kohna phatna la kisa te bek kiza ta ding hi….Jesu in A Pa minthanna tawh, a vantung mite tawh hong pai ciangin,…thu um misisa te hong tho khia masa ding hi. 1 Thess. 4:16; 1 Kor. 15:23. Tua pen ei Khristian te in Thawhkikna masa i cih pen a hi hi. Tua ciangin ganhing te in zong amau omzia kheelta ding uh hi. Isa. 11:6-9. Jesus kiang ah ki aap ciat ding uh hi. Late 8. Gal lem lung muanna in leitungbuppi uk ding hi. – Journal of the Rev. Joseph Wolff, pp 378, 379 (ed. 1939). “Topa in leitung en suk kik dinga, ‘hoih mah mah hi’ ci kik ta ding hi. Ibid. p. 294. Wolff in Topa hong pai ding nai mah mah ta ding hi ci in a um hi. Hilhkholhna hun a suutna ah Miller sehna hun mah bangin, suk mai mang hun ding pen kum tawmno bek in sam hi ci hi. Laisiangtho sik san a, “A ni leh a nai kua mah in thei lo hi,” hong pai kik ding a nai-na vai zong mite theih kul lo hi a ci suak pahte tung ah Wolff in” “Topa in a ni leh a nai ki thei ngei loding hi a ci hiam? Theikungte a teh hong no ciangin khuakhal ahong nai ta hi cih mi khat peuh in a theih bangin a hun hong nai ta ahih lam i theih theih nadingin kihilnate hong gen hilo hiam? Matt. 24:32. Eite in a hun huam beek thei thei het lo (360) ding I hi hiam? Topa mah in Daniel laibute sim unla thei un, hong ci hi lo a hiam? Daniel sungah tua thute a tawpna hun atun masung ki imcip phot dinga ‘mitampi taai kawi kawi phot dinga (Hebrewte hun tuatna genna hi), ‘theihna (hun theihna) khang ding hi’ Dan. 12:4. Hih thu genna ah Topa in ‘a ni leh a nai kua mahin theilo’ a cih hangin a hong naina hong thei sak nuam ahi hi. Noah Tembaw bawl lai mah bangin Ama hong pai ding ih ki gin kholh theih nadingin hun ciamtehnate a kicing in hong pia hi.”a ci hi. – Wolff, “ Research and Missionary La-bors,” pp. 404,405.
Laisiangtho khiatna, a hih kei leh a ki khiat khialhna vai Wolff in a genna ah, “Khristian pawlpi a tam zawin tel taka Laisiangtho in a gen thute panin pial khia-in Buddhist-te deih geelna lamah ki heii khinin uppih uh hi. Mai lam mihing nopsak nading pen huih lak khawngah om hi, Jewte thu a sim uh ciangin Gentiles (zentail) te thu zong a theih uh kul hi; Jerusalem thu a sim uh ciangin pawlpi thu a theih uh kul hi; leitung a cih leh vantung a cih nopna hi; Topa hong pai nading thuah thupuak siate kipawlna (missionary societies) a theih tel uh kul hi; Topa’ inn omna mualtung ah kahto cih zong Methodist kikhop khawmpi a genna hi ci in upmawh deih khiat uh hi.’ci hi. – “ Journal of the Rev. 
Joseph Wolff,” p. 96.
Joseph Wolff,” p. 96.1821-1845 kikaal kum 24 sung, Wolff khual zin kawi kawi a, Africa, Izipt, Abyssinia, Asia, Palestine, Syria, Persia, Bokhara, leh India khawng ah kileh kawi kawi hi. U.S.A. ah zong hawhin, St. Helena tuikulh ah ozng thu hilh hi. 1837 kum August in New York tunga, thu a hilh hi. Philadelphia, Baltimore, leh Washingtonte ah zong thu a hilh hi. A genna khat ah, “President lui John Quincy Adams hong vai hawm sakna (361)tawh Congress ulian ki khawm khempeuh thukim in Con-gress Hall khat thuhilh nadingin hong zang sak uh hi. Sani (Saturday) ni khat in thu genna ka nei hi. Congress member teng, Virginia-a Bishoppa leh Washington-a Pasian nasem teng in hong uap uh hi,” ci hi. Tua mah bangin kumpi uliante deih sakna tawh New Jersey leh Penn-sylvania ah zong ka thu muh khiatte ka gen a, Asia-a ka thu muh khiat te leh Jesu Khrist Kumpi-in amang ahihna thute ka gen hi,” ci hi. – “ Journal of the Rev. Joseph Wolff,” pp 398,399.
Europe gam thuneite’ kepna a om loh hangin a lau huai pen pen gamte nangawn ah zong ava zin kawi kawi hi. Haksatna tampi thuak in kisiat theihna namcin in kiim uum hi. Ciangpum tawh satna, gilkialna, sila dinga zuaknate leh sihna thuak dinga mawh sakna 3 vei, cih bang vive athuak hi. Misuamtein suam zel ahih manin, khat vei vei dang taak lum dek dek zel hi. Khat vei a neihsa khempeuh sut-in, a puan suah khiat sak uh-a, khe dap bulhloin tai tampi lam a paisak uh hi. Mual golpipite kantanin a maitang vuukin tuam a, akhete vuuk lak ah a hik cip hi.
Migilote leh a gamsa suakte lak ah galhiam vomloin zin dah in a ki cih ciangin, “Kei galhiam hong ki guanzo hi”. Tua ka gaalhiam pen “thu ngetna, Khrist adinga na ka sepna, Ama hong kep ding muanna” te “Pasian leh ka veengte hong itna ka lung sung ah om in, ka khut sungah Laisiangtho ka tawi hi.” ci hi. – Adams, W.H. D., “In Perils Oft,” p. 192. Hebrew pau leh mang pau-a Laisiangtho pen a paina khempeuh ah a keng hi. A khual zin nu nung na te khat ah, “Keimah in…ka khut sung ah Laisiangtho leem sa-in ka tawi hi. Ka vaang in tua sung ah oma, tua in hong huu ding hi cih ka thei hi” ci hi. Ibid., p. 201. Tua bangin thuak keei kaai in thukhenna thupuakna pen leitung phel gol zaw a ki zelh dong in a sem hi. Jewste, Turks, Parsee, Hindu, leh minam dang tuam tuam te lak ah Pasian thu theh kawi kawi a, pau nam tuam tuam te lak ah Messiah ukna hong tung dek ta hi cih thu atangko kawi kawi hi.
Bokhara-a a zinna ah gamlapi-a atang om mihon khatin Topa hong paikik baih ding cih upna tawh lamen a nungta uh a mu hi. Yemen-a Arab te in “ Seeraa kici laibu khat nei uh a, Khrist hong pai kikin, min thang taka a uk nading thu 1840 kum in hong piang kha ding hi, ci in na um (362) uh hi,” ci hi. – “ Journal of the Rev. Joseph Wolff,” p. 377. Yemen-a Rechabte tawh ni 6 sung hun ka zangha, Jonadab, Rechab’ tapa mi hoih phawkna-in leengguite ciing loin, a tang tuh loih, a zu dawnlo uh a, tuipuan buk sung bek ah teeng uh hi. Amau leh Israel mi Dan suante ka mu a, amaute in Rechabte mah bangin vantung meiilom tawh Messiah hong tung dekta ding ci-in lamen a om uh ka mu hi,” ci hi.– Idem., p. 389.
Tartary ah tua bang upna mah anei sangmang dang khat zong a va mu hi. Tartar siampi khat in tua sangmangpa kiangah Khrist bang hun ciangin hong pai kik ding hiam? cih a na dong hi. Sangmangpa in ka thei kei hi ci a a dawn kik ciangin, 1844 kum huam-a Khrist hong pai kik ding Laisiangtho thu hilh-a kawi vak sangmang khatin tua nangawn a theih loh pen Siampipa in lam dang a na sa mah mah hi.
1826 kum kipat phet-in Jeus hong kumkik nading thu pen En-gland gam ah ki hilh hi. A hih hangin America-a in ki dawk khol lo hi. A hun ding cian taka sehna zong om khol lo hi. Ahih hangin Khrist hong pai baih ding cih thu pen huzaap lianpi leh vanglianpi tawh ki tangko hi. Hi thu pen thu seelhat leh mi tuam om te kiang bek ah ki gen lo hi. Englishte laigelhpa khat ahi Maurant Brock in “Hih Gam Lungdamna Thu” pen sia 700 vaal bangin tangko uh hi, ci-in na genkhia hi. 1844 kum in Topa hong pai ding cih thu zong Great Britain gam ah
54
zong tangkona om hi. Tua thu genna laihawm te America panin tampi ki hawm khia hi. Laibute leh thu kizakna laite zong England te in na ngah uh a, zong a na hawm khia sawn uh hi. 1842 kum ciangin America pan-a tua thuthang ngahsa-a hong ciah English mi Robert Winter in a gamah Topa hong pai nading a tangko hi. Ama thupuakna pawm ciat uh a thukhenna hun hong tung ta hi cih thu England gam mun tuam tuam ah a tangko uh hi.
South America mi gamh-tatte lak leh siampite thuzawhna mun lak nangawnah Spain mi Jesuit pawlte khat ahi Lacunza in Laisiangtho sung panin Khrist hong pai baih ding cih thu na (363)mu khia hi. Tua thu gen loin a om thei kei hi. Ahih hangin Rome te kawk ding a ut loh manin Jew thu um bangin ki bawl in “Rabbi Ben-Israel” min in a tangko hi. Lacunza pen kum zakhawk 18 sunga nungta mi ahi hi. Ahih hangin ama laibu in 1825 kum in London tunga, mangkam in na ki teikhia hi. Tua lai aki hawm khiat cianign Jesuh hong paikikna thu Englang gam sung a lawpna sa pen nakpi in alawp beh sak hi.
Germany gam ah Bengel in kum zakhawk 18 sungin na hilh hi. Amah pen Lutheran pawlpi sia, Laisiangtho tel kheh a siam khat ahi hi. Bengel in a sang lai sinna te a zawh ciangin “theology lam sin a, tua in a lungsim leh a gamtat tha hat sak in, nunzia hoih a nei sak hi. Khangno dang te mah bangin biakna lam ah uplahna leh lunghihmawhna tampi a nei hi. Khangno khat thuak zawh loh zah dingin thaltang tampi vuh banga haksa asak tampi anei hi.” – Encyclopedia Britannica, art. Bengel (9th ed.). Wurtemberg ah pawlpi mi khat hong suak a, biakna suahtakna a leen nuam khat a hi hi. “Pawlpi suahtakna a pan pih mah bangin a ki khih-a ki tuat lungsim sung upna uk cipna a thuak mite a pawlpi panin taw kik in a suahtak nading in apanpih den hi.” – Ibid. Tua bang ngeina pen a gam mi peuh mah in zong hoih a sak uh thu a hi hi.
Mangmuhna 21 sung bulphuh in “Advent Sunday” tawh kisai thuhilhna a bawl leh Khrist hong pai kik nading vai Bengel lungsim ah hong phu khia vat hi. Ni dang bang loin Mangmuhna sunga hilhkholhnate hong ki dawk han han hi. Kamsangpa gen ziate, leh minthanna thupitein a lungsim zogawp lua ahih manin, tawlpi khat tua thu aki mangilh bawl phot hi. Pulpit-a a din ciangin a lungsim ah tua thu khauh tak in ah hong phawk leu leu hi. Tua hun a ki panin Mangmuhna sunga Khrist hong pai baih nading hilhkholhna thute hong sim pha saan hi. (364) A nimit ding a sehna pen kum tawm no sung hi ding hi a ci hi. Miller in zong tua khit asawtlo in ama cih a thukim pih hi.
Bengel laigelhte Khristian gam sung teng ah ki zeel hi. Ama muh khiat thute Wurtemberg State sung teng ah ki zeel a, Germany gam sung mun dang dang ah zong a lut hi. Tua nasepna pen ama sih khit in zong ki zom to lai hi. Gamdangte mah bangin Germany gam in zong tua tangkona na ngai uh hi. Tua sawng mah in Germany pan in thu um pawl khat Rusia gam ah peem to uh a, Khrist hong pai baih nading thu upna tua gam-a Germany pawlpi omte tungah a na tangko uh hi.
Khawvaak in France leh Switzerland zong taan’ hi. Farel leh Calvin in puahphatna thumaan a na theh khiatna Geneva ah Gausen in Jesu nihvei ong pai nadingthu ana tangko hi. Gausen pen sangnaupang ahih lai kum zalom 18 leh 19 kipat cil lam-in Europe buppi ah thu sit siamna (rationalism) laang mah mah hi. A khangno lai-in hilhkholhna sim thanuam ngei napi, biakna na a sepna hangin thu leh la a theih loh ban ah, lung hiang niloh in hong om hi. Rollin’ laibu “ Ancient History” a cih a sim khit ciangin Daniel bu a lian 2 sung sim a, tua sung ah hilhkholhna te taangtung takpi ahihna tangthu ki ciamteh a mu hi. Tua lai ah Laisiangtho pen Kha Siangtho huu mop tawh ki pia ahih takpina a mu hi. Hong pai lai ding hunte ah kisiatna pan hong len ding tembaw-sik kawipi bang hi ci in a ngaihsun hi. Thu suut siam lel tawh lung kim zo loin Laisiangtho sim to to in thumaan khuavak a kan tohna ciang ah lungkimna a hong nei kik hi. Tua hilhkholhna a sin beh toh zel ciangin Topa hong pai kik nading hun hi ta hi cih upna ah atung to hi. Hih thumaan in alungsim lawnglua ahih manin, mite mai ah a gen khia nuam hi. Ahih hangin Daniel bu pen thu thuuk, thusim hi, theih zawh loh ding thu hi (365) cih taangpi upna in a mai a dal mah mah hi. Geneva ah Farel in a na hihsa bangin, a tawpna ah, a nu a pate uh lawh thei dinga a lam et naupangte tung ah anasep hong pan hi.
Ama genna ah, “Hih thu na theih tek ding uh ka deih hi. I nasep I neu bawlna hi zaw loin manpha taka a thuk but theih nadingin I deih innkuan sung naupangte tung ah piak phot ding hoih hi” ci hi. “Mite in ih thu za leh deih ka hih manin a khang ham sa te tha khat in hilh pah leng hong ki za nuam lo kha ding ka lau hi” ci hi. “Tua ahih ciangin a neu pen te lawh masa ding, naupang hon khawm phot ding, mi hong tam sem sem ciangin, mite in zak nop sa-a lawp hi cih I muh ciangin, amau in a thu mu a a gen khiat kik theih uh ciangin u-haamtein zong tu-in na zak ding hoih hi cih hong mu ding uh hi. Tua pan in a cial nihna ki sem to thei ding a, khang haam sa te in thu hong kan ding uh hi. Tua ciangin nasep hong picing thei pan ding hi” ci hi. – Gausen, L., “ Daniel the Prophet,” Vol. 2, Preface.
A nasepna mai nawt hi. Naupangte kianga a gen pen u-haam te-in zong hong ngai uh hi. A biak inn sung te uh ah thu ngai mi hong dim hi. Tua te lak ah uhaam, milian, laisiamte zong hong om uh hi. Geneva a hong zin khual mite nangawn zong hong om uh hi. Tuatein hih thu pen mun dang gam dangah na puak sawn zaw lai uh hi.
Gausen in a nasep mai nawtna hangin hong tha nuam hi. French pau a sim thei mite adingin a thuhilhnate lai tawh gelhin ahawm khia hi. Gausen genna ah, “Naupangte sin dinga ki bawl pen, tua bang laibu a sim nuam lo-a theih zawh ding hi kei a ci anu a pate kianga ‘Naupangte nangawn in thei buang hi ven, bang hangin thei lah ding ih hiam? a ki ci kim dinga ka bawl hi” ci hi. “Hih hilhkholhna pen I tuu honte lak ah ki thei ciat leh ka deih lua hi. Lai a ki sim loh luat pen in tu hun ki taangsapna lahkhiatna kician zaw a suak hi.” “Tua hi a, hih lai simna tawh ih mai mah maha i tuah ding haksatna pan kiging khol thei-in Jeus Khrist vil in ngak khol thei leng ka deih hi” ci hi.
Gausen pen French pau-a thuhilh sia lak ah a ki dawk mah mah leh aki it mah mah hi napi a sia nasep tawm vei ki khawl sak hi. Bang hang hiam cih leh, pawlpi in dotna dawn’ (366) na laibu (catechism) a zat te thu bun sa zo lo, upna phuhna mel nei lo a, neem ahih manin Laisiangtho thu om bang khangno te hilh nuam zaw ahih man a hi hi. A nunung lam ciangin Theological saang ah saang sia asem hi. Tua kawm mah in Sunday ni ciangin thuhilh sia seem in naupang te makaih a, Laisiangtho sung thu amaute a hilh hi. Hilhkholhna thu a hilhna ah mite lawp in a khanglo sak pha mah mah hi. Professor asep kawm mah in laikhetna tawh naupangte ading a deih sak thute hilh khia hi. Tua bangin kum tampi sung huu zaap lian mah mah tawh mite in Khrist hong pai baih ta ding cih hilhkholhna thu sim in a theih nadingun a hanciam uh hi.
Scandinavia gam ah zong hih thupuak na ki tangko a, zapi zeel in ki lawp mah mah hi. Mi tampi in a leitung nuntak nading na ngawn uh zong khual nawn loin hong thokhia uh hi. Ki pulaak na tawh a mawhna te uh nusia in, Khrist min tawh mawh mai sakna hong ngen uh hi. Ahih hangin a gam-a inn teek pawlpi siapipa in tua bang hihna te deih lo ahih manin, tua thu zom-a a hilh mi pawl khat thong sung ah a khia hi. Mun tampi ah Topa hong pai kik nading thu hilhna pen hong daai pian mawk ahih manin, Pasian in tua thu tangko dingin a lam dang mah mah in naupangte a zangh in na hong seem kik hi. Amaute a kum cing nailo uh ahih manin a gam thukhun zui in thong ki khum theilo hi. Tua ahih manin a dal leh a nawngkaai sak omloin thu gen thei uh hi.
Nasepna pen mi nautaang lak leh nasem mite lak hi zaw deuh a, tangkona thu ngai dingin hong ki khawm ciat uh hi. Tua thu hilh naupangte zong a tam pen mi zawngte tate ahi uh hi. Amaute kim khat kum 6 kum 8 gual bek ahi uh hi. A gamtat in zong Pasian nget siangtho thukham te zui uh a, Honpa it uh ahih lam kilang sak uh hi. Tua zah-a naupang moi laite nangawn in tua pilna leh tua hoihna te nei thei lel ahihna teci pang suak sawn sawn uh hi. Mipite mai a a din’ uh ciangin amau pianpih ngeina baan ah a thu zawh huu zaap dang khat in tua bang dingin a taw sawn ahih lam ki mu thei hi. A aw suah uh leh a ki heek ziate uh kikhelin lam danga, Thukhenna hun hong tung ta hi ci-a a tangko uh (367) ciangin “Pasian kihta un la Amah phat un. A thukhenna hun hong tung zo hi” cih Laisiangtho kammal khawng man khia lian lian uh hi. Mite mawhna kawk khia in, a paangtatnate uh, numei-pasal mawhnate bek tham loin leitung a etlahna, a nungtolh nate uhnusia in, hong tung ding hehna pan a suahtak theih naidngun man langin ki khel un ci in gen uh hi.
Mitein lam dangsa in a liing uh hi. Tua pen mite a zo thei Pasian Khaa in mite lungsim sung ah thu a gen ahi hi. Mi tampi in Laisiangtho sim hong hanciam uh a, a paangtatnate uh, numei-pasal mawhna te pan in hong ki puah pha uh hi. A gamtat palaute uh khel in hong om uh ciangin, gam uk pawlpi sia liante na ngawn in Pasian in hih nasepna makaih hi cih anial theih nawnloh zah dongun tua tangkona hong mai nawt hi.
Scandinavia gamte ah zong Khrist hong pai kik nading tangkona thu kihilh dingin Pasian in a deih hi. Ama nasem siate’ aw ki daai sak hiau mawk ahih manin Pasian in Ama Khaa naupang te tung ah buak in, tua tawh nasep kizo ding hi leh bung hi. Jesu in Jerusalem hong naih ciangin a lungdam mihonpi in zui uha zawhna-aw tawh awng keek uh hi. Nisuh hiangte veii-in David Tapa, ci-a a tangko uh ciangin a hazaa Pharisee te in Ama kiang ah, hih mite daai sak in, a cih laitak un Jesu in, Hih mite in hilhkholhna a tun’ nading hi a, amaute daai hial mah leh zong suangtum te kiko veve lell ding hi, ci kik hi. Jerusalem kongpi a lutkhit uh ciangin siampite leh ukpite kihta in mipite daai uh hi. Ahih hangin Biak innpi panin naupangte in lungdamna aw tawh nisuh hiangte veii-in “Hosana, David Tapa tungah Hosana”ci in hong awng keek zuah zuah ve ve uh hi. Matt. 21:8-16. Phariseete lungkim loin na sa mah mah uh a, “Hihte in bang gen cih na za hiam?” ci uh hi. Jesu in a dawn’ kikna ah, “Hi mah in, nau ngek leh nawine laite na ngawn’ kam sung panin phatna na kicing sak hi a cihna sim kha ngeilo na hi uh hiam? a ci kik hi. Khrist hong pai masak lai in Pasian in naupangte a zat mah bangin, A hong pai kik nading tangkona ah zong naupangte zangh ahi lel hi. Pasian kammal omsate tung kim ding hi. Honpa hong pai nading tangkona pen mi nam kim, pau nam kim, (368) pawl khem peuh, gam khempeuh ah ki tangko ding a hi hi.
America gam sung tengah Jesu hong kum kikna thu tangko dingin William Miller leh a pawlte ki sawl hi. Hih gam pen tua tangko nasepna phualpi hong suak hi. Hilhkholhna sunga vantungmi khatna tangkona a tangtunna ahi hi. Miller leh a pawlte laigelhte gam dangte ah ki puak hi. Sangmangte lutna sa gam khempeuh ah Khrist hong pai baih nading thu tangkona pen tung kawi kawi hi. A tawntung Lungdamna Thu in a nai a gamla mun khempeuh ah, “Pasian kihta un la, avangliatna phat un. Bang hang hiam na cih leh a thukhen ding hun a tung zo hi.” ci kawikawi hi.
Hilhkholhna ah 1844 tuuk sungin Khrist hong pai ding banga a gen pen in mite lungsim sung ah teci pangin thuk lut mah mah hi. Thupuak pen gam khat pan gam khat ah lut in ki zeel kawi kawi hi. Mi tampi in tua hilhkholhna hun seh pen maansa uh a, a ki saktheinate uh pai khia in lungdam takin thumaan na saang uh hi. Sia tampite in pawltuam lungsim aneihte uh ban ah a pawlpi leh a khasumte uh nusia in, Jesu hong pai ding tangkona hong pawl uh hi. Tua thu a tangko mite lak ah siate pen tawm lai mah mah tham hi. A ki niamkhiat pawlpi mi tampitein tangko zaw uh hi cih kimu theih hi. Lokhote in a lote uh nusia in, set nasemte in a vante uh nusia uh hi. Sumzuakte in a sumbuk uh nusia uh a, nasep neite in a panmunte nusia in tangkona ah ki hel uh hi. Tua hi napi in nasep ding tam tawh ki tuak dingin nasem mite tawm lua lai hi.
Pasian awlmawh lo in, leitung zuau thu leh gitlohna tawh a dim pawlpi dinmun in galvil citakte alung gim sak hi. Tua mite gupkhit zawh nadingin gilkial dangtak, gim le tawl, khual nawnlo in mite sam in na seem uh hi. Satan’ langdona kawmkaal mah ah nasepna pen mai nawt nawt a, mi tul tampi in tua thupuak asaang uh hi.
Mun ci teng ah teci pan’na kiza hi. Deidan omloin, mawhnei leitung mi leh pawlpi mite tungah hong tung ding hehna pan a suahtak theih nading un thu kihilh hi. (369) Khrist kamtaai tuiphumpa Johan bangin hih thu atangkotein singphung ah a hei nga-in ki sik kikna gah hong gah dingin kunh uh hi. Mipi thugenna munte pan-a ki awngkhia Nopna leh lungmuan’na om hi, cih pen tawh ki lehbulh lua ahih manin amaute tangkona hangin mite kilok mah mah hi. Laisiangtho sunga a ki tel mah mah thute a theih ol ding in Kha Siangtho in lak ahih manin, mite in sai kaak thei uh a, a nial tatak pen tawmno bek om uh hi. Biakna naseemte in amau neihsa thumaan lo pan hong tho khia uh hi. A nungtolh, leitung nate bek en-a thu um lo, akisathei, a huai ham mi ahih gige lam uh hong ki mu tel ta uh hi. Tua ciangin mi tampi in mai zum in ki sik kikna tawh Topa hong zong uh hi. Leitung deihna-a sawt veipi a luai ken konna te uh tu in vantung lam hong ngat ta uh hi. Pasian Kha in amaute tung ah hong tunga, lungsim nip in hong neem uh hi. “Pasian kihta unla, avang liatna phat un. Bang hang hiam na cih leh a thukhen hun atung zo hi” cihna aw hong tangko pih uh hi.
Mawhneitein kapsa in, “Gupna ka ngah nadingin bang ka hih ding hiam?” hong ci ta uh hi. A thumaan gamtat lo-a a kiciamtehte khawng hong ki puah pha nuam uh hi. Khrist sunga tawldam nopsakna a ngah mite peuh mah in midangte zong hawm sawn nuam uh hi. Kisaktheihna leh tangtat nopna teng a leeng mang hi. Lungsim tak tawh ki pulaakna te bawl uh a, innkuan mimalte in a ki nai pih pente uh
55
leh a it pente un gupna angah nading a hanciam pih uh hi. Thu ki ngetsakna aw te kiza hi. Mun khempeuh ah Pasian zong-a lung gim khaa te ki mu hi. Mi tampi in zan khuavak vak in a mawhna te uh a ki mai sak takpi nading leh a beh a phungte uh leh a vengte uh adingin thu ngen-in Pasian buan uh hi.
Mi pawl tuam tuam khempeuhte Jesu Lamente’ kikhopna mun ah hong ki khawm uh hi. A hau a zawng, asaang a niam, nasep tuam tuam seemte, in amau ciat adingin Jesu hong kum kikna ding thu za nuam uh hi. Topa in amaute upna a ki pulaak laitak un lang pang khaa te let cip sak hi. Khat vei vei naseemte tha neem thei a, ahih hangin Pasian Kha Siangntho in thumaan (370)vangliatna guan hi. Vantung mite in a ompih lam a ki thei thei uh hi. Ni sial in thu um mi kibehlap hi. Khrist hong naina a gen uh ciangin mipi in huu saang lo liang mah-in angai uh hi. Van leh lei kimat ding tawh kibang hi. A teek a khang tung ah Pasian vangliatna hong tung hi. Mite in Topa phat kawm-in a inn lam uh zuan uh a, zan huih vot gam daai lak ah lung damna thu ging ki za hi. Tua ki khopna-a va paite peuhmah in bang zah in ki lawp ciat uh cih mang ngilh thei nawn lo uh hi.
Khrist hong pai nading a hun lian hong seh uh ciangin pawl tuam tuam panin lang pangte hong ding khia uh hi. Pulpit-a siate pan a niam pen vantung awlmawhlote lak dongin a nial mi hong om hi. Hilhkholhna kammalte hong tung hi: “A nunung bel nite ciangin a kosia thei mite in amaute’ deihgawhna bang gamta-in Topa hong paikik ding cih thuciamna in koi-ah a om hiam? I pute ipate a si khin zo uh hi; a hi zongin na khempeuh a pian’sak cil-a kipan apian’ ngei bangin a om lai hi,” ci uh hi. 2 Peter 3:3, 4. Honpa it-a ki gen mi tampite in nihvei paina pen nial loin a hun lian sehna bek a nial in a ki pulak uh hangin, na khempeuh a mu Pasian in a lungsim sung uh mu-a, Khrist hong pai in thumaan tawh leitung te thukhen ding hi cih thu zaknop a sa lo uh a hi zaw hi. Amaute in thumaan lohna nei uh a, lungsim tawng dong zong khia-a a mu Pasian mai ah a gamtatna te uh ki dawk sak ngam ngaap loin Topa muh ding a lau a hi zaw uh hi. Topa hong pai masak lai-a Jewstein Jesu dawn dingin a na ki gin loh mah uh a bang a hi zaw hi. Amau in Laisiangtho thumaan kigente ngai nuam lo bek tham loin, Topa a lam en mite nuihsan uh hi. Satan leh a vantung mite in Khrist leh a vantung mite maitang ah a lu uh puuk suk in kisial uh a, Ama mi a kici te in Ama hong kilat ding a deih het kei ve vua leh! Amah a itna uh neu pha ngel sam a hi ve maw! ci uh hi.
“Kua mah in a ni leh a nai thei lo hi” cih pen tua thu nialna pi pen hi den hi. Laisiangtho in, “Tua ni leh tua nai-hun kua mah in thei lo hi. Vantung mite in thei lo uh hi. Pa khat bek in a thei hi,” Matt . 24:36,3,33,43-51, ci mah hi. Topa lamente in a (371) Laisiangtho mun tel khehnate uh ki tuak takin a lah uh hangin a nialte in bel tua mun khial hi uh teh ci in lak uh hi. Khrist Biak innpi nusia a pai khiat khit Olive mual tunga A nung zuite tawh a kihona uh a a genthu a hi hi. Nungzuitein na dong uh a, “Nong pai ding leh leitung bei ding bang lim in hong thei sak ding hiam?” na ci uh hi. Jesu in lim piang dingte gen suk suk a, “tua limte na muh uh ciangin Mihing tapa in kong biang dongin hong nai ta hi ci in na thei ta un” ci hi. Honpa thu gente khat leh khat a ki lumlet ding ahi kei hi. A ni leh a nai kua mah in a theih loh uh hangin hong nai ta ahihna bel tel taka theih nadingin na hilh hi. Tham loin tua banga a hilh sim thu awlmawh lo-a Ama hong pai ding naina a thu donlo te pen Noah khang tuiciin tun’ ding a awlmawh lote mah bang ding hi ci hi. Tua mun mah-a thu gentehna sungah “Ka Topa hong pai hak ding hi” a ci mite thuak ding thu agen na ah, vil-a ngak-a a na om te piak ding letsong thu zong a gen hi. “A Topa hong ciah cianga tua banga a om amuh naseempa in thupha a ngah ding hi” ci hi. Matt. 24:36, 3, 33, 42-51. “Tua ahih ciangin ngak in na om kei leh, guta bangin ka hong pai ding hi,” ci lai hi. Mang. 3:3.
Paul in Topa hong pai ding a kiging lo mi pawl khat te thu a gen hi. “Zana guta te hong pai mah bang in Topa’ Ni in hong tung ding hi ci-in note mah in a tel takin na thei uh hi. Amaute in, ‘Nopsakna a om hi, launa omlo hi,’ ci-in agen laitak un, tagai numei tungah ta suah hun gimna a tun’ bangin amaute tungah kisiatna gal in thakhatin tung ding a, suahtakna neu kha beek a ngah kei ding uh hi” ci hi. Ahih hangin Topa hong pai ding a na lawp mite ahih leh, “Ahangin, tua Ni in guta mi bangin note tungah a hong tun’ nading in ah note in khuamial lakah a om na hi kei uh hi. Bang hang hiam na cih uh leh, note khempeuh in khuavak’ tate, sun lai’ tate na hi uh hi” na ci hi. 1Thess. 5:2-5.
Laisiangtho in ahih leh Khrist hong pai nading vai ah kiging lo-a om mawk nading thu pia ngei peuh mah lo hi. Ahih hangin thumaan a nial nuam mite in a bil uh hum- (372) in, “A ni leh a nai kua mah in theilo hi” cih pen a let sanpi uh ahi hi. Khrist nasem sia khat ka hi a ci pipite leh mi zahko theite in tua thu mah ging sak den ding uh hi. Mite khanglo in hotna lampi zong dingin hong patauh uh ciangin a khiim-daai dingin mite leh thumaan kikal ah biakna siate hong ki golh-in Pasian kammal a maan lopi pi-in a khiatna hong bawl uh hi. Mi muanhuai-lohonte in mi kheem mangpa tawh kopin, Pasian’ cih lohpiin, lungmuan’na, nopsakna om hi ci mik mek ding uh hi. Khrist hun a Phariseete mah bangin mi tampi in amau mah mah-in vantung gam sunga lut nuam lo uh a, a lut nuamte zong dal uh hi. Mite’ sisan amau tungah ki phul kik ding hi.
Pawlpi sung ah a ki niamkhiat pente leh a ki pia zo pen te in thupuak saang masa pen pah pah zel uh hi. Amau mah in hilhkholhna thu a suut uh ciangin Laisiangtho tawh kilehbulh-a mite’ gamtatna te, hilhkholhna laak dan te ong mu khia uh hi. Pawlpi in a uk cip lohna mun peuh-peuhah amau adinga Pasian thu a sin tatak mite in Laisiangtho kammal leh Jesu hong pai baih ding cih upna sittel in, thuman ahih lam mu khia in a zui uh hi.
Mi tampi in thu um lo a sang gamte’ bawlsiatna a thuak uh hi. Pawlpi sunga amau din’ mun a let kip lai theih nadingun a lam etna uh gen khia ngam loin a daai cip pawl zong a om hi. Ahih hangin Pasianthu om bang zuih nading thumaan sel cipna pen Pasian in phal lo dinga, amau tunga ki pia thumaan sel cip ding hi lo hi a ci pawl zong om hi. Khrist hong pai ding um uh ahih man bek-a pawlpi pana ki paai khia mi tampi a om hi. Hih sittelna thuak mite adingin kamsangpa genkholhna thu manpha khat: “Kei tung ah note nong cihtakna hangun na mipihte pawl khat un note hong mudah in hong hawlkhia ding uh a, zahpihna tawh note hong hopihin…Topa in ama liatna hong lak hen la, note hong honkhia ta hen hong ci vial ding uh hi. Hih banga hong paute pen mindaina a thuak ding mite ahi uh hi”. Isa. 66:5.
Tangkona in bang ciang lawh cih Pasian vantungmite in lawp takin en uh hi. Pawlpi a tam zaw in thupuak a nial lam pang ngen in gen zaw mawk uh cih a muh uh ciangin (373) vantung mite dah in ki hei kik uh hi. Ahih hangin mi tampi mah tua thupuak ah a ki sittel nailo om lai hi. A zi, a pasal, a nu a pate, leh a tatein athuzawh mitampi omlai hi. Tua bang mite vantung mitein hoih takin vil uh a, Pasian tokhom panin khuavak thak taan’ beh sak lai dingin koih uh hi.
Tua thupuak a ngah kha phot te in Honpa hong pai ding pen gen zawh loh zah-in lawp uh hi. Ama hong kilat ding a lam etna hun uh hong nai ta hi. A nai hong cing ta hi. Multho in, ciliap in daai khip khep uh hi. Tua hun ciang a nop sak nading uh ngaihsun in Pasian sungah a ki tawldam sak uh hi. Tua a ngak laitak un a ki hel kha te in tua lam etna nuam mangngilh thei lo uh hi. Nipikal tam sim bang in a sap laitakin leitung nate khempeuh paai khia uh hi. Thu um taktakte in nai tawm kha khit ciangin a si ta ding mah bangin a lungsimte uh sit pha pha in leitung nusia ta ding cih ngaihsun uh hi. “Van kah nading puantual” bel bawl lo uh hi. Topa dawn dinga lungsim ki gin’na pen khaa-ii sianthona ahi hi. Gamtat siangtho in, Khrist sisan tawh kisawp siangna pen hi a ci uh hi. Pasian mi ka hi a kici khem peuh in tua bang lungsim a nei ciat uh hih ding a deih huai hi. Tua bangin khentatna leh tha nopna nei tek uh hen. Ki niamkhiat takin Topa mai ah ngen le uh tu-a a neih uh hauhna sangin muhna theihna lianzaw nei ding uh hi. Tua banga thu ngen mi tawm lua hi. Mawhna nusia tatak mi tawm lua hi. Honpa in thupha tampi hong piakna ngah dingin upna nungta neihna te nusia mawk uh hi.
Pasian in A mite sit tel ding sawm hi. Ama khut in hilhkholhna hun seh khialhna a hum hi. Jesu alam-ente in a khialhna uh mu lo uh hi. A langdo pil pen pen te in zong muh sak tuan sam lo uh hi. A nialte in: “Na hun sehna uh bel maan hi. Na lianpi khat 374) bel piang mah ding hi. Ahih hangin Miller seh kholhna pen hi loin leitung ki lumletna ding hi zaw a, Khrist nih veina hong paina hi lo hi” cih sak uh hi.
A lam etna hun uh tung khin ta a, Khrist lah a mite la dingin hong pai lo mawk hi. A Topa uh hong pai takpi ding hi ci-a a umte nakpi in ci mawh in dongtuak uh hi. Ahih hangin Pasian sehna bangin bel a tung hi zaw hi. Ama kilat lamen-a ki nei amite a sit tel ahi hi. Amaute lak ah vai dang ngaihsun nawn lo-a a lau lel pawl zong om hi. Thu um hi’ing a kicih na uh in a lungsim uh leh a gamtat uh a lawh zo lo na hi mawk hi. Amau lam et banga thute a pian’ loh ciangin tua bang mite in kote ka ci mawh keei uh hi ci uh hi. Khrist hong pai takpi dingin um ngei zen zen lo uh hi. Tua bang mite pen thu um taktak mite adingin a dah huai, a lawmte a nuih san masa pen te a suak uh hi.
Ahih hangin Jesu leh vantung mi khempeuhte in a um takpi a cimawh takpite itna leh hehpihna tawh en gige uh hi. Muhtheih leh muhmawh kikal kideina daal ki hawk khia hi leh, vantung mite in amau hum in Satan thal tang pan dal hi cih akip tentante in mu ding uh hi.
56
56