LESSON 7: Buaina Hong Om Ciangin

LESSON 7  
Buaina Hong Om Ciangin
Nov. 10 – 16

Sabbath Nitak

Tu Kaal Sungin Sim Ding: Sawl. 6: 1-6; 10: 1- 23; 11: 3 – 24; 15: 1-22; Matt. 5: 17 – 20; Amos 9: 11, 12
KAMNGAH: “Khrih sungah a kiphum note in Khrih’ pianzia a nei khinta na hi uh hi. Tua ahih manin Jew mi le Gentail mi, sila le sila ahi lo, numei le pasal cih bangin kideidanna om nawn lo a, note khempeuh Khrih tawh na kipawlna hangun pawlkhat hi-in, a kibangkim na hi uh hi” (Galatia 3: 27, 28).
Khristian kipawlkhopna sungah a hamsa mahmah khat in pawlpi nasepzia, pawlpi dinmun muhzia, pomzia tuamtuam hong om ciangin kipumkhat ding hamsa hi. Tua thute in kipumkhatna siasak hi. Tuhun pawlpi in Thuciam Thak sung pawlpite tawh  kilamdang lo hi. Mihing i hih manin kilamdanna om mah ding hi.
          Khristian masa-te lakah zong Thuciam Lui tawh kisai thute a muhzia uh, a pomzia khatlekhat kibang lo hi. Khatlekhat kilangneihna tawh kipelh lo uh hi. Hih bang thute in pawlpi susia thei hi. Ahi zongin sawltakte le makaite pilvang takin Kha Siangtho makaihna zui uh ahih manun tua bang buai-na tuamtuamte beisiangsak uh hi.
          Nung kaal lamsungin pawlpi masate’ kipumkhatna i pulaak hi. Tu kaal sungin kipumkhatna a susia thei buai-nate koi bangin lemtuah uh cih i kikum ding hi.
 
SUNDAY           Nov.  11
Minam Kideidannate
 
           Sawl. 6: 1 sim in. Bang thu in pawlpi buai-sak hiam? Meigong huhna tawh kisai bang thubuai om hiam?
   ____________________________________________________________
   ____________________________________________________________
Khristian mi masa-te in huhna a piak uh ciangin Hebrew meigongte sangin Greek meigongte huhna tawmpiak zawkna hangin pawl sungah buai-na hong piang hi. Tua bangin maipha piakzawk deuhna in buai-na piangsak hi. Lai Siangtho in pulaak lo ahih manin maipha piakzawk om takpi hi thei, hi lo thei hi. Ahi zongin mi kimkhat in tua bangin pulaak uh hi. Tua buai-na in pawlpi kikhenkhapna piangsak thei hi. Minam kideidan khak ding ol mahmah hi lo hiam?
          Sawl. 6: 2-6 sim in. Koi bangin pawl sung buai-nate makaite in  siangsak uh hiam?
        __________________________________________________________
      ___________________________________________________________
Hun masa pawlpi in khang mahmah hi. Thu-um mi hong tam semsem ciangin  sawltakte tungah vangik hong tung hi. Pawlpi makai (deacon, Thuciam Thak in deacon ci-in gelh lo hi mah taleh) ding mi 7 kiteeng khia ahih manin Jerusalem pawlpi buai-na hong bei-in, thu-um mite in  pawlpi nasepna-ah hong kihel thei uh hi.
          Sawltakte in Greek meigongte’ pulaak thute hoihtak ngai-in, buai-na a ven nadingin mipite zong thudong uh hi. Mi 7 a telkhiatte un sawltakte tawh nasemkhawm uh hi. Hih makai 7 in Kha Siangtho tawh kidimin, pilna le thungaihsut siamna nei uh hi (Sawl. 6:3). Mi 7 a teelma-un sawltakte in thuhilh le meigong huhna sem khawm uh hi. Ahi zongin makai 7 teelkhit uh a kipan sawltakte in thuhilh nasep bek sem uh hi.  Tua bangin nasem ding leh nasep khen uh hi. Amau sanciatah sem uh hi. Luke in  Thuhilh nasep le cimawh huh nasep a pulaakna-ah ‘diakonia’ kammal zang hi (Sawl. 6:1). A khiatna in ministry ahih kei leh service (nasepna) hi.
          Tua buai-na tawh kisai-in makaite in pawlpi mite a kaihkhopna uh in bang thupi hiam? (Sawl. 6: 2)
MONDAY                    Nov. 12
Gentail Mite Kikhelna
 
          Gentail mite in hotkhiatna thu-um a tam semsem ciangin pawlpi masa sungah pawlpi nasep le pawlpi dinmun a lauhuai-sak dinmun hong tung hi.
          Sawl. 10: 1-23 sim in.  Gentail mite in hotkhiatna thu a up nadingin Kha Siangtho nasep ahihna bang thu in pulaak hiam?          _________________________________________________________
          _________________________________________________________
Peter in a mangmuhna hangin lungmang hi. Bang hang hiam cihleh thukhun bangin,  Jew thuzui kician mi khat in sasiang lo ne ngei lo hi; sasiang lo tawh kiniinsak lo hi (Siam. 11; Eze. 4: 14; Dan. 1:8). Ahi zongin Peter’ mangmuh in sanek ding le sanek loh ding thu hi lo-in, tuhun khatlekhat kideidanna mah bangin, Gential le Jew kikal kizopna zia hoih lo thuhilhna dingin mangmu hi zaw hi.
          A cilin Khristian pawlpi sungah Jew mi bek om hi. Hih Jew mite in kamsangte genkholh bangin Jesuh in Messia hi, ci-in a um Jew mite hi. Kihilh bangbangin thukham a zui Jew mite hi uh hi. Hih Jew thu-um mite in Jesuh Khrih i upna in Thuciam Lui thupiakte beisak lo hi, ci-in um uh hi (Matt. 5: 17- 20)
          Sawl. 10: 28, 29, 34, 35 sim in. Koi bangin Peter in Joppa khua- a a mangmuh a khiatna bang hi dingin ngaihsun hiam? Bang in tua bangin ngaihsunsak hi ding hiam?
   ____________________________________________________________
        __________________________________________________________
Gentail mite in Khristian pawl sungah a hong kikhel nadingin Kha Siangtho in makaih hi. Gentail mite in Khristian a suah nadingun vunat kul lo hi; Jew mi a suah uh kisam lo hi. Nungzuite in Pentecost ni-in Kha Siangtho a ngah bangun, Cornelius le a innkuanpih tungah Kha Siangtho kibuahna in Pasian’ deihna hi, ci-in Peter le a lawmte in pulaak uh hi (Sawl. 10: 44 – 47).  Jew mite tungah Kha Siangtho kipiak bangin Gentail mite tungah zong kipia ahih leh, Jesuh in Messiah hi, ci-in a sang mite in vunat kisam lo hi, cih kilang hi. Pawlpi masa in hih thu buaipih hi.
Tuesday     Nov. 13
Kha Siangtho in Makaih
 
          Jerusalem a om Khristian makaite in Caesarea khua a Cornelius tungah thupiang a zak uh ciangin , thukan dingin Peter sawl uh hi. Biakna makaite in Peter gamtatzia hoihsa lo uh hi. Bang hang hiam cihleh Moses Thukham in Jew mi khat in Gentail mi khat tawh annekhawm thei lo ding hi, ci hi (Sawl. 11: 3)
          Sawl. 11: 4-18 sim in. Peter in Kha Siangtho nasepna bangci pulaak hiam? A thupiangte a pulaakna bulpi in bang hi ding hiam?
______________________________________________________________
______________________________________________________________
Biakna makaite in Peter gamtatzia le Gentail mite tuiphum ding a vaihawmna a mawksak uh hangin, Pentecost ni-a Kha Siangtho nasep bangin tu-in zong Kha Siangtho in Peter makaih hi, cih pen kilang mahmah hi (Sawl. 11: 12). “ Amaute  in hih thu a zak uh ciangin mawhsakna thu gen nawn lo uh a, ‘Gentail mite zong kisikin a nuntak theih nadingun Pasian in hunhoih pia hi,” ci-in Pasian a phat uh hi (Sawl. 11: 18).
          Sawl. 11: 19 – 24 sim in. Tua khit ciangin bang thupiang hiam?
          _________________________________________________________
          _________________________________________________________
Makai pawlkhat  in Cornelius le a innkuanpih tung a thupiang in thutuam khat hi-in, tua bangin hong piang kik nawn lo ding hi, ci-in ngaihsun uh hi. Ahi zongin Kha Siangtho’ nasep tua bang hi lo hi. Stephen in thahna a thuak khit ciangin Jesuh nungzuite in Jerusalem khua pan Judea, Samaria, Phoenicia, Cyprus le Antioch cihte dongin kizel uh a, Gentail mi tampi in Jesuh Honpa-in sang uh hi. Jesuh in hih bangin a pian ding genkhol hi (Sawl. 1:8). Tua laitak a biakna makaite dingin kingaihsun lecin, Gentail mi tampi in thu-um mi a hong suah ciangin pawl sungah koi-ci bangin kalsuan ding cih pen a hamsa ding thu hi mah hi.
         
Koi bangin pawlpi le hotkhiatna thupuak tawh kisai muhna kicinlohna hangin i teci panna muibun lo sak hiam?
Wednesday                   Nov. 14
Jerusalem Council
 
          Sawl. 15: 1, 2; Gal. 2: 11 – 14 sim in. Bang thu hangin pawl sung buai hiam?
_____________________________________________________________
______________________________________________________________
Pawlpi masa sungah buai-na in thu-um mite kipumkhatna lauhuai-sak hi. Jew Khristian kimkhat in hotkhiat ngah nadingin Pasian tawh thuciamna sungah om kul a, vunat ding kisam hi, ci uh hi. Pasian tawh thuciam limtakin a zui mi in Gentail mite tawh kizopna nei thei lo ding uh hi. Tua bangin Gentail mi tawh kizopna uh hileh hotkhiatna tawh kigamla ding hi, ci uh hi.
          Jew mite in Gentail mite tawh kizop loh ding khuahtakin gen uh hi. Tua bang thukhun a om manin Gentail mi khat in Jesuh nungzui a suah nop leh hamsatna lianpi om hi. Thuciam Lui sungah Messiah Honpa thu a kigen kholh bang mahin, hotkhiatna thuciam sungah a lut nop uhleh, Gentail mi khat in Jew mi a suah masak a kul mah hiam?
          Sawl.15: 3 – 22 sim in. Jerusalem Council ah bang thu kikum uh hiam?
      ___________________________________________________________
   ____________________________________________________________
Thuciam Lui sunga vunatna thukham tawh kisai kikuppi-na nei uh hi. Antioch pan sawltakte, upa-te le makai-te tukhawm uh a, a thu kikup uh khensatna nei zo lo uh hi. Tua leh Peter, Barnabas le Paul in thugen uh hi. Peter thugenna sungah a mangmuhna thu sung mah bangin Pasian in Gentail mite tungah Kha Siangtho pia hi. Tua in Gentail mite lakah nasep kihongsak hi. Tua khit ciangin Paul le Barnabas in amaute tungtawnin Gentail mite tungah hotkhiatna thu a theihsakna thu cihte pulaak uh hi. Tua thu hangin mi tampi in thuman hong mu uh hi. Peter in a thugenna-ah “ Tua bangin i gamta het kei ding hi. Amaute mah bangin eite in zong i upna hangin Topa Jesuh hehpihna tawh hotkhiatna i ngah hi,” ci-in thu a gen hi (Sawl. 15: 11). A khiatna in kum za tampi Gentail tawh kisai a ngaihsutte uh hotkhiatna thu hangin a mawkna suak hi.
Upna thuthuk theihzawkna hangin na lungsim kikhel ngei hiam?  Na upna tawh kisai na telzawk manin bang thu na muhbeh hiam?
Thursday             Nov. 15
A Hamsa Thukhupna
 
          Pawl sung thubuai lemtuah dingin Antioch panin makai muanhuai kimkhat in Jerusalem a makaite tawh kimu dingin kisawl hi. Sawltakte, upa makaite, James cihte nai tampi sung thu kikupna a neih khit uhteh pawlpi kalsuanzia ding thukhensatna hong nei uh hi (Sawl. 15: 13 – 20).  Gentail mite in Khristian a suah nadingun Jew minam suah kul lo hi; vunat a  kipan biakpiakna thukhunte zuih ding kisam nawn lo uh hi, ci-in hong khensat uh hi.
          Amos 9: 11, 12; Jer. 12: 14 – 16 sim in. Israel gam tawh kisai-a om mite tawh kisai bang genkholhna om hiam?
_____________________________________________________________
______________________________________________________________
James in a thugenna-ah Amos siksanin thugen a, Thuciam Lui kamsangte in namdangte in zong hotkhiatna sung hong lut ding hi, ci-in pulaak ciat uh hi. Israel mite tungtawnin minam khempeuh in hotkhiatna sung hong lut ding uh hi, cih pen Pasian’ geelkholh hi. A taktakin Abraham le ama suanlekhakte tungtawnin minam khempeuh in thupha ngah dingin Pasian in Abraham a sapkhiat ahi hi (Pian. 12: 1-3). Kha Siangtho’ makaihna tawh Gentail lak a nasem  Peter, Barnabas, Paul, Gentail mite kikhelna cihte thupi simloh hi thei lo hi. Hih bang thute in Thuciam Lui genkholhnate tangtung hi, cih kilangh hi.
          A taktakin Pasian in Israel mite laka om Gentail mite aa dingin thukhun koihsak khin hi (Siam. 17, 18).  James in tua thukhunte siksanin khensatna pia hi (Sawl. 15: 29).  Gentail mite in Jesuh sungah hotkhiat ngah dingin Pasian in Gentail mite sam hi. Kha Siangtho in makaihin  a theih ngei loh uh Lai Siangtho thuthuk theihtel semsem uh hi.
          Antioch pawlpi kalsuanzia ding Jerusalem Council khensatnate Sawl. 15: 30 – 35 sungah kimu thei hi. Tua khensatna hangin thu-um mite in lungdam uh hi (Sawl. 15: 31). Kha Siangtho kimakaihsakin, Pasian’ kammal zui-in itna, sepkhopna, kimuanna a om ciangin pawl sung buai-nate lemtuah zo uh hi.
Jerusalem Council khentatna tungtawnin khat ii thugen ngai bek tham lo-in i zaknop loh thu gen uh hi mah taleh a thugen uh thuman hi kha thei hi, cih lungsim neih ding cih hong hilh hi lo hiam?
Friday                  Nov. 16
Ngaihsutbeh Ding: Ellen G. White, “ A Seeker for Truth,” 131- 142; “ Jew and Gentile,” 188 – 200, in The Acts of the Apostles.
          Jerusalem Council sunga kihel thukhentatna nei-te in Jew le Gentail mite Khristian upna sungah a khansuah sawltakte, thuhilhsia le mun tuamtuam panin palaai makaite kihel uh hi. Jerusalem pawlpi pan makaite le Antioch panin palaai banah pawlpi makai honkhat zong kihel uh hi. Amaute thukhentat in Pasian’ deihna tawh kituak hi.  Limtak ngaihsutna tawh khentatna nei thei uh hi. Pasian in amaute buai-nate beimangsak hi. Hih thu Kha Siangtho ompihna tungtawnin kimu thei hi. Kha Siangtho makaih bangin a nuntak ding theihtel uh hi. Khristian thu-um mi khempeuh kaikhawmin a tamzaw thukimna tawh thukhenna hi lo hi. A sia le a pha khentel theihna nei sawltakte le upa kim khat in khensat uh, amau khentatna bangin mipi in zui uh hi. Mi khempeuh in makaite’ thukhentatna tawh lungkim khin lo uh hi.  Kilangneihna, kihihsaknate hangin buai-na om hi. Hih bang mite in Pasian nasem mahin kingaihsun uh hi. Khatlekhat kigensia-in khialna zong uh hi. Sep ding tuamtuam geelna nei uh a, hotkhiatna thugen mite nasep nawngkai-sak uh hi. Pawlpi kipat a kipan pawlpi in buai-na tuak a, leitung bei dongin pawlpi in buai-na tawh kipelh lo ding hi.” Ellen G. White,  The Acts of the Apostles, 196, 197.
 
Kikup Ding Dotnate
 
1.    Koi bangin pawlpi masate ettehin tuhun pawl sung kilemlohna buai-nate siangsak thei ding i hiam? Pawlpi masa sung upna tawh kisai buai-na panin pumpi kipumkhat theihna siksanin, koi bangin tu-in pawlpi in ngei-na, minam, pau kibang lo hi kipumkhatin mainawt ding hiam? Bang thu kimakaihsak ding i hiam?
2.    Friday ni-a Ellen G. White’ laigelh i sim ciangin pawlpi masate kipumkhat uh hi taleh bang thu in pawlpi thaneemsak hiam? Tua a deihhuai lo thu in bang hong hilh hiam?

 

Tomlakna: Pawlpi masa sung a buai-nate in thu-um mite kikhenkhamsak thei hi. Ahi zongin thu-um mite in Lai Siangtho’ sawl bang zui-in Kha Siangtho in amaute makaih ahih manin buai-na tuamtuam lakah pawlpi in kipumkhat thei hi.
 
See also  Lesson 9: AKICIAN PENPEN LAHTELNA
Tags: ,

Admin

Admin

Top