Calvary Mualtung aa Topa Zeisu

 

Laisiangtho simtampi ten “hih biakbuuk vaitawh kisai Laisiangtho sungaa kigelhte pen khiatna le kimanna neilo pi hi,amalmal aa ikan na pen mawkna hi” ci’n ngaihsun uh hi. Hih gangawhbiakna te bei khinta hi ci’n tua bang munsan te haallel ( simlo) uh hi. Ahizong in thuman deihtaktak te in “ Laisiangtho pen ei hunnung aa te ading le eite etteh ding aa kiciamteh hi ci’n thupi ngaihsut zaw uh hi. 1 Cor 10:11 Topa Zeisu mahmah in zong “Mosses thukham laibu sung, kamsangte laibu sung le late sungah kigelh thu khempeuh atangtung ding ( Zeisu tawh) ahi hi” ci hi. Luke 24:44. Paul in “Laisiangtho pen Pasian humuapsa hi aa mite phattuamna ding hi ci hi. 2 Tim. 3:16 Hih biakpiakzia aneng atawng aa kankhia mite in Pasian gupkhiatna le Christ ii nasep zia kiciantakin musiang dingaa khamuang takin Pasian tawh kinai thei ding uh hi. Hih in vantung biakbuk sung pan aa gupkhiatna hong kivaihawm zia le siampilian Zeisu in tua sungah bangci bangin nasem hiam cih galmuh theih nading kongvang khat ahihlam hong mukhia ding hi.

Siluang aa biakna hitaleh siluanglo aa biakna hitaleh; tuate khempeuh in Pasian tuuno thuakzia khempeuh le mawhsuut zia khempeuh hong lak hi. Hih mun ah thuthum theihding om hi. (1) Hong kipia pa ii geelna (2) Bangci bang in kipiakhia ding le (3) Hong kipiakhia siampi pa thuakna, hih teng 3 in Zeisu tungbek ah kisuan hi. Topa Zeisu in hong kipiakhia pa ahihna tawh “perfect man” “apicingpa” in nuntak zia honglak hi. Piakkhiat nading in mite tangding paubanglo Ama nuntakna hong piakhia hi. Siampi bang in Pasian mihing khat tangin gualzawhna ngen hi. Khasiangtho in hihthu sinnuam te tungah khuavak hong tan ta hen!.

Biakna ganno te namtuamtuam tawh paai na in Christ ii nunzia tuamtuam te kilangsak hi. Ama pianpih nunzia, ama nasep a zaizia le avangliatzia te honglak hi. Banghanghiam cihleh ei te hong honkhia pa in ii bangkim hi aa mun khempeuh le na khempeuh in amah kisam hi. Tua ahih manin mun khat bek genlel tawh amah kicing theilo hi. Christ thu ih tel nading mun tuamtuam pan ih et kul hi.

 

Christ in hong kipiakhia pa hi. Biakpiakna tawh kisai Pasian in Isreal te tung sepding agen khempeuh amahmah in asepngiat thu te hi. Calvary mualtung singlamteh tungah akipia dingin kuamah in Topa Zeisu zawhthawhthu tawh sawllo hi. John 10:18. Mimawh a sanggam te aitangin pa Pasian maiah kiap hi. Hih nasep hongseptheihna ding vantung Pasian hihna hemkhia in ki hawmtawm sak hi. Mawhmai theihna ding piakding khatzong aneilo mihing te ading a khongin hongkipia hi.

Mawhsut zia te ah mawhpua ganno tungpan in mawhkisik pa dimun kilang hi. Rabbis te in mawhnei pa in mawhpua ganno a that laitak in “aw hihpen ka nuntakna dingaa kipia taktak himawk lo maw” cih kithei hi ci uh hi. G Vander Loeuv in agen na ah “ tua kigo ganno in athatpa nuntakna tangaa si ahí hi.

Eph. 1:7-8 “Christ hongsihna hang in eite in suahtakna ngah in ih mawhna te hong kimaisak hi. Tuazah dong in Pasian hong hehpihna thu bangzah in lian ahihiam?

 

Mawhneipa in mawhna te upnatawh Topa tungah athumkawm in ama tangaa si ding ganno lutungah akhutnga in amawhna te suan (transfer) hi. “Tu in keimawhna te hihganno tungah kisuanta ahihman in kamawhna thaman sihna te amanthuak ding hi” cih upna tawh tuaganno ama khutngiat tawh that hi. Tua mawhnei pa in tuaganno sihna amuhciang in keima sihtang aa si himawk veh ee ci’n asi ding taktak pen keimah hi veng cih kitel hi. Piangthak sia tampi te mawhnei nahihna na kitel hiam? Cih kammal pen hih thu gennuam hi. Tua ganno hong sih takcing in kamawhna te kimaisak takpi ta hi cih upna tawh lungnopna hongngah hi. Pasian thusung ah lungnopna ih cih tua hi. Pasian thupha tampi sang in midangte sang in nopsa zaw ih hihman aa phatna lasa aa diandianna le hih lungnopna pen kilamdang mahmah lai hi. Pasian thupha ihsan theihna pen ih mawhna kimaisak hi cih upna tawh ihtel khitciang hipan zaw hi. Keima sihna ding kimaisakta (ki cancel) ta cih pen upna tawh kimu thei hi. Tanglai aa thuum mi te nunzia tua hi. Tuni tuhun takciang in mawhnei keima sihding pen kicancel khin cih upna tawh ihsan ding ahihi. Singlamteh ma le nung kilamdang na omlo hi. Upna tawh hehpihna kisang tuak hi.

 

Tanglai biakna piakna in tuuno bek hilo natampi kizang thei hi. Mawhbanglo ganhing, vasate kizang hi. Banghang in tuuno bek hilo ganhing dang zong kizangthei hiam cihleh Pasian pen mihing le ganhing piangsak pa hi aa mihing te pen ama sungpan nuntakna tawh kinungta ahihman hi. Leitungbuppi tungaa om mawhna apua ding pa in mawhna neilo tua piangsakpa Zeisu hi.

 

Topa Zeisu leitung ah hong pai lai in asep ding mungtuppi pen in vantungkumpi kiukna ii nget mawhna thaman hangaasihna mawkthuak lel ding cih bek hilo in vantungkiukna thukham ii deihna akicingthumanna tawh picingsak ding a hihi. Laisiangtho sungah; “Tua ahihmanin leitungah Christ hongpai ciang in Pasian kiangah, ganhing le khawhsa tawh biakna na deihkei aa, nangkong biakna ding in pumpi khat nong vaihawmsak hi. Meihalbiakna le mawhmaisakna ding in biakna te tawh nangna lungkim kei hi. Tua ahihman in thukham laibu sungah keima thu akigelh bang teekteek mah in keima hihding nong deih bang tektek mah ahih dingin ka hong pai hi, Pasian aw, ka ci hi, a ci hi” Heb. 10:5-7. Hih pen hingtang biakpiakna lianpen hi.

 

Ei mimawhmi te in Christ nung ii zuihzawh nading in eitang aa si Topa theihlel tawh kicing nailo hi. Nuntak thak ihnuntaktheihna ding tua Topa ih sungah hong nuntak ding kisam hi. Tua hileh bek eite ading siampi hongsepsak theipan ding hi.Vantung biakbuuk in tuabang alunggulh te thaguan ding in kigingsa in om tawntung hi.

 

Zeisu siampilian pen pa nasepzia pen Isreal mite a ding siampilian sem te in limcing uh hi. Mawhna kisuan ganno in anuntakna sisan hong buak khitciang in siampi pa in asiangtho mun Pasian omna ah tua sisan te paipih hi. Pasian tawh thuciamna, Pasian biakna ding in sisan va theh hi. Christ siampilianpa, eite siampi pa in calvary mualtungaa ama sisan tawh vantung biakbuk sung ah lut hi. Tua ahihman in mihingte nisim nuntakna ah Pasian le mihing te kizomsak hi. Kumkhat khat vei mawhsuutna ni or kilemni takciang in asiangtho pen munsung aa hehpihna tokhum mai ah minam buppi ading aa kigo gansi tawi in siampilian pa alut bang mahin leitungbuippi tangding aa kibua Pasiantuuno sisan tawh Zeisu in vantung asiangthopen mun hehpihna tokhum mai ah siampilian sem in om hi. Topa Zeisu in anungzui khempeuh ama angah kawikim hi.Thuum mite Pasian tanu tapa suahtheihna ding in Christ in nuntakna siangtho nungta( ze etna namkim thuak ta leh) in le anuntakna pia khinzo hi. Tua ahihman in gualzawhna lianpen le gualzawhna khempeuh amah kipia hi. Tua hiihmanin mikhat in Topa Zeisu minsuangin Pasian kiangah ki-ap leh Pasian in sang hi.

 

Hih mun ah ngaihsuthuai thu 3 om hi. (1) Christ ii hingtang biakpiakna mihing lampan muhzia (2)Christ ii hingtang biakbiakna Pasian lampan muhzia (3) Christ sungah mihing te hingtang biakna piakzia Pasian lampan muhzia te a hi uh hi. Hih muhzia te ihtelmuh theihna ding in anuai aa siangthosakna thu 3 te ngaihsun ph alai ni.

Siampi laibu 17:11 ah “ Banghang hiam cihleh nuntakna pen si sung ah om hi.Note a ding kilemna bawlna ding in biakna tua tungah tua si ka pia zo hi. Si pen nuntakna ahihman in kilemna a piangsak na ahi hi.” Hebrew BDB 498 sungah “ si pen nuntakna tawh kituamkhawm hi” ci hi.RSV ah si pen nuntakna ding ci hi. Biakpiakna ah sisan pen mawhneilo ganno sisan pen mawhnei pa nuntakna limcing ding in kizang hi. Mawhsawpsiangna ding Topa Zeisu sisan in leitung anuntak lai ahizong sihna pan thokik khit ciang dong azangkhawm ding aa kibua sisan hi.

 

Mihing pumpi sungah sisan in asiangthopen hi aa sahui te sungaa om nuntakna neilo ninthem te sawpsiang in taikhia hi.biakpiakna ah sisan in Pasian abia mite mawhna sawpsiang nading ahihi. 1John 1:7 ah “ Topa Zeisu sisan in mawhna khempeuh sawpsiang hi” ci hi. Siampi laibu sung ah “tua sisan in mihing ading kilemna bawl na ding hi”.

 

Tanglai biakbuuk sung aa kizang gansi peuhmah in Topa Zeisu sisan limcing hi aa kisikna tawh kithuumsa mawhna te kimaisak sa in kiciamteh hi. Hih te pen siangthomun le siangthopen mun kidalna puanpi tung le siangtho mun sungaa meihal biakna tua kiu aa kite tung ah kiciamteh hi. Laisiangtho thak sung aa sisan akigen ciang in Topa Zeisu hog kipiakna vive agen nuam a hihi. Tua ahih manin sisan pen sawpsiangtho nading, diktansak nading, kilem nading, tatkhiat nading, mawhna paikkhiat nading kizang hi. (Siampi 16:19, Rom 5:9, Eph 2:13, 1:17 Heb 10:29, 9:22)

 

Pasian tawh kilemna abawl mawhnei mi te bek Topa Zeisu nuntakna in honkhia thei hi. Rom 5: 10. Topa Zeisu vankah khit ciang in tua sisan pen lenggah tui tawh limki cing sak hi. Nekkhawm nek ciang aa I dawn lenggah zu/ tui in ei te ading aa hong kipia nuntakna, hog kibua sisan limcing hi.

Biakbuuk sungah tuiipen thukham 10 limcing tuikuang sungah kikoih hi. Tui pen pumpi, puan le na dang khempeuh natna siatna omlo sawpsiang nading in kizang hi. Paul in zong pawlpi pen Christ ading in Pasian thutawh tuiah kisawpsiang hi ci hi. Christian nuntakna sung ah tuiphumna le khekisil sakna te pen tuitawh sawpsiang na hi. Act 22:16. Topa Zeisu pen eite nitna hong sawpsiang ding TUINAK a hihi. Zech. 13:1. Sisan le tui te in biakpiakna asiangthosak santhamcing sak hi.

Heb 12:29 ah ei te Pasian pen akantum thei meikuang tawh genteh hi. Mei pen Khasiangtho tawh zong kigenteh zel hi. Mei pen van sia le nitna asingthosak athahat pen khat hi. Christ in amite meitawh siangthosak in nuntakna deihlo te haltum ding hi.

 

Meihal biakna tau tung aa kuang mei pen meimawkmawk hilohi.Hih pen Pasian mahmah in atawhkuang mei hi. Lev. 9:24. Hih mei pen abia mi te biakna asan ciang bek aa apiak meisiangtho hi. 1 Kings 18:38, 1 Chro. 21:26 Paul in; “Ahizong in tua khuam tung ah kham, ngun, suangmanpha, sing, bi, lopa anam tuamtuam kilam thei hi. Tua akilam na te meitawh ki ze-et ding ni hong tungding aa, tua nasepna te abangci hiam ci in mei in ze et ding ahihman in alam mi te nasep ciat hong kilang ding hi. 1 Cor 3:13

 

Pasian pawlpi dawimangpa in do in pawlpi sungah buaina te hong om in khat le khat kipawlkhen na hong om hi. Hih munsan ah khat le khat kua mawhzaw cih kikawk in kibuai hi. Ngun le Kham le bi, lopa te ei mihing ten kikhen theilo hi. Upmawh thutawh thukhen mawk pen lauhuai mahmah aa; Topa’n zong, no khen ding hi kei, keima khen ding hi ci hi. Mi tampi in kei bel ngnun, kham ka hi ci ding hi. Ahizong pawlpi ading bangci nasem ih hiam cih sawtlo in hong kilang ding hi. Pawlpi it dan aman le akhial zong om ding hi. Pawlkhat ten pawlpi it mahmah in pawlpi mi te itlo uh hi. Signboard pen mihing sang in thupi asa zaw hi mawk uh hi. Pawlpi pen kipawlkhopna hoih ahihmanin Pasian pawlpi ki tang tuanlo ding hi. Pasian in pawlpi pen thukhun tawh lamlo in mihing tawh lam aa tua mite ading thukhun khunsak zaw hi. Tua thukhun zahtaklohna zong Pasian zahtaklohna hi zel ahihmanin gamtat luhek zia kidop huaimahmah hi. Pau zong kidop huai hi. Topa Zeisua gupnop man in Peter in tem azat mawk pen Topa’n awilo, hoihsa tuanlo hi.

 

Eden huanmai ah biakna tau tungaa biakna ganno akantum sak mei in Abel biakna zong kantum hi. Pian 4:4, PP 71. Tua mah bang in Abraham le pasian kiciamna biakna tau tung aa sa te tung ah tua meimah in kipsak hi. Gen. 15:9,15. Aaron kiap na zong hih meisiangtho mah tawh Topa’n sang hi. Lev. 9:24. Gideon moh le sa te zong hih meisiangtho mawhtawh sang hi. Thukhen 6:19.tua bangmah in Manoah, David biakna te zong mei tawh sang hi. Thukhen 13:19, 1Khang 21:26. Solommon in biakinn pi hong ap ciang in vantung meikuang mah tawhpasian in nasang hi. 2 Chro. 7:1. Hih pen Laisiangtholui sung ah meikuang tawh kisai a tawpna hi. Khasiangtho hongkum ciang in meikuang lim tawh hong kumsuk hi. Rev. 21 :8 ah migilo teng meikuang in kantum ding ci’n ki gen hi. Ngun le kham te meitawh kisawpsiang thei aa, bi le lopate mei-in kang ding hi.

 

Biakbuuk tawh kisai in meikuang zatzia namnih om hi. Katar kici pen meikhu bang hiaa tua meikhu pen Pasian a ding in namtui cih na hi. Hih pen meihalbiakna tau tung ah kipaai n ate kantum hi. Mincah cih leuleu ciang in an ahiaa tuitawh biakna te kilemna ding aa sathau te kan in agimnan tuisak hi. Paul in Christ pen ate ading in agimnamtui biakna ding in hong kipia hi ci hi. Ep 5:2. Kammal nihna ah Saraph kantum in vutsuak cihna hi. Hih in Pasian thukhenna lim cing hi.

 

Hih atung aa thute gawmkhawm kik leng Sisan , tui le mei te in Topa zeisu nunzia limlang bangin hong kilang sak hi. Meihalbiakna, kilem nading biakna le mawhna hang aa biakna te in mawhpua ganno sih ding ngen hi. Hih te manphatna pen sisan hang ahihi. Tua sisan te biaknatau tungaa kit e tung akitat / akitheh na in minamkim te ading Topa Zeisu sihna hang aa gualzawh na hi. An le dawntheih te tawh biakna ah sisan kihel lo hi. Hi te leuleu ciang in mihing te anlakna limcing hi. Amau te gah, nasepna ii thaman cihna hi. PP. p72. Simpipa in hih sisan omlo biakna te biakna gansa te tungah hong koihna in Topa Zeisu ei ading in aneihsa vangliantna khempeuh suahkhia in kihawm sak na lim honglak hi.

 

Lenggah tui tawh biakna ah tua lenggah tui te meihal biakna tau tungah kibua in namtui mahmah hi. Tua ahihman in sisan tawh biakna le sisan lo tawh biakna in mawhkisik mipa in anuntakna tua biakna tautungah pia in Topa Zeisu thuakna ding te akicingsak ahi uh hi.

Calvary mualtung aa Topa Zeisu paisan tuuno sisan in nang aading bekciang thupi hiam? Leitung vantung buppi te sangin nangmahmah hong itzaw pa hong itna telsiam ciatni.

 

Mangpi(Kentucky)