DM Canright Tangthu Tawm

Dudley Marvin Canright (September 22, 1840 – May 12, 1919) was a pastor in the Seventh-day Adventist Church for 22 years, who later left the church and became one of its severest critics in Zokam, Zopau, Zolai for Zomi Adventist of Worldwide and Tedim area of Chin State, Myanmar.

SDA UPNA A NUSIA D. M. CANRIGHT THU (SDA Tangthu)

“Nangmah in sihna na thuak dongin thumanin om in. Tua hi leh, nuntakna kumpilukhu nang kong pia ding hi.”
Mangmuhna 2:10

1880 kum in George Butler pen James White tangin GC President ding kitel hi. Tua dinmun a lamen khat ahi DM Canright pen a lungkim lo hi. Canright pen tua ma kumin James White om loh ciang meeting chairman ah zong a mapang khin khat ahi hi. Amah pen thugen siam mahmah Texas leh California kiim ah zong Pasian thugen lawhcing mahmah khat ahi hi. Amah teelcing lo hi cih atheih phet in Canright in, “Hih mite adingin thu ka gen nawn kei ding hi” ci in a sanggampa a hilh hi.

Canright pen Professor Hamill ii thugen kisinna sang ah a lut hi. Sangngaupang lai siam mahmah, a class sung ah zong mite etteh pen ahi hi. Professor Hamill in Adventist hilo pawlpidang a thugen ding in tonpih a, midangte in zong thupi sain siam sa mahmah uh hi. Sunday zan khat, West Side, Chicago a biakinn gol pen ah, “Mi Sianghto te gam luah ding” cih thulu tawh Pasian thu gen hi. Mi 3000 val bang kikhawm uh hi. Gen siam mahmah ahih manin mipite khitui zong tampi luang sak hi. A thugen man ciangin a nohset nuam mipi tamlua ahih manin, a lawmpa D.W Reavis nangawn in nai lang sung bang a ngak hi. “Sermon ka ngaih khempeuh ah hoih pen pen hi” ci in mite in nohset ngeingai uh hi. Amah a pakta mipite a ciah khit uh ciangin a lawmta un park khat ah tawlnga in tukhawm uh hi. Canright in a lawmpa kiang ah a thugente lak ah puahphat ding kisam a om leh om loh dong hi. Reavis in , “Na thugen pen zaknop ka salua a, tua dan lam ngaihsutna tawh ka na ngai kha kei hi. Na thugen in ka kha tha hong khauh sak tuam mah mah hi” ci hi.

See also  DEBATE EVOLUTION VS. CREATIONISM IN ADVENTISM

DM Canright
Tua ciangin Canright hong dingkhia in, ” Ei Adventist thupuak, kuama theih loh, a minthanglo pi khat a gengen hi kei leng mi thupi mahmah khat ka hih ding ka lamen hi” a ci hi. Reavis in Canright kampau lamdang salua in kilat liang hi. Canright kiang ah hong dingkhia in, “Lawm Canright aw, hih Adventist thupuak pen tulai taka na hihna na thupina ciang hong tunpih pen ahi hi. Na paisan khak leh tua ma a na dinmunah na tung kik ding hi” ci in a tai hi.

GC President Butler in Canright ii nuntakna ah a deih bangin nate hong om loh ciang a lungkiat baihzia hih bangin gelh hi. “Kiniamkhiatna leh thuakzawhna, midangte ngaihsutna a azahtak siamna cih bang nei ngei lo hi. A deih bangin nate om leh cih a ut luat man in amahmah buai den hi. Thuhilhna sang siam ngei lo a.. Na khatpeuh ah a mazan lai in mi thahat hi mah leh, haksatna a om ciangina lungkia baih, mi thanem mah mah khat a hi hi. Zeisu Khazih galkap hoih tak hi dingin haksatna thuakzawhna lam ah a kisam mi khat a hi hi” na ci hi. Tua zawh ciangin Canright in Pasian nasepna leh Adventist pawlpi nusia ta hi. Nakpi tak a a tangko Adventist thupuak lehdo in nungta in thu Hong gen ta hi.

D.M. CANRIGHT KISIK
D.M Canright, Adventist a khuavak lian mah mah, thuneihna leh minthan nop luatna ki uksak a hih manin , hun khat lai a it mah mah Adventist thu pen hongleh do ta hi. A tung ah thuman lo a nasem aup mite thukkik ding lunggulh den hi.

See also  AWR Tangthu

1889 kum ciangin laimai 420 apha Adventist upna guipite lehdo na “Seventh-Day Adventism Renounced” cih laibu hong bawlkhia hi. Amahmah in Upna kinialna a kinialpih langkhat te upna zangin Adventist te upna nial hong kipan hi. Lungsim gim mah mah kawm sa in a nuntakna hong bei hi. Ellen White leh tua hun lai a pawlpi makaite in pawlpi ah ciahpih kik sawm in nakpi takin zol uh hi.

Tuate lak ah a lawm hoih mahmah a hi D.W Reavis zong kihel hi. Battle Creek khawmpi a mankhit ciangin Publishign house sung ah thu kikup pih hi. Canright zong hong kap khia hi. Reavis in, “Na kisikna thu te i nasep pih sanggamte kiang ah hilh in. Amaute in hong maisak in hih nasepna ah hong semsak kik ding uh hi” ci in tha a pia hi. Ahih hangin Canright in a lawmpa liangko lenin a kah kawm in, “Kileh kik thei hi leng ka lungdam mahmah ding hi, ahih hangin hi thei nawn lo hi. Ziakai lua ta hi. Tawntung a mangthang ding pa ka hi hi, ka lawm Reavis aw, bangbang na sem zongin hih Adventist thutak pen na lehdo ngei kei in” a ci hi.
A pianpih sanggampa mahmah in zong , “Dudley Canright aw, Hih thutak sung ah kei leh ka innkuan pihte nangmah mah in nong lutpih hi a, tu in hong paisan kik ding na hiam? Na gamtat banga gamta in Pawlpi’ nusia dingin nong deih hiam?” ci in a dot ciangin, “Deih dek lo hi ingh. Tua bangin na om un. Pawlpi na paisan uh leh keimah bangin na kisia khin mang ding uh hi” a ci hi.

See also  Problem of Jesus 18 years

The Adventist Review Editor sawtpi a sem khin Elder F.M Wilcox in zong tuma lam thute genpih a, “Canright aw, New York pawlpi neu khat ka khan khiatna pawlpi pen nangma phuh khiat sa hi. Tu in ahih leh kei pen Adventist Pawlpi pan Pasian nasem khat ka hi hi. Tu a na gamtat bangin gamta mai ding ka hiam?” ci in a dong hi. Canright in tawmvei sung a ngaihsut khit ciangin, “Tu laitak a na thu tangkote na um takpi hiam?” ci in dong kik hi. “Ka lungsim khempeuh tawh ka um hi” ci in Wilcox in dawngkik hi. Tua khit ciangin, “Na nasep pihte tawh haksatna na nei hiam?” ci in dong kik a, “Nei kei ingh, amaute tawh na sepkhop nuam ka sa mahmah hi” ci in a dawn kik ciangin, “Tua ahih leh ngaihsut kong piak in.. tulaitaka na omna ngei pawlpi ah om suak in cih thu ahi hi” ci in a dawng hi.

Kum 31 sung a seppihte leh a lawmte in Canright pen pawlpi ah ciahpih kik sawm uh hi. Ahih hangin amah in hi sa thei nawn lo hi. Khuavaak lian leh etlawm pen khat a hi ngei khat pen khuazing sung ah lamet bei in a mangthang a hi hi. Hih bang thu eite tungah hong tun lohna dingin thungen ciat ni.
Source: Faith Triumphant Daily Devotion. August 3, 4.


A sim mimal kim Topa in Pawlpi’ Tung leh Pasian’ Tung sih dong a citak dingin Thupha Hong pia ta hen.
Amen.

Tags: ,

Admin

Admin

Top