Ellen G White Thu

ELLEN G. WHITE THU

By: Pr. Kham Khen Pau

Thu Patna: Seventh-day Adventist Believe 27 bu sungah Ellen G. White’ laigelhte Lai Siangtho tangg aa zat ding hi lo hi. A kizakimin zong seh ding hi lo hi. Lai Siangtho pen, a tuam vilvel Pasian kammal, Kha Siangtho humop (II Tim. 3:16) ahih manin, Ellen G. White’ leh a laigelhte sittel nadingin akhial thei lo, Pasian’ pilna kiciaptehna Laibu ahi hi. (Seventh-day Adventist Believe 27, Ministerial Association, General Conference of Seventh-day Adventist, Washington D.C, 1988, P 227).

Unau peengte’ suahna: America saklam nisuahna, Gorhams akicihna munah, a penpih Elizabeth tawh 1827 kum November 26 nii-in, piangkhawm uh hi. Amin pen, Ellen Gould Harmon hi-in, pasal a neih a kipan ‘Harmon’ munah a pasal’ behmin ‘White’ kizang ahih manin, Ellen G. White kicisuak ta hi.

Sangkahna leh liamna: Kum (9) aphak, 1836 kumin, a sangkahna ah, atan kibatpihte khat in, suang tawh deeng ahih manin, nipi kaal thuum bang khua phawk lo hi. Kikhoi-in, si dekdek napi-in, Topa’n zang nuam ahih manin, nungtasakkik hi. (Tan nih zo, atan thuum kumin, si dektak aa, liamna a ngahna pen, a nasep ding teng Dawi mangpa’n mukholin, a thah sawmna pan, Pasian in honkhia hi).

Pianthakna leh tui kiphumna: 1840 kumin, piangthakin, 1842 June 26 ni-in, Portland gaam Cosca Bay ah, a pawlpi Methodist Pastor khat in, tui sungah phuum hi. Methodist pawlpi ah tui a kiphuumin, kum (15) pha hi. Tua manin amah pen, Sunday taang pawlpi pan aa, khaangkhia ahi hi. Ellen G. White pen, anu nupi hoih mahmah khat ahi hi.

Mangmuhna tawh Pasian in thusiim lak: 1844 kum October 22 ni-in, Topa Jesu hong kum loh manin, alawm teeng tawh Lai Siangtho simin, thungenin, omden uh hi. 1844 kum December kha zingsaang khat, numei dang (4) tawh South Portland ah thu-updan kibatpihte’ innah, thu ngenngenin a om Laitakuun, nungakno kum (17) apha, Ellen G. White’ mit ah, vantunggaam niamsuk duaiduai bangin, kilak hi. Tua Laitakin, Pasian’ vangliatna in, nungakno pum tuamin, leitungbup mangngilh sak hi. Leitung pualam musak hi. Jesu hong paii ciang aa mi siangthote’ omdan ding leh a letsong sanzia ding uh, mu hi. (Early Writings Pp 13-20).

South Portland, Maine aa, thuuppihte lakah hong genpah keii sam zen leh pawlkhatte in, Pasian’ khuavak cihpihpah uh hi. Thu cilgil, helseden lungkhauh piangthak lote in, na zahko gawpgawp uh hi. (Gam. 24:4, 16; Rev 21:2) sunga mangmuhnate leh nungakno’ mangmuhna a lakpa in, Jehovah Pasian ahi hi.

See also  Biography of N. C. Wilson

Pasal neihna leh tate neihna: Kumkikna lamen, kum (23) apha, Sia James White tangval siangtho sinsen leh Ellen G. White, kum (19) aphak, kum 1846 August in, siangtho kitenna nei uh hi. 1847 kum August 26 ni-in, ta upa pen pasal Henry nei uh hi. Anihna a tapa uh Edson, athuumna a tapa uh William, a tumpen a tapa uh, Herbert nei uh hi. Leitung pen, sihnagam ahih mahbangin, 1860 kumin, kha (3) apha, a tatumpen uh, Herbert in, a ute leh anu le apa nusia in sihsan hi. 1863 kum ciangin, ata upen kum (16) tangval nota kimlai-in, anau tegel leh anu apa nusia in, sihsan leuleu hi. Mihing innkuan khuasakna ahih manin, Ellen G. White in, nasa mahmahin, ki tapkhapnapi, thuak keii Lai mawk hi.

Sabbath thumann saanna: 1846 kum November kha in, Joseph Bates’ gelh, “The Seventhday Sabbath,” kici Laibu, Laimai (46) apha, hong simna tungtawnun, a nupa un, Sabbath thumann hong saang theilek mawk uh hi. (Lai Siangtho in, leitung pan vantung dongah Pasian Sabbath kizang suak ding hi, ci hi. (Isa. 66:22, 23; Mt. 24:20). Jesu hong kumkik ding a dawn, a lamen nupate in, tua hun aa kipan, Sunday sungah Pasian’ Kha Siangtho om lo hi, cih hong hilh ta uh hi.

Mangmuhna tawh Sabbath kilak: Tua zawh kha (6), 1847 kum April kha ni (3) ni-in, Pasian in vantung biakinnpi veemvaam sung, mangmuhna tawh Ellen G. White lak hi. (Rev. 11:19) Thukham (10) lakah nambat linaa, Sabbath vaangtaang in a tuam zong mu hi. (Early Writings Pp. 32-35). Tua hun Laitak, zawng mahmah uh ahih manun, a pasal in, a hun hawmbawl thiamthiamin, Pasian’ thugen hun, gampalak ah sum thalawh hun, meilenglam bawlna ah, suum thalawh hun, lopaa atna-ah suum thalawh hun, cih bangin nungta likliak uh hi. (Tuhun aa Pasian nasem annek ding zong neilote in, etteh huai mahmah hi. Amaute upna le biakna in, a kiam theilo a hauhna laigil uh ahi hi. I Tim. 6:6; James 2:5; I Pet. 1:5-9).

See also  DM Canright Tangthu Tawm

Mangmuhnate, Laibu aa bawlna: 1849 kumin, connecticut gaam Rocky Hall ah, mai (8) apha, “The Present Truth,” cih Lai hawmkhiatna kipan uh hi.

1851 kumin, Laibu masa penpen, mai 64 apha, “A Sketch of the Christian Experience and Views of Ellen G. White” cih Laibu hawmkhia uh hi. A behlapna (supplement) tawh kigawm, mai (127) apha, “Early Writings” a bu in kinei hi.

1855 kumin, Battle Creek aa nasepna pan Pasian in, pawlpi kalsuanzia ding thu, honkhat lak hi. Mai (16) apha, Testimony for the Church pen, kum (55) cin kum, 1910 teh, mai 55000 hong cingin, abu in bu (9) hong dim hi. 1850 kum aa Ellen G. White’ Diary bu ah tua kum sung, veng leh paam tawh kimuhkhawm hun, khat veivei review zum sungah aki deihkin Laibute khui hun in, a zatnate kigelh hi.

1858 March Sunday ni khatin, Ohia gaam Lovett’s Grove ah The Great Controversy, mangmuhna, Pasian in pia hi. Early Writings, Pp 133-295.

1865 kum December 25 Christmas nii-a, mangmuhna panin, Laimai 489 apha, Testimonies for the Church, Vol (1) na hong piangkhia hi.

1866 kumin, cidamna Thu hilh nang, zato neih ding kikupnapi khat neihpihin, September kha teh, “Western Health Reform Institute” neih ding kikipsak hi.

1868 kumin, kumsiim kikhopnapi neih ding, phuankhia hi.

1874 kum ciangin, gamdang aa sangmaang puakkhiat kipanta hi.

Pawlpi min kipiakna: Pawlpi min dingin, 1860 kum October kha ni (1) ni-in, Seventhday Adventist dingin kipsak uh hi. 1861 kumin, Michigan Conference kiphuan hi. 1863 kum May kha in, General Conference of Seventh-day Adventist kiphuan hi.

Sabbath sun hunpi zang: 1867 July 20, Sabbath sun hunpi Michigan a, Bushnell khua ah, Ellen G. White in zang hi.

1891 kum March kha in, General Conference ki khoppi, mi 4000 val mai, Sabbath sun hunpi ah, Ellen G. White in, nai khat sung hun zang hi.

Ellen G. White’ hun nunung: Kum (81) aphak, 1909 kumin, Washington-a General Conference kikhoppi siim dingin zin hi. Awging selsel in thu gen hi. Tua banah, kum (6) a nuntak sungin, a laigelh dingte zo siangta hi. “Ka nuntakna abeii zongin, ka lai gelhte in, hun bei dongin, mainawt ding hi,” ci hi. 1915 Kum February 13, Sabbath zingsang in, Elmshaven a Laisimna inndei sung, a lut leh kipalkha in tuuk hi. Tho zo nawnloin, liamgawp hi. A veilam khelguh kitan nahi hi. Pasian’ a ding, kum (70) na semin, ama’ nuntak kum (87) acin, kum 1915 July 16 Friday nii pen, leitung a nuntak tawpkhakna hita hi. Michigan gam, Battle Creek khua, Oak Hill haan, a pasal’ gei-ah, thawhkikna masa ngakin, ihmu hi. (II Tim. 1:12; I Pet. 1:4-9; I Cor. 1:7, 8). (Leitung a piangkhia numei khempeuh lakah Pasian’ thu, lai-in tam gelhpen ding hi.)

See also  Biography of G.I. Butler

Theih ding: Ellen G. White tunga kilak mangmuhnate, William Foy le Hazen Foss te’ tungah Pasian in, lak masa hi. Amau’ genkhia lo ahih manin Ellen G. White tungah kilak hi.

Thu khupna: A mangmuhna laibu, bu 100 val pha-in, Laimai kician mahmah in, mai tulza (100,000) vaal pha hi. Nampite pau in, nam sawmlii leh guk (46) in kiletkhia aa, bu awn tampi kilet khinta hi. America gaam ah, kum (60) leh gaamdangah kum (10), a kigawm in, kum (70) Pasian’ na a sep hun sungin (2,000) vei val bang, mangmuhna Pasian in pia hi. A mangmuh sung pen, hun khat teh, minute lang (30 seconds) pan, nai (4) sung ahih hun zong om hi. Seventh-day Adventist te in, kumsimin kampau nam (200) val tawh US$ 20,000,000 val man ding, Laibute bawl den uh hi. Amen!

II Chro. 20:20 “Topa naPasian uh um un, tua hi leh note nakip ding uh hi. Ama’ kamsangte um un, tua hi leh namavang ding uh hi.”

Ref: Pr Kham Khen Pau, “Ellen G White Thu,” in Malaysia Zomi SDA Kum 3 Cin Leather Jubilee Magazine, chief editor, Pr. Dr. Cin Sian Pau, 2012, pp. 15-18.

NB: Laimal gawm pen magazine bu sunga dan lian in kizang lo-in, a tel nop zaw ding leh Zomi a tamzaw zat ZCL standard in kipuahpha hi. (Admin)

Tags: , ,

Admin

Admin

Top