GC 15: French Tualgal le Lai Siangtho

Great Controversy 15: French Tualgal le Lai Siangtho by Ellen G White


EUROPE gamte khempeuhah mite-in Laisiangtho akipom nadingin kum zalom 16 lai-a Puahphatna-in na kun kawikawi hi. Gam pawlkhatte-in vantung kamtai hi ci-in lungdam takin na saang uh hi. Gam pawlkhatte papacy vangliatna-in nadal ahih manin, Laisiangtho khuavaak leh a thuphate nilkhia khin dektak uh hi. Gam khatah khuavaak alut hangin khuamialin na deihlo ahih manin a saang kei uh hi.  Kum zalom tampi sungmah thumaan leh thukhial a tungnungzaw ding kituh in buai niloh uh hi.  A tawpna-ah thusia in zoa, vantung thumaan ki paaikhia hi.  “Hih thu pen leitungah khuavaak hong tunga, mite-in khuavaak sangin khuamial a deih zaw hi,” a cih mawhsakna a tangtunna ahi hi.  Johan 3:19.  Tua vantung Hehpihna thupha a neuseh minamte kiang panin Pasian thupha kiheemkhia ahih manin, gitlohnathusia a khan’cin dongin ki koihkhong ta hi.  

Leitung buppi in tua khuavaak nialna thaman a gahte amu toto uh hi.Laisiangtho deihlo-a, gal-a dona hun France gamah kum zatampi sung asawt hi. A tawpna-ah tualgal a pian’lawh hi. Romete-in Laisiangtho a sukkhiatna uh hanga tua buaina hong kipan ahi hi. Pope thuneihna leh ngimna tawh akisem khempeuh lakah leitung buppi muh dingin a nasia pen zong ahi hi. Kumtulval sung Rome pawlpite thuhilhna in angimsan uh a ki lahkhiatna zong ahi hi.

Pope tungnun’pen hunsunga Laisiangtho suhkhia-a a humcipna-uh kamsang mangmupa-in na genkhol khin zo hi. Akisel Mawhna mipa nasepna hanga piang ding a cih pen France-in athuakpha deuh hong suak hi. (266) Topa vantungmi-in, “Amau in khuapi siangtho zong kha 42 sikgawp ding uh hi. Ka teci nihte zong thu ka pia dinga, amaute in khautang puan silh in ni 1260 dongin kamsangte bangin thu a hilh ding uh hi….Amaute in a teci pan’na a zawh khit uh ciangin kuam thukpi sungpan hong kahto sahang in amaute do-in zo-in a that ding hi. Amau luang te zong aTopa uh a singlamteh tung ah asihna khuapi ahi, khaa lam thu-in Sodom leh Iziptcih khiatna nei khuapi sungah a om lampi tungah a om uh a, … Leitunga om mite in zong tua kamsang nihte in a bawlsia ngei ahih manin, tua a luange hangin lungdamin khat leh khat nuamna nate a ki pia ding uh hi. Ni thum leh a lang khit a cin khit ciangin tua mite sungah Pasian kiang pan a nungta sak Kha lutin amaute in a thawh uh, adin’ uh ciangin a en mite khempeuh a lau mah mah ding uh hi.” – Revelation 11:2-11.
Hi a hun a genna ah kha 42 leh ni 1260 pen a hun a kibang ahi hi. Khrist pawlpi-in Romete’ bawlsiatna athuak ding hunteng ahi hi. Kum 1260 sung pope tungnun’vangliat pen hun hia, AD 538 pan ki pan in 1798 kum-in a bei ding ahi hi. Tua khit-in France galkapte Rome-ah lut uha, pope man-in thongah akhia uha, pope thong sung ah asi hi. A sawtloin pope dangkhat aki teelkik hangin aneih ngei-uh kumpi thuneihna a neikik nawn kei hi.
Pasian -in A mite hehpih a, athuak siatluatna uh tomsak ahih manin bawlsiatna pen kum 1260 sung a bit in ki zomsuak samlo hi.. Pawlpi’ thuak ding tua “gimna lianpi” Honpa in a gen kholhna ah, “Tua nite akitom sak kei leh kuamah suakta zo lo ding hi. (267) Ahih hangin a teelsa adingin a ki tom sak ding hi” ci hi. Matt. 24:22. Puahphatna thu hangin 1798 ma-in bawlsiatna pen vengta hi.
Teci nihte tawh kisai-in kamsangpa gen zomna-ah, “Tua mite in Topa mai-ah a om oliv kung nih, meivak koihna nih a hi uh hi.” (Rev. 11:4). Laphuakpa in, “Na thu in kei, lam hong lak ding meivak hi a, ka paina lampi-ah khuavak ahi hi.” (Ps 119: 105) ci hi. Teci nihte pen Laisiangtho a Lui leh a Thak bu nihte a genna lim ahi hi. A nih mah un tawntung Pasian thukham thupina teci leh tatkhiatna ding geelna thu ah teci pang tuaktuak uh ahi hi. Laisiangtho Lui-a gangawh kithoihna limte-in Honpa hong om zia ding a kawk khol ahi hi. Laisiangtho Thak sunga Lungdamnathu leh Laikhakte-in Laisiangtholui sunga hong pai ding kamciam ahi Honpa pen Jesu a hihna leh hilhkhol limteng in amah kawk in ataktak pen hong tung ta ahihna a gen leuleu hi.
“Khautang puan silhin ni 1260 dongin kamsang bangin thu ahilh ding uh hi.” Papal vangliatna in thumaan kammalte selcipin, zuau-thei tecite zangin lang pan’sak ahih manin, hihhunin Pasian’ teci nih te ahi, Laisiangtho pen a maimialmah mah hi. Biakna lam leh leitung lam uliante-in Laisiangtho mawhsakin a hilo lamlam heisak in mihing leh dawi kikopin mite lungsim Laisiangtho thuman pan a heikhiat theih zah un hei uh hi. Tua thumaan a gen ngamkhat om lehheekin sabet-in beng uh hi. Gawtbawl in khuamial thong inn sungah khum uha, upna hangin a that uh hi. Amaute in mual le guam lak kawhawm sung khawng beelin a buk-sim laitak nangawn un thumaan teci a pangg te thang-ippi silh in kamsang bangin thugen hi. Tua manin hih kum 1260 sung pen tua banga teci a pan’ uh kul hi. Tua khua mial mahmah hun nangawn in zong Pasian kammal thumaan a deih, tha nuam hanciama azong mi om veve sam hi. Tua hun sung teng mah in thumaan a dawksak theih nadingun amaute tungah vangliatna, pilna, leh thuneihna a kisam bang a kipia hi. “Mi khat peuh mah in amaute tungah gimna abawl nop leh, amaute kamsung uh pan mei pusuakin a galte a kangtum thei hi. Mi khat peuh in tua bang gimna aabawl nop leh, tua bangin thahna athuak ding hi” Rev. 11:5 (268). Mihing in Pasian kammal nuainetin nin sak theilo hi. Mangmuhna a thu khupna-ah tua bang ahihte ading luahuaina a gen hi. “Hih laibu sunga hilhkholhna thu te a za mi khempeuh kiangah teci ka pan’na in, kuami kua mi hi ta leh, hih laite behlap in aguan leh, hih laibu sungah a kigelh gimnate tua mi tungah Pasian in akoih thuah ding hi. …a paih khiat leh zong laibu sungah a kigelh nuntakna kung leh Khuapi Siangtho pan tua mi ngah ding khempeuh Pasian in a lakkhiatsak ding hi.” Rev. 22:18,19.
Pasian lahkhiat thute leh a sawl thute mite-in a kheksak loh nadingin ki kep nadingin tua bangin thu apia hi. Tua thupiak mawhsakna pen Pasian thukham zaang khaai ngaihsut dinga mite a makaih khempeuh tungah zong atu hi. Pasian thukham i zui-a i zui kei zongin thupilo hi, a ci mi peuh mah tungah hih a lauhuai thu atung ding ahi hi. Pasian hilhna sanga ama lungsim puak a thupisakzawte, a deih banga Laisiangtho khiatna a kaaite, leh leitung lam a ngate-in tua a gamtatnate uh hangin thaman thuak ding uha, tua in amau zontawn thaman ahi hi. A ki gelh thu ahi Pasian kammal leh a thukham in mi khempeuh gamtatna sittelin tawikhai dinga, alek zolo leh acinglo peuh mah anolh ding hi.
“Amaute in teci panna azawh khit uh ciangin,”cih tawh kisai in, thangip-pi puan silh teci nihte in a teci pan’ ding hun uh pen 1798 kum in beita hi. A simtham-a a sepna uh a zawhkuan-uh ciangin “kuam thukpi sungpan hong kahto sahangin” amaute gal-in hong sim ding a hi hi. Satan in papalte zanghin, Europe gam tampi-ah leitung ukna leh pawlpi-ukna ana a len kop hi. Tu-in Satan vangliatna thak tua bangin hong ki lang hi. (269) Laisiangtho a zahtaak luazaw-in ki gen uha, kuama sim theihloh ding kam tawh koih in, mipite kiang pan aki gamla theithei-a selcip ding pen Romete ngiimna policy bulpi ahi hi. Tua bang hun sungin tecite in “thangip-pi puan silh in” kamsang bang in thu ahilh uh hi. A hi zongin kuam thukpi sungpan pan hong pusuak a vanglian sapi khat in Pasian thu Laisiangtho pen gal in do ding hi ci hi.
“A khuapi” kongzingah teci-te kithatin a luang uh a kisialna mun pen “khalam Izipt” a kici hi. Laisiangtho tangthu sunga minam a gente khempeuh lakah Izipt kumpi sangin vantung’ thuneihna a nialngam zaw kumpi dang omngeilo hi. Mosesin Topa min tawh thu hong gen ciangin Pharaoh in, “Ama aw ngai in Israel ka paisak ding in Topa in kua ahi hiam? Topa ka thei kei hi, tua thamlo-in Israelte ka pai sak kei ding hi,” ci hi. Paikhiatna 5:2. Tua in a nungta Pasian niala, up lohna leh demna lungtang a dawk sak Egypt banga hong pau lawki minam khat peuhte lim cing ahi hi. Tua “khuapi” pen “khaa lam thu ah” Sodom tawh zong gen teh hi. Sodom khua in Pasian thukham palsat-a a nitna uh pen khuavalna a hi hi. Hih Laisiangtho sunga mawhna bawl gam a gen pen in zong hih thuah paangtat penpen ding uh cihna zong ahi hi.
Kamsangpa kammal mah bangin 1798 ma deuh-in Satan phuatkhiat, Laisiangtho bu gal-a a bawlna gamtatsia hong laang takpi hi. Tua gamah Pasian teci nihte daaicip leh Pharoah Lawki ngeina leh Sodomte paangtatna hong khang kik ding ahi hi.
Tua hilhkholhna bang lianin France gamah atung hi. 1793 kum tualgal lai-in, “Europe gam mipil misiam, mi nam thupi pen khat a ukte in ki khoppi khat bawl uh hi. Mite pomsa thumaan upna leh Pasian biakna nialhuan nading thukimna khat, leitungin a zak cilna dingin, ong nei uh hi.” (270) Sir Walter Scott “ Life of Napoleon Buonaparte,” Vol, 1, ch. 17 (ed. 1854). Van leh lei bup aneipa’thu nialin, do nadingin a khut a zanghngam gamkhat aki ciamteh gam pen France gam ahi hi. England, Germany, Spain cihte leh munkhempeuh ah Pasian gensia ngei leh Lawki upna pom gam tampi mah om ciat uh hi. A hih hangin France pen leitung tangthu-ah a ki langkhia vilvela Pasian omlo cihna gamthukhun bawl nading ki khoppina nei a tua banga pulaak khia gam France bek a om hi. A khuapi sung mitam penpenna mun citengah numei-pasal lungdam in Pasian omlo cih thu la-in sa in a laam uh hi.
France gam in Sodomte omzia teng a zilkik pha mahmah hi. Tua tualgal hun sungin zulhtatna, leh kihhuai gamtatnate pen Sodom khuapi kisiat lawh gamtatna ciang mah a tung hi. Tangthu gelhte ciaptehna-ah, hilhkholhna sunga kigen bang lian mah in Francete huukna lanna leh Pasian aneih lohzia uh a nasiat gen mahmah uh hi. “Tua thu in biakna nakpi in a susia hi. A siangtho kiteenna kiam suk a, nupa leh kipi kiteenna vai ah gam ukte vaihawm sak hong suak-in, ut hun in kitengin ut hun mah in kikhenthei dongin ong zulhtat ta uh hi. Dawite-in innkuan sung nuntak zahtaak kaaina, a nopciitna, leh a muanhuaina om zaangzah suksiat a sawmna uh ah, a kipuahkik thei nawnlo ding leh asuuksia pen kheltatna ahi kipi kiteen na a siatsakna uh kaan a suuksiazaw adang om thei nawnlo ding hi….Kam khelkhel zangh thei-a min thang, pawi-lah-siam nu Sophie Arnoult in kumpite thu-a ki teen’ sakna pen “zualzan-anlim neekkhawm pawi hi’ ci hi. – Scott, Vol. 1, ch. 17.
(271) “A Topa uh singlamteh tunga asihna khuapi ahi” Hih hilhkholhna kammal pen France mah ah a taang tung hi. Hih gam sangin Khrist alangdozaw gamdang omlo hi. Hih gam zah-a gilo leh kheltat, thumaan langdo gamdang omlo hi. Lungdamanathu a um mite a bawlsia in, Khrist’ nungzuite tunga a tatsiatna-uh tawh France-in singlamteh ah Topa a khailum uh a suak hi.
Kumza khit kumza akizom in, mi siangthote sisan ki luangsak den keei hi. Waldenseste-in “Pasian thumaan ading leh Khrist Jesu tecipan’na adingin” Piedmont mual dungte-ah a nuntakna-uh a paih laitak un France gamah a sanggamte uh ahi Albigenseste in tua bang bawlsiatna mah natuak uh hi. Puahphatna a laan’lai-in tua thu-umte a lipkhap huai gawtbawlna tawh that den uh hi. Kumpite, Ukpite, Tonu a hite, leh a kisathei a gal-haang miliante in a ki that Jesu mite’ gentheihna teng muhnop et-in en uh hi. Gaal-haang Huguenotte in a siangtho bel leh athupi bel thuman ading gaalnanna in asisan uh na bua uh hi. Protestantte pen gam mi a kismlo bangin seh uh a, athatzo pepeuh tua zah pia ding cih sehna khat nei uha, amaute’ lutang la nuam-in gamsa bet bangin a beng uh hi.
“Sehnel gamkeu sunga pawlpi” a kici 1800 huam-a France gamsunga om athamlai nidang Khristian suan le khakte-in khanglam gam muallak ah bu in a pate upna baan zom thei uh hi. Zankim laitakin mual pang munsia lakte ah gaal-haangte hong pai-in tuate kaai mang ving veng uh a, a khantawn un innsung sila-in a khawi uh hi. A siangthopen, a na vaakpen, France gam mipilpente sikkhau khih in a lipkhap huai gawt bawlna tawh mi suamte leh gutate mah bangin a bawl uh hi. A dopbawl zaw diakte uh kaptuuk zel uh hi. Gaalhiam neilo, cih nading thei loin khuk din’in thungen lel uh hi.
Khanghaam puteek piteek, belh ding neilo nupite leh mawhneilo naupang tampi a ki khopna munte uhah a sisa-in ki nusia hi. Mualsang tung khawng, a kikhop ngeina mun uh gam mang tulak (272)lak khawngah vaak le’ng, kalli suan sim-in, muhngam huailo zah in “lopa tung khawngah misi luang ki phahpheei zelzul a, singkung tung khawngah misiluang ki khai geei-gaai kawi-kawi hi.” – Wylie, b. 22, ch. 7. Namsau, hei, leh meiselte’ suksiatna hangin a gambup un “khuamial gam simtham a suak hi.” “Hih gitloh gamtatnate pen in Khuamial Hun (Dark Ages) sungate hilo in khuavaak hun akici Louis a 14na pa khang khawnga gamtatnate ahi hi. Nate thei in pilna khangtota a, lai kisiamta hi. Zum lam leh khuapi lam naseemte zong laithei thugen siamte vi-ve uh hina pi lungduaina migiitna thuphate a khansangsik in aki sumit zaw hi.– Ibid.
Tua kum zalom huam sunga tatsiatna zosiah-a a sia huai penpen le dipkuathuai pen St. Bartholomew-a Mihon Suamlupna ahi hi. Leitungin a cikziathuai kithahna a seh kikkik uh ciangin tua thu phawk pen in ki nei zel hi. Rome siampite leh thukhen phungzite ngetna zui-in France kumpipa thupiakna tawh ki seem ahi hi. Zankim ihsip laitakin misuam nading daak ong ging hi. Protestantte a innciat uh ah kumpihulum beelin lung muang tak a ihmu hithiat kimlai, theih kholhloh in ki kaaikhia hi. Paulap bang mah omlopi-in ki ban thah ngelh ngelh hi.
Izipt gama saltang Amite mitmuhloh in Khrist in a makaih bang mah in, tua mihon suamlupna sungah Satan in aki mulo in amite a makaih hi. Khuapi bek ah tawp lo-in, Kumpi thupiakna tawh Protestantte omna gamsung khua khempeuh ah zong kithat ziazua kawikawi hi. Numei pasal, piteek puteek, naupang meelmawl, zahtaak leh siit cih neiloin that uh hi. Milian mineu, a moi ahaam, nupi leh nungak, a vekpi-in a ki bangin that uh hi. Misuamte in France gambuppi ah khanih sung si khop in mi a go uh hi. A gambup ading paakpalh lih-leh abang amanpha mihoih 70,000 bang that uh hi.
“Tua misuamnathu Romein a zaak ciangin thuzui naseem (clergy)te gen zawhloh in nuam in nopsa uh hi. Lorraine-a Cardinalpa-in tua thuko mipa pen pahtawina lukhu tul khat a pia hi. St. Angelo ah tua lungdamnathu muakna in thaupi (Mee pi) lawn uh hi. Mun khempeuh pan in lungdamna biakinn daakte kisaat a, zan-in meiphualpite sep-in sun zah phial mahin vaak sakzo uh hi. A Cardinalte leh thuhilh maangliante in Gregory a 13napa kiim uum-in Lorraine ah Cardinalpa omna St. Louise Biakinn ah siangthopumpi tawh lam pai khopna (prosession) nei-in “Nang Pasian kong phat uh hi (Te Deum) cih zingsang thu ngetna ava neihpih uh hi. Thamlo in, Misuamnapi phawk dennadingin minphatna Medal khat ki seek hi. Tua tungah galkap mang lianpi penpa a dona lim, Kumpipa in tua misuam nading a vaihawm lai-a Councilte tawh a ki kupna lim, leh mi kithat ziazuate lim kisuai, Vatican zum sungah zong Vasari lim kizeem thum tak a koih uh hi. Gregory in Kham tawk kibawl Lingpaak khat Charles a khak hi. Misuampi khit khali ciangin Misuampi ni thu French phungzipa khat genna lungkim takin ngai a, a, “asiangtho bel pa in tua thu a zak ciangin Pasian tung leh St. Louis tung ah lungdam ko dingin a pai ni pen a lungdam huai kipah na tawh kidim ni ahi hi’ a ci hi. –  White, Henry, “The Massacre of St. Bartholomeu,” ch. 14, par. 34 (ed. 1871).
St. Bartholomeu Misuampina a hansuah khaa mah in Frence Tualgal a pian nading mah in a vaihawm hi. Jesu Khrist pen akineih tawmpa hi, ci uh a, Pasian deih lo French mite in “Tua mi sualpa meekzaan un” ci uh hi. Vantung simmawhna leh kihhuai gitlohna tawh kheltat a khan sia pen pen, leh gamtatsia-a mi’ gimneih pente peuh pahtawi pente suak sak uh a, a thumaan, a siangtho, a duhhop a huaihamlo Khrist a khailum zaw uh hi. Hih bang teng tawh Satan tunga tokaai a suak uh hi.
Kuam thukpi sung pan hong pusuak sahang in amaute gal-in do dinga, zogawp in amaute that ding hi. “Tualgal leh Ukna Gilo in a uk hun lai-a Pasian neilo France vangliatna in Pasian leh A thu siangtho a lang bawlna zah-in ahuaisia dang leitungah om ngei lo hi. Gambup kikhoppi thukimna tawh Pasian biakna beimang sak uh hi. A huatna uh lahna in Laisiangtho bute kaai khawm-in mipi mai ah a haal tum uh hi. Pasian thukham te zong lei ah sik cip uh hi. Laisiangtho thusinna mun khempeuh susia uh hi. Nipikal tawl (274)ngak nite zong kheel in ni sawm sial-in tawlnga-in gualnop bawlna leh Pasian neu bawlna lim a lak uh hi. Tuiphumna leh neekkhawm bawlnate khaam uh hi. Misi vuina haante ah lai suang uh a, a tawntung in ihmu cip ding hi, cih sak uh hi.
Pasian kihtakna in haina kipatna hi, cih sak uh hi. Gam zahtakna leh suahtakna longal biakna peuh mah khaam uh hi. “Mi gensia leh thusia gen ding tang hial-in Paris-a bishop pa pen kumpi ngeina tawh kiteel minam bup palai bangin koih tawm uh hi. Mi hon ki zui-a paina khat ah amah pai pih uh a, kum hi-tan ta a hilhsa thute leh siampi sepna khempeuh in, thumaan pan hi ta leh tangthute pan hi ta leh, gui le zop pih nei hilo hi ci a Kikhoppi mai-a pulaak sak uh hi. A biak Pasian omlo hi acih nadingin ki ciamna bawlsak uha, mailam ah gambup suahtakna leh liangko kikimna, nuntakhoih lungsim maan neih nading ah ki aap sak uh hi. A nasepna leh siampi kizepna teng sabuai tungah a ngaksuk ciangin Presidentpa in sanggam it banga itna tawh amah a ngawngkawi hi. A lampial phungzi tampite in hih phungzipa nungzui-in ama bawl bangin a bawl ciat uh hi.” – Scot. Vol. 1, ch. 17.
“Leitunga a om mite in zong tua kamsang nihte in a bawlsia ngei ahih manin, tua aluangte hangin lungdam in khat leh khat nuamna nate akipia ding uh hi.” Pasian neilo France in Pasian teci nihte’mawhkawk khiatna aw daaisak uh hi. Pasian thumaan kammal zong a kongzingte uh ah that-in a sialpaih ciangin, Pasian thukham nial-a a mu dahte lungdam ki paakin diang uh hi. Mitein a kilangtangin vantung Kumpipa gensia uh hi. Tanglai mimawhte mah bangin, “Pasian in bang ci theih ding ahi hiam? A sangbelpa icih in phawktheihna nei ahi hiam?” ci-in ko uh hi. Late 73:11.
Up zawhloh zah-in Pasian kosiatna hangsan uh a, a vaihawm thakna sunguh-a phungzipa khat bang in, “Pasian aw, A om mah na hih leh Na mindai-na teng tu-in hong siansuah in. Na phu hongla in ci-in ka hong to hi! Thuklo a Nong om lailai leh Na vangliatna a zangh ngamlo Na hi ding hi. Paulo in tua ci khen-khan mawk le cin kua in Nang a om mah hi ci-in hong umthei nawn ding hiam?” ci zen hi. – Lacretelle’s  History,” (275) Wol. XI, p. 309; in Alison’ “History of Europe,” Vol. 1. Ch.10. Tua kammal pen “Ama thu ka man’ ding Jehovah i cih kua ahi hiam? Ke’n Jehovah cih bang kathei ngeikei hi!”ci-a Pharoah in a zat ngeisa khat a hong ging kik ahi hi.
“Mi haite in a lungsim sungah Pasian omlo hi” ci hi. Late 14:1. Topa in bel thumaan a susiate, “Amaute haina leh khialhna mi khempeuh mai ah kilang ding” ci hi. 2 Tim. 3:9. France gam in a nungta Pasian biak ding nial a, “a tawntung-a lian pen, a sangpenpa” a nolh khit uh asawtlo in numei suksia limpua Thu Ngaihsutna Tonu(Goddess of Rea-son) nungzui in milim a bia uh hi. Hih pen mi nambup kikhopna-a gambup thukimna ahi hi. Tangthubu gelhte in, “Khiatna mahmah a neilo, 

 

 

41

a zahtaak thamcing lo, hih haitatna a bawl uh bel a suuk pen mah hi pah hi. Kikhopna inn kongvangte ki honga, lasa pawl leh tumtheihtawi pawl hong lut uh hi. Khua sung vaihawm hausate tawh suahtakna pahtawina la sa kawmkawmin, galvilte-in uum cih sa-in mailam-a a biak ding uh Thungaihsutna Tonu cih min aphuah uh numei khat amai kikhuhsa in hong lut pih uh hi. A tual hong tun’uh ciangin amai kikhuhna leemkhia khian-khian uh a, Presidentpa taklamah a koih uh ciangin, laam inn-a numei laamsiam nu ahi hi. Thungaihsutna Tonu a cih nu-sianlim laakna aneih uh, hih nu mai ah France gam mihonpi thamlo in mipil thungaihsun siambel akineite nangawn in bia-in a tokaai uh hi.
“Hih a kihhuai leh maizum huai, akineih tawm Thungaihsutna Nusian hangin a minam bup un ki kheel-in, liangko kikim-a taangpi nuntak theih ding deihna-in Tualgal piangsak uh ahi hi. – Scot. Vol. 1, ch. 17.
Thungaihsutna biak sapna thugenpa in, “Gam Ukna thukhun bawlte! Ahang theihna Khuavaak in motphutna mialpi nawhkhia ta hi. A mitmang tawh tua khuavaak taang lua en in mutheilo uh hi. Tu ni-a hih gothte inn lim-a kilam biakinnpi sungah mipi hi zah ki khawpna-in thumaan ging a hong thawnkik ih zaksakna masa pen ahi hi. Tua lai ah biakna man ahi, suahtakna leh Ahang Theihna(Reason) ki bia ding hi. Tua pen Gambup galhiam hi-a, zong ki cipha sak ding hi. (276)
Tua lai mah ah nate pianzia ahi a Ahang Theihna Pasian anuntak suak theih nadingin agamtang theilo milim khempeuh ki susia ding hi. Nate pianpih, milimte laka anungta a thupi pen ahi Ahangtheihna Pasian pahtawi-in i bia hi.” aci hi. – Thiers, M.A., “History of the French
Revolution,” Vol. II, pp. 370, 371.
Tua Nusian pen biakinnpi sungah hong tun ciangin kikhopna thugen siampa in akhut tawh leenkawmin, mipilam hong nga in, “A sithei mihingte aw, na meidawi man uha na bawltawm uh, bang mah ahih theilo Pasian’van gingte kihta-in liing nawn kei un. Pasian cih omlo hi. Ahangtheihna bek om hi, cih tu-a ki pan in thei ta un. A milim thupi pen leh siangtho pen note kong pia hi. Milim neih a kul leh hih bang milim bek nei un…alian mah mah Suahtakna zong ahi Ahang Theihna mai bekah na kun ding uh hi!”
“Tua nusian pen presidentpa in a ngawngkawi khit ciangin mo-tor hoih mahmah sungah tuangsak uha, mi honpi laizang nawk-in, Pasian zalaih dingin, Notre Dame Biakinnpi-ah a koih uh hi. Biakna tausaang tungah tua nu saang khaan uha, a hong pai khempeuh in a bia uh hi.” –
Alison, Vol. 1, ch. 10.
Tua zawh a sawt loin mipi mai ah Laisiangthobute haalna in a zom pah hi. Inn lianpi sung ong lut uh ciangin, Tang’van keem Pawl (Popular Society of Museum) thakhat in awng uha, “Vive la Raison!”, Ahang Theihna khansau hen! ci-in ciangdawn khat ah Thungetna leh Misa bawlnabu, leh a kaangtum baang Laisiangtho Lui leh A Thak khawng suang in presidentpa in, “Leitung mi a hong biak sak uh hih thuhaivai teng meikhuk-ah ki haal ta hi,” a ci hi. – Journal of Paris, 1793, No. 318. Quoted in Buchez-Roux’s collection of Parliamentary History, Vol. XXX, pp. 200, 201.
Hih Lawki nasep a hong picinna pen pope patkhiat sak ahi hi. Romete bawlbawl kithuah ki kholhdan ngeina, ki-uk dan, biakpiak ziate in France gambup siatna a piangsak hi zaw hi. Tualgala a khengval tatsiatna khempeuh pen Pawlpi’ tokhom alente hang hi –a, thu tang takin kikhen hi leh pawlpi tung tu ding hi ci-in thuciamteh laigelhte in gen uh hi.. Pope in kumpite lungtang sungah thusia pawi-in gu a suahkhit ciangin, Puahphatna pen, kumpi langpang, kilemna leh galmuanna asusia bangin musak in(277) a langdo sak hi.Tua bang ahih nadingin, kumpi tokhom panin gitloh kheltatna nasia penpente tawh a gam a ukcip nadingin sim hansuah in thumuap sim den cih Romete vakhna pen ahi hi.
Suahtakna lungsim pen Laisiangtho tungtawn-a piangkhia ahi hi. Lungdamnathu a na ki saan’na peuhah mite lungsim khangh-lo hi. Tua ciangin a kikhihcipna sikkol ahi khua-phawkloh saltaanna, ki siatnate, leh thuciin zuihnate suutkhia in a nusia uh hi. Amau in mihing ngaihsutna maante ngaihsun in sepna ngeina bang seem nuam uh hi. Kumpite in tua mu uha, amaute a nawkgawp khak ding uh lau uh hi.
Rome in a launate uh a khiangkhol thei dingin navaak-in, zong tuantual ngeilo uh hi. 1525 kum in France gam a keem dinga ki sawlpa kiangah pope in, “Hih haina (Protestant thu) in biakna bek thamlo in vai thupi khempeuh, mi thupi khempeuh, thukham leh ngeina khempeuh baan ah thuneihna leh zaliatna khempeuh zong ong susia lai ding hi,” ci-in a hilh khol hi. – Felice, G, de. “History of the Protestants of France,” b. 1, ch. 2. Par. 8. Tua zawh kum sawtloin pope sawltak khat in Kumpipa kiangah, “Kumpipa aw, taksang kei in. Protestantte in biakna bek hilo leitung ki-ukna kumpivai zong hong lumlet ngelngel ding uh hi….Biakna thak khat in kumpithak khat mah deih hamtang ding hi’ ci-in ava lawt hi. – D’Aubigne, “History of the Reformation in the Time of Calvin.” b. 2, ch. 36. Tham loin, theology siamte in mipite giim-neihna asiansuah nading un, Protestant upna in “a ki phuaktawm thu leh a haihuai thu lamah mite heiikhia ahih manin, kumpipa a ki muan ding zah-in muang sakloin pawlpi leh kumpi hong hawmsuak sak ding hi,” a va ci hi. Tua bangin Puahphatna langdo dingin Rome in France athuzawh hi. “Kumpi tokhom kip nading, Ukpite kip nading, leh Upadite kip nading deihna-in France ah Protestantte bawlsiatnading namsau kidok masa hi.” – Wylie, b. 13, ch.4.
Tua athukhun uh in bang thaman hong tun’pih kik ding cih Gamukte in tawm muh kholh luazekkha uh hi. Laisiangtho bangin thu hong kihilh leh a gambup nopsakna bulpi teng, ahikitamkimnate, thumaan-na te, ki kepsiamnate, leh thuman-nate mite sungah hong po dinga French gam khangto zawngel mah ding hi ven! “Dikna in minam a tawi saang ” ( Paunak 14:34; 16:12) in tua tungah “kumpi tokhomte a kip” hi zaw hi. “Thumaan-nasepna in lungmuanna a pia hi zaw”a, tua ciangin “daihna leh khamuanna atawntung in akip ding hi.” Mite in Pasian zahtaak in athukhamte a zuih uh ciangin, (278) thumaan leh dikna thuneihna a zangh kumpipa zahtaak in, gamsung thukhunte zong ong zahtak pan ding uh hi. Ahi hangin akamsia France in bel Laisiangtho leh athuzuite nial uh hi. Kumza khit kumza, a dik-a gamta mite, a thumaan ngimna khauh mipilte, thuman a zui ngamte, upna thumaan hanga a thuakngam tua bang mihoihte in a kum zalom mah-in aki khumcip sal suak uha, ki halna khuamtungah si uh hi. Pawlkhat leisung khuamial thongte-ah muatcip uh hi. Tul tampite taaimang uha, Puahphatna hong om-a ki pan kum 250 sung bang tua bang bebek hi den uh hi.
“Tua bang bawlsiatna maitang pan a taaimanglo, Lungdamnathu ah a belhtentan, khutsiamna, set nasepna lam, leh pilna lam peuh seem-a om teeiteei French mi tampite in a gam ki-ukna hangin taaikeek in abelh theihna gam peuh beel uha, tua gamte va hamphasak tuam uh hi. Mi gam va tung uha, Puahphatna thuphate tawh va khangkhia uh hi. Amau gam pen a hawmsuak hi. Tua kum 300 sung bang a ki nawhkhia teng France ah om in, a gam leitang puah uh hen la, a gam-a setzongte ah na seem sakin, amau pilna leh theihna in aminam laite puah uh henla, amau thumuhnate in a gam uh makaih in dinpih hi zen leh, amau galhaan’na in a gam ading galdo leh, amau thutan-na lungsim in a upadi uh bawl in, Laisiangtho’ guat lungpilna in gam mite lungsim makaih hi zen leh bel bang zah ta in minthanna leh vangliatna in tu dongin France tuam in, bang zah takin hampha in mi dangte et teh a khangto gamnuam suak ding uh hiam!
“Ahih hangin a kizo theilo, thulang bek en, mitsi tentan nuam uh ahih manin amau gam pan sia lian sia hoih mahma te, vai hawmsiam belte, kumpi (279) tokhom adinga pangpi mihoihte, leitunga ama gam “a minthang sak dingte”, ki halna khuam leh nawhmang ding khat zaw saang a ut zawk teelsak denkeei mawk uh hi. A tawpna ah a gam kisia takpi ta a, a sunglam upna pulaak ngam gaalhang mi zong om nawnlo hi. Kihalna khuam zuat pih ding biakna kuhkalmi zong bei ta hi. Nawhkhiat tham dingin gam it mi zong om nawnlo hi.” – Wylie, b. 13, ch. 20. Tua ciangin lipkhaphuai sisan luan’na Tualgalpi tawh mual hong khum ta uh hi.
“Huguenotte taaimangna in France gam taangpi kiamsak hi. Van leh nate abawl khuapi kisia ta hi. Lei hoih an tamna munte gamsimtham suak ta hi. Anaak pan aluang Pilna teng kangta, mihing lungsim khantoh nateng kiamsuk in mainawt zonawnlo hi. Paris khua pen mi zawng munpi khat suak a, Tualgalpi bei ciangin kumpipa kiang pan khutdawh ngen a nungta 200,000 bang om hi, ki ci hi. Aki siacip minam sung pan Jesuitte bek khangto uha, pawlpi leh sangte ukcip sawn uha, thonginnte leh inn kawcikte ngen zat-in nei uh hi.”
France-a thuhilhsiate, a kumpite, leh mipi upadi leente siamna in bang mah cinzo nawnlo hi. A tawpna-ah ukna gilo leh siatna ciang a tun’ gam-ukna leh nuntakzia pen Lungdamnathu in a puah sak uh hi leh tua buaina teng aveng ding kimlai tua bang ding in lah aphal kei uh hi.Tua manin agambupin siatna ah aki denna uh hi. Romete ukna sungah mitein Honpa hong piak thupha leh etteh dinga hong koih angsung mangngilha ki piak ngamnate bei ta hi. Mi dangte noptuam nadinga angsung nialna leh midang deihsak masakna lungsimte gamlapi ah leengmang ta hi. Tua hangin, mihaute in mizawngte a gawina ahilh a taai ding om nawnlo hi. Mi zawngte in zong salnuntak leh kiamsukna pan-a a huh ding kua mah nei nawnlo uh hi. Amau angsungbek khuat ciat uh a, a hau photte hau semsem in gilo semsem uha, mite a nencip semsem uh hi. A kum zalom tampi sung miliante in mi ginalote gawicip uha, a, huaihamna uh tawh khelbawlna piang hi. Mi haute in mizawngte tungah khial uha, mi zawngte in mi haute mudah ta uh hi.
Gam meeng tuamtuam tampi ah ukpite leh miliante in mun le mual leh logam khempeuh leen uh ahih manin, nasemnamte in a saap bebek in lokho in leitang neite’ thu bangbang leh a nget bangbangin a sap piak kul hi. Pawlpi leh kumpite pen tua miniamte in vaak (280)  uh a, thuneite in tampi-pi la in, kumpi leh pawlpi naseemte vaak uh hi. “Ukpite deihna bangbang Upnadi golpen suak pah mai-a, lokho mite leh a miniamte in a ukte a vaakna un gilkial in tasam uh hi….Mipite in avai khempeuh uh ah leitang neite deihna a dot phot denkeei uh kul hi. Lokho mite nuntakna pen a tawlnga thei ngeilo, a buai den khat hi a, a phun ngamte phunna pen bawlsiat behlapna lel a suak hi. Thukhen Zumte in lah miniam pampaih in Ukpite lampang zaw hamtang den uh hi. Thukhen mangte in a ki langtang in golhguuk la uh hi. Hi banga a buppi kisiatna hang mah in tungsiah uliante lungsim bangbang pen thukham hi pahpah hi. Gam-uk kumpi baan ah, biakna lam uliante in mipi tung pan siah a kaih uh hangin a kimkhat nangawn Gambup sum kholna leh Pawlpi sumkholna sungah lutlo hi. A dangteng pen zulhtat paangtatna-in zangh uh hi. Tua banga mipi zawng sakzo zah-a siah le kaih a late Upadi in siah a maap zawlai hi. Tua bangin siah pengh mi 150,000 bang a om hi. Ahih hangin amau nopsakna ngah nadingin a gentheihlawh mi a awn a mak-in a om hi.
Thukhen zumte lah gualnopna vive tawh paangtat uh hi. Gam mite leh makaite kikal ah ki muanlahna vive a om hi. Huaiham in simneek ding uh hi ci-a Kumpi naseemte muan lahna dimkhol den hi. Tualgal pian ma kum 50 val lai in Louis 15na pa in kumpi sem hi. Tuapa zong hih hunsia sungah bang mah-a ki manglo, thadah, khuaval, gualnop bek uuk kumpi hi, ci in ki ciamteh hi. Gamsung nautaang mite zawngsakzo zah-in hamphat tuhna in na a ki sep manin gambup in sum tasam uh hi. Tua in mite hehna sosak ahih manin, buaina piang ding hi cih, kamsangte mit kulselo in, mikhempeuh in mukholthei ta uh hi. Councilorte in ngaihsut a piak ciangin kumpipa in, “Ka deih banga ka bawlna zui phot lel un. Ka sih khit ciangin a piang nuam peuh piang hen,” cih vive-in thuk hi. A (281)ki samte puahphat dingin a ki nget hangin a mawkna a suak hi. Thusia piang dingte zong mu napi in puahphat ding bawlngaap loin zong a bawlngam kei hi. France in a thuak ding siatna pen ki mukhol gige a, ahih hangin ama thadahna leh a huaihamna bek tawh ni tumsak in “Kei khit ciangin piang hen!” cih a hi den mawk hi.
Kumpite leh gamukte hazat-huai-hamlungsim zui in Rome in mipite hu-neh gawpin sila bangin khihcip uh hi. Tua ci leh a gambup thaneem ding cih mu in tua bangin gamukte leh gammite thaangawk ding in abawl hi. Saupi a ukcip zawh nading in, a khaa uh sikkol bulh in salsuahna pan a taaikhia sim zolo ding in koih kul hi cih amu uh hi. Tua a Upadi bawl uh in pumpi gentheihna sangin, azah tul-in a mite lungsim a siasak zawtham lai hi. Laisiangtho suhkhiat sak a, mihingte huaihamna leh thulang etna bek tawh vai a kihawm ciangin mite pen haina leh thuciin lelte khawng in khuhcipa, lungsimsia in vuka, amau leh amau a ki-uk theilo, dinmun atun pih hi.
Ahih hangin Romete ngimna banglo lam in nate hong piangkhia hi. Rome upna sungah mipi ong ki piak sangsik in, mipi pen thu umlo lawki leh tualgal bawlte suaksak zaw tham hi. Rome thu pen phungzi vai ci in a mu dah uh hi. Thu zuihna lam siate peuh mah pen amaute a nen-niam lel ding mite bangin muta mai uh hi. Romete pasian bek pasian in mu ta uh a, Romete thu hilhna bek amaute biakna aseh ta uh hi. Tua gitloh huaihamna teng pen Laisiangatho hanga piang nuntakna gah sa uh ahih manin, Laisiangtho a deihna uh om nawnlo hi.
Romete in Pasian omzia lakkhial uh hi. Pasian nget thute a lehlam in lak uh ahih manin mite in Laisiangtho leh A neipa Pasian nial ta uh hi. Rome in ama upna pen Laisiangtho sunga om thu bang lim-in khembawlna tawh mite a hai-up sak uh hi. Tua manin Voltaire leh a pawlte bangin Pasian kammal paai khia uha, mun citengah uploh nading thu a theh kawikawi uh hi. Rome in a sikkhetul zangin sawtveipi mite sikcip uh ahih manin, nakpi in kiamsuk khin uh hi. Tua hangin mipi lunghaam in ngoltol khin uh ahih manin Rome tawh kipelh nuam ta uh hi. Tua manin a thu khatbeek a mang nuam kei uh hi. (282)Sawt veipi a biak uh kheemna ah a heh uh suaklua ta uh ahih manin, thumaan  nangawn tua tawh nialkhawm kha ta uha, tua suahtakna pen a lungsim uh’n suahtakna man sakha ta uh hi.
Puahphatkikna kipatlam in, kumpipa thusiamna tawh, ukpite leh thuhilhsiate gawm sanga atamzaw dingin mipi sungpan teelin taangmi hong puak thei uh hi. Thu saikakna leh khensat theihnanei uh hi napi, ahih hangin tua athuneihna uh hoihtak in a zangthei dingin kiginglo uh hi. A thuaksa thumaanlo omzia teng ki puah leh deih lel in tua ding aki thukim uh hi. Sauveipi a kikhol a thuaknate uh hangin lungso in, tuate apiangsak-a a up mawhte uh tungah phula in gamukna lumlet-a buaisak gawp mai ding ut zaw ta uh hi. Mipite in amau akinetcip nateng tawh amau anenniamte gawtkik uh hi.
France in a vawh uh khaici mah sisan tawh a atkik uh ahi hi. Romete ukna-a a ki piak man un a thuak uh buainate lauhuai mahmah hi. Romete thuzawhna hang bek in puahphatna nasep kipat tuung-in France gam teekteek mah ah kihaalna khuam kiphut masa pena, tu in tuamun mah ah Puahkikna-tualgalte in ngawngtanna set phut masa uh hi. Kum zalom16 lai-a Protestant upna hanga ki haalna thuakmasate ki haalna mun teekteek mah ah kum zalom 18 ciangin Tualgalte thah masak penpente ngawngtanna set tawh kitan hi. France a cidamsak ding Lungdamnathu nawhkhia in thu umlo hihna leh siatna kong, a hong zaw uh hi. Pasian thukham kepna paampaih uh ahih manin, mite thukhamin a lungsona dalzol nawnlo in, a mi nambup in langpang uha, kumpi a dohuan ta mawk uh hi. Laisiangtho a galbawlna un leitung tangthu sungah “Ukna Kihtak huai” a cih hun a kipan khiasak ahi hi.
Gaalmuanna leh lungnopna teng mite lungsim pan leh inn sungah beita ahih manin, kua mah a lun muang om nawnlo hi. Tu ni-a a gualzo mi zing ciangin guallel thei ding cih hi lel hi. Gamptatna leh huuktatna vive hi khin hi.
Alungso mipite khutah ki aap dingin Kumpipa, biaknasiate leh Ukpite, ki zawhthawh ta hi. Kumpipa a kithah ciangin a phulaak nopna

 

42

uh ki sosuah pan bek hi. Thah ding (283) thu pia te mah ki halna tautung dong ki nungzuih sak pah hi. Tualgal ah gilo a sak tata uh thah dingin sehsa-in om hi. Thonginnte dim uh hi. Khiat khat-in 200,000 val khum uh hi. A gam khuapite buaina tawh kidim hi. Tualgalte sung nangawnah pawlkhat leh pawlkhat ki thuhuallo lai uha, France gam bup pen ki totna buaina tualpi asuak uh hi. “Paris khua sungah buaina khat khit khat hong kizom a, khua sung mite a pawlpawl in kikhen ziazua uh ahih manin, ngimna lian nei zong hi kholloin pawlkhat leh pawlkhat ki susia nuam uh hi lel mai ta hi.” A buaina uh behlap dingin, aveng theilo, Europe gam galdona lakah va kihel sawnsawn uh hi. “A gambup sumzat kisam a, galkapte in khasum ngen in Paris khua mite in anngawl uh hi. Gam dawnte ah misuamte in mite hawmsuak sak uh in, agambup in kumpi omlohna ninam (civi-lization) bang mai ahi hi.
Romete in gitloh-gawt bawl zia mi khempeuh hilhpil mawk uh ahih manin siamthei tek mahmah uh hi. Ki thuhkikna hun khat a hong tung ta ahi lel mai hi. Tu in bel Jesu nungzuite kihaalna khuam ah ki kaai saamlo-in, khuamial thong sungah ki khum hi. Sawt veipi lai-in hihte mangthang khinzo, ki hawlkhiamang zo hi. Sisan luang saka gamp-tat nop asak theih nadingun, apattahna tenguh a huaisiatzia pena agamp-tat Rome in a hong phawk ta hi. Khang tampi sung France gam-a biakna siate in a zat uh gawtbawlna teng mah etteh in amau tungah tu-in ki zangh kik ta hi. Ki thahna taute phungzite sisan tawh san ziazua hi. Khatvei lai-a Huguenotte dimna inn kawcik sungte leh thonginn sungte ah tu in amau a bawlsiate leh dim kik ta hi. Tutphah saute peuh tawh ki khihkhawm in tutmun-a a pei-peii ding nasep cih bang khawng sem sak uh hi. Rome Pawlpi in amau thunialte a bawlsiat ngei dan uh gimna teng mah tawh a Pawlpi siate, tu’in, aki bawlsia kik ta ahi hi.”
“A gitloh huai penpen thukhunte a gilo penpen zum pan in ki bawl hi.Tua thukhun sungah kua mah in a lawmte nangawn hopih theilo dinga, thu zong ngen theilo ding cih a hi hi. (284) Tua bang ahihte pen gambup lehheek mawhna nei zah in kiseh hi. Tua adingin thusim kante mun citengah dim uh hi. Zing sialin ngawngtanna set pen tawlnga lo-in sau veipi pi na seem sak uh hi. Sal nawn teembaw tung mi-kigak zah mah-in thonginn tengah mi kigak hi. Kong zing hawkguam pan in sisan phuan teng Seine gunah luang suk hi….Paris khua kongzingte ah Thong Motorte in a mi matte uh a dimdim-in a nawn hi. Aki sawlkhia Ulian Sawltakte in a va gamkuanna uhah khuapi sunga kitheih ngeilo kheltatna tuamtuam va zangh lai uh hi. Mi thahna set-tempi pen ki khaangto in kiasuk kik zel hi. Tua nangawn zekai lua a sa uh hi. A mimatte uh a hon in gual-in teh khat-in tampi-pi a teptan sak uh hi. A taw ki vutvang simsa gunkuangte ah mi tampipi tuangsak in a nawn uh hi. Lyons khuate sehnel gam a suak hi. Arras khua a mi ki mante bang akhel bawlnop man bek un a nawh sih ding uh phallo kik zawzen uh hi. Saumur pan tuipi dongin Loire gundung suk tengah va-ak leh muu in a guak tanga ki bua misiluangte bawm zaizai uh hi. Numei pasal, a haam a moi, cih zahtuam nei loin a ki lawmlo theithei-in ki kawisa-in a bua uh hi. Tua a kih huai kumpi in a thah khangno nu ngakno leh tangval no kum 17 gualte a zalom mah in ki sim thei hi. Naungeek nawine laite kaaikhia uh a, Jacobin pawl makaite ki lot-in teipi muk tawh ki saang lianlian uh hi.” Kum sawm sung bek in mihing tampi bei mang uh hi.
Hih gamtatte khempeuh Satan deihna bangbang hi a, amalungkimna bang a ki sem ahi hi. Ama nasep a ki pat pan, a tawp dong a khangkhangin, tua bang ngen ahi hi. Mite gimpiak ding, Pasian nasepte meelhem sak siatsak ding, Pasian itna leh thuphateng zuutmai sak ding, leh tua bangin vantungah dahna dim sak ding cih vive ahi hi. Tua ciangin mite kheem in a lungsimmit uh mangsak ding leh tuahsiatna khempeuh ah Pasian ngawhsak in phunsan sak ding a deih ahi hi. Ama ngongtatna zui-in suahtak ding deiha a hong ki thasaan te a niamkiat ciangin (285) amaute valtat in tatsia sak sese hi. Tua banga a dal om keeilo a gamtatnate pen a tatsiate leh migawite in suahtakna ngah i cihte hi bang hi, ci-in mawh kawk kik leuleu uh hi. Khilhna gamtat namkhat a ki dawk ciangin Satan in mengcip leuleu in lampi dang khat tawh a kheem zel hi. Tua khemnathak pen mite in a masa-a mah bangin lawp takin na saang zel uh hi. Romete vaiteng kheembawlna hi cih a muh uh ciangun Pasian thukham palsat dingin a sawltakte tung tawn-in lah seem zo tuanlo ahih manin, biakna khempeuh kheem bawlna vive hi, a ci sak leuleu hi. Laisiangtho zong gelhtawm laibu mawkmawk khat hi, ci sak hi. Tua bangin Pasian thute paam paih-in, kamkaih ki vawhlo gan bangin utut a mawh bawl lel dingin a bumbeh leuleu hi.
Amaan suahtakna pen Pasian thukham nget bang zui-a nuntakna ah om zaw ahi hi. France gam-in hih thumaan a theih loh manin agambup in siatna khawk bel athuak uh ahi hi.  Ka thupiakna a ngai hihoh leteh! Nangma nopsakna pen gunpi bang dinga, na thumanna pen tuipi tuihualte tawh kibang ding hi. Tua ahih ciangin migilote’ adingin nopna omlo hi.” “Ahih zongin, ka thugenna a ngaite in lungnopna ngah dinga, launa nei loin nuam takin om ding uh hi,” ci hi. Isa. 48:18,22; Paunak 1:33.
Lawkite, thu umlote leh lampialte in Pasian thukham nial uh hi. Ahih hangin a thaman hong saan’ uh ciangin Pasian sawl bangbang man’ na pen mihing nopsakna hi bek zaw mawk h, cih aki langh zel hi. Pasian laibu Laisiangtho pana sin ding thute a sim nuamlo mi in mi namte omzia tung panin a simtheih nading khom uh om veve hi.
Mite in sawl a man’ loh nadingin na asep ciangin, Satan in Rome pawlpi a zangh hi. Azat sawltak pen akilangh lo dingin seelcip phot hi. A nasep zong asimtham in kuul-lut in iimcip ahih manin kiamsukna leh kamsiatnate apian ciangin Pasian thu a palsatna uh hanga piang ahih lam mite in atelzo nawnkei uh hi. Tua bang hun ciangin Pasian Kha Siangtho nasepna in Satan vangliatna nalangdo zel ahih manin adeih bang zah in apicin zo kei hi. Mite in agentheih nateng uh hong bangci pian’ khiat hiam cih a khekhap sulzuih in kankhia kiknawn selo uh hi. Tua ahih manin, tualgal sunga a minam vaihawmte un Pasian thukham a kilang tanga a paaihkhiat uh manin a tuateng a thuak uh ahih lam nangawn a theizo kei uh hi. Ahih hangin azompah Uknagilo hun ciangin ahang in bang hiam cih mi (286)khempeuh in muthei ta uh hi.
France in mipi maitangah Pasian nial in Laisiangtho a paampaih ciangin, migilote leh khuamial khaate in sawtveipi sung atup kinken alunggulh uh a ngah suak uha, gambup khatin Pasian thukham dalsak zo, ci in ki paakta mahmah uh hi. Bang hang hiam cih leh thusia bawlte zong ki mawhsak pahpahlo a hih manin mite lungsim in “thusia bawl ngam pah hi.” Thuhilhsia 8:11-13. Ahih hangin amaan a dikk thukham palsatna pen daltheihloh buaina leh siatna in asul zuih kik teekteek zel hi. Pasan sialnek bangin thukhenna in buak pah zawzenlo ahih tei hangin mihing giloh gamtatna pen, a tawpna ah, maibin’na ah kinga den ham tang hi. Kum za tampi sung lampialna leh tatsiatna in thuk-kikna ni ading hehna a khol uh hi. Amawhna uh a dim ciangin Pasian awlmawh lote in Topa’ lungduai zawh nawnlohna a lauhuai lam phawkpha saan uh a, tua lah ziakaai lua ta zel hi. Hong hu den Pasian Kha Siangtho in a gilo Satan vangliatna teng a khakcipna pan a khawl ciangin mite thuaksiat nading bek vaipi-a a hawmpa Satan in a ut banga a septheih nading hun kipia sawn sawn hi. Tua banga langpan’na a teel zawte in agamtat uh gah a ne lel dingin ki koih a, a gambuppi tatsiatna leh buaina tawh kidim hi. Tua pen laikung tawh gelh theihvet ding hi nawnlo hi. Gammeengte hawmsuak a, khuapite kisia in buai uha, lungkham-a kahna leh kiko aw vive ki za ta hi. Ziinliingpi’ lohgawp bangin France gam kilok hi. Biaknate, gamukna thukhunte, mipi kikholh dante, innkuan vai, gam kiukna, leh pawlpi dindan khempeuh pen Pasian thukham apaaikhia khut mahin sat paai hi. Mipilpa in a kituak taka a genna ah, “Migilo in ama gitlohna mah ah puuk kik ding hi” ci hi. “Mawhnei mi in gitlohna a za vei-in bawl napi a khan’ ki sawtsaka, ahih hangin tua migilote a hoih hi lo hi: Pasian kihta a Ama mai-a a lau mi in nopsa dinghi.” Thuhilhsia 8:11-13. “Note in pilna deihlo in, Topa kihtakna na mudah uh hi,” “nagamtatna bangun na thuak ding uha, nomau’ gamtatna mah in note hong gimsak ding hi.” Proverbs 1:29, 31.  
“Kuam thukpi sung pana hong pusuak” Pasian dempa’ vangliatna in a thah Pasian teci muanhuaite tua bangin a ki nusia den ding ahi kei hi. “Ni thum leh ni (287) lang acin khit ciangin tua mite sungah Pasian kiang pan nuntakna huih lutin, amaute in atho uha, a din uh ciangin a en mite khempeuh alau mahmah ding uh hi.” Mang. 11:11. 1793 kum in Khristian biakna phiat a Laisiangtho a paam paih upadi khat France gam buppi ki khoppi in a bawl hi. Tua upadi a ki piak khiat khit kum thum leh a lang ciangin Laisiangtho pen susia nawn lo ding ci in tua thunei te mah in genkhia kik uh hi. thu siangtho anial khialhna thaman mu in leitungbupin galet-in lam dang a sa uh hi. Pasian um-in Ama thumaan zuihna in hoihna leh dikna bulpi ahih lam a mu tel uh hi. Topa in a genna ah, “Nang in kua zahko-in simmawhna hi hiam? Nang in kua tungah na aw sangsakin, kiphasak na hi hiam? Iaraelte’ Siangtho Pa, kei tungah hong tuaci na hi hi” Isa. 37:23. “Tua ahih manin, en un, amaute ka hilh ding hi. Tu tung peuhmahin ka min in Topa hi, cih a theih nadingun ka vangliatna leh ka hatna ka thei sak ding hi,” ci hi. Jer. 16:21.
Kamsangpa in teci nihte vai gen beh lai hi. “Vantung panin zong, ‘Hih laitak ah hong kahto un,’ ci-in nakpi-in thupiakna aw a za uh a, vantung meii tungah tuangin a kahto uh amaute galte in a mu uh hi” Rev. 11:12. France in Pasian teci nihte gal-in a do man-in a ngah ngei nai loh zahtaak ngah ta uh hi. 1804 kum-in British & Foreign Bible Society ki ci Laisiangtho Hawmna phualpi ki phuan khia hi. Tua nung zui-in Europe gamte ah a phual meeng tampi kinei kawikawi hi. 1816 kum-in American Bible Society ki phuan leuleu hi. British Society a hong pian khiat ciangin Laisiangtho pen paunam tuam tuam 50 bangin kheen in ki hawmkhia hi. Tua pen tu in pau nam tuamtuam tampi in ki teikhia khin ta hi.
1792 ma kum sawm nga sung gam danga thupuak ding ngaihsutna om nailo phial ahi hi hi. Tua ading kipawlna zong omlo hi. Lawki gamte a Khristian thupuak ding asawm Khristian pawlpi zong omlo phial hi. Ahangin kum za lom18 bei kuan lam ciangin ki khelna lianpi hong piang hi. Mihingte ngaihsut tawm tawh theihna bekah (288) lungkim zo nawnlo-in Pasian lahkhiat thuman leh nuntak pih ding biakna khat hong lunggulh ta uh hi. Tua-a ki pan-in gam dang thupuakna pen up mawh zawh loh zah in a khang hi.
Laikhetna a ki neih ciangin Laisiangthobu hawmkhiatna ong manlang mahmah hi. Vanzat hoihzaw bawl theihnate leh gam khat leh gamkhat ki thuzakna hoih neih tohnate in ni dang lai-a minam ki deidannate leh ki-makihtaak kholhnate beisak hi. Rome-a phungzipa thuneih luatnate bei in Pasian thu tuamtuam a lut theih nading lampi ong ki hong khia hi. Kum tawm vei sung Rome khua kongzingte ah a daal omloin Laisiangtho bu te ki zuak thei hi. Tu in leitung bup mi a omna ciang ciang ah a baan zom-in na ki seem thei pai suak hi.
Thu umlo Voltaire in kisial kawm-in a pauna khat ah, “Tua mi sawm leh nih in Khristian biakna phuan hi, mite in a cih uh ka zak a tha dah ta hi. Mi khat bek in zong tua biakna susia zo ding hi cih kong lak nuam hi,” ci hi. Ama sihkhit kum 100 pai ta hi. Mi mak tampi in Laisiangtho gal-in do lai uh hi. Ahih hangin Laisiangtho a bei genloh Voltaire hun lai-a bu 100 a omna ah tu in bu tulsawm, thamlo a butul za-in om ta hi. Puahpha mite khat in Khristianthu a genna ah, “Laisiangtho pen sikseekte phahsanh bang hia, sek tampi in a sat hangin a sekta kisia zaw hi” ci hi. Topa genna ah, “Nang mah do nadinga ki bawl hiam peuhmah mavanglo ding a, thukhenna sungah nangma langa apang mi khempeuh na nial gawpzo ding hi.” ci hi. Isa. 54:17.
“ Pasian kammalte kho tawntung dinghi,” “Ama nasepnate khempeuhah amah thumanin citaka, ama thupiak nate muan taak mah mah hi. Atawntrung in tuate kip ngitngeta, thuman leh thutang tawh zuih ding ah hi..” Isa. 40:8. Ps. 111:7, 8. Mite’ zawhthawhthu tawh a ki seem khempeuh ki puuk dinga, a ki phiat theilo Pasian thu ahi suangpi tunga kiphut khempeuh a tawntung in kip ding hi.
 
43
See also  GC 12: French Puahphatna
Tags: ,

Admin

Admin

Top