GC 24: A Siangtho Laka Siangthobel Munah

BIAK-BUK thu in 1844
kum-a cihmawhna thu thukpi kong hon’na tawhtang
a hi hi. Tua thu in thumaan nasepna a kizopna leh a kilem diam diamnate
hong lak a, Pasian khut in Advent nasepna makaih a Ama mite in tu in bang sem
ding hiam cihte atel sak hi. Jesu nungzuipite alungkham ni zana cih mawh luat
khit laitak uha “Topa a muh uh ciangin a lungdam” kik uh mah bang ahi hi. Tu in
Ama hong pai ding a lam en takpite pen hong lungdam kik mah mah ta uh hi.
Amaute in letsong pia dingin hong kilang ding in lam en khin uh hi. A cihmawh
khit ban uah Jesu a muh loh sawn sawn uh ciangin han phual ah Mary tawh nakpi
in kap a, amautein ka Topa a la mang ta uh hi. Koi lai ah sial uh hiam ka
thei kei hi” ci khawm uh hi. Tu in Siangtho Bel Mun ah Amah in hehpih na tawh
akidim Siampilian sem hi ci in mu uh hi. A sawt loin amaute Honkhiapa leh a
Kumpipa dingun hong kilang ding cih a thei ta uh hi.

Daniel 8:14-a “ni tul nih leh ni za thum ciangin Biak-innpi ki sian suah siang ding (424) hi” cihna leh vantung mi khatna tangkona, “Pasian kihta un la, a vangliatna phat un. Banghang hiam na cih uh leh , a thukhen ding hun a tungzo hi “ cih thu pen Khrist in Siangtho Bel Mun ah lutin, mawh thumna leh Dawpkholh thukhenna a sepna zia kawkna a hi zaw hi. Migilote kisiat nading leh Ama mite hon khia dinga Khrist hong pai nading na hi lo zaw mawk hi. A khialhna uh pen a hun sehna uh hi lo zaw in, ni 2300 bei ciang a thu piang ding pen seh khial uh a hi zaw hi. Tua seh khialhna hangin thu um mite in cihmawhna thuak uh a hi hi. Ahih hangin tua a cihmawhna thuak ding pen nangawn uh zong Laisiangtho hilhkholhna in a gen khol sa mah na hi leu leu hi. Amau lamet bang hong pian loh ciangin dah a a kahna te uh zong a piang ding mah a a thu om kholsa na hi sawn sawn zel a, Topa mai ah Ama naseemte letsong a piak theih nading thu teng a kimsakna a hi hi.

Khrist pen amau lam et bangin leitung ah hong pai lo hi. Ahih hangin a lim a ki ciing khol sa mah bangin vantung Pasian Biak-buk sung Siangtho Bel Mun-a a lut na hi zaw hi. Kamsangpa Daniel in hih hun ding a muh kholhna ah, Amah pen Taangkumpu kianga a pai na na gen hi. “Zan ka mangmuh hun sungin ka khawdak leh mihing tapa tawh a kibang mi khat meii tunga hong pai ka mu hi. A nungta tawntung mipa’ kiangah pai –in, ama kiangah a ki pia hi,” ci hi. Dan. 7:13. Hih hong paina Malakhi in zong a gen kholhna ah “ “Tua ciang in na ngakngak uh Topa a biakinn sungah thakhat thu-in hong pai ding hi” Mal. 3:1 na ci hi. Biak-innpi sunga Topa hong lut ding pen Ama mite lam et lohpi in tha khat thu hi ding hi ci hi. Amaute in tua lai ah Amah a pai dingin ngaihsun lo uh hi. Amaute in hih leitungah Amah hong pai in, “Pasian a thei lo mite ih Topa Jesu Khris’ Lungdamna Thu a ngai lo mite dan a piak,” hun ding in a lam en zaw kha uh hi. (2Thess. 1:8).

Ahi zongin mite in Topa dawn dingin ki ging nai lo uh hi. Amaute adingin bawl lai zek ding a kisam nasep pawl khat om hi. Khuavak kipia in, amaute lungsim ah (425) vantung Pasian Biak-buk ki lak tel ding hi. Tua ciangin upna tawh Siampilianpa’ mawhsut nasepna zui thei ding uha, sep lai ding a kisam nate hong ki dawk to zel ding hi. Pawlpite tung ah hilh ding patau kona dang ki pia lai ding hi.

Kamsangpa genna ah: “Ahi zongin ama hong pai ni ciangin kua in thuak zo ding a, amah hong kilat ciangin kua nungta zo ding ahi hiam? Amah in, sikte a siangthosak mei leh puante asiangthosak satpiang tawh kibang hi. A ninte kangtumsak in, ngunte asiangsakpa bangin thukhen dingin hong pai ding hi. Tua ciangin Topa tungah a kilawm (dikna tawh) biakna pia ding uh hi,” ci hi. Mal. 3:2, 3. Khrist in van Biak-buk-a Palai a sepna a khawl ciangin hih leitung a a na nungtalai mite in siangtho Pasain mai ah Palai nei loin om ding uh hi. Amaute puantual nin baang lo ding hi. A gamtatte uh zong aki theh sisan hangin mawhna panin in kisiansuah sak khin ding hi. Pasian thusiamna leh amau mah hanciamna tawh amautein gilo galdona ah a zote ahi ding uh hi. Dawpkholh thukhenna a ki sep lai teng a ki sik kik thu um mite mawhna teng, Biak-inpi pan a nil khiat hun lai sung teng leitunga Pasian mite lakah mawhnate koih khia in ki puah siangna na om ve ding hi. Hih nasepna Mang. 14 sung thupuak ah ki tel takin a om hi.

Hih nasep a ki zawh ciangin leitung ah Khrist mite in ama hong pai nadingin a ki ging khol khin uh na hi ding hi. “Tua ciangin Judah mite leh Jerusalem mite’ piak biaknate pen, nidangate mah bangin Topa’ mai-ah a lungkimhuai hi ding hi.” Mal. 3:4. Topa a hong pai cianga a saan’ ding pawlpi pen, “siangtho in mawhsakna omlo ahih ciangin, anin ban’na omlo, sa tonna om lo-in, a mel kilawma “ dim pawl pi a hi ding hi. Efesa 5:27. Tua cianginpawlpi pen, “Ziingsang khuavak tawh a kibang, …Amah amel hoih mah maha nitang, khataang, a bang “ in mu ding hi. – Canticle (Solomon La) 6:10.

Topa a biak-inn a hong pai na baan ah A hong pai kik nading Malakhi in a genkholhna zong om a, thukhen siang dinga hong pai cih genna ah, “Mi honpite’ Topa in hih bangin ci hi: ‘Note tungah thukhen dingin ka hong pai dinga, ai tawite, numei tawh mawhte, a manlopi-a teci pangte, nasemte’ thaman piakna-ah khemna a zangte, meigong, tagah, leh gamdang mite a zawhthawh bawlte, leh kei hong zahtak lo mi khempeuhte’ lang khatah teci ka pang ding hi,” Mal. 3:5. Jude in zong tua thu mah a gen behna ah, “Topa in mi khempeuh thu khen in, Pasian’ thu a deih lo mi khempeuh in Pasian’ deih loh a bawlna uh na khempeuh a kipan Pasian’ thu a deih loh uh mawhna a neite in, Topa tungah gensiatna kam khempeuh kilangsak ding a hi zongin, Topa in akisim zolo misiangthote tawh hong pai khawm ding hi.” Jude 14,15. ci hi. Hih Topa hong paina pen A Biak-inn a hong paina tawh a kibang hi loin hun tuam tuak, thu tuam tuak a hi hi.

Dan. 8:14 a Siangtho Bel Mun siansuah dinga eite’ Siampilianpa hong paina, Dan. 7:13 a Tangkumpu kianga hong paina, leh Malakhi sunga Topa a Biak-inn a hong pai pen a hun, a thu a kibang a hi hi. Matthai 25 sungah Khrist in nungak 10 tawh genteh in, Zipipa hong tun’ na thu gentehna zong na gen hi.

1844 kum khuakhal laitak leh phalbi mong kikaala ki tangko, “Ngai un, Zipipa hong tung ta hi”, cih pen a hi hi. Tua genna ah, Nu-ngaak te a pil leh a hai om thu a gen hi — pawl khat in Topa hong pai ding a lam en, Amah a mu nuam takpi- a tha nuam pawl, a pawl a kha lau man peuh uh a a lawp pak lel te, leh thumaan thei a lungkim lel Pasian thupha a ta sam pawlte a hi uh hi. Thu gentehna ah Zipipa hong tun ciangin “ ana ki ging khol sa te Amah tawh sung tum in gual nuam uh hi,” ci hi. Hih laitak ah Zipipa hong pai hun pen mopi ma a hi hi. Mo pawi pen Khrist in A mite Ama gam sunga a lut sakna lim ahi hi. Khuapi siangtho Jerusalem khua thak in tua Kumpigam khuapi Limla hi a, “Tuuno zi” a cih pen ahi hi. Vantungmi in Johan kiang ah a genna ah, “Hih lai-ah hong pai in. Tuuno’ zi ahi mo kong lak ding hi hong cih khit ciangin, Khasiangtho tawh kei a sang mual lian dawnah hong pai pih a, Pasian kiang vantung pan Pasian’ vangliatna pua-in hong kiasuk Jerusalem Khuapi Siangtho hong lak hi.” ci hi. Mang. 21:9,10. Mo cih pen tua Khuapi (427)Siangtho a hi hi. Zipipa dawn dingin a hong pai khia nu-ngakte pen Pawlpi cihna a hi uh hi. Mangmuhna sung ah Pasian mite pen mo pawi nitak an ne dinga kisam leengla te ci hi. Mang. 19:9. Leenglate pen Mo a cih tawh zong ki lak thei lo hi. Kamsangpa Daniel genna ah, Khrist in Taangkumpu kiang pan in “Ukna, minthanna leh Kumpigam a ngah hi.” “A pasal adinga ki zemsa-a om Mo tawh a kibang”, A kumpigam khuapi Jerusalem Thak a ngah ding a hi hi. Dan. 7:14; Mang. 21:2. Tua Kumpigam a ngah khit ciangin Amah in Aminthanna tawh kumpite’ Kumpi, topate’ Topa-in hong pai ta ding hi. Ama mite “Abraham, Isaak leh Jakobte tawh” Ama gam sung Ama sabuai-a “tu khawm” dingin hon khia ta dinga, Tuuno Mo pawi nitak an hong uum pih ding uh hi.

Taangkona in “En un, Zipipa hong tung zo hi” cih hi hi. 1844 khuakhal laitaka, tua tangkona hangin mi tul tampi in Topa hong pai ding lam en uh hi. A seh hun mah in A Kumpigam la ding, leh Mo nei dingin vantung Taangkumpu kiang ah a hong pai a hi. Mite lam et bangin leitung ah hong pai lo hi. “A na ki gingkhol te Amah tawh mopawi ah lut uh a, kong a ki khak hi.” Amaute hih mopawi ah a pumpi uh tawh va om hi loin, amau pumpi leitunga omlai sapi mah in a thu tawh tua vantung ah a om uh a hi zaw hi. Khrist nungzuite in “Tua Mopawi pan a Topa uh hong pai kik ciang dong a ngak uh” hi zaw hi. Lk. 12:36. Ahih hangin amaute in Ama nasep a theih pih uh kul a, Upna tawh Ama nung zui in Pasian mai ah Amah tawh a pai khawm uh a hi hi. Hih a amau mopawi pai pen a thu omzia tua bang na hi zaw hi.

Thu gentehna sungah a meivak a meitui thunte bek mopawi ah lut uh hi. Laisiangtho thumaan thei a Kha Siangtho leh Pasian thupha a neite, zan lungkhamna thuaka lungduai taka ngakte, a kitel zaw khuavak mu nuam a Laisiangtho sung a zong khia beh zel te, in hih van Biak-buh tawh kisai thumaante mu khia uh hi. Honpa in mawhsutna thukhenna tawh athuah ziate thei uh hi. Tua manin van Biak-inn sunga Ama nasepna zong upna tawh ah zui thei uh hi. (428)Laisiangtho teci pan’na khempeuh a saang te in hih thumaan a genna te uh ki bang sisek a, Palai nasep a zawh siang nading nasep seem ding a Pasian mai ah Khrist a lut pen upna tawh na zui uh hi. Tua te pen a tawpna ah Ama kumpigam a ngah khawm pih ding mopawi siimte in gen hi.

Matthai 22 sung ah mopawi tawh lim laka genna khat mah om hi. A mopawi ma in Dawpkholh thukhenna om a ahihna tel takin a gen hi. A mopawi ma deuh ih Kumpipa hong lut a, leenglate en hi. Mi khempeuh in niin baanglo, tuuno sisan tawh ki sawp mo pawi puan paak ahi gamtat hoih a silh uh hiam sit tel hi. Mang. 7:14. A cinglo mi nawh khia in, mo puanpaak silh a a muh teng saang hi. Kumpigam sung Tokhom tunga tutkhawm pih theih dingin cing hi ci in seh hi. Hih gamtat sittelna, Pasian Kumpigam adinga ki gingkhol khentatna pen Dawp kholh thukhenna hi a, van Biak-buka nasep ki zawh siang nading zong hi ta hi.

Dawptelna a ki zawh ciangin, khang tawntunga Khrist nungzui ka hi a cite’ thuteng a ki sittel ding hi. Tua khit ciangin, hun hoih hehpihna leh migitna kongpi ki khak ta ding hi. Kam vui tomno khat tawh hi bangin ki gen hi, “abaihsa a om nungakte tawh mopipa pawi sungah a lut khawm khit uh ciangin, kong a khak uh hi,” a cih thu in Topa nasep a mahialna ciang, leh mihing hotkhiat nadinga sepna a kim dong hong tun’ suk hi.

Leitung Biak-buk nasepna in vantunga sepna lim a ciing ahi hi. Kilemna ni in Siampilian pa in a Siangtho Bel Mun a lut ciangin, Siangtho Mun kici a dei masa sunga nasepna a khawl ta ahi hi. Pasian in, “Israel mihon khempeuh adingin kilemna a bawlkhit hong paikhiat matengin kikhopna buk sungah kua mah omlo ding hi,” ci in thu pia hi. Siampilaibu 16:17. Tua lim mah zui in Khrist in Siangtho Bel Mun a siansuahna bawla a lut ciangin a dei masa sunga mawhsutna nasep pen a khawl ta a hi hi. Tua dei masa sunga mawhsutna (429)a zawh ciang mah-in a dei nihna sung nasep aki pan ta a hi pah zel hi. Limciin nasepna ah Siampilianpa in zong Siansuahna(Kilemna) ni ciangin Siangtho Mun nusia in mawh thoihna gansi tawh Pasian mai ah lut a, a ki sik kik tak tak Israel te mawhna te va sut sak hi. Tua lim mah zui in Khrist in eite Palai sepna cial khat zo ta a, a cial dang khat ah lut in mawhneite adingin Pa mai ah Ama sisan tawh va lut ta a hi hi.

Hi bang ditdet thu Jesu a Lam-ente in 1844 kum in thei nai lo uh hi. Honpa hong pai ding a lamet hun uh a khen’ khat ciangin Ama hong pai ding bel nai pel mawh ve ve ding hi ci in um uh a, thu piang khat bel om ham tang ding hi ci a a up mah bangun Pasian mai a Khrist Palai nasepna cial masa a zo ta na hi takpi hi. Topa meii tawh hong pai mazek in mite hun hoih hehpihna kongkhak ki khak ta ding cih Laisiangtho hilhna amaute tung ah ki lak hi. Mite in zongin, kiu in, a kah uh hangin hehpihna kong ki hon’ nawn lo ding hi Laisiangtho in a cih hun pen tua hun ciang a hi ta hi. Khrist hong pai ding hi ci a a up ni uh hi thu hi a, Ama hong pai ma zek a hong om ding a hi kei nam ci in ngaihsun uh hi. A kosiathei mite hansanna leh gamtatna te hangin, Thukhenna hun hong tung zo hi ci a patau kona lah ki tangko khin ahih manin, leitunga ding in asep ding uh aman khinta in seh uh hi. A gammang mawhnei mite gup khiatna ding zong lunggulh in nei nawnlo uh hi. Pasian in Lungdamnathu ading in hehpihna kong khak ta ahih manin, a Khasiangtho zong a dokkik ta bangin ngaih sun uh hi. Tua thu teng in hun hoih bei in “migitna kong ki khak zo hi,” ci-a a upna uh a kip sak hi. Biak-buk thu a tel kan uh ciangin thuman khuavaak aki tel zawin hong mu uh hi. Ni 2300 beina 1844 kum ciangin vai thupi khat tei tei piang ding hi cih a lametna uh bel a maan a hih lam ong tel ta uh hi. Mihing te in Pasian mai a zuat theih nading uha kum 1800 vaal a kihong hehpihna leh lametna kong khak pen kikhak in, mawh mai siang na ding in Siangtho Bel Mun ah Khrist’ siampi sepna tawh va lut hi. Ama mawhsutna cial khat ki khak ta a, a cial dang khat hong sem ta a hi hi. (430) Mawhneite adingin Khrist mawhsut nasepna “kong a ki hong” lai cial khat Van Biak-buk ah a om lai hi.

Mangmuhna sunga Khrist in pawlpite a hopihna kammal pen tu laitak hun a hi hi: “A singtho mi, a thuman mi, David’ konghon’na anei mi, kuama theih loh dingin hong in, kuama hon’ theih loh dingin a khak thei” ci hi. Mang. 3:7,8.

Tua hi a, Jesu in mawhsutna nasepna ah a lut ciangin upna tawh a zuite in Ama Palai nasepna nop tuam pih uh a, tua mawhsutna nasep a entel ding khuavaak hong kipia pen a nial mite in tua noptuamna ngah lo uh hi. Khrist hong pai masak lai a khuavaak a na nial Jewste, leh leitung Honpa-a Amah a saang nuam lote in Ama hong maisakna ngah thei lo uh hi. A Palai sepna hangin a nungzuite in thupha angah theih nading in Jesu van ah kah to-a, Van Biak-inn sung ah a lut ciangin Jewste khuamialpi sung ah ki nusia cip lel ta ahi hi. Leitunga amau bawl niloh lai lai ki thoihna leh biakpiakna teng a mawkna asuak hi. Tua amau bawl lai lai limciin’na mawhsutna pen a beita ahi hi. Mihingte muh theih sepna pen Pasian mai ah a ki bei sak ta hi a, tua kong ki hong nawnlo hi. Jewste in vantunga Ama sep mawhsutna bek tawh a ki ngah thei hotkhiatna na nial kha khin zo uh hi. Tua ahih ciangin amau in Pasian tawh kizopna nei lo uh hi. Amau adingin kong ki khak ta hi. Amaute in Khrist thei lo uh a, Pasian mai a ki thoihna maan leh Palai in saang lo uh ahih manin Ama Palai sepna noptuam pih kha lo uh hi. Tua thu um lo Jewste omzia in tu hun-a thu umlo Khristian te omzia ding kawk khol a hi hi. Amau in a migi Siampilianpa nasepna a theih-in thei nuamlo tang hial uh ahih manin thei kha lo pah takpi uh hi. A lim ciing nasepna a ki zat lai-in Siampilianpa Siangtho Bel Mun ah a lut ciangin Israel te khempeuh biak-buk kiim ah ki khawm uh hi. A ciliap (431) huai thei pen pen ki niam khiatna tawh Pasian mai ah ki aapna nei uh hi. A mawhnate uh maisak nading leh mipi lak pan paih khiat athuakloh nadingun a thuum uh hi. Tu in a tatak Siampilianpa in siansuahna(kilemna) a bawl laitak hi mawk hi cih ih theih ciangin bang zah takin ki aap pha zaw lai ding kul hiam cih phawk huai mah mah hi.

Pasian in migitna tawh patau kona a sawl pen nial mawk ding hi het lo hi. Noah hun lai in tangko ding thupuak khat ki pia hi. Tua thupuak ana saan’ zia uh tawh kizui in amaute a suakta ding uh ahi lhi. Amaute in thupuakna nial uh ahih manin Pasian Kha Siangtho in mihing te kiang pan ki dok khia kik a, tuileet vuh cip in a ki sia cip uh hi. Abraham hun lai in Sodom khua a teengte mawhna pan a dal Kha Siangtho daai hiau hi. Lot, a zi leh a tanu nihte lo buang van pan-a ki khiat suk meikuang in su mai mang cip hi. Tua mah bangin Khrist hun ciangin zong ahi leu leu ding hi. Thu um lo tua hun lai a Jewste kiang ah, Pasian Tapa in “En un, na inn uh mi omlo gam simthamin kinusia ding hi” ci hi. Matt. 23:38. Ni nunungni en suk leu leu in mong neilo vanglianpa in, “Tua mite in gupna a ngah nadingun ki-itna tawh kipawl thuman a sang kei uh hi” ci hi. “Tua ahih ciangin amuate in thuman thutak umlo in, gitlohna-ah a nuamsa mi khempeuh in thukhena ngah nading un, zuau thu um dingun, khemna in hahkata a sep theihna thu Pasian in amaute lakah a piangsak hi,” ci hi. 2 Thess.2:10,12. Pasian thumaan kihilh pen nial uh ahih manin Pasian in Kha Siangtho dok khiat ciangin, a deih zawk uh zuau kheemna tawh a ki diah cip ta uh hi.

Ahi zongin Khrist in mihing te ading Palai seem lai ta dih a, a zong mite tungah khuavak hong pia thei lai hi. A masa in Jesu alam ente in hih thu atheih loh uh hangin a nung muh tel uh a, Laisiangtho in amau dinmun maan hilh tel ahih ciangin a mai uh hong vang pha saan leu leu hi.

1844 hun hong bei a, Advent thu upna a leen lai te tung ah bawlsiatna lian thuak hun tawl khat sung hong om hi. Amaute in amau din mun maan a tel theih man un Van Biak-inn ah a lungsim uh nga-in a ki tawl dam sak uh hi. Mi pawl khat in Kha Siangtho makaih Advent nasepna pen Satan makaih leh a sawltakte bawl, ci in hun seh hilhkholhna (432) nial-in nusia uh hi. Pawl khat in bel sepna omsate ah Topa in hong makaih hi cih thei in kip takin leen cinten uh hi. Pasian deihna theih beh zel uh-a, A Siampilianpa in amaute’ mawhsut nadingin biakbukah a dawlnihna ki pan ta hi cih a mu uh hi. Tua pen upna tawh ih zuih kul hi ci in mutel uh a, leitunga pawlpi nasepna zong ma kihial ta ding hi cih a thei uh hi. Amautein vantung mi khatna leh nihna tangkona atel zaw in thei uh a, Mang. 14 sunga vantung mi thumna tangkona thu saang ding leh tangko sawn dingin hong ki ging ta uh hi.

Tags: GC, SOP