HEHPIHNA HANG BEK

HEHPIHNA  HANG  BEK

       Hih thuhilhna pen thuman thuhilhna hi ding tawh kibang napi, limtak ngaihsun lehang a man hetlo, mi tampi a paikhialsak khin leh paikhialsak lailai ding, a lauhuai mahmah thuhilhna ahi hi.  Tua ahih manin tua bang upna man lote a man lohna lahkhiat leh thuman lampi hilh ding pen tavuan lianpi hong suak hi. hristian tamzawte upna-ah, “Jesuh Khrih singlamteh tunga a sih ma, thuciam lui hun lai-in Thukham zuih kul a, Sabbath zong tan kul hi.  Tua thukham zuihna pen amaute gupna ngahna ahih manin thukhamte hoih taka a zuih uh kisam hi.  Ahi zongin, tua pen mihing in cin zo lo ahih manin Jesuh hong sih kul ta hi.  Israelte’n thukham hoih tak zui zo hi leh Jesuh sih kisam lo ding a, zui zo lo ahih manun Jesuh sih kisam pelmawh ta hi.  Tua ciangin Jesuh in thukhamte a kimin hong zui a, eite tangin singlamteha sihna hong thuak hi.  Tua a sihna hangin hehpihna tawh gupna ngah,  mawhmaisak ihi hi.  Tua ahih manin Khrih i up nak leh thukham zuih kul nawn lo hi.  Hehpihna hunah om zo ihih manin thukham in hong uk nawn lo hi,” ci uh hi.

A Man Lohna te:

  1. Hih thuhilhna-ah Jesuh singlamteh tunga a sih ma hunin mihingte in thukham hoih taka zuihna hang tawh gupna ngah thei, thukham zuihna in hotkhiatna pia thei danin hilh hi. Hih thuhilhna pen Lai Siangtho thuhilhna tawh kitukalh pha mahmah hi.  Lai Siangtho in, “Upna hangin Pasian” hong hehpihna tawh hotkhiatna a ngah ihih thu (Ef. 2:8) leh, Thukham zuihna hangin kuamah in Pasian tawh kipawl theihna ngah zo lo (Rom 3:20; Gal. 2:16; 3:11) ahihna thu siang takin hong gen hi.  Hotkhiatna i ngah theih nadingin Pasian’ hong piak Jesuh sim loh leitung khempeuhah min dang khat zong om lo hi. (Sawltak 4:12).
  2. A nihna-ah: A man hetlo hih thuhilhna sungah, “Jesuh sih ma huna mihingte adingin Pasian pen mi veet, itna nei lo, gupna a ngah theih nadingin haksa taka thukham zuih ding, mihingte tunga kal ngiat Pasian, hehpihna nei lo Pasian hi,” ci-in ngaihsutna mite nei sak hi.  Bek tham loin, singlamteh tunga Jesuh sih khit pan kipanin mihingte adingin Pasian pen migi Pasian, muh zia san zia a zai Pasian, Thukham zuih zong kul nawn loa mihingte tunga hehpihna a nei pha saan Pasian danin hong um sak hi.  Hih thuhilhna in gupkhiatna nam nih a om danin hong umsak a; singlamteh tunga Jesuh a sih ma-a mite gupna ngahna pen “Thukham zuihna hang” hi-in, Jesu sih khit cianga mite gupna ngahna pen “Hehpihna” hang hi, ci-in hong um sak hi.  Hih thute Lai Siangtho thu tawh kilehbulh mahmah hi. (Rom 3:23; Titu 2:11).
  3. A thumna-ah: hih upna leh thuhilhna a man lohna thu khat leuleu ah; “Israelte’n Thukham zui zo hi leh Jesuh sih sese kul lo ding a, ahi zongin thukham zui zo lo mawk ahih manun Jesuh sih hong kul ta hi,” ci uh hi. Tua bangin Israel te thukham zuih zawh lohna hang beka Jesuh sih hong kul, Israelte’n thukham zui zo hi leh Jesuh si lo ding- a sih zong kisam lo ding hi cih thuhilhna zong Lai Siangtho thu tawh kitukalh pha mahmah hi.  Jesuh singlamteha a sih nading thukhun pen piancil lai peka a kikhung khin, leitung mihing a kipiansak ma, Israel minam om ma pekpeka Tawntung Pasian’ vaihawm khitsa ahi hi.  Sawltak Piter in, “Pasian in hih bang dingin leitung pian ma pekin Khrih a teelsa hi a, …..,” (Peter 1:20) ci hi.  Sawltak Pawl in zong, “Thu zuau a gen ngei lo Pasian in nuntak tawntungna thu tangtawng pekin hong ciam hi,” (Titus 1:2) ci hi.
  4. Mi pawlkhat in, Singlamteh tungah Jesuh a sih ma hunin hehpihna om lo, thukham zuihna leh gamtat hoihna tawh mite in gupna ngah uh a, Jesuh sih khit ciangin hehpihna tawh gupkhiatna ki ngah hi-in, tu hun pen ‘HEHPIHNA HUN’ hi ci uh hi. Thuciam Lui huna mite adingin Pasian pen hehpihna nei lo Pasian danin hilh uh hi.  Singlamteh tunga Jesuh a sih tak ciang Pasian in mihingte nakpi taka hehpih tawm keei danin um uh hi.  Hih upna pen thuman tawh kibang napi man hetlo, Lai Siangtho thuhilhna tawh kilehbulh mah mah thu a hi hi.

      Peter in, “Pasian in hih bang dingin leitung pian ma pekin Khrih a teelsa hi a, note a hong khualna-in tu hun nunung ciangin Pasian in note kiangah amah a hong lakkhia pan ahi hi.” (I Peter 1:20) na ci hi.   Tua thu thukim pihin Pawl in zong, “Khrih hangin ama mite ahi dingin leitung a pian ma nangawnin Pasian in a hong teelsa ihi hi,(Ef. 1:4) ci hi.  Tua thu ki-imcip Jesuh Khrih hanga lungdamna thu pen mi khempeuh in Pasian umin a zuih theihna dingin tu-in Pasian thupiakna tawh a hong kipholak ta ahi hi. (Rom 16:26).

      Singlamteh tungah Jesuh a sih tak ciangin Pasian in eite a thakin hong hehpih gawp hi loa, Adam leh Evua te mawhna-ah a tuk uh a kipanin kikhel ngei lo tawntung itna Pasian in leitung pian ma peka a kholsa a lamdang hehpihna, “Numei suan in gul lutang sunim ding,(Pian. 3:15) cih thu pulak khia pah hi.  A cih nopna-ah, “Jesuh Krih in mihing bangin hong piangin Adam leh Evua te mawhna hangin hong si ding a, mawhna a pankhia-pa Satan lutang sunim ding a, maimangsak ding hi,”  cihna ahi hi.

      Mihing a kipiansak ma-in, Pa leh Tapa te thu kikumin, mihing bawlin tua mihingte mawhna sungah tuk zenzen leh kua in mawh pua-in tankhia ding cih kikumin geel khol uh hi.  Leitung leh mihingte a bawlpa ahi Jesuh in, “Ka bawlsa mihingte mawhnaah a tuk khak zenzen uh leh KEIMA’N a mawh pua-in mawhna thaman sihna thuak sak ning,”  ci-in mawhmaisakna dingin ama pumpi a piak ding thuciamna na bawl khin zo hi. (Heb. 10:5-7; Late 40:6; Johan 1:1,2).

See also  Tanu/tapa neite theih ding thu

      Hih thute pen leitung pian ma peka thu tawh a kikoih khol gupkhiat nading geelna thu ahi hi.  Sawltak pawl in, “Pasian in leitung a pian ma pekin Khrih Jesuh tungtawnin hih HEHPIHNA hong pia hi.(2 Tim. 1:9,10) na na ci hi.  Hih thu gil mahmah a, thuk mahmah ahih manin i tel theih nadingin Kha Siangtho huhna kisam hi hang.  Ci leh sa lungsim in tel zo lo hi.

      Tua ahih manin, Adam leh Evua te pan kipan gupkhiat ding mi khempeuhte pen gamtat hoih man hi lo-in, “Ama geelna leh HEHPIHNA hanga gupkhiat” vive hi ding hi hang.  Singlamteh ma leh singlamteh khit-a mite zong kilamdanna om tuan loin gupna ngahna a hang kibang kim ding uh hi (Rom 3:23).  Khrih sihna leh thawhkikna huhau-in, a khawnkhonga mawhmaisakna leh hehpihna tawh gupkhiatna ngahte vive ihi ding hi.  Eite in hotkhiatna i ngah theih nadingin leitung khempeuhah Pasian in hong piak min dang khat zong om lo hi.  Topa Jesuh bek mah mi khempeuh adingin Gumpa ahi hi.  Bang hang hiam cih leh mi khempeuh in hotkhiatna a ngah theih nadingin Pasian in ama hehpihna lak khin zo hi (Titu 2:11), a cih mah bangin!

Singlamteh Ma-in Zong Hehpihna Bek Mah:

    Gupkhiatna in Hehpihna hang bek hi, nang hanciam zawhna leh thukham zuihna hang hilo hi. Agelh Pr Dr Pl Biakchawna, translated by VL ChhawnaThuciam Lui-a Mite Singlamteh Hanga Gupkhiat:

      Adam leh Evua te mawhna-ah a tuk uh ciangin mawhna thaman sihna, tawntung sihna thuak ding hi ta uh hi.  Ahi zongin tawntung Pasian geelna leh hehpihna tawh amaute thakhat thu-in beimangsak pah lo-in, upna hanga hehpihna tawh gupkhiat ahih kik theih nadingun kong honsak zaw hi.  Leitung piancil-a a kigo Tuuno geelkholhsa a om pen um uh hi cih lah nadingin a mawhna tangun tuuno go-in biakpiakna pia uh a, tua tuuno sisan luangkhia tungtawnin upna hanga mawhmaisakna ngah uh hi.  Tua biakpiakna tuuno vun tektek tawh Topa’n amaute pumpi tuamna savun puantual bawlsak hi.  Theitehte suahkhia-in savun puantual tawh tuam ta hi. (Piancil 3:21).

      Hi thute in mihing hoihna leh hanciamna hanga gupna ngah ihih loh lam; Khrih dikna puantual Topa’n hong silhsaka, ama hehpihna hang bek tawh midiktanna leh gupkhiat ihih hong telciansak hi.  Isaiah in, “Amah in hotkhiatna puan kei hong silhsakin, thumanna puanpi tawh kei hong tuam khin hi,” a cih mah bangin.

      Tua ahih manin, Adam leh Evua te zong “Ta neih (Jesuh Khrih)” hangin gupkhiat hi ding uh hi (I Timo. 2:15).  Tua mah bangin Kain leh Abel te zong Khrih singlamteh tunga a sihna lim ahi tuuno biakpiakna tawh kithawih ding thu Pasian in a hilhsa a hi hi.  “A upna hang mah tawh Abel in … a santheih huaizaw biakpiakna Pasian’ tungah a na pia hi.  Pasian in ama biakna na sang ahih manin a upna hangin mihoih hi, ci-in Pasian’ pahtakna a na ngah hi.”  (Heb. 11:4).  “A upna hang mahin Enok zong sihna tawh kipelh hi.” (a neu 5).  “Upna lo tawh kuamah in Pasian lungkimsak zo lo hi.” (a neu 6). 

      Tua mah bangin Noah in zong teembaw khat bawlin a innkuanpihte tawh na suakta a, a upna hangin mihoih hihna thu Pasian kiang panin a ngah hi (a neu 7).  Pasian in teembaw bawl dinga thu a piak bang linlianin, thumang taka teembaw a bawlna pen Pasian a upna hang ahi hi.  A teembaw    bawl pen gupna a ngahna hi loa, teembaw bawl nuam ding zah donga Pasian’ thu a manna leh Pasian a upna pen midik ahihna leh gupna a ngah lawhna hizaw hi.

      Lai Siangtho sungah, “Abraham in Pasian um a, tua a upna hangin Pasian in mihoihin a sang hi,”  ci-in kigelh hi (Rom 4:3; Gal. 3:6; Pian. 15:6).  Pasian in mihoihin Abraham a san hun pen a vun a ki-at khit hi lo-in a ki-at ma ahi hi (Rom 4:10,11).  Thukham a zuihna hanga gupkhiat hi lo-in, Pasian a upna hanga gupkhiat hizaw hi.  Pasian thukham leh thupiak te, a ngeina te a zuihna hang pen Pasian a up man hizaw hi (Pian. 26:5).  Mi pawlkhatte in, “Abraham in Jesuh singlamteha a sihna thu theih zong thei kha lo, Jesuh zong mu ban lo ahih manin Jesuh sihna hanga gupna om pen ngah thei lo ding hi,” ci thei uh hi.  Farisai mite in zong tua bangin ngaihsun uh a, Jesuh in, “Note pupi Abraham in keima hun a tun ding lawp mahmah a, amah in tua hun mu-in nuam mahmah hi,” a cih ciangin, “Nang pen kum sawmnga zong pha nai lo na hih manin Abraham mu ding na hi hiam?” ci-in leh dot uh hi.  Ahi zongin Jesuh in, “A taktakin ci lehang, Abraham a pian ma-in kei ka om khin hi,” ci-in a dawng hi (John 8:56-58).

      Tua ahih manin Abraham in Khrih leh singlamteh thu nak theih nak tel pha mahmah a, tua a thu muh leh a thu theihte lawppihin nuam mahmah hi.  Moriah mual tunga a tapa neihsun Isaak biakna tau-ah a piak lai-in, Pasian in a tapa neihsun Jesuh Khrih leitung mawhneite ading a piak nading thu a nuntaaknaah a taktakin na na telcian (experience) pha mahmah hi (Pian. 22:1-14; Heb. 11:17-19; Jeim. 2:21-24 en in).

      Tua mah tawh kibangin Moses zong Thuciam Lui hun, Jesuh suah ma peka a si khin zo hi mah taleh, Jesuh singlamteh tunga sihna hang bekin gupkhiat ahih veve-na thu Lai Siangtho in hong gen hi.  “Moses a gol ciangin Faro’ tanu’ tapa kicih ding a ut nawn loh ngamna zong a upna hang mah ahi hi.  Tomno sung mawhna sungah nuam takin om ding sangin Pasian’ mite tawh gimna thuakkhawm ding a utzaw hi.  Mailamah a thaman ding mukhol thei ahih manin Egypt gam sunga hauhna leh nopsaknate khempeuh sangin Khrih hangin simmawhna thuak taakzaw tham hi, ci-in a ngaihsun hi.  Moses pen kumpipa’ heh ding lau hetloin Egypt gam panin paikhia a, a kimu thei lo Pasian a mu bang keekin a nungkik hetlohna zong a upna hang mah ahi hi”  (Heb. 11:24-27).  Moses in Jesuh Khrih tel muh mahmah ahih manin, Khrih a kisimmawhna singlamteh pen leitung hauhna leh nopsaknate sangin thupi sazaw-in, kisialhpih tham sazaw hi.

See also  Marriage and Family

      Tua ahih leh, Moses le Thuciam Lui huna thu um mi gupna ngah dingte  khempeuh in singlamteh bangci muh theih hiam?  ci-in dotna nei kha thei hi teh.  Nisim-a biakbuk sunga siampi nasepna leh singlamteh liim ahi tuuno go-a kithawihna panin Jesuh singlamteh galmuh thei uh hi.  Thukham palsat mimawhte, thupiakna a om bangin a mipihte’ lak panin hawlkhiat ding leh suang tawh denlup ding ahi hi.  Hi mah taleh, a mipihte’ lak panin hawlkhiat ding ut lo, suang tawh denlup ding zong thuak ngam lo-in kisik a, a piangthakte in, a mawhna uh tanga a si ding tuuno hong paipih a, mimawhpa in tua tuuno lu tungah a khut nga-in siampite zakah a mawhna a pulak khit ciangin ama khut teek tawh tua tuuno go hi.  Tuuno sisan phulkhia a et gige ciangin mawhna ii lipkhaphuaina leh ama mawhna in bangzahin na susia hiam cihte limtakin ngaihsun (lungngai)-in a mawhnate a banbanin hong phawkkhia hi.  Tuuno mawhna nei lo ama khut teekteek tawh a tawl at-in sisan luangkhia a et ciangin mimawhte ading a si Pasian Tuuno Topa Jesuh, keima mawhna hangin ni khat ni ciangin hong si ding hi cih Kha Siangtho in tua mawhnei pa lungsim sungah theisak hi.  Tua mipa mawhnei ahih lam kiphawkin nehno-in dahin kap a, a mawhna hangin kisikin  piangthak hi.

      A mawhna hanga a kigo tuuno a sih phetin tua mimawhpa in midiktanna, mawhmaisakna leh mihoih hihna ngah hi.  Suang tawh denlup khuan om nawn lo hi.  Thukham hanga mawhsakna thukhenna leh kidenglum ding ahihna panin suakta zo hi.  Hih siampi nasepna nisimin pelh ngei lo uh hi (Siam. 1:4; 3:7; 4:4).  Hih nasepna in Pasian Tuuno Jesuh Kalani mualah eite mawhna tangin si ding ahihna lim na lak hi.  Khrih sihna hangin a khawnkhong-a mawhmaisakna i ngah theihna siang takin hong telsak hi.

      Ni khat ni teitei ciangin numei suan panin leitung tankhia ding Jesuh hong suak dinga, Eden mawhna sunga a si cip dingte honkhia ding leh a kikhak cip Eden kongkhak hong kik dingin Kalani singlamtehah a lauhuai mahmah sihna hong thuakin, sihna leh han khuamial khupletin, ni thum ni ciang hingkik dinga, mawhna salte suahtakna Jubilee daak hong tum ding hi; cih thute upna tawh ngaklah sain nisimin na gal et uh a, “Gamlapi-ah a om lai galmuhin na bia uh hi.” (Heb. 11:13). 

      Tua thute um takpi mah uh hi cih a lahkhiatna ding un Pasian thukham leh thupiakte zui-in a mawhnate kisik uh hi.  Biakbuk sung siampi nasepna tungtawnin nisimin Kalani singlamteh gal et uh hi.  Tua ganhing sisan a piakna te, Sabbath a tanna te, a vun atna te a gupna ngahna uh hi lo hi.  Tuate in gupna pia thei lo hi.  Tua a thukham zuihna khempeuhte a upna uh a lahkhiatna bek ahi hi.  A upna hanga Pasian thukham leh thupiakte zui hizaw uh hi.  Tua a upna ngiat uh pen, “Khrih hanga diksakna, a khawnkhonga a ngahna,” uh ahi hi.

      Tua hi a, Thuciam Lui huna mite in a hong piang lai ding ahi a hong tung nai lo Khrih singlamteh gupna thu masuanin nei uh a, gamlapi pan galmuh uh hi.  Um takpi mah uh cih lahkhiatnain a mawhnate uh kisikin Pasian thukham leh thupiakte, Moses thukhamte zui uh hi.  Ei, singlamteh khit cianga mite, AD kum 2000 khit cianga mite ihih leh, tanglai-a thu piang khinsa ahi Kalani muala a si Jesuh pen i nunglam leh et kikin i mu thei hi.  Tua Jesuh eite mawhna hangin si khin a, zong thokik khin ta hi.  Amah i up takpi nak leh gupna ngah dingte ihi hi (I Kor. 6:11).  Tua hi a, singlamteh ma leh singlamteh khit mihingte Kalani singlamtehah kituntuah khawm lianin, “A kisathei mite, Topa hang bekin kisathei ta hen!” (Jer. 9:24; I Kor. 1:31).  cih thu hong tangtung thei ta hi.

      “Amaute (Thuciam Lui huna mite) in lungdamna thu a zak mah bangin eite (Thuciam Thak huna mite) in zong i za hi.” (Heb. 4:2).  Tua ahih manin singlamteh om ma-a thu um mite leh singlamteh om khit-a thu um mite gupkhiat ihih theihna pen Topa Jesuh Khrih hang bek ahi hi.  “Midang kuamah tungtawnin gupkhiatna om lo hi,” cih i theih khitsa ahi hi.  Singlamteh om ma ahi a, singlamteh om khit ahi zong, cikmah hunin thukham zuihna leh gamtat hoihna tawh kuamah gupkhiatna ngah om ngei nai hetlo hi. “Note upna hangin Pasian hong hehpihna tawh gupkhiatna a ngah na hi uh hi.” (Ef. 2:8).     

Ih kibat Lohna Tawm Om:

       Ahi zongin, “Gupkhiatna-ah” hi lo-in thuciam lui hun leh thuciam thak huna mite ih kibat lohna tawm om hi.  Jesuh singlamteh hong sih ma thu um mite in Khrih hong si ding hi cih a up manun a mawhnate kisikin Pasian thukham leh thupiakte a zuih ban uh-ah, Khrih pen hun khat teitei ciangin hong si ding hi cih um ahihna uh lah nadingin Biakbuk sung siampi nasepna, singlamteh lim biakna pawite, khadet pawite, pawi sabbath te, pawi tawh kisai annek tuidawn te, vun atna te leh nisim mawhphelna ganhing sisan tawh biakpiakna te leh Moses thukhamte a zuih uh amau ading kisam hi.  Pasian thukham sawm banah Jesuh lim ahi tua ngeinate a zuih kim uh kul hi.

See also  Agriculture Campaign

      Tua vun atna te, singlamteh lim siampi nasepna leh Moses thukhamte pen singlamteha Jesuh a sih ma hun sunga zat ding bek hi a, Jesuh hong sih ciangin kisam nawn lo hi (Gal. 3:19).  Tua thukhamte tuni dongin Lai Siangtho sungah kigelh mah taleh a thupina leh a manphatna bei ta hi.  “Eite adingin a hoih lo, i mawhna a kiciamtehna khempeuh singlamteh tungah kilhcipin a beisak ta hi.” (Kol. 2:14) ci-in Pawlin na gen khin hi.

      Tua ahih manin, nek le dawn – Jesuh sihna ding lim ciing ahi tuuno sa nekna le leenggah tui dawnna te, biakna pawite, khadet pawi le pawi sabbath zatna te, vun atna cih te-ah kuamah in ngeina zuih ding bawl kul nawn lo hi.  Hihte pen mailamah a hong piang ding nate (Jesuh sihna leh siampi nasepna) lim hi lel a, ahi zongin tu-in a taktak ahi Khrih hong om ta hi.  A taktak siampi nasepna pen Khrih sep ding – Khrih aituam ahi hi.  A lim le a liim nasepna ahih leh leitunga om siampite (Levia siampite) aituam ahi hi.  A lim in a lah a taktak nasepnate pen Khrih aituam ngiat ahi hi (Kol. 2:14-17).

      Tua hi a, Thuciam Lui huna mite in Khrih a up manun mawhnate kisikin Pasian Thukham Sawmte a zuih ban uah, Khrih hong si ding cih lim ciinna nasepte khempeuh a zuih uh kisam hi.  Tua pen a upna uh a lahkhiatna ahi hi.

      Thuciam thak huna thu um mite ading leuleu ciangin “Jesuh si ding hi” cih lim ciin-na ahi ganhing sisan tawh kithawihnate le biakna pawi leh biakbuk sunga siampi nasepna te zuih kul nawn lo hi.  Jesuh um a, mawhna kisik a, a piangthakte in a upna uh a lahkhiat nadingin Pasian thupiak, thukham sawm a zuih ding sim loh a dang zuih ding bangmah kisam om nawn lo hi.

      Thuciam Lui huna thu um mite in Pasian thupiak Thukham sawm zui-in; Pasian dang nei lo, milim bia lo, Sabbath palsat lo, nu leh pa mawhna bawl lo, mi that lo leh a cian lai thukham dangte zuia hoih taka a nuntak mah bang un;  thuciam thak huna thu um mite in zong Pasian dang nei lo, milim bia lo, Sabbath palsat lo, mi that lo, nu leh pa mawhna bawl lo banah a cianlai thukham dangte zong zuia i nuntak ding kisam lai veve hi.  Bang hang hiam i cih leh Pasian Thukham sawm pen singlamtehah bei lo, kikilhcip lo, singlamteh ma leh singlamteh khitah a thupi dan kibang denden lai ahih man ahi hi. “Thukham a maiman’ ding sangin van leh lei a manthan’ ding olzaw hi.”  (Matt. 5:17, 18; Luka 16:17) a cih pen Pasian thukham sawmte a gen ahi hi.

      Rom 10:4-ah, “Upna a nei mi khempeuh Pasian tawh a kipawl theih nadingin Khrih in Thukham a beisak hi,” cih thu i mu hi.  Hih thu, mi tampi takte in Pasian thukham sawm beisakna sa khial kha uh hi.  Tua bang hi lo hi.  Moses thukham, Jesuh sih nading lim ciinna biakbuk nasepna leh biakna pawite tawh kisai thukhamte beikhin ahihna thu a gen hizaw hi.

      “Tua ahih leh hih upna thu i gen ciangin Thukham a phiat ihi hiam!  Hi lo hi; a kipsak semsem ihi hi,” (Rom 3:31) ci-a Pawl in a gen pen hih Pasian thukham sawm a gen ahi hi.  Khrih i up tak cianga kip taka i zuih ding thukham om a, tua thukham pen Pasian thukham, thukham sawm, sianthona leh hoihna thukham ahi hi.  A khat leuleu-ah Khrih i up tak cianga a bei i zuih a kul nawn lo thukham zong om a, tua in singlamteha Jesuh sihna ding lim a ciing biakna leh ngeina nasepna thukhamte hi-in, singlamteh om ma-a thu um mite adingin thupi mahmah napi, singlamteh khit cianga thu um mite adingin ahihleh kimanna nei nawn vet lo hi.  Tua pen a kibat lohna ahi hi.

      Tua ahih ciangin, “Tu-in ei singlamteh khit cianga mite in nipi kaal sim Sabbath, thukham sawm sunga nambat lina (Sabbath ni a siangtho-a zat ding phawk un) pen zuih kul nawn ding ahi hiam?”  ci-in na lungsim sungah dotna nei thei kha ding hi teh!  A dawnna pen, “Zuih kul pha mahmah lai hi” cih hi.  Bang hang hiam cih leh i gen khitsa mah bangin Pasian Thukham sawmte pen a bei mawkmawk thei lo a kip tawntung, a maiman’ ding sangin van leh lei a manthan’ ding a olzaw zah-a kip ahih thu Jesuh Khrih teekteek in gen khin zo hi.  Ahi zongin ute naute aw, “Thukham sawmte i zuih mana gupkhiatna a ngah hi peuhmah lo-in, piangthak khin, gupna ngah dingte in thukham a zuihna uh pen Pasian a itna uh a lahkhiatna hizaw hi,” cih thu pen mangngilh khial kha kei ta peuh ni.

      Amah Jesuh Khirh teekteekin, “Kei na hong it uh leh ka thupiakte na zui ding uh hi,” (John 14:15) na na ci hi.  Itna Johan in zong, “Pasian i it ciangin ama thupiakte a zui ihi hi,” (I John 5:3) na ci beh hi.

      Bang hun bang huna om mite, koi mun koi muna a teng mite, leitung mi khempeuhte adingin gupkhiatna lampi a kibang ahi hi.  “Upna hangin Pasian’ hong HEHPIHNA tawh hotkhiatna a ngah na hi uh hi.”   Note thalawhna hangin a ngah hi lo-in Pasian’ hong PIAKKHONG ahi hi.

      Hih thuman thu, siang taka na tel theih nadingin TOPA’N thupha hong pia ta hen.  Amen!!!

Na sim khit ciang na deihsakte simsak sawn in.

 

A gelh:

Pr Dr.PL.Biakchhawna

 

A let khia:

Pr VL.Chhawna

Download (PDF, Unknown)

Tags: ,

Admin

Admin

Top