ZSL 8: Huihpinung Tuipi pan Van Meei Tungah

Zomi Sabbath School Lesson 8: Huihpinung Tuipi pan Van Meei Tungah

Lesson 8: Huihpinung Tuipi pan Van Meei Tungah

*February 15–21

Sabbath Nitaklam                                                       Feb 15

Tukalsung Simding: Daniel 7; 2 Thess. 2:1–12; Rom. 8:1; Mk. 13:26; Luke 9:26; Luke 12:8; 1 Tim. 2:5.

Kamngah: “Hih leitung kumpi gam, vangliatna le liatna khempeuh, a Lianpen Pasian’ mite tungah a kipia ding hi. Amau kumpi za cihmah hunin beingeilo ding a, leitung ukna za a nei khem-peuhte in a thu uh mangin, amaute’ na a sem ding uhhi” (Daniel 7:27).

            Daniel 7 mangmuhna le Daniel 2 mangmuhna a kibang ahi hi. Daniel 7na in 2na a zaizaw in pulak hi.

            A masa in, Zanlai in mangmu a, huihpi 4 in tuipi kiloksak ci hi. Khuamial le tui in piansaksate ahihhang, tua piansaksate a subuai khat omtuak hi.

            A nihna in, a mangmuh ganhingte in, a siangtholo ganhingte hi a, piansakna thukham palsatna lim ahi hi.

            A thumna, tua ganhingte pen ukzawhna aana nei ci hi: Adam tungah Pasian piaksa ukzawhna aana pen, hih ganhing te’n sut hihtuak hi.

            Alina, Mihing’ Tapa hong pai ding, Pasian ukzawhna Amahmah in ngahkik ding hi. Adam in Eden ah a mansuahsa pen, Mihing Tapa in vantung’ thukhenna pan ngahkik ding hi.

            Atung a Laisiangtho sung gentehna ganhingte pen, a zaizaw a teltheihna dingin limpua vive hibek hi. A thupizaw deuh pawlkhatte pen vanmi in akhiatna gensukpah a hih manin, eite’n zong ihtelpah lel hi.

Sunday                                                                 February 16

Ganhing Li te

            Daniel 7 simin. Bang thubulpi Daniel kiang kilak a, bang mang mu hiam?

………………………………………………………………………………………………………………………………………………………………………………………………………………

            Daniel kiang a kilak ganhing malsimin, Nebuchadnezzar muh milimpi a khenhkhenhte tawh kibang hi. Athu a kicing zaw in honggen ding hi. Milimbia gamte pen, ganhing sianglo tetawh genteh hi. Alina lobuang teng, Daniel in a theihngei ganhingte vive ahi hi. Namkhat simin, amau gamtatzia le tong tawh kumpi khat limpua uh a, simmawhna tawh a kimawk bulhtawm hilo hi.

             Humpi: Humpi in Babylon tawh kituak mahmah hi. Kha nei cih zong, inn hoih mahmahte le Babylonte siamna teng cihna hi. Tua humpi a kha kibotkhia a, mibangin dingto, mihing lungsim ngahhi ci hi. Babylon gam le a kumpipa a cihnopna ahi hi.

            Vom: Vom in, Medo-Persia gampi hi a, a pum langkhat sangzaw cih zong, Persia in Media sangin lianzaw cihna hi. A ha kawm ah nakguh thum om cih in, Persia te’n, Lydia gam, Babylon gam le Egypt tungah gualzo ding cihna hi.

            Kamkei: A tangzang mahmah kamkei in, Alexander the Great phuh Greek gam ahi hi. Kha li in manlang mahmah cihna hi a, Alexander in, kum tawmveino sungin, leitung phellang zoman a hihna lak hi.

            A kihtakhuai le Ngongtat ganhing: A masalamte pen kibang cibek a, Alina pen ‘hi’ cipah hi. A masalamte pen “Humpi bang” “Kamkei bang” cibek napi’n, alina pen kibang hi cihetlo in sapi cipah hi. Hih kii-tamnei ganhing in, amasate sangin gilo zaw mahmah hi. Tua pen Rome gam a cihna hi in, mi gam sim, that, bawlsia, tuancil gawp takpi mah hi.

            Kumtul pawlkhat sungin, hih mihingte’ tangthute hong piangin beikhin hi. Atung a gamlum bialbual teng telcian in bang khamuanna peuh nanei hiam? Laisiangtho a muanhuaina hong bangci hilh naci hiam?

READ  ZSL 9: PAWLPI LEH PILNA

Monday                                                                February 17

Kii-neu

            Daniel 7:7, 8, 19–25 simin. Alina ganhing pan hong mengkhia, Kiineu’ vangliat na a nei kua hiam?

……………………………………………………………………………………………………..

            Zanni in, a gilomahmah ganhing kii sawmnei penbel milimbia Rome cih sinkhin hi hang. Tu’n, kiineu le a vangliatna ihsin dinghi. Mangmuh lai in, ganhing lina in kii sawm nei, kii thum kibawhkhiatna pan, kiineu khat hongpokhia, tua kiineu in in mihing’ mitnei in “kiphatsakna kam tampi pau” (Daniel 7:8) ci hi. Tua kiineu in, a lauhuai mahmah sapi ahi milimbia Rome panin hongpiang ahi hi. Tua kii in milimbia Rome khansausak a, a vangzong kipsak hi.

            Hih kii in misiangthote galin do cih Daniel in mu hi. Vanmi in, Hih kii pen kumpi khat mah hi a, langdona nam thum bawlding: (1) Sangpenpa langdo in kiphatsakna kampau ding, (2) Sangpenpa’ misiangte gal in do ding (3) Hun le thukham kheelsawm ding hi. Ama’n misiangthote zogawp ding hi. Vantungmi in, kiineu gamtat theih hun ding ciangtanh sak a: hunkhat, hunte le hunlang ci hi. Kamsangte’n hun acihteh “kum” hi a, hunte a cihleh a ki thuap hi a, “kum nih” hi. Tua ahih manin, kum thum le kumlang hi a, kum-ni paizia tawh et ciangin kum 1,260 ahi hi. Hih hun sungteng kiineu in Pasian langdo ding a, misiang te bawlsia in, Pasian’ thukhamna kheelsawm ding hi ci hi.

            2 Thessalonians 2:1–12 simin. Hi tengah Gilopa le Daniel’ Kiineu a kibatna bangteng hiam? Bang vangliatna peuh hi ding a, banghang hiding hiam? Milimbia Rome sungpan hong piangkhia a, tua hunpan leitung beidong, tuni ciangdong a kiplai vangliatna in bang hiding hiam?

………………………………………………………………………………………………………………………………………………………………………………………………………………

Tuesday                                                          February 18

Zumh ah Kituu

            Ganhing li teng le kiineu gamtatna teng a mangmuh khit ciangin, Kamsangpa in, Vantung thukhen zumhpi mu hi (Daniel 7:9, 10, 13, 14). Zumhpi a honphet leh, kumpi tokhomte hong kikoih in, Taangkum Pu hong tu hi. Taangkum Pu’ mai ah vanmi a tultul simte in nasem ngeingai uh a, thute kikhen in, laibu tezong kihong hi. A thupikhat ah, hih thukhenhun pen, kum 1,260 kiineu’ nasepteng a zawhkhit ciang (AD 538 – 1798) hiding a, Pasian’gam a phuh madeuh hiding hi. Mangmuhna sungah zong, thumvei a nuai a bangin ki pulak hi:

Kii-neu Hun (538 – 1798)

Vantung Thuhkhen Hun

Pasian Tawntung Gam Hun

            Daniel 7:13, 14, 21, 22, 26, 27 simin. Tua thukhenna in, Pasian’ mite a ding banghangin hoih hiam?

………………………………………………………………………………………………

            Laisiangtho lui sungah biakbuk lampan thukhenna omzel himahleh, hihteng a pen tua hilozaw hi. Kiineu bek hiloin, vannuai buppi thukhenna hi a, tawntunggam a uk, Sangpenpa in thukhen ding hi. Daniel 7 sungah thukhenna a kipatna a tawpna cihte kicingtak in gen tuanlo hi. Kiineu in Pasian’ mite a bawlsiatna hangin thukhenna ahi hi. Hihtengah, vannuai bup thukhen kipat-hun agennuam hizaw hi. Daniel 8 le 9 ah, tua thukhen kipat-hunpen, Mawhphel Ni hi a, biakinnpi siansuahna Ni cihthu maikal ah, sinlai ding hihang. Hih sinna panin, Pasian’mite tungah dawpkholh thukhenna omhi cihthu hong tellak hi (Daniel 7:22).

READ  ZSL 2: Laisiangtho’ Bulpi le Pianzia

            Thukhen Ni ciangin khamuanga omtheih nading, singlamteh ah Zeisu’sawpsiangna thu banghangin telhuaisa na hiam? Singlamteh tawhlo in bang lam-etna peuh ihneithei diam? (Rom. 8:1.)

Wednesday                                                         February 19

Mihing’ Tapa Hongpaina

            Daniel 7:13 simin. Hih Mihing’ Tapa acih kua hi a, Koici telgen theih ding nahiam? (Mk. 13:26; Matt. 8:20; Matt. 9:6; Luke 9:26; Luke 12:8)

………………………………………………………………………………………………………………………………………………………………………………………………………………

            Thukhenna a kipatlian le a mi thupi penpen khat hong lut hi: Mihing’ Tapa ahi hi. Kua a hiam? Amasa, Mihing’ Tapa in vanmi ahi hi. Ahih hang, a taktakin, mihing’ngeina neithuah hi. Amah pen Pasian-Mihing hi a, thukhen dingin hong lut ahi hi. A nihna ah, tua Mihing’ Tapa vanmeei tung tuangin, a nihveina hong kumsuk ding theikim ciat hi hang. Daniel 7:13 sungah, Mihing’ Tapa in vantung pan tuaksuklo a, TaangKumPu’ maiah kipheikhiin ci hi. A thumna ah, Mihing’ Tapa vanmeei tung tuangin, Topa in hong kumsukta ci hi. Hi lim in, tanglai siampiliante, meei in tuamin, siangthopen munah, Mawhphel Ni in ava lutna thu hong phawkkik sak hi.

            Mihing’ Tapa pen kumpi hi a, “ukzawhna, minthanna le kumpiza ngah ahih manin, minamkimte, minam tuamtuamte, pau namtuamtuamte khempeuh in, Ama’na asem ding uh hi” (Daniel 7:14). Nasem cihpen “bia” zong hithei hi. Daniel 1 pan 7 dongsungah, 9veitak omhi (Dan. 3:12, 14, 17, 18, 28; Dan. 6:16, 20; Dan. 7:14, 27) cihteng hi a, Pasian tungah biakpiakna kihel hi.

            Pasian’ thukham kheelsawm ahihmanin, kiineu in Pasian tungah biakpiakna susia hi. Hih thukhenna in biakna maan hong mukiksak hi. Pope bawl biakpiakna in, Pasian le mipi kikal ah, amau palai in kikoih uh hi. Daniel in bel Pasian le mipi kikalah palai diktaktak pen Mihing’ Tapa bekmah hiding hi ci hi. Laisiangtho in zong “Pasian khatbek om a, Pasian le mite hong kilemsakkik thei Khazih Zeisu bek omhi” (1 Tim. 2:5) ci hi.

            Laisiangtho sung pan Zeisu nuntakzia ih simsimkhin zo a, Amah thukhenpipa ding cih na theihna in bangci in hong khamuangsak hiam?

Thursday                                                             February 20

Sangpenpa’ Misiangthote

            Hihlai muntengah Pasian’ mite tungah bangpiang ci hiam? Dan. 7:18, 21, 22, 25, 27.

………………………………………………………………………………………………………………………………………………………………………………………………………………

            “Sangpenpa’ misiangthote” cihteh, Pasian’ mite cihna hi. Kiineu in amaute do hi. A Pasian tung vuah citakuh ahih manun, papal hunlai in dona thuak uh hi. Christiante in, Rome kumpi hunlai in, nasia takin bawlsiatna thuak uh hi. Ahihhangin, Daniel 7:25 sung a bawlsiatnapen, Rome kumpi beikhit, hong pokhia kiineu in misiangthote a bawlsiat dingthu hizaw hi.

            Pasian’ mite peuhmahpen, leitung kumpite’n a bawlsiat tawntung ding kiphallo hi. Pasian’ gam in leitung gamteng’ mun luahta ding hi. Mang sung mahah, Mihing’ Tapa tungah “ukzawhna le kumpiza kipia hi” (Daniel 7:14) ci hi. Vantungmi in akhiatna a genciang, “misiangthote” in gamluah uh (Daniel 7:18) ci hi. Adang omtheilo hi. Mihing’ Tapa in Pasian’aa ahihmanin, Ama gualzawhna zong Amite’ aa ahi hi.

            Siampilianpa in, Zeisu kiangah, Messiah Pasian’ Tapa na hi takpi hiam ci in a dot ciangin, Zeisu in, Ps. 110:1 le Daniel 7:13, 14 te pan: “Ka hi hi, Vanglian Pasian taklam ah Mihing’ Tapa omin, meii lakah a hong pai namu ding uh hi” (Mk. 14:62) ci in dawng hi. Zeisu in, vantung thumaan tokhom ah tu in, eite palai hong sepsak hi. Khuamial ukzawhnate susiacip zo a, Amah a zuante gualzawhna angah uh hi. Launa ding peuhmah omlo hi. Paul in zong “Eite a hong itpa hangin hih thu khempeuhah gualzo pente ihi hi. Bangmahin ama’ itna tawh hong kikhensak zo hetlo ding hi. Sihna nuntakna, vantungmite vantung vangliatnate leitung a om nate, leinuai a om nate, Pasian bawlsa nate khempeuhin, I Topa Zeisu Khazih hangin, Pasian in eite hong itna tawh hong khenzo hetlo ding hi” (Rom. 8:37-39) na ci hi.

READ  ZSL 10: ARTS LEH SCICENCES LAM PILSINNA

            Daniel mangmuhna in, kum tultampi peklai in, leitung tangthute mukholkim dildel hi. Mailam hun adingin, Pasian’ kamciamte ih muantheih na’ng hong bangci huhsa nahiam?

Friday                                                                  February 21

Ngaihsutbeh Ding: Hih tangthute a tungthambek enpakleng, Rome gampen saklam migilo gamte’n simgawp in susia a, Rome khuapi abishop in zong, tua migilo gamthumte a suksiatna hangin, ukzawhna aana AD 538 kumin hong ngah cihbang hi pak lel hi. Rome kumpite’ ki-ukdaan pawlkhat zong zangsuk pah hi. Tuabangin, 1798 kum, Napoleon in pope a khiatsukdong mah vangnei uh hi. Hih kumpi in Rome kumpi bei sakpah lianlo in, bawlsiatna teng khawlsak hi. Pope in, Khazih aiawh hi ing acih banah, Laisiangtho sung pan a hilo upna thukhun pawlkhat bawltawm hi. Misite kikholna, mawh maisakna, mawhsuutna le Sabbath pan Sunday ah kheekna cihtepen, hun le thukham kheelsawm ding acihte hipah hi.

            “Mihing in, ama’thahatnabek tawh galpa mai ah dingzolo hi. Mawhbang a puanmah silh in, Pasian’ mai ah mawhna pulak ding hi. I mawhna khempeuh kisik pulak in thumleng, Zeisu in eite ading hong palai sak hi. Ama’n Calvary pi tawh hong mawhsakpa hong nolhsak hi. Ama thumanna hangin, vannuai leitungah, ukzawhna aana Aman ngah in, a Pa Pasian kiangpan hehpihna hong ngetsak thei hi. Hong mawhsakpa tungah, Amahin, “Topa’n hong taai tahen, Satan aw. Hihtepen, ka sisan tawh kaleisate hi uh a, meikuang sungpan kateenkhiat singkhuahte ahi hi” ci hi. Upna tawh Amah abeel mite “Na mawhna teng kong paihkhiatsak khin a, tu in, na silh ding puan thak ka hong pia ding hi” (Zechariah 3:4) ci hi. EGWhite Prophets and Kings. Pp. 586, 587.    

Kikup Ding Dotnate:

  1. Sapi linapan hong pokhia kiineu omzia le vang-liatnate lungngai kik dih in. Pasian’ mite abawlsia a, tuni ciang dong a kiplai, Rome gampan hong piangkhia a vanglian gamkhatbek bang gam hiam?
  2. Hizahin kician mahmah lel ahih manin, tua kiineu pen, Zeisu pian mapek a kum 100 vallai a beikhin, Greek kumpipa hi dinghi cihbang ngaihsutnate ih nutsiat theihna ding tha hong ngahsak tuam hiam?
Tags: ,

Admin

Admin

Top