Lesson 7: Humpite Kua pan Vanmite Kua ah

*February 8–14

Sabbath Nitaklam                                                         Feb 8

Tukal sung Sim Ding:  Daniel 6; 1 Samuel 18:6–9; Matt. 6:6; Acts 5:27–32; Mk. 6:14–29; Hebrew 11:35–38.

Kamngah: “Tua a hih ciangin vaihawmpi dangte le gam ukpite in Daniel’ nasepna encik in, a mawhna zonding a hanciam uh hi. Ahih hangin Daniel pen a thuman le a citakkhat a hihmanin mawhna le simtatna a muzo kei uhhi” (Daniel 6:4).

            Medo-Persia te’n Babylon a lakkhituh ciangin, Medes Kumpi Darius in, Daniel’ pilna thei ahih manin, ki ukna a thakpuahna ah Daniel kihelsak hi. Kamsangteekpa himah napi, a sepnate ah kuhkal mahmah a hih manin, kumpipa in, ama nuai ah gambup uksak hi. Athu kicing a kipulakloh hang, Daniel in hazatna mah phukha zel leuleu hi. Tangthu a tawp ma in, Daniel in Medo-Persia gam tungah thuman a, Pasian tungah thuman phadiak hi. Tua bangin, Pasian tungah a thumanna in thudangdangte tungah zong thumansak hizawtham hi.

            Daniel thuaksa bawlsiatna tepen, tu hun nunung eite aading, etteh takcing lel hi. Tua tangthu in, Pasian’ mite thuaksiatna peng ding ci hetlo hi. Khamuan ding panin, a sia tawh kidona peuhmah, a pha in zo tawntung ding, Pasian in a mite honkhia cih teci hong lak hi.

Sunday                                                                  February 9

A Haza Khate

            Vantung, hoihmahmahna ah, Lucifer in Khazih haza hi. “Lucifer in Zeisu Khazih haza hi. Vantungmi te’n, Zeisu’ dinmun man ahi, liatna ukzawhnate zahtakna tawh kunin a biak uhteh, Lucifer zong kuun pongmawk napi’n, a lungsimtawngah, hazatna le muhdahna omhi” EGWhite, The Story of Redemption, p. 14. Thukham sawmte sungah, hazatna kihel a hih manin, mithahna le guktaknate mahbangin siahuai mahmah hi (Pai. 20:17).

            Daniel 6:1–5, tawh Gen. 37:11 le 1 Samuel 18:6–9 cihte simkhawm in. Hazatna in bangzah in nasem hiam?

………………………………………………………………………………………………………………………………………………………………………………………………………………

            Daniel’ uksiamna pen kumpipa’n pakta mahleh, a dangte’n haza zawsop uh hi. A mawhna ding zongin pampaih sawm uh hi. A zonzon uhhangin, mu zolo uh hi. “A hih hangin Daniel pen a thuman le a citakkhat a hihmanin mawhna le simtatna a muzo kei uhhi” (Dan. 6:4). Aramaic pau in “citak” cih kammal pen “muanhuai” zong hithei lai hi.

            Daniel mawhbaanglo: ulian dangte in, ama langkhatah mawhna muzolo uh hi. Amau muhthu khatbel, a Pasian le Pasian’ thukham tungah, thuman citak cih mu uh hi. Daniel a mawhsakna dingun, Daniel in Pasian dang le Pasiandang’ thu zui in, gam langdo cihtawh mawhsak sawmta uh hi. Daniel omziate a etet uh ciangin, ama’ Pasian thukham tawh gam hong uk ding hi ci uh hi. Hihzah a Daniel cihtak hi zen!

            Bang ci bang hazatnate phukha a, nabangci phuut hiam? Hazatna limlim, khalam a dingin a lauhuaina banghang hiam?

Monday                                                                February 10

Daniel Ki-Thaangsiah

            Daniel 6:6–9 simin. Hih thupiak ii a nunglam ah bang ngaihsutna omhiam? Kumpipa kiliatsak koici zatsak theih hiam?

………………………………………………………………………………………………………………………………………………………………………………………………………………

            Kumpi Darius in, a sawtlo a, a paihkik ding thupiak-khat piakhia hi. Tumah lianin a kiphut thak gamthak makaite’ gamvai kimawlna thaangsungah awk kha hi. Darius in, gamkee 120 suah in, ukna aana zong tuate tungah hawmsawn hi. Hunsau a dingin kicinlohna tampi hong omhi. Huzaap neipian makaipi khatpeuh in gam satkham zothei hi. Ni 30 sung kumpipa bek zahtakna pia ding cihthu in, kumpipa tungah cihtakna le zahtakna pia ding cihthu in thuhoih mahmah tawh kibang hi. Makai uliante’n, hihthupen, ukpite, gamkee te le aana neite khempeuh huam ci napi’n, Daniel a helloh lamuh kumpipa’n theisaklo uh hi. Kumpipa pen pasian bangin bia ding cih nuam pongmawk hi. Persian kumpite in, ki pasian sak ngeilo uh hi. Ni 30 sung bekbek, pasiante tung thungetna peuhmah, kumpipa tungtawnlo in ngen theilo ding cih khamna ahi hi. Kumpipa’n a ngiimna bulpi uh kantel khalo hi. Gam langdona khamna ding a kibawl thukhunpen, Daniel suksiat nopna thukhun a hih leltaklam phawk zolo hi.

            Hih thukhun, thunih in paisak hi. Amasa in, thukhun a palsatmi, humpite’ kua denna ding hi. Hihzah thukhauh a gam vuah omngei nailo a, Daniel’ galte’n a bawltuam vilvel uh ahi hi. Nisuahna lam gam laizang a tangkumpite in, humpite thong sungah khawi uh a, kisapna a omteh khahkhia zel uh hi. Kumpite’thu manglo khawng a omuh ciangin, a balnen ding humpi zonzon kullo ding a cihna uh ahi hi.

            Anihna, thukhun kikheelthei nawnlo hi. A kikheel thei nawnlo “Medes le Persia te thukhun” Esther 1:19 le 8: 8 sungah omhi. Greek tangthupu Diodorus Siculus in, kumpi Darius III (Daniel sung a Darius hilo) in, a lungsim kikheel hi napi, sihdaan a piaksa mawh neilo khatpen khahkhia kik thei tuanlo ci hi.

Tuesday                                                               February 11

Daniel’ Thungetna

            “Thu na ngetuh ciangin, na inn sung uhah tumin, kong khak unla; na muh theihloh uh na Pa uh kiangah ngen un; tua hileh, kuama muhlohna ah na gamtat uh a hongmu na Pa un, note tungah thaman hong pia ding hi” (Matt. 6:6).

            Daniel 6:10 simin. Daniel in kuama muhlohna ah thu a ngetkhinkhian loh banghang hiam?

………………………………………………………………………………………………………………………………………………………………………………………………………………

                       Daniel pen gam makai khat, bek hilo, Pasian’ nasempa ahi hi. Kumpipa thupiakte langkhat ah bang omcih a theizo, amahbek ahi hi. Darius a dingin, a thupiak pen, gambup ki pumkhat na’ng hi mahleh, langdo pawlte a dingin Daniel a suksiat na’ng hiziau hi.

            Tua khempeuh nungah, thuman taktak in cileng, dawi in Pasian a langdona hileuleu hi. Tualai hun, BC 539 lai in, Daniel 7 sung a mangmuhna (553 BC) le 8 (539 BC) cihte, Daniel in mukhinzo hi. Tua a hihmanin, hihpen leitung vaibek a hilo vannuaihuam kidona a hihlam tellua hi. Pasian’ Tapa in leitung kumpite’thu mangmuhna a piakciangin, a khiatna a hilh vanmi (Daniel 7) in, tua haksatnate thuakzawh na’ng tha pia tawntung hi. A lawmte phutkhakte Nebuchadnezzar thupiakte tungtawn panin zong tha ngahtuam ding hi (Dan.3).

            Tua hang mah in, Jerusalem lam nga in, a thunget ngeina bangin, nikhat thumvei mah ngen tawntung lel hi. Midang, pasian dang tungah thungenlo ding cihthu ompipi mah, Daniel in tua ni sawmthum sungzong ki meelseel tuanlo in thungen veve hi. Gamkee ukte, uliante tampi lakah, Daniel amah bekmah kumpi’thu mangloin, mimal in om teutau hi. Ama thunget zelpen, kumpipa thukhunthak pianmapek pan azatsa ngeina ahi hi.

            Acts 5:27–32 simin. Hih hanthotna te kician mah naven, eite’n, mihingte bawlsa thukhun khatpeuh ih manloh ciangin, Pasian’ deihna bang a gamta ih hih ding bangci hih ding hiam? (Deihtak ngaihsut ding in, a upna khial a cihding sangin sihna a teelzaw mite)

Wednesday                                                         February 12

Humpite Kua Sungah

            Daniel 6:11–23 simin. Daniel in a Pasian tungah a cihtakna in bangzah vanglian cih a pomna in, kumpipa’n bang gen hiam?

………………………………………………………………………………………………………………………………………………………………………………………………………………

            Langdo pawlte’n, Daniel thunget manta uhhi-thupiak palsatna linlian ahi hi. Tua thu kumpipa kiangah hong pulak uh a, “tua Daniel, Judah gampan salmatpa” (Daniel 6:13) ci uh hi. Amau muhna ah, kumpipa pahtak mahmahpa pen, “sal” hilel ci uh hi. Kumpipa tungah “Na thupiakna a mangnuam kei hi” (Daniel 6:13) a ci uh hi. Tu petmah ciangin, kumpipa’n zong khem thuakin letmat thuhkha ahihlam hong phawkpha hi. Laisiangtho in “Daniel a suahtak theihna ding hanciamin nitum dong a ngaihsun hi” (Daniel 6:14) ci hi. Ahih hang, lai omsa mahbangin thudang hihzo tuanlo hi. Medes- Persiante thukhunte in a cihbang lian in hihkul hi. Kumpipa’n zong cih na’ng thei nawnlo in, Daniel humpite kua sung khiatsuk ding, thu pia tamai hi. Ahih hang, lametna kammal ahi “thuman takin nabiak na Pasian in hong honkhia tahen” (Daniel 6:16) ci in vaikhak hi.

            Laisiangtho sungah bel, humpite’ kua sungah Daniel in bangci hih cih om tuanlo mah leh, thungen ding cihbel theihsa hipah hi. Pasian in zong, Daniel cihtakna pahtawina in, vantungmi sawl in kemsak hi. Daniel liamhetlo in, a nasep semzom thei dingin omlel hi. EGWhite in, “Humpi’ kua sungah Daniel a khia dingte galte, Pasian in khamhetlo lel hi; vanmi gilote le leimi gilote’n a sepnopna uh semsak lel hi; ahih hang, Pasian in Amite kiciantakin honkhia a, thuman thutak in nasia takin gualzawhna ngahsakzaw hi” ci hi, Prophets and Kings, pp. 543, 544.

            Hih Daniel’ tangthu bel ahoihlam in tawp hi ven, a dangte e, Mk. 6:14-29 sung khawng, a hoih a tawp khollo hiven? Na teldan gen in.

Thursday                                                             February 13

Teci Pang

            Daniel 6:24–28 simin. Pasian tungtang kumpipa’n bang teci pang hiam?

………………………………………………………………………………………………………………………………………………………………………………………………………………

            Darius in Pasian phatin, a vangliatna pulak bilbel hi. A thupitna ah, kumpi lianpipi in Pasian’ liatna pulak zen hi. Nebuchadnezzar hun in zong ((Dan. 2:20–23; Dan. 3:28, 29; Dan. 4:1-3, 34-37) ah pulak hi. Darius in zong, Daniel kihotkhiat a muh ciangin, amasa Nebuchadnezzar sangin a nasiazaw in hih hi. A thupiaksa lumletkik in, mi khempeuh in, “Daniel’ Pasian kihta un” (Daniel 6:26) ci in thu pia hi.

            Daniel pen hotkhiatna lamdang ngah ahi hi, thuman citak, thusia in bawh, Pasian in thupha pia hi. Hih ih muhte pen mailam thupiang dingte ah, etteh dingte vive hi: Pasian in Amite honkhia ding a, migilo te’n thaman ngah in Topa’n leitung zo ding hi.

            Daniel 6:24. Hih munsan ah bang buaina om hiam? Banghang hiam?

            Thubuaisak khat omvat hi. Zite le tate pen ei ngaihsutna ciangah, mawhneilo napi’n thuak cih bangin ngaihsun hihang. Thumanlo cih koici gencian thei ding ih hihiam?

            Amasa in, Kumpipa in, Persian gam thukhun in a bawllai in, a innkuan un na ci hi. Tanglai thukhunte in, tayakhan peuhmah innkuan buppi in helhi. Dik hi cihna a omtheihloh hang, Persia thukhunte’n hibang hilel hi.

            Anihna ah, E’n bel Laisiangtho ciaptehna ciang bek a thei hihang a, kumpipa nasepte ih theihpih kei hi. Laisiangtho in bel Pa/Nu mawhna hang in tate thatlo ding (Deut. 24:16) ci hi.

            Tuabang thutanglote kawmkal ah, bang khamuan-na na neithei diam? 1 Cor. 4:5 simin. Bangci hiam? Banghangin thupi nasa hiam?

Friday                                                                  February 14

Ngaihsutbeh Ding: Daniel’suahtakna thute Hebrew 11 sungah omhi. “Upna tawh Gual zawhna” a cihte lakah “humpi-nelkai kamte humcip” (Hebrew 11:33) ci hi. Lamdang phamahmah hi. Theihding khat ah, Daniel bang a suaktate bek galhang kicilo a, a suaktalo sihna thuakte (Heb. 11) zong galhangte mah ahi uh hi. Pasian in, sihna tawh ahi a, nuntakna tawh ahi zongin hong zangthei hi. Daniel suahtak manin, mikhempeuh suakta pahlo ding hi. Zeisu ading upna hangin nuntaknapia mi tampitak omhi. Daniel tungah thupiang a lamdang hotkhiatnapen, Pasian in vannuai buppi hong uk cih hong theihsakna ahi hi. Amite khempeuh mawhna le sihna panin hong honkhia lai ding hi.

Kikupding Dotnate:

1. French mi Jean Paul Sartre in “mihingte’ pianzia a bul a bal teltheih nadingin abaihpen lampi in, khatvei ciangin Pasian suakding cih theihding hiziau hi” (Jean PaulSartre, Being and Nothingness: A Phenomenological Essay on Ontology, Washington Square Press, 1956, p. 724). Hihthu in kumpipa thaangawkna ahangthu bang honglak hiam? Eite bang dinmun peuhah ih omzongin, pilvangtak in hong kikhemnate, banghangin kidophuai naci hiam? Adang “Pasian batnopna” bang peuh a omthei diam?

2. Pasian tungah cihtakna lak dingin koibangin hong kisawlthei dingin na um hiam? Na nasep le na nuntakna hong sukha thei ding cih a thei khat a hithei diam?

3. Pasian in Ama deihna picing sak ding in Daniel a zat theihna’ng, Daniel sungah bang om cih namu hiam? Pasian hong panpihna tawh tuabangte nasungah nakhangtosak thei diam?