Sinna 2: I Khensatnate

Lesson 2                                                           April 6 -12

I Khensatnate

SABBATH NITAK                                                   April 6

Tukalsung simding: Eph 1:1-4; Matt 22:35-37; Matt 7:24,25; Pro 18:24; 1 Cor. 15:33; Eccl. 2:1-11.

Kamngah: “Topa’ na, na sepnop kei uhleh, gun galkhat aa, ana na sepsak uh napu napate uh pasian ahi a, note’ tenna gam Amor mite’ pasian ahi zongin, a na na sepsak ding peuhpeuh uh tuni-in teel un. Ahih hangin kei leh ka innkuanpihte in ahihleh Topa’ na ka sem ding uh hi” (Joshua 24:15).

            Nuntak hunsung in khensatna tawh kidim kinken hunlam na phawkkha hiam? Zingthawh hunpan kipan zan lupkik hun dongin theihkhak leh theihkhak loh khensatna vive tawh aki nungta hi.

            Khensatna abaihlua te pen ki ngeina seh mai a, khensatna a haksa mahmah pawlkhat in nuntakzia kikhel na’ng leh tawntung thu khawngtawh hong kizom to hi, ei ading bek hilo, i innkuanpih te ading zong hong hi toto thei lai hi.

            Tuadan khensatna lianpi te bangzahtak in i thupi sak a, bangci’n i khensat hiam? Khensat khialh manin mi bangzah in kisik in i om a, khensat khialhna te hang in bangzah in i thuak hiam? I hamphatna in mawh kimaisakna om hi. A siapen mikhat ading nangawn zong tatkhiatna leh damsakna cihte om hi.

            *Tu kalsung bupin, khensatna, khensat dingdan, leh i khensatna te i athu nungzuite tawh kisai zai takin i kikum ding hi.

SUNDAY                                                               April   7

Ngaihsut theihna leh Khensat theihna

            Mihing khat, apian mapekpan kipan hotkhiatna ngahding leh ngahlo ding cih Pasian in, geelkhin hi ci in Khristian pawlkhat in um uh hi. A mau upna in, ‘mikhat huntawpna ah kisia veve ding cih Pasian in theikhol a hih manin tua mi pen a kisia ding ngiat in Pasian in a gelkholhsa hi’ ci uh hi. Seventh-day Adventist te’n tuadan peuhmah ki sang theilo hi. Pasian in hotkhiatna ngah ding in mikhempeuh a sam hi. Nuntak tawntung ngah ding in leitung pianma pekpan in hong zawn khinzo hi.

            Eph 1:1-4; Tit 1:1,2; 2 Tim 1:8,9 sung sim in. Pasian teelsa mite cihthu tawh kisai bangci’n kigelh hiam?

……………………………………………………………………………………………………………………………………………………………………………………………………………………………………………………………………………………………………………………..

            Hih thu in bangzah takin lungdamhuai taleh mi phawlkhat mangthang veve ding uhhi (Matt 25:41). Banghanghiam cih leh, Pasian in eite hong teel khit hangin ei aituam ding khensat theihna thu zong hongpia veve hi.

            Khensat theihna tawh kisai Matt. 22:35-37 sungah bangci kigelh hiam?

………………………………………………………………………………………………………………………………………………………………………

            Topa in amah a it ding in hong tawsawn lo hi. Itna cihpen man ngenlo in a kipia hi. Lai Siangtho pen ‘Pasian in thahatna suanghetlo in mihing te ama lam ah a kaihna’ tangthubu hi ci’n kigen zel hi. Zeisu nuntakzia pan kilangh pen hi. mite’n amau khensatna ciat tawh Pasian lamah hong ki hei theih nading Zeisu lampi honsak hi. Pawlkhat in Pasian lam hongzuan a, pawlkhat in amah thahsawm uh hi.

            Pasian in hotkhiatna ngahding in mimal kim hong sap hangin tua letsong i san ding leh sanloh ding pen mimal khatciat kensatna hi. Khensat ding thutampi lakpan “kei leh ka innkuanpihte in Topa’ na kasem ding uh hi” cih khensatna in ei ading leh i innkuanpihte ading manpha pen hi.

MONDAY                                                              April 8

A dik a man khensatna te

            Khensatna i thupit zia theikhin tekding hi hang. Tuamah bang in khensatkhialhna i thunungzui leh adeih huai lo huzap te zong theikhin ding hihang. Tua hileh bang ci’n a dik leh a hoihpen in khensat theiding i hi hiam?Khensatna dik i neihtheih na’ng a kisam septheih pawlkhat hih Lai Siangtho munte ah zong ni.

1. 1 Thess. 5:17; James 1:5

…………………………………………………………………………

2. Isa. 1:19; Matt. 7:24, 25

  …………………………………………………………………………

3. Ps. 119:105; 2 Tim. 3:16

……………………………………………………………………………

4. Pro. 3:5, 6; Isa. 58:11

…………………………………………………………………………….

5. Pro. 15:22; 24:6

……………………………………………………………………………

            Khensatna i neih ma-in Topa kiang thungetna tawh i apden ding kisam hi. Ei khensatna te in Pasian deihna leh a thukham te tawh kituak lo khawng ahih khak ding kidawp huai mahmah hi. Ei khensatna te’n Topa minthanna a hihtheih na’ng amah kiangmah i-ap ding kisam a, Topa hong lamlahna in ei geltawm vaite tawh aki lehbulh phial zong, ama’ gelnate i muan-ngam ding kisam hi. Pasian in ei ading ahoihpen hong gelsak hi cih muanna tawh hangsan takin kalsuan-ngam ding kisam hi.

            Na nuntakna ah khensatna lianpi-te bangci’n na khensat hiam? Tuadan na khensat nading in khalam tawh kisai bang zah in na ki aap hiam?

TUESDAY                                                           April    9

Lawmdingte teelna

            Kholhpih lawmding teelna in khensatna thupipen teng lakah khat ahi hi. Lawm zongding i kuankhia tangtang kei a, ei omna munah naseppih te leh eitawh lungsim kituak zawdeuh khat leh nih khawngtawh lawmin kikhawl thei hihang. Hih Lai Siangtho munte ah lawm zonna tawh kisai zuihhuai thu bangteng kimuthei hiam? Pro. 12:26; 17:17; 18:24; 22:24; 25.

………………………………………………………………………………………………………

            Kholhpih Lawm ding i deih aleh, ei mahmah in zong kholhpihtaak khat i hih ding kisam hi (Pro. 18:24). Mi pawlkhat in lawm neilo kisa uh a, a mau gamtat kampauna mahmah in zong mite a nawlhkhiakhia ahih lam kiphawk khalo uh hi. “lawm leh gual i teelna ah i kicinloh nate theipipi mah hong taisan lote zonhuai masa hi. Khat leh khat ki zahtak in kicinlohnate ah mawh kizong masa lo, lungsim kiniamkhiat leh lungduaina in Zeisu lim leh mel i sutna hi. Tuabang lungsim puakna in i ngaihsut toinate hong paihkhiatsak ding a lungsim picing neite hong suaksak ding hi.” EGWhite, Pastoral Ministry, p. 95.

            Kholhpih lawmhoih tawh kisai Lai Siangtho sungah a minthang pen in, David leh Jonathan tangthu hi. Jonathan’ pa kumpi Saul in Pasian thumang in citak hileh a kumpi gam kipsuaksuak ding a, Jonathan in zong kumpi za luah ngel ding hi. Saul thumanloh manin, kumpi thak dingin, Pasian in David hong teel ta a, Jonathan in ama ngah ding hamphatna khempeuh a taan hi. Innkuanpih khat hoihlohna in mihoih a innkuanpih te vai susiazo mahmah hi.

            Ahih hang, Jonathan in David tungah hehna leh hazatna lungsim neilo bekthamlo in, apa Saul’ khutlum panin honkhiazaw hi. “Jonathan in ama pumpi zahin David a it hi” (1 Sam 18:1). “Sanggamte aw, mi’ khemsa-in ta kei un. Kikholhpih hoihlote in mi siasak thei hi”(1 Cor. 15:33)

            Nangtungah muhdahna nei tuanlo napi’n nang hong susia thei lawmte na neikha hiam? Kholhpih lawm teelkhialhna in, innkuansung hongbang ci nawngkaisak thei hiam?

WEDNESSDAY                                                   April  10

Tenpih ding Teelna

            Kholhpih lawm ding nangawn hoihtak kiteel nuam hileh, zi/pasal ding teelna ah ahoihzaw teelnuam ding hi hang. Pasian in ama khut tawh Adam ading zi nabawlsak a, ama ading in ahoihpen leh a picingpen ahih manin teel kulnawn lo hi. Ei te pen kicinlohna neitek i hih manin teelding leh ngaihsut ding hong tam zawdeuh hi.

            A thupi mahmah khensatna ahih manin zi/pasal vaitawh kisai Pasian in zong lamlahna hongnei veve hi. Monday ni lesson ah zuihhuai thute banah, numei pasal kitenna vai ah adang athupi kalsuanzia tampi (Lesson 6 na ah zong) sinto laiding hi hang. Pasian ading nasepding khensatna khitciang, tenpih ding teelna vaipen mikhat nuntakna ah thunungzui tampen hi.

            Tenpih ding teelna tawh kisai hih Lai Siangtho munte’n bangci lam hong lak hiam? Ps. 37:27, 119:97, 1 Cor. 15:33, James 1:23-25.

…………………………………………………………………………………………………………………….

            Tenpih taak numei/pasal nazon ma-in, tenpih taak mi nahih ding hanciam phot in. “no tungah hong kibawl ding na deih bangun midangte tungah na bawl un” (Matt 7:12). Tenpih gina mahmah i nei phial zongin, ei lampan gina kei leng innkuan sung vai buaina hong om veve ding hi.

            Hih thupen a lamdang hilo hi. Amau nang i gamtatkhialh mawhnate midangtung ah a kawkkawk Rome khua mite, Paul in hun tampi bei in thu a hilh kul hi. Zeisu in zong, “Banghang in na lawmte’ mit sunga ninthem tang muhsak thei napi-in nangma mit sunga singluang tang phawk thei lo na hi hiam?” na ci hi (Matt 7:3).

             Nang tektek tungah naneih loh hoihna khat, na tenpih zi/pasal tungah bangzahvei na lamen ngei hiam?

THURSDAY                                                          April 11

Nasep teelna

             I nuntak sungah i lunglut leh sepnop nasep i teel kul hi. Hau mahmah a na-sepkullo liang i hih kei leh, innkuanpih te donkawm in inn nasep te ban ah, i nuntak khop kivak nading nasep i neih kul hi.

            I nuntakzia tawh kizui in nasep teeltheihna pen hongki ciangtan zel hi. Koi mun ah om a koidan nasep i sem zong in, Zeisu’ hong piak hotkhiatna sankawm in, i nuntakna hong mannei sak thei nasep ahih ding thupi hi. I nasep khempeuh ah Pasian minthanna ahih ding kisam hi.

            Solomon in bang khialhna bawlkha hiam? Tuadan i hih khakloh nading bangci’n kikem zo ding hi hiam? Eccl. 2:1-11.

……………………………………………………………………………………………………….

            Solomon bangin i khialhna ding hauh leh maan kisam sese lo hi. “Sum deihluatna in siatna namkim piangsak hi. Mi pawlkhat in sum deihlua liang uh ahih manin a upna pan un pialkhia-in gimna lungkhamna tampi a thuaklawh uh hi” (1 Tim 6:10). A zawng mahmah khat in zong a hau mahmah khatzah mah in sum deih thei lel hi.

            Nuntak zonkawm in sumzonding kisam na pi’n, hauhloh phamawh hi tuanlo hi. Pa tampi te in haunuam lua mahmah in, a zi a ta don zolo liang in sumzong uh hi. Inkuan nuam, zipil, nu le pa a iit, ta pil cihte hauhna tawh khekngam liang ding na hihiam? Mitampi in hauhna sangin tua te mah lunggulh zaw veve ding uh hi.

            Nasep cih pen ei nuntakna tawh a kikop dingin Pasian in Gen. hunpan kipan hong sehsa ahi hi (Gen. 2:15). Tua nasep te leh hauhna te, i nuntakna ah a hang’ in i koihkhak na in lampial na lianpi hita hi. Solomon lampialna zong hi mah hipah hi. Tua nasep leh hauhna te ah lungnopna leh nuntakna a hang’ zongkha a hih manin a tawpna ah kisik in, tua “na khempeuh in a mawkna hi” na ci ta hi.

            Mi bangzah in “ka nuntakna ah ka nasep khanzaw in ka innkuanpih te nusia zaw leng” ci ngei hiam? Hih dotna hang in bang thu na tel kha hiam?

FRIDAY                                                                 April 12

Ngaihsut ding thu: Lai Siangtho bup sung in mihingte’ teel theihna thu i neihna mu hi hang. Mawh neihma in Adam leh Eve (Gen. 3) in teel theihna thu nei uh a, teelkhial pah uh hi. Mawhnei lo mite nangawn in zong teelkhial thei laibuang a hih leh, ei mawhnei khin te’n bangzah takin teelkhial baih ding i hi hiam?

            I phawkding in, khensatna leh teelna tawh kisai in hong ki tawsawn lo, suakta tak in ki teelthei ahih manin, a hoihloh lam thei gegu in teel sese kullo hi. Haksa mah taleh i sung aa teeng Pasian’ vangliatna suang in a hoihpen thute suakta tak in i teel ding hi. Ei khensatna in ei innkuan tungah zong huzap nei ahih manin khensatma in ngaihsut mahmah kul ding hi. Cain in, a sanggampa thahding a khensatna hangin a innkuansung dahna lianpi hongpiang hi. Jacob’ tate’n, a sanggam pa Jospeh, sila in zuak ding a khensatna hangun, a pa nuntakna susia zo uh hi. A puan namkawm in, “hih, ka tapa gim mah hi, gamsa te’n hong balkek sak in hong neksak khin hi” ci’n ni tampi sung a pa Jacob kap hi. A tapa tengleh tanu te’n hehnep sawm napi’n hehnem zolo uh hi. “kap kawm in hankhuk sungah ka ta pa nungzui in ka pai ding hi” ci hi (Gen. 37:33-35).

Suakta takin teeltheihna hangin, a pha a sia tuah na leh innkuan pih tetung ah ei khensatna huzap te a tunna tawh kisai, Korah, Dathan, leh Abiram te tangthu Laisingtho sungah kimu thei hi (Num. 16:1-32; Dan 6:23, 24; Gen. 18:19).

Kikupding thute:

1. Tuni in suaktatak in nakhensat thu bang om hiam? Tua thu te’n nang leh Pasian kizopna, nang leh midang kizopna tungah bang hong theisak hiam? Tua nakhensat khit te lakpan, koi pen na kisik pen hiam?
2. Lai Siangtho tangthu te ah, kua tengin khensatkhialhna a bawl uh hiam? Amau khialhna tungtawn in bangci pilna i la thei ding hiam? Amau khensat khialhna in a innkuanpih te bang supna piangsak hiam?
3. I khensatkhialh nate kisik ciat ding hi hang. Tuadan i kisik laitak in Pasian hong piak lungdamna thu in koici hong lungdam sak hiam? Khensat khialhna man na lungkham pen hunin Lai Siangtho’ kamciam na pom hiam?
4. Mi pawlkhat zineih/pasalneih dingvai tawh dotna hong nei leh, bang ngaihsut piakna na pia diam? Banghang? Hih a thupi mahmah khensat hun ah Pasian kammal bangci’n na lak diam?