HSS 2:  JERUSALEM ATANGA BABULON

Zomi Sabbath School Lesson 2: Jerusalem pan  Babylon ah, 1st Quarter, 2020

ZIRLAI 2                                                            January 4–10

 JERUSALEM ATANGA BABULON

 

CHANGVAWN: “Tichuan, heng tlangval palite hi Pathianin lehkha thiamna leh finna zawng zawngah hriatna leh bengvarna a pe a; Daniela chuan inlarna leh mumang zawng zawng hriat thiamna a nei a,” (Daniela 1:17, NKJV).

 

SABBATH  CHAWHNU                                                                     January 4

Chhiar Tur: 2 Lalte 21:10–16; Daniela 1; Matthaia 16:24–26; 2 Korin 4:17; Galatia 2:19, 20; Jakoba 1:5.

 

BIBLE hian tlu tawh mihringte chak lohna chu tlang takin a tar lang mai a. Genesis 3 chinah hi chuan mihringte sualnate leh a nghawng tha lo tak chu tarlan a ni zui ta zel

  1. Chutih rualin, Pathiana rinna ropui tak lantirtu, rinawm loh zara thil eng emaw tak tel mai thei tur ni site pawh tarlan an ni bawk a. Chutianga rinawmna kawnga entawn tur tha ber ber thenkhat chu Daniela bu-ah hian a chuang hlawm a ni.

Chutih laiin, Daniela bu kan zir hian, he buin a fak leh tarlan ber chu Pathian a ni zawk tih hi hre reng ila. Daniela leh a thiante rinawmna fak leh chawisan kan tumna lamah, khang tlangval palite nun kaihruai leh tichaktu, Babulon Lalram chakna leh hipna do theia Siamtu zawk kha kan chawisang lo fo mai. Mahni ram leh hmun ngeia rinawm tura chona hi a lian thei hle a, ram dang, hnam dang nun leh sakhaw biakna karah phei chuan a khrih hle ang. Mahse, khang mi ropuiten chona an hmachhawn theih chhan chu, tirhkoh Paula ang khan, “an rina chu an hriat” (2 Timothea 1:12) a, Amah an rinchhan tlat vang a ni.

SUNDAY                                                                                           January 5

PATHIAN THUNEIHNA

 

Daniela bu hi a tirah chuan hneh nihnain a intan phawt a. Juda lalram chu Nebukadnezzara laka tlawmin, tempul bungbelte pawh Jerusalem atangin Shinar rama phurh a ni a. Shinar tih thu hi Bible-a Genesis 11:2-ah kan hmu a, chu chu Babel Insang sakna hmun kha a ni. Shinar chu ‘Pathian laka helna’ chhinchhiahna tarlanna a ni. Khang Babel Insang satute khan van tawnga sak an tumnaah chuan lo hlawhchham ta mah se, pawnlam lan dan mai atang chuan, Shinar rama mi Nebukadnezzara leh a pathiante chuan Israelte Pathian thuthlung chu a hneh ta zawk ni mai awmin a lang.

Chuti chungin, Daniela bu bultanna thil chiang tak chu, Jerusalem hneh a nihna chhan kha Babulon lal thiltihtheihna chungnun vang ni lo vin, “LALPA chuan Juda lal Jehoiakima chu a [Nebukadnezzara] kutah a pe,” (Daniela 1:2, NKJV) tiin a la sawi cheu a ni. A hma daihah, A miten Amah an theihnghilh a thuthlung an bawhchhiat chuan, ram dang salah a la tartir dawn a ni tih a lo sawi tawh a. Chuvangin, Daniela khan Babulon sipai chakna piah lama van Pathianin khawvel chanchin inher chu a kaihruai a   ni tih a hria a. Chutiang taka Pathian thuneihna hriatna zarah, heng thalaite hian Babulon lalrama thlemna leh nawrna hmachhawn thei turin chakna leh phurna an nei thei ta a n.

Chhiar tur: 2 Lalte 21:10–16, 2 Lalte 24:18–20, leh Jeremia 3:13. Engati nge Pathianin Juda leh Jesusalem chu Babulon mite kutah a pek?

Hetia kum zabi 21-na huna chonate kan hmachhawn mek lai hian, Daniela bua chiang taka tar a nih ang hian Pathian chungchang thlirna dik tak kan neih a ngai a.  He buin a sawi danin, A rawng kan bawlsak Pathian chuan A thuneihna hmanga khawvel hun inher thunun chauh ni  lo vin, mamawh hun taka A mite a tanpui tura A mite nunah zahngaihna nen a lo che thin a ni. Pathianin khang Hebrai tlangval saltangte tana A tihsak ang khan, tawpna huna A mite tan pawh, anmahni leh an rinna kawng hrang hranga beihna nasa hle mah se, A la tihsak dawn a ni tih kan la hmu zel dawn ni.

Tunah hian, pawn lam atang leh kohhran chhung atang emaw pawha i nungchanga tlin lohna denchhena rinna thua chona i hmachhawn thenkhat chu engte nge ni? I hmaa thil lo thleng tur apiangte hneh thei tura sawtpui turin, engtin nge Pathian thuneihna rinchhan dan i zir theih ang?

 

THAWHTANNI                                                                                  January 6

NEKCHEPNA KARA RINNA

 

Daniela 1 chhiar la.Heng tlangvalte hian eng ti tura nawrna nge an hmachhawn?

Babulon an lo thlen veleh heng tlangval palite hian an rinna leh chhia leh tha hriatna thuah chona lian ber mai an hmachhawn nghal a; lal rawngbawlsak tura inzirna tha bik nei tura tih an ni. Hmanlai lalte khan an sal mante zinga a tha ber ber thlan chuahte chu lal in velah an chhawr tangkai thin a; chutiangah chuan anmahni mantu lal leh an pathiante chunga rinawm tlat tura ngaih an ni. Chutianga an tih chu an sakhuaa piantharna leh an khawvel thlir dan thlak tura innawr luihna a ni ber mai. Chutiang atan chuan khan Hebrai tlangvalte pawh kha an hmingte thlak a, hming tharte phuahsak an ni reng a. Hming thar chuan neitu thar leh dam chhan thar an neihzia pawh a entir a ni.

See also  MSS 3: နက်နဲခြင်းမှဖွင့်ဟဖော်ပြခြင်းသို့

Babulon mite chuan chutianga hming thar puttirna hmanga an chunga thuneihna lantir leh an Babulon nunphung leh thilte ngaihsantir tumin an nawrlui a. An hming pangngai, Israel Pathian hming chawi kha, ram dang mite pathiante hming chawimawinaa thlaksak an ni a. Chu bakah, lalber chuan ama dawhkan kilpuia siam pawh a tum ruh hle bawk a. Lal chaw ei ang ei nihna khan hmanlai hunah chuan awmze thuk tak a nei a. Thinlung zawng zawnga lal chunga rinawmna leh ama zara nung nihna a entir. An eitur chhawpte kha an lalram pathiante hnena hlan hnute a nih thin avangin chutiang han ei pawh chuan an sakhuana thilah awmze thuk tak a nei bawk a. Lalberin an pathian a biakna thil pawmpui leh tel vena a ni.

Chutiang chuan, Daniela leh a thiante khan chona lian tak an hmachhawn mek a ni tih an inhria a. Anmahni Pathian chunga rinawm zel chunga chu lalram tih dan phungin na taka a nawr chunga dam khawchhuak tur chuan, thilmak a thlen a ngai. Chu chauh ni lo vin, kha Babulon khawpui kha mihring thiltihtheihzia tarlanna a   la ni lehnghal! Babulon mite pathian biakna hmunte chu mihring thiamna chungchuang hmanga din niin, an huan inkhai te leh khawpui chhunga Eufrates Luipui luang lut ruih maite kha cho rual loh mihring ropui leh thiltihhteihzia  lantirna  a ni.

Tichuan, Daniela leh a thiante chu kaisan theihna tura remchanna pek an ni a, chu chu an hlawkpui leh hmuingil theihna tur pawh a ni. Chutiang a nih chuan Hebrai saltang ni tawh lo vin, lal leh mi lian chhungzinga mi an lo ni tawh bawk ang. Ropuina kawng awlsam chu zawh turin zirtirna tluanghruite chu an thlah mai dawn em ni ang le?

Khang tlangvalte khan an chhia leh tha hnukhniama inremsiampui tura thutlukna siam turin eng tiang kawngtein nge chhuanlam an siam theih ang le? Eng tiang kawngtein nge chutiang ziarang deuh chona verther zawkte chu tunah in hmachhawn theih?

 

THAWHLEHNI                                                                                   January 7

TUMNA RUH TAK

Daniela 1:7–20 chhiar la. Heta thil pahnih kan hmuh chu: Danielan duhthlang thei tura zalenna a neih leh Pathian lo chetna a ni. Hetah hian eng zirtirna thupui pawimawh tak nge awm bawk?

Hebrai saltang palite khan an Babulon hmingte kha an hnial awmin a lang lem lo. An zingah tel an Hebrai hming hmang bak kha chu an tan tih ngaihna a awm lo pawh a ni mahna! Mahse lalber dawhkana an chaw leh uain in thu-ah erawh kha chuan, khatiang ei leh in an kaa luhtir loh chungchangah kha chuan an thu a ni ve tawh a. Chuvangin duhthlan theihna an neih kha tlangval palite tan khan a pawimawh hle reng a ni.

Chuti chungin, officer pawhin an hmingte an thlaksak thei a nih chuan an ei turte pawh an tih danglamsak thei ngei ang. Khang tlangval paliten lal dawhkana mi thil an ei duh loh chhan pahnih ni awm chu:

Pakhatnaah, lal dawhkana eitur zingah khan thil thianghlim lo (thiang lo) a tel a ni thei ang (Leviticus   11). Pahnihnaah, an chawte kha an pathian limte hmaa hlan hmasak an nih hnuin lal dawhkana chhawp tura thawn an ni thin a. Chutiang chuan, Daniela khan bumna leh vervekna tel lo, chiang takin, sakhuana thil vangin ngenna a siam a, a awmzia chu lal ina chaw vel chuan amah leh a thiante chu a tibawlhhlawh dawn tihna a ni (Daniela 1:8), a huaisen thlak thlawt a ni.

Daniela leh Babulon hotu lian inbiakna kan enin, thil pawimawh tlem a lo lang a. Pakhatna, Daniela khan kha hotupa dinhmun khirh dan kha a hriat thiampui a, chuvang chuan fiahna hun siamsak turin rawtna a thlen. Ni sawm chhung chuan thil dang an rin an thatpui leh thatpui loh a lang hman ang a, hotupa tan pawh a hlauhawm lotuk lo thei ang. Pahnihna, chutiang hun rei lo te chhung leka rah tha a chhuah hman dawn tih Daniela a chian ngamna chu Pathiana rinna a nghah pumhlum hmiah vanga a ni. Pathumna, ei atana thlai leh in atana tuisik thlan zawkna khan Thilsiam laia mihringte tana Pathianin chaw a lo pek kha a kawk a (Gen. 1:29), Daniela khan chumi zara thutlukna siam pawh a ni mai thei e. A thu hrimin, Pathianin a tira min pek aia ei tur tha zawk a awm thei chuang dawn em ni?

See also  Lesson 9: SATAN LEH A PAWLTE

Danielan duhthlang tura zalenna a neih zara Pathian lo chetna tur kawng a hawnah khan eng chu nge han pawimawh ta viau le? (Daniela 1:9)? Duhthlanna kan siam pawimawhzia chungchangah eng zirlaite nge heta tang hian kan lak chhuak theih ang? Thutlukna kan siamahte hian Pathian kan rinchhanna hian eng awmzia nei tur nge ni ang?

 

NILAINI                                                                                           January 8

SAWISELBO LEH FING

Nebukadnezzara din hna atana an tlin dawn vangin Daniela leh a thiante kha lal rawngbawl tura thlan a ni. Lal duh dan angin, ‘hmelhemna nei lo’ leh ‘hmeltha tak’ (Daniela 1:4, NKJV) an ni. Thil ngaihnawm tak chu, inthawina thilte leh lal ina rawngbawltute kha ‘hmelhemna nei lo’ an nih a ngai (Lev. 22:17–25; Lev. 21:16–24). Babylonian lal khan a lal ina rawngbawl tura khatiang sawiselna awm lo a thlan khan, Israelte Pathian angah a inngai deuh pawh a ang a. A lehlamah, Daniela leh a thiante khatiang an lo ni kher khan, anni kha Babulon lalrama chona an hmachhawn danah khan Pathian tana inthawina nung an ni tih a kawk pawh a ni mai thei  e.

Chhiar tur: Galatia 2:19, 20; Matthaia 16:24–26; 2 Korin 4:17. Thlemna eng pawh kan hmachhawnna karah rinawm taka kan awm reng theihna tur chungchang eng thilte nge heng changte hian min hrilh?

Hebrai saltangte rinawmna kha Pathianin a chawimawi a, enfiahna hun ni sawm a lo ral khan, anni kha lal dawhkan kilpuitute dangte aia hrisel zawk leh ei tha zawk ei angin an lang tlat mai. Tichuan, Pathianin A chhiahhlawh palite hnenah chuan “thiamna leh finna zawng zawngah hriatna leh bengvarna a pe a, Daniela chuan inlarna leh mumang zawng zawng a hre thiam,” (Daniela 1:17, NKJV). He thilthlawn pek hian Danielan hrilh lawk rawngbawlna a neihna turah tangkaina tak a la nei dawn a  ni.

Babulon rorelna hmuna A chhiahhlawh rinna Pathianin a chawimawi ang khan, keini pawhin khawvel chonate kan hmachhawn laiin finna min pe a. Daniela leh a thiante nuntawng atang khan, kan khawtlang nun hlemhle takah pawh bawlhhlawh kai lo vin kan nung thei tih kan zir a. Pathian rawngbawl tur hian kan khawtlang leh hnam nun lak atangin kan inthiar fihlim daih a ngai lo tih kan zir a. Daniela leh a thiante pawh kha, dawt thu leh thil dik lo pui pui, thuruk zingah an cheng chauh pawh ni lo vin, chutiang lam zirna sikula luhtir chu an ni hial zawk mahse, chutichung chuan an la rinawm ta cheu tho a

Khawi hmunah pawh chengin, kan thurin leh zirtirna anga rinawm harsat viauna khawtlang leh hnam nun zinga kan khawsa pawh a ni thei. A chhe zawnga in

khawtlang nunin hu a neih dan hre reng chungin, hei hi mahni in zawt teh: “Eng ang taka thain nge chung chu ka do let?

 

NINGANI                                                                                          January 9

FINAL EXAM

 Daniela 1:17–21 chhiar la. Tlangval palite hlawh- tlinna thuruk chu eng nge ni? (En tel tur: Joba 38:36; Thufingte 2:6; Jakoba 1:5.)

“Babylonian University-a” kum thuman zir hnuin, Hebrai tlangval palite chu final exam nei turin lalber hmaah an ding a. Zirlai dangte aia hrisel zawk hmelpu ni ngawt lo vin, hriatna leh finna lamah pawh anni chu an khum chiang hle a ni. Tlangval palite chu lal rawngbawl tura lak nghal an ni a. Kan theihnghilh hauh loh tur chu, he “hriatna leh finna” tihah hian ringlo mite thil tam tak a tel ang tih chu rinhlelh rual a ni lo tih hi a ni. Chuti chungin, an zir tel ve vek tho va, an ring ve lem lo tih mai lohah chuan, a thiam pawh an thiam phian mai tih a chiang a  ni.

Nebukadnezzara kha chuan zirlai tlangval paliten khatiang taka an thiam theihna kha lal ina an ei leh in bakah, an training program vangah a ngai pawh a ni mai thei e. Daniela leh a thiante erawh kha chuan, chutianga an tih thatna chhan kha chu Babulon zirna that vang a ni lo tih an hre ran mai tih chu a thu kalhmang atangin a lang a. Engkim hi Pathian laka chhuak a ni a. Amah rinchhantute tana Pathian thiltihtheihzia entirna thiltithei tak a va ni em! Pathian fate kan nihna tichhia leh tiderthawng thei heng tunlai thiamna te, sorkar te leh zirna hmunpuiin min hneh theihna hi kan hlau ngawt tur a ni lo.Pathiana rinna kan nghah tlat phawt chuan, hun harsa karah pawh min chelh ding thei a ni tih hriain, thil buaithlak karah pawh chhelna min pe thei a. Kan rinna phatsan tura chona kan hmachhawn huna thutlukna dik siam thei tura a chabi chu kan kutah a awm a  ni.

See also  Khazih sungah Tawlnga

Daniela 1 kan enin, Pathian chungchang thil pawimawh thenkhat kan zir thei a, chungte chu: (1) Pathianin khawvela thilthleng chungah thu a nei. (2) Kan hnam leh khawtlang boruak tha lo kan paltlang theih nan Pathianin finna min pe thin. (3) Mahni thinlung chhung leh nunphung renga Amah rinchhantute chu Pathianin a chawimawi thin.

He bung tih tawpna thu chu, “Daniela chuan lal Kura kumkhatna thlengin a thawk ta zel” (Daniela 1:21, NKJV) tih a ni. Heta lal Kura hming tarlan hian pawimawhna tak a nei a: ram danga sala hruai nihna karah beiseina a siamsak a ni. Kura kha Pathianin A mite chhuah zalen a, Jerusalem lama kir leh phalsaktu tura a mi thlan a ni. A bung tir lamah hneh leh sala hruai thu sawi mah se, a tawpna erawh chu beiseina leh mahni ram lama kir lehna thu a ni thung. Hei hi kan Pathian a ni a: kan nuna harsatna khirh ber lo thlen lai pawhin, beiseina tukverh min hawnsak a, chu chu tawrhna leh natna piah lama ropuina leh hlimna kan thlir lawk theih nan a  ni.

 

ZIRTAWPNI                                                                                   January 10

NGAIHTUAH ZUI TUR: “Babulona Daniela leh a thiante kha an vanglai hun hmang mek, Aigupta rama Josefa hun hmasa lam dinhmun aia remchanna duhawm zawk nei a ni a; chuti chungin, nungchang lama fiahna an paltlang erawh chu a nep chuang hauh lo. An tlangval chhuah tirh lai vela Judai ram khawsakna tluangtlam tak atangin khatih laia khawvel khawpui ropui bera hruai niin, chuta roreltu rorelna hmunah, lal rawngbawltu bik ni tura zir tura thur chhuah an  ni.  Chu  rorelna hmun anmahni hual  veltu nawmchenna leh hlemhletna thlemnate chu a chak em   em a. Dik tak chuan, anni Jehova betute kha Babulona saltang an ni a; an Pathian ina bungbel thianghlimte pawh Babulon mite pathian biakna tempul-ah dah a ni a; Israel lal ngei pawh Babulon mite kuta mi tang a ni. Anmahni hnehtute chuan Hebrai hote sakhua leh hnam nun ai chuan anni sakhua leh hnam nun chu a chungnung zawk tiin an uankhum a. Chutiang hnuaiah chuan, A thupekte Israelten an hawisan avanga tihtlawm an nihna atang ngei chuan, Pathianin A thilngiat thianghlim leh thuawina rah chhuah chu a chungnung zawk a ni tih Babulon-ah finfiahna a pe a. Hetiang hriattirna thu hi Ama chunga rinawm tlatte hmang chauha pek thei a ni thin.”—Ellen G. White, Education, p. 54.

 

SAWI HO TURTE:

  • In class-ah, Kristian in nih vanga in khawtlang leh hnam nun avanga chona in hmachhawn thinte chu sawi ula. Chung chu engte nge ni a, engtin nge kohhran in nihna ang khan hma in lak theih ang?
  • Daniela leh a thiante tana an rinna hnuhhniam a awl dan tur chungchang kha ngaihtuah Babulon mite lah kha hmelma, anmahni hnehtu kha an ni si a. Judate kha hneh an ni a. Daniela leh a thianten an pawm theihna turin, Israelte Pathian aia Babulon mite pathiante ropui zawkzia eng ‘finfiahna’ dangte nge awm thei ang? Chutiang harsatna hnuaiah chuan chhel taka an tuar fan fan theih nan, eng Bible thutakte nge han pawimawh zual deuh ang? (Jeremia 5:19; 7:22–34.) Hei hian kan Bible thu kan hriat a, ‘tunlai thudik’ kan man thiam pawimawhzia eng nge min zirtir tur ni ang? 
  • Engati nge rinawmna hi a pawimawh viau? Keimahni tan chauh pawh ni lo, rawng bawlsak dan kawng kan zawnsak mekten LALPA nungchang an lo hriat theih nan pawh?
Tags: ,

Admin

Admin

One thought on “HSS 2:  JERUSALEM ATANGA BABULON

Comments are closed.

Top