ZSS 2: Jerusalem pan  Babylon ah

Zomi Sabbath School Lesson 2: Jerusalem pan  Babylon ah, 1st Quarter, 2020

Lesson 2: Jerusalem pan  Babylon ah

*January 4–10

 

 

Sabbath nitaaklam                                                       Jan 4

Tukal sung Simding: 2 Kings 21:10–16; Daniel 1; Gal. 2:19, 20; Matt. 16:24–26; 2 Cor. 4:17; James 1:5.

 

Kamngah: “Pasian in tua khangno li te, laitheihsiamna le pilna thukte a pia hi. Daniel  pen mangmuhna le mangkhiat siamna a pia hi” (Daniel 1:17).

            Laisiangtho in a puksa mite thanemna pulakkhiat ding zumhuai salo hi. Gen. 3 na pankipan, mihingte’ mawhna le a thamante uh pulak ngiatngiat hi. Tua kawmkal mahin, zia-etna lianpipite zo a, Pasian tungah a thumaan teitei zong omhi. A lungtang nathuai mah mah thupiang Daniel sungah omhi.

            Daniel’ laibu sim ciangin galhangpa taktak pen Pasian hizaw cih phawkin. Daniel le a lawmte cihtakna thu gen sialin, Babylon kumpite’ tawh a kitalsik tua khangno 4 teng a makaih Pa ki mangngilh kha den hi. Thumaan citak cihpen, eima gam le leitang ah bel baihlel e. Mi’ gam, mi’ leitang, midang ngeina le biakna sungah haksa hi. Ahih hangin, Sawltak Paul bangin khattang in a thuakngamna thupen a “uppa a theihman” (2 Tim. 1:12) in a muan hang hi.

 

Sunday                                                                    January 5

Pasian’ Ukzawhna

                       Daniel’ laibu simsuk pak leng, guallelhna tawh kipan hi. Judah in, Nebuchadnezzar mai ah guallel a, biakinn um le beel khempeuh Jerusalem pan Shinar gamah puakhia gai uh hi. Shinar cih pen, Gen. 11:2 sung, Babel tausang dinna mun ahi hi. Pasian langdona kipatna mun a hihmanin, lim hoihlo hi limlim hi. Babel tausang lamte in, vantung bansak zolo mahleh, Nebuchadnezzar le ama’ pasiante in Shinar munah om in, Israel’ Pasian tungah gualzo hi ci in um uh hi.

           Daniel in, Jerusalem’ gual lelhna pen, Babylon kumpi vangliatzawkna hilo a, “Topa in, Judah kumpi Jehoiakim pen Nebuchadnezzar khut sungah pia” (Daniel 1:2) hizaw ci hi. Sawtlai pekin, Pasian in, Amite’n Amah mangngilh in thuciam a palsat vualeh, gamdangah Sal in kiman ding genkhol zo hi. Babylon kumpi thahatna le, Pasian in tua tangthu makaih gige cih Daniel in telpha mahmah hi. Hih khangno te’n, Pasian’ ukzawhna tellua mahmah uh a, Babylonte’ ukna le zolna khempeuh a maingat zawh na’ng uh tha ngah tuam hi.

                       2 Kings 21:10–16; 2 Kings 24:18–20, le Jeremiah 3:13 cihte simin. Banghangin Pasian in, Judah le Jerusalem, Babylonte’ khutsungah pia hiam?

 ………………………………………………………………………………………………………………………………………………………………

            Kum zalom 21 sung to nate maingat laitakin, Daniel’ laibu sung a, Pasian’ theihkhol nadan enpha kik ding hihang. Pasian in ukzawhna tawh tangthu hawl beklo in, hehpihna tawh Amite panpih denlai ci in hih laibu in ciamteh hi. Sin suksuk leng, Hebrew salmatte ading Pasian in a vaihawmsak mah bangin, hun nunung ciang, Amite adingin, bang langdona peuh hong tungzongin, vaihawmsak lai ding hi.     

                       Na upna hong langdo bangpeuh om a, pawlpua pan maw, pawlsung pan, a hih keileh, nangma pumpi thanemna maw? Na mai ah hong suak peuhpeuh na zawhzawh na’ng in, Pasian vangliatna koici bangin suang thei ding nahiam?

 

 Monday                                                                 January 6

Nenniamna Nuaiah Upna

            Daniel 1 simin. Hih khangnote bang zawp dingin kisawl hiam?

READ  Zokam Lesson 1: PATMOS PAN LUNGDAMNA THU

 ………………………………………………………………………………………………………………………………………………………………           

Babylon tungcil limlim, Hih khangno 4 te’n, a upna uh hangin tona lianpi maingat pahlian uh hi. Kumpi nasem kisin dingin tuamkep ding kiteelkhia pah hi. Tanglai kumpite in, a galmatte lakpan a hoihpen pawlkhat tengkhia in, amah le a pasiante nasemsak thei uh hi. Tuate, upna lamah le leitung lamah a pumpi bup in thaksuaksak zel uh hi. Tua bang dingin Hebrew salmatte min kheelmasa pen hi. Amau’ neihsa ahihna lakna in, minthak pia uh hi. Minthak piakna tawh Babylonte ngeina le lungsim puathei ding cih deihna ahi hi. A min masa uh, Israel’ Pasian’min kitamte, namdang pasian minte tawh kheksak uh hi. Tua banah kumpipa’n ama annek bang nesak nuam talailai hi. Kumpipa’an neekpih cihin thutampi huamsak hi. Kumpipa tungah thumaan in kingamh cihna ahi hi. Tua ante zong a pasiante maiah ki aap khinsa hi a, tuate neeksakna zong biakpiakna thukmahmah ahi hi. Kumpipa’ biakna sungah thukimtakin kihelna ci uh hi.                

            Tua bangin Daniel le a lawmte’n hihbang tona lianpi phu uh hi. Amau ading in, tua vangliatnate do in, Pasian tungah cihtak theihna ding peuhmah pen, thulamgdang khat apianloh phamawh ta hi. A buaihuai sem thukhat in, Babylon khuapi pen mihingte’ gual zawhna mualsuang a ding ahi hi. Biakinn hoih mahmahte, huan kikhai le khuapi laizang kantan a luang Euphrates gun cihte pen, kuama’ demzawhloh hoihna tawh kidim ziazua hi. Daniel le a lawmte zongin, tua nopsaknate sungah ki beelpawltheihna hunhoih ngahthei ding uh hi. Hebrew salmatte hi nawnlo in, kumpi uliante suakthei ding uh hi. Upna nusia in leitung minthanna le nopsakna tawh khekzaw dinguh hiam?               

            Hih tangvalnote in, amau khensatnate, koici bangin pulaak khia uh hiam? Tua bang zolna lianpi na thuakkha hiam? A nem dikdek zolna peuh ahi hiam?

 

Tuesday                                                                  January 7

Khensatna Kip

 

            Daniel 1:7–20 simin. Hih tengah thunih in nasem hi: Daniel’ deihteelna le Pasian’ panpihna hi. Bang thukhun thupi namu hiam?

 …………………………………………………………………………………………………………………………………………………

Hebrew salmat tangval 4 te in, a Babylon minthakuh niallo uh hi. Amau le amau Hebrew minpi mah tawh kisap lohbuang hihtheih dang neituanlo uh hi. Kumpipa sabuai tungpan an le zu cihte bel, amau nialtheih hilel hi. Amau 4 teng deihteelna in thupi mahmah hi. Ulian khat in, a min kheelsakthei a hihleh, amah’n ankuang kheelthei hi. Kumpipa sabuai panin aneek noplohna thu nih omhi.  

            Amasa, Kumpipa sabuai tungah an sianglo omding hi (Lev. 11).

            Anihna, An peuhmah pasiante milim’ maiah a ki aap masak khitteh, kumpipa neek dingin kipuakpan hi. Daniel in, hun mawkbei sakhetlo, zuaulo khemlo in, biakna upna hangin, hih ante nekloh ding hangsan takin ngen hi (Daniel 1:8).   

            Daniel le Babylon ulianpa kihona sungah, a thupi pawlkhat om hi. Amasa in, ulian pa a ding haksatna omding cih telpih ahih manin, hong sin in ci hi. Ni sawm sung an dang nek kisinna tawh, ulianpa launa beisak ding cihna hi. A nihna ah, hun tomno khat sungin a hoihzaw piang ding cih zah in Pasian muang hi. A thumna ah, gah-teh le tui bek teelkhiatna in, Piancil lai a Pasian hongpiak anbulpi (Pian. 1:29) Daniel in a teel ahi hi. Pasian hong piak anbulpi sangin a hoihzaw andang koi ah omlai thei ding hiam?    

READ  ZSS 7: Mawh Maisakpa Pasian

            Pasian in, na hong sepzom theihna dingin, Daniel’ teelsiamna in bangzah in thupi hiam? (Dan. 1:9) Eima’ deihteelna a thupitzia, bang theihbehna na ngah hiam? Pasian muanna in, eite deihteelna bangci huzaap hiam?

 

Wednesday                                                            January 8

Ninbaanglo Le Pil

            Daniel le a pawlte in, Nebuchadnezar deihdaan tawh kituak a hihmanun, kumpi inn sungah nasem dingin kiteel uh hi. Kumpipa’ deihna bangin, kumpi inn nasem ding peuhmah, “poina neilo” le “melhoih” ding (Daniel 1:4) ci hi. Dihdih in, biakpiakna ganno le biakinn nasem peuhmah “poina neilo” (Siampi 21: 16-24; Siampi 22:17-25) ding ci hi. Babylon kumpipa in, amah le amah Israel’ Pasian tawh kikimsak in, a nasemdingte hibangin deih hihtuak hi. Thukhat ah, ngaihsut khaklohpi mah in, Daniel le a pawlte’n, Babylonte nenniamna nuai mahah, Pasian adingin siangtho takin nasem thei uh hi.

            Galati 2:19, 20; Matt. 16:24–26; le 2 Cor. 4:17 cihte simin. Bangbang zia-etna thuak taleng, thuman takin ki dingtang thei veve cih hih Laisiangtho in hong koici hilh naci hiam?

…………………………………………………………………………………………………………………………………………………………

            Pasian in, a thumaan Hebrew salmat 4 teng pahtawi in, ni sawm a beiciangin, kumpipa ankuang asawk midangte sangin, amau hoihzaw, cidamzaw thampek uh hi. Tua bangin Pasian in, a nasem 4 teng “laitheih siamna le pilna thukte” a pia hi (Daniel 1:17). Hih pilna in, Daniel’ kamsang nasepna ah thu kician omsak hi.

            Pasian in, Babylon kumpi innsungah, anasemte’ upna a pahtawi mah bangin, eite’ leitung haksatnate ih phut laitakin, pilna hong pia hi. Daniel le a pawlte tungtawnin, kimkot hoihlo kawmkal mahah, ninbaanglo in ki omthei cih honglak hi. Pasian’na sepna dingin, tang-om cihbang kullo ahihna zong hong lak hi. Daniel le a pawlte in, a ombek hilo a, zuauthu, thumaanlo le phuahtawm thutawh kidim Sang ah pilna sin hi napi un, thumaan citakin omveve uh hi.    

            Koikoi ah teng taleng, thumaan a langdo ngeina le mipite in, hongzol taleh, ih up thumaan tungah citak dingin hongto hi. Na minam ngeinate in, hong lehzolnate zongkhia inla, Ke’n bangzah nialzo kahiam cih ngaihsun in.

 

Thursday                                                               January 9

Sittelna Nunung

            Daniel 1:17–21 simin. Tua mi 4 teng gualzawhna tawhtang bang hiam? (Job 38:36, Pro. 2:6, James 1:5 cihte simbeh in.)

 …………………………………………………………………………………………………………………………………………………

            Kum thum sung “Babylonian University” ah Hebrew tangval 4 sang a vakah khit uh ciangin, kumpipa maiah, sittelna nunung va ding uh hi. Cidamzaw bek hilo, a pilna uh zong batzawhloh hilai hi. Tua mi 4 teng, kumpipa inn sungah nasem dingin kicialpah lian hi. Mangngilhloh dingkhat ah, “pilna siamna” a cihteh, milimbiate aa tampi kihel ding hi. Um kei phialmah leh zong, hoihtak kisin in siam mahmah uh hi. 

            Nebuchadnezzar in bel, hih bang lawhcinnate peuhmah, kumpi ante neekna bekmah tawh piangthei dingin ngaihsun hi. Ahih hangin, Daniel le a pawlte’n, hihbang lawhcinna sangmahmahte peuhmah, Babylon ngeinate in piangsak zolo ding, Pasian bekin piangsakzo cih tel sitset uh hi. Pasian in, Amah amuangte vang a piakzia. Media-te, kumpite le sang dangdangte in, Pasian’ tate suksiat ding hong lauhthawn hangin bangmah lauhuai keeilo hi. Pasian ih muan nakleh, kamphat kamsiat cihte le haksatna khempeuh ih palzo ding hi. Ih upna hongto a omciangin gualzawhna tawhtang in teelsiamna ahi hi. 

READ  ZSL 12: SABBATH: PASIAN OMZIA NUNTAKPIH

            Daniel 1 ih etciangin, Pasian tawh kisai pilna pawlkhat ih ngah hi. (1) Pasian in tangthu hawl hi. (2) Pasian in, ih kimkot pan ngeina le mipite hong langdonate palzawhna ding pilna hong guan hi. (3) Pasian in, Amah lungsim le nundaan tawh a muangte pahtawi hi.

            “Cyrus, Babylonkumpi a suahdong, kumpi inn ah, Daniel ompaisuak hi” Daniel 1:21. Cyrus’ thu a ki pulakpen, salmat mipite adingin lametna lianpi omhi. Pasian in, Amite Jerusalem a ciahkik theih nadingin, phalna pia ding, Cyrus teelkhia hi. Daniel’ laibu apatna lamah, guallelhna le saltanna ommah leh, a thukhupna lamah inn ciah kikding lam-etna pia hi. Hih in eite Pasian ahi hi: Haksat penpen hunsungah zong, vantung tawlet honghon in, thuaksiatna le gimnate galkhatah minthanna le nopna omcih hong musak hi.

 

Friday                                                                  January 10

Ngaihsutbeh Ding: “Daniel le a pawlte Babylonah omuh a, Egypt ah Joseph a tuncil lai sangin hamphazaw uh; himah leh, nakpi takin ki sittel keei hi. A tualniam Judean innte tawh teh theihloh, khuapilian inn hoih pipite sungah, kumpi lianpen pa nasem dingin kihilhna ngah uh hi. A nuam kumpi inn sungah kisiat theihna’ng zolna thahat mahmah omhi. Amantakin, amau, Jehovah Pasian abiate in, Babylonte salmat hileltak; Pasian’ innpi sungpan umleh beel tengpen, Babylon pasian biakinn sung tunguh; Israel’ kumpipa nangawn Babylon khut sungah thongkia; tua ahih manin, Hebrew’ biakna sangin, Babylonte biakna in lianzaw, thupi zaw ci in kiphatsakpih uh hi.

            Tua bang hunsung in, Israelte’n Pasian’ thukhamna pan lampial a hihmanun, Pasian in, Ama ukzawhna le sianthona, Ama’ deihnate Babylon tungah pia a, thumanh a kulna hilh hi. Hih teci panna Ama’n pia a, a thumaan mite bekmah a kipiathei ahi hi.”  Ellen G. White, Education, p. 54.

 

Kikup Ding Dotnate:

  1. Na khaansung vuah, ngeina tuamtuamte, mipite hong tonate kikum dihun. Bangteng peuh hi a, pawlpi buppi in bangci phuutzawhthei ding hiam?

 

  1. Daniel le apawlte’n upna a nutsiat dinguh baihlua lel hi. Babylonte bel galzote hilel uh hi. Jew mite aihleh guallelte hi. Israelte Pasian sangin Babylon “pasian” liatzawkna “teci” bangdang ompeuhmahlai hiam? Hih santakah, kiptak a dinzawk na’ngun, tha apia bang Laisiangtho mun omhiam? (Jer. 5:19, Jer. 7:22–34.)Hihbangte in, Laisiangtho simpha mahmah in, “tulai thumaan” telphat mahmah ding a thupitna hong bangci lak hiam?

 

  1. Cihtakna in, eima a dingbek hilo, cihtakna tawh ih tecipan amute ading nangawn in banghangin thupi hiam?

Download (PDF, 2.72MB)

Tags: ,

Admin

Admin

Top