3. Ka Samsau leh Ka  Papa

 Michael Kujjoo, 38

South Sudan October 19

A phawk khak simin Michael Kujjoo in a pa muhdah cihtakin mudah   hi.

Khat veivei mite in, “Na pa koi-ah om a hia?” ci-in adot uh ciangin Michael in, “Ka pa sikhin ta,” ci-in mudah lua ahihmanin tua bangin dawng den hi. Uganda gamah Michael kum 9 a phak laitakin a pa   in, a nuleh amah taisan hi.

Tawlkhat sung Michael in a pa’ lo-ah na sem a, a pa in na naksep sak mahmah hi. Nisim in   Michael in a nasep a mankhit ciangin, a pa in a nekding an pia pahpah lo hi. Tua pen naupang kisek tamai hi.

A pa’ kiang pan khat vei ong ciah ciangin a nu’ kiangah, “Pa tawh bel om khawm zo nawn mahmah kei ning,” ci hi. Khat veimahmah zongh lo kuan nawn lo hi. A haksatnate cikmah hun in mangngilh thei lo hi.

Anuntakna haksa mahmah a, a pa mawhsak den hi. A pa’n taisan lo hileh nuntakna nuam zawdeuh dingin lamen hi.

Sumlepaai haksatna hangin high school ah a kum thumna aman khit ciangin sang tawpin rap lasak nasep sem hi. Kenya ah peem in, tua lai-ah sam sausak niapnuap sa-in nightclub ah kum nih sung sem hi. Uncle khat in Sudan khanglam ah a sap ciangin Juba khua a, nightclubte ah hip-hop    sa hi.

Ni khat, lamlianpi zui-in Michael hong pai laitak, store neipa khat in na hopih hi. “Nang koi-ah kikhawm na hia, lawm?” na ci  hi.

Michael zongh hongkhawl in, “Koi mah” ci  hi.

“Bang hi lo ding? Hong en dih ve, Biakinn a pai ding nam mahmah hi se ka hia?” acih kawmin a sam kikawk hi.

“Aw, biakinn ah pai thei lua ni cei” tua pa in ci   hi.

Michael in zongh tua store owner pa koi-ah kikhawm ci-a, a dot kik leh Juba Central Seventh-day Adventist biakinn ah a kikhop lam thei  hi.

“Tua khawng a kikhawm te’n thungetna maanlo ngen in, phuahtawm damsakna khawng bawl mawkmawk lel uh hi lo ahia” Michael in cih san  hi.

Store neipa’n Michael kikhawm dingin zawn taleh nial   hi.

Akik ciangin Michael tua saii mai nawkin ong pai leuleu a, saii neipa in a na hopih ciangin a lehlam etsan veva hi. Khat vei a muh kik leuleu ciangin saii neipa in Michael na hopih leuleu hi.

“Mai Saturday ni ciangin nipikaal thum sung thugenna a kipan ta ding hi ungh. Bang hang a ong pai lo zenzen ding na hiam?” na ci leuleu   hi.

Tua kikhopna ah, Pasian’ kiang aa thungetna te pen telnop in muibun ahihmanin Michael in hoih  sa hi. Tua khit ciangin pastor in seventh-day Sabbath tawh kisai hong gen a, Pasian in Sabbath pen Saturday panin Sunday ah a khel hetlohna thute Lai Siangtho taangte bulphuh in gen ngiatngiat hi. Inn a tun ciangin Michael in pastorpa thugente Lai Siangtho tawh taih in a sim ciatciat ciangin Sabbath pen Saturday ni ahih lam tel ta  hi.

Tua thugenna a Sabbath tawpna ni ciangin Michael zongh adang mi tampite tawh Nile gun ah tui hong kiphum ta hi. Kua ma’n a samsau lam kammal khat nangawn paupih sese lo    uh hi.

Ahizongin Sabbath ni ciangin Michael biakinn ah kikhop hong kipan ta a, a samtawh kisai-in mi kihona hong za kha hi.

“Nang tui kiphum khin ta hi ve cin, na sam mettom nuam nai lo maw?” pawlpi mi khat in na ci hi. “Ong to bawl pian na hia? Samson in zongh a sam na hawi hi lo maw. Hih sam lel pen a sia hi kei,” ci-in Michael in dawng  hi.

“Na cih hangin mi khempeuh in na sam hangin hong en ngeingai uh hi ven,” tua pawlpi mipa in ci teeiteei hi.

“Buai keng ei. Midangte thu i khen dingin kilawm kei” Michael in ci   hi.

Ahizongin a maanlo khat bel om hi, cih Michael in thei hi. Biakinn tuamtuam ah teci pangin a pai kawikawi na ah, a gen masak penpen in, “Ka limlemeel tawh kuamah na buai kei un. Kei zongh note mahtawh a kibangh hi ingh” cih ta tawh pan den  hi.

A lungsim sungah, ‘hih Adventistte in kei pen ong deih takpi mah uh a hiam? Aihkeh abeisa hun lai-a, ka pa mah bangin a na uh ka sepsak ding a ut bek uh ahiam,’ cih thei nuam mahmah hi. Kum khat hong cing ta-a, pawlpi mite in a it lam hong ki thei hi. Tua ciangin lungkim takin a samlomte hong meet khia ta hi.

Tua hun lianmah in a pa hong phawk ngeungau hi. Mate 6:15 sung sim iin, “Mite in note’ tungah hong mawh khaaknate na maisak kei uh leh note’ mawhna zong hong kimaisak lo ding hi” cih hong sim kha hi.

“Topa Pasian aw, hih pen Nangma’ deihna ahih leh Nang’ deih bang hi ta hen. Koici maisak theih ding, cih hong hilh in,” ci-in thu ngen  hi.

A pa’ telephone nambat a ngah theih nading kha thum vilvel sawt hi. Michael in a pa aheh dingin   a lamet hangin, na tua ci lo  hi.

“Kua na hia? Ka tapa na  hia?”

“Himah ing ei. Bang thu piang cih kong gen ding haksa samahmah ing ei pa aw” Michael in ci hi. “Phamawh kei lua ei. Tua te tawh na lungsim buaisak kei oh ka ta aw. Tapa khat mah bangin nong ciah ding bek hi ei, ka lunggulh. Na hihtheih hunhun in hong ciah oh, tua ciangin thupha hong pia ning ei” pa in ci hi.

Kum sawmthum sung vilvel muhdahna teng Michael lungsungah tuisuak ziahziah ta    hi.

“Ka nuntak sung tawntung mudah paisuak mai ning, ci-a ka ngaihsut hi ven. Ahizongin Seventh- day Adventistte’ thugenna in, na khempeuh hong kikhel sak hi. Hih pawlpi in mite vantung gam tung dingin puah khol taktak hi, cih thei ing,” ci-in tu laitak in kum 38 a pha, Juba ah mawtaw hawl in muh bangbang asem Michael in gen  hi.

Sabbath sim a Michaelte’ kikhopna ahi, Juba Central Seventh-day Adventist biakinn a, naupangte Sabbath school khante lam nadingin 2016 kum a Sabbath 13na mission sumpi nong piak man un      lungdam mahmah hi. Tu kuata sunga nong piak uh sumpi khenkhat tawh zongh i biakinn gei-a i sanginn ding ki lamlai ding ahih manin hong huh lai lai un. Lungdam   ei.

By Andrew McChesney