ZSL 7: Kampau, Athu le A Kizoppih Thute

Zomi Ssabbath School Lesson 7: Kampau, Athu le A Kizoppih Thute

Lesson 7                                                             *May 9–15

 

Kampau, Athu le A Kizoppih Thute

 

Nipini (Sabbath) Nitaklam                                               May 9

Tukalsung Simding: Deuteronomy 32:46, 47; 1 Kings 3:6; Numbers 6:24–26; Genesis 1:26, 27; Genesis 2:15–23; 15:1–5.

Kamngah: “Hih thukham laibu la unla, note langkhatah teci dingin a omtheih nadingin Topa na Pasian uh thuciamna singkuang geiah koih un.” Deuteronomy 31:26.

           Leitung mi billion tampi te’n kampau nam 6000val kinei hi. Laisangtho bukimpen kampau nam 600val, Laisiangthothak bekleh khentuamtuamte kampau 2500val tawh kiphenkhia khin hi. Kampau nam tamkhin mahmah napi, a langzong khinzo nailo lai hi.

            Billion khat le alang (1.5billion – 1,500,000,000) bangin Laisiangtho a kici limlim amau kampau in kiphensak nailo hi. Nasep ding tampi omlai hi mahleh, Bible society hanciamna tawh, mihing billion 6 (6,000,000,000) bangin laisiangtho simthei ta uhhi.

            Amau kampau ngiat a Laisiangtho neite bangzahin hampha uhhiam! Eite’n hamphatlam vive in i ngaihsut hangin, ta’anglai Europe gamah hih Laisiangthobu pen mipite muhloh dingin kikeemcip liangcih i mangngilh den hi. Laikhetna setpite tungah le Biakna Puahphate tungah i lungdamna lian hi. Laisiangthobu anei taktak eite’n, Khasiangtho panpihna tawh simin, Topa le ama’ hong hilhna laimaite hoihtakin i sin ding hi.

 

Nimasani (Sunday)                                                                            May 10

Laisiangtho Telcianna

            2 Timothy 3:16, 17 simin. Bang deihna in Laisiangtho hong kipia hiam?

…………………………………………………………………………

            Tangthu sungah Pasian nasepnate’ teci dingin Laisiangtho kigelh hi a, a puuk mihing a hotkhiat na’ng, thuman lampi ah hong makaih na’ng ahi hi. Mihing’ kampau mah, mihing’ kammal mah in, Topa’ deihna pulaak in muhtheih ding a deihna a hihi. Egypt pan Israelte a hotkhiatlai in, Ama’ thupuak pua ding minam in a teel ahi hi. Amau Hebrew kampau (Aramaic tawm kihel) mah zangin, Amah tawh kizop ding aphal hi.

            Greek ngeina hong piang a, khantohna zong ompah hi. Tua hunlai in leitung phellang Greekte ukna sung khempeuh ah a kizang, Greek pau in Laisiangtho kisimthei hi. (Laisiangtholui zong Greek pau in phenkhin hihtuak hi.) Hih “leitungbup huam” kampau in, nungzuite le pawlpi masa ading, Zeisu sihkhit a lungdamna thupha a zelhsakna thahatsak hi.

            Tua khit, Sawltak John in “Pasian’ thuman le Zeisu Khazih teci- panna” (Revelation 1:2) cihi. Hi bangin, Laisiangtho in, a kipatna pan a tawpna dongmah Pasian “thuman” le Zeisu “teci panna” ahihna hong theisak hi.

            Deuteronomy 32:46, 47 simin. Israelte in, “thukham sunga kammal khempeuh” (Deuteronomy 32:46), le thukham laibute aihkeileh “lamlaknate” thu a man ding banghangin thupi thei hiam? Pasian’ kammal in eite’ ni koibangin sausak hiam? Tuni i sinna tawh koici kizop hiam?

            Mi tampitakte adingin amau kampau a Laisiangtho nei hibeklo in, version tuamtuamin neih beh lailai uhhi. Version khatbek a nei zong om veve uhhi. Na neih bangbang pen, Pasian’ kammal hi, thupipen hi, hong hilhna bang mang ding hi’ng nacihding hibek hi.

            Pasian’ thu mangin, naupangte hilhsawn dingpen, banghangin “thu-neu” (Deuteronomy 32: 47) hilo thei hiam?          

 

Ninihni (Monday)                                           May 11

Kammalte le Akhiatna

            Kampau khatsimin, khiatna thuk, haksa anei kammal omciat a, paudang tawh kicingtakin phenkhiat ding haksa mahmah hi. Tuabang kammalte tawh kisai, amau zatdan leh a khiatna zaidan hoihtakin zonphot kul hi.

See also  ZSS 2: Jerusalem pan  Babylon ah

            1 Kings 3:6, Psalms 57:3, Psalms 66:20, Psalms 143:8, le Micah 7:20 te simin. Pasian’ hehpihna le hoihna in, a piansaksa mite tungah koibangin hong kipia hiam?

            Hebrew kammal chesed (hehpihna) pen Laisiangtholui sungah kitamzat mahmah hi. Pasian’ itna, hoihna, hehpihna le a thuciamte cihnopna ahi hi. Kumpi David tungah, “a lian itna kip nalak zo hi” (1Kings 3:6) ci hi. “Ama itnakip le a thumaanna honglak ding hi” (Psalms 57:3). Israel tawh kisai in, “Jacob tungah nacihtakna le Abraham tungah itnakip nonglak ding hi” (Micah 7:20). Laibu buppi phialmah Pasian hehpihna le itna pulaakna in chesed vive zang hi.

            Numbers 6:24–26; Job 3:26; Psalms 29:11, Isa. 9:6, le Isa. 32:17 cihte simin. Hihte sungah, “kilemna” (peace) shalom acih pen abang a cihnopna hiam?

——————————————————————————

            Hebrew pau in shalom pen “kilemna” in kiphen zel hi mahleh, a khiatna taktakin thukzaw zaizaw lai hi. “Pumbit, picing le ommuang” cihte zong kici thei hi. Pasian’ thupha le hehpihna in, hong shalom sak a, tua pen Pasian hong piak hi (Numbers 6:24-26). Job in a thuaksiatna hangin “ommuanglo” aihkeh “gamdailo” shalom kisam cihi. Azawm dikdek ih leitungah, Sabbath ni in deihtakin i kimuak dingdan pen, Shabbat shalom i kicih ding hi a, Pasian tawh i kikholh manin a sangpen lungnop kilemna hong pia hi.     

            Bangkampau pau in sim taleng–hih kammal’ khiatna theikei phial lengzong – ei telna ciangciangah hihte’n bang cinuam cih i ngaihsun thei diam?

 

Nilaini (Tuesday)                                                                  May 12

A Kigenmun Kammal, Kizopzia le Khiatna

            Hebrewte lungsim ah, laikhiatdan, ngaihdan khawng pulaktheih na’ng lam tampi omhi ci’n um uhhi. Europe-te’ pau tawh kibanglo in, Hebrew taangpau in laimal khenna neimello ahih manin, lai tawh kizopna a bawlna dingun laigualhdan puahphat kul hi.

             Genesis 1:26, 27 le Isa. 6:1–3 simin. Hih tengah bang kampeuh kipau phapha hiam? Hih a kipauphakik kammalte in bang cihnopna tuampeuh nei uh a, kipauphakik hiding hiam?

…………………………………………………………………………

            Hebrew laikungpu te’n, Pasian’ omzia khat a bulgen nop uh ciangin, thumvei a kizomin pau phakik uhhi. Piansak nasepna ah, Pasian sepsa asangpen in, mihing a piansakna ahihi. “Bawl” cihpen ‘bara’ hi a, Pasian bek tawh kisai hi. Bangmahmah a omnailo panin, a deihna khat piangsak tawmthei pen Pasian bek hi. Mihing a piansakzia a genna ah: “Pasian in, ama’ limbangin mihing piangsak in, Pasian’ lim bangin amah a piangsak hi. Amah in pasal le numei a piangsak hi” (Genesis 1:27). “Piangsak” thumvei a cih i mu gige hi. Moses in, mihing pen Pasian in Ama’ lim bangin a bawl ahihna gentel nuamlua hi. Tua thuman a gentel ahi hi.

            Isaiah mang sungah, seraphimte’n “Siangtho, siangtho, siangtho, Vanglian Topa” (Isa. 6:3) ci uhhi. A cihnopna bulpipen, Pasian’ sianthona in biakinnpi dim a cinuam ahi hi. Isaiah in, Pasian’ maiah dingin “Gimngahpa hita ing, a mawknapi ka hihi” (Isa. 6:5) ci in Pasian’ sianthona hong musak hi. Kamsangpipi Isaiah nangawn in, Pasian’ sianthona hangin, ama’ ginatlohna phawkin patau mahmah hi. Paul in zong (Rom. 1-3) sungah mihing mawhneihna le Honkhiapa i kisap zia hong pulak a, Laisiangtho in mihoih i cih Isaiah nangawn a puuksa mihingmah hiveve cih hong theisak hi.

            Daniel 3na ah, “Nebuchadnezzar’ milimpi’ thu tamveipi genkikkik hi (Dan. 3: 1, 2, 3, 5, 7, 12, 14, 15, 18). Nebuchadnezzar in, nakpi takin Pasian a langdona ahih manin, gendantuam tawh hihthu mah (Dan. 2:31-45) sungte ah, 10vei bang gen phapha hi. Daniel’ deihna bulpi in, Pasian bekmah biaktaakcing hi napi, biaktaak acing zolo pasian khatpeuh, mihing in bawl tawmtawm cih hong musak nuam hi.

See also  “Hong pai Un . . .”

 

Nilini (Wednesday)                                                               May 13

Athu le Akizoppih Thute

            Laisiangtho thute in kizoppih nei diudeu hi. Amau guak in dinglo hi. Kammal khat in, a omna laigual sungah kizoppih nei a, tua akizoppihte tawh telkhop masak kul hi. Tua laigual in zong, ama’omna mun, a thucingzaw omlailai hi. Tua pen laikungpu laigelh khenkhat hi a, tuapan khenhpi (chapter) leh khenhpite in omsawnlai hi. Tua ahih manin, thukhatpeuh i telkhialh lohna dingin, kizoppih thute leh laigualte i telphat mahmah kul hi.          

            Genesis 1:27 with Genesis 2:7 enkaak in. Tua khitciang Genesis 2:15–23 simin. Hebrew te’n “mihing” acihna Adam pen, a kizoppih thukhempeuh tawh koibangin telthei ding hiam?

…………………………………………………………………………

            Genesis 1:27 ah mihing a piansakna pahtawina in, bara cih kammal kigen phapha mukhin hihang. Mihing zong a kizoppih kammal “pasal le numei” cih om leuleu hi. Hebrew pau in adam cihpen, hiteng lianah, mihing i hihna ci in telkul limlim hi. Genesis 2:7 ah adam laimalpen “leivui” pan Adam a piansakna (Hebrew pau in Adam mah) kawk hi. Tua lai-in Eve piang nailo ahih manin pasal Adam bekmah a cihna ahi hi. Chapter 2 a kizopna ah zong adam “mihing” (Genesis 1:27) le pasalpa Adam (Genesis 2:7) ci in kilamdang hi. Adam pen nungsang ciangin, khanggui kisuutna ah, (Genesis 5:1-5; 1Khangtangthu 1:1; Luke  3:38) sung tengah Zeisu a cihna hi a, “Adam nihna” (Romans 5:12-14) hong suak hi.

            Laimal “Adam” muntuamkhat ah a ombangin, Adam le Eve ki piansakna zong, a zaizaw in Genesis 1-2 sungah kiciamteh hi. A kicingzaw i cihcih pen ahihi. Tua sungah kamphenpa in ngiim na, ngaihdaan leh khantohdaan khawng zong helsuk hi. Genesis 2: 4-25 sungteng pen piansakna thu ciaptehna nihna peuh kici in, a ngiimna taktakbel kitumdang a, maikal ah ihsin ding hi. A ciapteh na munnihtuak ah mihing kipatdaan hilhcianna omtuak uhhi.

            Pasal le numei tegel pen Pasian khutngiat tawh kibawl cih i thei khinzo hi. Tulai “leitung pilna” in, ei le ei amawkpian a cih pongmawk, a haihuaina bang hong theisak hiam? (1Corinth 1:20).

 

Ningani (Thursday)                                                              May 14

Laibute le A Thupuak

            Pasian’ thu tawh kisai a tampen in Laisiangtho bu ahi hi. Laisiangthobute pen muntuamtuam pan, thu tuamtuam tawh kigelh ahi hi. Pawlkhat pen genkholhna; pawlkhat pen kigawmtawm, Late bang e. Tangthu buzong 1 leh 2 Kumpite, le pawlpi tuamtuamte tungah Paul’ laikhakte cihbangin om ngeingai hi. 

            Laibu’ khiatna le thupuak i teltheih nadingin, laikungpu le a gelhdaan pan kipan sinkul hi. Tampi takmah laikungpu kithei hi. Laisiangtholui ah bu masa nga teng bang Moses gelh ahi hi (Josh. 8:31, 32; 1 Kings 2:3; 2 Kings 14:6; 21:8; Ezra 6:18; Neh. 13:1; Dan. 9:11-13; Mal. 4:4). Zeisu le Sawltakte’n zong kipsak hi (Maku 12:26; John 5:46, 47; 7:19; Acts 3:22, Rom. 10:5). Laisiangtho laikungpu pawlkhat kipulaklo lel hi. Esther, Ruth le Samuel laibute Khangtangthu cihte laikungpu kitel mello hi. 

            Genesis 15:1–5 le Genesis 22:17, 18 simin. Moses in Piancilbu laikungpu ahihna thu kician bang omhiam?

See also  ZSS 7: Zeisu le Mi Kitasamte

…………………………………………………………………………

            Paikhiatna pan Thuhilhkikna dong laikungpu Moses hi a, paikhit khitin agelh ahihi. Piancil laibu pen, Pasian’ piansakna tangthu hi a, Piancil hun pan beh makaite hun ciangdong hi a, Paikhiat mapek in a gelh hihtuak hi.

            “Moses in kum tampi tuu a cinkawmin, amah bek omin, amite ki nenniamna ngaihsunsun a, Pasian in apu apate tungah a kamciamte phawkin, asun azan in Israel ading thungen hi. Vanmite’n zong Moses khuavakpia uh a, Khasiangtho humuamna tawh Piancil laibu gelh hi” EGWhite, Patriarchs and Prophets, p. 251.

            Piancil laibu in, hotkhiatna ngiimna teng le Pasian in a puuksa mihingte a tatkikna ding teng hong pulak hi. Abraham suante minamlian suaksak ding cih thuciam a bawl ciangin kician semsem hi. “Nasuan leh khakte van a aksi leh tuipigei a sehnel bangin tampi ka phasak ding hi” (Genesis 22:17) ci hi

            Thuman dang ei theihkhakloh, bang khawngpeuh, Piancilbu in hong hilh hiam? Pasian’kammalte in, eite upna a dingin bangzah thupi hiam?

 

Kiginni (Friday)                                                                 May 15

Ngaihsutbeh Ding: Kidona Lianpi sungah Ellen G. White gelh, “John Wycliffe,” pp. 79–96; “Luther before the Diet,” pp. 145–170; “Methods of Bible Study,” sung panzong khen 4. a – j dong anuai a link pan simin: www.adventistbiblical-research.org/materials/bible-interpretation-hermeneutics /methods-bible-study.

            “Pasian in  eite hotkhiat na’ng a kisam thute a thubu sungah hong pia khinzo hi. Tua Pasian’ kammalte peuhmah vanglian le puktheilo cih saantheih kul hi. I gamtatzia ding, upna thuguipi le theihna khantohna ding ahihi. A kisamlo peuhmah hong mawklahlo le Khasiangtho makaihna lo peuhmah in honglaklo hi. Thukhat panin, Honpa in Ama thute le Ama hong hilhsate hong telphasak dingin, Khasiangtho hongsawl ding hong kamciam hi. Laisiangthobu pen Khasiangtho’ humuap ahih nungsang, Laisiangtho a langdo thudang hong hilhlo ding hi.”—Ellen G. White, The Great Controversy, p. 9.

 

Kikup Ding Dotnate:

  1. Nang’ pau in Laisiangtho phendaan tuamtuam omphial taleh, nang neihsunsun tawh na bangci kalsuan hiam? Pasian’ kammal cih umtakpi in zuihsawm in na koici hanciam hiam?
  2. Pasian in Piansaklai nigukni in mihing bawl cih Pasian’ kammal le leitung mipilte’n “science” pilna tawh mihing hong pianna ding kum awn tampisung kikhelkhel cih thuhilhna ngaihsunkaak in.Hihzah a kigamla thunih i et ciangin, eite laisiangtho i letkip ding a phatmawhzia leh, Pasian’ thu in kiciantak in hong hilhsate pan puapialna bangzah lauhuai cih hong hilh hiam?
  3. Laisiangtho nateltheih semsem nading, bang vanzat peuh nanei hiam? Bangmah vanzat neikeiphial lengzong, tukal sung ih thusinna in Laisiangtho khiatdaan bangzah hong teltuam sak hiam?
  4. Israelte pen atuu atate peuhmah thuman hilh ding, amau nuntak sung vua Pasian’ makaihnate hilhsawn ding cih kivaikhak ngiat uhhi(Deuteronomy. 4:9). Upna kihopsawn bel genliang kei inla, Pasian hong makaihna i genkhiat ciangin i upna hong khangsak zo hiam? Midang tungah Pasian hong makaihna hawpsawnna in eima a ding bang phattuamna hong pia thei ding hiam?

 

 

Tags: ,

Admin

Admin

Top