KAMSANGNU ELLEN G. WHITE LAI ATTE ZATDAN DING LEH HILHCIAN DAN DING

KAMSANGNU ELLEN.G. WHITE LAI ATTE ZATDAN DING LEH HILHCIAN DAN DING
Pr. P L Thlenga.
Ellen G White lai at ( The Spirit of Prophecy)te pen Lai Siangtho mah bangin a sim, a sin dan leh a hilhcian dan ih siam kei leh a tupna leh deihna tawh ki gamla in ki lampial thei ahih manin a sindan, a zatdan leh a hilhcian dan ih siam ding thupi mah mah hi. A nuai ah Kamsangnu laiatte hilciandan leh a deihna point 9 bang kong atkhia a hoihtakin na simciat nadingun kong thum masa hi.

  1. THUNGET NA TAWH SIM DING
    Lai Siangtho sim ding mah bangin Kamsangnu Ellen G White laiatte ih sim ding ciangin thungetna neih masak ding kisam hi. Na lungsim kihong ( open mind) takin na sin ding hi. Na mimal sansa thute nawlkhin in Kamsangnu laiatte pan in Pasian in bang hong hilh nuam hiam ci in ngak kawm in sim ding hi hang. Tua ban ah upna neih ding thupi mah mah hi. Kamsangnu in, “ Mi tampite in amau leh amau pil khin kisa uh a, muanmawhna a neihnate uh pen amau pilna in kingaihsun uh hi” na ci hi. A muangmawh thei mite adingin muanmawhna ding thu tampi mukha ding uh hi. Ih muanmawhna khempeuh Pasian in hong hepkhiat sak lo hi. Kiniamkhiat tak leh citak takin ih sin dinga, a ki hilhthei, a kisin mi ( learner) mi ih hih ding kisam hi. ( Testimonies for the Church, Vol 3, p.255)
  2. A DEIHNA THULAIGIL PI THEIH SAWM IN ( Focus on the Central Issue)
    Kamsangnu laibu a sim mi pawlkhat in a deihna thu laigil muhkhiat sawmna sangin thuthak leh hong pumlawpsak ding thu bek zong in kisim thei hi. A kaal laka ei deih thu tomno te bek ah ih lungsim ngalo in, a thulu leh a deihna bulpi pen ngaihsun kawmin sim in, hilhcian ding hi hang. A thulu khat vekpi sim khit zawh main leh a buppi simzawh main thutawpna bawl ding hilo hi. A kaal laka thu tomno ei deih na teng bek buaipih loin, a thulu huampi leh a bu buppi ii deihna ngaihsun in sin in hilhcian ding hi hang.
  3. BANG HUN IN, KUATE ADING, BANG HANG IN GELH HIAM?? ( History and Literary Context)
    Kamsangnu laiatte ih sim ciangin mi pawlkhat in ih sansa thute tawh a kituak thei ding in kisim sawm hamtang hi. Pawlkhat in a hih leh ih deihna laigual, paragraph khat bek sim in ih sansa thute kip sak na dingin ih zangh hi. Hih bangin laigual nih leh khat bek tuam lakin a sinte hilo in, hih thute kua a dingin a gelh hi a, bang hun a mite ading, bang hangin hih thute gelh ahi hiam cihte ih sin masak ding kisam a, tulai taka mite a ding ahi hiam, a mimal in kuate khat peuh a dingin a at ahi hiam cih et kim ding kisam hi. Tua bangin context en masa phot loin, mi tampite in atomno no in ih deihna mun te lakhia in, hilhcianna dingin ih zangh kha thei hi.
    Kamsangnu laibu ih simna munte a deihna bulpi (context ) theihcian na ding in a laiat kaihkhopna bute (compilation book) te muanhuai lo a, a lai at telkhopna bute ( selected messages) te leh, a kammal hoih kaihkhopna (selected quotations) te tungah zong kingak huai lo hi. A hangin hih bangin a deihna munte bek lakhawm in laibu a kibawl te ah, a deihna bulpi (Context) te kimu zo tak nawnlo hi. Tua a hih manin thu haksa pawlkhat leh telkhialh theih pawl khat ah Ellen G White in a lai-at hun alai a a deihna leh a tupna (context) pen ih theih na dingin a original pen pen sim sawm ding kisam hi.
    Gentehna: 1860 pawl in, Ellen G White in numeite kiang ah na nik(skirt) uh sing sak un na ci hi. A hang bulpi in tua hun lai numeite in lei a kikai duat duat zah khopin nik tual ten mah mah uh hi. Tua pen amau hun laia numeite uuk mah mah dan hi a, sakolleng tung a tuan uh ciangin buaihuai thei mah mah hi. Tua ban ah nawksak, nawngkai ( uncleanly, uncomfortable, inconvenient, unhealthful) na hangin skirt sing ten ding in na ci hi. ( The Ministry of Healing, p.291). Hih thugelh bulphuh in, bang hun in hih lai at in, kuate a ding at cih kan loin, na nik (skirt) uh singten un, Kamsangnu in ci hi ih cih ding pen ong hikim thei lo hi.
    Tua mah bangin 1894 kum in bicycle (setbing, sik sakol) tuan pen hoih lo hi ci-in na gen hi. (Testimony volume 8,pp 51,52). A hangin tua hun laiin bicycle (sik sakol) pen tam manlua ahih manin mite in a neih khempeuh uh zuakin lei uh hi. Tua bangin alei mite in tua sik sakol pen gualnopna in zang uh a hih manin, tua sik sakol lei hoihlo a cihna a hi hi. Tua thu sim kha in tuhun khangthakte kiang ah, sik sakol(bicycle) tuan pen hoih lo hi, kamsannu in zong gen hi ci a kihanthawnna pen hoih lo kha ding hi.
    Tua hun lai mahin pilsinna sanginn ah sakol tungtuan khawng kisin sak ding hi na ci hi. A diakin numeite in sin ding kisam hi. Thu kisam vat ( emergency) tuah ciang in a ki zangh thei dingin numei in zong sakol tungtuan sin ding kisam hi. ( Education ,pp.216,217). Hih thu a deihna telcian loin, numeite in sakol tung tuan kisin ding Kamsang nu in gen hi ciin sakol tungtuan sin ding hanthawnna in thumaan hi lo kha ding hi.
  4. A KHENGVAL IN HILHCIAN LO DING. ( Avoid Extreme Interpretations)
    Kamsangnu lai-atte ih hilhcian ciangin a khengval in hilhcian baih mah mah hi. Kamsangnu hun lai in zong hihbang hilhcianna azanghte amah mah in na tuak ngei hi. Tua a hih manin hih bangin na at hi. “We must guard against creating extremes, guard against encouraging those who would either be in the fire or in the water” (Testimonies to Ministers, pp. 227, 228).
    Mi pawlkhat in kua hiamte sepkhialna pen thuhilhna dingin Kamsangnu laigelhte uangtak in na zang in hilhcian thei uh hi. Tua pen Kamsangnu in deih hetlo ahih manin hih bangin na gen hi. “ Mi tampi te in midangte sepkhialhna tungtang a Pasian in keitung ahong muhsak kilaakna pen a khengval takin na la-in tua tungtawn in midangte ahilhna hangin tuamite upna thahatsak lo in zawm sak zaw hi”, na ci hi. (Testimonies for the Church Vol 1, p.166.)
    Gentehna khat ah, Sport leh games thu tawh kisai in Battle Creek College sangnaupangte tung ah hi bangin laigelh hi. Gualnopna leh kimawlna, kidemnate a zangh a uukte in Pasian pen amau amakai ding in zangh lo uh hi. Tua a hih manin Pasian thuhilhna leh taina a tokhia uh a hi uh hi. (Fundamentals of Christian Education, p. 378)
    Hih pen mi pawlkhatte in Ellen G White in games (computer games a hilo), kimawlna tuam tuam leh bawlung kidemna te deihlo hi ci in na pheng gen gawp thei uh hi. A hih hangin a tung a thu khauh takin a gen khit aban ih et ciangin , “ Eite lungsim hong buaisak pen pen in a khengval lua in ih pai khak ding ka lauthawn na pen ahi hi” na ci hi. Tua ban ah hih thu tawh kisai in Ellen G White pen khengval lua ( extreme) lo a hihna a nuai a laigual in na lak kik hi. Nu leh pate leh siate tung ah hih bangin thu na gen a, “ Nu leh pate leh naupangte in naupangte kaikhawm in a gei uh ah kom sak in, a it zia uh kilang sak in, a sep khat peuh peuh uah nu leh pate in lunglut pih hi cih kalang sak hen la, a kimawlna (sport) te ah zong lunglut pih hi cih kilang sak ta hen. Khat vei vei ciangin naupangte bang mah in amaute lak ah om in kimawl khawm hen. Tua hi leh amaute muanna kingah bek thamlo in, a mau leh amau zong kimuanna nei tuam ding hi”, na ci hi. ( Fundamentals of Christian Education, p,18)
    Tua a hih manin Kamsangnu in a khengval tak a kimawlna deih lo a, bawlung sui in a kidem mite vangam tung lo ding hi ci in a pehtawi gawp te in Kamsangnu laigelh a telcian loh man hizaw hi. Amah Kamsangnu ahih leh na khempeuh a khengval sangin a kitawikim dingin thu agen hi zaw hi. Ama laigelh sate a simte in a khengval in kizang kha thei zaw na hi thei hi.
  5. NA GENNOP THULU TAWH KISAI IN MUN KHAT BEK HILO IN, MUN TUAMTUAM A A GELHNA TE SIM SAWM IN
    Mun danga agelhte sim loin, ih deihna san san leh ih lungsim tawh kituak san ta la a sim pen baih mah mah hi. A hih hangin tua bang in sim ding hi peuh mah lo hi. Hih thulu tawh kisai mun dang khat ah genna anei hiam ci-in zonbeh in a om thei zah zah sin beh in, tua pan in hih thulu in bang hong hilh nuam hiam, a deihna bang hiam cih theih masak ding kisam hi.
  6. A HOIH PEN AMAAN PEN LEH A TAK TAK KHENTEL SIAM IN. ( Understanding of the ideal and the Real)
    Kamsangnu in a thugen leh a lai gelh te pen a hoihpen, a lungkimhuai penin gelh den hi. Ahih hangin tua ahoihpen ki zui zo loin, a hoihpen cing zo kei mahleh azom ahoih zong ngaihsut ding leh zuih ding kisam hi. Tua bek thamlo in, akammal zat zia te khengval lua a hiam cihhuai phial te zong om hi. A hih hangin alaigelh mundangate ih sim kik ciangin azatna hang kitel cian thei hi.
    Gentehna in: 1894 kum in hih bangin na gen hi, “ Pilsinna sang pen khuapi pualam ah a om kei leh khangnote in cikmah hunin pilna maan ngah ngei lo ding hi” ( 3Selected messages, 312) . Hih a laigelh pen khauh mah mah in, “ never” cih kammal na zang hi. Pilsinna sang khuapi pua lam a om pen alunggulh huai pen, a hoih penpen ( Ideal ) hi a, a hih hangin khuapi sunga teng naupangte a dingin khuapi pualam a paikhiat ding pen haksa ahih manin, 1909 kum in pilsinna sang pen khuapi pua lam leh khuapi sung ah zong koih ding ahi hi na ci kik hi. ( Testimonies for the Church, vol9, p.201). A deihna bulpi in, Pilsinna sang pen khuapi pualam ah kilam thei leh a lunggulh huai penpen, a hoih pen pen hi a(ideal) hi a, a hih hangin mizangte leh khuapi sunga om naupangte adingin paina haksa a hih manin khuapi sung ah zong pilsinna sang neih ding kisam hi a cih na ahi hi.
    Hih bangin Kamsangnu laigelhna ah a lunggulh huai ahoih penpen (ideal) agenna om mah leh, tua ahoih pen pen ih cit zawh nai kei leh azom ahoih pen zong nagen veve hi. Hih bang mahin sa ngawl ( sa nek loh ) pen ih lungngulh leh ahoih pen pen hi a , ahih hangin angawl theilo te adingin vangam taanna liang hilo hi. Khauh taka a gen( strong statement) bek la in, a kilawm leh ahi thei ciang (moderating passage) pen ih lah kik kei leh Kamsangnu gen mah bangin mite Kha lam ah picing sak hizaw loin, a liam sak ki hi zaw ding hi. ( Selected Message, book3, p.286). Tua a hih manin alunggulh huai a hoih penpen pen mikim tung ah ih lamen kei ding hi. A hoih pen (ideal) om a, a taka ih hih theihna ciang ahoih pen (real) zong om hi cih ih theih ding hoih hi. ‘Ideal’ pen mi khempeuh in kicin, kizui zolo a, tua a hih manin ‘real’ dinmun ah lungkim hun zong a om a hi hi.
    Naupangte sangkah kipat kum tawh kisai in zong, kum 8 pan in kum 10 ciang bang nu leh pate kiang ah om thei leh, inn lam ah nu leh pate in makaih in hilh thei leh hoih hi cihthu gen hi. ( Testimonies vol3, 137). A hih hangin inn lam panin a hilh thei lo nu leh pate a ding in sang kah baih sak zong ahoih thu na gen hi. ( Selected Messages, book 3, p 214.)
  7. GENKHIALH LEH ATKHIALH ZONG NEI HI CIH PHAWKNI.
    Ih gen masak bangin Kamsang khat hi mah leh mihing khat mah a hih manin, Pasian tung ah a thu ngahte adeihna bulpi khial lo hi mah leh, akammal zat, a ni a kum leh a nambat zatte khial thei veve hi. A diakin tangthu ( history) leh nate thu(science) thu ah Kamsangnu pen Tangthu kante (historian) leh Nate asiam( scientist) hilo ahih manin hih thute ah maan kimlo kha ding hi. Tua bek thamlo in, Kamsangnu pen Lai Siangtho sinmi ( Theologian) hilo a hih manin a laigelhte Lai Siangtho thuthuk kan khiatna dingin kizangh theilo hi. Ahih hangin biakpiak hunbawlna (devotional) leh Kha anvakna ( Spiritual nurturing) lam ah hoih mah mah hi. Hih atung akhialna nengnote hangin Pasian kamsang hilo hi cihna dingin kizangh tuan lo ding hi.
    Tua a hih manin Lai Siangtho leh Genkholhna laibute pen Pasian humop hi mah leh, a kamsangte leh agelhkhiatte pen mihing mah ahih manun khialhna ki nei thei veve hi. Mihing sepkhiat khempeuh pen hoihkim (perfect) cih om thei lo hi. A laigelh khempeuh amal mal in ( word by word) a maan lo om thei lo, khial thei lo hi cih in kisang lo hi.
    A diak diakin, Historical fact ah thu pian kum leh amun minte , mihingte leh a nambat zah (figure) kigelh khial thei hi. A pia Pa Pasian himah leh, aciamteh ( final product) pen mihing mah himawk ahih manin, mihing gelhkhiat (product) lim lim in kicing khin cih om thei lo hi. (E.G. Selected Message Vol1, 20:2).
    Lai Siangtho kigelhna pawlkhat Gentehna in gen leng:
  8. 1 Samuel 16:10,11 ah David pen Jese tapa giatna ci mahleh, Khang Tangthu Masa 2:15 ah David pen Jese tapa sagihna in na ciamteh hi.
  9. Judahte leh Israelte sungah galvan tawi mi asimna ah Israel mi tulzagiat leh Judah mi tulzanga ci in (2Sam 24:9) ah na ciamteh mah leh (1Khang Tangthu 21:5) ah Israelte tuzasawm leh tul khat, Judahte tulsawmli leh tulsagih in na ciamteh hi.
  10. Tua ban ah, David in Suriate sakol leng a suksiat sak zah pen (1Khang Tangthu 19:18) ah, “ Sakol leng tul sagih leh galkap tulsawmli” in na ciamteh a, a hih hangin (2 Samuel 10:18) ah , “ Sakol leng zasagih leh kakol tung tuang mi tul sawmli” in na ciam the hi. Hih mun ah anambat zah kituaklo hi. Hih bangin Lai Siangtho nangawn ah akituak lo om thei hi. Pawlkhat te ahih leh telsiam huai hi mah leh pawlkhat a hih leh a telsiam haksa zong om phial hi
  11. 2 Samuel 7:1-3 ah, Kam sang Nathan in kumpi David kiang ah biakinn pen na lungkim tak in lam in na ci suk ziau hi. A hih hangin a zing mah mah ciangin Pasian kiang pan thu hong tungin David in Pasian biakinn a ma khut tawh a lam lohding thu na thei sak kik hi. (2Sam 7:12,13). Hih mun san ah Kamsang Nathan in Pasian thupiak hilo, ama ngaihsutna tawh biakinn lamding in Kumpi David na hen ziau hi. Hihbangin Kamsangte nangawn mihing a hih man un na sem khial gen khial thei v eve hi.
  12. Nungzui Matthai in Zeisu pen sum sawmthum tawh kizuak ding hi ciin agen khol pen Jeremiah hi na ci mah leh (Matt 27:9) , a tak tak in Zechariah na hi zaw ( Zekhariah 11:13) hih bangin a neng no no khialna om agen kim zawh dinghilo hi.
    Hih bang mahin Kamsangnu Ellen G White laiatte ah at khial leh sepkhialh zong pawlkhat om veve hi.
  13. Babel tausang inn lam pen tuicin tunma in na ciamteh a, ( 3SG), a hih hangin tuicin tunkhit nahi gige hi.
  14. Tuiphumpa Johan sih pen Zeisuin Peter leh Andrewte, Johan leh Jacobte anung zui ding in asap ma in nagen a, (2SP183, 184), ahih hangin Khancin Lungdeih bu (Desire of Ages) p 245 ah tua hun lai in Tuiphumpa Johan pen thong inn sung ah a om laitak in na gen kik hi.
  15. Kedorlaomer khupipa in a pankhoppih kumpi li nei hi ( Tuanpupa leh Kamsangte 143) ah na ci a, a hih hangin Piancil 14:1,9 ah kumpi thum na ci hi. A mah tawh li suak bek hi.
    Tua bangin Kamsangnu in zong a at khialh, tampi mah na nei hi. Hih munte ih et ciangin Kamsangte nagawn in zong atkhialh, sepkhialh nei thei uh hi cih kilangh hi. Ahih hangin aphazah (figure) leh anengno dang khialhnate pen mihing khutsuak (product) a hihna kilangh sak ahi hi. A thu laigil pen mihinge gupkhiatna leh hong makaihna pen ah lam hong pial sak lo a hih manin Adventiste in Pasian humop hilo hi na cih lawh tuan lo uh hi. Amah Ellen G White mahmah in a lai gelhte pen khial theilo hilo hi cih na gen ngei hi. Khial theilo (in fallible) pen Pasian leh van bek a hih hi na ci hi. ( 1 Selected Message,p.37)
READ  Launa by JM Paupu

Dr. David Paulon in Ellen G White kiang ah April 19, 1906 in laikhak in dotna khat na dong hi. “ Mipite tung leh mimal tung ah na lai gelh khempeuh te pen a kammal kim in (word by word) in Pasian humop hi a, Pasian Thukham sawmte bangin a kikhel thei lo leh akhial thei loin kip takin na sang ingh. Hih pen a maan mah ding hiam?” ci in na dong hi. Ellen G White in Dr. Paulson lai khak pen June 14, 1906 in hih bangin na dawng hi. “ Sanggampa Paulon aw, ka laigelhte pen sittel tak in na sim a, a hih hangin koi mun ah mah tua bangin ka laigelhte a malkim ( word by word) pen Pasian humop a khial theilo hi cih ka gen leh ka at pen na mu ngei kei ding hi. Lai Siangtho mah bangin athu pen Pasian hong piak hi mah leh a gelhkhia pen mihing lel ka hih na hangin khialna zong om thei ding hi.” (1Selected Message,pp24-26) na dawng hi.
Tua a hih manin, Lai Siangtholeh Kamsanna kha zong Pasian in apiak lai in, akammal kim ( word by word) in apia hilo a, a gelkhiate in amau siamdan dan (style) un na gelh uh hi. Pasian in ahumop pen a laigelh athumalte hi loin, agelhte hi zaw hi. A at lai takun Pasian Kha in ompih mah leh mihing mah ahih man un gelkhial thei leh khialhna mum na nei ve ve thei uh hi. A hih hangin ih gensa mah bangin hih banga gelhkhialh na neu nonote in Pasian humop a hihna khiam tuan lo a, a thugelh thupi leh a thulaigil pen lam apial sak lo ahih man in Pasian thupiak ahihna bei tuan lo hi.

  1. LAI SIANGTHO SANGIN A SANGZAW IN KOIH NGEI LO DING
    Kamsangnu tektek in a kamsanna tungtawna laigelhte pen Lai Siangtho behlapna ( Additional Bible) hilo a, Lai Siangtho aman leh man loh sittel na hilo hi. Bek thamlo in Kamsangnu laigelhte a man leh manloh Lai Siangtho tawh sittel zawk ding hi na ci hi. (4T246; GC, vii). A laigelhte khuavaak neu zaw hi a, Lai Siangtho pen Khawvaak lian zaw hi na ci hi. (R&H, Jan 20,1903). Lai Siangtho sangin koih sangzaw, a hih kei leh a kibangin ki koih ngei lo ding hi. A laigelhte pen Lai Siangtho tawh kituak hiam ( biblical hiam) ci in Lai Siangtho tawh sittel zaw ding hi hang. A laigelhte pen Lai Siangtho bangin upna tehna ( basis Doctrine) leh midangte taina leh thuhilhna in zat ding hi lo hi. Lai Siangtho tang in ( Lai Siangtho sim ai tangin) zang ngei lo ding hi hang.
  2. ELLEN G WHITE IN GEN TAKPI HIAM
    Pawlpi dangte in Sabbath ni in singteh keu sangin agik zaw dom lo ding ci in Lai Siangthosung ah omlo pi a om bang keek in agen mah bangin, Ellen G Whte laigelhte zong ih gen ding ciangin a kician takin gen ding kisamhi. A gen ih sak a gen loh tampi na om thei hi.
    Gentehna in: Ellen G White in Zeisu hong hai ciangin vangam tak tak ih tunma in Sabbath ih tang ding hi cih kigen thei pen Ellen G White in koi mah ah na gen lohi. A gen khat in Limlang tuipi pan in ni 7 sung pai ding cih Early Writings pp 16 ah na gen hi.
    Uriah Smith in Daniel bu leh Mangmuhna bu hilhcianna a gelh laiin, vantungmite in agei ah ding in ompih uh hi cih Ellen G White in gen hi cih ki gen thei thukhat zong a takpi in Kamsangnu in khat vei zong gen ngei lo hi.
    Ellen G White in Melkhizedek pen Kha Siangtho hi na ci hi cih zong agen om a, ahih hangin khat vei beek Kamsangnu in gen ngei lo hi. A ki nai pen pen a gen khat in tua Melkhisedek pen Zeisu hilo hi cih thu hi.
    Tua a hih manin, leitung mun tuam tuam ah Ellen G White in gen hi (langpannopna, selpho nopna leh hanthawnna )ci in a gen theih uh tampi om hi. Ih thugente pen ei mah mah in ih tel ding kisam a, Kamsangnu in gen hi ci bek loin, a genna laibu leh a laimai dong in gen sen sen leng hoih mah mah hi. Ellen G White in a gen takpi hiam cih ih gen ma in sittel masak huai mah mah hi.. Ka lungdam.. A sim mimal kim Topan Thupha hong piak sak ta hen. Amen. Behlapna: Pr. PL Thlenga pen tu laitak in Spicer Adventist University sangpi ah Systemetic Theology lam hilh in a sep laitak a hi hi. Mundang ah Pasian Gupkhiatna thu tangko in vak kawi kawi man kei mah leh, Spicer sangpi panin Pasian nasem dingte training ding, (Prophet school ) Topa koih hi mawk hi. A hunbup in Gospel tangko vak kawi kawi theilo hi mah leh, Semester break hun lai in pai kawi kawi thei ve hi. Mizo Pune sangnaupangte ading Revival Camp abawl nop tawh, tu laitakin Ibrahimpatnam, Andra Pradesh ah Revival Meeting aneih laitak hi a, kumthak January 19 pan in Manipur Circle Annual Meeting ah zong Revival Speaker dingin a kigin laitak hi. Thungetna ah phawk ciat ni.. Lungdam,
  3. Tulaitak pen kei muhna ah, Spicer sangpi pen Religious Department lamah Sia hoih leh sia muanhuai teng a om laitak hi in mu ingh. Pr. Dr. Jesin Israel, Khami mah mah a kigen ngiat, Dr. Paul Bargian, Dr. Goperson ( Sangnaupang hih lai a, laisiam tungtuag grade A student) te in a sep laitak uh hi. Kawlgam pan in Theology lam sunglut leh Pasian nasem nuamte kah na ding in ahoih pen pen laitak hi in mu ingh.
    Lungdam sawn sawn ei..
READ  CS 1: Pasian Tawh Nasemkhawmte
Tags: ,

Admin

Admin

Top