Khangtawn Lunggulh: Thumasa

The Desire of Ages: Khangtawn Lunggulh - Nunneem Zeisu by Ellen G White and translated by Suan Khen Go into Zokam, Zolai, Zopau, Tedim, Chin, Paite, Thado

Thumasa

Minam kiim in a nuntak sungun a teenna a khawlna mun peuhpeuhah amau’ gen theihloh a kisam khat om sak uh hi. Tua pen a sin sung a lung sung uha, a-om den, tu a, a neihloh uh lunggulhna khat ahi hi. Hih lunggulhna pen mihing’ pianphung sung mahmah ah hong hehpih Pasian in a suan ahi hi. Mihing in tutadih ama’ dinmun leh ama’ kuitunna a sia zongin a pha zongin a hoih zaw phial zonghin lungkim zo lo mai thei hi.

Satan in a lungsim kawi, a lungsim khelpilna tawh hih mihing’ sinsung lungsunga lungulhnate na hei khia hi. Amah in hih lunggullhna pen gualnopna, hauhna, thazualna, minthanna leh vangliatnate tawh mite lungkim sak hi. Satan ii khemsa simzawh loh mite in hih thute na sin khin uh hi. Zongh na puuk khin mah uha, lungkim zawhna mu tuan lo uhin, a ngei mahin hawmsuak uh hi.

Hih mihingte’ sinsung lungsunga lunggulhna lungkim zawhna a pia zo ding Mi Khat bek kiangah makaih ding pen Pasian’ lunggel ahi hi. Tua lunggulhna pen Ama’ hang hi-a, tua i lungulhna in Ama’ kiang hong zuat pih kha dinga tua lunggulha ii picinna leh tangtunna pen Amah ahi hi. Tua picinna pen tawntung Pasian’ Tapa, Zeisu, tua Khazih ahi hi. “Tua Tapa in Pasian’ pian’zia a kimin a neih nading, Pasian mahmah in a sehsa ahi hi.” “Mihing hong suahna sungah Khrih in Pasian’ pian’zia khempeuh a kimtakin nei a,” “Khrih tawh na kipawlna hangun nuntakna kicing na nei uh hi” Kalawte 1:19; 2:9,10. Kha tawh akisuan lunggulhna khempeuh zahtak takin a huamin kizui hi.

Haggai in Amah, “Minam khempeuhte’ lunggulhna-the desire of all nations, na ci a, eite in Amah, “Khangtawn khempeuhte’ lunggulhna-the desire of all ages,” i ci siam ding hi. Amah pen “Khangtawnte’ kumpipa” hi zaw lai hi.

See also  Kumkikna Lamen Innkuan

Hih laibu ii ngimna pen lunggullhna khempeuh ii lungkim nading Zeisu Khazih Amah bek a om’ lahkhiat ding ahi hi. Khazih ii nuntakna aki-at laibu tampi: ahoih nono, thu theih nading a dim a ha, khangtangthu a them a neng, tulai thupiang tawh ki tonkhawm tangthute, ngeinate, thupiangte, Nazareth khua mi Zeisu ii thuhilhte, Ama’ vangte akilak ahuam nuntakna tampi mah om mah ding hi. “A lang zongh kigen khin zolo hi,” ki ci hi.

Hih laibu in hih thute lah dingin ngimna nei lo hi. Lungdamna Thubute aki thuhualdan lak lo dinga, khang tangthute ngat takin zongh ban lah lo ding banah a thupi thupiangte leh a lamdang Zeisu’ nuntaknate lak lo ding hi. A Tapa tungtawna aki lak Pasian’ itna lah ding ahi hi. Khazih nuntakna ii khalam hoihnate lak dinga, mi khempeuh in a ciin theih ding thute lah ding ahi hi. I kannop khat lel lunggulhna ahihkeileh kimawhkawk dotnate theihnopna tawh lungkim lel ding hilo hi. Zeisu’ gamtat-nunzia hoihna ii mitlakna in A nungzuite Ama’ kiangah kai hi. Ama’ mimal ompihna, Ama’ thuakpih khualna leh amau’ cingtaklohna banah a kisapnate vei pihin aki hon pawlpihnate in amaute’ gamtat-nunziate cilehsa’ lungsim panin khalam lungsim ah kheelto hi. Angsung huaihamna pan kipiakkhiatna, lungsim toi, thutheihloh leh mi lang muhdah-kholhnate pan lungsimpi thutheihna banah minam khempeuh phung khemepuhte’ khate itna picing amaute in nei ta hi. Hihteng banah hih laibu ii a ngiimna bulpi pen in, thupha Zeisu mite piak khiat ding ahi hi. Hih laibu a simmite Ama’ kiang a zuat nadingin hih laibu in huh ding hi. Maitang kituahin lungsim kikumin, a nungzuiluite’ tungah a sepsa mah bangin Amah mu ding uh hi. Zeisu Vanglianpa in mawhna pan mite gum khia zo pena, Ama’ tungtawna, Pasian’ kianga zuan khempeuh Ama’ aituam Pasian’ meellim ah kheelto cih theihsak nading ahi hi.

See also  Nakpi-a Pattahna Lauhuai.

Hih laibu a at’ nu pen Pasian’ thu ah tuahkhakthu a thuuk a zai, a lom a tangin a nei ahi hi. Zeisu’ nuntakna pana, thuhoih thakte pholh khia hi. Suangmanpha thakte a manpha a kikepna panin hong puak hi. Amah in mong neilo Pasian’ hauhna innpi pan lungsima mangmat ngeiloh hauhnate a laisimte mai-ah hong khia hi. Khuavak a thak leh minthanna khuavakte in a kithei ngeisa laimai tampite panin hong taang khia hi. Hih laibu in a tomin Zeisu Khazih in Pasian’ pianzia a dima a neihna, mawhneite’ tunga mongneilo hehpihna a neihna, Dikna Ni ahihna, a thukhual Siampi Lian Pa ahihna, mihing’ ginatlohnate leh natna khempeuh a Damsakpa ahihna, a nunneem, mi hehpih thei Lawm khat ahihna, a tawntunga mi huh thei kikholhpih Pa ahihna, David kumpi inn sunga kumpipa’ Tapa ahihna, Ama’ mite’ luum leh tei ahihna, lungnopna kumpipa ahihna, hong pai ding kumpipa ahihna, Tawntung Pa, khang tawntunga lunggulh- nate leh lametnate ii kuitunna leh gahtak ahihna cihte hong lak hi.

Pasian’ thupha tawh hih laibu leitung kipia hi. Ngaklahnate leh lunggulhnate tawh a lungkim zo nailo kha tampite’ aa dingin Topa in A Kha tawh hih laibu sunga kammalte nuntakna kammalte hong suak sak dingin thungetna tawh i pang hi. Amaute in, “Ama’ thawkkikna angliatna leh Ama’ thuaksiatna thuakpihna,” hong thei dinguha, atawpna-ah, thupha Zeisu khang tawntungah, “nangma taklamah nop tawntungnate a om hi,” hong ci ding uh hi. “A taklam khut ah lungdam kipakna a tangtunna,” kihawm ding hi. Topa’ sungah a bangkim khempeuh a mu mite’ a picing khin thamante in “tawntung lungtainate,” hong mu-in, “Ka ngaihno a mel hoih a, a thahat hi. Mi tul sawm lakah tehpih ding dang omlo hi,” “a vekin, deihloh ding, khat zong omlo hi,” hong ci ngaungau ding uh hi. (Hih Laibu a lian(chapter) 27-87, dong pen “Humble Hero” Laibu pan kila ahih manin, The Desire of Ages Laibu tawh kibang teekteek lo ding hi. “Humble Hero” Laibu pen a thu a deihna bulpi teng ki-tomkaih Laibu ahi hi. Laiteipa in bel, “Humble Hero” a teei-nate tua bang teekin a letkhiat ahi hi.

See also  Buaina in Sabbath hi

Tua ciangin Laibu Min pen Khangtawn Lunggulh: Nunneem Zeisu kipia hi. A Manglai-in, The Desire of All Ages, hi-a, All na kinusia in The Desire of Ages na ci uh hi. A deihna pen (khang) dung suksuk, (khangtawn) cih a khiatna huam ahih manin Ages pen Khangtawn-in kitei hi. A lawh nuam dingin leh a thuluan a khum dingin Khangtawn Lunggulh: Nunneem Zeisu kipia hi.

Laimai pen manglai bu tawh akituak dingin laigual lakah manglai bu ii laimai kikoih hi. Thulu tawh kizui-in a zon-ol nadingin hih laibu ii laimai pen zon-olna sunga thulu te gei-ah kigelh hi. A manglai bu ii laimai leh Zolai bu ii laimai cih bangin laimai simna nam nih om hi.

Laiteipa.

Tags: ,

Admin

Admin

Top