MSS 10: Khasum Khomlo Baan Sazianlen nu

Martha Etana Chewaka, 45

Ethiopia

December 7

 

Martha Etana Chewaka in buaina lianpi khat nei  hi.

Ethiopia gam khuapilian ahi Addis Ababa a baan khat ah khasum tampitak sang hi. Ahizongin khasum san khat leh san khat kikal sungin a sum khom ngei lo   hi.

Saziankai ahi Martha in a sumzeek danding hoihtakin geel sinsen hi. Khasum a san ciangin a     masa penpen in tithe ding khenkhia pah hi. Tua khit ciangin a inn sapman pia hi. Tua khitteh moh bawlnading maidavui, olivethau, mehza, cihte banah puanhoih nonote leh khedap hoih nonote zong lei hi.

Himahtaleh khabei kuan kaalkhat sap sungteng pen a lungkham pen hun hi den hi. A sumteng bei  ta ahih manin annek ding khiam bek lo in bangmah lei zo nawnlo ban ah, sum khol ding cih peuhmah  gamla lai hi.

Tua zawh a sawt lo in, Martha in a naseppih saziankai khat mah tawh hong kiteng uh a, a nih un a sum uh zeek khawm ta leh uh, kha bei ma in a sum uh bei ve ve   hi.

“Bang hangin hih sumte in thupha ngah lo mawk uh hi ding hiam?” ci in Martha in lamdang sa mahmah hi. Thakhat thu-in ngaihsutna thak khat a lungsim sungah hong lut lian hi. “Pasian in Ama’ NI Siangtho Ni in na ka sep manin thupha hong pia lo    a hi mai tam maw” ci hi.

Tua bangin ngaihsun phapha aa, a om laitakin, Pasian’ dawnkikna bang khat, “Bang hangin Sabbath ni-in na sem mawk na hiam? Ka thupiakte zui hi lecin na sumte in zong thupha ngah ding hi” a   za hi.

READ  Lupna Khat Bawl

A Seventh-day Adventist nulepate tawh Sabbath School leh sun Hunpi khawng a kikhop khawm lai nite Martha in hong phawk kik hi. Ahizongin kum 21 a phak ciangin baan ah nasep a ngah ni a   kipanin kikhawm kha nawn lo hi. Ethiopia gamah nipikaal khat in ni 6 sung na kisem ahihmanin   Saturday ni te in zum kikah hi. Martha ahihleh mizawng innkuan sungpanin a khangkhia ahihmanin khasum tam san theihtheihna mun a zuan a hi  hi.

Martha in a neulai pek a Sabbath School ah a sin ngeisa mah bangin tithe mantakin pia hi. Khat veivei Sabbath ni nitak lam zumkhak khit ciangin a ciah kawm in biakinn gei-ah khawl pak in pastor pa kiangah a tithe ap ziau zel hi. Tua lo teh khat veivei a tithe lai-ip sungah guang ziau in, a meltheih pawlpi mite vaikhak ziau thei  hi.

Tithe tawh kisai-in a cihtak mahmah kawmkal ah, a sum pen nem thei mahmah lo in, liau cih takin liau a, sumzat a tangsam den mawk  hi.

Martha zong Pasian’ kiangah huhna hong ngen mai ta  hi.

“Sabbath ni in na ka sep loh nadingin nasep dang khat hong pia in,” ci-in thu ngen hi.    Kha khat sung bang nisim in tua bangin thu ngen hi. Bangmah kilamdanna om tuan lo hi.

“Ka nasep khawl tamai ning. Pasian’ thu ka manloh manin ka sumte zong nem thei kei bei pahpah leltak. Pasian in thupha ong piaksak peuh leh nang’ khasum teng zong kicing lel ni” a pasal kiangah ci hi.

“Aw, na cih ngam leh khawl pah mai ve leh,” ci   hi.

Amah zong Adventist khat mah ahihna tawh kizui-in a lawm nu’n a nasep khawl leh a deih sawtpitak na hi khin zaw lai  hi.

READ  A Nasemte khat in Huzaap

Ahihhangin Martha khawl tuan lo hi. Tua sangsik in, a sep kawmkawm in nasep thak khat a ngah nadingin thu ngenngen hi.

Kum nih hong cing ta, hong semzom zo nawn lo hi. Nisim hunsim phial in, a lungsim sungah,    “Tu laitak pen na nasep na khawl hun dingin a hoih pen hun ahi hi. Tu laitak pen na nasep na khawl hun dingin a hoih pen hun ahi hi. Tu laitak pen na nasep na khawl hun dingin a hoih pen hun ahi hi” cih dan khat om den hi. Ni nga sung vilvel an tangin thu a nget khit ciangin, bank ah nasep khawl ta ahihna   pulaak khia ta hi.

A pute in lamdang sa mahmah hi. Amah pen nasep siam mahmah, hanciam mahmah khat ahih dungzui in a pute in pammaih sa mahmah hi. Tua ahihmanin Sanini pawl khat a off theih nadingin panmun thak khat pia uh hi. Ahi zongin Martha thukim ngam tuan lo hi. Pasian thu sawtveipita a nialna panin tu-in citak taka Pasian’ thu a man ding hun hi ta   hi.

Bank pan in a paikhiat phet leh lungnopna le khamuanna tawh kidim pah lian hi. A beisa kum 13 sung tawntung baan ah a nasep sungin tua bang lungnopna khatvei zong ngah kha ngei lo    hi.

Kha khat hong cing ta, tua kha sung pen a nupa un, sumzat a ki tangsap loh uh kha masa hi ta hi.

A nupa un lamdang sa mahmah uh  hi.

“Tuni a kipanin, Pasian um taktak ta ingh. Ahangin na khasum bek tawh i innkuan sung kisapna khempeuh kicing mawh hi lo maw! Pasian in hong kem    taktak mah ei” Martha in ci hi.

READ  MSS 9: Kisil Buk Sungah Thungen

Nupate in a sumzeek dan uh bangmah a kheel zong hi tuan lo uh hi. A nek a dawn uh hi taleh a    silh a teen uh hitaleh bangmah khiap kul tuan lo in kicing mawk hi. Hinapi, a sum uh bei siang tuan lo lai mawk hi.

“Koi panin sum hong pai hiam cih zong thei se keng, ka theih khat bek om hi, ‘ka innkuan un thupha ka ngah uh hi.’ Nakpi takin sum zon sangin Pasian’ thu manna hoih zaw hi” Martha in ci hi.

Nong piakkhiat uh mission sumpite tawh, Ethiopia gam sung a, Martha te khawng a neulai vua tithe piakdan ding a kihilhna uh, a kikhopna uh ahi, Sabbath School    khaan dingte ki lambeh ding hi.

Sabbath 13na mission sumpi nong piakkhiat manun lungdam mahmah   hi.

By Andrew McChesney

 

Tags:

Admin

Admin

Top