KHAZIH EITE’ DIKTANNA

(Mopawi ah bang puan na silh ding hiam?)
By Ted Wilson (Sabbath Sermon)

​

Kumthak hun nuam khat kipat mah bangin eite in ih gupkhiatna thumungpi ahi, “Khazih leh Ama’ Diktatana” thu ngaihsut hun ahi hi. Matthew in Zeisu thugentehna ahi a lawphuai mahmah “Mopawi” bawlna hong lak khia hi. Matthew 22 sungah a kigelh in, Kumpipa’ bawl a thupi mah mah mopawi thu ahi hi. Hih mopawi in thupi bek tham loin, ngaklahhuai mahmah mopawi, kumpipa in a tapa ading abawlsak ahi hi. Kumpipa in “A khohsa mite sam dingin a nasemte a sawl hi” (Matthew 22:3).

A khasiathuai thu in, a khohsa mite in tua kumpipa’ tapa mopawi pen na lunglut lo mawk uh hi. Kumpipa bawl mopawi ah asap mite, hong pai nop loh ciang kumpipa lungsim bangzah in na ding cih na ngaihsun kha hiam? Hih gentehna thu leh a deihna pen tuni in ih lungsim sungah koih dih ni. Zeisu in Ama’ mopawi ah eite hong sam hi. Eite ih pai ding hiam?

Mopawi Lengla Dona
Mopawi sungah lengla dona zong a lawphuai mahmah khat ahi hi. Ko innkuan in zong mopawi lengla dona pawipi ka inn ah nih vei leh biakinn ah khat vei ka nei ngei khin uh hi. Mite in ka tanute mopawi lengla dona ah hong pai in hong uap uh ciangin ka lung uh adam mahmah hi. Ahih hangin, hih thu gentehna ah kumpipa khohsa mite in kumpipa’ itna tak tawh a sapna thudon lo uh hi. “Amaute in paulap bawl in amau na tek sep san uh hi” (Matt 22:5). Eite zong tuhun kumzabi sawmnih leh khat nuntak zia tawh buai in Pasian in hong nekpih ding pawipi thudon man lo in ih om kha hiam?

Kumpipa Kinialna
Hih gentehna sung ah, kumpipa in mopawi a asap a khoh mite in kumpipa nasemte man in bawlsia in that uh hi. Nang zong Pasian tawh na semkhawm ding na gel ciangin, mite in hong nial ding, hong bawlsia ding, hong pampaih ding leh a tawpna ah zong hong that ding in ki gingkhol in. Christian pawlpi bup leh a diakin ei Seventh–day Adventist pawlpi in kumpipa’ nasemte bangin ih thuak ding zong ih kiging ding kisam hi. 

Ahih hangin mailam hun ading lungkham kei in. Mailam hun a, kamsangte genkholh eite theihsa ahong tung dingte hangin lau kei in. Khazih in eite tawh atawp dongin hong om khawm ding cih a kamciam (Matt28:20) i mu hi. Mi khatpeuh in tulai thupiangte panin kamsangte thuhilh kholhnate a tangtunzia mu ding uh hi. Eite in huntawpna ah ih om ta hi.

Kumpipa in a nasemte tua banga kibawlsia in a kithahnate azak ciangin heh mahmah hi. Amah in a galkapte sawlkhia in, tua mithatte susia in a khuapi uh haltum hi. (v.7)

Mopawi Kipan
Kumpipa in mopawi kipan sak ta a, “Kitenna mopawi a baihsa in om a, ahi zongin asap mite a ne dingin kilawmlo asuak uh hi, tua ahih manin lam lianpi ah va pai unla, mi na muh zahzah uh hong sam un” (v. 8,9), mi tampi mi hoih leh mi sia khenlo in hong sam uh ahih manin mopawi inn sung adim uh hi (v. 10).

Tuni in Pasian’ thu ih tangko ciangin, Pasian thu tawh a nungta tawh a nungta lo tawh mi tampi in hong za in hong sang ding uh hi. Ahih hangin asia le apha, tang le tahumte atawpna hong omkhawm ding hi. Tua khit ciangin sinkhiatna om dinga, tu in zong hih sinkhiatna kipan ta hi in ka um hi. 

Nang le kei in, ngaihsutna maanlo, ngeina hoihlo Pasian kiangpan hong pial sak ding pan ih kidal nading lampi khat bek om ding hi. Tua bang a ki sinkhiatna pan kip tak a din theih nadingin eite in “Khazih’ Diktanna” tung bek ah kingak ding ahi hi. Eite in Khazih in eite hong diktansakna, hong siangtho sakna, hong bawlthakna vangliatnate ih ngah ding kisam hi.

A Kamciam Kalhna
Lai Siangtho sungah Khazih diktannate ih san khit ciangin hong kamciam Zeisu hih theih ding leh hong hih sak lai ding tampi om hi. “Ama’ min a um mi tampite tungah Amah in Pasian tate hihna za pia hi” (John 1:12). Sawltak Paul in zong ‘Khazih’ lungsim bang eite in ih neih tek ding’ (Phil 2:5) hong hanthawn hi. Mangmupa John in zong eite hihna mantak leh eite hamsiatna pan suahtak nadingin, “Na hauh na ding un Ka kiang pan in kham citak hong lei un, … puan kang a siangtho.. note na silh ding un, na khuamuh na dingun mitza kei kiang pan hong la un. Ka itte ka tai a, kisik kik un” (Mang 3:18,19).

Zeisu’ gentehna ah kumpipa in a mopawi siimte hong et ciangin, mi pawlkhat in mopawi puan silhlo mu ahih manin, amah in “Lawmte aw, banghang in mopawi siimna puan silh loin hong pai nahi uh hiam? (Matt22:12) ci in a dot ciangin tua mite in a dawnna ding thei lo uh hi. Pawlkhatte in ahih leh tua mopawi siimna puante silh ding kipia mah leh sang nuamlo lai uh hi. 

Kumpipa in a Tapa’ mopawi ah, midang meltheihloh (nang le kei) hong sam bek thamlo in, mopawi siimna puan letsong in hong pia thuah lailai hi. Khazih in eite Ama’ Diktanna puantualpi hong piak ciangin, eite akua mapeuh a dingin gollua neulua cih om lo in, kituak linlian dinga, eite in tua Mopuan hong kipia pen sang in ih silh ding bek kisam hi. Amen.

Kicing zaw leh Thuk zaw 
Kamsangnu’ laibu Christ Object Lesson sungah Khazih’ thugentehna pen a kicing zaw in eite hong hilh hi. Mopawi puan in “A siangtho, paubanna a nei kilkel lo Nuntakzia, Khazih hong piak eite neih ding” ahi hi. (COL. p310)

Tua nuntakzia pen eite nuntakzia hilo in, Khazih a’ ahi hi. “Hih pen Khazih’ nuntakzia hi a, Ama’ paubanna omlo nuntakzia, Amah pen Honpa leh gumpa asangte ading in hong piak upna tawh ih san ding bek ahi hi”. Eite in ih um takpi hiam?

Hih laibu sungah hibang in kamciam a muanhuai mahmah hong pia lai hi. “Tua Khazih Diktanna tawh a kituamte bek in Pasian mai ah kilangh ding uh hi. A kitunna puan tualpi pen Khazih Diktanna hi a, Khazih in kisik in a um mite bek khuh ding hi. ..hih puantualpi pen Vantung pan a kigan hi a, mihing bawlsa khauzang malkhat beek zong kihel lo hi. Khazih mihing hong suahna ah a nuntakzia kicing a, tua nuntakzia pen eite hong pia hi. Eite hoihna ahih leh beelpuansia bang bek ihi hi (Isaiah 64:6). Ama’ paubanna omlo Nuntakzia tawh mi khempeuh Pasian thupiak zui thei dingin hong bawl hi. COL p. 311,312

Midangte’ hong thangsiahna ahi, “Pasian thukhamte kizui zolo hi, paubanna a neilo nuntakna neih theih ding hilo hi” cihte ah awk kei ni. Eite eima’ hanciamna tawh paubanna neilo nuntakna kinei zo lo cih pen thuman hi a, ahih hangin eite in Khazih Diktanna puan tualpi ih silh ciangin Vantung a ih Pa Pasian mai ah paubanna ih nei kei hi. Amen.

Siangthosakna Kizom
Hih khit ciangin Khazih Diktanna in eite sungah a kizom in na hong sem hi. Ellen G White in, “Eite Khazih sungah ih ki pumpiak ciangin, ih lungsimte Ama lungsim tawh ki pumkhat in, lungulhna leh lungsimte zong Amah tawh pumkhat suak a, Ama ading in mun awng kibawlsak in, eite in Ama nunzia tawh ih nungta hi. Tua in “Khazih’ Diktanna puanpi silh” a deihna taktak ahi hi. Diktanna in thuman nasepna leh tua nasepna tawh thu kikhen ding ahi hi. Eite ih nuntak zia tawh thu hong khen ding a, tua nuntakzia pen eite upna ih lahna ahi hi. COL 312

Tua ban ah, “Mopawi ah mopawi puan asilh lo mipa dinmun tuhun in mi tampi om hi… Amaute in Khazih a kisapna uh leh a upna uh a taka nuntakpih lote ahi uh hi. Amaute in a pianpih kente le a ngeina luite pai lo uh hi. Amaute in amau le amau hoih kisa in, Khazih hoihna suan ding sangin, amau hoihna suangin ding uh hi. Hih thute za khin mah leh amaute in Khazih’ mopawi ah Khazih Diktanna mopawi siimna puan silh lo in hong pai uh hi.” COL p315.

Ei Seventh-day Adventistte zong eite hoihna leh dikna a suangte sangin, Khazih hoihna le dikna a suangte ci in mite in hong muta uh hen. Ellen G White in, “Eite Khazih Diktanna puan tualpi ih nuntak sungin silh tek ni. Hih in eite Khazih nuntakzia inn ah kipatna leh Khazih hangin a thupiak zuihna ahi hi… tua hikei leh eite zong Kumpipa’ tapa mopawi a, mopawi siimna puan silh lote ih bang ding hi.” COLp306.

Mainawt Ni
Eite mai i nawt ciangin, Khazih’ hong piak puantualpi tawh kikhuh in vanlamte tawh na ih semkhawm zo ding hiam? Khazih hong piak Ama Diktanna eite in saangin, tua tawh kituam a, Khazih nungzuite nunzia tawh ih nuntakna ih lahkhiat ding kisam hi. Mite in Kha Siangtho tawh ih kidimna pen “Hih Seventh-day Adventistte in Zeisu thei takpi uh hi. Khazih amaute lungsim sungah teng takpi in, amaute pen Khazih Diktanna tangko pen pente hi” hong ci ding uh hiam?

Elder Ted N. C. Wilson.

President. G.C
Source: Adventist World, January 2016.

Translated by Daniel Shoute