MSS 9: Khrisian Laibu ahilo khat tawh Gupkhiat

Elijah, 50

East-Central Africa Division      November 30

Africa nisuahnalam gam sungah Lai Siangtho hoih takin a sinna uh hangin mi tampitakte Seventh-day Adventist sungah hong lut uh  hi.

Elijah zong khristian hi lo napi Lai Siangtho hoihtak in a sinna panin Adventist   hong suak hi.

Khrisian ahi lo innkuan sungpanin Elijah khangkhia a, Africa Nisuahnalam gam sung aa, a sangkahna ah pil mahmah hi. Biakna tawh kisai subject pen limsin phadiak in, Nisuahna gamlaizang lam    a om University mun thum ah degree la kawikawi hi. A gam vua dingin biakna makaipi khat dinmun   dong hong tungto ta a, mundangah mission nasepna ah makaipi hong suak   hi.

Himah taleh Italy ah biakna vai-in khat vei a va zin lai-in Rom khuapi sungah a lut ciangin inn sung baangtungte ah Pasian in mihingte Sabbath ni-in a tawlngak ding a sawlnate amuh ciangin a  lungsim sungah dotna khat hong suak hi. Sabbath ni pen Saturday ni ahihlam zong Lai Siangtho tungtawnin a theihsa ahi hi. Tu-in Rom khuasungah Sunday ni-in saiite kikhak in biakinn ah a kikhopna uh a mu hi.

Banghiam khat in Elijah lungmang sak hi. Italy gamsungah a zinna tuamtuam te ah, tanglai mun minthangte a et kawikawina ah, Jesu Jordan Gun sungah a ki tuiphum mah bangin mite tui sungah a kiphumna uh limte a mu hi. Ahizongin tu-in a maute a makaih mite in, tui kiphumna ki zangh nawnlo in,  tui thehna kizangh zaw ahihna a gen ciangin lamdang samahmah uh hi. Tua bangin tuiphumna tangin tuithehna a kizatnading sawlna Lai Siangtho sungah muzolo   hi.

Tua bangin Elijah a inn ah hong tunkik ciangin, a ma’ Lai Siangtho sungah a lian 6 na sunga, Jesu thu kigenna hong simsuk kik hi. Adiakdiak in alian 19 na sung leh Ellen White gelh, “Khangcin     lungdeih” hong etkaak hi. Ama’ nuntak sung kum 40 bang a phakna sungah, kua man’ Jesu thu peuhmah Elijah’ kiangah va genpih ngei lo hi. Ama’ theihna ah Jesu pen kamsang lian khat bek in thei lel a, mi mawkmawk khat mah bang bek in ngaihsun hi. Tu-in ahihleh ama’ Lai Siangtho sung a sim ciangin, Jesu Pasian ahihna, A sihna, Na khempeuh a piansak theih nadingin vangliatna aneihna,    leh leitungah a om lai-a nalamdang abawlnate sim suksuk hi. Alian thum sung a, a neu 45, 46 a sim khak ciangin Jesu pen Pasian taktak ahihna mu aa, lamdang samahmah  hi.

READ  A Gammang Sanggamnu a ding Thungen

A Lai Siangtho honsa in koih in, Isaiah 9:6 sung a “Banghanghiam cihleh eite’ adingin naungek khat hong suak a, eite tungah tapa khat hong kipia hi. Amah pen eite hong ukpa hi ding a, ama’ min pen Lamdang, Thulakpa, Vanglian Pasian, Tawntung Pa, Nopsakna Kumpi, kici ding hi” cih tawh hoihtakin enkaak khawm hi. Tua bangin a kantel khit ciangin a lungsim khempeuh tawh, Jesu biak dingin khentat pah hi.

“Ka Lai Siangtho in Jesu pen Pasian ahihna leh Piangsakpa a hihna hong laktel thei ahih manin ka Honpa leh Tanpa in ka sang pah hi,” ci-in thudongte tungah genkik hi. “Hih thu tawh kisai-in kuamah’n    kei kiangah hong hilh ngei lo hi” ci  hi.

Tua bangin Elijah in Jesu thu kicing zaw in a teltheih nadingin pawlpi khat hong zongg pah hi. Nidang a lamkabom khawngah biakna tuamtuamte pasian’ thu kikupna (dialogues)te hong phawk kik a, tua te lakah Khrisian pawlpi tuamtuamte zong kihel thei in, Adventist pastorte zong kihel zel ahihlam phawk kik hi.

“Khrisian pawlpi dangdangte sangin Adventists te in Jesu Pasian ahihna ka mite’ tungah nak telgen theih zawtham uh hi,” ci  hi.

Tua manin, Saturday ni khat, Adventist biakinn khat ah va kikhawm   hi.

Asawt lo in azi a tate tawh khua dang khat ah a kituah nading uh thu hong om hi. Elijah in Khrisian biakna a upna hangin a beh a phungte in thah a sawm man a khualal ahi   hi.

A pem na uh tua khuapi thak ah Sabbath masa ni in, East-Central Africa Division sungah   executive secretary sem ahi Alain Coralie in nipikaal nih sung effort bawl a kipat hun tawh kituak lian hi. Effort a man ciangin Elijah leh a zi Josephine te nupa in, Jordan gun sungah Jesu a ki tuiphum ngiat mah bangin, tui sungah ki phum ngiatna tawh a upna uh hong lakkhia uh   hi.

READ  MSS 11:Supding Omlo

Tu-in Elijah kum 50 pha ta a, Jesu thu a za ngei nai ngiat lo te’ kiangah lawptak leh hanciamtakin thu hilh hi. Ama’ effort bawlna leh laibu zuakna hangin mi tampitakte hong ki tuiphum uh hi. Tua banah    a omna pawlpi ah deacon zong sem lai  hi.

“Filippi 3:7-14 sungah leitung nate leh hamphatna khempeuh Jesu i upna hangin i supngam ding  ahi hi. Tua hang mah in ka behlephung mah zong a nusia ka hi hi” Elijah in ci hi. “Tua ban ah ka pilsinna university te a kipan ka degree thupi teng leh biakna lamah ka thuneihna, ka vaang neihna khem peuh ka nusia hi. Bek tham loh in gam lian thum panin ka biakna nasepna hangin khasum mun thum pan a ka     ngah teng zong ka sumh ngam hi. Jesu bek ka mitsuan ta hi” ci   hi.

Ama’ tangthu a za ngei mite’ kiangah, “Note khempeuh in zong na mawhna uh kisiik kik in Jesu bek mitsuan in, gupkhiatna na ngah nadingun kong lunggulh mahmah hi,” ci   hi.

By Andrew McChesney

Tags:

Admin

Admin

Top