Khuamial Sung Pan

January 19 Mozambique

Khuamial Sung Pan
Agen: Atija Jamal Caminete, 57

Mozambique(Mozambik) gam a, Muslim 80% bang a ten na Nampula khuapi pan in a gamla simsim khuata khat ah a teeng a pi’ kiangah a hawhna panin, Atija in Seventh-day Adventist pawlpi’ thu a zak cilna ahi hi.

Numeino Atija kum 8 a phak in a pite’ khua ah hawh a, Adventist biakinn mai, a kantan laitak in Elder pa in na sam a, an na ne sak hi. Biakinn ah thugen zong a ngai dingin sam pah hi.

Tua ni-a, azak sermon pen tudong tel sitset lai hi. Thugenpa in Matt. 24 sung bulphuh in ‘Topa Jesu hong paikik ciangin misite koibangin thosak kik ding’ cih thu gen hi. Atija’ lungtang bunpah vinven hi. Abeisa kha 1 lai in anau nu, Muanacha in nusia hi.

“Thugenpa’ thugen ka ngaih kawm in, ‘Aw.. ka nau tawh ki mukik ding keive maw’, ci-in ka ngaihsun pah hi,” Atija in ci hi. Tuazawh kum 7 khit, amah kum 15 a phak ciangin Sunday tangg innsung pan a khangkhia, Adventist biakinn ah, a kikhawm pasal khat tawh hong kiteng hi.

Sabbath ni khat, tua pa in kikhawm dingin zawn hi. Patna la “Vantung ah min hongsap lai tak” cih kisa in, a gei-a kum 6 khawng apha pan numei no in siang selsel in a sak ngai kawm in nuam sa mahmah hi. “Tua nu’ lasak ka zak teh ka lungtang ong bunh taktak hiven,” Atija in ci hi. Tua ni-a kipanin Adventist suah ding khentat hi.

Mozambique saklam gamte’ ngeina ahi, ‘innkuan vai thupi khat peuh a om ciangin thallohpa’ thudot ding pen amau pupa ngeina ahih manin, Atija zongh a pasal tawh a nuno ahi, Carmen kiangah hawh dingin pai uh hi. A nuno pen dawi-ai tawi hi-a, amah a khansuah nu zong ahi hi. Atija in Adventist a suah nopna thu a nuno’ kiangah anget ciangin, a nuno-in, “Hih thu pen na nu tawh ki kum zaw in” na ci hi.

See also  Lupna Khat Bawl

Meizong ahi, Atija’ nu in, “Ke’n kong khansuah hi kei, nang hong kem na pano tawh kikum zaw in,” na ci leuleu hi. A Pano, Candido in na phal lo hi. A ki tuiphum peuhmah leh cik mah hunin kisai kha nawnlo dingin, kamciam hi.

Tua kammal in Atija linglawng sak hi. Ahizongin tui kiphum veve hi. A nupa un kiphum ton uh hi. A innkuan pihte uh khat zong vapai vet lo hi. Ahun a cin ciangin Atija in ta pasal khat, Dionisio kici hong nei hi. Khat vei tua a tapa nasia takin a ci hong na mawk hi. Atija in a nuno kiangah hitaleh a dang siampute’ kiangah hitaleh paipih nuam vet lo hi.

Nitak khat A pano Candido in teipi khat tawisa in Atija te’ kongkhak vang ah va ding hi. “Hih naupang a sih ding a ngak ka hi hi. A sih khit ciangin hih ka tawi ka teipi na ngawng ah hong siatsuk ding hi’ng” ci hi. Ni nih hong cingta, naupang in anletui ne lo in hong kiam semsem hi. Atija te nupa zong khitui naptui tawh thu hong ngen uh hi. A nithum ni ciangin, tawmkhat hong nuamtuam zawdeuh in, siavuan te’n zong hoih ta ding hi, ci uh hi. A pano zong a teipi tawh a inn ah ciah hi.

“Dawigilo pen tu in kizo khin ta ei. I tapa a si taktak ding ka sak khit hiven, Pasian’ hehpihna tawh hong dam kik hi,” Atija in ci hi. Tua damkikna in Atija’ nau nu’ lungsim sukha in, amah zong Adventist hong suak hi. Kum khat khit ciangin Atija’ sanggampa le adang a nau numei khat zong hong ki tuiphum uh hi. Tua khit ciangin a nu hong kiphum a, tua zawh a sawt lualo in a nuno Carmen zong hong ki tuiphum hi. “Pastor pa in ka nuno a phum in tuisungah thum vei tak phumsuk tang hial hi,”Atija in ci hi.

See also  MS3: Khut Laam

Tua nupinu tuisung pan hong dawk khiat masak in, kua ma’ theihloh kammal honpi khat awngkhia gawp hi. Tua amuh ciangin Pastor pa in, “Khat vei phum kik ni” ci-in, phumkik hi. A nih veina tuisung pan hong thawh khiat ciangin, a suukzaw in hong awng khia leuleu hi. A thum veina taktak ciangin khagilote in nusia taktak tasam uh hi,” ci in Atijah in gen hi.

Tu-in ahih leh nupinu Carmen pen Deaconess hi ta hi.

Atija a ki tuiphum peuh mah leh kisai nawn lo ding, ci-a, a kiciam vatvat a Pano Candido zongh, ama’ zi nangawn hong ki tuiphum peetpeet ciangin Atija te’inn ah hong hawh sam hi. A mah zong tui kiphum nuam ahihna hong pulaak hi. A tui kiphum zawh kum khat khit ciangin a si ta hi.

“Ka innkuan pih khempeuh in Jesu Khris sangta uh hi. Khial hong sa in, hong langpan ka innkuan pih khempeuh khuavak hong musak Pasian’ tungah ka lungdam mahmah hi.” Atija in ci hi.

Tu in Atija kum 57 pha ta a, Pasian’ zat mahmah Pastor pa’ zi ahi hi. A pasal Lazaro pen tu-in Nampula khuapi-ah pawlpi kem sia ahi hi.

Tu kuata Sabbath 13 na sumpi khenkhat tawh Nampula khuapi-ah tagah kepna innpi kilam ding hi. Mission sumpi nong piakciat man un lungdam.

Tags:

Admin

Admin

Top