MSS 6: Khuata Pan Kumpi Inn ah

Khuata Pan Kumpi Inn ah

Vincenzo Mazza, 70

Italy; February 8

Kum 16 apha Vincenzo Mazza pen Italy gam sung Sicily tuikulh ah hong ciah kik in, Seventh-day Adventist Pawlpi ah tui a kiphum khitna thu a gen ciangin a pa nak heh mahmah hi.

Tua banah kum sawmval gual tangvalno in pastor suah ding a gen sawnsawn lai ciangin a Pa’ hehna khang semsem hi.

“Na pai peuhmah leh ong ciah nawn kei oh” ci-in (Leitung Galpi Nihna hun lai a, galkap sem ngei, a ta nga te khauh tak in a uk sitset), a pa in gen giap hi. Vincenzo pen Italy gamah Adventist makaipi khat suak in, tua gam kumpipa tawh Lai Siangtho kikum khawm ding hi, ci-in kua mah in neucik zong ngaihsun khol kha ngei lo uh hi.

A Pa’ lauphawnna in pasalno themcik zong lungkia sak zo lo hi. Florence aa om Villa Aurora kici Adventist Sang ah Vincenzo va pai hi. A tun ciangin, sum lo tawh sang ki kah thei lo ding-a, nasep tawh kah theihna program lah om lo sawnsawn hi.

Lungkia takin sang huang sung tengah kileh kawikawi hi. Inn ah a ciah kik ding lah ut lo hi. Inn a ciahkik nop leh a upna a nusiat kul ding hi. Nakpi takin thu ngen hi.

Thakhat thu in a bil gei-ah ki hopih a, “Na puan ang-ip sung en sin aw,” ki ci hi.

Vincenzo in a puan-ip sung a sawk leh laidal khat na om a, tua tungah Florence a pai lai-a, a ki muh khak pih German innkuan khat i’ address na ki gelh hi. Tua innkuante-in Germany gam Karlsruhe ah a  vahawh nadingin a sapna-uh lai ahi hi.

See also  MISSIONARY DING A, PIANG NGIAT

Tua ciangin Germany gam Darmstadt khuapi ah Adventist sang a om lam hong phawk vat hi. A sum neih sun teng hong sim ciau ciau a, Darmstadt ciang a tun nading meileng letmat lei zawh mialmial nading sum nei lai hi.

Vincenzo zongh meileng ah tuang pah in Karlsruhe ah zan khat in tung hi. A meltheih innkuan te’ kiangah Lai Siangtho sang kah nopna thu gen in a vai teng a gen ciangin, tua innkuan te in Karlsruhe  pan in Darmstadt ciang a tuan nading meileng letmat na lei sak leuleu uh hi.

Khangno pa ahih leh tu-in sum nei nawn lo, German tawh kisai: a pau, a lai, theih khat zong nei lo, Sang ah zong koi ci pai ding cih khat zong a theih om lo hi. Sawt veipi sung lam siau kawikawi in Adventist sanginn zong kawikawi hi. Gamlak tungta-a, asawt loin gammang hi. Ni tumta-in, akhua dam mahmah banah lau mahmah hi. Bang cihding cih khat zong ngaihsun thei lo ahih manin nakpi takin kap kawmin Pasian’ kiangah thu ngen hi.

“Hey, khangno pa! Bang zongg na hia?” ci-in aw khat hong ging a, diang khia veva kha hi.

Vincenzo in akiim apaam a-et hangin bangmah mulo-a, lamdang sa mahmah kawmin tunglam a-et leh putek neu samkaang biibiai khat amu hi. Tua sangin lamdang asakzawk lai-ah, tua putekin German pau tawh aho pen amah’n theitel mawk hi.

“Adventist Seminary azongg kahi hi” ci-in Vincenzo in Italian pau tawh dawngkik hi.

“Koici pai ding, cih hong gen ning ei” ci-in pu-in German pau tawh gen leuleu hi. Tua zong Vincenzo in thei leuleu hi.

See also  03. Tawlngak Dingin Ngiimlo

Pu in a paidan ding khempeuh ateltakin hilh-a Vincenzo zong pai pah hi. Kal tampi asuan phei khit ciangin lungdam kohkik ding phawk vat-a, akihei leh Pu na om nawn lo hi.

Vincenzo seminary ah tung ta-a, a sayate’ kiangah a thupiang teng a gen hi. Amaute in amah na saang pah uh a, a sepding zong nasep guan pah uh hi. Vincenzo in akhan tawntung Italy le Germany gam sung tengah pastor sep ding ngaihsutna tawh amaban hongzom toto ta hi.

1995 kum panin Italy gamah pawlpi makaipi, a pensen lak 2000 kum dong semsuak hi. A tawntungin a pa tawh ki zopna nei den hi. Hun saupi khop khat khit ciangin Pa in Vincenzo’ tungah mawhmaisakna ngen hi.

“Kei pen thuneihna aana tawh ka tate hong ukcip na pa-uh kahi hi. Hih thu ka kiphawk theih ciangin ka kisik mahmah hi” ci-in a tapa Vincenzo, a zi le ata nihte tawh khuakhal sungin a pate’ kiang, Sicily ah a va hawh lui-un, na gen hi.

Italy gam Adventist Pawlpi makaipi khat ahihna tawh, Vincenzo in Italy kumpi Oscar Luigi Scalfaro kiangah Protestant pawlpite a panpihna tawh kisai in lai khak khat gelh ngei hi.

Tua lai a khak khit a sawt lo, 1997 kum in, Kumpi Scalfaro in kumpi inn ah a hawh dingin Vincenzo sam hi. A hawh masak khit ciangin amaute lawmta suak uh hi. Kumpi Scalfaro in i pastor pa tamvei pi tak mah a hawh dingin sam zelzel a, tua bangin a sap sim in, “Pastor Mazza aw, hehpihna tawh Lai Siangtho hong sim khop pih in. Thu hong nget khop pih in” ci den hi.

See also  4. Pawlpi 13 ah Itna Zongg

A ki lawmtatna uh a kilangh penpen khat ahi, pastor pa in a pensen khit ciang a, a om na ding innpi honpawi 1998 kum in Forle ah a bawlna ah, Kumpipa in  a va uapna ahi hi. Kumpipa a va kihel manin kua ma’ theih pih khol loh ding kimlai, Italy gambup thuthang ah ki tangko ziahziah hi. Italy gambup ah Adventist Pawlpi’ thu zong a za kha ngeilo mi tampitak te in Seventh-day Adventist Pawlpi’ thu a theih ban uh ah, ni sagih ni Sabbath thu zong hong thei uh hi.

Tu-in, Vincenzo kum 70 pha ta a, Parkinson’s disease kici natna ngah hi. Himah taleh a lungsim sungah pastor nasep mah om den ahih manin, ama’ facebook laimaite ah sermon tom nono post thei zel hi.

Tu kuata Sabbath 13na i mission sumpi khenkhat tawh Germany gam, Darmstadt khuapi a, Marienhohe Academy Sangpi building te kipuah sak ding hi. Phal tak in nong piak khiatna uh hangin lungdamna lian mahmah hi. Topa’n thupha hong pia kim ciat ta hen.

By Andrew McChesney

Tags:

Admin

Admin

Top