ZSS 6: Kiphatsakna Pan Kisiatna Ah

Zomi Sabbath School Lesson 6: Kiphatsakna Pan Kisiatna Ah

Lesson 6       Kiphatsakna Pan Kisiatna Ah

*February 1–7

 

Sabbath Nitaklam                                                     Feb. 1

Tukal Sung Sim Ding: Daniel 5; Rev. 17:4–6; Ps. 96:5; Col. 1:15–17; Rom.1:16–32, Eccl. 8:11, Rev. 14:8.

 

Kamngah: “Amah in hun le khuahunte kheel a, kumpite koih in lah a lakhia hi. Amah in mite tungah pilna le theihna a pia hi.” (Daniel 2:21).

            Daniel 5na ah, mihingte kiphatsakna te pen zumhuaitakin tawplel cih tangthu in Pasian in hong lakzo hi. Nebuchadnezar in, hun sawtpimah la hitaleh, pilna ngah limlim hi. Atuupa, Belshazzar inbel ngahlo hi. Biakinnpi hai tepen gualnop bawlna ah simmawh bawl in zang hi. Tuabang simmawhbawlna pen, Pasian talsik in do hipah hi. Belshazzar in a siatna hai, tuabangin dimsakin, Daniel 8 sungah kii-neu in Pasian’ biakinnpi bul do a cihbanglian in gamta hi. Belshazzar tung panin, Kumpi dinmun lakhia in, Ama’mite galte tungah a bawldan dingteng bawlsuksuk hi. Tua thupiangte BC 539 kum hi. Zankhat sungin Babylon in, Medo-Persia te’ khut sung tungziau hi. Daniel 2 sungah kham pan ngun a tungsuk ahi hi. Leitungvai khempeuh nangawn Pasian mahin uk cih teci ahi hi.

 

Sunday                                                                              February 2

Belshazzar’ Gualnoppawi

             Daniel 5:1–4 le Daniel 1:1, 2 simkhawm in. Belshazzar in a sia mahmah bang bawl hiam? Ama’ omzia taktak hong bangci lak hiam? A gamtatnate Rev. 17:4–6 tawh saikak in. A kibat dan genin?

 ……………………………………………………………………………………………………………………………………………………

 

            Kumpipa in biakinnpi hai siangthote zudawnna zatdingin thupia hi. Nebuchadnezzar in, Jerusalem biakinnpi pan hong ciahpihin, ama’ pasian biakinn sungah koih a, zahtakna piaksak laibuang hi. Tua pipi, Belshazzar in zangkhai bawlmahmah in zudawnna in zang hi.

            Tuabangin zu a dawnkawmin, “Kham, ngun, tau, sik, sing le suang pasiante phat hi” (Daniel 5:4) ci hi. Na nam guk hong pulakte ciapteh huai hi. Babylonte in nambat 60 bul-phuh in zang mahmah uh hi. Tu hun ciangin nambat 10 bulphuh in i zang hi. A pasiante uh 6 hong pulak limlimpen, Babylon biakna sungah picinna nambat ahi hi. Tua amau upna mah bulphuh in, Nebuchadnezzar mang milimpi zong bawl a, leivui mun ah sing a zanglel ahi hi. A mang sungah Suangtum pen, a nunungpen in hong kilang ahihmah bangin, milimte a bawlna vuah zong a nunungpen mah hizel hi. Suangtum in, leitung kumpite tungah Pasian thukhenna lim (Daniel 2: 44, 45) zong ahi hi.

            Tua gualnop pawipi in, Babylon gam’ hun nunung hipah hi. A pawipi uh zongin, tulai hun nunung Babylon ading lim khatmah hipah hi. Belshazzar mah bangin, hun nunung Babylon ii numei gilo in leitung gamte a khialhsakna hai tawi hi. Upna maanlo le biakna maanlote zangin tuhun Babylon in leitungbup lampialsak a (Rev. 17:4-6), thukhenna a thuak dingin omsak hi. Thukhenna Ni hong tungta ding hi.

            Ei mipite in Pasian’ ngeina le thumaan peengsak dingin bangteng peuh i bawl hiam? Tua bangin thumaan peengsak nasepna khawngpan bangci kidoptheih ding ih hi hiam? Na khaanpihte tawh dawngkhawm un.     

 

Monday                                                                                       February 3

Saploh Mikhual Khat

 

            Daniel 5:5–8 simin. Bangthu piang a, kumpipa’n bang hih hiam? Hih thu le Daniel 2na bangci kinaih a, banghangin thupi hiam? (Ps. 96:5; Col. 1:15–17).

READ  ZSS 4: Langdonate Maingat

 …………………………………………………………………………………………………………………………………………………………………

 

            A beisa Nebuchadnezzar hihmah bangin (Dan. 2:2 le Dan. 4:7), Belshazzar in zong, tua lai lamdang sim dingin, Chaldean mi bumtawi aaitawi te mah sampah hi. Pahtawina lianpitak mah piakdingin kamciampah a: (1) puansantual tanglai miliante silhte (Est. 8:15); (2) mi thupi hi cih lahna khamkhii (Gen. 41:42); (3) Gambuppi ah ulian 3na hi ding cihte ahi hi. Gambup ulian 3na cihpen, tua laitakin Belshazzar’ pa Nabonidus kumpi hi a, nambat khat hipah, a zom Belshazzar amahmah nambat nih, khitteh tua lai lamdang simthei pa nambat thumna cihdan ahi hi. A hihhang, tua mipilte’n sim theilo uh hi.         

 

            A mawhna teng khit banah, kumpipa’n a lehlamin pilna zonsawm lailai hi. Amau’ pau Aramaic pau teekteek a kigelh hinapi, ngaihsunzo mahmahlo uh hi. Isaiah tungtawnin Topa kammal “Amau mipilte pilna kisia ding a, amau’ thu mutheite’ thumuhtel theihna kiselcip ding hi” (Isa. 29: 14). Paul in zong hih munsan a lakkhitteh, “tuhun a mipil, miteite le thusel a siamte, bangin kimang ahi hiam? Hih leitung pilna pen haina a suaksak khitna kilang khinzo hi. Pasian in Ama’ pilna hong zang a, mihingte in amau’ pilna tawh Pasian a theih zawhloh nadingun, a bawl hi. A haihuaithu ci in a ngaihsut uh ih thuhilhna a umte Pasian in hotkiatna a piazaw hi” (1 Cor. 1:20, 21) ci hi.

            Thumaan pawlkhat tepen, mawk nutsiat ding paamaih mahmah ahih manin, Pasian in eite kiangah hong laklak ahi hi.

           

            Hong kipia ding thamante in tawmlua mah taleh, a sawtlo in hong tungding ii thaman dingte ngaihsun in. Hih thaman in, hih leitung a a tam mahmah nate tawh kisai in bang honghilh naci a, banghangin tawntung nate lamen in omding thupizaw nasa thei hiam?

 

Tuesday                                                                 February 4

Kumpinu Honglut

 

            Daniel 5:9–12 simin. Kumpinu in, Kumpipa theihsa ahi ding, Daniel’ thu bang gen hiam?  Daniel a omlam zong a theihkhakloh lam bangci ki ciapteh hiam?

……………………………………………………………………………………………………… ……………………………………………

            Kawm tungah lai lamdang khat hangin, a pawipibup buaigawpzo a, Kumpinu hong lut in, zukhamlua kumpipa gamtat danding hong hilh hi. Daniel tawh kisai phawkkiksak hi. Nebuchadnezzar khanlai pekin a mangkhiatte, nalamdang a sepsate, thuthukpi a genkhiatte khempeuh a phawkkik dingin agen hi. Belshazzar in, a Pu a Pate bangin pilvang hileh, hih lai lamdang amuhphetin, a khiatna gendingmi theipah lelding hi. Kumpinu hong lut a hong huhna pen, kumpipa’n amailam thu nangawn bangmah geeltheilo cihna hipah hi. A kammalte in, tua lai lamdang a khiathei Daniel omlam a phawklopa Belshazzar a taaigawp tawh kibang hi. Kumpinu in Daniel pen, Pasian’ Khasiangtho, khuavak le a sangmahmah pilna, a kanzaw siamna, mangkhiat siamna, thuhaksate dawntheihna le aaisante, mitphialsiamte, khongkhai siamte, le aksi ente ukpipa a hihna thu pulaksak hi (Daniel 5:11,12).                            

            Hih santak ah, Belshazzar in Daniel a mangngilh theih lamdang mahmah hi. Laisiangtho sungah bel gencian lianlo mahleh, tua hunpen, Belshazzar nuai a nasep kumthumna hi ta (Daniel 8:1, 27) a, mithak hinawnlo hi. Daniel’ kum zong 80 kiim ahih manin, khangno khatpeuh tawh kheknuam zong hithei hi. Daniel’ Pasian tungah ki aap nuamlo zong hithei hi. Ahang thu tampitak ommah taleh, Daniel tangthute mangngilh baihlua mahmah hi.    

READ  HSS 5: DÂNIN A TUM TAK CHU BAWHCHHIAIN

            Romans 1:16–32 simin. Hih tangthu sung teng bek hilo in, tulai hun mahmah in hibang ngaihsutna le lungsimte om veve cih koici kimuhtheih hiam?

 

Wednesday                                                           February 5

Ki Tawikhai in Leekzolo

 

            Daniel 5:13–28 simin. Kumpipa hun nunung thu, banghang hi ci in, Daniel in, pulak hiam?

 ……………………………………………………………………………………………………………………………………………………

            Bangbang hileh, Daniel mah dotloh phamawh hi napi, uaikaai keei hi. Daniel tungah a lungsim puakzia sangin, Daniel’ Pasian tungah a lungsim puakzia kilanghsak hizaw hi. Thaman tawh kisai in, Daniel’ dawnna in, ama’ lungsim takpi a pulak, le tua lai lamdang khiatna hangin, a thamante in bangmah mannei nawnlo cihna zong ahi hi. 

            Daniel in, kumpipa, thu thum tawh mawhsak hi. Amasa, Nebuchadnezzar phutkhaksa khempeuh awlmawhlo hi. A pa bangin kisikkik huai mahmah hi. A nihna, Belshazzar in biakinn’ haite zudawnna in zang a, a milimte pahtawi hi. Hih takah na namguk a pulaak khiatsa simkhin zo hihang. A thumna, “na nuntakna le na hihna khempeuh hong uk Pasian” pahtawi ding na mangngilh hi (Daniel 5:23) ci hi.   

            Kumpipa leeklohna teng a suutsuk dikdek khitciangin, Daniel in lai khiatna genpan hi. Tu’n, tua kawmtung lai kigelhpen, Aramaic pau, kammal thum linlian hi a: MENE: Kisimkhinzo; TEKEL: Tawikhai khinzo; PERES: Ki khenkhamzo ci hi.

            Babylon kongpi ah Medo-Persia galkap honte amu mipilte in, khiatna thupi neiding cih ngaihsun napi, kumpipa lungnoploh na’ng peuhmah bangmah gennuamlo uh hi. Daniel bekmah in, a khiatna a kicing dildel in kumpipa kiangah gen ngam hi. MENE: Pasian in nagam simkhin a, beisakta hi; TEKEL: Nang hong ki tawikhai in, na leekzo kei hi; PERES: Na gam kikhenkham khin in, Medes le Persia te kipiazo tahi (Daniel 5:26-28). Lungnop na’ng kam malkhat zong om khalo hi.   

            Kumpipa tungah, Pasian’ thukhenna manlang-takin hong tungpah hi. Tulai hun, thuman thutang thhukhenna a omloh laitak in, Pasian ih muang thei ding hiam? (Eccl. 3:17; 8:11; Matt. 12:36; Rom. 14:12.)

 

Thursday                                                             February 6

Babylon Puukna

 

            Daniel 5:29–31 le Rev. 14:8; 16:19; 18:2 cihte simkhawm in. Tuhun Babylon puukna ding hong lakkhol a, Beshazzar’ Babylon puukna pan bang pilna peuh ih sinthei diam?

……………………………………………………………………………………………………………………………………………………………………

 

            A mawhna bangpeuh ahi zongin, Belshazzar pen pasalvai mahmah bilbel hi. Thusiapi himah taleh, tuabang gending mahin, thaman nangawn a kamciamsa a hihmanin, amah lungkim veve hi. Daniel’ thupuakte thumaan hi cih sangthei a, Daniel’ Pasian zong omtakpi cih umta hi. Lamdang takin, nidangin a nialnial kumpipa piak thamante tutungin, Daniel in, sang dihdih hi (Daniel 5:29). A hangthu bel, tua thamante in bangmah phattuamna piazo nawnlo ta hi. A gam a pukding hita ahih manin, khiatna nei nawnlo ta hi. Ki thunopsakna dan in, kamsangpa in tua thamante sang a, nai tawmvei no sung, gambuppi ulian thumna suak vat hi.

            Kamsangpa cihbang linlianin, Babylon puukta hi. Hong nawhtun mahmaha, kumpipa le a miteng zukham in a om sung un, gal kisimna omvetlo in Babylon puuk hiau hi. Tangthu pu Herodotus in, Persia te’n tui guampi to uh in, Euphrates gunpi khe-kang uh a, guntaw leikeu panin khuapi sung lut uh hi ci hi. Tua zan mahin Belshazzar kithat hi. Apa Nabonidus in khua pualam paikhia in, kumpithakte kiangah ki aapkhol hi. Tua bangteng in, leitung pan in gamlian penpen, kham lutangpi puukin, omnawnlo ta hi.   

READ  Piansakna leh Pukna

            “Pasian deihna a telthei dingin, Belshazzar zong hun tamveipi kipia hi. A pu Nebuchadnezzar zong mihing lakpan a kihawlkhiat a muhtangmah hi. Minthannate apiapa mahin lakikzel cih zong a muhsa mah ahi hi. Kumpi khat, kumpipan ki hawlkhia in, ganhingte tawh kipawl cihzong thei gige hi. Belshazzar in, gualnop utlua mahmah ahih manin, mangngilhloh dingpipi khawng ki mangngilh sakin, Nebuchadnezzar tungah thukhenna a tungsak mawhnate bawl hi. Hun manpha tampi takmah mawk beisak a, thuman tawh kizopding hun manpha-te awlmawhlo hi” Ellen G. White, Bible Echo, April 25, 1898.

            Thumaan tawh kizoptheih na’ng hunhoih ihngah kha hiam? Bang a cihna hiam? Bang dinmun khawngah thumaan tawh kizom ihci ding hiam?

 

Friday                                                                   February 7

Ngaihsutbeh Ding: Tanglai in Pawipi khaam laangmah-mah hi. Kumpite’n amau liatna lakna in a pawlte uhtawh pawipi khaam uh hi. Hih pawipite’ thu aki theihcianloh hang, Medo-Persia te’n Babylon a lak laitakun, Babylonte’n pawipi a khaam laitak ahi hi. Babylon in kulh bitmahmah nei, khuapi laizangah Euphrates gun luang ahih manin tui kicing, kum tampi neekkhop ding an om ahih manin, gal pataulo uh a, pawikhaam lel uh hi. Galte’n kim-um taleh, Belshazzar patau selo in, pawipi khat kinsap vatlel hi. Topa langdo a gualnop, a lauhuai zia theihsakna hipah hi. Thumaan a sin nuamlo kumpipa pen, Pasian in, Daniel zangin, “Na nuntakna le nahihna khempeuh hong uk, Pasian na zahtak kei hi” (Daniel 5:23) ci in thuhilh hi.

            “Gamte tangthute in thu hong hilh hi. Gam khatsim, mimalsim in Pasian in ngiimna hong neihsakciat hi. Mawhna a bawlhetlopa in, mite le minamte khaukhai (Amos 7:7) tawh hong tehteh hi. Avek un, amailamthu peuhmah amau deihteelna bang hi ding a, Pasian in Adeihna a picin dong uk gige hi” EG. White, Prophets and Kings, p. 536.

 

Kikup Ding Dotnate:

  1. Sunday ni a dotna pen kikum unla, kipawlna khat in Pasian’ thuman koibangin simmawh thei hiam? Bangci dan hiam? Pawlpi in, koibang in ih koih ding hiam?

 

  1. Hih tangthu ih simciangin, hotkhiatna pen theihna tungtawn bek hilo in, ih donkik dandan hi cih na koici muhtheih hiam? (Dan. 5:22 simin.)

 

  1. Daniel 5:23 sim lecin; Thukhun thupi bangteng namu hiam? Gentehna’n, Pasian langdo vai hong koici hilh hiam? Pasian pen hong piangsakpa bek hila, hong cing hong kem tawntungpa ahihna koibangin hong lak hiam?

 

  1. A khiatna zong thei nailo pipi Belshazzar patau mahmah hi (Dan. 5:6). Mawhna sungah ki suangtak tak in nuntakzia bang hong lak hiam?

 

Tags: ,

Admin

Admin

Top