Lesson 2: KIPUMKHAT LOHNA A PIANGSAK THEI NATE

Lesson 2

KIPUMKHAT LOHNA A PIANGSAK THEI NATE

Oct 6- 12

 

 

Sabbath Nitak

 
Tu Kaal Sung Sim Ding: Thna. 28: 1-14; Jer. 3: 14 – 18; Thukhente 17:6; 1Kum. 12: 1-16; 1Kor. 1: 10-17; Sawl. 20: 25 -30
KAMNGAH:TOPA zahtakna pen pilna kipatna hi a, Siangtho Pa theihna pen thumuhna ahi hi”(Pau. 9: 10).
Israel mite in Pasian’ thupiak bangin a nungta dingin kamsangte in hilh pha-pha uh hi. Thudonlohna le thuman lohna in langpanna piangsakin, kipumkhatna susia hi.Pasian’ thukham nuntakpihna in  leitung siatna panin hong kem ding leh leitung pasian tuamtuamte lakah a siangtho mi hihna dingin hong cing hong kem hi. Pasian’ deihna bangin i nuntak ciangin kipumkhatna om a,  leitung pasian tuamtuamte biakna ding panin hong dal thei hi. Pasian  in a mite a siangtho ding, mite tungah teci hi dingin hong deih hi.
          Topa in Israel mite Egypt saltanna pan a hotkhiat khit ciangin hih bangin pulaak hi: “ En un, note in a luah dingin na lutna uh gam sungah na zuih dingun TOPA ka Pasian in kei hong thupiak bangin thukhamte le ngei-na kipte kong hilh khinzo hi. Tuate zui unla, sem un; bang hang hiam cihleh hih thukhamte khempeuh a zak uh ciangin, “Hih minam liante pen a pil thuthei taktak hi,” a ci ding uh mite’ muhna-ah hih thu pen nomau’ pilna le nomau’ theihna hi ding hi” (Thkna. 4: 5,6).
Topa tungah a cihtakin thupha ngah banah mite aa ding thupha hi dingin Pasian in geel khin hi. Cihtak lohna hangin siatna, kipumkhat theih lohna piangsak hi.
SUNDAY           Oct. 7

“A NUNGKIK KA TATE AW, HONG KILEH KIK UN”

 
Israel mite tangthu in thumanlohna, buai-na tawh kidim hi. Pasian nusia-in gimna a thuak uh ciangin Ama kiang kik uh hi.  A cihtheih uhteh Pasian taisan zel uh hi. Gimna a tuah uh ciangin Pasian zuan kik uh a, Pasian in thupha a piak ciangin pasian tuamtuam bia kik zel uh hi. Pasian’ deihna bangin a nuntak uh ciangin lungnopna leh nopsakna tawh kidim uh hi. Amau ut bangin gamta-in a thuman loh uhteh  galte’ bawlsiatna sihna lianpi thuah uh hi. Tua bangin a omzia ding uh, Israel mite in Canaan gam a lut ma-in Pasian in mukhol khin hi. Tua hi-in gimna tawh a kipelh nadingun Pasian in lampi bawlkholhsak hi.
          Thkna. 28: 1-14 sim in. Pasian’ deihna zui uh hileh Israel mite in a ngah ding thupha bang pulaak hiam?
__________________________________________________________________
__________________________________________________________________
Jer. 3:14 – 18 sim in. Israel mite a mawhna uh kisikin Pasian kiang zuan ding Ama sapna tungtawnin bang thu na nuntakpih ding hiam? Pasian hong itna leh a mite tungah lungduai ahihna na ngaihsun thei hiam?     
_____________________________________________________________________
___________________________________________________________________
Pasian langdo, milim bia-in, kilemlohna tawh kidim uh hi mah taleh Pasian in a mite it, hehpih veve-in thupha pia tawntung hi, cih thu in lamdang hi. Amah taisan uh hi mah taleh a mawhna kisikin, Topa in ama kiang zuan dingin sam tawntung hi.  Pasian in amaute puahpha-in lametna guan tawntung hi.
          “Hong kilehkik in, a zulhzau Israel aw, TOPA in kong ci hi. Hehna tawh nang kong en kei ding hi; bang hang hiam cihleh a hehpih thei pa ka hi hi, TOPA in kong ci hi. Ka heh tawntung kei ding hi. Na mawhna na phawk ding bek kisam hi. TOPA na Pasian na langpanna, singliim nuai khempeuhah gamdang pasian-te tawh na khialh kawikawi-na le ka thu nong man lohnate pulak in, TOPA in kong ci hi” (Jer. 3: 12, 13).
          Mite in Pasian’ kammal a thudon loh hun laitakin Jeremiah in tua bangin Topa’ kammal pulaak hi. Kumpi Josiah hun sungin kipuahphatna a om tei hangin, a tam zaw Israel mite in Pasian tungah citak lo uh hi. Siatna, milim biakna le huaiham angsung thu bek tawh nungta uh ahih manun gam sung khempeuh in siatna tawh kidim hi. Pasian’ deihna tawh a kigamla semsem uh ahih manin lauhuai-na vive tawh kidim uh hi. Tua hi mah taleh Jeremiah tungtawnin Pasian in amaute sam tawntung hi. Pasian in amaute thupha pia nuam hi; nopsakna, cihtheihna tawh kidim dingin geelkhol hi. Ahi zongin tua bang thupha tawh a nuntak nadingun upna le Topa tungah cihtakna tawh a nuntak uh kisam hi.
Pasian’ deihna bangin na nuntakna le na nuntakloh kilamdanna na thei hiam?
Monday             Oct. 8      
PASIAN MAI-AH THUMAANNA
 
Thukhente sungah Israel mite in Topa’ deihna a zuih loh manun a thuak uh gimnate kimu thei hi. Israel mite in Canaan gam a lut khit a sawt lo-in Canaan mite biak pasian tuamtuam bia uh hi. A kihilhna zui lo-in lehtat zawsop uh hi. Milim biakna bek hi lo, a dang siatnate tawh kidim uh hi.
          Thukhenna 17:6; 21: 25 sim in. Israel mite lakah siatna bang tung hiam?
          _____________________________________________________________
         ______________________________________________________________
Pasian mite lakah kilemlohna, buai-na hong piang hi. Topa tungah a thuciamna bangin nungta hi leh uh, amaute in pumkhat suakin, tua thuciam tawh a kipelh uh ciangin amaute in buai-na tawh kidim hi. Kimlepaam in amaute huzaap ahih manin Israel mite in amau hoihsak bangin nungta uh hi. Ei hoihsak, ei deih bangin kalsuan hi lehang, Pasian’ hong sapna tawh kigamla i hi ding a, kisiatna tawh kuamah kipelh lo ding hi.
          A nuai-a munte in Kumpite’ uk sungin Israel mite nunzia bang pulaak hiam?
Thkna. 2: 11 -13 ___________________________________________________
Thkna. 3: 5 -7 _____________________________________________________
Moses tungtawnin Pasian in a mite cihtaklohna pulaak khin hi. Topa tawh a thuciam palsat uh a, Pasian tawh kigamla-in thupha sang thei lo uh hi. Topa’deihna bangin a nuntak uh ciangin Pasian in namdangte tungtawnin amaute thupha hi. Tua bangin thupha tawh a kidim uh ciangin Pasian taisanin, thuman khuavak tangsai ding mangngilh uh hi. Pasian tungah citak lo banah a mipihte uh tungah zong citak lo uh hi.  Huaihamna tawh kidimin amau hamphat nading bek ngaihsun uh hi. Milim mite lakah Pasian’ zia le tong le a thupiak kilangsak ding uh hi napi, hazatna le huaihamna tawh kidim uh a, milim bia mite in amaute simmawh hi.”  Ellen G. White, Prophets and Kings, 20, 21.
         
Koi bangin i nunzia in midangte huzaap hiam?  Midangte in SDA pawlpi a deihuai-na a mu uh diam?
Tuesday     Oct.  9

Hebrew Mite Lakah Kikhenna

 
          Thuman langpanna hangin gimnate in zankhat thu-in a piang hi lo hi. Kum khat khit kum a zalom val bang khensatnate, deihtel khialhnate hangin Pasian’ mite in gim thuak uh hi.
          Kumpi Rehoboam’ tangthu 1Kum 12: 1-6 sim in. Bang thu in Pasian mite lakah a lauhuai kikhenna piangsak hiam?
         ______________________________________________________________
         ______________________________________________________________
Rehoboam le cingtakna nei nai lo amah tawh nasemkhawm uliante in  Israel mite tawh kisai Pasian’ lamlahna telthei uh hi leh gam sungah kipuahphatna kitangsapna thu kipulaak bangin puahphatna nei ding uh hi. Shechem-ah a mawhna uh kisik thei ding uh hi napi bang hangin gimna thuak cihte ngaihsun lo uh hi. Tua a kipan amaute siatna hangin mi tampi in siatlawh uh hi.
          Pasian’ geelna tawh kituak lo-in nungta uh a, Solomon uk hun a kipan nengniamna lian semsem hi. Amaute in muantakcing takpi zo lo uh hi. Amau thuneihna, kiliatsaknate in mihing kiphatsakna pulaak hi” Ellen G. White, Prophets and Kings, 90.
          A nuai-a munte in khentat siam nadingin pilna kitangsapna  zia bangci pulaak uh hiam?  Koi teng pan pilna man  hong pai hiam?
          Pau. 4: 1-9 _______________________________________________________
          Pau. 9: 10 ________________________________________________________
          James 1:5 _________________________________________________________
Rehoboam le amah tawh nasemkhawm mite in gammite tungah gimna piakbehna hangin Israel gam sungah tua bang siatna om ngei nai lo hi. Kumpi pa in mipil pawl nih panin makaih huhna ngen hi.  Hih mite’ makaihna bangin a gamtat ciangin a pa Solomon leh a pupi David  in kum 80 sung a makaih gam, tu-in a kisia ding hi ta hi. Kumpipa in mipi a kihtak manin a pa uk sung sangin gimna tawh uk zaw ding cih thu in khemna hi. Kumpipa thudot khangnote in gam mite hehpihin amau nget bangin nasep olsak zawk ding pen kumpip aa dingin thu hoih hi lo hi. A taktakin kumpipa in gilo-in nasep hamsa tawh gam mite uk ding hi, ci-in a pulaak ding uh kisam hi. A tawpkhakna-ah kumpipa in gilo-in gam mite hehpih lo-in, ama tungah thuman ding le cihtak ding kilawm lo phialin kumpipa gilo lua hi. Tua hang mahin Pasian’ mite sungah kikhenna hong piang hi. Pasian in tua bangin a piang dingin geel lo hi.
Wednesday         Oct. 10

Korinth Pawlpi Sung Buai-na

 
          Thuciam Thak sung pawlpite in buai-na tawh kipelh lo uh hi. Gentehna-in Korin 1-4 sungah Paul in Korin pawlpi sung kipumkhatna ding limgen mahmah hi. Paul in Ephesus khua-ah a om sungin Korin pawlpi sungah pawl kikhenna tuamtuamte za hi. Tua hangin pawlpi kipumkhat ding limgen mahmah hi. Pawlpi kipumkhatna susia thei-te hemkhia-in, pawlpi in kipumkhat ding hilh tawntung hi. Paul in hih thu lunghimawhpi pen ahih manin kikhennate hemkhia-in pumkhat hi ding vaikhak hi.
          1Kor. 1: 10- 17 sim in. Bang thute in kilangneihna piangsakin, kipumkhatna susia hiam?
         ______________________________________________________________
       _______________________________________________________________
Chloe’ mi kimkhat in Paul kiangah Korian pawl sunga thu-um mite kitotna le pawl kikhenna thute a zaksak ciangin Paul lunghimawh hi. A lunghimawhna hih bangin Paul in pulaak hi: “Sanggamte aw, note khatlekhat kithutuakin, pawl kikhenna omkha lo-in, na lungsim, na ngaihsutna uhleh na ngimna uh na kikhatsak nadingun i Topa Jesuh Khrih min tawh ka hong thum hi” (1Kor. 1:10). Bang thu, bang thu hangin pawl kikhen uh hi mah taleh tua pawl kikhenna a khawl dingun Paul in hanthawn hi.
          Paul in Korin pawlpi mite tungah Khrih nung a zui dingin sapna ngah mite na hi uh hi; bang bang siamna tawh kidim taleh mihing nungzui ding na hi kei uh hi, ci-in hilh hi. Mimal tawh kisai-in amau deih mi khat ii nungzui-in kikhenna piang ahih manin, Khrih’ deihna tawh kituak lo hi. Khristian thu-um mite in Khrih le singlamteh siksanin kipumkhat ding hi, ci-in Paul in hilh hi (1Kor. 1:13). Khrih le singlamteh tung a hong sihna bulphuhin Khristian thu-um mite kipumkhat hi. Tua lo makai, pilna, siamna nei mah taleh kua tungah kinga lo hi. Singlamteh phungah mi khempeuh kikim khin hi. Khrih sungah kituiphumna in mawhna pan hong siangsak hi.  Ahi zongin Khrih sungah kipumkhat nadingin mihing in a hanciam kul hi.
          SDA upna le pawlpi masuante hangin pawlpi kipumkhatna ama thu thu-in hong piang  hi lo hi. Kitot kiselna, kikhenna cihte in pumkhatna susia ahih manin Khrih hong itna le Ama ukna sungah i om kei leh kipumkhatna om lo ding hi.
Koi bangin kipumkhatna susia thei khempeuh pelh dingin Paul in hong hilh hiam? Khrih simloh mi khat tungah kingak khak ding kidop kul hi lo hiam?
Thursday             Oct. 11

“Ngia-te Hong Pai Ding”

 
          Sawl. 20: 25 – 31 sim in.  Paul in Ephesia pawlpi a upa-te tungah bang lauhuai thu hilhkhol hiam? Bang lampi tawh tua lauhuai-thu dal dingin hilh hiam?
_____________________________________________________________________
_____________________________________________________________________
Paul in a nasepna peuhpeuhah langpanna tuak hi. Khrih Jesuh hong piak Lungdamna Thu a siantho-na kepcing ding hamsa hi, cih pen Paul in tel mahmah hi. Lungdamna Thuman kepcing ding Ephesia upa-te a vaikhak nunung penah galvil pa tawh na genteh hi (Eze. 33: 1-6).  Amaute in tuucing bang hi-in, citakna tawh pawlpi mite a makaih ding uh hanthawn hi.
          Khrih in thuhilhzuau sia-te in tuuvun silhin hong pai ding uh hi, (Matt. 7: 15) ci-in a hong genkholh mah bangin Paul in zong tua bang thuhilhzuau siate gam-ui tawh genteh hi (Sawl. 20: 29). Paul in tua bangin a genkhit a sawtlo-in thuhilhzuau sia hong om takpi-a, hih zuau gen thuhilhsia-te in Asia gam sungah Paul phut pawlpi sungah buai-na piangsak uh hi. Paul in Asia Minor sunga pawlpi –te tungah tua bang lauhuai thute hilhkhol hi (Eph. 5: 6 – 14; Kol. 2:8).
          Paul in Ephesus pawlpi kemTimothy a laikhakna sungah thuhilhzuau sia-te in pawlpi kipumkhatna a suksiat loh nadingun bang thu hilhkhol hiam?
____________________________________________________________________
____________________________________________________________________
A masa-in Timothy in Lai Siangtho’ gen thute a theihmasak ding kisam hi. “Thuman Thutak a khensiam nadingin” (2Tim. 2:15). Kitot kiselna piangsak phuahtawm tangthute pelhin  Pasian kiang pan hong pai thuman thute theihtel ding thupi hi. Lai Siangtho sung a thuman thute hoihtak hilhcianin, tua thuman thute in up khialhna a kipan Lai Siangtho telkhialhna tawh hong kipelhsak ding hi. Pasian’ kammal thutak in Khrih sungah a gualzo nuntakna hong ngahsak ding hi. Thuman le thuman lo i theihtel nadingin Lai Siangtho tawh sittel ding kisam hi.
          A nihna-ah Paul in ‘kihhuai thute le kimanna nei lo thute’ pelh in ci-in Timothy hilh hi (2Tim. 2:16).  A thuhilhna-ah Timothy in muantakcing, belhtakcing thuhilh mi a suah nadingin upmawh thute, buai-na piangsak thei tangthu a kipan khanggui thute hilh lo ding hi.  Phuahtawm thu, tangthu tuamtuamte in kitot kiselna, pawl khenna piangsak hi. Tua bang thute in thuzuihna susia hi. Thuman thutak bek in Pasian kiang hong tun ding a, thu-um mite  hong kipumkhatsak hi. Zuau thu in pawlpi susia hi; tua bang thute in natna tawh kibang hi (2Tim. 2:17). A tawpkhakna-ah Pasian’ kammal in pawlpi kipumkhatna susia zuauthu panin hong kemcing ding hi (2Tim. 3: 14 – 17).
         
 Koi bangin pawlpi kipumkhatna susia  zuau thute panin kikem ding na hiam?

Friday                  Oct. 12

Ngaihsutbeh Ding:  Ellen G. White, “The Rending of the Kingdom,” 87 – 98 in Prophets and Kings; “ A Message of Warning and Entreaty,” 298 – 308 in The Acts of the Apostles.

“ Topa nasemte in kipumkhatna a hanciam dingun Topa in deih hi. Siamna kibang lo-in Pasian nasem khatlekhat nasepna-ah nasepkhop ding hamsat hun om ding hi. Ahi zongin mun khatah a lawhcing lo nasem khat in mundangah lawhcinnna ngah thei hi. Pawlpi mite in zong sia khat ii thugen a telzawh loh hangin a dang sia khat mah in a gen ciangin telzaw thei uh hi. Nasepna zia kibang lo hi mah taleh, pawlpi kipumkhat ding nasem khempeuh in a hanciam ding kisam hi. Siamna/talent tuamtuam a om hangin, tua siamna a pia Kha Siangtho in khat bek hi. Nasepna mun khempeuhah hehpihna, itna, thukhualna kisam hi. Pasian in a hong koihna mun khat peuhpeuhah citakin nasem ding kisam hi. Khrih in amah a um mite kipumkhat nading a thunget tangtung takpi ding hi. Ama nungzui mite kipumkhatna leitung mite in mu ding uh hi.” Ellen G. White, Gospel Workers, 483.
Kikup Ding Dotnate
 
1.    Mi khat  in amah le amah dik a kisak pen lamdang lo hi. Khangthak hun (postmodern) sungah Lai Siangtho’ hong hilhkholh a hoih gamtat, ngaihsutna cihte hong piang takpi hi. Koi bangin pawlpi in tua bang thute nawk ding hiam?
2.    Kumpi Rehoboam thu le Israel kikhenkhapna thu ngaihsun in. Tuhun aa dingin bang thumanpha hong hilh hiam?
3.    Pawl sungah buai-na tuamtuam hong om ciangin pawlpi makaite in koi bangin pawlpi makaih ding kisam hiam? Koi bangin buai-na lianpi a suahma-in tua buai-na khaktan ding thupi hiam? Korin pawlpi mite bang lo-in koi bangin siatna tawh kipelh ding na hiam?
4.    Pau. 6: 16 – 19 sunga thute ngaihsun inla, pawlpi kilemlohna dal nading bang hong hilh hiam?
Tomkaihna:  Lai Siangtho in kipumkhatna susia thei thute hong hilh khol hi. Pasian’ mite in thuman thutak zui-in Pasian’ deihna tawh kituakin a nuntak uh ciangin, kilemlohna cihte damdam in hong bei ding hi. Thukhente hun sungin kumpi Rehoboam in Israel mite khenkham hi. Thuciam Thak sungah zong pawlpi kipumkhatna susia thei thute pelh dingin hong hilh hi. Pasian’ kammal thuman thutak hoihtakin telthei-a, Kha Siangtho’ makaihna tawh a nungta lehang kipumkhatna susia thei kitot kiselna khempeuh i khantan zo ding hi.

See also  Amaute in Pumkhat
Tags: ,

Admin

Admin

Top