Lesson 4: Kipumkhat Nading Tawhtang

LESSON 4              Oct. 20 – 26

Kipumkhat Nading Tawhtang

 

Sabbath Nitak
 
Tu Kaal Sung Sim Ding: Eph. 1: 3-14; 2: 11 – 22; 5: 15 – 6:9; Gal. 4:7; Matt. 20: 25 – 28.
 
          KAMNGAH: “ Pasian in a pilna le a thumuhnate zangin ama geelsa bangin hong sem a, Khrih zangin a sepnop thusimteng eite tungah hong kilangsak hi. Tua a geel thu pen, a hunhoih a tun ciangin Khrih khutnuai-ah, vantung le leitungah a om khempeuh gawm ding ahi hi” (Eph. 1: 9, 10).
          Ephesus khua in Asia Minor huampi sungah vanzuak vanlei-na pualpi khat hi. Ephesus pawlpi sungah Jew, Gentile kigawmkhawm hi. A hau, a zawng, a pil, bangmah thei lo minam kim kigawmkhopna pawlpi ahih manin buai-na tawh kipelh lo uh hi. Ahi zongin Khrih pumpi pawlpi sungah Khrih mah tawh pumkhat hihna mitsuan uh hi. Tua  ahih manin Paul in Ephesus pawlpi a laikhakna-ah Khrih nungzui mite kipumkhat ding limtakin hilh hi.
          Paul in kipumkhatna thunihin mu hi: Jew le Gentile mite in pumkhat suahna – Khrih pumpi, anihna-ah vantung vantung a om na khempeuh in Khrih sungah pumkhat hihna ci-in pulaak hi.
          Kipumkhatna bulpi in Khrih hi. Paul in ‘Khrih sungah’ ‘ Khrih tawh’ cih kammal a laikhaknate-ah tam veipi kimu hi. Pasian in Khrih nunna, a sihna le sinna pan a thawhkikna tawh eite aa ding le na khempeuh a sepna pulaak hi. Pasian’ hotkhiat ngimna bulpi pen in Khrih tungtawnin na khempeuh pumkhat suahna ding ahi hi. Hun bei ciangin hih kipumkhatna hong tung ding hi.
Sunday                Oct. 21
Khrih Sungah Nungta
 
          Eph. 1: 3- 14 sim in. Khrih sungah a hong kipia khin bang pulaak hiam?
          ____________________________________________________________
          ____________________________________________________________
Jesuh nungzuite in  Pasian min i phat ding kisam hi. Khrih sungah Pasian in Ama tanu tapa dingin hong teelkhin a, leitungah Amah kilangsak dingin hong sawl hi. Paul in Khrih tungtawnin Pasian tawh i kizopna gentehna tuamtuam tawh pulaak hi. Ta bangin a hong neihna in pumkhat hihna pulaak hi.  Khrih sungah Amah tawh innkuan khat i hi hi; Pasian tawh innkuan khat i hi hi. Pasian tawh innkuan hihna in Israel mite tawh a thuciam tawh kizom hi. Israel mite in Pasian gamh luah dingte hi, ci-in kamciam om hi. Jesuh in Messiah hi, ci-in a um Gentile mi khat in Pasian gamh luah ding a,  Pasian ta suahna ngah hi, ci-in Paul in pulaak hi (Rom. 8: 17; Gal. 4:7). Khrih tawh kizopna, Khrih sungah omna in Khristian kipumkhatna dingin a thu bulpi suak hi. Mi khempeuh in Khrih sungah pumkhat suak ding Pasian in lunggulh hi. Pasian innkuan sungah Khrih theihna in hamphattuam diakna hong pia lo hi. Pasian in eite khempeuh a kibangin hong it a, hong honkhia hi.
          Mi tampi in sehkholhna tawh kisai telkhial uh hi (Eph. 1: 5, 11). Pasian in hotkhia ding kamciam ahih leh siatna thuak ding mi teltuam om hi, ci-in ngaihsun uh hi. Lai Siangtho in tua bangin hong hilh lo hi.  Leitung pianma-in Pasian in mi khempeuh a hotkhiatna dingin geelsa-in koih hi. “ Pasian in leitung mite a it manin a tapa khat neihsun a piak dongin leitung mite a hong itna hong lak hi. Tua tapa a um mi khempeuh in kisia lo-in nuntak tawntungna ngah ding uh hi” (Jn. 3: 16; 1Tim. 2:6; 2Pet. 3:9).  Hotkhiatna thu a um ding mite Pasian in thei khol hi. Pasian’ theihkholhna in mimal khentat theihna daltan lo hi. Mi khempeuh in hotkhiatna ngah theih nadingin Khrih hong si hi. I kidot ding thu in: Khrih hong sihna na um, na sang hiam? Pasian in ama hatna tawh kuamah thu-um dingin sawl lo hi.
          “Pasian’ thukham palsat mi in mangthang lo-in mawhna sung pan a suahtak nading lampi vantung panin kivaihawm khin hi. Eite tangin amah le amah hong kipia, eite tangdingin hong ding Khrih sungah upna nei mi in Pasian’ telna a ngah mi hi-in, Jesuh Khrih tungtawnin hotna ngah ding mi-in kisehsa ahi hi. Mi khempeuh in hotna a ngah ding Pasian in deih hi.Tua dingin lampi hong kihonsak khin hi. Ama tapa hong pia khin hi. Siatna sung a tung ding mite in Khrih Jesuh tungtawnin Pasian’ tapa tanu suah ding a nial mite hi ding uh hi.” Ellen G.White, The SDA Bible Commentary, vol. 6., 1114.
  
Monday     Oct. 22
Kideidannate Hemkhia
 
          Minam kideidanna, pau kikhenna, biakna cihte in mihingte hong kikhensak thei-te hi. Nasepna mun tampi-te ah biakna, minam pulaak kul hi. Tua dungzui-in hamphatna, hamsiatna om hamtang hi. Hih thute hangin buai-na, gal, kinengniamna, kilangneihna cihte hong piang hi.
          Eph. 2: 11 – 22 sim in. Paul in Khristian kipawlkhopna ding lampi hoih pulaak hi. Koi bangin  Khrih sungah kipumkhatna in mimal kilamdannate sukha hiam? Singlamteh tungah Khrih hong sihna in bang beisak hiam?
    ________________________________________________________________
    ________________________________________________________________
Paul in Ephesus pawlpi a laikhakna-ah Khrih hehpihna a theihma a nunzia-te uh  phawk dingin gen hi. Minam, ngei-na, biakna cihte in khatlekhat kikalah buai-na, kilangneihna piangsak hi. Ahi zongin Khrih sungah eite khempeuh in pumkhat i hi hi. Amah eite Honpa, Topa hi. Eite khempeuh in Pasian tanu tapa i hi hi. “A gamlapi-ah a om ngei hinapi-in tu-in Khrih Jesuh tawh na kipawlna hangun ama sihna in Pasian kiang hong tunpih hi” (Eph. 2: 13).
          Jerusalem biakinn-ah Jew minamte om nading mun kituamkoih hi. Tua munah namdangte om ding kiphal lo hi.  Jew mi hi lo, namdang khat tua munah a va pai leh sihna thuak ding hi.  Paul in Jew mite bek om nading munah a vapai manin mawhsakna thuak hi. Kolbulh a thuak ciangin Ephesus khua-ah Trophimus biakbukah biakna thukhun palsat hi, ci-in mawhsakna thuak hi (Sawl. 21: 29).  Ephesus pawlpi a laikhakna-ah minam khempeuh pumkhat hong suaksak Khrih in eite kilemna hi; Amah in minam kideidanna khempeuh beisak hi, ci-in pulaak hi (Eph.2:14).
          Khrih sungah thu-um mi khempeuh in Abraham suanlekhak hi-in lungtang vunat mite hi.  Pasian in Abraham tungah vunat ding thuciam na pia a, tua thuciam tu-in Khrih sungah lungtang vunatna hong suak hi (Thna. 10:16).  “Khrih hong vunatna hangin ci le sa mawhna pumpi paikhia-in khut tawh a ki-atlo vunatna tawh ama sungah vun ki-atte na hi uh hi” (Kol. 2:11).
Eph. 2: 11 – 22 sim in. Bangci bangin Paul’ pulaak thute i pawlpi sungah kimu thei hiam? Bang kikhel ding omlai hiam?
Tuesday              Oct. 23
Khrih Sungah Pumkkhat
 
          Paul in Ephesus pawlpi tungah nuntakpih ding thute pulaak hi. Jew le Gentile kilamdanna, ngei-na, minam kilamdanna cihte in phuahtawm hi lo-in a om takpi thu hi. Kilamdanna tuamtuam pan mahin Pasian in hong samkhia-a, tua sapna tawh a kilawm a kituakin a gamta dingin hong hilh hi (Eph. 4:1).
          Eph. 4: 1-3 in Pasian’ sapna ngah mite in Khrih sungah koi bangin a nungta dingin hong hilh hiam?
         ______________________________________________________________
       _______________________________________________________________
Pasian kiang pan hong pai hehpihna, hoihna cihte in kilemna, kipumkhatna piangsak hi (Eph. 4: 3). Hihte khempeuh in itna pan mengkhia hi (1Kor. 13: 1-7).  Itna in khatlekhat kizopna kho-sakin, Khristian thu-um mite sungah kipumkhatna le kilemna hong pia hi. Pawlpi kipumkhat in midangte muh theih dingin Pasian’hong itna pulaak hi. Gal, kikhenna, buai-na hong om ciangin thu-um mite khatlekhat ki-it ding kisam a, tua in Pasian aa ding i teci hong suak hi.
          Eph. 4: 4 – 6 sim in.  Bang thuguipi pulaak hiam?
         ______________________________________________________________
         ______________________________________________________________
Paul in pawlpi kipumkhatna thupi takin a ngaihsutna thu pulaak hi. Ephesus pawlpi in kipumkhat dingin hanthawn hi (Eph. 4: 1-3). Tua khit ciangin thu-um mite kipumkhatsak nading thugui 7 pulaak hi (4: 4 – 6). Thu-um mite in kipumkhatna nei khin uh a  (Eph. 4: 4-6), kipumkhatna sungah kalsuanin (4: 1-3), kipumkhatna susia thei-te pelh ding uh a, ama suan uh tangtun dingin a mainawt ding uh kisam hi (4: 13).
          Paul in thuman thutak’ vangliatna a kilatsak ding uh thu-um mite thapia hi. Kiniamkhiatna, dikna, thuakzawhna, itna cihte in Khrih kilangsak nunzia banah hotkhiatna hong piak thupha hi, ci hi. Upna khat, Kha Siangtho khat, upna khat, Topa khat sungah om ahih manun, Khrih’ pumpi ahi pawlpi sungah lametna kikhat, ngimna kikhat uh hi.
          Pawl sungah kilangneihna a om ciangin leitung mite muhna-ah Khrih mindai-na piangsak hi. Tua bang ciangin Satan gualzo hi. Paul in ama hunlai-a pawlpi tung bekah a pulaak hi lo hi. Tuhuni zong pawlpi kipumkhat a, kilemna sungah a nungta dingin hong hilh hi.” Ellen G. White, 5T., 239.
Pasian in a hong sapna tawh kizui-in kalsuanin a nungta dingin bang khentatna hoih nei ding na hiam?
Wednesday                   Oct. 24
Pawlpi Makaite le Kipumkhatna
 
          “Khrih hong hawmsak letsong tawh kizui-in eite khat ciat tungah hehpihna thupha hong kipia zo hi”(Eph. 4:7). Mi khempeuh in a ngah dingin hotkhiatna a khawnkhongin hong kipia-in, nasep tuam vilvel a sem dingin Kha Siangtho in mi kim khat tungah siamna pia hi.
          Eph. 4: 11 sim in. Pasian in makaihna-ah bang pia hiam? Piakkhong siamnate in bang ngimna nei hiam? Koi bangin tua siamnate khatlekhat in kizopna nei hiam?    ________________________________________________________________
    ________________________________________________________________
Khristian kici mi khempeuh in hotkhiatna thu gen Pasian’ nasem, Pasian’sila hi. Matt. 28: 19, 20 sunga thupiak, mi khempeuh nungzui suaksakin, tuiphumin, thuhilh ding sawlna in Khristian khempeuh tungah Khrih hong piak hi. Pastor, thuhilhsiate bek in hotkhiatna nasem ding, thugen ding hi lo hi.  Khrih a um mi khempeuh in Ama nasem dingin hong kisam hi. Kuamah peng thei lo hi. Pawlpi makaite tung bekah kinga lo hi. Pawlpi makai sia-te in pawlpi puahin, a khansuah dingin Kha Siangtho in siamna pia hi. Pawlpi makaite in pawlpi kipumkhat nading, kipumkhatna a kip nading nasem ding uh hi.
          Makaihna tawh kisai-in Kha Siangtho piak siamnate  Pasian’ mite in a mangthang mite zonna-ah zat dingin a kipia ahi hi. “Eite khempeuh in upna le Pasian Tapa theihtelna ah pumkhat suakin picing a, Khrih kicinna zah i tun mateng” (Eph. 4: 13) nasemin pawlpi makaite in pawlpi mite nasep a huh ding, a makaih ding, a pantah ding kisam hi.  Pawlpi makaite in Jesuh makaihna zia etteh a,  pawlpi a makaih ding uh kisam hi.  Jesuh in mite nasem dingin hong pai a, mite in ama nasem dingin hong pai hi lo hi (Matt. 20: 25-  28). Eite zong tua bang mah ding i hi hi.
          Mihing in kuama tungah kinga lo-in amah le amahin a om ding ki-ut hi. Nitumna gamte-ah hih bang mi tampi om hi. Ahi zongin Paul in Khristian mite in tua bang hi lo ding hi, ci hi. Thu-um mite khatlekhat kizopna nei-in, kipawlkhawm a, nasem khawm ding mite hi. Eite khempeuh in Khrih’ pumpi i hi hi.
         
Kha Siangtho piak bang siamna na ngah hiam? Koi bangin pawlpi kipumkhatna dingin tua siamna na zang hiam?
Thursday             Oct. 25
Khrih Sungah Mihingte Kizopna
 
          Khristian biakna in kizopna bulphuh biakna hi. Pasian tawh kizopna le thu-um midangte tawh kizopna hi. Midangte tawh kizopna man nei kei leh Pasian tawh kizopna in khiatna nei lo ding hi. Mite tawh kizopna om lo-in Khristian biakna om thei lo hi. Paul in Ephesus pawlpi tungah a pulaak thuguipite in tuhun i nunzia ding hong hilh hi.
          Eph. 5: 15 – 21 sim in. Paul in bang hong hilh hiam? Kiniamkhiatna, sawlmanna le kipumkhatna bang kici zop hiam?
  _________________________________________________________________
  _________________________________________________________________
Paul in khatlekhat tungah kiniamkhiatna in Kha Siangtho tawh kidim nunna in tomkhawm hi, ci-in pulaak hi (Eph. 5: 18).  Kha Siangtho tawh kidim leh kidim lo kitheihna khat  in kiniamkhiatna hi. Kha Siangtho tawh a kidim mi in Pasian deihna tawh kituak kiniamkhiatna nei-in midangte nopsak nading zong ngaihsuttheihna nei hi. Hih thute mihing pianpih panin kingah hi lo hi. Ahi zongin i sungah Kha Siangtho a hong om ciangin tua bangin i nungta ding hi. Tua bang nunzia in Kha Siangtho’ hong piakkhong hi. Kha Siangtho in Khrih tawh pumkhat hi. Hih thu siksan lehang khatlekhat tungah kiniamkhiatna in Khrih i zahtakna le Ama hong sihna a pulaak i hi hi.
          Eph. 5: 22 – 6: 9 sim in. Khatlekhat tungah kiniamkhiatna in innsung hi taleh nasepna munte-ah hi taleh bangci bangin huzaap nei ding hiam?
    ________________________________________________________________
  _________________________________________________________________
Pawlpi kipumkhatna in innkuan sung kipumkhatna tungah a kingakna ciang khat om hi. Zi le pasal ki-itna, kipumkhatna in Khrih in pawlpi a itna limcing hi, ci-in Paul in hong hilh hi. Tua hi-in inn sungah Khrih nunzia kilang hi leh pawlpi sungah zong hong kilang ding hi. Hih bangin Khrih nunzia in, nu le pa in tate tawh kizopna, nasemte le nasemcial kikalah hong kilang ding hi. Tua leh inn sung hi taleh pawlpi sung hi taleh kipumkhatna le kilemna tawh kidim ding hi.
         
          Tuni thusinna tungtawnin inn sung hi taleh pawl sung hi taleh na nunzia ding bang thuguipi na mu hiam?
Friday                  Oct. 26
Ngaihsutbeh Ding: Ellen G. White, “ The Spirit of Unity,” 179 – 188, in 9T.
          “Khrih in minam, dinmun, thuzuihna-ah kuamah deidan lo hi. Laithei-te le Pharisee mite in amau bek in thupha ngah mi-in kingaihsun uh hi. Ahi zongin Khrih in kuamah deidan lo-in na hong sem hi. Pasian in mi khempeuh tungah a kibangin nisa, guahtui a kipan itna le hehpihna hong pia hi, ci-in Khrih in kilangsak hi. 
          Khrih sungah biakna, minam, suakta mi le a kihencip mi deidan lo-in Pasian mai-ah kikimin hong koih hi. Ama nasepna kuamah in uk lo hi. Khrih in lawmlegual, gal, khualmi, meltheih, kuamah khen lo hi. Nuntak tungtawnna tui a lunggulh mi tungah a lungkim hi.” Ellen G. White, 9T., 190, 191.
         
Kikup Ding Dotnate
 
1.    A mite in thuman sungah a nungta dingin Pasian in ama geelna pulaak hi (Eph. 4).  Tua thu a pulaak ding pawlpi in kipumkhatin, thu-um mite in amau nunna tungtawnin mite tungah thuman kilangsak ding hi.” Ellen G. White Comments, The SDA Bible Commentary, Vol. 6., 1117.  Ephesian in pawlpi kipumkhatna bang pulaak hiam? Pawlpi kipumkhatna dingin bang sem ding na hiam?
2.    Kipumkhatna i gen ciangin sawlmanna le kiniamkhiatna kisam hi. Tua lo-in  bangci bangin kipumkhatna om thei ding hiam? Kiphasakin, kei thu bek cih lungsim nei-in midangte thusim lohna in bangci bangin kipumkhatna om ding hiam? Koi bangin kiniamkhiatin, sawlmang ding i hiam?
3.     Na khempeuh, thu khempeuh tawh kikim khin ta kei lehang koi bangin kipumkhat veve thei ding i hiam?

 

Tomkaihna: Ephesus pawlpi a laikhakna-ah, Paul in Khrih sungah nungta i cih a khiatna hilhcian hi. Mite tawh khatlekhat i kizopna a kipan pawlpi sung kizopnate  khempeuh Khrih vangliatna in a hong khel ding kisam hi.  Kipumkhat nadingin nunzia kikhel kul hi.
See also  Lesson 9: AKICIAN PENPEN LAHTELNA
Tags:

Admin

Admin

Top