SINNA 10                                                          December 1 – 7
KIPUMKHATNA LEH AKISIA KIZOPNA

SABBATH NITAK Dec.1

Tukal sung sim dingte: 2 Tim. 4:11; Phil. 1-25; 2 Cor. 10:12- 15; Rom. 5:8-11; Eph. 4:26; Matt. 18:15-17.

LAI SIANGTHO BULPHUH: “Pasian gal i hi laitak in, ama Tapa sihna tungtawn in eite amah tawh hong kilemkiksak ahi leh tua banga kilem khinsate ama hinna tungtawn in hotkhiat in i om zaw sem ding hi” (Rom. 5:10).

I muhsa mah bangin, Pentecost khit nangawn in thu-umte kikal kizopna akikan un om veve hi. Pawlpi makaite leh pawlpi mite in tua bang haksatna buainate koi bangin siangsak cih Thukhun Thak in tampi hong gen hi. Tua thuguite tuhun pawpi aa dingin nakpi tak manpha hi. Lai Siangtho tawh kizui in buainate siangsak leng ahoih pen hong pianna leh Christ sungah kipumkhatna kepcingna hoih pen ahihna hong lak hi.
Tu kal i sinna ah, a kisiasa kizopna te a ngeibatkikna leh mihing te kizopna in Christ sunga kisakhatna koi bangin huzaap cih i sin ding hi. Kha Siangtho nasepna in mite Pasian tawh kisai bek hilo in khat le khat kinai sakzaw nasep zong ahi hi. Tua sungah Pasian tawh kizopna a daltan nate suksiat ding leh khat le khat kizopna a daltan nate sukzan ding ahi hi. A tom in, lungdamna thu i vangliatna a kilangsak a lianpen in pawlpi in bang gen cih sangin pawlpi koi bangin nungta cih hi zaw hi.
“Note khat le khat na ki-it uh leh ka nungzuite na hilam uh mi khempeuh in a thei ding uh hi” (John 13:35). Hih ki-itna omlo in pawlpi kipumkhat ding i gen thute in a mawkna hi lel aa bangmah lawhcing lo ding hi.

SUNDAY December 2
KILAWMTATNA A NGEIBANGKIK

Paul leh Barnabas te Jesu a ding teci pangin nasem khawm uh hi. Ahi zongin a lunghimawh (lau) thei mahmah John Mark muang ding maw muanglo ding cih thu ah kithukimlohna khat hong nei uh hi (Sawl. 15:36-39). Lungdamna thu tangkona ah lauhuaina te hangin lau ahih manin John Mark in Paul leh Barnabas te nusia hi (Sawl. 13:13).
“Hih anusiatna hangin tawlkhat sung Paul in Mark maipha pia hetlo hi. Barnabas in ahih leh muhna leh tuahkhak thu ah picing nailo ahih manin maisak sawm hi. Christ nasepna dingin siamna tampi nei cih mu ahih manin Mark in nasep a nusiat khak ding Barnabas lunghimawh
mahmah hi.” – Ellen G. White, The Acts of the Apostles, laimai 170.

Pasian in hih mite a zat hangin amau kikal buainate a vensak ding uh kisam hi. Hehpihna thu a gen sawltakpa in ama deih a banglo khangno thuhilhpa tungah hehpihna a zaisak beh ding kisam hi. Mawhmaisak thu gen sawltakpa in a maisak ding kisam hi. Barnabas makaihna nuai ah John Mark kiptak in hong khangto hi (Sawl. 15:39). A tawpna ah, ama kikhelna in Paul lungsim nakpi takin sukha hi.

Timothy tung leh Colosse pawlpi te tungah a laikhakna in John Mark tawh a thak kizopna nei ahihna leh hih thuhilh khangnopa tungah muanna nei ahihna koi bangin hong lak hiam? Col. 4:10, 11; 2 Tim. 4:11.
_______________________________________________________________

Paul leh John Mark te kilemkikna thu a huampi bek in hong kigen hagin kilemkik uh ahihna kitel mahmah hi. John Mark pen sawltakpa’ muan mahmah lawmte lak ah kha thong suak hi. Colosse pawlpi te kiang John Mark pen “nasep khoppih” ci in phat gen hi. Paul nuntakna nunung lam ah, Timothy in ama kiang Rome khua ah John Mark a tonpih ding hanthawn hi. Ahangin, “nasepna ah ka phattuampih hi” ci hi (2 Tim. 4:11). Hih amaisak thuhilh  khangnopa in Paul nasepna tampi panpih hi. Amau gel kikal kidaltan nate kitamzaan khinta a, lungdamna thu a dingin nasem khawm thei ta uh hi. Amau kikal ah bang thu a om phial zongin leh Paul in John Mark tawh kisai nidang ngaihsutna omsa ah dik a kisa kha phial zongin tua te tu in a beisa hong suak khin zo hi.

Eite hong nasak leh hong lungsimsak te koi bangin maisak thei ding i hiam? Banghang in mawhmaisakna in nidang a kizopna omsa khempeuh a ngeibatkiksakna hi denlo hiam? Banghang in tua bang hih ding kisam den lo hiam?

MONDAY December 3
SILA PAN TAPA AH

Rome khua thong sungah a om sungin, Paul in Colosse pan Rome khua ah sila pan in a taisim Onesimus min nei khat tawh kimu hi. Onesimus’ topa pen Paul in a theih mahmah khat na hi hi. Philemon tungah laikhak in sila pan a taikhia pa tawh nidang aa kizopna uh a neihkik ding a lawmpa tungah Paul mimal ngetna lai ahi hi.
Paul in kizopna thupi ngaihsut hi. A kisia kizopna in khalam khantohna ding leh pawlpi kipumkhatna dingin a lauhuai thu ahihna sawltakpa in thei hi. Philemon pen Colosse ah pawlpi makai khat ahi hi. Onesimus tungah ahehna thukkik hileh a Christian tecii hoihlo dinga thuumlo
te tungah pawlpi teci mial ding hi.

Philemon 1-25 sim in. A ngeibangkik kizopna tawh kisai a thupi thugui bang kimu thei hiam?
_________________________________________________________________

Etpak in sila neihna tawh kisai Paul in deihlohna thu nakpi tak a genlohna lamdang sakhuai phial hi. Ahizongin, Paul genzia in muibun zaw tham hi. Lungdamna thu in din mun kideihna teng susia ding ahi hi (Gal. 3:28; Col. 3:10,11). Sawl takpa in Philemon kiangah Onesimus sawl kik a, sila bang hilo in Jesu sungah a tapa leh Topa sungah Philemon i “sanggam itpa” dingin sawl hi (Philemon 16).

Sila tai sim te in mai lam aa ding lametna neilo cih Paul in thei hi. Bang hun cilo in mat thuak thei uh hi. Zawnna leh ngauna tawh a nuntakna uh kidim hi. Ahizongin, tu in Christ sungah Philemon sanggam hihna leh lungkim taka nasem hihna tawh Onesimus in lametna dim nuntakna nei ta hi. Philemon nuai ah nek le dawn, giahna ding leh nasep ding lungmuan om hi. A kisiasa kizopna bawlhoihkikna in ama nuntakna ah tampi kilamdanna tun hi. A muanhuai le it sanggampa, leh lungdamna thu ah Paul tawh nasem khawmpa hong suakta hi (Col. 4:9). Hih Jesu sungah thu-um minihte kilemkik theih nadingin Paul in deihlua in hanciam keeikaai ahih manin ama ipsung sawk in a bei teng nangawn piak ding phal hi.

Hih lungdamna thu sunga kimu thuguite in midangte tawh na kizopna ah haksatna, buaina leh kisiatna te damkiksak theih nading koi bangin hong huh hiam? Hih thuguite in na pawlpi sungah kipumkhatna a siatlohna dingin koi bangin dal thei ding hiam?

TUESDAY December 4
KIPUMKHATNA DINGA KHA SIALPIAK TE

Hih sinna ah i muhsa mah bangin, Corinth pawlpi in buaina lianpi nei hi. 1 Cor. 3:5-11, 12:1-11 leh 2 Cor. 10:12-15 sungah Paul in pawlpi kipumkhatna ding a thupi ahi damsakna leh a ngeibatkikna dingin bang thuguite hong gen hiam?
_________________________________________________________________

Hih hunte ah sawltakpa in pawlpi kipumkhatna ding a thupi thuguite pawlkhat hong gualsuk hi. Jesu in nasep tuamtuam a sem dingin nasem mi a tuamtuam zang ahihna hong lak a, Pasian gam lam nading in a vek un semkhawm uh hi (1 Cor. 3:9).

A kidem dingin Pasian hong samlo a, a semkhawm dingin hong sam hi. Christ pumpi na a sem ding leh kiimle-paam a panpih dingin Pasian in thu-um mial khat ciat letsong (silpiak) pia hi (1 Cor. 12:11). Letsong lianzaw neuzaw cih omlo hi. Christ pumpi a dingin a vek in kisam hi (1 Cor. 12:18-23). Pasian hong piak i siamna te mimal aituam adingin zat ding hilo a, lungdamna thu tangko nading in Kha Siangtho in hong piak ahi hi.

Midangte tawh kitehkaakna pen pilvai lo hi. Ahangin, tua bang hihna in hong lungkia sak ahihkeileh kiphatsakna hong tun thei hi. Midangte ei sangin siamzaw, lianzaw in i ngaihsut leh amau tawh i kitehkaak ciangin thanem in i nasepna khempeuh ah lungkia baih ding hi hang. Alangkhat ah, Christ a ding i nasep pen midang te sangin lawhcing zaw i kisak leh, ei le ei kiphasak kha ding hi hang. Christian khat in tua bang lungsim neih hetloh ding ahi hi.

Hih bang ngaihsutna tegel in Christ a ding leh khat le khat kithuahna ah hong susia thei ngaihsutna te ahi hi. Christ hong piak huzaap i neih zahzah tawh sem hi leng, Christ a ding i sepna ah lungnopna leh lungkimna mu ding hi hang. I nasepna in midangte hnciamna panpih dinga, tua ciangin Christ pawlpi in kumpi gam phutna ding kahlei lianpi hong suak ding hi.

Pasian nasepna sungah ikhat siamna na en (eng) hun a om ngei hiam? (Sia khollo hilo hia?) Tua mah bangin, midangte tawh na kitehkaak caingin na siamna ah kipaak/kiphasak in na om kha ngei hiam? Mawhnei mite pianzia hi aa hih bang ngaihsut om den ahihna thu Pual lunghimawh pipen ahi hi. Koi lam koi lam ah na puuk zongin, Christ sungah sakhat hihna kepcing nading in koi bangin angsungkhuallo lungsim nei thei ding i hiam?

WEDNESDAY December 5
MAWHMAISAKNA

Mawhmaisak na i cih bang hiam? Mawhmaisak na in ei tungah hong khial khat i gamtatna diksak hiam? Ka mawhmaisakna in hong khialpa’ kisikna tungah kinga hiam? Hong dahsak/gimsak khat kei mawh maisakna tawh kilawm kei leh ee? 

Anuai a munte in Lai Siangtho mawhmaisakna zia koi bangin hong tel sak hiam? Rom. 5:8-11; Luke 23:31- 34; 2Cor. 5:20; Eph. 4:26.

Amah tawh i kilem theihna dingin Christ in hong pan/sem masa hi. “Pasian hoihna in kisikna ah hong pi hi”(Rom. 2:4). Mimawh i hih laitak in Christ sungah Pasian tawh i kilem hi. Eite kisikna leh mawhthumna in kilemna bawllo hi. Singlamteh tunga Christ sihna in kilemna bawl aa, tua ei aa dinga kisem thu san ding in ei vai a hi hi. I mawhna te i thum masiah mawhmaisakna thupha ngahlo ding cih a maan ahi hi. Tua in mawhthumna in Pasian’ lungtang sungah mawhmaisakna piangsak cihna hilo hi. Mawhmaisakna in a tawntung in Ama lungtangah om hi. Mawhthumna in hong ngah sak hi zaw hi (1John 1:9). Pasian in eite hong muhzia khel hilo in eite in Amah tungah i lungsim puak hong khel zaw a hih man in mawhthumna in nakpi tak in thupi hi. Kisikna ding leh mawhthumna ding Kha Siangtho hong zawhna vangliatna i zuih ciangin eite a kikhel i hi hi.

Mawhmaisakna in i khalam cidamna dingin nakpi takin thupi hi. Eite tungah hong khial khat, eite mawhmaisakna tawh a kilawm kei zongin, maisaklohna in amau sangin ei mau mah hong nasak zaw hi. Mi khat in nang tungah dam theilo in a om leh hong nasak semsem dingin  amaute a phal na hi hi. Pawlpi sungah hih bang thuakna leh nasakna te in kikhenna leh kitelkhialhna piang sak mun mahmah hi. Pawlpi mite kikal ah ki siangsaklo natsakna te in Christ pumpi kipumkhatna nasak hi.

Mawhmaisakna in eite mawhpaihna pan in midangte khahkhiatna a hi hi. Ahang in, Christ in zong Ama mawhpaihna pan in eite hong khahkhia hi. Hih in ei tungah midangte gamtatna diksakna hilo hi. Ama tungah i khialh ciangin Christ in eite tawh kilemna hong bawl a hih manin eite tungah hong khial te zong kilemna i bawl ding ahi hi. Eite hong kimaisak a hih manin eite in zong maisak thei hihang. Eite hong ki-it a hih manin eite in zong it thei hi hang. Mawhmaisakna in teelna hi. Midang khat gamtatna leh lungsim puak koi bangin omta leh mawhmaisak ding tel thei hi hang. Hih in Jesu lungsim puakzia a hi hi.

Christ sungah i neih mawhmaisaknaa in midang te i maisak ding koi bangin hong huh thei hiam? Christian nuntakna ah hih mawhmaisakna banghang in thupi hiam?

THURSDAY December 6
A NGEIBATSAKKIKNA LEH KIPUMKHATNA

Matt. 18:15-17 sim in. Pawlpi mi dang khat ei tungah hong khialh ciangin kilem lohna siansak na ding Jesu in hong gen bang cial thumte in bang hiam? Tu lai i dinmun ah koi bangin zang thei ding i hiam?
________________________________________________________________
Pawlpi sung mimal kilemlohna te a hih thei zah in mi tampi lawhsak loh ding Matt.18 sungah Jesu in a lunggulhna hong gen hi. Buaina a nei mi tegel in amau sungah buaina vensak ding deihna ahi hi. Hih thu hangin Jesu in, “Nang tungah na sanggampa hong mawh leh pai in no gel bek om khawm in ama khialhna lak in” ( Matt. 18:15) ci hi. Tua minih te kikal buaina ah kihel mi a tam semna leh kilemlohna tam semsem thei aa, thu-um dangte kithuahkhopna sukha semsem hi. Mite in panpih lam kieni ciat a, kido bawlna hong kipan hi. Ahi zongin, Christian te in amau kilamdanna te mimal/aituam vai ah siansak ding a hanciam uh ciangin Christian ki-itna lungsim leh khat le  khat kitelsiamna hong om a kilemkikna piangthei hi. Amaute kilamdanna te siansak ding a hanciam uh ciangin Kha Siangtho in na a sep na ding hun hoih om thei pan hi.

Khat veivei buaina venna dingin mimal ngetna te thubun zolo thei hi. Tua bang hun ciangin khat leh nih kuppih ding Jesu in hong sawl hi. Hih kal nihna sepna dingin kal masa sep phot kul hi. Ngimna in mite ki-pumkhat sak ding hi a. kigamla sak semsem ding hilo hi. Langdo a thuak lam ah a koppih tein ama dikna pulaak ding ahikeileh a dangte mawhsak ding hilo hi. Christian itna leh kikhuatuahna tawh lamlak in thungetsak ding a, a kilemlo minih gawmkik ding ahi hi.

Khat veivei buaina siansakna ding hanciamna khempeuh a lawhsap hun om thei hi. Tua bang hun ciangin pawlpi mite a thu vatun ding Jesu in hong hilh hi. Sabbath zingsang kikhop hun ah mimal kitotna va puak aa kikep ding cih hong gen hilo hi. Kal masa te gel tawh hih mite kilemna angah zawh kei leh a kilawm pen mun in pawlpi thu kikupna (Church board) ahi hi. Christ ngimna in kilemkikna ding aih lam mangngilh kei un. Akhat te mawhsak in khat pengsak ding hilo hi.

“Lungkimlohna pen siatbawlnopna tungsak kei un. Liamna lungvei in guu tawh kidim kammal te a hong suahkhiat ding phal kei un. Aza mite lungsim siasuah sak thei hi. Nasak luatna ngaihsutna ten a lungsim adim ding phawl kei in. Na sanggampa kiang pai inla kiniamkhiatna
leh lungsim takpi tawh hih thu kuppih in.” – Ellen G. White, Gospel Workers, laimai 499.

FRIDAY December 7

Ngaihsut beh Ding: The Ellen G. White Encyclopedia sunga “Mawhmaisakna,” laimai 825,826.

“Nasemte in amau sungah Christ a om ciangin, angsung khualna khempeuh a sih ciangin, a lianpen ding kidemna leh hanciamna te a omloh ciangin, kisakhatna a om ciangin, amaute mahmah a kisiantho sak ciangin, khat le khat ki-itna te kimu in a kithuak khak ciangin, Pasian in hong kamciam Kha Siangtho hehpihna guah amaute tungah zu zuazua ding hi.” – Ellen G. White, Selected Messages, book 1, laimai 175.

“Tua a lian Topa’ Ni ciangin eite buukna leh tausang ahi Christ tawh a ding khawm dingte i hih leh, kihazatna leh lianpen ding nakpi a sawmna te i hepkhiat kul hi. Hih a sianglo nate i zungte i suksiat cip ding kul aa, tua hi leh amaute hong pokik ngei nonglo ding uh hi. I Topa lamah ei mau mahmah i pumbit in i pan kul hi.” – Ellen G. White, Last Day Events, laimai 190.

KIKUP DING DOTNATE:
1. Colossians 3:12-17 sim in. Sawltak Paul in Colosse pawlpi te zon ding a hanthot ahoih Christian nunzia kikum un. Hih hoihna te in banghang in thubuai venna ding bulpi hi thei hiam? Matt. 18:15-18 sunga Jesu hong piak thugui te bangin sep theihna ding hihte in koi bangin hong makaih hiam?

2. Colossian 3:12-17 sunga thuhilhna te en kik in. Hih thu te banghang in pawlpi kipumkhatna dingin thupi mahmah hiam?

3. Seventh-day Adventist pawlpi bup i et ciangin, leitung bup phakna dingin a kisam kipumkhatna neih theihna ding hong awh lianpi pen bang thu hi ding hiam? I thuhilhna te leh upna guipi te maw? Hi het lo hi. Hih thute leitung bup ah tangko dinga Pasian hong piak te ah hi. A thu nawngkai pen in ei sung, i mimal kizopna, i ki-hazatna cikcik te, i phun ciauciau nate, i angsung khualna te, a lianpen hih ding i lunggulhna te, leh thudang tampi te a hi hi. Pawlpi kipumkhatna ding i muh ma in nang sungah a kisam kikhelna a om theihna dingin bang hang in Kha Siangtho vangliatna nget kul masa hiam?

Ahuampi in: Jesu Christ lungdamna thu in damsakna leh bawlphatna a hi hi. Tua bang te a om caingin midangte tawh kizopna huzaap pah ding hi. Mawhna dim leitung na ngawn ah midangte tawh kizopna hoih koi bangin nei thei ding cih Lai Siangtho in a vanglian thugui leh etteh ding hong pia hi.