Kisikkikna le Mawh Pulaakna

Kisikkikna le Mawh Pulaakna

Ni khat ni in, innkuan khat a mawtaw uh tawh gamlapi ah khualzin in hong paikhia uh hi. A pai nopna mun uh pen GPS zangin hong pai uh hi. Mun khatna ah a lampi zuih uh khial in, a langkhat zaw lam ah a pai ding uh hi hizaw hi cih GPS in hilh hi. Tua ciangin, a khialhna uh kiphawk in a kileh theih nading uh lampi kawi ( U Turn) a tun uh ciangin a lampi man zuan in hong kileh vingveng uh a, a tun nopna mun uh cidam takin hong tung thei uh hi.

Tua kilehkik ding hong hilh thei leh hong phawk sak thei pen amau innkuan adingin GPS ahi hi. Eite Christian nuntakna ah zong tua hong phawksak thei leh hong hilh khat om hi. Topa Zeisu in a nungzuite kiangah, “Amah (Khasiangtho) hong tun’ ciangin leitung mite tungah mawhna thu, thuman thu leh thukhenna thu laktel ding hi” ci in na vaikhak hi. John 16:8. Khasiangtho in thuman thu hong hilh hin, ih khialhna panini h kihei a, kisikkikna ah hong kha hi. Sawltak Laisiangtho in, “Israel mite kisik kikin Pasian in a mawhna uh a maisak theihna dingin Ukpi leh Honpa-in tua Jesuh bawlin ama taklamah a tusak hi” (Acts 5:31) ci ahih manin kisikkikna le mawhmaisakna pen Zeisu kiang bek ah om hi. Mihngte hanciamna le sepna tawh hi lo a, Zeisu hang ahi hi.

Tu in a kisikkik lungsim ah bang teng hong om ding hiam cih Laisiangtho in a nuaia bangin hong hilh hi. Siahdongpa in, “Pasian aw, mawhneipa keimah hong lainat in” (Luke 18:13 ZIV) ci in thungen hi. Kamsangpa Isaiah in, “Kote khempeuh mawhnei mi ka hi khin uh a, ka gamtat hoih khempeuh uh zong puannin tawh kibanglai veve hi. Kote khempeuh singteh bangin ka vul uh a, ka mawhna hangun huih letkhiat nahthel keu ka bang uh hi” (Isaiah 64:6) na ci hi. Laphuakpa in, “Pasian aw, kei hong entel in la, ka lungsim hong thei in. Kei hong sit in la,    Kei sungah siattheihna a omkha hiam hong en in la, tawntung lampi-ah kei hong kha in” (Psalms 139:23,24) ci in mawhna tawh kidim ih hihna la in na gelh hi. Mawhnei ih hihlam kithei kei leng kisikkik nading lampi om lo a, mawhnei te bekin kisikkikna kisam hi. Mawhnei ih hih lam kitel ding kisam hi.

See also  Nimrod le Sunday

Ih mawhnate kiphawk in, ih khialhnate ih kisikik takpi leh It John in, “Ahi zongin Pasian kiangah i mawhnate va pulak lehang, amah citakin thuman ahih manin, i mawhnate hong maisakin i hoihlohnate khempeuh hong siangsak ding hi” (1 John 1:19) ci in hong gen hi. IH mawhna te pulaak in Pa kiang ih koh ding hong gen hi. Kisikik in mawhna ih pulaak ciangin ih mawhna khat zong imlo, selsim lo in a vek sisek in ih pulaak ding Pasian in deih hi. Tanglai Israelte hun in, mawhnei mi khat in mawhsawp nadingin tuuno hong pai pih ciangin, tuuno a gawh ma-in, tua tunno lu tungah mawhneimi in a khut nih nga sukin a mawhna khempeuh a vekpi in sut in, tua khit ciaingin, mawh thoihna tuuno go hi. Pasianin na mawhna te a theilo hi peuhmah lo a, tel lua mahmah ahih manin na sikikkikna a dik mah hiam, na pulaak siang mah hiam cih hong ngak hi. Ih mawhna te imsim in selsim lo ding hi hang. Paunak Laisaingtho in, “A khialhna a im mite a dau pailo ding a,  a mawhna pulakin a kikhel mite in  hehpihna ngah ding uh hi”(Proverb 28:13) ci hi.

Ih khialhna panin kileh kik ding ahihkeileh kisikkik ding ih gente pen bang hang kisam se hi ding hiam ci in ka ngaihsun a, Kamsangpa Ezekiel in Topa hopihna hi bangin na ngah hi, “Midik khat tungah nuntakna ding kam ka ciam hangin, a beisa-a ama hoihna suangin mawh gamtat ding hong kipan leh, ama gamtat hoihnasate ka phawk kei ding hi. Ama mawh gamtatna hangin si veve ding hi.” Ezekiel 33:13). A hoih gamta in Pasian deihna ih zui a, ahi zongin thumaan pan pial in khialhna ih bawl leh Topa deihna hilo a, sihna thuak ding cih ahi hi.

See also  Zunkhum Dalna Zatui

Aw… tua leh kisikna taktak ih cih pen bang hi mawk ding hiam? Kisikna diktak ih cih in “Banghang hiam cihleh Pasian deihna tawh a kituak dahna in kisikkikna piangsak a, tua kisikkikna in hotkhiatna a hong tun hi. Hotkhiatna a ngah mite kisik ngeilo ding uh hi. Ahi zongin, leitung vai-a dahna in sihna a piangsak hi.” 2 Cor. 7:10,11 ZSV. HI takah dahna nam nih na gen a, Pasian deihna tawh kituak dahna le leitung vai-a dahna ci hi. Leitung vaia-a dahan cih ciangin, khialhan hanga hong tung ding thaman(daan le thukhenna) te kihtaakna ahi hi. Genesis 3: 12,13 sung ih et ciangin amau khialhna pen mi dangte tungah tungsak in, a tuah dinguh thukhenna pen pelh sawm uh hi. Tua banga mawhna thaman hang a tuak ding daante launa in Pasian lungkimsak lo a, Pasian maipha ngahna hi lo hi. Pasian deihna tawh kituak dahna ih cih ciangin, mite muhna le Pasian muhna ah midangte tawh kibang lo in, a omdan limlim tumdang ding hi. Gentehna in numei dang tawh a mawh papi khat in a kisikkik taktak leh a zi tung leh Pasian tungah mawh sutna nei ding a, mawhmaisakna a ngah nadingin thuum ding hi. Tua bangin mawhmaisakna a ngah khit ciangin, tua zia-etna ah a puuk nawn loh nadingin tua numei kiang van eh nawnlo in, a zi lo tawh koimah dang paikhia nawn lo ding hi. A internet khempeuh khak ding hi. A omna khua ahihkeh a vangte kikhin in mundang pek ah va om ding hi.

Kisikkik taktak ih cih ciangin, “…Israel mite aw, na gamtatnasa bang ciatun thu kong khen ding hi. Kisik kikin na gamtatsiatna khempeuh panun khawl un la, na mawhna hangun kisisak kei un. Na gamtatnasa uh mawhna khempeuh nusia un la, na lungsim uh leh na ngaihsutna uh thaksuaksak un. Bang hangin no Israel mite si nuam na hi uh hiam?”(Ezekiel 18:31,32) ci in Pasian in Israelte a sih loh nading uh lampi om sun ahi kisikkikna taktak nei a, a mawh kik nawnloh ding uh hilh hi. Tua kisikna diktak ih cih in lungsim siangtho hong guan in, Pasian tawh hong kikhawl sak hi.

See also  Christian Khangno le Tattoo

Tua lungsim siangtho ih neih theih nadingin David in, “Pasian aw, keima sungah lungsim siangtho hong piangsak in la, a thak a man ngaihsutna ka sungah hong guan’ in” (Psalms 51:10) ci in thungetna na nei hi. Tua lungsim siangtho ih ngah theih nadingin nisim in a nungta Pasian’ Thubu sim in, thungetna tawh mawhna pulaak in ki-apna nei den ding hi hang. Mawhna kisik le maisakna a ngahte ih hih ding Topa deihna ahi hi. A si ding le a maiming dingin Topa in hong phal lo.

 

 

Tags:

Admin

Admin

Top