MSS 10: Kum 10 Sung Mang Kibang Den

Kum 10 Sung Mang Kibang Den

Laurentiu Stefan Druga, 35

Spain, March 7

Romania gam Khuapilian ahi Bucharest khuapi gei-a, Elementary Sangah, Seventh-day Adventist naupang thum bekbek kah vilvel hi.

Amauteng thum a vek un tan giat vive hi uh a, Laurentiu Stefan Druga tawh ki khaankhat ahih manun biakinn ah kikhawm dingin a zawn zel uh hi. Laurentiu in Jesu itna a theih ciangin ama’n zong it mahmah ahih manin kituiphum hi.

Laurentiu in pastor suahnopna lungsim hong nei hi. Tua Bucharest khua-a, Adventist school ah mun 20 bek awng lai-a, tua mun-ah lut zawh nadingin entrance exam mat hoih kisam hi. Exam ni ciangin, Laurentiu khaan sungah lut-in, sabuai gol deda khat ah tu hi. A mai-a ki koihsa question laidalte ensuk in, abanban-in a phi hi. A 21na ngah pah hi.

“Phamawh kei ei,” a nulepate’ kiangah ci hi. “Mai kum ciangin hanciam kik ning ei.”

Ahizonginn tua kum in a khalam nuntakzia hong kiam mahmah mawk hi. Entrance exam hun hong tung kik leuleu-a, a lut nangei sang khaansung mah ah lut-in, a tut nangei mah ahi, sabuai gol deda pen mah-ah tukik kha hi. Dotna laidal en suk hi. A lung kia mahmah hi. Pasian’ deihloh in a gamtat lam kiphawk mahmah ahihmanin, alungsim hawmsuah gawp hi. Thakhat thu-in dinggto vatin pusuak khia hi.

Kum tampi hong sawt to ta hi. Laurentiu Spain gam lamah pai-in tua lai-ah innlam nasep (construction worker) sem hi. Tua lai-ah zi nei-in Pasian’ kiang panin gamla semsem ta hi. Kum 23 a phak laitakin, tua a omna Spain ah Adventist sia sem ahi, a panote khat tawh ki mu kha uh hi. Nidang lai-a Pasian a itna le pastor a suahnopna thute hong phawk kik mahmah hi. A zi tawh tui kiphum khawm dingin a khensat uh hi.

READ  Cidamna

Tua ni thupi ni a tun ma-in, Laurentiu in koici bangin nuntakna thak tawh nungta ding cih hong ngaihsunsun hi. “Topa Pasian aw, Kei a’ dingin bang hong geelsak nahi hiam?” ci-in thu ngen hi.

A zing ciangin, tua bang mahin thu ngen leuleu hi. “Topa Pasian aw, Kei a’ dingin nong geelsakna bang ahi hiam?” ci hi.

A kituiphum zawh uh zan nihna ciangin Laurentiu in mang khat manh hi. A mangin, laisinna sangkhaan khat sungah lutin, sabuai gol-deda khat ah tu-a, dotna laidal khat a en hi. A beisa kum sungin a sin ngei hetloh pi ganaan a phi ding hi miikmeek hi. A lungsim mawkgawp hi. Patau gawp in a lungtang kinawh saai mahmah hi. Tua laitakin, Laurentiu khanglo vat hi. Zingsang lam nai 3:00 am na sat ta hi. “Aw! Ka zalmang na hi bilbel saam ee” ci-in khuisa pampam hi.

Ihmu kik a, mang khat manh leuleu  hi. Tu-a leuleu ciangin, A pawlpi ahi, Madrid Church sung-a, pulpit ah nuihmai kawmin thugen-in a dingg hi. Mipite in lunglut takin ngai dimdem uh hi. Ama’ sungah lungnopna hong luang ngiat hi. Pasian’ ompihna amahmah kiphawk hi.

Zingsang ciangin, Laurentiu in a mangmat mangngilh hi. Tua nitak ciangin zong thu ngen leuleu-in, “Topa Pasian aw, bang hong geelsak na hiam” ci hi. Ihmu sip leuleu hi. Sangkhaan khat sungah lutin, sabuai gol-deda khat ah tu hi. A sabuai tung a etsuk leh Romanian Language Exam a phi ding ahihlam ki thei hi. Tua lai a sinloh zawh kum khat bang pha khin ahihmanin a lungsim ah bangmah om vet lo hi. A diip kuagawp hi. Tua zawh a sawt loin, sabuai dang khatah tu leuleu hi. Tu-in ahihleh a thugen a lunglut mahmah, mipi honkhat mai-ah, nuihmai hiuhiau in thu a gen hi. Pasian’ ompihna lungnuam takin ngah kha hi.

READ  THUKHUK NGAIHSUTNA SUNGAH NGAIHMUANNA OM KEI

Tua bangin zansim phialin a kibang mang manh den hi. A laiphina sangkhaan kibang den-a, ahizongin a laiphi kikhelkhel hi. Khat vei zong kigingkhol cih om ngeilo banah lungkia, hi den mai hi. Tua khit ciangin a munlemual kikhel in biakinn sung hi zeel hi. Sabuai dangkhat, mipite’ mai, cih bangin hiden hi. Mipite’ tungah thu hilh, Pasian’ ompihna kiphawk cih bangin mang manh den hi.

Tua bangin kha thumsung bang a mat khit ciangin, Pasian in pastor hong semsak nuam ahi maiding hiam, ci-in Laurentiu in lamdang sa mahmah hi. “Ahi zongin Topa Pasian aw, ka nasep ka khawl thei kei ding hi. Zi neikhin ka hihmanin ka innkuan ka vaak kul ta ding hi. Hi theinawn lo hi,” ci-in Pasian’ geelna nial sawm hi.

Tua a mangmat pen kizom suaksuak lai hi. Kum khat hong cing ta hi. Tua khit ciangin kum nih, kum thum, kum li hong cingtoto hi. Anulepate’ kiang leh a lawm itte’ kiangah a mangmat gen zel taleh amaute in, a lungsim ngaihsut teng a manh zel hi, ci-in ngaihsun lel uh hi.

Ataktakin cileng, amangmat pen hong ki ngeinaseh mai ta hi. A lup kawmin, amangmat amasa lamteng lungnoplohna ahih zenzen hangin, a nunung lam tengin a lung nuamsak zel ahih manin tua ngaihsun kawmin lum zel hi. Tua mah bangin Laurentiu in nitak simin a lup ma-in thu ngen den-a, “Topa Pasian aw, kei a’ dingin bang hong geelsak peuh mah na hiam?” ci ngeungau zel hi.

Kum 10 hong cin khit ciangin, Laurentiu in a mangmat a zi’ kiangah gen hi. Nitak khat, Laurentiu te nupa mi 250 bang a kikhopna khangno khawmpi ah va kikhawm uh hi. Thugenpa in Laurentiu’ ngaihsutna teng a thei bang keek in thu gen hi. Laurentiu in pastor suah ding hi thei a kisak nawnlohna a ngaihsut simin thugenpa in pulpit tung panin a na dawng denkeei tawh kibang hi. Laurentiu’ zi in a pasal kiangah, “Lai Siangtho sang na kah kul taktak ta ding hi,” ci-in hanthawn ta hi.

READ  Tuahsiatna in Hongnawk Ciangin

Kha thum khit ciangin, Laurentiu te nupa, kum kua a pha atapa uh tawh, Madrid khuapi panin nisuahna lam tai 235 (km 380) bang a gam la Sagunto Adventist College ah sangkah dingin hong pai ta uh hi. Tua ni-a kipan in a mangmat khawl ta hi.

Tu-in Laurentiu a Lai Siangtho sangkah, a kum nihna hi ta hi. “Ka laisin khempeuh leh ka siate tawh ka ki kholhna khempeuh pen ka mangmat a nunung zaw lam hi den hi,” Laurentiu in ci hi. “Ka mangmat a masalam bel phawk nawn khol ke’ng. a nunung lam pen, tu-a ka nisim nuntakna hi ta hi,” ci hi.

Tu kuata Sabbath 13 na, i mission sumpi khenkhat tawh Laurentiu’ sangkahna ahi, Sagunto Adventist College sang a dingin a kisam mahmah lai, inn le lote leina ding leh lamh nadingin ki zangh ding hi.

 By Andrew McChesney

Tags:

Admin

Admin

Top