Kumpi Zawl La

Lesson 6Kumpi Zawl La

May 4  –  10

Sabbath Nitaaklam                                     May 4

Tukaal sung sim dingSolomon la:  Gen. 2:7; 1 Cor. 7:3-5; John 17:3;  1 John 1:9;  Romte 1:24-27;  Gal.  5:24.

Kamngah:  “Keimah simloh kuamah ngai ke’n la, kei simloh kuamah kawi kei in. Itna zong sihna zah in thahat a, ngaihna zong sihna zah in khauh hi.”  (Pro. 8:6).

            Nuntak sung buppi, kiteen ni lianpen hi. Mi khempeuh zong kiteng kimlo mah ta leh, akitengte in, to-na lianpi phu uh a, thupha lianpi zong tuak uh hi. Thupha lian te lakah, ang kizatpihna kihel hi. A hun maan leh a munmaan in zat nakleh thathatna tawh a kidim itna a hihi.

            Mi tampi sandan takin, Lai Siangtho pen, angki zatpihna tawh ki lehbulh hetlo hi. Piangsakpa hong piakna tawh ki tukalh a zatman hibek hi.

            Solomon’ la in, a tompen leh a kitawmsim pen himah taleh, khangmoi monu khat leh Shulamite kici mopa, Kumpi Solomon mah hi ding a, ki um khat kizopna teng a hihi. Tua laibu in, mihingte kizopna thuk leh itna i a nopna hong lak phadiak hi. Tua Solomom Ps. pen, Pasian in a mite hong itzia, Khazih leh a pawlpi ki itzia cih khawng lakna in kizang hi mah taleh, a taktak a pen, mihing taktak numei khat leh pasal khat kizopna a hihi.

            *Tukal sung buppi, Lai Siangtho lui in kitenna a pulak daan teng i sin suksuk ding uh hi.

 

SUNDAY                                                                 May 5

A Kikhen Theilo Nuntakna

            A nuai a munte na sim ciangin, Lai Siangtho in mihing’ pumpi bangci muh na sa hiam?  Gen. 2:7; Ps. 63:1; 84:2; 1Cor. 6:19, 20; 1 Thess. 5:23.

            Upna pawlkhat in, mihing’ pumpi pen namnih phasak a, Kha nuntak theih na’ng in, pumpi in buaisak ci uh hi. “Pumpi” a siat hangin “Kha” hoih veve ci uh hi.  Lai Siangtho in mihing pumpi pen Angkawmna tawh ki pumkhat sak hi. Nuntakna in, “Pumpi leh Kha” (Gen. 2:7) ki pumkhat a hihi. Laphuakpa in, amah, Pasian tungah ki pumpiak (Ps. 63:1; 84 2) hi. A mipum in, Pasian deihna sungah ki sianthosak kul hi.

            Mihing’ pumpi a hoihlam pan a et ciangin, Solomom in, Angkawmna zong mu hi. Hih munte in, tua muhdan te hong bangci lak hiam?  Songs 1:2,13; 2:6;  5:10-16;   7:1-9.

………………………………………………………………………………………………………

            Hih Lai Siangtho munte’n mihing pumpi pahtawi mahmah hi. Innkuan neite’ pumpi a ding lauhuaina bangmah om saklo hi. Kicingtak in gamtat theihna kiciantak in hong pulaak hi.

            Angkawm vai genhuailo, zathuailo cih dan ngaihsutna nei minam tampi om hi. A kitengsa nupate in, cidam tak leh ki pumkhat tak a Angkawm ding haksa a sakna uh om thei hi. Tua mah bangin, naupangte nangawn zong, Angkawm siamna tawh Khristian innkuan hoih suahtheih daan khawng kihilh khalo hi. Lai Siangtho in hih Angkawm vai kiciantak in hong hilhna tungtawn in, mihing te in zong lungnopna sangpen ngah thei ding leh hong piangsakpa hong silpiak lianpen ginatak leh zahtakna tawh i zat ding hong deih hi.

            Angkawmna pen ganhing bang a niam mahmah maizumhuai gamtatna hi cih ngeina upna ngaihsutna leh lungsim puakzia te pan bangci kidaal theih ding i hiam? A langnih tuak un khengval theicih Lai Siangtho in hong koici lah hiam?

 

MONDAY                                                               May  6

 Zawl la Sungah Ki Itna te

            Solomon’ Ps. sungah ki itdaan tuamtuam te pulaak dih un. Songs 1:2,13; 2:10-13,16; 3:11; 4:1-7; 5:16;  6:6; 7:1-9; 8:6,7.

READ  ZSS 2: A HOIHZAW  LEITHAK KHAT GEELNA

………………………………………………………………………………………………………………………………………………………………………

            Solomon’ Ps. in lawmta kician tak leh kidon takin a hun zatna te hong lak hi. Lawmhoih nih in, nupa in kiteng suak hi. A zi in “Hih ka lawm” ci hi (Songs 5 : 16). Lawm cih kammal in Angkawmvai om vetlo kikhawlhna a hihi.  Tua bang lawmhoih Zi/Pasal a neikha te mi hampha a hihi.

            A la sungbuppi ah naitak a kikholhna, ki itna kilakna te in, numei leh pasal a dingin lungsim leh pumpi nopsakna a hihna te tawh kidim hi. Lungsim sung aa hong suakbang in kinai tak a, itna kilahna in, piangsakpa hong silpiak hi a, nupate adingin ki pumkhat na’ng nakpi’n hong huh hi. Nupate in a lungsim vuah siangtho ki itna, a neih manun, a mau ki itna in, “niin banglo in ciim sitset” hi (Adventist Home lai 99).

            Hih Lai Siangtho munte’n zong, itna sangpen hong lak hi. Ki itna diktak in mi’ lungsim sungah omlo a; Kha Siangtho’ silpiak ngiat a hihi (Rom. 5 : 5). Hihbang ki itna in nupate khihkipzo hi. Naupang te’n a neulai pan kipan in nu leh pa tungah muanna a neihtheih na’ng un, hihbang ki itna tawh kizop kul hi. Thu-um-mite Khazih pumpi sungah hong henkhawm thei, ki piakkhiat itna a hihi. Solomon’ la te in hih bang ki itna te tawh nupate ki it dingin hong deih hi.

            Hihbang ki naihna te in, Pasian tawh i kinaih theihna ding in hong koici makaih hiam?  A kibatna bangteng om hiam? (Gentehna in, hun zatdaan, ki pum-piak daan). A dang bang a omlai tam? 

TUESDAY                                                               May  7

Itna Thei 

            Mi tampi te’n “Eden ah ciahkik ding” vive Solomon’ la sungah mu uh hi.  A gen nupa-te pen nupa masa te a hihloh uh hang, a la thu in huan masa hong phawk sak hi. Pasian’ geelna sa bangin “sa-khatna” (Gen. 2 : 24,25) hong pulaak hi.

            Solomon’ Ps. in, nupate, ki pumkhat theihna’ng in langnih ki pumpiak, a kulna hong koici lah hiam?             Solomon’ la 4:7-5:1.  Paul hong hilhna 1 Cor. 7:3-5 tawh koici kibat hiam?

………………………………………………………………………………………………………………………………………………………………………

            Solomon in,  “Hongpai un”  (Songs 4:8) ci in hong zol hi. A mo in zong zui pah hi. A nungciangin tua nu in, “Ka ngaihno a huansungah hong paisak un” (Songs 4:6) na ci hi. Mopa zong paipah hi (Solomon’ la 5:1). Hih tengah kuama’ sawlzawh thu tawh omkhawm hilo hi.  Amau nihgel ki ittak leh suakta takin a lutuh hi. “Keima’ huan” in  “Ama’ huan” ahi hi.

            “Solomon” leh “Shulamite” cih minpen, Hebrew kam shalom, “Kilemna” aih keileh “ki-pumkhatna” cih kammal pan hong pai a hihi. Amau nihgel ki pakta khawm uh hi (Songs 4:1-5; 5:10-16).  Amau’ ki zopna in, ki thukim dimdiamna om a hihlam, a la sungah kilangh hi.  A ki thukimna ah “Ka ngaihno in kei aa hi a, keimah zong ama aa ka hihi” (Songs 2:16) a cihna kammal in, Eden huansungah, “Tu petpet in hihpen keima’ guhte leh keima’ sa te a hihi” ci kammal aw hong tangko hi (Gen. 2:23).

            I nupa kipumkhatna in, i Pasian tawh kizopna koici bangin hong “thei” hiam? Gen. 4:1,25;  1 Samuel  1:19;  Luke  1:34;  John  17:3;  1Cor. 8:3.

………………………………………………………………………………………………………

            Lai Siangtho in nupa kikal kinaina pen thei cih kammal zang citciat hi. Amau’ hihna sungtawng thute ki-ap uhhi. Pumpi nihbek hilo, lungsim nih “sakhat” suakuh hi.  Thei cih ciangin, Pasian leh mi kizopna zong lak hi. Thu ngaihsun Khristian te in, nupa ki pumkhatna, ki apna, ki pumpiakna, teh theihloh lungnopna, siangtho thusim te leh Khazih leh Pawlpi ki pumkhatna te mukhia uh hi.

READ  Sinna 3: Kikheel ding Kiging

 

WEDNESDAY                                                                  May  8

Ki Itna Hundik

            Solomon’ la 4:8 – 5:1 dong simsuk in. Solomon’ la 4:16 leh 5:1 in a laibu buppi thu laigil hi a, Solomon leh Shulamith kiteenna picingsak hi.

            A nuai a munte sungah, Solomon in bang tawh genteh hiam?  Songs 4:12,16;  5:1; 8:8-10.

………………………………………………………………………………………………………

            Solomon’ la sungah mi tampi in Angkawm lampang ah kiten masiah, siangtho mahmah uh hi. Tua thu kiptak a theihna pen, Shulamith a neulai pan kipan, a sang- gamte in, “kulh” hi ding maw “kongpi” na ci uh hi (Solomon’ la 8:8,9). A kiten dong siangtho ding hiam (kulh) leh mikim Angkawm suak ding hiam (kongpi)hi ding hiam? Nupi khangham khat a dingin, a pasal neih dong siangtho hileh “kulh hi ing” ci hi (Solomon’ la 8:10). A kiten dongmah siangtho hi ci in a mopa’n “ka lawmnu a ki umcip huan, a ki neituam tuinak” (Solomon’ la 4:12) na ci hi. Ama’ theihna tungtawnin ki itna bek tawh kiteen ding a lawmte tungah thuhilh tawntung hi. Solomon’ la sungah Shulamith in, “Jerusalem’ tanu te” tungah kiteen hun a cin mateng itna subuai lo dingin, thumvei sitset thuhilh hi (Songs  2:7; 3:5; 8:4).  Hoihtak in kam kiciamna tawh a kiten theih dong a cih nopna hi.

            La sungah a lawmpa in, amah tawh vakkhia dingin a nihveina sammah ta leh (Songs 2:7; 3:5; 8:4), kiteen masiah tua sapna sanglo hi.  Tu’n ahih leh, lawmnu in, ama’ huansungah sam a (Songs 4:16), mopa’n zong lungdamtak in sapna sang hi (Songs 4:10).  Monu pen midang aa hilo a, ama’ aa hi tawntung ding a ih manin, mopa lawp mahmah hi.  “Keima’ mo, ka neihsa, huan na hi a, midang dawnloh dingin a ki umcip tuinak” (Songs 4:12) na ci hi.   A picing hih numei tawh a kiteen manin, kamciam gam tung zahin ki ngaihsun hi.  “Na muk khuaizu bang in khum a, na leipan bawngnawi leh khuaizu luang hi” (Songs 4:11) ci liang hi.

            Angkawm vai ah a teelkhial a kisik mite adingin, bang thuhoih omlai hiam?  1 John 1:9 leh Ps. 103:12; Isa. 55:7; John 8:11 cih te saikaak in.

 

THURSDAY                                                              May 9

Piangsakpa Silpiak Kemcing

            Pasian in mihing pasal leh numei abawl lai in, ngiimna khat na nei hi (Gen. 1:26-28).  Ama’ lim leh meel suun a, ang kibanglo tegel in, kitenna tawh “sakhat” suak in, thumgawm Pasian a ki pumkhatna hong lak hi.  Pasal leh numei akigawm na uh hangin, Pasian’ mel a suun mi nungta a thak hong pian theihna ding lampi hong hi.

            Piangsakpa deihna bang a hilo, ang kizatna te, Lai Siangtho in koici muh hiam?  Siampi 20:7-21; Rom 1:24-27; 1 Cor.  6:9-20.

………………………………………………………………………………………………………

            Mi tungah Pasian’ lim leh mel suksiatna te Lai Siangtho in sang lohi. Tua bang ang zatna te nusia in, Angkawmna siangtho sungah Pasian in hong makaih hi.  Mihingte tung thupiang te Pasian thukham tawh a ki langdo ciangin, tua kha mawhna in zo cip hi.

            Khristian thu umte a dingin Angkawm daan leh a dangdang te a dingin bang lamlakna hong kipia hiam?  Rom. 8:1-14; 1 Cor.  6:15-20; 2 Cor. 10:5; Gal. 5:24; Col. 3:3-10; 1 Thess. 5:23, 24.

READ  ZSL 10: Mawh Pulakna pan Hehnep Thapiakna ah

………………………………………………………………………………………………………

            Thu umte in Khazih hongpai ni ciangin mawhna pan suaktak ding ngak gige uh hi. Upna tawh ngak gige uh a, Khazih’ sihna sungah si khawm in, Khazih’ thawhkikna sungah thokik khawm dingin ki um uh hi.  Tatsat lo thungetna leh kigin na in Kha Siangtho vangliatna ngahsak a,  mawhna pumpi singlamteh ah khai in, Zeisu’ nung zui uh hi.       Mawhna kisikte Pasianin maisak hi (1John 1 : 9). Nidang a zualzang mawhnei mite, thu um mite tawh kalsuan khawm dingin lungdamna thu in hong hanthawn hi.  Mihing te lakah Angkawm khialhna tampi khang ahih manin, pawlkhat te in kipuahphatna cing taktak ngah zolo kha thei ding uh hi. Pawlkhat te’n lah, Pasian deih loh Angkawm zualzanna sangin, nungak siangtho aa omte khawng teel zawsop kha ding uh hi.

            I pawlpi in ang kibang zangkhawm te tawh koici kizop tuak nasa hiam? Amau ang zatdaan eite muhna tungtawn in amau lungsim bangci omtuak nasa hiam?

 

FRIDAY                                                                  May  10

Ngaihsut Beh ding:

“Kiteenna in Khazih kiangpan thupha tampi sang a, siangtho tak a zat ding bek a hihi. Biakna maan taktak in Topa’ deihna tawh ki lehbulh lo ding hi.  Mihing te kitengin, innkuan suak a, vangnei tak in vantung innkuan limlak ding a, Pasianin hong deihsak hi. Khazih in ama nasep kipat tungin, Eden huan pan a piaksa thupha te piakik hi. Mopawi ah om ding zong amah’n niallo hi.  Tua mopawi zong siangtho tak, thuman tak a kibawl a hih leh mihing te tung a kipia a lianpen thupha a hihi.” EGWhite, Daughters of God, lai 180,181.

            Solomon’ la sung a om bangin ki itna tawh ang kizatna in ki tenna ah thu lamdang pi a hihi.  A kip a kho ding bel, puatham hoihna te hang hi zawlo hi. I pumpi teek in kiam ding a, anlim te, dianna te leh saphuk tawh ki puahphatna te in, i pumpi hoih tawntung sak zolo hi. Solomon leh Shulamith kiteenna in khantawn hi a, ki pum- piakna a hihi. Khat leh khat kei aa hi cih thumvei sitset pulak hi (Songs 2:16; 6:3; 7:10).

            A masa pen in langnih thukim tak a ki itna (Eph. 5:21,33) hi.  A nihveina in, numei in kipsakna tawh thukkik (Eph. 5:22,23) hi. A thumveina in pasal in numei a lunggulhna pulaak (Eph. 5:24-32) hi. Hihbang ki itna ki sumit zolo a (Solomon’ la 8:7), a kisia theilo thukip a hihi (Songs 8:6).

Kikup Ding Dotna te:

  1. Solomon in a zi picinna koici pulaak hiam? Solomon’ la 4:1-5, 6:8, 7:1-9. Adam in Eve a muhcil lai tawh saikaak in. Gen. 2:23. Pasal te in zite tawh koici kizop tuak nasa hiam? Eph. 5:28.
  2. Pawlkhat te’n Solomon’ la sungah, Pasian leh mite kikal, Zeisu leh a pawlpi kikal ah mihing pumpi zang a thu gentehna omsak uh hi. Khengval liang a genteh ding a hihloh hang, hih mi nihgel kikal thu tawh ei leh Pasian kikal thu kizopna koici saikaak thei ding i hi hiam?  Isa. 54:4, 5; Jeremiah 3:14;  2 Cor. 11:2.
  3. Pro. 31:26, Solomon’ la 5:16 leh Pro. 25:11 simin. I kampau na tawh i zi balzan gawp a innkuan susia; a hih kei leh pahtawi gawp in innkuan lamto cih khawngbangzah thupi hiam?  A nuai a te simin gen in James 1:26; 3:5-11.

Tags: ,

Admin

Admin

Top