Laaitui Khua Lungdamna Thu Tangkona
1973 KUM LAITUI LUNGDAM THU TANGKONA
-Reported by Kenneth Suananang
28 Mar 73: Lian Huai, Kam Uap ka tanute nih le ko nupa Buanman pan ding khia in Tonzang ahka kikhin uh hi. 1972 kum in Tonzang Effort bawl lak ah kihel ka hi man in pawlpi kem ding inong kideih ahi hi. Tonzang pawlpi kip sak dingin Pastor Elisha Paul (UMM President) le Pastor V. Kipzanang (Tedim/Tonzang Circle Leader) hong pai uh a, 7 Apr 73 (Sabbath) ni in mi 59 kakikhawm uh a, pawlpi mi dinhmun a zui zo lo mi 9 disfellowship a kibawl khit ciangin a om laimi 38 tawh Tonzang pawlpi kip sak na kinei hi.
16 Apr 73: Lian Huai kum 2 le kha 7, Kam Uap kum 1 le kha 4, Thang Pau gilsungah kha 7 val,sibua lai lai, Laitui effort bawl ding, Tonzang ah lah, gam dang ahih liang lo hang lengla tang kisa mah mah lai, ka tun zawk sawt nai het lo, Thuklai pan Tiddim ah ka van tungsa teng Tiddim pan Tonzang ah 10 Apr 73 ni va la, tui zong innpi kong pan tawi kul, buai huai mah mah kawmkal ah Laitui Effort bawl ding thu om ahih man in lawp mah mah in, 16 Apr 73 ni in Tonzang pan ka ding khia hi. Ka zi in cik mah hun in, “Hih bangin bangci hong nusia ding na hiam ong cingei lo ahih manin Pasian ka phat hi.
17 Apr 73: Saya Langh Sawm Mang pen Tiddim ah om hi. Pastor V. Kip in Laitui ah zintunhmun, tangkona ding mun le kisapna tuam tuam a van khol dingin Saya Mang le kei hong pai sak hi. Tiddim pan 1 p.m. in ding khia ka hih man un, zingan nek lah, sawt khin, nitak annek lah hunnai lo, Khamtung ta in ‘lunch-dinner-sun-an’ ci ngakngak zong kinei mel lo, ih kam in zinghuannitak huan hih pah malam ahih man in Lamzang tung pan gilkial tuak mai e, ci in Laamzang ah2 p.m. pawl in niangtui sai ah mok-kan le bawngnawi hai 3 ta K3.50 man tuak ka ne ka dawn uhhi. Bawngnawi lah hai taw lam ki mu thei dek in ciim pian ahih ciang, nawi hai 3 tak ci in nazumnui phial uh zong in, lamto ka kah uh ciang gilkial pukhong in lam ka pai zo kei uh a, nitak nai 8 in Laitui ka tung pan uh hi. Pai ngei na hi lo in, zintun nading dot tawm tawm ahi lai hi.
Sayama Thian Cin Vung (midwife – tu’n Mrs. Kam Za Thang) inn ah ka tung uh a, a nu, Pi VumKhaw Cing in om pih ahih manin, ka pute inn ah ka hawh zel bang hong phawk sak phial hi. Anhong huan tawm a, anlim pen pen ahi mai hi.
18 Apr 73: A zingsang ciang in ak hong gawh (go) a, annek ding ciangin, “Pi ak hong ngawliang maw, lungdam ta a, ahihang ko aksa zong ne meal ba ve ung,” ka ci khem hi. A taktak inaksa ne lo hi lo, duh lua kisa napi, gawlmeek ahih ding ka lau uh hi. Ka pi in, “Ngawngmeak tuum nu? Ko ak ngawng meak ngei ba ve ung, ngawng at vateak khu zam ve, ne vo,” hong ci a,lungdam ei ci in ka ne ngam pan uh hi.
Khuasung thu zong ka dawp uh a, Pa Zam Za Kham pen Anderson hun a, Adventist suak sa hi a,a makpa Thuam Kam in zong tulai thuman lunggulh hi ci in ka za uh hi. Khuasung ah inn zonghoih pen, Pa Lian Khan Thang ka hoh pih uh a, inn zat ding phal tak in hong pia hi. Zintunh nang State Middle School headmaster U Ngen Za Dal (Vangteh) in Tan 8 sangpi ah zintunh nang hong phal leuleu ahi ciangin Pasian ka phat uh hi. Ka kithuah pih ding te zong amasa pen te nitak nai 3, anunung pen te nitak nai 10 in hong tung uh hi. Pastor V. Kipzanang (circle leader, makai), SayaThankhuma (Kaptel kual saya), Saya Kenneth Htang Suanzanang (Tongzang kual saya), SayaLangh Sawm Mang (Tedim Station Zum), Saya Sangvunga (Buanman Kual saya), Sayama NianKhan Man (Mualkawi), Miss Cing Za Don (a) Donno, ahi hi. Man ciangin Saya Thang Khan Dal(a) Daltawng in Laitui pawlpi kem hi.
19 Apr 73: Tuzing sang pawl 4 kikhen in khualhilh innlak ah ka vak uh hi. Laitui pen Khamtungkhua lian pen pawl hi a, inn 409 pha hi ta leh, innsim a siik kim dingin ka hanciam uh hi. Pa Lian Khan Thang inn ah nitak ciang kikhop ka kipan uh a, mi 500 sang tawm zaw lo inn dimlet in hong pai uh hi.
20 Apr 73: Tu nitak zong mi 500 sang tawm zaw lo hong pai uh hi.
21 Apr 73: Tu nitak mi 400 val deuh hong pai uh hi. Mi tawm hong kiam hi.
22 Apr 73: Tu nitak mi hong kiam a, 200 bang hong pai lai bek hi.
23 Apr 73: VBS ka kipan uh a, mun khempeuh ah makai kawi kawi ka hih man in Laitui VBS zong keimah ong ki makai sak hi. Tu nitak zong mi 200 kan hong pai nawn lo hi.
24 Apr 73: Tu nitak guah tam lua mah mah ahih man in tangkona ki bawl thei vet lo hi.
25 Apr 73: Tuni zong guah tam lai a, tangkona ki nei thei hi napi, mi 100 bang bek ong pai hi.
26 Apr73: Tu nitak mi 200 val ong pai kik ahih ciang Pasian ka phat uh hi. Inn lam lung hihmawh ka hih hang Nu Dim in lai ong khak a, ko dam ung, ong lung hihmawh ke’n ong ci hi.
29 Apr73: Tu nitak zong mi 200 val ding ong pai kik a, lungdam in Pasian ka phat uh hi. Nu Dim in 21 Apr 73 a lai at khat ka ngah a, Lian Huai le Kam Uap neu lai, Thang Pau suak dek tahi a, ‘Ko cidam ung, innlam lung hi mawh ke’n. Topa’n nasepna ah zawhna ong pia ta hen!’ ciin lai ong khak a, ong lung nuam sak hi. Telephone cih te tua lai hun in ki mangmat nai lo hi.
30 Apr 73: Tu nitak ‘The Mark of the Beast – Sapi ciamtehna’ kihilh a, mi 300 val in thu ongngai uh hi.
1 May 73: Thungai mi 200 bang lak pan 46 te in pulpit pan zolna ong sang uh hi. Zingsang naikhat ciang ka lum thei pan uh hi.
6 May 73: Kei lai ka at man lo hang Nu Dim in Post Office pan in lai khat hong khak leu leu a,naute tawh cidam ung, ong lungkham ke’n. Topa’n ong panpih nang thu kong nget sak hi,” hongci hi.
7 May 73:Tuni nitak 1:30 pm pan 3:00 p.m sung Pa Zam Za Kham te inn ka phiat uh hi. Tuamah bang in nitak 6:30 pan 7:30 pm kikal Thuam Kam te inn ka phiat uh hi.
8 May 73: 7:30- 8:30 am sung Pa Lian Khan Thang te inn ka phiat uh hi. Nitak lam Aisaan thei Siampu Pa Kam Gin inn phiat in song, dawi biakna khempeuh ka haltum khin uh hi.
9 May 73: Tuni Pa Kam Gin kiang ah aisaan nuam a pai om ahih hangin, ama’n aisaan nuamnawn lo hi. Tuni zong Nu Dim in “Ko cidam ung, Pasian in zawhna ong pia hen,” ci in ong laikhak ka ngah leu leu a, Topa tungah ka lungdam hi. Ka lawm te’n lai ngah om lo ahih man inciamnuina in ong ki nei a, lai khak ka ngah ciang zong maizum dan in ka la kha lai hi.
10 May 73: Tu nitak kikhopna ah mi 32 in Sabbath tang ning ci in ong ding uh hi.
11 May 73: Tu nitak mi 50 val in Pastor V. Kip ‘appeal-zolna’ sang uh hi.
12 May 73: Pa Lian Khan Thang kiangah sum khek ding ong pai om a, Sabbath ahi cianginPa Lian Khan Thang in sang lo hi. Tuni mi 11 tuiphum ding in kiging napi 9 bek ong kiphumtak tak hi. Nitak kikhop man ciangin RCM father khat makai in hong nial uh hi. Debate-Thukinialna ki nei a, Siapi Ngen Za Dal (RCM) in, “Hong zo dik dek mawk uh ciai,” ong ci hi. 2:30am ciang in lupna ki zuan thei pan hi.
13 May 73: Pa Zam Za Kham tapa Vum Do Lian dawivei dan a dam lo, mi bang lo penin “American te zan zan” ci den pong hi. Pa Zam Za Kham inn, “Dawi in zangh a, ei bulpite konuam pha deuh hi,” ci hi. Thunget ciang in a sungah a teng dawi patau in innkiu, beem kawmkhawng ah ciip in bu liang hi. Thunget khit ciang ka ciah uh a, nitak 4:30 in Tiddim ka tung kik uh hi.
Laaitui Khua Lungdamna Thu … by on Scribd