Lesson 5                                                       *April 25–May 1

Laisiangtho Bekmah: Sola Scriptura

 

Nipini (Sabbath) Nitaklam                                            April 25

Tukalsung Simding:  1 Corinth 4:1–6; Titus 1:9; 2 Timothy1:13; Maku 12:10, 26; Luke  24:27, 44, 45; Isaiah 8:20.

Kamngah: “Pasian thu nungta-in a gamtaang hi a, langnih a hiam namsau sangin hiam zaw lai hi. Kha le lungsim, guh le tang kituahna, guh le guhngeek dongin khenkhia thei hi. Mihingte’ lungsim ngiimna le ngaihsutnate zong theithei hi” Hebrew 4:12.

            Protestant-te in “Laisiangtho bek” ci in, a upna thuthuk(theology) uh Laisiangtho bek bulphuh uhhi. Roman Catholic upna in Laisiangtho le ta’ang upna ngeinate gawmkhawm uh hi napi, Protestant-te in, upna lamsang peuhmah “Laisiangtho bek” bulphuh uhhi.

            Protestant-te kipuahphatna le kumtampi thumanlo ahilhhilh Rome a langdo ngamna thubulpi in Laisiangtho mah ahi hi. Laisiangtho letkhia a kineihna, khiatna kibanglo khawng omsak gawp uh hi napi; Protestant biakna puahphate in, gramma le tangthu entel phot in, kuhkal takin, khiatna maantaktak hong neisak uhhi.

            Tukal sungtengin sola Scriptura a cih uh Laisiangtho bekmah cih i sin ding uhhi. Laisiangtho bek i cihteh, Laisiangtho bul-et mahmah a, Pasian’ kammal i teltheih na’ng a kisam phadiakte i sin ding uhhi.

 

Nimasani (Sunday)                                                                           April 26

Laisiangtho in Ki-ukna Dinsan

            Seventh-day Adventist-te pen, acil pan kipan, laibu’ mi, Laisiangtho umngiat Christiante ci in kithei hi. Laisiangtho bek i cih takmah in, Laisiangtho bekmah i pahtawi hi. I upna le biakna vai khempeuhah Laisiangtho bekmah i dinsan ahi hi. Biakna ah phutkhakthu, mi’ ngaisutdan, ta’ang upna cihtepen, tua Laisiangtho nuai ah dinsanneute ahi uhhi. Pawlpi in, Laisiangtho pualam pan upna tuamtuam leh khiatdan tuamtuamte a omlohna dingin, Laisiangtho bekmah dansanpi in a kipahtawi hi.

            1 Corinth. 4:1–6 sim inla, adiakin 6na, Paul in “akigelhna khengval” in pailo ding hi hang. Hihthu in i upna adingin banghang thupilua hiam?

…………………………………………………………………………

            A kigelhzah khengval pailo ding cihteh, munluite tokik a thupiangsate theihkikna kihel lo hi. Tua bangte in, i Laisiangtho kammalte khuavak hongtaan in, hong telsak zawsop hi. Khanglui kammal laibu, dictionary bu, Laisiangtho thulu zon-olnabu le Laisiangtho khiatna laibute zong a khengvalte lakah kihello hi. Tu a i laisiangthobu a letkhiate’n zong, muhdan tuamtuam, science lam khawngleh thudang tuamtuam tepan huhna la uhhi. Tua huhna tuamtuamte zong, Laisiangtho dinsan tawh a kituak hiam cih sittel phot kullai hi.

            Laisiangtho bekmah upna in kiplet leng, upna lamah buaina khatpeuh a om ciangin, thuman Laisiangtho leh mihing’ ta’ang upnate khentel i siam ding hi. Laisiangtho sung kigelhte khengval peuhmah paise dah lelni. Christian mantaktak Ahihna le lungdamthu tawh mite i zawh theih na’ng in, Laisiangtho bekmah kiplet ding hihang.

            “Laisiangtho in leitungah upna le lai kigelh dang khempeuh ii bulpi taktak ahi hi.”—Martin Luther, Luther’s Works, vol. 32: Career of the Reformer II, ed. Jaroslav Jan Pelikan, Hilton C. Oswald, and Helmut T. Lehmann, vol. 32 [Philadelphia: Fortress Press, 1999], pp. 11, 12.

            Sawltak 17:10, 11 simin. Atung a i gengente tawh kisai, hih Laisiangtho munin bang peuh gennei hiam?

 

Ninihni (Monday)                                                                April 27

Laisiantho a Kipumkhatna

            Laisiangtho in amah le amah “Pasian humuap” kici hi(2 Tim. 3:16). “Kamsangte’ deihdan a kiletkhia mawkmawk hi hetlo a, Pasian in Khasiangtho tungtawnin a piak bangbang hi zaw hi” (2 Pet. 1:20, 21). Pasian in  Laisiangthobu laikungpu hi na cih nakleh, tua Laisiangtho sung om thu tuamtuamte a bul taktakah kipumkhatna nei ahih lam na phawk ding hi.

            Titus 1:9 le 2Timothy 1:13 simin. Eite’ upna adingin Laisiangtho kipumkhatna in banghangin thupi sese hiam?

……………………………………………………………………………………………………………………………………………………

            A piapa Pasian ahih manin, asungtawng mahmah kipumkhat ngiat hi. Laisiangtho in ki pumkhatna neikei mawkleh, i upna zong kipumkhat theilo ding hi. Laisiangtho kipumkhat keileh, pawlpi in zong thuman le thuzuau a khentel siamna’ng haksa ding hi. Ki-ukna bulkip neitheilo ding a, Pasian’thupan a pialkhiate puahphatna neitheilo ding hi. A gualzawhna thabei in suahtakna vanglian neilo ding hi.

            Zeisu le Laisiangtho laikungpute in, Laisiangtho ki pumkhatna le Pasian’ piak ahihna genpha mahmah uhhi. Tua tawh kisai in, Laisiangtholui kammalte a zatkikna uh ih en dinghi (Rom. 3:10-18 sungah, Paul in, Laisiangtho kammal ci in, Thuhilhsia 7:20; Late 14:2, 3; 5:9; 10:7; le Isaiah 59:7, 8) cihte zang hi.

            Laisiangtho laikungpu khempeuh in, tualaite khentuam theih ahihlohna, anung amai akilem dimdiam thu thupite vive ahihna honglak uhhi. Laisiangtho lui leh thak kikalah, ki thutuaklohna ompeuhmah lo hi. Laisiangtho thak in lungdamna thudang leh biaknathak khawng hong hilhlo hi. Laisiangtho luipen Laisiangtho thak in telkheh a, Laisiangtho thakin Laisiangtho lui tungah kilam hi. Tuabangin anih tuakun kipanpih in khuavak kipiatuak uhhi. Laisiangtho sungthu khat peuhpeuh i sin ding ciangin, a ki pumkhatna phawkin, bulneilo thudangte khawng bulphuh lozaw ding hi hang.

            Laisiangtho munkhawng a ki kingkalh dan khawng hong omteh, bang i cih diam? Koibangin i lemtuah thei diam?

 

Nilaini (Tuesday)                                                                   April 28

Laisiangtho Thu Kician

            Laisiangtho’ thu kician mello hileh, Laisiangthobek cih ding zong thangahhuai mello hi.

             Mate 21:42; 12:3, 5; 19:4; 22:31; Maku 12:10, 26; Luke  6:3; Mate 24:15; le Maku 13:14 cihte simin. Zeisu in Laisiangtho’ thute kician mahmah ahihna, bang gen phapha hiam?

 …………………………………………………………………………

            Laisiangtho’ tecipante kician mahmah: kicingtak le kiciantak in hong hilh hi. Mun tamzawte ah, naupangte leh picingte’n zong a kikim in, tua Laisiangtho hilhnate kitelzo hi. A thukzaw pilna le theihna neihtheihna’ng zong tampi omhi. Laisiangtho khiatna khawngpen biakna tawh akituak ding phalna cihbang kullo hi. Thu ummi khempeuhin a teltheih ding thupizaw hi. Laisiangtho khia ding khawng siampi tawmno teelkhiat sangin, thu-um khempeuhin khiazawleh hoihzaw hi. Tua a hihmanin, eimau mimalin, Pasian’ thupuak i teltheih na’ngin, Laisiangtho kantel ding i kihan- thawn zaw hi.   

            Laisiangtho laikungpute in, “a kiptawntung Laisiangtho’ thute peuhmah in, lim kiciankhat hong laktuam a hihkei nakleh, laimal ombang, laigual ombang lianlian a khiat ding hilel hi. Asung tawngah akiseel khinkhian, amuu, athuthuk, telzawh lohthute pulaakna dingin a hawng khehtawm cihbang khawng omlo hi.”—Handbook of Seventh-day Adventist Theology [Hagerstown, MD: Review and Herald Publishing Association, 2000], p. 65. Laisiangtho kiciatna pen a kampau, a deihna le a laimalte mahmah tawh kizom a, laikungpute’n zong amau deihbang, acing akem omlo a, mawtgelh hetlo uhhi.

            Khatveivei ciang, ei’ lungsimin a batzawhloh le telzawhloh zong omkha sop ding hi. Pasian’kammal hi a, eilah a puuksa mihing i hilel hi. Eite theihloh phamawh mahmahte, a diak in hotkhiatna tawh kisai limlim bangpen kician kitel mahmah lelhi.

             Na telloh khawng a omhunte ngaihsunkik inla, nungtelkik sawmin. Nang phutkhak thute hangin, nangmahbang a tello midangte koibangin nahuhthei diam?

 

Nilini (Wednesday)                                                              April 29

Laisiangtho in Laisiangtho Letkhia

            Abulpi tawphah kipumkhat ahih manin, amah leh amah kiletkhia thei hizaw hi. Tua bang ki pumkhatna lotawh, ama’ khiatna amah’n khia theilo ding hi. Mun khat ii khiatnate, mundangkhat ah kipulaak ahih manin, a kitelzaw dingin amah leh amah kikhia thei kici hi.

          Luke  24:27, 44, 45 simin. Zeisu in, Amah kua ka hi ci in Laisiangtho sungpan genkhia hiam? I Laisiangtho zatdan ding bang hong hilh naci hiam?

…………………………………………………………………………

               Laisiangtho amah le amah kiletkhiatna le Laisiangtho hoihna hong musak hi. Tua bangin Laisiangtho munte deidan hetlo in, ei’ khiatdante thuman cih lakna dingin khuikhawm zel ding hihang. Laisiangtho kammalte hoihtak ngaihsunpha zaw in. Mun khat peuh khiatna lapaklo in, tua kammal omna laibu zong i ngaihsut kul hi. Paul in (Rome 15:4) sungah “Laisiangtho sung thu-om khempeuh pen eite thuhilh nading” tuate khempeuh i simphat nading a hihi.

            “Laisiangtho sungah Thu akim dildel in kigelh a, Laisiangtho le Laisiangtho mah tehkaak ding ahi hi. Tua kammalte a huamin en ding a, a kizopnate zong i en ding hi. Pasian in leitung ading a ngiimna bulpi, kidona lianpi ngiimna le hotkhiatna ngiimnate khempeuh i sin ding hi” —Ellen G. White, Education, p. 190.

            Laisiangtho le Laisiangtho mah i tehkaak dingteh, Laisiangtho mah hoihtak sim masa in. A hihtheihleh, alaibu bulpi ahi Hebrew le Greek encian leng hoihpen hi. Laisiangtho telsem nading in laibu bulpi kisam lianglo hi napi, phattuamna omtaktak thei hi. Ahihkei lehzong, thungetna, kiniamkhiatna leh ki-aapna taktawh laisiangtho i sim leh gahpha gah takpi ding hi.

            Upna thukhunkhat lungngai in, misite omzia cihbang, Laisiangtho mun pawlkhat teelkhia lecin, adang nateellohte hangin paikhialhna omthei hi. Thulu khattawh kisai mun ombangbang kaikhawm in simna banghangin thupi mahmah hiam?

 

Ningani (Thursday)                                                              April 30

Laisiangtho Bekmah le Ellen G. White

            Isaiah 8:20 simin. Laisiangtho pen “thukham le teci panna” ci in pahtawi dending banghang thupi hiam? Laisiangtho a suaklo kamsang pawlkhatte banghang hiam?

……………………………………………………………………………………………………………………………………………………

            Laisiangtho bek i cih ciangin, SDA te’n, Pasian’ humuapna mahtawh hun nunung a beibaang pawlpi ading thupuak apuaknu, Ellen G. White tawh kisai dotna omden hi. Ama’ laigelh teleh laisiangtho koici kizop hiam? Ama’ laibute apuathambek simpak lecin zong, Laisiangtho mah siksanin, bulphuh tangtang hi. Laisiangtho mahin thukhunpi, upna leh gamtatna khempeuh bulpi hi ci in gentangtang hi (Kidona Lianpi, p. 595).Tua banah Protestantte in Laisiangtho bekmah pahtawi ahihna zong pulak tawntung hi (Kidona Lianpi, p. 9).

          EGWhite in amah le amah akigenna ah, ama’ laibute pen “khuavakneu hi a, khuavak lian ah hong makaih ding” (The Advent Review and Sabbath Herald, January 20, 1903) ci hi. Ama’ laite in Laisiangtho mun kheek ngeilo ding hi. Amah’n “note in Laisiangtho na telcian kei uh hi. Pasian’ kammal hoihtak simin, Christian picinna lunggulh hile uhcin, Pawlpi Thulamlak na kisamkei ding uh hi. Note in, Pasian’ kammalte awlmawh bawllo nahih manun, Pasian in Pawlpi thulamlak hong pia ahihi.—Ellen G. White, Testimonies for the Church, vol. 2, p. 605.

            Tuabangin ama’ laigelhte i pakta ding hi. Laisiangtho laikungpute mahbangin Pasian’ humuapna mahtawh a saan ahi hi. Ama’ laigelhte pen Laisiangtho behlapna in nei mawkmawk lozaw in, Laisiangtho kihilhcianna hizaw hi. Laisiangtho kheek sawmngei hetlo hi; upna le gamtatna a ding thubulpi in laisiangtho hi ci tawntung zaw hi.

            EGWhite nasepnate sungah, genzawhloh hamphatna lianpi i nei hi. Laisiangthobu Amah’n a laptoh mahmah laitakin, eite’n zong, ama’ kiangpan bang khuavak lamdang i ngah thei ding hiam?

 

Kiginni (Friday)                                                            May 1

Ngaihsutbeh ding: The Handbook of Seventh-day Adventist Theology, laibu sung Laisiangtho khiatna acihna ah, “Laisiangtho in amah le amah kiletkhia” ci hi. Laisiangtho kammalte aki thutuahna le a kiciat mahmahna, pp. 64–66. Chapter 20 sim lecin, “Laisiangtho hilhna le Kisinna,” Education, pp. 185–192; “Laisiangtho kammal thupipen” Selected Messages, book 3, pp. 29–33.

            “Laisiangtho sang naupang limlim, laisin nopna lungsim guan ngiat ding hi. Laimai simin en ngiatngiat ding a, ei ngaihsutna a kiptheih na’ng peuh hizaw lo in, Pasian in  bang gen hiam cih theih na’ng hizaw hi. Hong piapa Khasiangtho panpihna bekin laisiangtho hong teltaktak sak ding hi. Tua theihtelna ngah in nuntakpih ngiat in. Pasian hong sawl khempeuh i mang ding hi. Laisiangtho naksim lecin, hanciam tak a Pasian’ na sepna le lungduaina hong guan ding hi. Suangtote in, leisung kham a tawh uh mahbangin, lungsimtakpi le lungkialo in Pasian’ kammal thuthukte i zong ding hi.”—Ellen G. White, Education, p. 189.

            “Laisiangtho pen an le tui in nei in, tatna hekna ah bulphuh lecin, Pasian kiang panin ngaihsutna hoih khatpeuh nangah khading hi. Tua kammalte, note’ maiah tuni in, ka pahtawi hi. Kei kammalte ciinkiikna lel ‘Sister White in hi cih, Sister White in hia cih’ cikei unla, Israel’ Pasian in  bangci a bang thu hongpia cih zongzaw un.”—Ellen G. White, Selected Messages, book 3, p. 33.

 

Kikupding Dotnate:

1. Mi tampi in, Laisiangtho buppi in abangci hilozaw in, teeltuam pawlkhatpeuh simlel uh ahih manun, bang upkhialhna peuh neithei uhhiam?
2. Matthew 11:11 simin. Zeisu in tuiphum John vai a genna ah: “Leitungmi khempeuh sung pan tuiphumpa John a lianpen ahi hi. Ahi zongin vantung ki-ukna sungah aneupen i cihte nangawn John sangin lianzaw lai hi” ci hi. Laisiangtho a gelh hetlo kamsangkhat Zeisu in hong pulaak hi.Laisiangtho sung laibu khatzong a neilo pa in, kamsang taktakmah hithei veve cihthu koibangin hong theisak hiam? Hihthu panin SDA te’n bang thupuak i ngahkha hiam?
3. Laisiangtho bekmah a ci, ei SDA bek i hi hetkei hi. Pawlpi dangte in zong citek uhhi. Hi napi, pawlpi dangte in laisiangtho sungpan mahin, doctrine tuamtuamte koi bangin mukhia thei hiding uh hiam?