Lesson 4                                                             *April 18–24

 

Laisiangtho: Biaknathu Khempeuh Bulpi

 

 Nipini (Sabbath) Nitaklam                                                 April 18

Tukalsung Simding: Mark 7:1–13; Romans 2:4;1 John 2:15–17; 2 Corinth 10:5, 6;  John 5:46, 47; John 7:38.

Kamngah: “Thukham le teici panna bangin Amaute’n a genkei uhleh, amau’ sungah khuavak a om kei hi” Isaiah 8:20.

            Upna thubulphuh dingin Laisiangtho a zanglo Christian pawlpi omlo hi. Tua kawmkal mah ah, pawlpite’ Pasian thuzuihdaan kibanglo veve hi. Laisiangtho zatdaan pen pawlpi khat le khat kibang keeilo hi. Tua bang a Laisiangtho khiatdaan kibatloh theihna thubul nga en ding hihang: ta’ang upna, phutkhak thu, minam ngeina, ngaihsutna le Laisiangtho mahmah ahi uhhi.

            Hihte in pawlpi simin Pasian’ thu saandaan huzap mahmah hi. I ta’ang upna le minam ngeinate i nei ciat hi. Phutkhakthu tampite le ngaihsutdaan, theihdaan tuamtuamte zong i neilai hi. A khinkhai thei dingin lungsim zong nei hihang. Laisiangtho zong nei in, Pasian’ thu i tel semsem nadingin simciat hihang.

            I Laisiangtho khiatna ah, a tunga teng lakpan koipen in hong huzaappen hiam? I neih masak huzaapnate in, i Laisiangtho khiatdaan leh i Pasian’ thu zuihdaante ah hong makaihpen hi.

 

Nimasani (Sunday)                                                                         April 19

Ta’ang Upna

            Ta’ang upna zong sia samlo hi. Thu beisate kizomto thei in, mantakin nakisem hiathiat thei hi. I bulpi tawh hong kizomkipsak hi. Hih ta’ang upna in, biakna sungah a thupi mahmah khat hi napi, lauhuaina zong pawlkhat omlai hi.

            Mark 7:1–13 ah Zeisu in leitung ta’ang upnate bangcidaan in genhiam?

…………………………………………………………………………

            Zeisu’n a phutkhak ta’ang upnapi pen Jew mite lakah a khangkhang in Siate pan sangnaupangte tungah kihilhsawn uhhi. Zeisu’ hunlai in, Laisiangtho tawh kikimin omsak uhhi. Tua ta’ang upnate in hun sawtpi la in, thu-nengnono tampi takmah Laisiangtho ahuh dingin behlaplap uhhi. Hih mihing’ ngeina lelte, biakna makaipite “upate” in pibawl mahmah taleh (Mark 7:3, 5), Pasian’ thukham tawh ki zakim theivetlo hi (Mark 7:8, 9). Mihing’ ta’ang upna ngeina hipeuh a, “Pasian’ thu pampaih uhhi” (Mark 7:13) cilel hi.

            1 Corinthians 11:2 le 2 Thessalonians 3:6 simin. Pasian’ kammal leh Mihing’ ta’ang ngeina koibangin khentel thei ding hiam? Tuabang khentel ding banghang thupi hiam?

…………………………………………………………………………

            Anungta Pasian’ kammal in, amah zahtak theihna le cihtakna hong guan hi. Hih cihtakna in ngeina khatin kipsuak hi. Eite’ cihtakna in, a kammalte tungtawnin a deihna hong pulaak den, a nungta Pasian tungah thumaan ding deih hi. Mihing’ ngeinate khempeuh tungah, Laisiangtho in makaih tawntung hi. Ta’ang upna ngeina hoihpente tungsiahah Laisiangtho omlai hi. Pasian’ kam mal hang a hong piangkhia ta’ang upna ngeinate nangawn, Laisiangtho tawh taihphot lai ding kisam hi.

            “Ta’ang upna” cih thulu nuai ah, pawlpi’ septheih ding bangteng a omtam maw? Laisiangtho le ngeina khentel theihding banghangin thupi kici thei hiam?

 

Ninihni (Monday)                                                                April 20

Phutkhak

            Romans 2:4 le Titus 3:4, 5 simin. Hoihna, thuakzawhna, mawhmaisakna, migitna le Pasian itna koici neihtheih ding ihi hiam? I upna pen, muhtheihloh lungsim pilna maimai hilozaw in, ih phutkhak taktak ahih ding banghang thupi hiam? I phutkhak thute in Laisiangtho tawh a kituak khollo in, i upna khawng hong lampialsak theihdaan gen in.

…………………………………………………………………………

            Mihing i hih phot nakleh phutkhak neih dingmah ahi hi. I ngaihsutna le lungsim sukha mahmah hi. Pasian in eite hong piansakcil limlim in, Amah tawh kizom ding le phutkhak sate hangin i omziate piang ding ahihi.

            Pasianin, mikhat leh khat kizop ding, la le tumgingte, piansaknate’ hoihna le Ama’thu sungah suahtak lungnopna ngahding in hong deihsak hi. Eite biakna le upna in thukhunte leh khensatnate sangin thupizaw hi. I phutkhakte in, Pasian i muhdan le a kammal i teltheih na’ng hong huh hi. Pasian’ deihna i theih ciangin, eite’ muhna kiciangtanhlua le cingtaaklo lua ahihna i telsemsem ding hi.

            2 Corinthian 11:1–3 sungah bang vauna omhiam? Eite’ theihna ciang lellel a muan takcinlohna bang hong hilh hiam?

…………………………………………………………………………

            Ei’ theihna ciang lellel muanhuai vetlo hi. Theihna cihzong a munmun tawh kisai hi. Laisiangtho tawh taihphat dending a hihi. Khatveivei teh, Pasian’thutawh a kituaklopi khawng ki thei gawpgawp nuam hi. Ei’ theihna le ei’ deihna khengin, Pasian’ kammal muanzawk kisinhuai hi. Ei’ phutkhak le theihna pen, Laisiangtho kammal tawh a kitukalh lohna ding in, i kikep siam mahmah kul hi.

            Pasian itna le mihing itna (Mark 12:28–31) cihte gelin thukham kitomlakna hi a, thupi mahmah hi. Tua ahih manin, eite’ phutkhakthu le theihthute, Pasian’kammal tawh taihden ding banghangin thupi hiam?

 

Nilaini (Tuesday)                                                                  April 21

Minam’ Ngeina

            Ngeina khatpeuhpeuh sungah i kihelciat hi. I ngeina in hong huzaap mahmah hi. Kuamah suaktalo hihang. Laisiangtholui hun Israel zong akimkot a minamte’ngeinate in huzaap in kisia uhhi. Tulaitak in eite kikheel a, i hoihzawkna banghang hiam? Pasian’ kammalte pen, mihing’ ngeina namkhat sung khawng a kipia hi napi, hi ngeina hiding cih ciangtanh bel omtuanlo hi. A ki-pelh theilo ngeina’ huzaapna in, i Laisiangtho teldaan zong hong huzaap hi. Laisiangtho in, leitung minamte, gamliante leh mihing’ kizopna cihte khempeuh hong piankhiatna bulpi hi cihzong i phawk zel dinghi. Laisiangtho in, mihing’ ngeina khengval ahih manin, tua ngeinate’ lakah a om mawhnate puahphat sakthei hi.

            1 John 2:15-17 simin. John in, leitung nate itluatloh ding a cihteh, bang a cihnopna hiam? Leitung mahah teng napi hangin, koibangin, leitung lungsim i neilo thei ding hiam?

……………………………………………………………………………………………………………………………………………………

            Hong piansaklai a, Pasian deih ngeina pen mawhna in susia hi. Tua pen, Pasian thukhenna nuai ah omlel hi. I ngeina pawlkhatbel i upna tawh kituak bilbel hi napi, hoihtak khentelsiam mahmah kul hi. Laisiangtho upna tawh a kituaklo ngeinate hangin, a kituak ngeina khawng bawl tawm kulkha ding hi. Tunglampan hong tuaksukpen mah i letkip keileh, i gei a omkhatpeuh i lenkha ding hi.

            EGWhite in zong anuai a bangin hong hilh hi: “Khazih’ nungzuite in leitungte thukhun le lunglutte pial ding a, ahih hang, tuam ompah ding zong hi tuanlo hi. Hong Gumpa in, mite lakah vakihel hi napi, Pasian’ deihna peuhmah neusak hetlo in, pahtawi denzaw hi.”—EGWhite, Counsel to Parents, Teachers, and Students Regarding Christian Education, p. 323.

            Na ngeinate uh koibang tengin Laisiangtho tawh kitukalh hiam? I upna hong suksiat sakthei tua ngeinate langkhatah, bangci bangin kiptakin dingtang thei ding hiam?           

 

Nilini (Wednesday)                                                              April 22

Thu Ngaihsun

            2 Corinth 10:5, 6; Paunak 1:7; 9:10 simin. I lungsim sungah Zeisu’ thu manhna banghangin thupi hiam? Banghangin Pasian kihtakna in pilna kipatna hithei hiam?

…………………………………………………………………………

            Pasian in thu-ngaihsut theihna hong guan ngiat hi. I hek i tatna i biakna vaite, ngaihsutna tawh thukhup ding hong deih hi. I upnate zong ngaihsut zawhlohthu hi tuanlo hi. Kum zalom 18 hunsungin, biakna khanlawhna hong piang a, leitung nitumnalam phadiakah, ngaihsutna thak hong ngah uh hi napi, thukhupna hoih tawh hong khupthei uhhi.

            Theihna peuhmah pen mite’n a phutkhakthu-te pan hong piang cih upna om a, mite’ ngaihsutna in pilna bulpi hi aci zong omuh hi. Hih muhdan pen, ngaihsut bang a piang acite hi a, thumaan pen ngaihsuttawm theih hivetlo, pilna pen ngaihsuttawm theih ci uhhi. Thumaan in om gige a, ngaihsutna tawh i pomding kisam hi. Hih thu in mihing’ ngaihsutna pen thumaan tehna suaksak hi. Pawlpi’ thuneihna le Pasian’ kammal Laisiangtho’ mai-ah kuun ma in, mihing’ ngaihsutna mai ah kuun masak dingdaan hihtuak hi. Mihing’ ngaihsutna sungah a kician mello peuhmah kipaikhia lianlian hi. Tua bangin Laisiangtho mun tampi maiming saklel uhhi. Pasian’ nalamdang bawlteng, Zeisu a pumpi mahtawh thokik cihkhawng, nungak siangtho sungpan hongpianna, niguksung bek ah piansakna le a dang tampite uphuai sa nawnlo ta uhhi.

            Aman takin, mihing’ ngaihsutna limlim mawhna in susia khinzo a, Zeisu i ki uksak ding kisam cih i phawk ding kisam hi. Mihing limlim i theihna mial bikbek a, Pasian tawh kigamla hi (Ephessians 4:18). Pasian kammal pan khuavak i kisam hi. Pasian in, eite hong bawllai in, i ngaihsutna mahmah zong Pasian tawh kizomlo liangin suakta lua dingin hong bawllo hi. “Topa kihtakna in pilna kipatna hi” (Paunak 9:10; 1:7) ci zawsop hi. Pasianin hong hilhkholte sang a, Ama’ kammal sungah omin, Laisiangtho sunga kigelhte zuihnopna in, ngaihsutna maantaktak hongpia hi.

            Kum zalom pawlkhatlai in, American President Thomas Jefferson in, Laisiangthothak Ama’ deihbangin bawltawm a, ama’ muhna ah tulai huntawh kituak asaklohte paikhia lianlian hi. Zeisu’ nalamdang bawlteng beita, a thawhkikna zong beisak. Hih bangthu in, mihing ngaihsutna peuhmah ciangtanh omlua cih hong bangci lak hiam?

 

Ningani (Thursday)                                                             April 23

Laisiangtho

            Eite Laisiangtho hong muam honglak Khasiangtho in, Pasian kammalpan lampial dingin cikmah hunin hong makaih ngeilo hi. Seventh-day Adventist-te adingin, Laisiangtho sangin a lian zaw ta’ang upna, phutkhakna, ngaihsutna le ngeina khatzong omlo hi. Laisiangtho bekmah in na khempeuh hong tehsak thei hi.

            John 5:46, 47; le John 7:38 simin. Zeisu bekmah, Khalam dotna hong vengsakthei hi. Zeisu in Messiah ahihna Laisiangtho in bangci gen hiam?

            Mi pawlkhatin Khasiangtho kiang pan a tuamvilvel in “genkholhna” ngahdaan in ki um uh a, ahih hang Laisiangtho tawh ki tukalhgawp hi. Khasiangtho khawng pen Pasian’ kammal sangin liansakzaw pongmawk uhhi. Pasian’ kammal thupisaklo, a thupuakte khawng a pelhte in, Khasiangtho makaihna nuai pan pialkhin uh a, lauhuai mahmah hi. I kha’ galmuanna in Laisiangtho a hihi. Upna leh tatna hekna khempeuh ah i dinsan ding ahihi.

            “Laisiangtho tungtawnin Khasiangtho in i lungsim sungah thuman thutak hong guan hi. Thukhial pholak in lungsim sung pan hong nilkhiatsak hi. Thuman Khasiangtho in, Pasian’ kammal tungtawnin na hong sem a, Khazih in zong mite ama lamah kaai hi”—EGWhite, The Desire of Ages, p. 671.

            Pasian’ kammal pen Khasiangtho khawng tawh mawkkhek keini. Amah’n Laisiangtho tungtawn in Zeisu lamah eite hongzol in, Khalam dinmun pen Laisiangtho bekmah cih hong hilh hi. Laisiangtho in thuman upna hi (1Tim. 4:6) a, Pasian’ kammal in muantakcing, santakcing hi. Laisiangtho tung khawngah thu-mawkkhen keini. Pasian’ thu in eite’ngaihsutna hong ukin, thukhen thei hi. Pasian’ kammal a kigelh ahihi.

           Thudang a kician mello, upmawh thu khawng sangin, Laisiangtho mah a lungmuanhuaina bang omhiam? I thuhilhnate leh khalam thute ah Laisiangtho dinsanin i neihlohna bang lauhuaina piangthei hiam? I khalam thute ah mimal thusuak peuh tawh kalsuan mawk leng, bangzah in lauhuai ding hiam?

           

Kiginni (Friday)                                                                               April 24

Ngaihsutbeh Ding: EGWhite, “The Scriptures a Safeguard” laimai 593–602, The Great Controversy sungpan simin.

            Ta’ang upna, phutkhakthu, ngeina, ngaihsutna leh Laisiangtho cihte in Pasian’thute tungah hong huzaap mahmah hi. Zuau thudotna khatah: Hih atung ateng lakpan, i biakna sungah, koipen in huzaap neipen hiam? Laisiangtho hi i cihpah ding hi a, Khasiangtho na sepna hangin, Laisiangtho in i nuntakzia kheelsak ding hihang.

            “Mihingte hotkhiatna ding a kisam bangbangin, Pasian in Laisiangtho hongpia hi. Tua Laisiangtho pen vangliatna tawh a kidim leh, a khialtheilo Pasian’deihna ahihi. I zia i tong ding hi a, upna thukhun ding leh, i phutkhakte ettel nading ahihi.”—Ellen G. White, the Great Controversy, p. 9.

 

Kikup Ding Dotnate:

 

1. Pasian’ thukham khawng nuntakpih ding, lungsim khempeuh tawh Pasian it ding leh, vengte eimah bangin itding sangin, mihing ta’ang upna khawng nuntakpih, banghang in baihzaw hiam? (Matt. 22:37–40).

 

2. Sunday ni dotna nunungpen kikum kik dihun. Ta’ang upna in pawlsungah bang dinmun la hiam? Biakna taangngeina sungah, thupha leh tona koi tengah kimu hiam?

 

3. Taang upna in bangzah in hoihmahleh, tuate in Pasian’ kammal khengin vangliatna a neihloh na’ng bangci hih ding hiam?

 

4. Mikhat in, Topa’ genkholhna sangin, mang khat manin, Laisiangthothak hun a ding Sunday ni in, tawlngak ni mantaktak hi cih kilak leh, tua mipa thugente na bangci dawn ding a, Pasian’ kammal bekmah tawh kiteh ding cih na koici hilh ding hiam?

 

5. Na pawlpi ki tuiphumzia kikum dih unla: tua ngeina in naupna bangzah huzaap hiam? Taanglai pawlpi tangthu i lehetkik ciangin, ngeina thupisaklua uh a hih manun, a lum a let suak uhhi. Tuabang khialhna i bawl khakloh na’ng, eite bang pilna hongpia naci hiam?